Онлар Мәсиһи тапдылар!
«Биз Мәсиһи тапмышыг» (ЈӘҺ. 1:41).
1. Андреасын Мәсиһи тапдыгларыны демәсинә сәбәб нә иди?
ВӘФТИЗЧИ ЈӘҺЈА ики шаҝирди илә јан-јана дурурду. Иса јахынлашанда о нида етди: «Аллаһын Гузусу будур!» Андреас вә башга бир шаҝирд дәрһал Исанын ардынҹа ҝедиб бүтүн ҝүнләрини онунла кечирдиләр. Бир гәдәр сонра Андреас гардашы Шимон Петери тапыб она һәјәҹанла деди: «Биз Мәсиһи тапмышыг», сонра да ону Исанын јанына апарды (Јәһ. 1:35—41).
2. Мәсиһ һагда пејғәмбәрликләри арашдырмаға давам етмәјимиз бизә һансы фајданы ҝәтирәҹәк?
2 Андреас, Петер вә башгаларынын Мүгәддәс Јазылары дәриндән арашдырмаг үчүн чохлу имканлары олду. Әлбәттә ки, бүтүн бунлар назаретли Исанын вәд олунмуш Мәсиһ олдуғуна даир иманларыны мөһкәмләндирди. Мәсиһ барәдә пејғәмбәрликләри арашдырмаға давам етдикҹә Аллаһын Кәламына вә Онун Мәсһ олунмушуна гаршы бизим дә иманымыз мөһкәмләнәҹәк.
«Бах! Сәнин Падшаһын ҝәлир»
3. Иса тәнтәнәли сурәтдә Јерусәлимә дахил оланда һансы пејғәмбәрликләр јеринә јетди?
3 Мәсиһ тәнтәнәли сурәтдә Јерусәлимә дахил олаҹагды. Зәкәријјәнин пејғәмбәрлијиндә дејилмишди: «Еј Сион гызы, бөјүк севинҹлә ҹош, еј Јерусәлим гызы, һајгыр! Бах падшаһын сәнә тәрәф ҝәлир. О, әдаләтли вә хиласкардыр. О, итаәткардыр вә бир ешшәјә — ешшәјин баласы олан сыпаја миниб ҝәлир» (Зәк. 9:9). Мәзмурчу јазмышды: «[Јеһованын] исми илә ҝәләнә алгыш олсун!» (Мәз. 118:26). Бу пејғәмбәрлијин јеринә јетмәси үчүн Иса ҹамаатын һәрәкәтләрини идарә едә билмәзди. Онлар өз истәкләри илә бөјүк севинҹлә ону уҹадан саламлајанда бу пејғәмбәрлији јеринә јетирдиләр. Бу һадисәни охујанда һәмин сәһнәни вә инсанларын севинҹ долу сәсләрини тәсәввүр етмәјә чалышын. (Матта 21:4—9 ајәләрини оху.)
4. Мәзмур 118:22, 23 ајәләринин неҹә јеринә јетдијини изаһ един.
4 Исанын Мәсиһ олдуғуна даир чохсајлы сүбутлар олса да, чохлары ону гәбул етмәјәҹәкди. Бунунла белә, о, Аллаһ үчүн әзиз иди. Онун барәсиндә габагҹадан дејилмишди: «[Сүбутлары ҝөрә-ҝөрә онлара инанмајан] адамлар ондан үз дөндәрди, хор бахды. Биз она гијмәт вермәдик» (Јешаја 53:3; Марк 9:12). Лакин Аллаһ мәзмурчуну нөвбәти сөзләри јазмаға илһамландырмышды: «Бәнналарын рәдд етдији даш ҝушәдашы олуб. Бу, Рәббин иши иди» (Мәз. 118:22, 23). Иса бу ајәләри она дүшмән кәсилән дин рәһбәрләринин диггәтинә чатдырды; Петер исә бу сөзләрин Мәсиһин үзәриндә јеринә јетдијини сөјләди (Марк 12:10, 11; Һәв. иш. 4:8—11). Иса мәсиһчи јығынҹағынын «тәмәл дашы» олду. Аллаһ горхусу билмәјән инсанлар тәрәфиндән рәдд едилмәсинә бахмајараг, Иса Аллаһын сечилмиши иди вә Онун үчүн чох әзиз иди (1 Пет. 2:4—6).
Ону әлә вердиләр вә тәрк етдиләр!
5, 6. Мәсиһин әлә верилмәси илә әлагәдар һансы пејғәмбәрлик сөјләнилмишди вә бу пејғәмбәрлик неҹә јеринә јетди?
5 Габагҹадан дејилмишди ки, јолдашларындан бири Мәсиһи әлә верәҹәк. Давуд пејғәмбәрлик етмишди: «Етибарлы сајдығым ән јахын достум, чөрәјими јејән мәнә хәјанәт етди» (Мәз. 41:9). Киминләсә чөрәк кәсән инсан онун досту һесаб олунурду (Јар. 31:54). Буна ҝөрә дә Јәһуда Искариотун һәрәкәти ән бөјүк хаинликдир. Иса ону әлә верән шәхс һагда һәвариләринә дејәндә Давудун јаздығы нөвбәти пејғәмбәрлијин јеринә јетдијини ҝөстәрди: «Һамынызы нәзәрдә тутмурам, мән сечдијим адамлары таныјырам. Лакин Мүгәддәс Јазыларын: “Мәнимлә чөрәк кәсән мәнә хәјанәт етди”, — сөзләри беләҹә јеринә јетмәлидир» (Јәһ. 13:18).
6 Хаин Мәсиһи 30 ҝүмүшә — гул гијмәтинә әлә верәҹәкди! Зәкәријјә 11:12, 13 ајәләринә әсасланараг Матта ҝөстәрди ки, Иса белә бир ҹүзи, кичик мәбләғә әлә верилди. Бәс нәјә ҝөрә о, бу һадисә һагда «Јеремја пејғәмбәр»ин васитәсилә дејилдијини јазыр? Ҝөрүнүр, Маттанын ҝүнләриндә «Зәкәријјә» китабынын да дахил олдуғу китабларын сырасында «Јеремја» китабы биринҹи јердә дурурду. (Лука 24:44 ајәси илә мүгајисә ет.) Јәһуда әјри јолла газандығы бу пуллары хәрҹләмәјә маҹал тапмады: о, пуллары мәбәдә атды вә ҝедиб интиһар етди (Мат. 26:14—16; 27:3—10).
7. Зәкәријјә 13:7 ајәси неҹә јеринә јетди?
7 Мәсиһин шаҝирдләри пәрән-пәрән олаҹагды. Зәкәријјә јазмышды: «Чобаны вур, гојунлары пәрән-пәрән олсун» (Зәк. 13:7). Ерамызын 33-ҹү илинин нисанын 14-ү Иса шаҝирдләринә демишди: «Бу ҝеҹә башыма ҝәләҹәк һадисәләрә ҝөрә һамыныз мәндән үз дөндәрәҹәксиниз. Чүнки јазылыб: “Чобаны вураҹағам, гојунлар пәрән-пәрән олаҹаг”». Бу, белә дә олду. Матта јазыр: «Шаҝирдләрин һамысы ону [Исаны] гојуб гачдылар» (Мат. 26:31, 56).
Иттиһам олунду вә дөјүлдү
8. Јешаја 53:8 ајәси неҹә јеринә јетди?
8 Мәсиһ мәһкәмә гаршысына ҝәтирилиб мәһкум едиләҹәкди. (Јешаја 53:8 ајәсини оху.) Нисанын 14-ү, сәһәр чағларында бүтүн Синедрион топлашды вә Исанын әл-голуну бағлајыб вали Понти Пилата тәслим етди. Исаны сорғу-суала тутдугдан сонра Пилат онун тамамилә ҝүнаһсыз олдуғуну билдирди. Лакин Пилат Исаны бурахмағы тәклиф едәндә издиһам: «Ону дирәјә мыхла!» — дејә гышгырараг ҹани Бараббаны азад етмәји тәләб етди. Бу адамлары разы салмаг үчүн Пилат Бараббаны азадлыға бурахды, Исаны исә гамчылајыб дирәјә мыхламағы әмр етди (Марк 15:1—15).
9. Мәзмур 35:11 ајәси Исанын үзәриндә неҹә јеринә јетди?
9 Јаланчы шаһидләр мәһкәмәдә Мәсиһә гаршы ифадә верәҹәкдиләр. Мәзмурчу Давуд демишди: «Амансыз шаһидләр галхырлар, јаландан үзүмә дурурлар» (Мәз. 35:11). Бу пејғәмбәрликдә јазылдығы кими, «бөјүк каһинләр вә бүтүн Синедрион Исаны өлүмә мәһкум етмәк үчүн јаланчы шаһидләр ахтарырды» (Мат. 26:59). «Бир чохлары Исанын әлејһинә јаландан шәһадәт верирдиләр, лакин сөзләри бир-бири илә дүз ҝәлмирди» (Марк 14:56). Шаһидләрин јалан данышмасы Исаны өлдүрмәк истәјән гаты дүшмәнләрини һеч нараһат етмирди.
10. Јешаја 53:7 ајәсинин неҹә јеринә јетдијини изаһ един.
10 Мәсиһ иттиһамчылары гаршысында сәссиз олаҹагды. Јешаја пејғәмбәрлик етмишди: «Она зүлм етдиләр, о изтираб чәкди, амма ағзыны ачмады. Кәсилмәјә апарылан гузу кими, гырхымчыларын габағында дилсиз гојун кими ағзыны ачмады» (Јешаја 53:7). «Бөјүк каһинләр вә ағсаггаллар ону иттиһам едәндә Иса ҹаваб вермирди». Пилат она деди: «“Ешидирсән, сәнә гаршы нәләр дејирләр?” Амма Иса сусур, бир кәлмә сөз белә демирди. Вали буна чох тәәҹҹүбләнди» (Мат. 27:12—14). Иса иттиһамчыларыны тәһгир етмирди (Ром. 12:17—21; 1 Пет. 2:23).
11. Јешаја 50:6 вә Микеја 5:1 ајәләри неҹә јеринә јетди?
11 Јешаја пејғәмбәрлик етмишди ки, Мәсиһи дөјәҹәкләр. Биз охујуруг: «Мәни дөјәнләр үчүн белими ачдым, үзүмү саггалымы јоланлара тәрәф узатдым. Тәһгирләрдән, түпүрҹәкләрдән үзүмү ҝизләтмәдим» (Јешаја 50:6). Микеја пејғәмбәр јазмышды: «Исраил һөкмдарынын үзүнә дәјәнәклә вураҹаглар» (Мик. 5:1). Марк бу пејғәмбәрлијин јеринә јетдијини тәсдигләјир: «Бәзиләри Исаја түпүрдүләр, онун үзүнү өртүб јумругламаға башладылар. Онлар дејирдиләр: “Пејғәмбәрсәнсә, сүбут ет! Де ҝөрәк сәни ким вурду?” Мәһкәмә иҹрачылары Исаны силләләјиб апардылар». Марк һәмчинин јазыр ки, әсҝәрләр «гамыш чубугла онун башына дөјәҹләјир, үзүнә түпүрүр, [истеһза илә] гаршысында диз чөкүб тәзим едирдиләр» (Марк 14:65; 15:19). Әлбәттә ки, Иса бу ҹүр рәфтара лајиг дејилди.
Сон нәфәсинәдәк садиг
12. Мәзмур 22:16 вә Јешаја 53:12 ајәләри Исанын үзәриндә неҹә јеринә јетди?
12 Мәсиһин едам едилмәсинин тәфсилатлары һагда габагҹадан хәбәр верилмишди. Мәзмурчу Давуд демишди: «Шәр инсанлар дәстәси мәни дөврәјә алды,.. јан-јөрәми бүрүдүләр, ајагларымы, әлләрими дешдиләр» (Мәз. 22:16). Маркын Мүждәсиндә Мүгәддәс Китабы охујанлара јахшы таныш олан бир һадисә барәдә дејилир: «Ону сәһәр саат доггузда дирәјә мыхладылар» (Марк 15:25). Мәсиһин ганунсузлара тај тутулаҹағы да габагҹадан дејилмишди. Јешаја јазмышды: «О, ҹаныны фәда етди, үсјанкарлара тај тутулду» (Јешаја 53:12). «Иса илә бәрабәр ики гулдуру да дирәјә мыхламышдылар, бири онун сағында, о бириси дә солунда иди» (Мат. 27:38).
13. Мәзмур 22:7, 8 ајәләри Исанын үзәриндә неҹә јеринә јетди?
13 Давуд Мәсиһин тәһгирләрә мәруз галаҹағыны сөјләмишди. (Мәзмур 22:7, 8 ајәләрини оху.) Иса ишҝәнҹә дирәјиндә әзаб чәкәркән тәһгирләрә мәруз галды. Матта јазыр: «Орадан кечәнләр башларыны булаја-булаја ону сөјүр вә дејирдиләр: “Мәбәди дағыдыб үч ҝүнә тикәнә бах! Өзүнү нијә хилас етмирсән? Әҝәр Аллаһын оғлусанса, ишҝәнҹә дирәјиндән дүш!”». Бөјүк каһинләр, мирзәләр вә ағсаггаллар да ону әлә салырдылар: «Башгаларыны хилас едирди, өзүнү исә хилас едә билмир! Әҝәр о, Исраилин Падшаһыдырса, гој ишҝәнҹә дирәјиндән дүшсүн, онда биз она инанарыг! Бәс нә олду, Аллаһа ҝүвәнирди?! “Мән Аллаһын Оғлујам”, — дејирди» (Мат. 27:39—43). Лакин Иса бүтүн бунлара ләјагәтлә таб ҝәтирди. Бу, бизим үчүн неҹә дә ҝөзәл нүмунәдир!
14, 15. Мәсиһин палтары үчүн пүшк атылаҹағы вә она сиркә вериләҹәји һансы ајәләрдә јазылмышды?
14 Мәсиһин палтары үчүн пүшк атылаҹагды. Мәзмурчу јазырды: «Араларында палтарларымы бөлүшдүрүрләр, ҝејимим үчүн пүшк атырлар» (Мәз. 22:18). Бу сөзләр јеринә јетди: Рома әсҝәрләри Исаны «дирәјә мыхладылар вә пүшк атыб әбасыны араларында бөлдүләр». (Мат. 27:35; Јәһја 19:23, 24 ајәләрини оху.)
15 Мәсиһә сиркә вә өд вериләҹәкди. Мәзмурчу демишди: «Мәнә јемәк әвәзинә өд вердиләр, сусајанда сиркә ичиртдиләр» (Мәз. 69:21). Матта јазыр: «Исаја ичинә аҹы бир шеј гатылмыш шәраб вердиләр, амма Иса онун дадына бахыб ичмәди. Онлардан бири гачыб бир сүнҝәр ҝөтүрдү, ону сиркәјә батырыб бир гамышын уҹуна тахды вә ичмәк үчүн она узатды» (Мат. 27:34, 48).
16. Мәзмур 22:1 ајәсиндәки пејғәмбәрлијин неҹә јеринә јетдијини изаһ един.
16 Бәзиләри Аллаһын Мәсиһи тәрк етдијини дүшүнәҹәкдиләр. (Мәзмур 22:1 ајәсини оху.) Пејғәмбәрлијә мүвафиг олараг, «саат үчдә Иса уҹадан: “Ели, Ели, лама сабахтани?” — јәни “Аллаһым, Аллаһым, нијә мәни тәрк етдин?” — деди» (Марк 15:34). Исанын сәмави Атасына олан иманы сарсылмады. Аллаһ Мәсиһ Исадан мүдафиәсини чәкәрәк ону дүшмәнләринә тәслим етди ки, нөгсансызлығы ахырадәк сынансын. Иса өлүмгабағы һәмин сөзләри уҹадан демәклә Мәзмур 22:1 ајәсиндәки пејғәмбәрлији јеринә јетирди.
17. Зәкәријјә 12:10 вә Мәзмур 34:20 ајәләри неҹә јеринә јетди?
17 Мәсиһин бәдәни дешиләҹәкди, лакин онун сүмүкләрини гырмајаҹагдылар. Јерусәлим сакинләри «бәдәнини дешдикләри шәхсә» бахаҹагдылар (Зәк. 12:10). Мәзмур 34:20 ајәсиндә исә дејилир: «Рәбб онларын [«онун», ЈД] һәр бир сүмүјүнү горујур, һеч бири зәдәләнмәз». Бу сөзләри тәсдигләјәрәк һәвари Јәһја јазыр: «Әсҝәрләрдән бири низә илә онун [Исанын] бөјрүнү дешди вә бөјрүндән ган илә су ахды. Бунлары өз ҝөзү илә ҝөрән [Јәһја] шәһадәт едир вә онун шәһадәти доғрудур... Бунлар Мүгәддәс Јазылардакы: “Онун бир сүмүјү белә сынмајаҹаг”, — сөзләри јеринә јетсин дејә баш верди. Мүгәддәс Јазыларын башга јериндә исә јазылыб: “Онлар бәдәнини дешдикләри адама бахаҹаглар”» (Јәһ. 19:33—37).
18. Неҹә олду ки, Иса варлы адамын «јанында» дәфн олунду?
18 Мәсиһ варлы адамын «јанында» дәфн олунаҹагды. (Јешаја 53:5, 8, 9 ајәләрини оху.) Нисанын 14-ү, «ахшам дүшәндә ариматејалы Јусиф адында бир варлы адам» Пилатдан Исанын ҹәсәдини истәди вә онун хаһиши јеринә јетирилди. Матта әлавә едир: «Јусиф Исанын ҹәсәдини ҝөтүрүб ону тәмиз, зәриф кәтана бүрүдү вә гајада ојулмуш тәзә сәрдабәсинә гојду. Јусиф сәрдабәнин ағзына јекә бир даш дијирләди вә чыхыб ҝетди» (Мат. 27:57—60).
Мәсиһ вә Падшаһ олан Исаны алгышлајын!
19. Мәзмур 16:10 ајәсиндәки пејғәмбәрлијә әсасән, нә баш верди?
19 Мәсиһ дириләҹәкди. Давуд јазыр: «[Јеһова,] мәни өлүләр дијарына атмазсан» (Мәз. 16:10). Гадынлар Исанын ҹәсәдинин гојулдуғу мәзара ҝәләндә онларын неҹә тәәҹҹүбләндикләрини тәсәввүр етмәјә чалышын. Онлар инсан симасында бир мәләклә үз-үзә ҝәлдиләр. Мәләк онлара деди: «Тәәҹҹүбләнмәјин. Билирәм, сиз едам едилмиш назаретли Исаны ахтарырсыныз. О, бурада јохдур. О дирилиб. Бујурун, онун гојулдуғу јерә бахын» (Марк 16:6). Һәвари Петер ерамызын 33-ҹү илиндә Әллинҹи ҝүн бајрамына ҝөрә Јерусәлимә ҝәлән ҹамаата мүраҹиәт едәрәк демишди: «[Давуд] Мәсиһин дириләҹәјини, Мәзарда галмајаҹағыны вә бәдәнинин чүрүмәјәҹәјини габагҹадан билиб хәбәр вермишди» (Һәв. иш. 2:29—31). Аллаһ јол вермәди ки, севимли Оғлунун бәдәни чүрүсүн. Үстәлик, Иса мөҹүзәли шәкилдә дирилдиләрәк руһани аләмә гајытды (1 Пет. 3:18).
20. Мәсиһин һөкмранлығы барәдә Мүгәддәс Китабда һансы пејғәмбәрлик јазылыб?
20 Габагҹадан дејилдији кими, Аллаһ Исанын Онун Оғлу олдуғуну бәјан етди. (Мәзмур 2:7; Матта 3:17 ајәләрини оху.) Иса Јерусәлимә дахил оларкән издиһам ону вә онун ҝәләҹәк Падшаһлығыны үрәкдән алгышлајырды. Биз дә бу ҝүн бөјүк севинҹлә онун вә Падшаһлығынын ҝәтирәҹәји хејир-дуалар барәдә данышырыг (Марк 11:7—10). Мәсиһ тезликлә бүтүн дүшмәнләрини мәһв едәҹәк, чүнки о, Мүгәддәс Китабда јазылдығы кими, «һәгигәт, итаәткарлыг вә салеһлик наминә дөјүш арабасына» галхыб (Мәз. 2:8, 9; 45:1—6). Онун Падшаһлығы бүтүн јер үзүнү идарә едәндә сүлһ вә әмин-аманлыг һөкм сүрәҹәк (Мәз. 72:1, 3, 12, 16; Јешаја 9:6, 7). Јеһованын севимли Оғлу Иса Мәсиһ артыг ҝөјләрдә падшаһлыг едир. Јеһованын Шаһиди олмаг вә бу һәгигәтләри бәјан етмәк неҹә дә бөјүк шәрәфдир!
Неҹә ҹаваб верәрдиниз?
• Исаны неҹә әлә вердиләр вә ону кимләр тәрк етди?
• Иса Мәсиһин едам едилмәси илә әлагәдар һансы тәфсилатлар барәдә габагҹадан сөјләнилмишди?
• Исанын вәд олунмуш Мәсиһ олдуғуна сәни әмин едән нәдир?
[13 сәһифәдәки шәкил]
Исанын тәнтәнәли шәкилдә Јерусәлимә дахил олмасы илә һансы пејғәмбәрликләр јеринә јетди?
[15 сәһифәдәки шәкил]
Иса бизим ҝүнаһларымыздан өтрү өлдү, лакин инди ҝөјдә падшаһлыг едир