Савадсыз, садә адамлар

1, 2. Мәбәдин дарвазасынын јанында Бутрусла Јәһја һансы мөҹүзәни ҝөстәрдиләр?

ҜҮНОРТА чағыдыр. Ҝүнәш издиһамын үстүнә шәфәг сачыр. Мөмин јәһудиләр вә Исанын шаҝирдләри јаваш-јаваш мәбәдин һәјәтинә топлашырлар. Бир аздан «дуа вахты» башлајаҹагa (Һәв. 2:46; 3:1). Бутрусла Јәһја издиһамын арасындан өзләринә јол ачараг мәбәдин Ҝөзәл Гапы адланан дарвазасына тәрәф ҝедирләр. Бу сәс-күјүн вә ајаг сәсләринин ичиндә анаданҝәлмә топал бир адам сәдәгә диләјир (Һәв. 3:2; 4:22).

² Бутрусла Јәһјанын јахынлашдығыны ҝөрән диләнчи адәтән сөјләдији сөзләрлә онлардан сәдәгә диләјир. Һәвариләр ајаг сахлајыр. Буну ҝөрән киши үмидлә ҝөзләрини онлара дикир. «Мәндә нә ҝүмүш вар, нә дә гызыл, — дејә Бутрус дилләнир,— амма нәјим варса, ону сәнә верирәм: нәсрани Иса Мәсиһин ады илә сәнә дејирәм, јери!» Бутрусун топалын әлиндән тутуб галдырдығыны вә онун өмрүндә илк дәфә ајаглары үстүндә дурдуғуну ҝөрән издиһамын һејрәтдән неҹә донуб галдығыны бир тәсәввүр ет! (Һәв. 3:6, 7). Кишинин шәфа тапмыш ајагларына неҹә һејрәтлә бахдығыны, сонра исә үркәк-үркәк илк аддымларыны атдығыны ҝөзләринин өнүндә ҹанландыра биләрсәнми? Һеч шүбһәсиз, о атылыб дүшә-дүшә уҹадан Аллаһа һәмд етмәјә башлајыр!

3. Издиһамын вә шәфа тапмыш адамын гаршысында һансы мөһтәшәм һәдијјәни алмаг имканы ачылмышды?

³ Вәҹдә ҝәлмиш ҹамаат Сүлејман сүтунларында дуран Бутрусла Јәһјаја тәрәф ахышыр. Бир дәфә Иса мәһз бурада тәлим вермишди. Инди исә Бутрус һәмин јердә дурараг индиҹә баш верән һадисәнин мәғзини халга ачыглајыр (Јәһ. 10:23). О, ҹамаата вә сағалтдығы адама гызылдан вә ҝүмүшдән даһа дәјәрли бир әнам тәклиф едир. Һәмин әнам өзүнә шәфа тапмагдан даһа чох шеји дахил едир. Бу төвбә етмәк, ҝүнаһларын бағышланмасы вә Јеһованын тәјин етдији «һәјатын Өндәри» Иса Мәсиһин давамчысы олмаг имканыдыр (Һәв. 3:15).

4. а) Топал адамын мөҹүзәви шәкилдә шәфа тапмасы һансы гаршыдурмаја ҝәтириб чыхарды? б) Бу фәсилдә һансы ики суалы арашдыраҹағыг?

⁴ Неҹә дә әламәтдар ҝүн иди! Бир нәфәрә шәфа верилмишди, о, артыг ҝәзирди. Минләрлә башга инсана исә Аллаһа лајиг тәрздә һәјат сүрмәләри үчүн руһани ҹәһәтдән сағалмаг имканы верилмишди (Кол. 1:9, 10). Бүтүн бунлардан әлавә, һәмин ҝүн баш верән һадисәләр Мәсиһин садиг давамчылары илә һакимијјәт саһибләри арасында гаршыдурмаја сәбәб олду. Чүнки онлар Падшаһлыг һагда хәбәри бәјан етмәк әмринин јеринә јетирилмәсинә мане олмаға чалышырдылар (Һәв. 1:8). Бутрусла Јәһјанын — савадсыз, садә адамларын издиһама шаһидлик едәркән истифадә етдикләри үсулларындан, еләҹә дә онларын әһвал-руһијјәсиндән нә өјрәнә биләрик?b (Һәв. 4:13). Тәгибләрлә үзләшәркән онларын вә башга шаҝирдләрин нүмунәсини неҹә өрнәк ҝөтүрә биләрик?

Өз гүввәләри сајәсиндә дејил (Һәвариләрин ишләри 3:11—26)

5. Бутрусун ҹамаата мүраҹиәтиндән нә өјрәнирик?

⁵ Бутрус вә Јәһја издиһамын гаршысында дурмушдулар. Һәвариләр билирдиләр ки, онларын арасында бу јахынларда Исанын едам едилмәсини тәләб едәнләр дә ола биләрди (Марк 15:8—15; Һәв. 3:13—15). Топалын Исанын ады илә сағалдығыны горхмадан бәјан едән Бутрусун неҹә бөјүк ҹәсарәт ҝөстәрдији һагда бир дүшүн. Бутрус инсанлары разы салмаг хатиринә һәгигәти тәһриф етмәди. О, Мәсиһин өлүмүндә издиһамын мәсулијјәт дашыдығыны ачыг-ајдын сөјләди. Лакин Бутрусун һәмин адамларла һеч бир әдавәти јох иди, чүнки онлар «ҹаһилликдән» белә етмишдиләр (Һәв. 3:17). О онлара гардашлары кими мүраҹиәт етди вә диггәти Падшаһлыг һаггында хәбәрин мүсбәт ҹәһәтләринә јөнәлтди. Әҝәр төвбә едиб, Мәсиһә иман ҝәтирсәјдиләр, онлар үчүн Јеһовадан «тәравәт мөвсүмү» ҝәләҹәкди (Һәв. 3:19). Биз дә һәмчинин Аллаһын јахынлашан һөкмүнү ҹәсарәтлә вә олдуғу кими бәјан етмәлијик. Ејни заманда кобуд, габа вә ја тәнгиди данышмамалыјыг. Әксинә, биз тәблиғ етдијимиз инсанлара ҝәләҹәк баҹы-гардашларымыз кими бахыр вә Бутрус кими диггәти Падшаһлыг һаггында хәбәрин мүсбәт ҹәһәтләринә ҹәмләјирик.

6. Бутрусла Јәһја тәвазөкар вә һәлим олдугларыны неҹә ҝөстәрдиләр?

⁶ Һәвариләр тәвазөкар адамлар иди. Онлар ҝөстәрдикләри мөҹүзәјә ҝөрә шәрәфи өзләринә ҝөтүрмәдиләр. Әксинә, Бутрус ҹамаата деди: «Јохса биз өз гүввәмиз ја да мөминлијимиз сајәсиндә онун ајагларыны сағалтмышыг ки, бизә белә бахырсыныз?» (Һәв. 3:12). Бутрус вә башга һәвариләр билирдиләр ки, хидмәтдә әлдә етдикләри истәнилән наилијјәт өзләринин јох, Аллаһын ҝүҹү сајәсиндәдир. Буна ҝөрә дә онлар тәвазөкарлыгла иззәти Јеһоваја вә Исаја верирдиләр.

7, 8. а) Биз инсанлара һансы әнамы әлдә етмәјә көмәк едә биләрик? б) «Һәр шејин бәрпа едиләҹәји» һагда вәд бу ҝүн неҹә јеринә јетир?

⁷ Падшаһлығын тәблиғи ишини иҹра едәркән биз дә онлар кими тәвазөкар олмалыјыг. Дүздүр, бу ҝүн Аллаһын руһу мәсиһиләрә мөҹүзәви шәкилдә инсанлары сағалтмаг баҹарығыны вермир. Бунунла белә, биз инсанлара Аллаһа вә Мәсиһә иман ҝәтирмәјә, еләҹә дә Бутрусун тәклиф етдији әнамы — ҝүнаһларынын бағышланмасы вә Јеһовадан тәравәт алмаг имканыны әлдә етмәјә көмәк едә биләрик. Һәр ил јүз минләрлә инсан бу имкандан истифадә едәрәк Мәсиһин вәфтиз олунмуш давамчысы олур.

⁸ Һәгигәтән дә, биз Бутрусун бәһс етдији «һәр шејин бәрпа» едилдији вахтда јашајырыг. Аллаһын «гәдимдә јашамыш мүгәддәс пејғәмбәрләри васитәсилә» сөјләдикләри јеринә јетди, белә ки, 1914-ҹү илдә ҝөјдә Аллаһын Падшаһлығы тәсис олунду (Һәв. 3:21; Зәб. 110:1—3; Дән. 4:16, 17). Бундан аз сонра Мәсиһ јер үзүндә һәгиги ибадәтин бәрпа олунмасына нәзарәт етмәјә башлады. Нәтиҹәдә, милјонларла инсан руһани ҹәннәтә ҝәтириләрәк Аллаһын Падшаһлығынын тәбәәләри олур. Онлар позғунлашан көһнә шәхсијјәти әјинләриндән чыхарыб «Аллаһын ирадәсинә әсасән... јарадылмыш јени шәхсијјәтә» бүрүнүрләр (Ефес. 4:22—24). Топал диләнчинин шәфа тапмасы кими, бу һејрәтамиз иш дә инсан ҹәһдләринин јох, Аллаһын руһунун сајәсиндә һәјата кечирилир. Бутрус кими биз дә башгаларына тәлим верәркән Аллаһын Кәламындан ҹәсарәтлә вә мәһарәтлә истифадә етмәлијик. Инсанлара Мәсиһин давамчысы олмаға көмәк едәркән газандығымыз һәр бир уғуру өзүмүзүн дејил, Аллаһын гүввәси сајәсиндә әлдә едирик.

«Биз... данышмаја билмәрик» (Һәвариләрин ишләри 4:1—22)

9—11. а) Јәһуди рәһбәрләри Бутрусла Јәһјанын бәјан етдији хәбәрә неҹә мүнасибәт ҝөстәрдиләр? б) Һәвариләр нә етмәк әзминдә идиләр?

⁹ Бутрусун нитги, еләҹә дә шәфа тапмыш топалын севинҹдән атылыб-дүшмәси, сәс-күј салмасы ҹамаатын арасында чахнашмаја сәбәб олду. Бу она ҝәтириб чыхарды ки, мәбәдин әразисиндә асајиши горумаг үчүн тәјин олунан мәбәдин рәиси вә бөјүк каһинләр мәсәләни арашдырмаға башладылар. Еһтимал ки, һәмин адамлар, ромалыларла сүлһдә олмаға чалышан, фәрисиләрин чох севдији шифаһи ганунлары рәдд едән вә дирилмәјә истеһза илә јанашан зәнҝин вә бөјүк сијаси нүфуза малик олан саддукиләр идиc. Бутрусла Јәһјанын мәбәддә Исанын дирилдијини ҹәсарәтлә өјрәтдикләрини ешидәндә онлар өзләриндән чыхдылар.

¹⁰ Гәзәб ичиндә олан дүшмәнләр Бутрусла Јәһјаны зиндана салдылар вә сәһәри ҝүн онлары сүрүјәрәк јәһуди али мәһкәмәсинин өнүнә чыхардылар. Өзләрини үстүн һесаб едән рәһбәрләрин фикринҹә, һәвариләр мәбәддә тәлим вермәјә ихтијары чатмајан «савадсыз, садә адам»лар идиләр, чүнки онлар һеч бир дини мәктәбдә тәһсил алмамышдылар. Лакин онларын чәкинмәдән вә әминликлә данышмасы мәһкәмә үзвләринин тәәҹҹүбүнә сәбәб олду. Бәс Бутрусла Јәһја нәјин сајәсиндә белә данышырдылар? Сәбәбләрдән бири о иди ки, онлар «Иса илә бир јердә олан адамлардан» идиләр (Һәв. 4:13). Онларын Ағасы мирзәләр кими дејил, әсл һакимијјәт саһиби кими өјрәдирди (Мәт. 7:28, 29).

¹¹ Һакимләр һәвариләрә тәблиғ етмәји дајандырмағы әмр етдиләр. Бу ҹәмијјәтдә мәһкәмәнин әмри ганун иди. Ҹәми бир нечә һәфтә әввәл Иса мәһкәмә гаршысына чыхарыланда елә бу мәһкәмә үзвләри онун һагда демишди: «О өлмәлидир» (Мәт. 26:59—66). Амма бу, Бутрусла Јәһјаны горхутмурду. Зәнҝин, али тәһсилли вә нүфузлу шәхсләрин гаршысында дуран Бутрусла Јәһја ҹәсарәтлә, ејни заманда һөрмәтҹил тәрздә дедиләр: «Өзүнүз фикирләшин: Аллаһын гаршысында Аллаһы гојуб сизә гулаг асмаг нә дәрәҹәдә дүзҝүндүр? Биз ҝөрдүјүмүз вә ешитдијимиз шејләр барәсиндә данышмаја билмәрик» (Һәв. 4:19, 20).

12. Ҹәсарәтимизи вә әминлијимизи артырмаға нә көмәк едә биләр?

¹² Сән дә елә ҹәсарәт ҝөстәрә биләрсәнми? Гаршында варлы, тәһсилли, јахуд нүфузлу шәхсләрә шаһидлик етмәк имканы ачыланда һансы һиссләри кечирирсән? Аилә үзвләрин, иш вә мәктәб јолдашларын етигадына истеһза едәндә неҹә? Горхурсан? Әҝәр беләдирсә, һиссләринә галиб ҝәлә биләрсән. Јер үзүндә оланда Иса һәвариләринә етигадларыны әминликлә вә һөрмәтҹил тәрздә мүдафиә етмәји өјрәтмишди (Мәт. 10:11—18). Дирилдикдән сонра о, «дөврүн јекунуна кими һәмишә» шаҝирдләри илә олаҹағыны вәд етмишди (Мәт. 28:20). «Садиг вә ағыллы нөкәр» Исанын рәһбәрлији алтында бизә иманымызы неҹә мүдафиә етмәји өјрәдир (Мәт. 24:45—47; 1 Бут. 3:15). Бу, јығынҹаг ҝөрүшләриндә, мәсәлән, «Мәсиһи һәјаты вә ибадәти» ҝөрүшүндә верилән тәлимин, һәмчинин jw.org сајтымыздакы «Мүгәддәс Китаба аид суаллара ҹаваб» бөлмәсиндәки мәгаләләрин васитәсилә һәјата кечирилир. Сән бүтүн бунлардан там фајда әлдә етмәјә чалышырсан? Әҝәр беләдирсә, ҝетдикҹә ҹәсарәтин вә әминлијин артаҹаг. Һәмчинин һәвариләр кими, сән дә јол вермәјәҹәксән ки, ҝөрдүјүн вә ешитдијин ҝөзәл руһани һәгигәтләр барәсиндә данышмағына нә исә мане олсун.

«Уҹадан Аллаһа дуа етдиләр» (Һәвариләрин ишләри 4:23—31)

13, 14. Тәгибләрлә үзләшәндә нә етмәк лазымдыр вә нә үчүн?

¹³ Һәбсдән азад олан кими Бутрусла Јәһја јығынҹағын үзвләри илә ҝөрүшмәјә ҝетдиләр. Онлар тәблиғи давам етдирмәјә ҹәсарәт алмаг үчүн «бирликдә уҹадан Аллаһа дуа етдиләр» (Һәв. 4:24). Бутрус өз гүввәсинә ҝүвәнәрәк Аллаһын ирадәсини јеринә јетирмәјә чалышмағын ағылсызлыг олдуғуну чох ҝөзәл билирди. Ҹәми бир нечә һәфтә әввәл о, өзүндән разы һалда Исаја демишди: «Һамы сәндән үз дөндәрсә дә, мән өмрүмдә сәндән үз дөндәрмәрәм!» Амма Исанын сөјләдији кими, Бутрус инсанлардан горхараг достуну вә мүәллимини инкар етди. Лакин Бутрус өз сәһвиндән нәтиҹә чыхарды (Мәт. 26:33, 34, 69—75).

¹⁴ Мәсиһ һаггында шаһидлик етмәк тапшырығыны јеринә јетирмәк үчүн гәтијјәтли олмаг аздыр. Тәгибчиләр сәни имандан дөндәрмәјә вә ја тәблиғ етмәкдә сәнә мане олмаға чалышсалар, Бутрус вә Јәһја кими давран. Дуада Јеһовадан ҝүҹ истә. Јығынҹағын көмәјинә архалан. Үзләшдијин чәтинликләр барәдә ағсаггалларла вә диҝәр јеткин мәсиһиләрлә даныш. Башгаларынын дуалары сәни чох мөһкәмләндирә биләр (Ефес. 6:18; Јаг. 5:16).

15. Нә вахтса тәблиғ етмәји мүвәггәти олараг дајандыранлар нәјә ҝөрә руһдан дүшмәмәлидирләр?

¹⁵ Әҝәр нә вахтса тәгибләр гаршысында тәслим олуб тәблиғ етмәји мүвәггәти олараг дајандырмысанса, руһдан дүшмә. Јадындадырса, һәвариләрин һамысы Исанын өлүмүндән сонра бир мүддәт тәблиғи дајандырдылар, амма чох кечмәмиш јенидән бу ишдә фәал олдулар (Мәт. 26:56; 28:10, 16—20). Кечмишдә етдијин сәһвләрә ҝөрә руһдан дүшмәк әвәзинә, онлардан нәтиҹә чыхарыб башгаларыны мөһкәмләндирә биләрсәнми?

16, 17. Мәсиһин давамчыларынын Јерусәлимдә јығышаркән етдикләри дуадан нә өјрәнирик?

¹⁶ Бәс һакимијјәт башында оланлар бизи сыхышдыранда нә һагда дуа етмәлијик? Диггәт јетир ки, шаҝирдләр сынагларын гуртармасы һаггында дуа етмирдиләр. Исанын «мәни тәгиб едибләрсә, сизи дә тәгиб едәҹәкләр» сөзләри онларын зеһниндә һәкк олунмушду (Јәһ. 15:20). Буна ҝөрә дә һәмин садиг шаҝирдләр Јеһовадан хаһиш етдиләр ки, дүшмәнләрин һәдә-горхуларыны ешитсин (Һәв. 4:29). Шаҝирдләр вәзијјәти һәртәрәфли ҝөрүр вә баша дүшүрләр ки, үзләшдикләри тәгибләр, әслиндә, пејғәмбәрлијин јеринә јетмәсидир. Онлар билирдиләр ки, рәһбәрләр һәр нә десәләр дә, Исанын өјрәтдији дуада дејилдији кими, Аллаһын ирадәси «јердә дә јеринә» јетәҹәк (Мәт. 6:9, 10).

¹⁷ Јеһованын ирадәсини јеринә јетирмәк үчүн шаҝирдләр Она дуа едәрәк дедиләр: «Өз гулларына гүввәт вер ки,.. Сәнин сөзүнү бундан сонра да ҹәсарәтлә данышаг». Бәс Јеһованын буна ҹавабы неҹә олду? «Онларын... јығышдыглары јер силкәләнди вә һәр бири мүгәддәс руһла долду. Онлар Аллаһын сөзүнү ҹәсарәтлә данышмаға башладылар» (Һәв. 4:29—31). Бәли, Аллаһын ирадәсинин јеринә јетмәсинә һеч нә мане ола билмәз (Әшј. 55:11). Бу нә гәдәр гејри-мүмкүн ҝөрүнсә дә вә тәгибчиләр нә гәдәр ҝүҹлү олсалар да, Аллаһа дуа етсәк, Онун сөзүнү ҹәсарәтлә сөјләмәјә давам етмәк үчүн бизә лазым олан ҝүҹү верәҹәјинә әмин ола биләрик.

«Инсанлара јох, Аллаһа» һесабат верәнләр (Һәвариләрин ишләри 4:32—5:11)

18. Јерусәлим јығынҹағынын үзвләри бир-бириләри үчүн нә едирдиләр?

¹⁸ Тәмәли јениҹә гојулмуш Јерусәлим јығынҹағы тезликлә бөјүдү. Онун үзвләринин сајы 5000-дән чох олдуd. Мүхтәлиф мәншәдән олмаларына бахмајараг, шаҝирдләр «ҹанбир гәлбдә јашајырды». Онлар «јекдил вә һәмфикир» идиләр (Һәв. 4:32; 1 Кор. 1:10). Шаҝирдләр чәкдикләри зәһмәтә бәрәкәт вермәси үчүн Јеһоваја дуа етмәклә кифајәтләнмирдиләр. Онлар руһани, лазым ҝәлдикдә исә мадди ҹәһәтдән бир-бириләринә әл тутурдулар (1 Јәһ. 3:16—18). Мәсәлән, һәвариләрин Барнәба ләгәбини вердији Јусиф адлы шаҝирд өз торпаг саһәсини сатыб, бүтүн пулу тәмәннасыз олараг ианә етди ки, узаг јерләрдән ҝәләнләр јени иманлары һаггында даһа чох өјрәнмәк үчүн Јерусәлимдә бир гәдәр артыг гала билсинләр.

19. Јеһова нә үчүн Һәнәнја вә Сәфирәни өлүмә мәһкум етди?

¹⁹ Һәнәнја вә Сәфирә адлы әр-арвад да өз мүлкләрини сатыб пулуну ианә етдиләр. Онлар өзләрини елә ҝөстәрдиләр ки, ҝуја пулун һамысыны верибләр, амма, әслиндә, «пулун бир гисмини» ҝизләтмишдиләр (Һәв. 5:2). Јеһова бу әр-арвады өлүмлә ҹәзаландырды. Буна сәбәб, онларын вердији пулун кифајәт гәдәр олмамасы јох, нијјәтләринин пис олмасы вә јалан данышмалары иди. Онлар «инсанлара јох, Аллаһа јалан» сөјләмишдиләр (Һәв. 5:4). Исанын мүһакимә етдији икиүзлүләр кими, Һәнәнја вә Сәфирәни дә Аллаһы разы салмагдан чох, инсанларын ҝөзүндә иззәт газанмаг марагландырырды (Мәт. 6:1—3).

20. Јеһова үчүн етдикләримизлә бағлы биз нә өјрәндик?

²⁰ Биринҹи әсрдә Јерусәлимдә јашајан садиг шаҝирдләр кими, милјонларла мүасир Јеһованын Шаһидләри дә сәхавәтлә көнүллү ианәләр едәрәк үмумдүнја тәблиғ ишини дәстәкләјирләр. Бу иши дәстәкләмәк үчүн һеч кими вахтыны вә ја пулуну вермәјә мәҹбур етмирләр. Бәли, Јеһова истәмир ки, биз Она көнүлсүз вә ја мәҹбури хидмәт едәк (2 Кор. 9:7). Јеһованы вердијимиз шејләрин мигдары јох, онлары һансы нијјәтдән ирәли ҝәләрәк вермәјимиз марагландырыр (Марк 12:41—44). Биз һеч вахт Һәнәнја вә Сәфирә кими шәхси мәнфәәтимиз вә ја өзүмүзә иззәт ахтардығымыз үчүн хидмәт етмәк истәмәздик. Әксинә, Бутрус, Јәһја вә Барнәба кими, ҝәл биз дә хидмәтимизи Јеһоваја вә инсанлара олан саф мәһәббәтдән ирәли ҝәләрәк иҹра едәк (Мәт. 22:37—40).