«Мәним достларымсыныз»

«Әҝәр сизә әмр етдијим шејләрә әмәл етсәниз, Мәним достларымсыныз» (ЈӘҺ. 15:14).

1, 2. а) Исанын достлары һансы мүхтәлиф мәншәләрә мәнсуб идиләр? б) Иса илә дост олмаг нәјә ҝөрә олдугҹа ваҹибдир?

ИСА илә бирҝә јухары отагда отуран инсанлар мүхтәлиф мәншәли инсанлар иди. Петер вә Андреј гардашлары балыгчы идиләр. Матта јәһудиләрин нифрәтлә јанашдыглары бир пешә саһиби — кечмиш верҝијыған иди. Ҝөрүнүр, онлардан бәзиләри, Јагубла Јәһја Исаны ушаглыгдан таныјырдылар. Диҝәрләри исә, мәсәлән, Натанел онунла ҹәми бир нечә ил иди ки, таныш иди (Јәһ. 1:43-50). Лакин Јерусәлимдә мүһүм Пасха ҝеҹәсинә топлашанларын һамысы әмин идиләр ки, Иса вәд едилмиш Мәсиһ, јашајан Аллаһын Оғлудур (Јәһ. 6:68, 69). Јәгин, Исанын: «Сизә дост дедим, чүнки Атамдан ешитдијим бүтүн шејләри сизә билдирдим»,— сөзләрини ешитмәк онлара чох хош иди (Јәһ. 15:15).

² Исанын садиг һәвариләринә дедији бу сөзләр бу ҝүн бүтүн мәсһ олунмуш мәсиһчиләрә, ҝениш мәнада исә онларын һәмкарлары олан ‘башга гојунлара’ аиддир (Јәһ. 10:16). Мәншәјимиздән асылы олмајараг, һәр биримиз Исанын досту олмаг шәрәфинә малик ола биләрик. Бизим үчүн онунла дост олмаг һәр шејдән ваҹибдир, чүнки онунла достлуг Јеһова илә дә дост олмаг демәкдир. Әслиндә, Мәсиһә јахынлашмадан Јеһова илә дост олмаг мүмкүн дејил. (Јәһја 14:6, 21 ајәләрини оху.) Бәс Иса илә дост олмаг вә бу достлуғу итирмәмәк үчүн биз нә етмәлијик? Бу ваҹиб мөвзуја кечмәздән өнҹә, ҝәлин Исанын бир дост кими гојдуғу ҝөзәл нүмунәјә диггәт јетирәк вә ҝөрәк, онун шаҝирдләринин бу достлуға һај вермәләриндән нә өјрәнә биләрик.

Јахшы дост олмаға даир Исанын гојдуғу нүмунә

3. Иса неҹә инсан кими танынырды?

³ Мүдрик падшаһ Сүлејман јазмышдыр: «Зәнҝини... чох адам севәр» (Сүл. мәс. 14:20). Бу мүшаһидә гејри-камил инсанларын достлуғунун чох вахт нәјә әсасландығыны үзә чыхарыр: онлар башгаларынын јох, өзләринин мәнфәәтини ҝүдүрләр. Лакин Иса дост сечиминә бу ҹүр јанашмырды. Инсанын мадди вә сосиал вәзијјәти онун үчүн һеч бир әһәмијјәт кәсб етмирди. Дүздүр, бир дәфә зәнҝин ҝәнҹ рәис Исанын үрәјинә јатмышды вә о, ону өз ардынҹа ҝетмәјә дәвәт етмишди. Лакин Иса һәмин ҝәнҹә нәји варса сатмағы вә јохсуллара пајламағы мәсләһәт ҝөрмүшдү (Марк 10:17-22; Лука 18:18, 23). Иса варлы вә адлы-санлы инсанларла отуруб-дуран адам кими јох, ашағы тәбәгәдән оланларын вә нифрәт едиләнләрин досту кими танынырды (Мат. 11:19).

4. Нәјә ҝөрә демәк олар ки, Исанын достларынын чатышмајан ҹәһәтләри вар иди?

⁴ Әлбәттә, Исанын достларынын чатышмајан ҹәһәтләри дә вар иди. Бир дәфә Петер бир мәсәләјә руһани нөгтеји-нәзәрдән јанашмамышды (Мат. 16:21-23). Јагуб вә Јәһја Исадан онлара Падшаһлыгда нүфузлу мөвге вермәсини истәмәклә шөһрәтпәрәстлик руһу ҝөстәрмишдиләр. Онларын бу һәрәкәти диҝәр һәвариләри гәзәбләндирмиш вә кимин даһа јүксәк мөвгејә лајиг олмасы мәсәләси араларында даими мүбаһисәләрә чеврилмишди. Лакин Иса сәбирлә достларынын дүшүнҹә тәрзини дүзәлтмәјә чалышыр вә дәрһал өзүндән чыхмырды (Мат. 20:20-28).

5, 6. а) Нәјә ҝөрә Иса һәвариләринин әксәријјәти илә достлуг етмәјә давам едирди? б) Иса Јәһуда илә достлуғуну нәјә ҝөрә кәсди?

⁵ Исанын гејри-камил инсанларла достлуғуну кәсмәмәсинин сәбәби һәддән артыг јумшаг олмасы вә ја онларын сәһвләрини ҝөрмәмәси дејил, әксинә, диггәтини онларын нијјәтләринин јахшы олмасына вә мүсбәт кејфијјәтләринә јөнәлтмәси иди. Мәсәлән, Исанын ән ағыр сынаглары заманы Петер, Јагуб вә Јәһја она дајаг олмаг әвәзинә, јухуја ҝетмишдиләр. Иса мәјус олса да, онлара анлајышла јанашды вә нијјәтләринин пис олмадығыны ҝөрәрәк деди: «Руһ гејрәтли, бәдән исә зәифдир» (Мат. 26:41).

⁶ Бунун әксинә олараг, Иса Јәһуда Искарјотла достлуғуну кәсди. Јәһуда өзүнү Исанын досту кими гәләмә версә дә, Иса бир вахтлар јахын досту олан Јәһуданын үрәјиндә пис нијјәтләр јарандығыны ҝөрүрдү. Дүнја илә достлуғу Јәһуданы Аллаһын дүшмәнинә чевирди (Јаг. 4:4). Буна ҝөрә дә Иса галан 11 садиг һәварисини дост адландыранда артыг Јәһуда онларын арасында дејилди (Јәһ. 13:21-35).

7, 8. Иса достларына олан мәһәббәтини неҹә тәзаһүр етдирди?

⁷ Иса диггәтини һеч вахт садиг достларынын сәһвләринә ҹәмләмир вә һәмишә онларын рифаһынын гајғысына галырды. Мәсәлән, о, дуада Атасындан хаһиш едирди ки, сынаглар заманы онлары горусун. (Јәһја 17:11 ајәсини оху.) Иса онларын физики мәһдудијјәтләрини нәзәрә алырды (Марк 6:30-32). О, јалныз өз фикирләрини ирәли сүрмүрдү, һәмчинин достларыны динләјир вә онларын фикирләрини вә һиссләрини баша дүшмәјә чалышырды (Мат. 16:13-16; 17:24-26).

⁸ Иса өз достлары үчүн јашады, достлары үчүн дә өлдү. Дүздүр, о билирди ки, һәјатыны гурбан вермәји Атасынын әдаләт нормалары тәләб едир (Мат. 26:27, 28; Ибр. 9:22, 28). Анҹаг ону һәјатыны гурбан вермәјә тәшвиг едән мәһәббәт олмушду. Иса демишди: «Һеч кимдә, бир нәфәрин достлары уғрунда ҹаныны вермәсиндән даһа бөјүк мәһәббәт јохдур» (Јәһ. 15:13).

Шаҝирдләр Исанын достлуғуна неҹә һај верирдиләр?

9, 10. Инсанлар Исанын сәхавәтлилијинә неҹә һај верирдиләр?

⁹ Иса вахтыны, мәһәббәтини вә малик олдуғу шејләри башгалары илә сәхавәтлә бөлүшүрдү. Бу, инсанлары она ҹәлб едир вә онлары гаршылыглы ҹаваб вермәјә тәшвиг едирди (Лука 8:1-3). Исанын шәхси тәҹрүбәси ону нөвбәти сөзләри демәјә тәшвиг етмишди: «Верин, сизә дә вериләҹәкдир: өлчүлүб-бичилмиш, силкәләниб-басылмыш, долуб-дашмыш, бол бир өлчү илә сизин әтәјинизә төкүләҹәкдир; чүнки һансы өлчү илә өлчсәниз, о өлчү илә дә сизә өлчүләҹәкдир» (Лука 6:38).

¹⁰ Әлбәттә, бәзиләри өз мәнфәәтләрини ҝүддүкләри үчүн Иса илә достлуг етмәјә чалышырды. Бу јаланчы достлар онун дедији бәзи шејләри баша дүшмәјәндә ону тәрк етдиләр. Исаја етибар етмәк әвәзинә, јанлыш гәнаәтә ҝәлиб она арха чевирдиләр. Һәвариләр исә она садиг галдылар. Онларын Мәсиһлә достлуғу тез-тез сынаға чәкилсә дә, онлар һәм јахшы, һәм дә пис анларында она дајаг олмаг үчүн әлләриндән ҝәләни едирдиләр. (Јәһја 6:26, 56, 60, 66-68 ајәләрини оху.) Јер үзүндәки һәјатынын сон ҝеҹәси Иса достларыны нә гәдәр чох гијмәтләндирдијини ҝөстәрәрәк деди: «Кечирдијим сынагларда Мәнимлә бәрабәр оланлар сизсиниз» (Лука 22:28).

11, 12. Иса шаҝирдләрини нәјә әмин етди вә онлар буна неҹә һај вердиләр?

¹¹ Иса шаҝирдләрини садигликләринә ҝөрә тәрифләдикдән бир гәдәр сонра һәмин адамлар ону тәрк етдиләр. Тезликлә онлар јол вердиләр ки, инсан горхусу Мәсиһә олан мәһәббәтләрини үстәләсин. Иса јенә дә онлары бағышлады. Аллаһ ону дирилтдикдән сонра о, шаҝирдләринә ҝөрүнәрәк онлары бир даһа өз достлуғуна әмин етди. Үстәлик, онлара мүгәддәс бир тапшырыг верди: ‘бүтүн халглардан шаҝирд’ һазырламағы вә ‘дүнјанын ән узаг јерләринә гәдәр она шаһид олмағы’ һәвалә етди (Мат. 28:19; Һәв. иш. 1:8). Шаҝирдләр буна неҹә һај вердиләр?

¹² Онлар Падшаһлыг һаггында хош хәбәри ҹанла-башла бәјан етмәјә башладылар. Јеһованын мүгәддәс руһунун көмәји сајәсиндә онлар тәлимләрини Јерусәлимин һәр јеринә јајдылар (Һәв. иш. 5:27-29). Һәтта өлүм тәһлүкәси белә онлары Исанын шаҝирд һазырламаг әмринә табе олмагдан чәкиндирә билмәди. Исадан бу тапшырығы аландан ҹәми бир нечә ониллик кечдикдән сонра һәвари Павел јазмышды ки, хош хәбәр «ҝөј алтында олан һәр мәхлуга тәблиғ едилмишдир» (Колос. 1:23). Бәли, бу шаҝирдләр сүбут етдиләр ки, онлар Иса илә достлугларыны гијмәтләндирирләр!

13. Шаҝирдләр Исанын тәлимләринин онлара тәсир етмәсинә неҹә јол верирдиләр?

¹³ Һәмчинин Исанын јени шаҝирдләри дә јол верирдиләр ки, онун тәлимләри һәјатларына тәсир етсин. Чохлары үчүн бу, давраныш вә хасијјәтләриндә бөјүк дәјишикликләр етмәк демәк иди. Јени шаҝирдләрдән бәзиләри вахтилә һомосексуалист, зинакар, әјјаш вә оғру олмушдулар (1 Кор. 6:9-11). Диҝәрләринә исә башга милләтләрдән олан инсанлара гаршы мүнасибәтләрини дәјишмәк лазым ҝәлмишди (Һәв. иш. 10:25-28). Бунунла белә, онлар Исаја табе олдулар. Онлар көһнә мәнликләрини кәнара атыб јени мәнлији ҝејиндиләр (Ефес. 4:20-24). Онлар «Мәсиһин ағлына» јијәләндиләр, јәни онун дүшүнҹә вә давраныш тәрзини баша дүшүб ону тәглид етмәјә башладылар (1 Кор. 2:16).

Иса илә бу ҝүн неҹә дост ола биләрик?

14. Иса ‘дөврүн сонуна’ даир нә вәд етмишди?

¹⁴ Биринҹи әсрдә јашајан мәсиһчиләр Исаны ја шәхсән таныјырдылар, ја да ону дирилдикдән сонра ҝөрмүшдүләр. Ајдындыр ки, бизим һеч вахт белә бир имканымыз олмајыб. Бәс онда биз Мәсиһлә неҹә дост ола биләрик? Үсуллардан бири Исанын һәлә јер үзүндә јашајан руһла мәсһ олунмуш гардашларындан ибарәт садиг вә ағыллы гул синфинин ҝөстәришләринә табе олмагдыр. Иса вәд етмишди ки, ‘дөврүн сонунда’ о, бу гула ‘бүтүн маликанәсинин идарәсини тапшыраҹаг’ (Мат. 24:3, 45-47). Бу ҝүн Мәсиһлә дост олмаг истәјән инсанларын әксәријјәти гул синфинә дахил дејил. Бәс садиг гул синфиндән алдыглары ҝөстәришләрә һај вермәләри онларын Мәсиһлә достлуғуна неҹә тәсир ҝөстәрир?

15. Инсанын гојун вә ја кечи синфинә аид олдуғуну нә һәлл едәҹәк?

¹⁵ Матта 25:31-40 ајәләрини оху. Иса садиг гул синфини тәшкил едәҹәк кәсләри гардаш адландырды. Гојунларын кечиләрдән ајрылмасы мәсәлиндә Иса ајдын ҝөстәрир ки, о, гардашларына олан мүнасибәти шәхсән өзүнә ҝөстәрилән мүнасибәт кими гијмәтләндирир. Бунунла Иса демәк истәјирди ки, бу сечимдә һәлледиҹи амил һәр бир инсанын онун һәтта ‘ән кичик гардашларындан бири’ илә неҹә давранмасы олаҹаг. Буна ҝөрә дә, јерүзү үмидинә малик олан вә Мәсиһлә дост олмаг истәјән һәр бир инсан, илк нөвбәдә, онун садиг гул синфини дәстәкләмәлидир.

16, 17. Мәсиһин гардашлары илә дост олдуғумуз нәдән бәлли олаҹаг?

¹⁶ Әҝәр сән Аллаһын Падшаһлығынын рәһбәрлији алтында јер үзүндә јашамаг үмидинә маликсәнсә, Мәсиһин гардашлары илә дост олдуғуну неҹә ҝөстәрә биләрсән? Ҝәл бунун үч үсулуну нәзәрдән кечирәк. Үсуллардан бири сәмими-гәлбдән тәблиғ ишиндә иштирак етмәкдир. Мәсиһ гардашларына хош хәбәри бүтүн дүнјада тәблиғ етмәји тапшырыб (Мат. 24:14). Амма һәмкарлары олан башга гојунларын көмәји олмасајды, Мәсиһин јер үзүндә галан гардашларына бу иши јеринә јетирмәк чәтин оларды. Һәгигәтән дә, башга гојунлар синфинин үзвләри һәр дәфә тәблиғ ишиндә иштирак едәндә Мәсиһин гардашларына мүгәддәс тапшырыгларыны иҹра етмәкдә көмәк едирләр. Мәсиһ кими, садиг вә ағыллы гул синфи дә достларынын онлара бу саһәдә ҝөстәрдикләри көмәји чох гијмәтләндирир.

¹⁷ Башга гојунлар тәблиғ ишини көнүллү ианәләрлә дәстәкләмәклә дә Мәсиһин гардашларына көмәк едирләр. Иса давамчыларыны өзләринә ‘јалан мамонла достлар газанмаға’ тәшвиг едирди (Лука 16:9). Бу о демәк дејил ки, биз Исанын вә ја Јеһованын достлуғуну сатын ала биләрик. Әксинә, Падшаһлығын марагларынын ирәлиләмәси үчүн мадди имканларымыздан истифадә етмәклә өз достлуғумузу вә мәһәббәтимизи садәҹә сөзлә јох, «әмәллә вә һәгигәтлә» ҝөстәририк (1 Јәһ. 3:16-18). Биз Мәсиһин гардашларыны мадди ҹәһәтдән дәстәкләдијимизи тәблиғ ишиндә иштирак етмәклә, ибадәт јерләримизин тикинтиси вә јахшы вәзијјәтдә сахланылмасы, һәмчинин үмумдүнја тәблиғ ишинин ирәлиләмәси үчүн ианәләр етмәклә ҝөстәририк. Һәм Јеһова, һәм дә Иса, ианәләримизин аз вә ја чох олмасындан асылы олмајараг, ҝүләр үзлә вермәјимизи јүксәк гијмәтләндирир (2 Кор. 9:7).

18. Јығынҹағын ағсаггалларынын Мүгәддәс Китаба әсасланан мәсләһәтләринә нә үчүн табе олмалыјыг?

¹⁸ Мәсиһин достлары олдуғумузу ҝөстәрмәјин диҝәр үсулу јығынҹағын ағсаггаллары тәрәфиндән верилән ҝөстәришләрә әмәл етмәјимиздир. Бу кишиләр Мәсиһин рәһбәрлији алтында мүгәддәс руһла тәјин олунурлар (Ефес. 5:23). Һәвари Павел јазыр: «Өз рәисләринизә итаәт един, онлара табе олун» (Ибр. 13:17). Бәзән бизә ағсаггалларын Мүгәддәс Китаба әсасланан мәсләһәтләринә риајәт етмәк чәтин олур. Ола билсин, биз онларын сәһвләрини билирик вә бу, бизим онларын мәсләһәтләрини дүзҝүн нөгтеји-нәзәрлә гәбул етмәјимизә мане ола биләр. Амма јығынҹағын башы олан Мәсиһ бу гејри-камил инсанлардан мәмнунијјәтлә истифадә едир. Буна ҝөрә дә, онларын һакимијјәтинә неҹә јанашмағымыз бирбаша Мәсиһлә достлуғумуза тәсир едир. Диггәтимизи ағсаггалларын гүсурларына ҹәмләмәсәк вә онларын рәһбәрлијинә севинҹлә риајәт етсәк, биз Мәсиһә олан мәһәббәтимизи ҝөстәрмиш оларыг.

Јахшы достлары һарадан тапа биләрик?

19, 20. Јығынҹагда биз нә тапа биләрик вә нөвбәти мәгаләдә һансы суал мүзакирә олунаҹаг?

¹⁹ Иса тәкҹә мәһәббәтли чобанлар васитәсилә дејил, һәмчинин јығынҹагдакы руһани аналар, баҹылар вә гардашлар васитәсилә дә гајғымыза галмаға давам едир. (Марк 10:29, 30 ајәләрини оху.) Тәзә-тәзә Јеһованын тәшкилаты илә үнсијјәт етмәјә башлајанда гоһумларын буна неҹә мүнасибәт ҝөстәрирди? Үмидварыг ки, онлар сәнин Аллаһа вә Мәсиһә јахынлашмаг истәјини дәстәкләјирдиләр. Анҹаг Иса хәбәрдарлыг етмишди ки, «инсанын дүшмәнләри [бәзән] өз евинин сакинләри олаҹагдыр» (Мат. 10:36). Јығынҹагда доғма гардашдан да јахын достлар тапаҹағымызы билмәк неҹә дә тәсәлливериҹидир! (Сүл. мәс. 18:24).

²⁰ Павелин Рома јығынҹағына јаздығы мәктубун сонунда ҝөндәрдији саламлардан ҝөрүнүр ки, онун чохлу достлары вар иди (Ром. 16:8-16). Һәвари Јәһја үчүнҹү мәктубунун сонунда јазмышды: «Достлары адбаад саламла» (3 Јәһ. 14). Ҝөрүнүр, онун да чохлу јахын достлары вар иди. Мәсиһчи баҹы-гардашларымызла јахын достлуг гурмагда вә бу достлуғу горумагда Исаны вә еркән шаҝирдләри неҹә тәглид едә биләрик? Нөвбәти мәгаләдә бу суала ҹаваб верилир.

Неҹә ҹаваб верәрдиниз?

• Јахшы дост олмагда Иса һансы нүмунәни гојуб?

• Шаҝирдләри Исанын достлуғуна неҹә һај верирдиләр?

• Мәсиһин досту олдуғумузу неҹә ҝөстәрә биләрик?

[14-ҹү сәһифәдәки шәкил]

Иса достларынын фикирләринә вә һиссләринә лагејд дејилди

[16-ҹы сәһифәдәки шәкил]

Мәсиһин досту олмаг истәдијимизи неҹә ҝөстәрә биләрик?