Сә’јлә бичин!

“Ҝөз јашлары илә әкәнләр севинҹлә бичәҹәкләр” (МӘЗМУР 126:5).

1. “Өз мәһсулуну топламаға ишчиләр ҝөндәрмәси” үчүн, бу ҝүн “мәһсулун Саһиби олан Рәббә” нәјә ҝөрә јалвармаг лазымдыр?

ИСА МӘСИҺ, Галилејада кечирдији үчүнҹү тәблиғ сәјаһәтиндән сонра шаҝирдләринә деди: “Мәһсул чох, ишчиләр исә аздыр” (Матта 9:37). Јәһудејада да һәмин вәзијјәт һөкм сүрүрдү (Лука 10:2). Бу, 2 000 ил әввәл мөвҹуд олан вәзијјәт иди. Бәс бизим ҝүнләримиз барәдә нә демәк олар? Өтән хидмәт или әрзиндә Јегованын 6 000 000-дан чох Шаһиди, символик мәһсул јығымында сә’јлә чалышараг, әксәријјәти “чобансыз гојунлар кими тагәтсиз вә дағыныг” олан 6 000 000 000 әһалидән ибарәт дүнјада мәһсул топламышлар. Демәк, Исанын, “мәһсулун Саһибинә јалварын ки, Өз мәһсулуну топламаға ишчиләр ҝөндәрсин” чағырышы, јүз илләр бундан әввәл олдуғу кими, бу ҝүн дә зәруридир (Матта 9:36, 38).

2. Дүнјанын диггәтини бизә ҹәлб едән нәдир?

² Мәһсулун Саһиби олан Јегова Аллаһ, ишчиләрин сајыны артырмаг јалварышына ҹаваб верир. Аллаһын рәһбәрлик етдији мәһсул јығымында иштирак етмәк неҹә дә севиндириҹидир! Дүнјанын әһалиси илә мүгајисәдә сајымыз аз олса да, Падшаһлыг һаггындакы хәбәрин тәблиғ едилмәсиндә вә шаҝирдләр һазырламаг ишиндә сә’јлә иштиракымыз дүнјанын диггәтини ҹәлб едир. Чох өлкәләрдә күтләви информасија васитәләриндә бизим һаггымызда тез-тез данышылыр. Телевизија васитәси илә ҝөстәрилән филмләрдә гапынын зәнҝинин чалынмасы, “ҝәлән Јегованын Шаһидләридир” сөзләри илә мүшајиәт олуна биләр. Бәли, символик бичинчиләр ролунда һәјата кечирдијимиз мәсиһчи фәалијјәти ХХЫ әсрдә јахшы мә’лумдур.

3. а) Һарадан билирик ки, Падшаһлыг һаггындакы хәбәрин тәблиғи Ы әсрдә дә дүнјанын диггәтини ҹәлб етмишди? б) Нәјә ҝөрә дејә биләрик ки, тәблиғ ишиндә мәләкләр бизә көмәк едирләр?

³ Падшаһлыг һаггындакы хәбәрин тәблиғи I әсрдә дә дүнјанын диггәтини ејни тәрздә ҹәлб етди вә елә бу сәбәбдән хош хәбәрин тәблиғчиләри тә’гиб олунурдулар. Буна ҝөрә дә һәвари Павел јазырды: “Мән елә дүшүнүрәм ки, Аллаһ биз һәвариләри өлүмә мәһкум олунанлар кими ән ахырда сәһнәјә чыхартды; чүнки биз дүнја, мәләкләр вә инсанлар үчүн тамаша олдуг” (1 Коринфлиләрә 4:9). Буна бәнзәр шәкилдә, тә’гибләрә бахмајараг, Падшаһлыг һаггындакы хәбәри сарсылмазлыгла тәблиғ етмәјимиз дүнјанын диггәтини бизә ҹәлб едир. Бундан әлавә, сарсылмазлығымыз мәләкләр үчүн бөјүк мә’на кәсб едир. Һәвари Јәһја Вәһј 14:6 ајәсиндә дејир: “Ҝөјүн ортасында учан башга бир мәләји дә ҝөрдүм. Онун әбәди бир Мүждәси вар иди ки, јер үзүндә јашајанлара, һәр милләтә, һәр гәбиләјә, һәр дилә вә һәр халга тәблиғ етсин”. Бәли, иҹра етдијимиз хидмәтдә — мәһсул јығымында — мәләкләр бизә көмәк едирләр! (Ибраниләрә 1:13, 14).

“Нифрәт едилирләр”

4, 5. а) Иса өз шаҝирдләрини нә барәдә хәбәрдар етди? б) Аллаһын мүасир хидмәтчиләринә нәјә ҝөрә “нифрәт едилир”?

⁴ Иса һәвариләрини тәблиғә ҝөндәрән заман, онлар онун “иланлар кими мүдрик вә ҝөјәрчинләр кими мә’сум олун” тапшырығыны хатырлајырдылар. Иса, бу сөзләрә әлавә олараг, деди: “Инсанлардан... өзүнүзү ҝөзләјин; чүнки онлар сизи мәһкәмәләрә верәҹәк, синагогларында дөјәҹәкләр; онлара вә диҝәр халглара шәһадәт үчүн Мәнә ҝөрә валиләрин вә һөкмдарларын јанына апарылаҹагсыныз. [...] Вә Мәним адыма ҝөрә һамы сизә нифрәт едәҹәк. Лакин ахыра гәдәр сәбр едән хилас олаҹагдыр” (Матта 10:16—22).

⁵ “Бүтүн дүнја... шәририн”, Аллаһын вә Онун халгынын баш дүшмәни Шејтан Иблисин “һакимијјәти алтында” олдуғу үчүн, бу ҝүн бизә “нифрәт едилир” (1 Јәһја 5:19). Дүшмәнләр руһани ҹәһәтдән тәрәгги етдијимизи ҝөрүрләр, лакин онлар бүтүн бунларын Јегованын хејир-дуасы сајәсиндә олдуғуну гәбул етмәк истәмирләр. Мәһсул јығымында севинҹлә иштирак етдијимиз заман, әлејһдарларымыз хошбәхтликдән ишыг сачан үзүмүзү ҝөрүрләр. Онлар бизим бирлијимизә тәәҹҹүб едирләр! Башга өлкәјә көчәндә вә вәтәнләриндә олдуғу кими, Јегованын Шаһидләринин орада да ејни фәалијјәтлә мәшғул олдугларыны ҝөрәндә, ола билсин, буну наразылыгла гәбул едирләр. Лакин биз билирик ки, Јеговаја мәгбул олан вахтда һамы, һәтта дүшмәнләримиз белә, бизә дајаг оланы — Јегованы таныјаҹаг вә арамыздакы бирлијин Онун сајәсиндә һөкм сүрдүјүнү биләҹәкләр (Һезекиел 38:10—12, 23).

6. Мәһсул јығымынын иштиракчылары кими биз нәдә әмин едилирик вә һансы суал јараныр?

⁶ Мәһсулун Саһиби, “ҝөјдә вә јер үзүндә бүтүн һакимијјәти” Оғлу Иса Мәсиһә вермишдир (Матта 28:18). Буна ҝөрә дә Јегова, ҝөјдәки мәләкләрин вә јер үзүндә јашајан “садиг вә ағыллы гул”ун васитәсилә мәһсул јығымына рәһбәрлик етмәк үчүн Исаны истифадә едир (Матта 24:45—47; Вәһј 14:6, 7). Бәс биз мәһсул јығымында сә’јлә иштирак едәрәк, дүшмәнләрин мүгавимәтләрини дәф етмәји, ејни заманда севинҹимизи горумағы неҹә баҹара биләрик?

7. Мүгавимәтләр вә ја тә’гибләрлә гаршылашдығымыз заман һансы әһвал-руһијјәни горумаға чалышмалыјыг?

⁷ Мүгавимәтләр вә ја ачыг тә’гибләрлә гаршылашдығымыз заман, Павелдә олан әһвал-руһијјәнин биздә дә олмасы үчүн, ҝәлин Аллаһын көмәјини ахтараг. Павел јазырды: “Бизи сөјүрләр, биз хејир-дуа веририк; бизи говурлар, биз таб ҝәтиририк; бизә ифтира атырлар, биз јумшаг ҹаваб веририк” (1 Коринфлиләрә 4:12, 13). Нәзакәтлә иҹра етдијимиз хидмәтә ујғун олан бу ҹүр әһвал-руһијјә, һәрдән әлејһдарларымызын бизә гаршы мүнасибәтләрини дәјишир.

8. Исанын, Матта 10:28 ајәсиндә јазылан сөзләри сизи неҹә руһландырыр?

⁸ Мәһсул јығымында ҝөстәрдијимиз сә’ји, һәтта өлүм тәһлүкәси белә зәифләдә билмәз. Падшаһлыг һаггындакы хәбәри ҹәсарәтлә, мүмкүн гәдәр ачыг-ашкар бәјан едирик. Буну етмәкдә Исанын нөвбәти сөзләри бизә ҝүҹ верир: “Бәдәни өлдүрүб ҹаны өлдүрә билмәјәнләрдән... горхмајын; анҹаг даһа артыг ҹәһәннәмдә һәм бәдәни, һәм ҹаны һәлак етмәјә гадир Оландан горхун” (Матта 10:28). Биз билирик ки, сәмави Атамыз һәјат Мәнбәјидир. Онун өнүндә нөгсансызлығыны горујанлары, мәһсул јығымында сә’јлә вә сәдагәтлә иштирак едәнләри мүкафатландырыр.

Хиласедиҹи хәбәр

9. Бә’зиләри Һезекиелин сөзләринә неҹә јанашырдылар, бәс буҝүнкү вәзијјәт барәсиндә нә демәк олар?

⁹ Һезекиел пејғәмбәр Јегованын сөзләрини “итаәтсиз милләтләрә” — Исраил вә Јәһуда падшаһлығына ҹәсарәтлә бәјан етдији заман, бә’зиләри ону мәмнунијјәтлә динләјирдиләр (Һезекиел 2:3). Јегова она деди: “Будур, сән онлар үчүн, јахшы чалғы чаланын вә сәси ҝөзәл оланын чох севимли түркүсү кимисән” (Һезекиел 33:32). Һезекиелин сөзләри бу инсанлара хош ҝәлсә дә, онлар һәмин сөзләрә мүвафиг олараг давранмырдылар. Бәс буҝүнкү вәзијјәт барәсиндә нә демәк олар? Мәсһ едилмишләрин галығы вә онларын јолдашлары, Јегованын вердији хәбәрләри ҹәсарәтлә бәјан едәндә, Падшаһлығын ҝәтирәҹәји хејир-дуалар һаггындакы сөзләри динләмәк бә’зи инсанларын хошуна ҝәлир, анҹаг онлар бу хәбәрләрә лазыми тәрздә һај вермир, шаҝирд олмур вә мәһсул јығымына гошулмурлар.

10, 11. Хиласедиҹи хәбәри ХХ әсрин биринҹи јарысында неҹә бәјан едирдиләр вә бунун нәтиҹәси неҹә олду?

¹⁰ Лакин бир чох инсанлар бичинчиләрин фәалијјәтинә хејирхаһлыгла һај верир вә Аллаһдан ҝәлән хәбәрләри бәјан етмәјә башлајырлар. Мәсәлән, 1922—1928-ҹи илләрдә кечирилән конгресләрдә, Шејтанын пис әшјалар системини ајдын шәкилдә мүһакимә едән хәбәрләр е’лан едилди. Бу иттиһамлар радио васитәсилә транслјасија едилирди. Сонра исә Аллаһын халгы, бу хәбәрләри изаһ едән милјонларла вәрәгәләр пајлады.

¹¹ Мин доггуз јүз отузунҹу илләрдә, шаһидлик етмәјин башга үсулундан — информасија јүрүшләриндән истифадә етмәјә башладылар. Әввәлләр Јегованын халгынын үзвләри, ачыг мә’рузәјә дә’вәт едән плакатлар ҝәздирирдиләр. Сонрадан бу плакатларда “Дин тәлә вә јаландыр” вә “Аллаһа вә Падшаһ Мәсиһә хидмәт един” шүарлары јазмаға башладылар. Јегованын хидмәтчиләри күчәләрдән кечәндә, бу шүарлар јолдан өтәнләрин диггәтини ҹәлб едирди. Лондонун гәләбәлик олан күчәләриндә кечирилән бу ҹүр јүрүшләрдә мүнтәзәм олараг иштирак етмиш бир гардаш дејир: “Бүтүн бунларын сајәсиндә Јегованын Шаһидләри һамынын диггәтини өзләринә ҹәлб етдиләр вә ҹәсарәтләндиләр”.

12. Аллаһдан ҝәлән мүһакимәедиҹи хәбәрләрдән савајы хидмәтимиздә диггәти даһа нәјә јөнәлдирик вә бу ҝүн хош хәбәри бирликдә кимләр тәблиғ едирләр?

¹² Аллаһдан ҝәлән мүһакимәедиҹи хәбәрләри бәјан едәрәк, инсанларын диггәтини Падшаһлыг һаггындакы хәбәрдә олан мүсбәт шејләрә дә ҹәлб едирик. Бүтүн дүнјада ҹәсарәтлә шәһадәтлик етмәјимиз, ләјагәтли инсанлары ахтарыб тапмағымыза көмәк едир (Матта 10:11). Мәсһ едилмишләр синфинин ахырынҹы үзвләринин чоху 1920-ҹи вә 1930-ҹу илләрдә, мәһсул јығымы заманы сәсләнән ҝур чағырыша һај верди. Сонра 1935-ҹи илдә кечирилән конгресдә, “башга гојунларын” “бөјүк... издиһамы”ны јер үзү ҹәннәтдә ҝөзләјән хошбәхт ҝәләҹәк һаггында валеһедиҹи хәбәр е’лан олунду (Вәһј 7:9; Јәһја 10:16). Бу инсанлар Аллаһдан ҝәлән мүһакимәедиҹи хәбәрләрә диггәт јетирдиләр вә мәсһ едилмишләрлә бирликдә хиласедиҹи хош хәбәри тәблиғ етмәјә башладылар.

13, 14. а) Мәзмур 126:5, 6 ајәләриндәки сөзләр неҹә тәсәлли верә биләр? б) Әкмәјә вә мәһсулу сувармаға давам етдијимиз заман нә баш верир?

¹³ Аллаһын бичинчиләри, хүсусилә дә тә’гибләрә мә’руз галанлар Мәзмур 126:5, 6 ајәләриндәки сөзләрдән бөјүк тәсәлли алырлар: “Ҝөз јашлары илә әкәнләр севинҹлә бичәҹәкләр. Әкәҹәји тохуму дашыјыб ағлајараг ҝедән, әлбәттә тајларыны дашыјараг севинҹлә ҝәләҹәкдир”. Мәзмурчунун әкин вә бичин һаггындакы сөзләриндә, Јегованын, гәдимдә Бабил әсирлијиндән гајыдан јәһудиләрин галығынын гејдинә галмасы вә онлара хејир-дуа вермәси әјани олараг әкс етдирилир. Јәһудиләр азад едилдикләри үчүн севинирдиләр, анҹаг әсирдә олдуглары 70 ил мүддәтиндә беҹәрилмәмиш галан саһәләри әкәркән, онлар јәгин ки, ағлајырдылар. Лакин әкмәјә вә тикмәјә давам едәнләрин әмәји бәһрә вә мәмнунлуг һисси ҝәтирди.

¹⁴ Биз вә ја һәмиманлыларымыз чәтин анларла гаршылашанда, салеһлик уғрунда әзијјәт чәкәндә, бунлар бизим ҝөз јашларымыза сәбәб ола биләр (1 Петер 3:14). Бичинә јени башладығымыз заман, чәтин анлар јашаја биләрик. Бизә елә ҝәлә биләр ки, хидмәтдә ҝөстәрдијимиз бүтүн ҹәһдләр әбәсдир. Анҹаг әкмәјә вә мәһсулу сувармаға давам едириксә, Аллаһ ону мүтләг бөјүдүр вә чох вахт бу артым ҝөзләдикләримиздән дә артыг олур (1 Коринфлиләрә 3:6). Бу сөзләрә әјани сүбут — Мүгәддәс Китабы вә она әсасланан нәшрләри пајламағымыз сајәсиндә әлдә етдијимиз сәмәрәләрдир.

15. Мәһсул јығымында мәсиһчи нәшрләринин ҝәтирдији фајдаја даир мисал чәкин.

¹⁵ Мисал үчүн, Ҹим адлы кишинин башына ҝәләнләри нәзәрдән кечирәк. Ҹим анасынын өлүмүндән сонра, онун әшјалары арасында “Һәјат неҹә әмәлә ҝәлиб? Тәкамүл, јохса јарадылма јолу илә?” китабыны тапдыa. О, китабы марагла охуду. Бир дәфә Јегованын Шаһиди олан бир гадын күчәдә она јахынлашды вә сөһбәт етдикдән сонра Ҹим, она тәкрарән баш чәкмәләринә разы олду. Нәтиҹәдә онунла Мүгәддәс Китаб өјрәнмәси башланды. Ҹим руһани ҹәһәтдән тез инкишаф етди. О өзүнү Јеговаја һәср едиб вәфтиз олунду. Ҹим өјрәндикләринин һамысыны гоһумларына данышырды. Нәтиҹәдә онун баҹысы вә гардашы Јегованын Шаһиди олдулар. Бир гәдәр вахт кечдикдән сонра, Ҹим Лондондакы Бејт-Елдә таммүддәтли хидмәтә башлады.

Тә’гибләрә бахмајараг, севиҹләрини горујурлар

16. а) Мәһсул јығымы нәјә ҝөрә уғурлу кечир? б) Иса, хош хәбәрин инсанлара тә’сир етмәси һаггында данышаркән нә барәдә хәбәрдарлыг едирди вә биз, инсанларын јанына һансы әһвал-руһијјә илә ҝәлирик?

¹⁶ Мәһсул јығымы нәјә ҝөрә белә уғурлу кечир? Она ҝөрә ки, мәсһ едилмиш мәсиһчиләр вә онларын јолдашлары, Исанын: “Сизә гаранлыгда нә сөјләјирәмсә, ону ајдынлыгда сөјләјин; вә гулағыныза пычылдананы дамлардан тәблиғ един” ҝөстәришинә диггәтлә јанашырлар (Матта 10:27). Лакин биз чәтинликләрлә гаршылашаҹағымызы билирик, чүнки Иса “гардаш гардашы, ата өвладыны өлүмә тәслим едәҹәк, өвладлар ата-аналарына баш галдыраҹаг вә онлары өлдүрәҹәкләр”, дејә хәбәрдарлыг етди. Даһа сонра Иса деди: “Фикирләшмәјин ки, јер үзүнә сүлһ ҝәтирмәјә ҝәлмишәм; Мән сүлһ дејил, гылынҹ ҝәтирмәјә ҝәлмишәм” (Матта 10:21, 34). Иса аиләләри гәсдән ајырмаг нијјәтиндә дејилди. Садәҹә олараг, бә’зән хош хәбәр онлара бу ҹүр тә’сир ҝөстәрирди. Ејни шеји Аллаһын мүасир хидмәтчиләри һаггында да демәк олар. Биз, аиләләрлә ҝөрүшән заман, онлара ајрылыг ҝәтирмәк истәмирик. Хош хәбәрин һамы тәрәфиндән гәбул едилмәсини истәјирик. Буна ҝөрә дә биз, аиләнин бүтүн үзвләри илә сәмимиликлә вә меһрибанлыгла сөһбәт етмәјә чалышырыг. Бунунла да ҝәтирдијимиз хәбәр “әбәди һәјата мејлли оланлар” үчүн даһа ҹәлбедиҹи олур (Һәвариләрин ишләри 13:48, ЈД).

17. Аллаһын һөкмранлығына тәрәфдар оланлар неҹә фәргләнирләр вә буну һансы нүмунәдә ҝөстәрмәк олар?

¹⁷ Падшаһлыг һаггындакы хәбәр Аллаһын һөкмранлығына тәрәфдар оланлары фәргләндирир. Мисал үчүн, ҝәлин ҝөрәк, “гејсәринкини гејсәрә, Аллаһынкыны Аллаһа верән” һәмиманлыларымыз Алманијада насизм дөврүндә башгаларындан неҹә фәргләнирдиләр (Лука 20:25). Дин рәһбәрләриндән вә Христиан аләминин килсәләринә мәнсуб олуб, өзләрини христиан адландыран кәсләрдән фәргли олараг, Јегованын хидмәтчиләри Мүгәддәс Китабын принсипләрини позмагдан имтина едиб сарсылмаз галырдылар (Ишаја 2:4; Матта 4:10; Јәһја 17:16). “Насист дөвләти вә јени динләр” адлы китабын мүәллифи профессор Кристин Кинг гејд едир: “[Насист] һөкумәти јалныз Јегованын Шаһидләри илә баҹара билмәди. Араларындан минләрлә өләнләр олса да, онларын фәалијјәти давам едирди вә 1945-ҹи илин мај ајында насионал-сосиализм мәһвә уғрадығы һалда, Јегованын Шаһидләринин һәрәкаты һәмишә олдуғу кими мөвҹудлуғуна давам едирди” (“The Nazi State and the New Religions”).

18. Тә’гибләрә бахмајараг, Јегованын халгы һансы әһвал-руһијјәни тәзаһүр етдирир?

¹⁸ Тә’гибләрлә гаршылашан заман, Јегованын халгынын ҝөстәрдији әһвал-руһијјә дә диггәтәлајигдир. Бизим иманымыз дүнјәви һакимләрә тәәссүрат бағышласа да, онлар биздә кин вә әдавәтин олмамасына тәәҹҹүб едирләр. Мисал үчүн, насистләрин күтләви гырғынына мә’руз галан Шаһидләр кечән ҝүнләри хатырлајанда, чох вахт севинҹ вә мәмнунлуг һисси ифадә едирләр. Билирләр ки, “үстүн гүдрәти” онлара Јегова вермишдир (2 Коринфлиләрә 4:7). Арамызда олан мәсһ едилмишләр “адларынын ҝөјләрдә јазылдығына” әминдирләр (Лука 10:20). Онларын дөзүмлү олмалары “утандырмајан” үмид верир. Бу ҹүр әминлик, јер үзүндә јашамаг үмиди олан садиг бичинчиләрә дә хасдыр (Ромалылара 5:4, 5).

Сә’јлә бичин

19. Мәсиһчи хидмәтиндә һансы әлверишли үсуллардан истифадә олунур?

¹⁹ Символик мәһсул јығымында иштирак етмәјимизә Јегованын һәлә нә гәдәр имкан верәҹәјини билмирик. Мәһсул јығымынын сонуну ҝөзләјәркән јадда сахламалыјыг ки, әсл мәһсул јығымы заманы бичинчиләр мүәјјән үсуллардан истифадә едирләр. Биз дә әмин ола биләрик ки, тәблиғдә е’тибарлы вә јохланмыш үсуллардан истифадә етсәк мүвәффәгијјәт газанаҹағыг. Павел һәмиманлыларына дејирди: “Јалварырам сизә... мәни тәглид един” (1 Коринфлиләрә 4:16). Павел, Милетдә Ефес ағсаггаллары илә ҝөрүшән заман онлара “истәр ачыгҹа, истәрсә дә евдән-евә” тә’лим вермәкдән бојун гачырмадығыны хатырлатды (Һәвариләрин ишләри 20:20, 21). Һәвари Павели мүшајиәт едән Тимотеј, онун неҹә тә’лим вердијини билирди вә буна ҝөрә дә онун тә’лим вермә үсуллары барәдә коринфлиләрә даныша биләрди (1 Коринфлиләрә 4:17). Аллаһ, һәвари Павелин истифадә етдији тә’лим вермә үсулларыны хејир-дуаландырдығы кими, бизим дә хош хәбәри евдән-евә ачыгҹа тәблиғ етмәк, тәкрар баш чәкмәк, Мүгәддәс Китаб өјрәнмәси кечирмәк вә гаршылашдығымыз һәр јердә инсанларла сөһбәт етмәк ҹәһдләримизә хејир-дуа верәҹәкдир (Һәвариләрин ишләри 17:17).

20. Руһани мәһсул јығымы бол олаҹағыны Иса неҹә ҝөстәрди вә бу сөзләр сон илләр әрзиндә неҹә јеринә јетир?

²⁰ Ерамызын 30-ҹу илиндә, Сухар шәһәри јахынлығында самаријалы гадынла сөһбәт етдикдән сонра, Иса руһани мәһсул јығымы һаггында данышды. О, шаҝирдләринә деди: “Ҝөзләринизи галдырын, бичилмәк үчүн ағармыш тарлалара бахын. Әкән дә, бичән дә бирликдә севинсинләр дејә, бичән әмәк һаггы алыр вә әбәди һәјат үчүн мәһсул топлајыр” (Јәһја 4:34—36). Јәгин ки, Иса самаријалы гадынла сөһбәтин сәмәрәсини артыг ҝөрүрдү. Ахы бир чох инсанлар, гадынын шәһадәт етмәси сајәсиндә Исаја иман етдиләр (Јәһја 4:39). Сон илләрдә мүхтәлиф өлкәләрин һакимијјәтләри Јегованын Шаһидләринин фәалијјәтинә гојулан мәһдудијјәтләри ҝөтүрүр вә ја бу дини тәшкилаты гануни олараг гејдијјата алырлар. Бунунла да мәһсул јығымы үчүн јени әразиләрин јаранмасына көмәк едирләр. Бунун сајәсиндә бу ҝүн бол руһани мәһсул топланыр. Бүтүн дүнја үзрә кечирилән мәһсул јығымында севинҹлә иштирак едәрәк, чохлу хејир-дуалар газанырыг.

21. Мәһсул јығымында севинҹлә вә сә’јлә чалышмаг үчүн һансы сәбәбләримиз вар?

²¹ Мәһсул јетишиб, бичилмәк үчүн һазыр олдуғу заман, ишчиләр дәрһал һәрәкәт етмәлидирләр. Ләнҝимәк олмаз. “Сонун вахтында” јашадығымыз үчүн, бу ҝүн биз сә’јлә вә ләнҝимәдән чалышмалыјыг (Даниел 12:4). Шүбһәсиз ки, чәтинликләрлә гаршылашырыг, лакин Јегованын хидмәтчиләринин топладығы мәһсул һәмишә олдуғундан даһа артыгдыр. Буна ҝөрә дә бу ҝүн севинҹ ҝүнүдүр (Ишаја 9:3). Беләликлә, ҝәлин севинҹли ишчиләр кими мәһсул јығымында сә’јлә чалышаг!

[Һашијә]

Сиз неҹә ҹаваб верәрдиниз?

• Мәһсул Саһиби ишчиләрин чохалмасы үчүн едилән јалварышлара неҹә ҹаваб верир?

• Бизә “нифрәт” едилмәсинә бахмајараг, һансы әһвал-руһијјәни горујуруг?

• Тә’гиб олунмағымыза бахмајараг, биз нәјә ҝөрә шадыг?

• Биз, мәһсул јығымында нәјә ҝөрә сә’јлә вә ләнҝимәдән чалышмалыјыг?

[14 вә 15-ҹи сәһифәләрдәки шәкилләр]

Руһани мәһсул јығымында иштирак едәнләрә мәләкләр көмәк едир.

[16-ҹы сәһифәдәки шәкил]

Информасија јүрүшләри Падшаһлыг һаггындакы хош хәбәрә чох инсанларын диггәтини ҹәлб етди.

[16-ҹы сәһифәдәки шәкил]

Биз әкир вә суварырыг, Аллаһ исә бөјүдүр.