Иса Аллаһын салеһлијини уҹалдыр

«Аллаһ, Мәсиһи Өз ганына иман васитәсилә ҝүнаһ әфв етдирән гурбан тәгдим етди. Бу исә, Аллаһын әдаләтини [«салеһлијини», ЈД] ҝөстәрмәк үчүн иди» (РОМ. 3:25).

1, 2. а) Мүгәддәс Китаб бәшәријјәтин вәзијјәти илә бағлы нә өјрәдир? б) Бу мәгаләдә һансы суаллар мүзакирә олунаҹаг?

ЕДЕН бағында галдырылан вә Мүгәддәс Китабда гәләмә алынан үсјан һамыја јахшы танышдыр. Нөвбәти ајәдә изаһ олундуғу кими, Адәмин ҝүнаһынын тәсирини һәр биримиз өз үзәримиздә һисс едирик: «Неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир» (Ром. 5:12). Нә гәдәр доғру оланы етмәјә чалышсаг да, сәһвләрә јол веририк, буна ҝөрә дә Аллаһын әфвинә еһтијаҹ дујуруг. Һәтта һәвари Павел дә тәәссүфләнәрәк дејирди: «Истәдијим јахшы шеји етмирәм, лакин истәмәдијим пис иши ҝөрүрәм. Нә заваллы адамам!» (Ром. 7:19, 24).

² Бу мәгаләдә нөвбәти ваҹиб суаллары мүзакирә едәҹәјик: бүтүн инсанлар ҝүнаһлы олдуғу һалда, неҹә олду ки, назаретли Иса ҝүнаһы мирас алмады вә о, нәјә ҝөрә вәфтиз олунду? Исанын һәјат тәрзи Јеһованын салеһлијини неҹә уҹалдырды? Ән ваҹиби исә, Мәсиһин өлүмү сајәсиндә нәләрә наил олунду?

Шејтан Аллаһын әдаләт вә салеһлијини шүбһә алтына алды

3. Шејтан Һәвваны јолдан неҹә чыхартды?

³ Улу валидејнләримиз Адәмлә Һәвва ағылсызҹасына Аллаһын али һөкмранлығыны рәдд етмәклә «Иблис вә шејтан адланан... гәдим илан»ын рәһбәрлијини сечдиләр (Вәһј 12:9). Ҝәлин бунун неҹә баш вердијинә нәзәр салаг. Шејтан Јеһова Аллаһын салеһлијини, јәни әдаләтлә идарә етмәсини шүбһә алтына алды. О, Һәввадан сорушду: «Доғруданмы, Аллаһ сизә “бағда олан һеч бир ағаҹын бәһрәләриндән јемәјин” дејиб?» Һәвва Аллаһын вердији ајдын ҝөстәриши тәкрарлајараг деди ки, јалныз бир ағаҹа тохунсалар, өләҹәкләр. Сонра да Шејтан Аллаһы јаланчылыгда иттиһам едиб деди: «Јох, әсла өлмәзсиниз». О, јаланына давам едәрәк Һәвваны Аллаһын онлардан нә исә јахшы бир шеј ҝизләтдијинә инандырды, һәмчинин бу мејвәдән јејәрсә, сечим азадлығына саһиб олараг Аллаһ кими олаҹағыны деди (Јар. 3:1—5).

4. Неҹә олду ки, бәшәријјәт Шејтанын һакимијјәти алтына дүшдү?

⁴ Әслиндә, Шејтан демәк истәјирди ки, бәшәријјәт Аллаһдан асылы олмаса, даһа хошбәхт олар. Адәм Аллаһын әдаләтли һакимијјәтини дәстәкләмәк әвәзинә, арвадына гулаг асды вә она гошулуб гадаған олунмуш мејвәдән једи. Бунунла да Адәм Јеһованын ҝөзүндә камиллији итирди вә бизи ҝүнаһын вә өлүмүн көләлијинә сүрүкләди. Ејни заманда, бәшәријјәт «бу әсрин танрысы» — Шејтан Иблисин һакимијјәти алтына дүшдү (2 Кор. 4:4; Ром. 7:14).

5. а) Јеһова сөзләринин доғру олдуғуну неҹә сүбута јетирди? б) Аллаһ Адәмлә Һәвванын нәслинә һансы үмиди верди?

⁵ Өз сөзүнә садиг галараг Јеһова Адәмлә Һәвваја һөкм чыхарды (Јар. 3:16—19). Лакин бу о демәк дејил ки, Аллаһын нијјәти боша чыхды! Јеһова Адәмлә Һәвваја һөкм чыхараркән онларын ҝәләҹәк нәсли үчүн үмид јери гојду: О, ‘өвладын’ пејда олаҹағыны вә Шејтанын онун дабанындан санҹаҹағыны бәјан етди. Лакин вәд олунмуш Өвладын дабанындакы јара сағалаҹаг вә о, Шејтанын «башындан вураҹаг»ды (Јар. 3:15). Мүгәддәс Китаб бу мөвзуја ајдынлыг ҝәтирәрәк Иса Мәсиһ һаггында нөвбәти сөзләри дејир: «Аллаһын Оғлу... буна ҝөрә зүһур етди ки, иблисин әмәлләрини пуч етсин» (1 Јәһ. 3:8). Бәс Исанын һәјат тәрзи вә өлүмү Аллаһын салеһлијини неҹә уҹалдырды?

Исанын вәфтизинин мәнасы

6. Һарадан билирик ки, Иса Адәмин ҝүнаһыны мирас алмамышды?

⁶ Иса бөјүјүб јеткин инсан оланда ејнилә Адәм кими камил олмалы иди (Ром. 5:14; 1 Кор. 15:45). Бунун үчүн о, дүнјаја камил инсан кими ҝәлмәли иди. Бәс бу неҹә мүмкүн ола биләрди? Ҹәбрајыл мәләк буну Исанын анасы Мәрјәмә ајдын сурәтдә изаһ етди: «Мүгәддәс Руһ сәнин үзәринә ҝәләҹәк вә Һагг-Тәаланын гүдрәти үстүнә көлҝә салаҹагдыр; буна ҝөрә дә, сәндән доғулаҹаг Мүгәддәсә Аллаһын Оғлу дејиләҹәкдир» (Лука 1:35). Еһтимал ки, Иса ушаг оланда Мәрјәм она дүнјаја ҝәлмәси илә әлагәдар мүәјјән мәгамлары ачыгламышды. Буна ҝөрә дә, анасы Мәрјәмлә өҝеј атасы Јусиф ону Аллаһын мәбәдиндә тапанда Иса онлардан сорушду: «Билмирдинизми ки, Мән Атамын евиндә олмалыјам?» (Лука 2:49). Бурадан ҝөрүнүр ки, Иса ушаглыгдан Аллаһын Оғлу олдуғуну билирди. Буна ҝөрә дә, Аллаһын салеһлијини уҹалтмаг онун үчүн бөјүк мәна кәсб едирди.

7. Исанын малик олдуғу ән дәјәрли шејләр нә иди?

⁷ Иса мүнтәзәм олараг ибадәт ҝөрүшләриндә иштирак етмәклә руһани шејләрә дәрин мараг ҝөстәрирди. Мүкәммәл зәкаја саһиб олан Иса, чох еһтимал ки, ешитдикләрини вә Ибраниҹә Мүгәддәс Јазылардан охудугларыны әла мәнимсәјирди (Лука 4:16). О еләҹә дә башга бир гијмәтли шејә — бәшәријјәт уғрунда гурбан верәҹәји камил инсан бәдәнинә малик иди. Вәфтиз олунан заман Иса дуа едир вә ола билсин, Мәзмур 40:6—8 ајәләриндә јазылан пејғәмбәрлик сөзләринин үзәриндә дүшүнүрдү. (Лука 3:21; Ибраниләрә 10:5—10 ајәләрини охуa.)

8. Нәјә ҝөрә Вәфтизчи Јәһја Исанын вәфтиз олунмасына манеә олмаг истәјирди?

⁸ Вәфтизчи Јәһја әввәлҹә Исаны вәфтиздән чәкиндирмәк истәјирди. Чүнки Јәһја јәһудиләри Гануну гаршы ишләтдикләри ҝүнаһларындан төвбә етмәләринин рәмзи олараг вәфтиз едирди. Јәһја Исанын јахын гоһуму олдуғу үчүн, јәгин, онун ҝүнаһсыз олдуғуну вә төвбәјә еһтијаҹы оламадығыны билирди. Иса Јәһјаны әмин етди ки, онун вәфтиз олунмасы дүзҝүндүр. О изаһ етди: «Беләҹә салеһ олан һәр шеји иҹра етмәк бизә јарашар» (Мат. 3:15).

9. Исанын вәфтизи нәјин рәмзи иди?

⁹ Јәгин, Иса билирди ки, камил олдуғу үчүн, Адәм кими, онун да камил өвладлары ола биләр. Лакин Иса һеч вахт белә бир шеји арзуламырды, чүнки бу, Јеһованын онун үчүн олан нијјәтинә дахил дејилди. Аллаһ Исаны јер үзүнә вәд олунмуш Өвлад, јәни Мәсиһ ролуну иҹра етмәк үчүн ҝөндәрмишди. Иса өз камил инсан һәјатыны гурбан вермәли иди. (Јешаја 53:5, 6, 12 ајәләрини оху.) Әлбәттә, Исанын вәфтизи бизим вәфтизимизлә ејни мәна дашымыр. Бура Јеһоваја һәср олунмаг дахил дејилди, чүнки Иса Аллаһа һәср олунмуш Исраил халгынын үзвү иди. Исанын вәфтизи өзүнү Аллаһын ирадәсини јеринә јетирмәјә тәгдим етмәјин рәмзи иди, јәни Мүгәддәс Јазыларда дејилдији кими, о, Мәсиһ үчүн ајрылан ролу иҹра етмәли иди.

10. Мәсиһ үчүн Аллаһын ирадәси нәдән ибарәт иди вә Иса буна неҹә јанашырды?

¹⁰ Јеһова истәјирди ки, Иса Онун Падшаһлығы һаггында хош хәбәри инсанлара тәблиғ етсин, шаҝирд һазырласын вә шаҝирд һазырламаг ишини өз давамчыларына да өјрәтсин. Исанын өзүнү тәгдим етмәси, һәмчинин Јеһова Аллаһын әдаләтли һөкмранлығыны дәстәкләјәрәк тәгибләрә таб ҝәтирмәјә вә амансызҹасына өлдүрүлмәјә һазыр олмасы демәк иди. Иса сәмави Атасыны чох севдији үчүн Аллаһын ирадәсини јеринә јетирмәкдән вә өз бәдәнини гурбан кими тәгдим етмәкдән мәмнунлуг дујурду (Јәһ. 14:31). Ејни заманда бизи ҝүнаһ вә өлүмүн әсарәтиндән гуртармаг үчүн камил һәјатынын дәјәрини Аллаһа тәгдим етмәк имканынын олдуғуну билмәк онун үчүн чох хош иди. Исанын бу бөјүк мәсулијјәтләри иҹра етмәк үчүн өзүнү тәгдим етмәси Аллаһа мәгбул идими? Әлбәттә!

11. Јеһова Исаны вәд олунмуш Мәсиһ кими гәбул етдијини неҹә ҝөстәрди?

¹¹ Мүждәни јазанларын дөрдү дә тәсдиг едир ки, Иса Иордан чајында вәфтиз олунанда Јеһова ондан мәмнун олдуғуну ајдын сурәтдә ифадә етмишди. Вәфтизчи Јәһја дејир: «Руһун ҝөјдән ҝөјәрчин кими ендијини вә Онун [Исанын] үзәринә гондуғуну ҝөрдүм... Мән дә ҝөрүб: “Аллаһын Оғлу Будур”, — дејә шәһадәт етдим» (Јәһ. 1:32—34). Бундан әлавә, Јеһова бәјан етди: «Бу Мәним севимли Оғлумдур, Ондан чох мәмнунам» (Мат. 3:17; Марк 1:11; Лука 3:22).

Өләнәдәк садиглијини горуду

12. Иса вәфтиз олундугдан сонра үч ил јарым әрзиндә нә етди?

¹² Иса һәјатынын нөвбәти үч ил јарымыны инсанлара Атасы вә Онун әдаләтли һөкмранлығы һаггында өјрәтмәјә һәср етди. Бу мүддәт әрзиндә о, Вәд едилмиш дијары гарыш-гарыш ҝәзиб-долашды; бәзән јорулса да, һәгигәтә әтрафлы шәһадәтлик етмәкдән ону һеч нә чәкиндирмирди (Јәһ. 4:6, 34; 18:37). Иса башгаларына Аллаһын Падшаһлығы һаггында өјрәдирди. Мөҹүзәви шәкилдә хәстәләри сағалтмагла, аҹ издиһамы дојуздурмагла, һәтта өлүләри дирилтмәклә Иса Падшаһлығын ҝәләҹәкдә бәшәријјәт үчүн нәләр едәҹәјини нүмајиш етдирди (Мат. 11:4, 5).

13. Иса дуа илә бағлы нә өјрәдирди?

¹³ Иса тәлим вә шәфа вермәк баҹарығы илә гүррәләнмәк әвәзинә, Јеһованы иззәтләндирмәкдә ҝөзәл тәвазөкарлыг нүмунәси гојду (Јәһ. 5:19; 11:41—44). О һәмчинин һансы ваҹиб шејләр барәдә дуа етмәли олдуғумузу да ҝөстәрди. Биз дуаларымыза Јеһова Аллаһын ‘адынын мүгәддәс тутулмасы’, о ҹүмләдән «ҝөјдә олдуғу кими, јердә дә» ирадәсинин олмасы үчүн Онун әдаләтли һөкмранлығынын Шејтанын пис рәһбәрлијини әвәз етмәси барәдә хаһишләри дә дахил етмәлијик (Мат. 6:9, 10). Еләҹә дә Иса бизи дуаларымыза ујғун давранараг Аллаһын Падшаһлығыны вә Онун салеһлијини ахтармаға тәшвиг етди (Мат. 6:33).

14. Камил олмасына бахмајараг, Аллаһын нијјәтиндәки ролуну иҹра етмәк үчүн нәјә ҝөрә Исадан сәј тәләб олунурду?

¹⁴ Ҹаныны гурбан вермәјин вахты јахынлашдыгҹа Иса үзәринә дүшән мәсулијјәтин нә гәдәр ҹидди олдуғуну анлајырды. Атасынын нијјәтинин һәјата кечмәси вә адынын иззәтләнмәси Исанын әдаләтсиз мәһкәмәјә вә амансыз өлүмә таб ҝәтирмәсиндән асылы иди. Өлүмүнә беш ҝүн галмыш Иса: «Инди ҹаным чох сыхылыр; вә нә дејим? Еј Ата, Мәни бу саатдан гуртармы дејим? Елә бу саат үчүн ҝәлдим», — дејә дуа едирди. Бу тәбии инсани һиссләрини ифадә етдикдән сонра о, диггәтини даһа ваҹиб шејә јөнәлдәрәк давам етди: «Еј Ата, адыны иззәтләндир!» Јеһова да дәрһал: «Һәм иззәтләндирдим, һәм дә иззәтләндирәҹәјәм», — дејә ҹаваб верди (Јәһ. 12:27, 28). Бәли, Иса һеч бир инсанын гаршылашмадығы ән ағыр сынагларда белә нөгсансызлығыны горумаға һазыр иди. Бундан әлавә, сәмави Атасынын сөзләри ону даһа да әмин етди ки, о, Јеһованын һөкмранлығыны уҹалтмаға вә она бәраәт газандырмаға мүвәффәг олаҹаг. О, һәгигәтән дә, буна наил олду!

Исанын өлүмү сајәсиндә нәјә наил олунду?

15. Өлүмүндән габаг Иса нәјә ҝөрә: «Тамам олду!» — дејә нида етди?

¹⁵ Иса ишҝәнҹә дирәјиндә ҹан верәрәк: «Тамам олду!» — дејә нида етди (Јәһ. 19:30). О, вәфтиз олундугдан өләнә гәдәр, үч ил јарым әрзиндә Аллаһын көмәјилә, һәгигәтән дә, бөјүк ишләр ҝөрмәјә мүвәффәг олмушду! Исанын өлүмүндән сонра ҝүҹлү зәлзәлә олду. Онун едамында иштирак едән вә еһтимал ки, Аллаһын Оғлу олдуғуну иддиа етдијинә ҝөрә башгаларынын она ришхәнд етдијини ҝөрән Рома забити: «Доғрудан да Бу, Аллаһын Оғлу иди», — дејә етираф етди (Мат. 27:54). Чәкдији бүтүн изтираблара бахмајараг, Иса нөгсансызлығыны горуду вә Шејтанын әсил јаланчы олдуғуну сүбут етди. Шејтан Әјјубун ҝүнләриндә Аллаһын һөкмранлығынын тәрәфини тутан һәр бир инсан һаггында белә бир иттиһам ирәли сүрмүшдү: «Инсан ҹанына ҝөрә һәр шејини верәр» (Әјј. 2:4). Иса садиг галмагла ҝөстәрди ки, Адәмлә Һәвва гаршылашдыглары асан сынаг алтында садигликләрини горуја биләрдиләр. Ән ваҹиби исә, Исанын һәјаты вә өлүмү Јеһованын әдаләтли һөкмранлығыны уҹалдараг она бәраәт газандырды. (Сүлејманын мәсәлләри 27:11 ајәсини оху.) Бәс Исанын өлүмү сајәсиндә даһа нәләрә наил олунду?

16, 17. а) Мәсиһдән өнҹә јашајан хидмәтчиләрини Јеһова нәјин әсасында салеһ сајырды? б) Јеһова садиглијинә ҝөрә Исаны неҹә мүкафатландырды вә Оғул һал-һазырда садиг инсанлар үчүн нә едир?

¹⁶ Исадан өнҹә јер үзүндә Јеһованын чохлу садиг хидмәтчиләри јашамышдыр. Онлар Аллаһын ҝөзүндә салеһ сајылыр вә дирилмәјә үмид едирдиләр (Јешаја 25:8; Дан. 12:13). Бәс мүгәддәс Аллаһ — Јеһова ҝүнаһлы инсанлары нәјин әсасында хејир-дуаландырырды? Мүгәддәс Китабда изаһ олунур: «Аллаһ, Мәсиһи Өз ганына иман васитәсилә ҝүнаһ әфв етдирән гурбан тәгдим етди. Бу исә, Аллаһын әдаләтини ҝөстәрмәк үчүн иди. Чүнки Аллаһ сәбирли олараг, әввәлҹә ишләдилән ҝүнаһлара диггәт јетирмәмишди ки, индики заманда Өз әдаләтини изһар етсин ки, Өзү адил олсун вә Исаја иман едәнә бәраәт версин» (Ром. 3:25, 26)b.

¹⁷ Јеһова Исаны дирилдәрәк јер үзүнә ҝәлмәздән өнҹә саһиб олдуғундан үстүн мөвге вермәклә ону мүкафатландырды. Һал-һазырда Иса иззәтли өлмәз руһани варлыгдыр (Ибр. 1:3). Баш каһин вә Падшаһ олан Ағамыз Иса Мәсиһ давамчыларына Аллаһын салеһлијини уҹалтмагда көмәк едир. Биз сәмави Атамыз Јеһоваја чох миннәтдарыг ки, Оғулу тәглид едәрәк Онун салеһлијини уҹалдан вә сәдагәтлә хидмәт едәнләри мүкафатландырыр. (Мәзмур 34:3; Ибраниләрә 11:6 ајәләрини оху.)

18. Нөвбәти мәгаләдә сөһбәт нәдән ҝедәҹәк?

¹⁸ Һабилин ҝүнләриндән та бу ҝүнә гәдәр садиг инсанлар Јеһованын вәд етдији Өвлада иман едиб онун ҝәләҹәјинә әмин олдуглары үчүн Аллаһла сых мүнасибәтләрә малик идиләр. Јеһова Оғлунун сонадәк садиг галаҹағыны вә өз өлүмү илә «дүнјанын ҝүнаһыны» тамамилә арадан галдыраҹағыны билирди (Јәһ. 1:29). Исанын өлүмү инсанлара бу ҝүн дә фајда ҝәтирир (Ром. 3:26). Бәс Исанын фидјә гурбанлығы сәнә һансы хејир-дуалары ҝәтирә биләр? Бу суал нөвбәти мәгаләдә арашдырылаҹаг.

[Һашијәләр]

Неҹә ҹаваб верәрдиниз?

• Шејтан Аллаһын салеһлијини неҹә шүбһә алтына алды?

• Исанын вәфтизи нәји тәмсил едирди?

• Исанын өлүмү сајәсиндә нәләрә наил олунду?

[9-ҹу сәһифәдәки шәкил]

Исанын вәфтизинин нәји тәмсил етдијини билирсинизми?