Һамы Јеһованын иззәтини бәјан етсин
“Иззәти вә гүдрәти Рәббә верин. Исминин иззәтини Рәббә верин” (МӘЗМУР 96:7, 8).
1, 2. Јеһоваја һарадан иззәт верилир вә бу иззәт сәсинә гошулмаға кимләр дә’вәт олунурлар?
ЈЕССЕ оғлу Давуд ҝәнҹ јашларындан Бејтлеһемин әтрафында гојун отарырды. О, атасынын узаг өрүшләрдәки гојун сүрүләринә нөвбә чәкәркән, еһтимал ки, ҝеҹәнин сүкунәтиндә уҹсуз-буҹагсыз улдузлу сәмаја неҹә дә тез-тез нәзәр салырды! Аллаһын мүгәддәс руһу васитәсилә илһамланараг 19-ҹу мәзмурдакы нөвбәти сөзләри јазаркән, шүбһәсиз ки, һәмин ајдын тәәссүратлар онун хәјалында ҹанланырды: “Ҝөјләр Аллаһын иззәтини бәјан едәр; вә ҝөј гүббәси әлләринин ишини е’лан ејләр. Онларын аһәнҝи бүтүн дүнјаја вә сөзләри јерин уҹуна вармышдыр” (Мәзмур 19:1, 4).
2 Дил билмәдән, сөз сөјләмәдән вә һәтта сәс чыхармадан белә, Јеһованын јаратдығы еһтирам ојадан ҝөјләр ҝүндән-ҝүнә, ҝеҹәдән-ҝеҹәјә Онун иззәтини бәјан едир. Јарадылмыш шејләр Аллаһын иззәтини сусмадан бәјан едир вә онларын сәссиз шаһидлијинин ‘бүтүн дүнја’ сакинләринә чатдығына јалныз һәлимликлә нәзәр јетирмәк олар. Лакин јарадылмыш шејләрин сәссиз шаһидлик етмәси кифајәт дејил. Бу шаһидлијә садиг инсанларын да сәси гошулмалыдыр. Ады чәкилмәјән мәзмурчу Јеһованын садиг хидмәтчиләринә бу сөзләрлә мүраҹиәт етмишдир: “Иззәти вә гүдрәти Рәббә верин. Исминин иззәтини Рәббә верин” (Мәзмур 96:7, 8). Јеһова илә јахын мүнасибәтләрә малик оланлар бу дә’вәтә севинҹлә һај верирләр. Бәс Аллаһа иззәт вермәк нә демәкдир?
3. Инсанлар Аллаһа неҹә иззәт верирләр?
3 Аллаһа иззәт вермәк үчүн садәҹә сөз сөјләмәкдән даһа чох шеј тәләб олунур. Ишајанын ҝүнләриндә јашајан исраиллиләр Аллаһа ағызлары илә иззәт верирдиләр, лакин онлардан чоху сәмими дејилдиләр. Јеһова Ишајанын васитәсилә деди: “Бу халг мәнә јахынлашырлар вә ағызлары илә вә додаглары илә мәни сајырлар вә үрәкләрини мәндән узаглашдырырлар” (Ишаја 29:13). Бу ҹүр инсанларын сөјләдикләри һәмд сөзләри мә’насыз иди. Инсан Јеһованы бүтүн үрәји илә севиб, Она мәхсус олан јеҝанә иззәти гәбул етдији һалда һәмд сөзләри әһәмијјәт кәсб едир. Јарадан јалныз Јеһовадыр. О, Күлл-Ихтијар, Әдаләтли, мәһәббәтин тәҹәссүмүдүр. О, хиласымызын мәнбәји, һәмчинин ҝөјдә вә јердә јашајан һәр бир мәхлугун табе олмаға борҹлу олдуғу гануни Һакимидир (Вәһј 4:11; 19:1). Әҝәр биз буна һәгигәтән дә инанырыгса, ҝәлин Ону бүтүн үрәјимизлә иззәтләндирәк.
4. Аллаһы иззәтләндирмәјә даир Иса һансы өјүдләри верди вә биз онлара неҹә риајәт едә биләрик?
4 Иса Мәсиһ бизә Аллаһа иззәт вермәјин үсулуну өјрәтди. О деди: “Атам чох мәһсул вермәнизлә иззәтләнир; беләликлә Мәним шаҝирдләрим олаҹагсыныз” (Јәһја 15:8). Биз һансы тәрздә чох мәһсул веририк? Биринҹиси, “Падшаһлыг һаггында олан” хош хәбәрин тәблиғ едилмәсиндә үрәкдән иштирак едир, бунунла да Аллаһын “ҝөзлә ҝөрүлмәз хүсусијјәтләри”ни бәјан етмәкдә бүтүн мәхлуглара гошулуруг (Матта 24:14, И–93; Ромалылара 1:20). Бундан әлавә, бу ҹүр давранмагла биз бирбаша вә ја долајы јолла, јени шаҝирдләрин һазырланмасында иштирак едирик ки, бунун да сајәсиндә Јеһова Аллаһа иззәт сәсинин даһа уҹадан сәсләнмәси мүмкүн олур. Икинҹиси, мүгәддәс руһун биздә јетишдирдији сәмәрәни инкишаф етдирир вә Јеһова Аллаһын үстүн хүсусијјәтләрини тәглид етмәјә чалышырыг (Галатијалылара 5:22, 23; Ефеслиләрә 5:1; Колослулара 3:10). Бунун нәтиҹәсиндә давранышларымыз Аллаһа иззәт ҝәтирир.
“Бүтүн дүнјаја”
5. Мәсиһчиләрин иманларыны башгалары илә бөлүшмәклә Аллаһа иззәт вермәк мәс’улијјәти дашыдыгларыны Павелин неҹә вурғуладығыны изаһ един.
5 Павел Ромалылара мәктубунда вурғулајырды ки, мәсиһчиләр иманларыны башгалары илә бөлүшмәклә Аллаһа иззәт вермәк мәс’улијјәти дашыјырлар. Ромалылара јазылан мәктубун әсас мәғзи ондадыр ки, јалныз Иса Мәсиһә иман ҝәтирән кәсләр хилас ола биләрләр. Бу мәктубун 10-ҹу фәслиндә Павел гејд едирди ки, “ганунун сону Мәсиһ” олса да, онун ҝүнләриндә олан исраиллиләр һәлә дә Мусанын ганунуна риајәт етмәклә салеһлијә наил олмаға ҹан атырдылар. Буна ҝөрә дә Павел дејирди: “Әҝәр сән ағзынла ачыгҹа “Иса Рәбдир” десән вә Аллаһын Ону өлүләрдән дирилтдијинә үрәјиндә инансан, хилас олаҹагсан”. Һәмин вахтдан е’тибарән “јәһуди илә јунан арасында фәрг” олмады, “чүнки, һамысынын Рәбби бирдир, Ону чағыранларын һамысы үчүн зәнҝиндир. Зира: “Рәббин исмини һәр ким чағырса, хилас олаҹагдыр” (Ромалылара 10:4, 9-13, И–93).
6. Павел Мәзмур 19:4 ајәсини неҹә тәтбиг етмишдир?
6 Сонра Павел мәнтиги суал верир: “Иман етмәдикләри о Кимсәни неҹә чағыраҹаглар? Ешитмәдикләри Кимсәјә неҹә иман едәҹәкләр? Тәблиғ едән јохдурса, неҹә ешидәҹәкләр?” (Ромалылара 10:14, И–93). Исраил һаггында Павел дејир: “Мүждәјә һамы гулаг асмады”. Исраиллиләр нәјә ҝөрә гулаг асмадылар? Она ҝөрә јох ки, имкансыз идиләр, она ҝөрә ки, иманлары јох иди. Павел буну Мәзмур 19:4 ајәсини ситат ҝәтирәрәк ҝөстәрир вә буну јарадылан шејләрин сәссиз шәһадәтинә дејил, мәсиһчиләрин тәблиғ ишинә тәтбиг едир. О дејир: “Әксинә, “онларын сәси бүтүн дүнјаја, онларын сөзләри јерин уҹларына гәдәр чатды” (Ромалылара 10:16, 18, И–93). Ҹансыз варлыглар Јеһоваја иззәт ҝәтирдикләри кими, биринҹи әсрин мәсиһчиләри дә хилас һаггындакы хош хәбәри һәр јердә тәблиғ едир вә бунунла да ‘бүтүн дүнјада’ Аллаһа иззәт ҝәтирирдиләр. Павел Колослулара мәктубунда да хош хәбәрин нә дәрәҹәдә ҝениш јајылдығыны хатырладыр. О дејир ки, хош хәбәр “ҝөј алтында олан һәр мәхлуга тәблиғ едилмишдир” (Колослулара 1:23).
Чалышган Шаһидләр
7. Исанын сөзләринә әсасән мәсиһчиләр һансы мәс’улијјәти дашыјырлар?
7 Павел Колослулара мәктубуну, еһтимал ки, Иса Мәсиһин өлүмүндән тәхминән 27 ил сонра јазмышдыр. Бу ҹүр гыса вахт әрзиндә тәблиғ иши Колос шәһәринә неҹә чатмышды? Бу она ҝөрә баш вермишди ки, биринҹи әсрин мәсиһчиләри чалышган идиләр, Јеһова да онларын сә’јинә хејир-дуа верирди. Иса габагҹадан хәбәр вермишди ки, онун давамчылары фәал тәблиғчиләр олаҹаглар. О демишди: “Әввәлҹә бүтүн халгларда Мүждә тәблиғ едилмәлидир” (Марк 13:10). Бу пејғәмбәрликдән әлавә, Иса “Матта” китабынын сонунҹу ајәләриндә јазылан тапшырығы вермишди: “Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20). Исанын ҝөјә галхмасындан гыса мүддәт сонра, давамчылары онун тапшырығыны јеринә јетирмәјә башладылар.
8, 9. “Һәвариләрин ишләри” китабына әсасән мәсиһчиләр Исанын тапшырығыны неҹә јеринә јетирирдиләр?
8 Ерамызын 33-ҹү илинин Пентикост ҝүнүндә мүгәддәс руһун төкүлмәсиндән сонра Исанын садиг давамчыларынын ҝөрдүкләри биринҹи иш о олду ки, ҝедиб Јерусәлимдәки инсанлара “Аллаһын мөһтәшәм ишләри барәдә” данышараг тәблиғ етдиләр. Онларын тәблиғи ҝүҹлү тә’сир ојатды вә “үч минә јахын адам” вәфтиз олду. Шаҝирдләр дајанмадан халг гаршысында вә сә’јлә Аллаһа иззәт верирдиләр, бу да јахшы сәмәрәләр ҝәтирирди (Һәвариләрин ишләри 2:4, 11, 41, 46, 47).
9 Һәмин мәсиһчиләрин фәалијјәти чох тезликлә дин рәһбәрләринин диггәтини ҹәлб етди. Петерин вә Јәһјанын ҹәсарәтиндән нараһат олараг, онлар бу ики һәваријә тәблиғ етмәмәји тапшырдылар. Һәвариләр ҹаваб вердиләр: “Ешитдијимиз вә ҝөрдүјүмүз шејләри сөјләмәмәјимиз гејри-мүмкүндүр”. Онлары һәдәләјиб, азад етдикдән сонра, Петер вә Јәһја гардашларын јанына гајытдылар вә һамысы бирликдә дуада Јеһоваја үз тутдулар. Онлар мәрдликлә Јеһовадан хаһиш етдиләр: “Өз гулларына гүввә вер ки, Сәнин сөзүнү там ҹәсарәтлә сөјләсинләр” (Һәвариләрин ишләри 4:13, 20, 29).
10. Мәсиһин һәгиги давамчылары һансы мүгавимәтлә гаршылашдылар вә онлар буна неҹә ҹаваб вердиләр?
10 Бир гәдәр сонрадан ајдын олдуғу кими һәмин дуа Јеһованын ирадәсинә мүвафиг иди. Һәвариләр һәбсә алынмыш, сонрадан исә мө’ҹүзәли шәкилдә мәләк тәрәфиндән азад едилмишдиләр. Мәләк онлара демишдир: “Ҝедин вә мә’бәддә дуруб, бу Һәјат барәсиндәки бүтүн сөзләри халга сөјләјин” (Һәвариләрин ишләри 5:18-20). Һәвариләр итаәт ҝөстәрдикләри үчүн Јеһова онлара хејир-дуа вермәјә давам едирди. Онлар “һәр ҝүн мә’бәддә вә евдән-евә тә’лим вермәкдән вә Исанын Мәсиһ олдуғуну мүждәләмәкдән ваз кечмирдиләр” (Һәвариләрин ишләри 5:42). Ҝөрдүјүмүз кими, Исанын давамчыларыны халг гаршысында Аллаһа иззәт вермәкдән јајындырмаг ҹәһдләри һеч бир мүвәффәгијјәт ҝәтирмәди.
11. Еркән мәсиһчиләр тәблиғ ишинә неҹә јанашырдылар?
11 Тезликлә, Стефан һәбсә алынды вә дашланыб өлдүрүлдү. Онун гәтлиндән сонра Јерусәлимдә сәрт тә’гибләр башланды вә һәвариләрдән башга бүтүн шаҝирдләр дағылмаға мәҹбур олдулар. Тә’гибләр онларын сә’јини зәифләтдими? Әсла. Биз охујуруг: “Дағыланлар Аллаһын кәламыны мүждәләјәрәк долашырдылар” (Һәвариләрин ишләри 8:1, 4). Аллаһын иззәтини бәјан етмәк сә’јини тәкрар-тәкрар ҝөрмәк оларды. “Һәвариләрин ишләри” китабынын 9-ҹу фәслиндә Тарсус шәһәриндән олан Шаул адлы фәрисејин Исанын шаҝирдләрини тә’гиб етмәк үчүн Дәмәшг шәһәринә ҝедәркән ҝөрүнмәдә Исанын өзүнү ҝөрмәси вә ҝөзләринин тутулмасы барәдә охујуруг. Дәмәшгдә Һананја мө’ҹүзәли шәкилдә Шаула шәфа верди. Сонрадан һәвари Павел кими танынан Шаул илк нөвбәдә һансы иши ҝөрмәјә башлады? Мүгәддәс Китабда дејилир ки: “Дәрһал синагогларда Иса һаггында тәблиғ етмәјә башлады. “О, Аллаһын Оғлудур”,— дејирди” (Һәвариләрин ишләри 9:20).
Һамысы тәблиғ едирди
12, 13. а) Тарихчиләрин фикринә әсасән еркән мәсиһчи јығынҹағында диггәтәлајиг олан нә иди? б) “Һәвариләрин ишләри” китабы тарихчиләрин фикирләрини неҹә тәсдиг едир?
12 Еркән мәсиһчи јығынҹағынын һәр бир үзвүнүн тәблиғ ишиндә иштирак етдијинә һеч бир шүбһә ојанмыр. Һәмин дөврүн мәсиһчиләри барәсиндә Филип Шаффа јазыр: “Һәр бир јығынҹаг миссионер ҹәмијјәти, һәр бир иманлы исә миссионер иди” (“History of the Christian Church”). У. С. Уилјамс јазыр: “Үмумијјәтлә, тарихи мә’луматлар шаһидлик едир ки, еркән Килсәјә мәхсус олан бүтүн мәсиһчиләр, хүсусән дә фөвгәлтәбии ән’амлара [руһун ән’амларына] малик оланларын һамысы мүждәни тәблиғ едирдиләр” (“The Glorious Ministry of the Laity”). О, һәмчинин тәсдиг едир: “Иса Мәсиһ һеч бир вәҹһлә билдирмирди ки, тәблиғ етмәк мүәјјән тәбәгәјә мәхсус олан руһаниләрин үстүнлүјүдүр”. Һәтта гәдимдә јашајан вә мәсиһчилијин дүшмәни олан Селс јазырды “Јунчырпанлар, чәкмәчиләр, кечәчиләр, ән савадсыз вә садә инсанлар мүждәни сә’јлә тәблиғ едирдиләр”.
13 Бу фактларын дәгиглији “Һәвариләрин ишләри” китабында јазылан тарихи фактларла сүбут олунур. Ерамызын 33-ҹү илинин Пентикост ҝүнүндә мүгәддәс руһун төкүлмәсиндән сонра шаҝирдләрин һамысы, кишиләр вә гадынлар, Аллаһын мөһтәшәм ишләрини халг гаршысында бәјан етмәјә башладылар. Мәсиһчиләр Стефанын гәтлиндән сонра башланан тә’гибләр уҹбатындан башга шәһәрләрә дағыланда, онларын һамысы һәр јердә хош хәбәри јајырдылар. Тәхминән 28 ил сонра Павел јалныз кичик бир руһани синфинә дејил, јәһудиләрдән олан бүтүн мәсиһчиләрә нөвбәти сөзләри јазмышды: “Һәмишә Иса васитәсилә Аллаһа һәмд гурбаныны, јә’ни Онун адыны играр едән додагларын бәһрәсини тәгдим едәк” (Ибраниләрә 13:15). Павел тәблиғ ишинә олан мүнасибәтини тәсвир едәрәк јазырды: “Әҝәр Мүждәни тәблиғ едирәмсә, ифтихар етмәјә һаггым јохдур; чүнки бу, мәним зәрури вәзифәмдир вә әҝәр тәблиғ етмирәмсә, вај һалыма!” (1 Коринфлиләрә 9:16). Еһтимал ки, I әсрин бүтүн садиг мәсиһчиләри онун фикринә шәрик идиләр.
14. Тәблиғ иши иманла неҹә әлагәлидир?
14 Доғрудан да, Мәсиһин һәгиги давамчысы тәблиғ ишиндә иштирак етмәлидир, чүнки бу, иманла бирбаша әлагәлидир. Павел демишдир: “Салеһлик үчүн үрәклә иман едилир, хилас олмаг үчүн исә ағызла ачыгҹа сөјләнир” (Ромалылара 10:10, И–93). Јығынҹағын дахилиндә — руһани синфи кими — јалныз кичик бир групму иман ҝәтирир вә тәблиғ етмәк мәс’улијјәти дашыјыр? Сөзсүз ки, јох! Мәсиһин һәгиги давамчыларынын һамысы Рәбб Иса Мәсиһә ҹанлы иман инкишаф етдирир вә бу иманы халг гаршысында башгаларына бәјан етмәјә тәшвиг һисси дујурлар. Әкс тәгдирдә онларын иманы өлү оларды (Јагуб 2:26). Ерамызын I әсриндәки бүтүн садиг мәсиһчиләр иманларыны бу ҹүр тәзаһүр етдирдикләринә ҝөрә, јер үзүндә Јеһованын адына һәмд сәси уҹадан ешидилирди.
15, 16. Проблемләрә бахмајараг, тәблиғ ишинин инкишаф етдијини нүмунәләр әсасында ҝөстәрин.
15 Ерамызын I әсриндә јығынҹағын хариҹиндә вә дахилиндә олан проблемләрә бахмајараг, Јеһова Өз халгына артымла хејир-дуа верирди. Мәсәлән, “Һәвариләрин ишләри” китабынын 6-ҹы фәслиндә мәсиһчилији гәбул едән јунанҹа вә ибраниҹә данышанлар арасында јаранан фикир ајрылығы барәсиндә јазылыр. Һәвариләр бу проблеми јолуна гојдулар. Нәтиҹә барәсиндә охујуруг: “Аллаһын кәламы вүс’әт алырды вә Јерусәлимдә шаҝирдләрин сајы хејли артырды. Каһинләрдән бир чоху да имана сарылырды” (Һәвариләрин ишләри 6:7).
16 Бир гәдәр сонра Јәһудеја һөкмдары Һирод Агриппа илә Сур вә Сајда сакинләри арасында сијаси ҝәрҝинлик јаранды. Сурлулар вә сајдалылар јалтаглыг едәрәк сүлһ јаратмаға чалышырдылар вә ҹаваб олараг Һирод нитглә чыхыш етди. Топлашан халг гышгырмаға башлады: “Инсан јох, Аллаһ сәсидир”. Елә һәмин ан Јеһованын бир мәләји Һироду вурду, о да өлдү, “чүнки иззәти Аллаһа вермәмишди” (Һәвариләрин ишләри 12:20-23, И–93). Инсан һакимләринә бел бағлајанлар үчүн неҹә дә бөјүк сарсынты иди! (Мәзмур 146:3, 4). Мәсиһчиләр исә Јеһованы иззәтләндирмәјә давам едирдиләр. Бу сәбәбдән, “Аллаһын кәламы... вүс’әт алыб, јајылырды” (Һәвариләрин ишләри 12:24).
О заман вә инди
17. Ы әсрдә сајҹа артмаға давам едән инсанлар нә етмәјә башлајырдылар?
17 Бәли, I әсрин үмумдүнја мәсиһчи јығынҹағынын бүтүн үзвләри сә’јлә вә фәал сурәтдә Јеһова Аллаһа һәмд едирдиләр. Садиг мәсиһчиләрин һамысы хош хәбәри јајмаг ишиндә иштирак едирдиләр. Ким исә һәссас инсанларла гаршылашыр вә онлары Исанын тапшырдығы һәр шејә риајәт етмәјә өјрәдирдиләр (Матта 28:19, 20). Нәтиҹәдә, јығынҹаг бөјүјүр вә ҝетдикҹә даһа чох инсанлар гәдим дөврдә јашамыш Давуд падшаһ кими Јеһоваја һәмд етмәјә башлајырды. Һамысы илһамланмыш сөзләри тәкрар едирди: “Ја Рәбб Аллаһым, бүтүн үрәјимлә сәнә һәмд едәрәм; чүнки мәнә гаршы инајәтин бөјүкдүр” (Мәзмур 86:12, 13).
18. а) I әсрин мәсиһчи јығынҹағы илә буҝүнкү Христиан дүнјасы арасында һансы фәрг нәзәрә чарпыр? б) Нөвбәти мәгаләдә нә мүзакирә олунаҹагдыр?
18 Бунунла әлагәдар илаһијјат профессору Елиссон Трајтсын сөзләри дүшүнмәјә тәшвиг едир. О, Мүасир Христиан дүнјасыны I әсрин мәсиһчилији илә мүгајисә едәрәк демишдир: “Бу ҝүн килсәләр адәтән тәбии артым (килсә үзвләринин ушаглары һәмин дини гәбул едәндә) вә ја бир јердән башга јерә көчмәк һесабына (килсәнин үзвү башга килсәјә мәхсус әразијә көчүрсә) сајҹа артыр. Лакин “Һәвариләрин ишләри” китабында тәсвир едилән јығынҹаг бу дини јени гәбул едәнләрин һесабына артырды, белә ки, һәмин јығынҹаг өз фәалијјәтинә јени башлајырды”. Бу о демәкдирми ки, һәгиги мәсиһчилик артыг Исанын дедији јолла артмыр? Шүбһәсиз ки, јох. Мәсиһин һәгиги давамчылары ејни илә, I әсрин мәсиһчиләринин етдији кими, бу ҝүн халг гаршысында Аллаһа сә’јлә һәмд едирләр. Биз буну нөвбәти мәгаләдән ҝөрәҹәјик.
Изаһ едә биләрсинизми?
• Биз Аллаһы һансы үсулларла иззәтләндиририк?
• Павел Мәзмур 19:4 ајәсини неҹә тәтбиг етди?
• Тәблиғ иши иманла неҹә әлагәлидир?
• Биринҹи әсрин мәсиһчи јығынҹағында диггәтәлајиг олан нә иди?
[16-ҹы сәһифәдәки шәкилләр]
Тәблиғ иши дуа илә сых бағлыдыр.