“Онун сааты һәлә чатмамышды”
“Һеч ким Она әл атмады, чүнки Онун сааты һәлә чатмамышды” (ЈӘҺЈА 7:30).
1. Исанын һәрәкәт тәрзи һансы ики амил илә мүәјјән едилир?
“ИНСАН Оғлу Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир” - дејә Иса Мәсиһ һәвариләринә мүраҹиәт едир (Матта 20:28). Рома валиси Понти Пилата исә дејир: “Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим” (Јәһја 18:37). Иса, нәјә ҝөрә өләҹәјини вә өлмәздән габаг һансы иши иҹра едәҹәјини дәгиг билирди. Һәтта о, тапшырығыны јеринә јетирмәк үчүн нә гәдәр вахты олдуғуну да билирди. Мәсиһ ролунда јер үзүндә едәҹәји хидмәт үчүн, она үч ил јарым вахт ајрылмышды. Бу фәалијјәт, габагҹадан хәбәр верилмиш 70 символик һәфтәнин әввәлиндә, јә’ни Исанын Иордан чајында (б. е. 29-ҹу илиндә) вәфтиз олунмасы илә башланмыш вә һәмин һәфтәләрин ортасында (б. е. 33-ҹү илиндә) Исанын дирәк үзәриндә өлдүрүлмәси илә баша чатдырылмышдыр (Даниел 9:24—27; Матта 3:16, 17; 20:17—19). Беләликлә, ҝәлишинин мәгсәди вә сәранҹамында олан вахта даир һәссаслыг, Исанын јер үзүндәки һәрәкәт тәрзини идарә едән ики әсас амил иди.
2. Иса Мәсиһ Инҹилдә неҹә тәсвир олунур вә о, неҹә ҝөстәрди ки, алдығы тапшырығын ваҹиблији барәдә мә’луматы вар?
2 Инҹилдәки мә’луматларда Иса, бүтүн Фәләстиндә ҝәзәрәк Аллаһын Падшаһлығы һаггындакы мүждәни е’лан едән вә бир чох мө’ҹүзәләр ҝөстәрән, фәалијјәтли инсан кими тәсвир едилир. Фәал хидмәтинин башланғыҹына јахын Иса һаггында дејилмишди: “Онун сааты һәлә чатмамышды”. Исанын өзү дә бәјан етди: “Мәним вахтым һәлә тамам ҝәлмәјиб”. Иса өз хидмәтини баша вураркән, “вахт ҝәлди” - деди (Јәһја 7:8, 30; 12:23). Онун,- гурбанлыг өлүмүнү дә дахил етмәклә - алдығы тапшырығы јеринә јетирмәк үчүн ајрылмыш “саат” вә ја вахт барәдә мә’луматы варды. Ҝөрүнүр, бу онун сөјләдији вә етдији ишләрә өз тә’сирини ҝөстәрирди. Буну анлајараг, Исанын шәхсијјәти вә дүшүнҹә тәрзи бизим фикримиздә там ҹанланаҹагдыр. Бу исә, “Онун изләри илә” даһа дәгиг јеримәјимизә көмәк едәҹәкдир (1 Петер 2:21).
Аллаһын ирадәсини јеринә јетирмәјә гәрарлы
3, 4. а) Ганада кечирилән тој мәҹлисиндә нәләр баш верир? б) Аллаһын Оғлу, шәрабын гуртармасы илә әлагәдар Мәрјәмин тәклифинә гаршы нәјә ҝөрә е’тиразыны билдирир вә бундан нә өјрәнә биләрик?
3 Б. е. 29-ҹу илидир. Исанын илк шаҝирдләрини шәхсән сечмәсиндән јалныз бир нечә ҝүн кечиб. Инди онларын һамысы, Галилејанын Гана кәндиндә тоја топлашыблар. Исанын анасы Мәрјәм дә орададыр. Шәраб гуртармаг үзрәдир. Мәрјәм, оғлуна: “Шәраблары јохдур” - дејәрәк, бир тәдбир ҝөрмәсини тәклиф едир. Анҹаг Иса ҹаваб верир: “Гадын, мәндән сәнә нә? Саатым һәлә ҝәлмәјиб” (Јәһја 1:35—51; 2:1—4, И—93).
4 Исанын “Гадын, мәндән сәнә нә?” ҹавабы, гәдимдә ишләнән суал формасыдыр вә мәсләһәт, јахуд тәклиф едилән бир шејә гаршы е’тираз билдирир. Иса нәјә ҝөрә Мәрјәмин сөзләринә е’тираз едир? Онун 30 јашы варды. Ҹәми бир нечә һәфтә габаг о, вәфтиз олунмуш, мүгәддәс руһла мәсһ едилмиш вә Вәфтизчи Јәһја тәрәфиндән “дүнјанын ҝүнаһыны арадан галдыран Аллаһ Гузусу” кими таныдылмышдыр (Јәһја 1:29—34; Лука 3:21—23). Иса бундан сонра рәһбәрлији, јалныз ону ҝөндәрән Али Нүфуз саһибиндән алмалы иди (1 Коринфлиләрә 11:3). Һеч ким, һәтта јахын гоһумлары белә, Исанын јер үзүндә јеринә јетирмәк үчүн ҝәлдији ишә мане олмалы дејилди. Мәрјәмә вердији ҹавабында, Атасынын ирадәсини јеринә јетирмәк үчүн Исанын нә дәрәҹәдә әзмли вә гәрарлы олдуғу әкс олунур! Ҝәлин биз дә, Аллаһын гаршысында олан “вәзифәмизи” ахыра кими јеринә јетирмәк үчүн гәрәрлы олаг (Ваиз 12:13).
5. Иса Мәсиһ Ганада һансы мө’ҹүзәни едир вә бу, диҝәрләринә неҹә тә’сир ҝөстәрир?
5 Оғлунун бу сөзләрлә нә демәк истәдијини анлајараг, Мәрјәм дәрһал кәнара чәкилир вә гуллугчулара ҝөстәриш верир: “Сизә нә десә, ону един”. Иса проблеми һәлл едир. О, гуллугчулара бујурур ки, күпләри су илә долдурсунлар вә сонра сују ә’ла шәраба чевирир. Бунунла да, Исанын, мө’ҹүзәләр ҝөстәрмәк гүввәси илк дәфә ашкар олур, бу исә онун үзәриндә Аллаһын руһу олдуғуна ишарә едир. Мө’ҹүзәни ҝөрдүкдә, јени сечилән шаҝирдләрин иманлары мөһкәмләнир (Јәһја 2:5—11).
Јегованын еви үчүн ҝөстәрилән гејрәт
6. Јерусәлим мә’бәдиндә ҝөрдүјү мәнзәрә Исаны нәјә ҝөрә гәзәбләндирир вә о, нә едир?
6 Тезликлә, б. е. 30-ҹү илинин баһар фәслинин башланғыҹында, Иса јолдашлары илә Јерусәлимә Пасха бајрамына ҝедир. Орада шаҝирдләри, Рәһбәрләринин, бәлкә дә әввәлләр һеч ҝөрмәдикләри тәрздә даврандығынын шаһиди олурлар. Мә’бәдин ортасында аҹҝөз јәһуди таҹирләри гурбан ҝәтирмәк үчүн һејван вә гушлар сатырлар. Онлар, Аллаһын садиг ибадәтчиләриндән чох јүксәк гијмәт тәләб едирләр. Гәзәбдән ҹошан Иса һәрәкәтә башлајыр. О, кәндирдән бир гамчы дүзәлдиб, таҹирләри говур. Ҹәррафларын масаларыны чевирәрәк, пулларыны дағыдыр. Ҝөјәрчин сатанлара исә әмрлә “Бунлары бурадан рәдд един!” - дејир. Исанын шаҝирдләри онун гејрәтли давранышыны ҝөрдүкдә, Аллаһын Оғлу барәдә дејилән пејғәмбәрлији хатырлајырлар: “Сәнин евин үчүн ҝөстәрдијим гејрәт мәни јахыб-јандыраҹаг” (Јәһја 2:13—17; Мәзмур 69:9). Ибадәтимизи натәмиз етмәјә гадир олан дүнјәви тә’сирләрдән биз дә гејрәтлә горунмалыјыг!
7. а) Мәсиһин јанына ҝәлмәјә Накдимону тәһрик едән нә иди? б) Исанын самаријалы гадына шәһадәтлик етмәсиндән биз нә өјрәнә биләрик?
7 Иса Јерусәлимдә гејри ади әламәтләр ҝөстәрир вә бир чохлары она иман етмәјә башлајырлар. Иса, һәтта Синедрионун - Јәһуди али мәһкәмәсинин үзвү олан Накдимонда да тәәссүрат јарадыр вә о, даһа чох мә’лумат алмаг үчүн ҝеҹә Исанын јанына ҝәлир. Сонра Иса, шаҝирдләри илә тәблиғ едәрәк вә шаҝирдләр һазырлајараг, тәхминән сәккиз ај “Јәһудеја дијарында” галыр. Анҹаг Вәфтизчи Јәһја һәбсханаја салындыгдан сонра, онлар Јәһудејаны тәрк едиб Галилејаја ҝедирләр. Онлар Самаријадан кечәркән, Иса, јаранмыш имканы әлдән вермәјиб, самаријалы бир гадына әсаслы шәһадәтлик верир. Бунун сајәсиндә самаријалыларын чоху она иман едир. Ҝәлин биз дә, Падшаһлыг һаггында данышмаг имканларыны әлдән вермәјәк (Јәһја 2:23; 3:1—22; 4:1—42; Марк 1:14).
Галилејада ҝениш мүәллимлик фәалијјәти
8. Галилејада Иса һансы фәалијјәтә башлајыр?
8 Исанын, өлүм “сааты” ҝәлмәздән габаг, сәмави Атасына хидмәтиндә едәҹәји чох иши вар. Иса Галилејада,- Јәһудеја вә Јерусәлимдә етдијиндән даһа әһатәли хидмәтә башлајыр. О, “бүтүн Галилејаны ҝәзәрәк, онларын синагогларында өјрәдиб, Сәмави Сәлтәнәт Мүждәсини тәблиғ едир, халг арасында һәр ҹүр хәстәлик вә нахошлуғу сағалдырды” (Матта 4:23). Онун: “Төвбә един, чүнки Ҝөјләрин Падшаһлығы јахындыр” - дејә сөјләдији тәшвигедиҹи сөзләр бүтүн вилајәтдә сәсләнирди (Матта 4:17, И—93). Бир нечә ајдан сонра, Вәфтизчи Јәһјанын ики шаҝирди Иса һаггында онун өзүндән мә’лумат алмаг үчүн ҝәлдикдә, Иса онлара деди: “Ҝедин, нә ҝөрдүјүнүзү вә ешитдијинизи Јәһјаја билдирин: корлар ҝөрүр, ахсаглар јеријир, ҹүзамлылар сафлашыр, карлар ешидир, өлүләр дирилир вә јохсуллара Мүждә тәблиғ олунур. Вә Мәндән өтрү бүдрәмәјән нә бәхтијардыр!” (Лука 7:22, 23).
9. Халг нәјә ҝөрә Мәсиһ Исанын јанына јығылыр вә бундан һансы дәрси алмаг олар?
9 “Иса һаггындакы хәбәр... бүтүн әтраф вилајәтләрә јајылыр” вә “Галилејадан, Декаполисдән, Јерусәлимдән, Јәһудејадан вә Иордан чајынын о тајындан бөјүк издиһам” онун јанына јығылыр (Лука 4:14, 15; Матта 4:24, 25). Онлары Исанын, јалныз мө’ҹүзәви шәфа вермәси дејил, һәм дә онун валеһедиҹи тә’лими ҹәлб едир. Онун мүждәси ҹәзбедиҹи вә руһландырыҹыдыр (Матта 5:1—7:27). Исанын сөзләри “ләтиф” вә валеһедиҹидир (Лука 4:22). “Халг Онун тә’лиминә тәәҹҹүбләнир”, чүнки о, Мүгәддәс Јазылардан олан фикирләри сәлаһијјәт саһиби кими сөјләјир (Матта 7:28, 29; Лука 4:32). Ахы, белә инсана диггәтини ким ҹәлб етмәз? Ҝәлин биз дә, сәмими гәлбли инсанларын һәгигәтә мараг ҝөстәрмәләри үчүн, тә’лим вермәк габилијјәтимизи инкишаф етдирәк.
10. Назарет сакинләри нәјә ҝөрә Исаны өлдүрмәјә ҹәһд ҝөстәрир вә буна нә үчүн наил ола билмирләр?
10 Анҹаг Исаны динләјәнләрин һамысы һәссас дејилди. Хидмәтинин лап башланғыҹында, доғма шәһәри Назаретдә олан синагогда тә’лим верәркән, Исаны өлдүрмәјә ҹәһд ҝөстәрирләр. Исанын “ләтиф кәламларына” тәәҹҹүбләндикләринә бахмајараг, шәһәр сакинләри мө’ҹүзәләр ҝөрмәк истәјир. Лакин мө’ҹүзә ҝөстәрмәк әвәзинә, Иса онларын мәнфәәтпәрәст вә имансыз олдугларыны ифша едир. Синагогда оланлар гәзәбләнәрәк ајаға галхыр вә Исаны јарғандан ашағы атмаг мәгсәдилә тутуб дағын башына апарырлар. Лакин Иса, әлләриндән чыхараг мүвәффәгијјәтлә онлардан узаглашыр. Онун өлүм “сааты” һәлә ҝәлмәмишдир (Лука 4:16—30).
11. а) Бә’зи дин рәһбәрләри һансы мәгсәдлә Исаны динләмәјә ҝәлирләр? б) Исаны шәнбәни позмагда нә үчүн ҝүнаһландырырлар?
11 Исанын тәблиғ етдији јердә чох вахт дин алимләри, фәрисејләр, садукејләр вә диҝәр дин рәһбәрләри дә олур. Онлардан чоху динләмәјә вә өјрәнмәјә јох, Исада бир нөгсан тапмаға вә ону сөздә тутмаға чалышырлар. (Матта 12:38; 16:1; Лука 5:17; 6:1, 2). Мисал үчүн, б. е. 31-ҹи илиндә Јерусәлимдә кечирилән Пасха бајрамына ҝәлдикдә, Иса, 38 ил хәстә олан адама шәфа верир. Јәһуди дин рәһбәрләри Исаны, шәнбәјә риајәт етмәмәкдә ҝүнаһландырырлар. Иса ҹаваб верир: “Атам индијәдәк ишләмәкдәдир, Мән дә ишләјирәм”. Јәһудиләр исә Исаны күфр данышмагда тагсырландырырлар, чүнки Аллаһы Ата адландырмагла өзүнү Аллаһын Оғлу едир. Онлар Исаны өлдүрмәјә чалышырлар, амма о, шаҝирдләри илә бәрабәр Јерусәлимдән чыхыб Галилејаја ҝедир. Буна бәнзәр шәкилдә, биз дә, бизә гаршы чыханларла ҝәрәксиз тоггушмалардан гачынмалыјыг. Даһа јахшы олар ки, гүввәмизи Падшаһлыг һаггындакы мүждәни тәблиғ етмәјә вә шаҝирдләр һазырламаға сәрф едәк (Јәһја 5:1—18; 6:1).
12. Исанын Галилеја әразисиндәки тәблиғи нә дәрәҹәдә ҝенишдир?
12 Сонракы ил јарым әрзиндә Иса әсасән Галилејада хидмәт едир вә Јерусәлимә јалныз илдә үч дәфә кечирилән јәһуди бајрамына ҝәлир. Үст-үстә ҝәлдикдә, Иса Галилејада үч тәблиғ сәјаһәтиндә олур: биринҹи дәфә - јени сечдији дөрд шаҝирди илә, икинҹи дәфә - он ики һәвариси илә вә нәһајәт, узун мүддәт давам едән сонунҹу сәјаһәти, тә’лим алмыш һәвариләрини тәблиғ хидмәтинә ҝөндәрдији заман олмушдур. Галилејада һәгигәт һаггында неҹә дә ҝениш шәһадәтлик верилир! (Матта 4:18—25; Лука 8:1—3; 9:1—6).
Иса Јәһудеја вә Перејада ҹәсарәтлә шәһадәтлик едир
13, 14. а) Јәһудиләр Исаны нә заман тутмаға чалышырлар? б) Әсҝәрләр нә үчүн Исаны һәбс едә билмирләр?
13 Б. е. 32-ҹи илинин пајыз фәсли башлајыр, Исанын “сааты” һәлә дә габагдадыр. Чадыр бајрамы јахынлашыр. Исанын гардашлары ону тәһрик едиб дејирләр: “Бурадан чыхыб, Јәһудејаја ҝет”. Онлар истәјирләр ки, Иса гејри-ади мөҹүзәләрини Јерусәлимдә бајрама јығыланларын һамысына ҝөстәрсин. Лакин гаршыда ону тәһлүкә ҝөзләдијини биләрәк, Иса гардашларына дејир: “Мән... бу бајрама һәлә ҝетмирәм, чүнки Мәним вахтым һәлә тамам ҝәлмәјиб” (Јәһја 7:1—8).
14 Галилејада бир гәдәр јубандыгдан сонра, Иса “ҝизлиҹә имиш кими” (КМ) Јерусәлимә ҝедир. Јәһудиләр: “О һарададыр?” - сорушараг, Исаны доғрудан да бајрамда ахтарырлар. Бајрамын јарысында Иса мә’бәдә ҝирир вә ҹәсарәтлә тә’лим вермәјә башлајыр. Онлар, јәгин һәбс етмәк вә ја өлдүрмәк мәгсәдилә, Исаны тутмаға чалышырлар. Лакин буна наил ола билмирләр, “чүнки Онун сааты һәлә чатмамышды”. Чохлары Исаја иман етмәјә башлајыр. Һәтта фәрисејләрин ону тутмаг үчүн ҝөндәрдикләри әсҝәрләр дә әли бош гајыдыб, дејирләр: “Инсанлар арасында бу Адам кими данышан әсла олмамышдыр” (Јәһја 7:9—14, 30—46).
15. Нәјә ҝөрә јәһудиләр Исаны дашламаг истәјирләр вә Иса һансы тәблиғ фәалијјәтинә башлајыр?
15 Бајрам заманы Иса өз Атасы һаггында тә’лим верәркән, онунла јәһуди дүшмәнләрин арасында јени мүнагишәләр јараныр. Иса бајрамын ахырынҹы ҝүнү, јер үзүнә ҝәлмәздән әввәл мөвҹуд олдуғу барәдә сөјләјир, дин рәһбәрләри һиддәтләнир вә ону дашламаг истәјирләр. Амма Иса ҝизләнир вә сағ-саламат онлардан гуртулур (Јәһја 8:12—59). Иса Јерусәлимә гајытмајыб, Јәһудејада ҝениш шәһадәтлик фәалијјәтинә башлајыр. О, 70 шаҝирд сечир вә тә’лим вердикдән сонра, онлары һәмән әразидә тәблиғ етмәләри үчүн ики-ики ҝөндәрир. Онлар, Исанын һәвариләри илә ҝедәҹәји һәр бир јерә вә шәһәрә онларын габағынҹа ҝедирләр (Лука 10:1—24).
16. Иса Тәгдис бајрамында һансы тәһлүкәдән гачыр вә јенидән һансы фәалијјәтә башлајыр?
16 Б. е. 32-ҹи илинин гыш фәслидир вә Исанын “сааты” јахынлашыр. О, Јерусәлимә Тәгдис бајрамына ҝәлир. Јәһудиләр һәлә дә ону өлдүрмәјә чалышырлар. Иса мә’бәдин сүтунлары арасында ҝәзәркән, онлар онун әтрафына топлашырлар. Ону јенә дә күфр данышмагда иттиһам едиб, өлдүрмәк мәгсәдилә јердән даш ҝөтүрүрләр. Амма Иса бу дәфә дә гачыр. О, бу һадисәдән тезликлә сонра, тә’лим вермәк үчүн јола дүшүр вә бу дәфә, Иорданын әкс саһилиндәки Перејада, шәһәрдән-шәһәрә вә кәнддән-кәндә ҝедир. Чохлары она иман етмәјә башлајыр. Лакин севимли досту олан Лазарын хәбәри ҝәлдикдә, о, Јәһудејаја гајыдыр (Лука 13:33; Јәһја 10:20—42).
17. а) Иса Перејада тәблиғ едәркән һансы тә’ҹили хәбәри алыр? б) Нәдән ҝөрүнүр ки, Иса едәҹәји ишин мәгсәдини вә һадисәләрин вахтыны билир?
17 Бу тә’ҹили хәбәри, Јәһудејанын Бејтанја кәндиндә јашајан Лазарын баҹылары Марта илә Мәрјәм ҝөндәрмишдиләр. Хәбәр ҝәтирән дејир: “Ја Рәбб, будур, севдијин хәстәдир”. Иса: “Бу хәстәлик өлүмлә нәтиҹәләнмәз, Аллаһ иззәти үчүн, Аллаһын Оғлунун бунунла иззәт газанмасы үчүндүр” - дејә, ҹаваб верир. Бу мәгсәдин һәјата кечмәси үчүн, Иса, олдуғу јердә даһа ики ҝүн галыр. Сонра өз шаҝирдләринә дејир: “Јенә Јәһудејаја ҝедәк”. Онлар шүбһә ичиндә ҹаваб верирләр: “Рабби, бир аз әввәл јәһудејалылар Сәни даша басмаг истәјирдиләр; јенәми ораја ҝедирсән?”. Анҹаг Иса анлајыр ки, онун јер үзүндә хидмәт етмәси үчүн Аллаһын ајырдығы “ҝүнүн сааты” вә ја вахты гысалыб. О, едәҹәји иши вә бу ишин мәгсәдини дәгиг билир (Јәһја 11:1—10).
Инкаредилмәз мө’ҹүзә
18. Иса Бејтанјада ҝәлдикдә һансы вәзијјәти ҝөрүр вә онун ҝәлишиндән сонра нә баш верир?
18 Бејтанјада Исаны биринҹи гаршылајан Марта олур. О дејир: “Ја Рәбб, әҝәр бурада олсајдын, гардашым өлмәзди”. Мәрјәм вә онларын евиндә оланлар да Мартанын архасынҹа ҝәлирләр. Онларын һамысы ағлајыр. Иса сорушур: “Ону һараја гојдунуз?”. Онлар: “Ја Рәбб, ҝәл бах” - дејә ҹаваб верирләр. Гәбирин - ағзында даш гојулмуш мағаранын јанына ҝәлдикдән сонра Иса “Дашы ҝөтүрүн” - дејир. Исанын нә едәҹәјини анламајан Марта е’тираз едир: “Ја Рәбб, артыг гохумушдур, чүнки дөрд ҝүндүр ки, о өлүб”. Анҹаг Иса сорушур: “Сәнә: “Әҝәр иман едәрсәнсә, Аллаһын иззәтини ҝөрәҹәксән”,- демәдимми?” (Јәһја 11:17—40).
19. Лазары дирилтмәздән габаг, Иса нәјә ҝөрә уҹадан дуа едир?
19 Лазарын гәбиринин ағзында олан даш галдырыландан сонра, Иса уҹадан дуа едир ки, инсанлар онун инди едәҹәји ишин, јалныз Аллаһын гүввәси сајәсиндә иҹра олундуғуну билсинләр. Даһа сонра: “Лазар, чөлә чых!” - дејә, јүксәк сәслә гышгырыр. Лазар, ајаглары вә әлләри дәфн сарғылары илә бағлы, үзү исә дәсмал илә сарылмыш һалда чөлә чыхыр. Иса дејир: “Ону ачын вә бурахын ҝетсин” (Јәһја 11:41—44).
20. Лазарын дирилмәсини ҝөрәнләр нә едирләр?
20 Бу мө’ҹүзәни ҝөрдүкдә, Марта илә Мәрјәмә тәсәлли вермәк үчүн ҝәлән јәһудиләрин чоху Исаја иман етмәјә башлајыр. Диҝәрләри исә, баш верән һадисәни сөјләмәк үчүн фәрисејләрин јанына ҝедирләр. Фәрисејләр неҹә мүнасибәт ҝөстәрирләр? Онлар вә баш каһинләр тә’ҹили Синедрион топлајыб, ваһимә ичиндә ҝилејләнәрәк дејирләр: “Нә едәк? Бу Адам бир чох мө’ҹүзәләр ҝөстәрир. Ону белә бурахсаг, һамы Она иман ҝәтирәҹәк; ромалылар да ҝәлиб һәм јеримизи, һәм дә халгымызы јох едәҹәкләр”. Лакин баш каһин Гајафа онлара дејир: “Мәҝәр дүшүнмүрсүнүзмү ки, халг уғрунда бир адамын өлмәси, бүтүн милләтин мәһв олмасындан бизим үчүн даһа јахшыдыр?”. Онлар елә һәмин ҝүндән Исаны өлдүрмәји гәрара алдылар (Јәһја 11:45—53).
21. Лазарын дирилмәси мө’ҹүзәси нәјин башланғыҹыдыр?
21 Беләликлә Иса, Бејтанјаја ҝеҹ ҝәлдији үчүн, инкар едилмәси мүмкүн олмајан бир мө’ҹүзә ҝөстәрмәјә мүвәффәг олур. Иса, Аллаһдан ҝүҹ алараг, артыг дөрд ҝүн өлү олан адамы дирилдир. Буну, мө’ҹүзә Јарадана өлүм һөкмүнү чыхаран мө’тәбәр Синедрион да е’тираф етмәк мәҹбуријјәтиндә галыр! Бу мө’ҹүзә, Исанын хидмәтиндәки әһәмијјәтли дөнүш нөгтәсинин башланғыҹыны, “Онун сааты һәлә чатмајан” замандан, “сааты чатан” замана кечид дөврүнү тәшкил едир.
Сиз неҹә ҹаваб верәрдиниз?
• Иса неҹә ҝөстәрди ки, Аллаһдан верилән ишин әһәмијјәтини анлајыр?
• Иса, анасынын шәраба аид вердији тәклифә нә үчүн е’тираз едир?
• Исанын дүшмәнләри илә дәфәләрлә давранышындан биз нә өјрәнирик?
• Лазарын хәстәләндијини билән Иса нә үчүн јубаныр?
[6-ҹы сәһифәдәки шәкилләр]
Иса гүввәсини, Аллаһдан верилән тапшырығын јеринә јетирилмәсинә һәср едирди