Јеһова Өз сүрүсү үчүн чобанлар һазырлајыр
«Рәбб һикмәт верир, Онун ағзындан билик вә дәрракә чыхыр» (СҮЛЕЈМАНЫН МӘСӘЛЛӘРИ 2:6).
1, 2. Вәфтиз олунмуш гардашлары јығынҹагда үзәрләринә әлавә мәс’улијјәт ҝөтүрмәјә нә тәшвиг едир?
АРТЫГ једди илдир ки, ағсаггал хидмәт едән Ник дејир: «Мән ағсаггал тә’јин едиләндә өзүмү чох хошбәхт һисс едирдим. Бу тә’јинат гаршымда хидмәтими ҝенишләндирмәк имканыны ачырды. Мәним үчүн етдији һәр шејә ҝөрә Јеһоваја миннәтдарлығымы билдирмәк истәјирдим. Ағсаггалларын вахтилә мәнә көмәк етдикләри кими, мән дә јығынҹаг үзвләринә баҹардығым гәдәр көмәк етмәк истәјирдим». Лакин Ник севинмәклә јанашы һәм дә бир гәдәр нараһат иди. О давам едир: «Бу тә’јинаты аланда мәним һеч 30 јашым јох иди. Мәни нараһат едән о иди ки, јахшы чобан олмаг үчүн һикмәт вә дәрракәм чатышмаз».
2 Сүрүсүнүн гејдинә галмаг үчүн Јеһованын тә’јин етдији кишиләрин севинмәјә бир чох сәбәби вар. Һәвари Павел Исанын сөзләрини ситат ҝәтирәрәк һәмин сәбәбләрдән бирини ефесли ағсаггаллара хатырлатмышды: «Вермәк алмагдан даһа бөјүк бәхтијарлыг ҝәтирир» (Һәвариләрин ишләри 20:35). Ағсаггал вә ја хидмәти көмәкчи олан гардашын һәм Јеһоваја, һәм дә јығынҹаға даһа чох «вермәк» имканы вардыр. Мәсәлән, хидмәти көмәкчиләр ағсаггаллара көмәк едирләр. Онлар чохлу вахт апаран, амма ваҹиб олан ишләрлә мәшғул олурлар. Бу гардашлар гијмәтли хидмәтләрини Аллаһа вә гоншуларына мәһәббәтдән ирәли ҝәләрәк иҹра едирләр (Марк 12:30, 31).
3. Бә’зи гардашлар јығынҹагда әлавә мәс’улијјәтә нәјә ҝөрә ҹан атмырлар?
3 Бәс әҝәр вәфтиз олунмуш гардаш бу мәс’улијјәтин өһдәсиндән ҝәлә билмәјәҹәјини дүшүнәрәк хидмәти көмәкчи вә сонра да ағсаггал олмаға ҹан атмырса, онда неҹә? Ола билсин, Ник кими о да фикирләшә биләр ки, јахшы чобан олмаг үчүн онун лазыми баҹарығы јохдур. Әҝәр сән вәфтиз олунмуш гардашсанса, еһтимал ки, сәнин дә белә фикирләрин олур. Бу ҹүр ниҝаранчылыг әсассыз дејил. Чобанлар сүрү илә неҹә рәфтар етдикләринә ҝөрә Јеһованын гаршысында ҹавабдеһдирләр. Иса демишдир: «Кимә чох верилмишсә, ондан чох тәләб олунаҹагдыр; вә кимә чох әманәт едилмишсә, ондан даһа чох истәниләҹәкдир» (Лука 12:48).
4. Јеһова, гојунларыны отармаг үчүн тә’јин етдији гардашлара неҹә көмәк едир?
4 Мәҝәр Јеһова хидмәти көмәкчи вә ағсаггал тә’јин етдији кишиләри бу мәс’улијјәт јүкүнү тәк дашымаға гојаҹаг? Хејр, Јеһова онлара практики көмәк тәгдим едир. Бу көмәјин сајәсиндә онлар нәинки тә’јинатларынын өһдәсиндән ҝәлә биләҹәк, һәтта ону мүвәффәгијјәтлә јеринә јетирәҹәкләр. Кечән мәгаләдә ҝөрдүјүмүз кими, Јеһова онлара Өз мүгәддәс руһуну верир. Руһун сәмәрәси чобанлара сүрүнү шәфгәтлә отармаға көмәк едир (Һәвариләрин ишләри 20:28; Галатијалылара 5:22, 23). Үстәлик, Јеһова онлара һикмәт, билик вә дәрракә дә верир (Сүлејманын мәсәлләри 2:6). О буну неҹә едир? Ҝәлин бирликдә Јеһованын бу чобанлара неҹә тә’лим вердијинин үч үсулуну арашдыраг.
Тәҹрүбәли чобанлар тә’лим верирләр
5. Петер вә Јәһја нәјә ҝөрә мәһарәтли мүәллим идиләр?
5 Дүнја нөгтеји-нәзәринҹә мүдрик һакимләр Синедрион гаршысында дуран һәвари Петер вә Јәһјаны «охумамыш, авам адамлар» һесаб едирдиләр. Чүнки онлар охујуб јазмағы баҹарсалар да, Мүгәддәс Јазылар үзрә раввин мәктәбиндә тә’лим алмамышдылар. Буна бахмајараг, Петер, Јәһја вә диҝәр шаҝирдләр мәһарәтли мүәллим идиләр: онлара гулаг асанларын әксәријјәти Исаја иман ҝәтирирдиләр. Бәс бу садә инсанлара белә ҝөзәл мүәллим олмагда нә көмәк етмишди? Мәһкәмә үзвләри Петер вә Јәһјаја гулаг асдыгдан сонра ‘онларын Иса илә бәрабәр олдугларыны’ хатырладылар (Һәвариләрин ишләри 4:1-4, 13). Бәли, һәвариләр Аллаһдан мүгәддәс руһ алмышдылар (Һәвариләрин ишләри 1:8). Һәмчинин Иса да онлары өјрәтмишди. Бу, һәтта руһани ҝөзләри кор олан һакимләрә дә ајдын иди. Иса јер үзүндә оланда һәвариләрә јалныз гојунлары јығмағы дејил, онлары отармағы да өјрәдирди (Матта 11:29; 20:24-28; 1 Петер 5:4).
6. Иса вә Павел башгаларыны өјрәтмәкдә һансы нүмунәни гојмушлар?
6 Иса дирилдикдән сонра да чобан тә’јин етдији кишиләри өјрәтмәјә давам едирди (Вәһј 1:1; 2:1–3:22). Мәсәлән, о, Павели шәхсән сечиб онун тә’лиминә нәзарәт едирди (Һәвариләрин ишләри 22:6-10). Павел алдығы тә’лими гијмәтләндирирди вә өјрәндикләрини диҝәр ағсаггалларла бөлүшүрдү (Һәвариләрин ишләри 20:17-35). Мәсәлән, Тимотејин «утанмаға әсасы олмајан... ишчи» олмасы үчүн Павел чохлу вахт вә гүввә сәрф етмишди (2 Тимотејә 2:15). Онларын арасында сых достлуг телләри јаранды. Бир гәдәр әввәл Павел Тимотеј һаггында јазмышды: «О, ушаг атасына хидмәт етдији кими, Мүждәни јајмаг ишиндә мәнә хидмәт етди» (Филипилиләрә 2:22). Павел Тимотеји вә ја башга бир кимсәни өзүнүн шаҝирди етмәјә чалышмырды. ‘Мәсиһи тәглид етдији кими’, һәмиманлыларыны да ‘өзүнү тәглид етмәјә’ тәшвиг едирди (1 Коринфлиләрә 11:1).
7, 8. а) Ағсаггалларын Исаны вә Павели тәглид етмәсинин јахшы бәһрәләр ҝәтирдији һансы нүмунәдән ҝөрүнүр? б) Чобанлар ҝәләҹәк хидмәти көмәкчиләрә вә ағсаггаллара нә вахтдан тә’лим вермәјә башламалыдырлар?
7 Тәҹрүбәли чобанлар Исанын вә Павелин нүмунәсини тәглид едәрәк, вәфтиз олунмуш гардашлара тә’лим вермәкдә тәшәббүсү өз үзәрләринә ҝөтүрүрләр. Бу јахшы нәтиҹәләр ҝәтирир. Мәсәлән, дини ҹәһәтдән ајрылмыш аиләдә бөјүјән вә бу јахынларда ағсаггал тә’јин едилән Чад дејир: «Илләр әрзиндә бир нечә тәҹрүбәли ағсаггал руһани ҹәһәтдән бөјүмәјимә көмәк едирди. Атам мәсиһчи олмадығы үчүн, бу ағсаггаллар мәнә гаршы хүсусилә диггәтли идиләр вә демәк олар ки, мәним руһани аталарым олмушдулар. Онлар мәни өзләри илә хидмәтә апарыр вә тәблиғ етмәји өјрәдирдиләр. Сонралар бир ағсаггал мәнә јығынҹагда алдығым тапшырыглары јеринә јетирмәји өјрәдирди».
8 Чадын нүмунәсиндән ҝөрүнүр ки, вәфтиз олунмуш гардашлар хидмәти көмәкчи вә ағсаггал үчүн тәләбләрә ҹаваб вермәздән хејли әввәл дәрракәли чобанлар онлара тә’лим вермәјә башлајырлар. Нијә? Чүнки Мүгәддәс Китабда дејилир ки, һәм хидмәти көмәкчиләр, һәм ағсаггаллар јүксәк әхлаги вә руһани нормалара һәлә тә’јинатларыны алмаздан әввәл мүвафиг олмалыдырлар. Онлар ‘габагҹадан имтаһан едилмәлидирләр’ (1 Тимотејә 3:1-10).
9. Јеткин ағсаггалларын һансы мәс’улијјәти вар вә нәјә ҝөрә?
9 Әҝәр вәфтиз олунмуш гардашлар имтаһан олунмалыдырларса, илк нөвбәдә тә’лим алмалары мәнтигәујғундур. Мәсәлән, шаҝирд, мүәллимин ону һазырлашдырмадығы чәтин имтаһаны верә биләрми? Чох еһтимал ки, јох. Демәли, тә’лим чох ваҹибдир. Амма виҹданлы мүәллим шаҝирди јалныз имтаһана һазырламагла кифајәтләнмир, она, алдығы билији тәтбиг етмәји дә өјрәдир. Чалышган ағсаггаллар да вәфтиз олунмуш гардашларын хидмәти көмәкчи вә ағсаггаллар үчүн гојулан тәләбләрә мүвафиг олмалары үчүн онлары практикада өјрәдирләр. Ағсаггаллар, гардашын бу тә’јинаты алмасына ҝөрә дејил, ҝәләҹәкдә сүрүнүн гајғысына лазымынҹа гала билмәси үчүн бу гәдәр чалышырлар (2 Тимотејә 2:2). Лакин илк нөвбәдә вәфтиз олунмуш гардашларын өзләри сә’ј ҝөстәрмәлидирләр (Титуса 1:5-9). Тәҹрүбәли чобанлар исә бу мәс’улијјәтләрә ҹан атан гардашлара даһа тез инкишаф етмәләри үчүн көмәк етмәјә һәмишә һазырдырлар.
10, 11. Чобанлар гардашлары ҝәләҹәк тә’јинатларына неҹә һазырлаја биләрләр?
10 Тәҹрүбәли чобанлар диҝәр гардашлары јығынҹагда мүхтәлиф тапшырыглары јеринә јетирмәјә неҹә өјрәдирләр? Илк нөвбәдә онлара мараг ҝөстәрмәклә. Ағсаггаллар бу гардашларла мүнтәзәм олараг хидмәтә чыхыр, ‘һәгигәт сөзүнү доғрулугла өјрәтмәк’ баҹарығыны инкишаф етдирмәкдә онлара көмәк едирләр (2 Тимотејә 2:15). Јеткин чобанлар һәмин гардашларла һәмиманлылара хидмәтин ҝәтирдији севинҹлә бөлүшүрләр. Һәмчинин онлар гаршыја руһани мәгсәд гојмағын вә она чатмағын шәхсән өзләринә ҝәтирдији мәмнунлугдан данышырлар. Гардаша, ‘сүрүјә нүмунә ола’ билмәси үчүн, шәхсијјәтиндә дәјишикликләр етмәк барәдә достҹасына, амма конкрет мәсләһәтләр дә верирләр (1 Петер 5:3, 5).
11 Мүдрик чобанлар, гардаш хидмәти көмәкчи тә’јин едилдикдән сонра да она тә’лим вермәјә давам едирләр. Онилликләр әрзиндә ағсаггал хидмәт едән Брус дејир: «Тәзә тә’јин едилән хидмәти көмәкчи илә бирҝә отуруб садиг вә ағыллы гулун вердији рәһбәрлијә бир даһа нәзәр салырыг. Һәмчинин ҝөрәҹәк иши илә бағлы ҝөстәриши дә охујуруг. Үзәринә гојулан мәс’улијјәти там мәнимсәјәнәдәк она көмәк етмәји хошлајырам». Хидмәти көмәкчинин тәҹрүбәси артдыгҹа ону чобан башчәкмәси етмәјә дә өјрәтмәк олар. Брус давам едир: «Хидмәти көмәкчини өзүмлә чобан зијарәтинә ҝөтүрәндә, баш чәкәҹәјимиз инсаны вә ја аиләни руһландыраҹаг конкрет ајәләри сечмәкдә она көмәк едирәм. Бу чох ваҹибдир, чүнки јахшы чобан олмаг үчүн хидмәти көмәкчи Мүгәддәс Китаб ајәләриндән елә истифадә етмәји өјрәнмәлидир ки, инсанын үрәјинә јол тапсын» (Ибраниләрә 4:12; 5:14).
12. Тәҹрүбәли чобанлар тәзәҹә тә’јин едилән ағсаггаллара неҹә тә’лим верә биләрләр?
12 Тәзә тә’јин едилмиш чобанлара да сонракы тә’лим чох бөјүк фајда ҝәтирир. Јухарыда ады чәкилән Ник дејир: «Ики тәҹрүбәли ағсаггалдан алдығым тә’лим мәнә чох көмәк олду. Бу гардашлар адәтән һәр бир конкрет мәсәләнин неҹә һәлл едиләҹәјини билирдиләр. Онлар нөгтеји-нәзәримлә разы олмасалар да, һәмишә мәнә диггәтлә гулаг асыр вә тәклифләримә ҹидди јанашараг ону мүзакирә едирдиләр. Онларын баҹы-гардашларла һәлим вә һөрмәтҹил давранышындан мән чох шеј өјрәнмишәм. Бу ағсаггаллар проблемләри һәлл едәркән вә ја кимисә руһландыраркән Мүгәддәс Китабдан мәһарәтлә истифадә етмәјин ваҹиблијини мәнә ашылајыблар».
Аллаһын Кәламындан алынан тә’лим
13. а) Јахшы чобан олмаг үчүн гардаша нә лазымдыр? б) Иса нәјә ҝөрә демишдир: «Вердијим тә’лим Мәним дејил»?
13 Бәли, ағсаггалын ‘камил олмасы [вә] һәр ҹүр хејирли ишә тәҹһиз едилмәси’ үчүн Аллаһын Кәламы олан Мүгәддәс Китабда лазыми ганун, принсип вә нүмунәләр вар (2 Тимотејә 3:16, 17). Гардаш тәһсилли ола биләр, лакин јахшы чобан олуб-олмамасы Мүгәддәс Китабы нә дәрәҹәдә јахшы билмәсиндән вә ону неҹә тәтбиг етмәсиндән асылыдыр. Исанын нүмунәсинә нәзәр салаг. О, дүнјада ән һикмәтли, биликли вә дәрракәли руһани чобан иди, лакин Јеһованын гојунларына тә’лим верәркән һеч вахт өз мүдриклијинә архајын олмурду. О дејирди: «Вердијим тә’лим Мәним дејил, Мәни Ҝөндәрәниндир». Нәјә ҝөрә Иса сәмави Атасынын мүдриклијинә архаланырды? О изаһ едирди: «Өзүндән сөјләјән, өзүнә иззәт ахтарар» (Јәһја 7:16, 18).
14. Нәдән ҝөрүнүр ки, садиг чобанлар өзләринә иззәт ахтармырлар?
14 Садиг чобанлар өзләринә иззәт ахтармырлар. Мәсләһәт верәндә вә ја кимисә руһландыранда онлар өз һикмәтинә дејил, Аллаһын Кәламына мүраҹиәт едирләр. Онлар баша дүшүрләр ки, чобанларын иши гојунлара ағсаггалын дејил, ‘Мәсиһин ағлына малик’ олмаға көмәк етмәкдир (1 Коринфлиләрә 2:14-16). Мәсәлән, әҝәр ағсаггал никаһда јаранан проблемләрлә бағлы әр-арвада вердији мәсләһәтләри Мүгәддәс Китаб принсипләринә вә «садиг вә ағыллы гул»ун тәгдим етдији нәшрләрдәки мә’лумата дејил, өз тәҹрүбәсинә әсасландырарса, онда неҹә? (Матта 24:45). Онун мәсләһәтинә јерли адәт-ән’әнәләр вә мәһдуд һәјат тәҹрүбәси өз тә’сирини ҝөстәрә биләр. Дүздүр, адәт-ән’әнәләрин һамысы пис дејил вә ағсаггалын јахшы һәјат тәҹрүбәси ола биләр. Лакин чобанлар гојунлары јерли адәт-ән’әнәләри вә инсанларын фикирләрини рәһбәр тутмаға дејил, Исанын сәсинә вә Јеһованын сөзләринә диггәт јетирмәјә тәшвиг едәндә, гојунлар даһа чох фајда әлдә едирләр (Мәзмур 12:6; Сүлејманын мәсәлләри 3:5, 6).
«Садиг вә ағыллы гул»ун вердији тә’лим
15. Иса «садиг вә ағыллы гул»а һансы тапшырығы вериб вә гул синфинин мүвәффәгијјәтли олмасынын сәбәбләриндән бири һансыдыр?
15 Руһани чобанлар олан һәвариләр — Петер, Јәһја вә Павел Исанын бәһс етдији «садиг вә ағыллы гул» синфинә дахил идиләр. Гул синфинә Мәсиһин ҝөјдә идарә етмәјә үмид едән вә һал-һазырда јердә јашајан мәсһ едилмиш гардашлары дахилдир (Вәһј 5:9, 10). Бу системин сон ҝүнләриндә Мәсиһин јер үзүндә јашајан гардашларынын сајы азалыб. Лакин Исанын онлара тапшырдығы иш, Падшаһлыг һаггында хош хәбәрин сон ҝәлмәздән әввәл тәблиғ едилмәси, бу ҝүн ҝөрүнмәмиш мигјасда јеринә јетирилир. Сајынын азалмасына бахмајараг, гул синфи бөјүк мүвәффәгијјәтләр әлдә едиб! Нијә? Сәбәбләрдән бири тәблиғ вә тә’лим вермәк ишиндә өзләринә көмәк етмәк үчүн ‘башга гојунлардан’ оланлары һазырламаларыдыр (Јәһја 10:16; Матта 24:14; 25:40). Һәмин ишин әксәр һиссәсини онлар бу ҝүн сәдагәтлә јеринә јетирирләр.
16. Гул синфи тә’јин едилмиш гардашлара неҹә тә’лим верир?
16 Гул синфи онларын тә’лимини неҹә тәшкил едир? Биринҹи әсрдә гул синфинин нүмајәндәләринә јығынҹаглара нәзарәтчи тә’јин етмәк вә һәмин нәзарәтчиләрә тә’лим вермәк сәлаһијјәти верилмишди. Бу ағсаггаллар исә өз нөвбәсиндә гојунлара тә’лим вермәли идиләр (1 Коринфлиләрә 4:17). Бу ҝүн дә һәр шеј мәһз бу гајдаја әсасән гурулуб. Рәһбәрлик шурасы — гул синфини тәмсил едән мәсһ едилмиш ағсаггаллардан ибарәт кичик груп өз нүмајәндәләринә бүтүн дүнјада мөвҹуд олан минләрлә јығынҹагларда ағсаггал вә хидмәти көмәкчиләр тә’јин етмәк вә онлара тә’лим вермәк сәлаһијјәтини вермишдир. Бундан савајы, Рәһбәрлик шурасы филиалларын Комитә үзвләри, сәјјар нәзарәтчиләри, ағсаггаллар вә хидмәти көмәкчиләр үчүн мүхтәлиф мәктәбләр тәшкил едир. Бурада онлар гојунларын гајғысына даһа јахшы галмағы өјрәнирләр. Әлавә рәһбәрлик бу гардашлара мәктублар, «Ҝөзәтчи Гүлләси»ндә дәрҹ олунан мәгаләләр вә «Јеһованын ирадәсини јеринә јетирмәк үчүн тәшкил олунмушуг»a (рус.) кими китаблар васитәсилә верилир.
17. а) Иса гул синфинә е’тибар етдијини неҹә ҝөстәриб? б) Руһани чобанлар гул синфинә е’тибар етдикләрини неҹә ҝөстәрирләр?
17 Исанын гул синфинә бәсләдији е’тибар о гәдәр ҝүҹлүдүр ки, о, «бүтүн маликанәсинин», јә’ни јердәки руһани әмлакынын идарәсини она тапшырыб (Матта 24:47). Тә’јин едилмиш чобанлар да Рәһбәрлик шурасындан алдыглары рәһбәрлијә риајәт едәркән гул синфинә е’тибар етдикләрини ҝөстәрирләр. Бәли, чобанлар диҝәрләринә тә’лим верәндә, Аллаһын Кәламындан тә’лим аланда вә гул синфинин рәһбәрлијинә риајәт едәндә сүрүдә бирлији горујурлар. Бәли, Јеһова јығынҹағынын һәр бир үзвүнүн гајғысына галмаг үчүн гардашлара тә’лим верир. Буна ҝөрә биз Она неҹә дә миннәтдарыг!
[Һашијә]
a Јеһованын Шаһидләри тәрәфиндән дәрҹ олунуб.
Сиз неҹә ҹаваб верәрдиниз?
• Јеткин руһани чобанлар диҝәрләринә неҹә тә’лим верирләр?
• Нәјә ҝөрә чобанлар тә’лим верәркән өз фикирләринә әсасланмырлар?
• Чобанлар гул синфинә е’тибар етдикләрини неҹә вә нә үчүн ҝөстәрирләр?
[24 вә 25-ҹи сәһифәләрдәки шәкилләр]
Мәсиһчи ағсаггаллары јығынҹагдакы ҹаван гардашлара тә’лим верирләр.
[26-ҹы сәһифәдәки шәкилләр]
«Садиг вә ағыллы гул» ағсаггаллара мүхтәлиф үсулларла тә’лим верир.