Аллаһа јахынлашын
«О һеч биримиздән узаг дејил»
ҮММАНСЫЗ Каинатла мүгајисәдә инсанлар доғрудан да ҹылыздырлар. Бәлкә дә, сиз өзүнүздән сорушмусунуз: «Ади инсанын Күлли-Ихтијар Аллаһла јахын мүнасибәт гурмасы мүмкүндүрмү?» Ады Јеһова олан Аллаһ Она јахынлашмағымызы истәдији тәгдирдә бу мүмкүн ола биләр. Бәс О буну истәјирми? Тәсәлливериҹи ҹавабы һәвари Павелин Афинанын савадлы адамларына сөјләдији бәлағәтли нитгиндән тапмаг олар. Онун сөзләри Һәвариләрин ишләри 17:24-27 ајәләриндә јазылмышдыр. Павелин Јеһова һаггында хатырлатдығы дөрд мәгама диггәт јетирәк.
Биринҹиси, Павел дејир ки, Аллаһ ‘дүнјаны вә онун ичиндә олан бүтүн шејләри јарадыб’ (24-ҹү ајә). Һәјаты белә хош едән ҝөзәллик вә мүхтәлифлик Јараданымызын гајғыкешлијинә вә мәһәббәтинә шаһидлик едир (Ромалылара 1:20). Белә Аллаһын Өзүнү севдикләриндән узаг тутмасыны фикирләшмәк ағылсызлыг оларды.
Икинҹиси, Јеһова ‘һамыја һәјат, нәфәс вә һәр шеји верир’ (25-ҹи ајә). Јеһова һәјат Мәнбәјидир (Мәзмур 36:9). Һәјат үчүн ваҹиб олан һава, су вә гида Јараданымызын вердији бәхшишдир (Јагуб 1:17). Сәхавәтли Аллаһымызын Өзүнү тәҹрид етмәси вә беләликлә дә, бизи Ону танымаг вә јахынлашмаг имканындан мәһрум етмәсини дүшүнмәк һеч ағласығандырмы?
Үчүнҹүсү, Аллаһ ‘бүтүн халглардан олан инсанлары бир гандан јарадыб’ (26-ҹы ајә). Јеһова үзҝөрән дејил вә һәр ҹүр гәрәзли мүнасибәтдән тамамилә узагдыр (Һәвариләрин ишләри 10:34). Ахы башга ҹүр неҹә ола биләр? О, ‘бир ганы’, башга сөзлә десәк, Адәми јаратды, ондан исә бүтүн халглар вә иргләр төрәјиб. Аллаһ ‘истәјир ки, бүтүн инсанлар хилас олсунлар’ (1 Тимотејә 2:4). Беләликлә, Она јахынлашмаг дәримизин рәнҝиндән, миллијјәтимиздән, јахуд етник мәншәјимиздән асылы олмајараг, һамымыз үчүн мүмкүндүр.
Нәһајәт, Павел инсанын үрәјинә су сәпән бир һәгигәти сөјләјир: Јеһова «һеч биримиздән узаг дејил» (27-ҹи ајә). Јеһова уҹа Аллаһ олса да, Она сәмими-гәлбдән јахынлашмаг истәјәнләр үчүн һәмишә әлчатандыр. Онун Кәламы бизи әмин едир ки, Аллаһ узаг дејил, әксинә, «Ону... чағыран бүтүн инсанлара јахындыр» (Мәзмур 145:18).
Павелин сөзләриндән ајдын ҝөрүнүр ки, Аллаһ Она јахын олмағымызы истәјир. Анҹаг Павелин дедији кими, Јеһова белә јахынлығы јалныз Ону ‘ахтаранлара’ вә ‘әл илә јохлаја-јохлаја тапанлара’ бәхш едир (27-ҹи ајә). Мүгәддәс Китаб тәрҹүмәчиләри үчүн мәлумат китабында дејилир ки, «һәр ики фел әлчатан имкан... вә ја әлчатан арзуну ифадә едир». Мәсәлән, гаранлыг, лакин сизә јахшы таныш олан бир отагда ишығы јандырмаг үчүн әлинизлә јохлаја-јохлаја дүјмәни, јахуд гапыны ахтаранда онлары тапаҹағыныза шүбһә етмирсиниз. Еләҹә дә биз Аллаһы сәмими-гәлбдән ахтаранда әмин ола биләрик ки, ҹәһдләримиз боша чыхмајаҹаг. Павел бизи әмин едир ки, Ону мүтләг ‘тапаҹағыг’ (27-ҹи ајә).
Бәс сиз Аллаһа јахын олмағы арзулајырсынызмы? Әҝәр Ону «әл илә јохлаја-јохлаја» иманла ахтармаға башласаныз, үмидләриниз боша чыхмајаҹаг. Јеһованы тапмаг чәтин дејил, чүнки «О һеч биримиздән узаг дејил».