Гој јығынҹаг инкишаф етсин

«Ҹәмијјәтләр [јығынҹаглар] саламат галыб инкишаф едирдиләр» (ҺӘВАРИЛӘРИН ИШЛӘРИ 9:31).

1. Аллаһын јығынҹағы илә әлагәдар һансы суаллар јараныр?

ЕРАМЫЗЫН 33-ҹү илинин Пентикост ҝүнүндә Јеһова Мәсиһин давамчыларыны јени халг, «Аллаһын Исраили» кими гәбул етди (Галатијалылара 6:16). Руһла мәсһ олунмуш бу мәсиһчиләр һәм дә ‘Аллаһын ҹәмијјәти [јығынҹағы]’ олдулар (1 Коринфлиләрә 11:22). Бәс бу нә демәкдир? Аллаһын јығынҹағы неҹә тәшкил олунаҹагды? Үзвләринин мүхтәлиф јерләрдә јашамасына бахмајараг, онун фәалијјәт ҝөстәрмәси неҹә мүмкүн олаҹагды? Бунун бизим һәјатымыз вә хошбәхтлијимиз илә нә әлагәси вар?

2, 3. Иса јығынҹагда низам-интизамын олаҹағыны неҹә ҝөстәрди?

² Кечән мәгаләдә гејд едилдији кими, Иса һәвари Петерә: «Мән ҹәмијјәтими [јығынҹағымы] бу дашын [Иса Мәсиһ] үзәриндә гураҹағам; вә өлүләр аләминин гапылары она галиб ҝәлә билмәјәҹәкдир», — дејәрәк, мәсһ олунмушларын јығынҹағынын мөвҹуд олаҹағыны габагҹадан сөјләмишди (Матта 16:18). Бундан савајы, Иса һәлә һәвариләри илә оланда тезликлә гурулаҹаг јығынҹағын фәалијјәти вә тәшкил олунмасы илә бағлы ҝөстәришләр вермишди.

³ Иса сөздә вә әмәлдә ҝөстәрди ки, јығынҹагда бә’зиләри рәһбәрлији өз үзәринә ҝөтүрәҹәк. Онлар буну өз јығынҹаг үзвләринә хидмәт етмәклә едәҹәкләр. Мәсиһ демишди: «Билирсиниз ки, халглар арасында рәис сајыланлар онлара һөкмдарлыг едәрләр вә ағалары үзәрләриндә һакимијјәт сүрәрләр. Сизин аранызда белә олмамалыдыр. Лакин аранызда бөјүк олмаг истәјән, диҝәрләринин нөкәри олсун; вә аранызда биринҹи олмаг истәјән, диҝәрләринин гулу олсун» (Марк 10:42-44). Ајдындыр ки, Аллаһын јығынҹағы бир-бириндән тәҹрид олунмуш шәхсләрдән ибарәт, гармагарышыг дејил, үзвләринин бир-бири илә әмәкдашлыг вә үнсијјәт етдији низамлы гурулуш олаҹагды.

4, 5. Биз һарадан билирик ки, јығынҹаг руһани тә’лимә еһтијаҹ дујаҹагды?

⁴ Аллаһын һәмин јығынҹағынын Башы олаҹаг Иса ҝөстәрмишди ки, һәвариләринин вә ондан тә’лим алан башга адамларын јығынҹагда мүәјјән мәс’улијјәти олаҹаг. Онлар нә едәҹәкдиләр? Ән ваҹиби јығынҹаг үзвләринә руһани тә’лим верәҹәкдиләр. Хатырлајырсынызса, Иса дириләндән сонра башга һәвариләрин јанында Петерә демишди: «Јунис оғлу Шимон, Мәни... севирсәнми?» Петер Она деди: «Бәли, ја Рәбб, Сәни севдијими билирсән». Иса она деди: «Гузуларымы отар... Гојунларымы отар... Гојунларымы отар» (Јәһја 21:15-17). Чох ҹидди тапшырыгдыр!

⁵ Исанын сөзләриндән ҝөрүрүк ки, јығынҹаға топлашан инсанлар ағылдакы гојунларла мүгајисә едилир. Бу гојунлары — мәсиһчи кишиләри, гадынлары вә ушаглары руһани гида илә тә’мин етмәк вә онларын гајғыларына лајигинҹә галмаг лазым ҝәләҹәкди. Үстәлик, Иса бүтүн давамчыларына инсанлара тә’лим вериб, шаҝирд һазырламағы тапшырдығындан, јығынҹағын һәр јени үзвү бу тапшырығы јеринә јетирмәк үчүн тә’лим алмалы иди (Матта 28:19, 20).

6. Јениҹә тәшкил олунмуш Аллаһын јығынҹағында һансы тәдбирләр ҝөрүлмүшдү?

⁶ Аллаһын јығынҹағы тәшкил олунанда онун үзвләри мүнтәзәм олараг тә’лим алмаг вә бир-бирини руһландырмаг үчүн јығылырдылар: «Онлар, һәвариләрин тә’лиминдә вә үнсијјәтиндә, чөрәк бөлмәкдә вә дуа етмәкдә давам едирдиләр» (Һәвариләрин ишләри 2:42, 46, 47). Диҝәр диггәтәлајиг мәгам одур ки, Мүгәддәс Китабын тәләбләринә ҹаваб верән бә’зи кишиләр мүәјјән мәсәләләрә бахмаг үчүн тә’јин олунмушдурлар. Онлар тәһсилли вә ја хүсуси баҹарыглары олдуғуна ҝөрә дејил, «Мүгәддәс Руһ вә һикмәтлә долу» олдуглары үчүн сечилмишдиләр. Онлардан бири «Мүгәддәс Руһ илә долу» олан Стефан иди. Јығынҹағын тәшкил олунмасы сајәсиндә «Аллаһын кәламы вүс’әт алырды вә Јерусәлимдә шаҝирдләрин сајы хејли артырды» (Һәвариләрин ишләри 6:1-7).

Аллаһын сечдији кишиләр

7, 8. а) Биринҹи әсрдә Јерусәлимдәки һәвариләрин вә ағсаггалларын вәзифәси нәдән ибарәт иди? б) Јығынҹаглар васитәсилә тә’лим вериләндә һансы нәтиҹәләр әлдә едилди?

⁷ Бәли, биринҹи әсрдә јығынҹагда һәвариләр рәһбәрлик едирдиләр, анҹаг онлар тәк дејилдиләр. Бир дәфә Павел јол јолдашлары илә Суријадакы Антакјаја гајыдырды. Һәвариләрин ишләри 14:27 ајәсиндә дејилир: «Ораја чатыб, ҹәмијјәти [јығынҹағы] топладыглары заман, Аллаһын, онларын васитәси илә нәләр етдијини... нағыл етдиләр». Онлар һәлә һәмин јығынҹагда икән гејри-јәһуди иманлыларын сүннәт едилмәсинин лазым олуб-олмадығы һагда суал галхды. Мәсәләни һәлл етмәк үчүн Павел вә Барнаба Јерусәлимдә рәһбәрлик шурасы кими хидмәт едән «һәвариләрин вә ағсаггалларын» јанына ҝетдиләр (Һәвариләрин ишләри 15:1-3).

⁸ ‘Һәвариләр вә ағсаггаллар бу мәсәләни мүзакирә етмәк үчүн топлашанда’ иҹласы Исанын һәвари олмајан өҝеј гардашы, мәсиһчи ағсаггалы Јагуб апарырды (Һәвариләрин ишләри 15:6). Мәсәләни һәртәрәфли өлчүб-бичәндән сонра онлар мүгәддәс руһун көмәји илә Аллаһын Кәламына мүвафиг гәрар гәбул етдиләр. Рәһбәрлик шурасы гәрары јазылы шәкилдә јығынҹаглара ҝөндәрди (Һәвариләрин ишләри 15:22-32). Мәктубу аланлар ону гәбул едиб јазыланлара әмәл етдиләр. Бунун нәтиҹәси нә олду? Баҹы-гардашлар мөһкәмләниб руһландылар. Мүгәддәс Китаб дејир: «Беләликлә, ҹәмијјәтләр [јығынҹаглар] иманда гүввәт тапараг, ҝүндән-ҝүнә сајҹа чохалырдылар» (Һәвариләрин ишләри 16:5).

9. Мүгәддәс Китаб тәләбләринә ҹаваб верән кишиләр үчүн Аллаһын Кәламында һансы мәс’улијјәтләр нәзәрдә тутулур?

⁹ Бәс јығынҹаглар ҝүнбәҝүн неҹә фәалијјәт ҝөстәрирди? Мисал үчүн, Крит адасында јерләшән јығынҹаглара нәзәр салаг. Орада јашајанларын чоху пис ад чыхармыш олса да, бә’зиләри дәјишилиб һәгиги мәсиһчи олдулар (Титуса 1:10-12; 2:2, 3). Онлар мүхтәлиф шәһәрләрдә јашајырдылар, һамысы да Јерусәлимдә јерләшән рәһбәрлик шурасындан узаг иди. Бу елә дә бөјүк проблем дејилди, чүнки башга јерләрдә олдуғу кими, Критин дә һәр јығынҹағында ‘ағсаггаллар’ тә’јин олунмушду. Бу гардашларын һамысы Мүгәддәс Китаб тәләбләринә ҹаваб верирдиләр. Ағсаггал вә ја нәзарәтчиләр «сәһиһ тә’лимлә тәшвиг вә зидд ҝедәнләри тәкзиб етмәјә гадир» идиләр (Титуса 1:5-9; 1 Тимотејә 3:1-7). Диҝәр руһән јеткин кишиләр исә јығынҹаға көмәк етмәк үчүн јардымчы, јә’ни хидмәти көмәкчи тә’јин едилирдиләр (1 Тимотејә 3:8-10, 12, 13).

10. Матта 18:15-17 ајәләринә әсасән, ҹидди проблемләр неҹә һәлл едилмәли иди?

¹⁰ Иса белә бир гурулушун мөвҹуд олаҹағыны ҝөстәрмишди. Ҝәлин Матта 18:15-17 ајәләринә нәзәр салаг. Бурада дејилир ки, һәрдән Аллаһын ики хидмәтчиси арасында проблем јарана биләр. Онлардан бири диҝәринә гаршы ҝүнаһ ишләдәндә, зәрәр чәкән тәрәф о бирисинә јахынлашыб ону тәкликдә ‘ифша етмәлидир’. Бу аддымла проблем һәлл олунмурса, мәсәләдән хәбәри олан бир вә ја ики нәфәри көмәјә чағырмаг олар. Бундан сонра да мәсәлә һәлл олунмамыш галса, онда неҹә? Иса деди: «Әҝәр онларын сөзүнә бахмаг истәмәзсә, ҹәмијјәтә [јығынҹаға] сөјлә. Вә әҝәр ҹәмијјәтин [јығынҹағын] дә сөзүнә бахмаг истәмәзсә, гој о сәнин үчүн бир бүтпәрәст вә верҝијыған кими олсун». Иса буну дејән вахты јәһудиләр һәлә дә Аллаһын јығынҹағы идиләр, она ҝөрә дә бу сөзләр әввәлҹә онлара аид идиa. Анҹаг мәсиһчи јығынҹағынын әсасы гојуландан сонра, Исанын ҝөстәриши орада тәтбиг олунаҹагды. Бу диҝәр сүбутдур ки, һәр мәсиһчинин мөһкәмләнмәси вә рәһбәрлик алмасы үчүн Аллаһын халгынын јығынҹағы олмалыдыр.

11. Проблемләри һәлл етмәкдә ағсаггалларын ролу нәдән ибарәт иди?

¹¹ Буна мүвафиг олараг, проблемләр јарананда вә ја кимсә ҝүнаһ ишләдәндә јығынҹағы ағсаггаллар вә ја нәзарәтчиләр тәмсил етмәли идиләр. Бу, Титуса 1:9 ајәсиндәки ағсаггаллар үчүн олан тәләбләрә мүвафигдир. Дүздүр, ағсаггаллар гејри-камил идиләр. Мәсәлән, онлардан бири дә ‘натамам ишләри ҝөрүб гуртармаг’ үчүн Павелин јығынҹаглара ҝөндәрдији Титус иди (Титуса 1:4, 5). Бу ҝүн гардашларын ағсаггал тә’јин олунмасы үчүн онларын әввәлҹә өз иман вә сәдагәтләрини мүәјјән вахт әрзиндә сүбут етмәләри ҝәрәкдир. Буна ҝөрә дә јығынҹаг үзвләринин ағсаггаллар васитәсилә верилән рәһбәрлијә е’тибар етмәјә там әсаслары вардыр.

12. Ағсаггаллар јығынҹаг гаршысында һансы мәс’улијјәти дашыјырлар?

¹² Ефес јығынҹағындакы ағсаггаллара Павел демишди: «Өзүнүзә вә бүтүн сүрүјә диггәт един. Мүгәддәс Руһ сизи о сүрүнүн ичиндә нәзарәтчи тә’јин етмишдир ки, Рәббин вә Аллаһын ҹәмијјәтини [јығынҹағыны], Өз ганы баһасына әлдә етдији ҹәмијјәти [јығынҹағы] ҝүдәсиниз» (Һәвариләрин ишләри 20:28). Бу ҝүн дә јығынҹаг нәзарәтчиләри Аллаһын јығынҹағыны ‘ҝүдмәјә’, јә’ни онун гајғысына галмаға тә’јин олунурлар. Онлар буну залымлыгла дејил, мәһәббәтлә етмәлидирләр (1 Петер 5:2, 3). Нәзарәтчиләр ‘бүтүн сүрүнү’ инкишаф етдирмәјә вә она көмәк етмәјә чалышмалыдырлар.

Јығынҹаға бағлы галын

13. Вахташыры јығынҹагда нә баш верә биләр вә нә үчүн?

¹³ Ағсаггаллар вә үмумијјәтлә јығынҹаг үзвләринин һамысы гејри-камил олдуғундан, һәвариләрин бә’зиләри һәлә сағ икән олдуғу кими, вахташыры анлашылмазлыглар вә проблемләр баш галдыра биләр (Филипилиләрә 4:2, 3). Ағсаггал вә ја башгасы елә сөз ишләдә биләр ки, бизә кобуд, габа вә ја һәгигәтә ујғун олмајан кими ҝөрүнәр. Јахуд да бизә елә ҝәлә биләр ки, јығынҹагда Мүгәддәс Китаба зидд бир шеј баш верир, анҹаг ағсаггалларын бундан хәбәри олса да, һеч бир тәдбир ҝөрмүрләр. Бәлкә дә мәсәлә Мүгәддәс Јазыларын вә бизим билмәдијимиз фактларын әсасында һәлл олунуб вә ја олунмагдадыр. Анҹаг вәзијјәт бизим дүшүндүјүмүз кими олса белә, бир шеји јадда сахла: Јеһованын гајғысына галдығы Коринф јығынҹағында бир мүддәт ҹидди ҝүнаһа јол верилирди. Јеһова өз вахтында мәсәләни дүз вә бирдәфәлик һәлл етди (1 Коринфлиләрә 5:1, 5, 9-11). Өзүмүзә суал верәк: «Әҝәр о вахт Коринфдә јашасајдым, бу һалда нә едәрдим?»

14, 15. Бә’зиләри нәјә ҝөрә Исаны тәрк етмишдиләр вә бундан һансы ибрәт дәрси алырыг?

¹⁴ Башга бир вәзијјәтә нәзәр салаг. Тәсәввүр едәк ки, кимәсә Мүгәддәс Китабын һансыса тә’лимини баша дүшүб, гәбул етмәк чәтиндир. Бәлкә дә бу адам, ҹаваб тапмаг үчүн Мүгәддәс Китабы вә нәшрләримизи арашдырыб, јеткин мәсиһчиләрә, һәтта ағсаггаллара белә мүраҹиәт едиб. Бунунла белә, о, јенә дә суалы баша дүшүб гәбул етмәкдә чәтинлик чәкир. Бәс о нә етсин? Буна бәнзәр һадисә Исанын өлүмүндән бир гәдәр әввәл баш вермишди. О өзүнү ‘һәјат чөрәји’ адландырараг демишдир ки, әбәди јашамаг үчүн ‘Инсан Оғлунун әтини јејиб, ганыны ичмәк’ лазымдыр. Онун сөзләри шаҝирдләринин бә’зиләрини үрәкләринин дәринлијинә кими сарсытды. Јахынлашыб сорушмаг вә ја иманла ҝөзләмәк әвәзинә, бир чох шаҝирдләр ‘артыг [Иса илә] ҝәзмәдиләр’ (Јәһја 6:35, 41-66). Јенә дә суал јараныр: биз орада олсајдыг нә едәрдик?

¹⁵ Бизим ҝүнләрдә бә’зиләри Аллаһа тәкбашына хидмәт етмәји гәрара алараг јығынҹағы тәрк етмишләр. Беләләри дејирләр ки, кимсә онларын хәтринә дәјиб, јығынҹагда киминсә ҹидди сәһвини дүзәлтмирләр вә ја һансыса тә’лимлә разы дејилләр. Бу нә дәрәҹәдә дүзҝүн һәрәкәтдир? Бәли, һәр мәсиһчинин Аллаһла шәхси мүнасибәти олмалыдыр, лакин инкар едә билмәрик ки, Аллаһ һәвариләрин дөврүндәки кими, инди дә үмумдүнја јығынҹагдан истифадә едир. Үстәлик, Јеһова биринҹи әсрдә ағсаггаллар вә хидмәти көмәкчиләри јығынҹаға көмәк етмәк үчүн тә’јин едәрәк јығынҹаглара хејир-дуа верирди. Ејни шеји бизим ҝүнләр һаггында да демәк олар.

16. Јығынҹағы тәрк етмәк фикринә дүшән нәји јадда сахламалыдыр?

¹⁶ Әҝәр мәсиһчи јалныз өзүнүн Аллаһла олан мүнасибәтләринә ҝүвәнирсә, о, Аллаһын гурулушундан — үмумдүнја вә јерли јығынҹагдан үз дөндәрир. Белә адам Аллаһа тәкбашына ибадәт етмәјә вә ја јалныз бир нечә нәфәрлә үнсијјәт етмәјә давам едә биләр, анҹаг белә етдикдә о, ағсаггаллары вә хидмәти көмәкчиләри һарадан тапаҹаг? Диггәтәлајигдир ки, Павел Колосдакы јығынҹаға мәктубунда Мәсиһдә ‘көк салыб, инкишаф етмәкдән’ данышырды. Сонра бу мәктуб Лаодикија јығынҹағында охунмалы иди. Јығынҹагдан ајрыланлар дејил, она бағлы галанлар бундан фајдалана биләҹәкдиләр (Колослулара 2:6, 7; 4:16).

Һәгигәтин дирәји вә әсасы

17. 1 Тимотејә 3:15 ајәси јығынҹаг һаггында нәји өјрәдир?

¹⁷ Һәвари Павел мәсиһчи ағсаггалы Тимотејә илк мәктубунда ағсаггал вә хидмәти көмәкчиләр үчүн тәләбләри садалады. Сонра о, «јашајан Аллаһын ҹәмијјәти»нин, јә’ни јығынҹағын «һәгигәтин дирәји вә әсасы» олдуғуну деди (1 Тимотејә 3:15). Мәсһ олунмушларын јығынҹағы, сөзсүз ки, биринҹи әсрдә һәгигәтин дајағы иди. Һәгигәт јығынҹагда өјрәдилдији үчүн һәр мәсиһчи ону, әсас е’тибарилә, орада ешидиб иманыны мөһкәмләндирә биләрди.

18. Јығынҹаг ҝөрүшләри нә үчүн ваҹибдир?

¹⁸ Үмумдүнја мәсиһчи јығынҹағы да Аллаһын еви, «һәгигәтин дирәји вә әсасы»дыр. Аллаһла мүнасибәтләримизи мөһкәмләндирмәкдә вә Онун ирадәсини јеринә јетирмәји өјрәнмәкдә өз јығынҹағымызын ҝөрүшләринә мүнтәзәм ҝәлиб, орада иштирак етмәк ваҹиб рол ојнајыр. Коринфдәки јығынҹаға мәктуб јазаркән Павел диггәти һәмин ҝөрүшләрдә дејиләнләрә јөнәлтди. О истәјирди ки, ҝөрүшләрдә иштирак едәнләрин ‘инкишаф етмәси’ үчүн орада дејиләнләр ајдын вә башадүшүлән олсун (1 Коринфлиләрә 14:12, 17-19). Әҝәр Јеһова Аллаһын јығынҹаглардан истифадә етдијини вә она дајаг олдуғуну гәбул едириксә, биз дә инкишаф едәҹәјик.

19. Сән нәјә ҝөрә јығынҹағына миннәтдарсан?

¹⁹ Бәли, әҝәр биз мәсиһчи кими инкишаф етмәк истәјириксә, јеримиз јығынҹагдадыр. Артыг узун мүддәтдир ки, о, јалан тә’лимләрдән сығынаҹагдыр вә Јеһова Падшаһлыг һаггында хош хәбәрин бүтүн дүнјада тәблиғ олунмасы үчүн ондан истифадә едир. Шүбһә јохдур ки, Јеһова мәсиһчи јығынҹағынын васитәсилә чох шеј һәјата кечирмишдир (Ефеслиләрә 3:9, 10).

[Һашијә]

Хатырлајырсынызмы?

• Нә үчүн мәнтигәујғундур ки, Аллаһ јығынҹаглардан истифадә едәҹәкди?

• Гејри-камил олдугларына бахмајараг, ағсаггаллар јығынҹаг үчүн нә едирләр?

• Сәнин инкишаф етмәјиндә аид олдуғун јығынҹаг һансы ролу ојнајыр?

[14-ҹү сәһифәдәки шәкил]

Јерусәлимдәки һәвариләр вә ағсаггаллар рәһбәрлик шурасы кими хидмәт едирдиләр.

[16-ҹы сәһифәдәки шәкил]

Ағсаггаллар вә хидмәти көмәкчиләр јығынҹагдакы мәс’улијјәтләрини јеринә јетирмәк үчүн тә’лим алырлар.