«Руһән һәрарәтли олун»

«Сәјдә зәифләмәјин; руһән һәрарәтли олун; Рәббә хидмәт един» (РОМ. 12:11).

1. Нәјә ҝөрә исраиллиләр һејван гурбанлары вә башга тәгдимләр ҝәтирирдиләр?

ЈЕҺОВА Ону севдикләрини вә ирадәсинә табе олдугларыны ҝөстәрмәк үчүн хидмәтчиләринин үрәкдән ҝәтирдикләри гурбанлары гијмәтләндирир. Кечмишдә О, мүхтәлиф һејван гурбанларыны вә диҝәр тәгдимләри гәбул едирди. Мусанын Ганунуна әсасән тәләб олунан бу гурбанлар ҝүнаһларынын бағышланмасыны вә миннәтдарлыгларыны билдирмәк истәјән исраиллиләр тәрәфиндән ҝәтирилирди. Бизим ҝүнләрдә Јеһова мәсиһчи јығынҹағындан бу ҹүр мадди гурбанлар тәләб етмир. Лакин Ромадакы мәсиһчиләрә јаздығы мәктубун 12-ҹи фәслиндә һәвари Павел ҝөстәрир ки, биздән дә гурбанлар ҝәтирмәк тәләб олунур. Ҝәлин бахаг, бу һансы гурбанлардыр.

Дири гурбан

2. Бир мәсиһчи кими, биз неҹә һәјат сүрүрүк вә бу, өзүнә нәји дахил едир?

² Ромалылара 12:1, 2 ајәләрини оху. Мәктубун әввәлиндә Павел ајдын ҝөстәрмишди ки, истәр јәһудиләрдән, истәрсә дә гејри-јәһудиләрдән олан мәсһ олунмуш мәсиһчиләр әмәлләринә ҝөрә јох, Аллаһа ҝөстәрдикләри имана ҝөрә бәраәт газанырлар (Ром. 1:16; 3:20-24). 12-ҹи фәсилдә исә о, мәсиһчиләрин миннәтдарлыгларыны фәдакар һәјат сүрмәклә тәзаһүр етдирмәли олдугларыны изаһ едир. Бунун үчүн ағлымызы јениләшдирмәлијик. Мирас алдығымыз гејри-камиллик уҹбатындан биз ‘ҝүнаһ вә өлүм гануну’ алтындајыг (Ром. 8:2). Бу сәбәбдән биз мејилләримизи көкүндән дәјишмәклә ‘руһән вә әглән јениләшмәлијик’ (Ефес. 4:23). Бу ҹүр дәјишиклик јалныз Аллаһ вә Онун руһунун көмәји сајәсиндә мүмкүндүр. Амма биздән дә ҹидди сәј тәләб олунур. Јәни биз әхлагсыз, әдәбсиз әјләнҹәләрлә долу олан вә позғун дүшүнҹә тәрзинин һөкм сүрдүјү бу дүнјаја ‘ујғунлашмамаг’ үчүн әлимиздән ҝәләни етмәлијик (Ефес. 2:1-3).

3. Бизи мәсиһчи фәалијјәтиндә иштирак етмәјә тәшвиг едән нәдир?

³ Павел һәмчинин бизи «Аллаһын јахшы, мәгбул вә камил ирадәсинин нә олдуғуну дәрк етмәк үчүн» ағылла һәрәкәт етмәјә тәшвиг едир. Биз нәјә ҝөрә Мүгәддәс Китабы һәр ҝүн охујуб үзәриндә дүшүнүр, дуа едир, јығынҹаг ҝөрүшләриндә иштирак едир вә хош хәбәри тәблиғ едирик? Садәҹә јығынҹағымызын ағсаггаллары бизи буна тәшвиг етдији үчүнмү? Дүздүр, биз онларын фајдалы хатырлатмаларына ҝөрә чох миннәтдарыг. Лакин бизим мәсиһчи фәалијјәтиндә иштирак етмәјимизин әсас сәбәби Јеһованын мүгәддәс руһунун бизи Она сәмими мәһәббәт ҝөстәрмәјә тәшвиг етмәсидир. Бундан әлавә, биз шәхсән өзүмүз әмин олмушуг ки, бу ҹүр фәалијјәтдә иштирак етмәк Аллаһын бизим үчүн олан ирадәсидир (Зәк. 4:6; Ефес. 5:10). Һәгиги мәсиһчи кими јашамагла Аллаһы разы салдығымызы билмәк бизә бөјүк севинҹ вә мәмнунлуг ҝәтирир.

Мүхтәлиф әнамлар

4, 5. Мәсиһчи ағсаггаллар өз әнамларындан неҹә истифадә етмәлидирләр?

⁴ Ромалылара 12:6-8, 11 ајәләрини оху. Павел бизә ‘илаһи лүтфә ҝөрә мүхтәлиф руһани әнамларын бәхш едилдијини’ јазыр. Онун садаладығы әнамлар арасында нәсиһәт вермәк вә рәислик етмәк кими әнамлар да вар. Бунлар әләлхүсус «сәјлә» нәсиһәт вермәјә чағырылан ағсаггаллара аиддир.

⁵ Павел гејд едир ки, нәзарәтчиләрин чалышганлығы тәлим вермәләриндән вә ‘хидмәти’ иҹра етмәләриндән ачыг-ајдын ҝөрүнмәлидир. Контекстдән ҝөрүндүјү кими, Павел «бир бәдән»дә, јәни јығынҹагда һәјата кечирилән ‘хидмәтә’ ишарә едир (Ром. 12:4, 5). Һәмин хидмәт Һәвариләрин ишләри 6:4 ајәсиндә хатырланан хидмәтлә ејнидир. Орада һәвариләрин сөзләрини охујуруг: «Биз... дуа етмәк вә Аллаһын кәламыны јајмаг ишинә давам едәрик». Бу хидмәт өзүнә нәји дахил едир? Мәсиһчи ағсаггаллар әнамларындан јығынҹаг үзвләрини мөһкәмләндирмәк үчүн истифадә едирләр. Ағсаггалларын ‘хидмәтдә’ фәал олмаларынын ҝөстәриҹиси Аллаһын Кәламыны дуа едәрәк арашдырмалары, јығынҹаға тәлим вә рәһбәрлик вермәләри, һәмчинин тәблиғчиләрин руһани рифаһынын гајғысына галмаларыдыр. Нәзарәтчиләр өз әнамларындан виҹданла истифадә едәрәк «нәшә илә», јәни севинҹлә сүрүнүн гајғысына галмалыдырлар (Ром. 12:7, 8; 1 Пет. 5:1-3).

6. Бу мәгаләнин әсас ајәси олан Ромалылара 12:11 ајәсиндә верилән мәсләһәтә неҹә риајәт едә биләрик?

⁶ Сонра Павел дејир: «Сәјдә зәифләмәјин; руһән һәрарәтли олун; Рәббә хидмәт един». Әҝәр хидмәтимиздә зәифлијә мејиллилик ашкар етмишиксә, онда шәхси өјрәнмәмизә јенидән нәзәр салмалы, һәмчинин Јеһовадан тәкидлә вә тез-тез мүгәддәс руһ диләмәлијик. Аллаһын гүввәси бизә сүстлүклә мүбаризә апармаға вә јенидән шөвглә хидмәт етмәјә көмәк едәҹәк (Лука 11:9, 13; Вәһј 2:4; 3:14, 15, 19). Мүгәддәс руһ еркән мәсиһчиләри «Аллаһын мөһтәшәм ишләри барәдә» данышмаға тәшвиг едирди (Һәв. иш. 2:4, 11). Ејнилә, Аллаһын руһу бизи дә хидмәтдә сәјли, јәни ‘руһән һәрарәтли’ олмаға тәшвиг едәҹәк.

Тәвазөкарлыг

7. Нәјә ҝөрә тәвазөкарлыгла хидмәт етмәлијик?

⁷ Ромалылара 12:3, 16 ајәләрини охуa. Малик олдуғумуз әнамлары јалныз Јеһованын «лүтф»ү сајәсиндә алмышыг. Башга јердә Павел дејир: «Бизим габилијјәтимиз Аллаһдандыр» (2 Кор. 3:5). Буна ҝөрә дә иззәти өзүмүзә ҝөтүрмәмәлијик. Биз хидмәтдә газандығымыз уғурлара шәхси баҹарығымыз сајәсиндә јох, Аллаһын хејир-дуасы сајәсиндә наил олдуғумузу тәвазөкарлыгла етираф етмәлијик (1 Кор. 3:6, 7). Буна ујғун олараг Павел дејир: «Өзүнүз һаггында лазымындан артыг дүшүнмәјин». Өзүнәһөрмәт һисси вә Јеһоваја хидмәтдән севинҹ вә мәмнунлуг дујмаг чох ваҹибдир. Лакин тәвазөкар олмаг, јәни өз мәһдудијјәтләримизи дәрк етмәк бизи һәддән артыг өзүмүздән разы олмагдан чәкиндирәҹәк. Биз ‘сағлам дүшүнҹәмизи горумаға’ чалышмалыјыг.

8. Өз ҝөзүмүздә «агил» олмагдан неҹә чәкинә биләрик?

⁸ Әлдә етдијимиз наилијјәтләрә ҝөрә ловғаланмаг сәфеһлик оларды. Чүнки «бөјүдән Аллаһдыр» (1 Кор. 3:7). Павел гејд едир ки, Аллаһ јығынҹағын һәр бир үзвүнә мүәјјән гәдәр иман вериб. Өзүмүзү кимдәнсә үстүн һесаб етмәк әвәзинә, башгаларынын ҝөрдүјү ишләрин иманларынын гәдәринә ҝөрә олдуғуну етираф етмәлијик. Павел сонра дејир: «Өзүнүз барәдә неҹә дүшүнүрсүнүзсә, башгалары барәдә дә елә дүшүнүн». Башга мәктубунда исә о дејир: «Рәгабәт вә ја шөһрәтпәрәстликлә һеч бир шеј етмәјин, амма тәвазөкарлыгла бир-биринизи өзүнүздән јухары сајын» (Филип. 2:3). Һәр бир баҹы-гардашын мүәјјән шејләрдә биздән үстүн олдуғуну гәбул етмәк үчүн әсил тәвазөкарлыг вә бөјүк сәј тәләб олунур. Тәвазөкарлыг бизи өз ҝөзүмүздә «агил» олмагдан чәкиндирәҹәк. Јығынҹагда хүсуси тәјинаты олан бизләрдән бәзиләри јығынҹагда диггәт мәркәзиндә олсаг да, һамымыз чох вахт ҝөрүнмәјән «садә» ишләри ҝөрмәкдән дә бөјүк севинҹ дујуруг (1 Пет. 5:5).

Мәсиһчи бирлијимиз

9. Нәјә ҝөрә Павел руһдан доғулан мәсиһчиләри бәдән үзвләри илә мүгајисә едир?

⁹ Ромалылара 12:4, 5, 9, 10 ајәләрини оху. Павел Мәсиһин башчылығы алтында хидмәт едән мәсһ олунмуш мәсиһчиләри бир бәдәнин үзвләри илә мүгајисә едир (Колос. 1:18). О, руһдан доғулан мәсиһчиләрә хатырладыр ки, бир бәдәндә чохлу үзвләр олдуғу һалда һамысы ејни иши иҹра етмәдији кими, ‘онлар да чох олуб Мәсиһдә тәк бир бәдәни тәшкил едирләр’. Ејнилә, Павел Ефесдәки мәсһ олунмуш мәсиһчиләри сәсләјир: «Бәдәнин Башы олан Мәсиһә доғру һәр ҹәһәтдән бој атаг. Мәсиһдән асылы олараг бүтүн бәдән, һәр бир буғумун јардымы илә һәмаһәнҝ олуб, тәшкил олунур вә һәр үзвүн дүзҝүн ишләмәсинә ҝөрә бәдән гамәтини артырыр ки, мәһәббәтлә инкишаф етсин» (Ефес. 4:15, 16).

10. ‘Башга гојунлар’ һансы һакимијјәти гәбул етмәлидирләр?

¹⁰ ‘Башга гојунлар’ Мәсиһин бәдәнинин бир һиссәси олмасалар да, бу нүмунәдән онлар чох шеј өјрәнә биләрләр (Јәһ. 10:16). Павел изаһ едир ки, Јеһова «һәр шеји Онун [Мәсиһин] ајаглары алтына табе етдирди вә бүтүн варлыгларын үзәриндә баш олмаг үчүн, Ону иманлылар ҹәмијјәтинә верди» (Ефес. 1:22). Бу ҝүн башга гојунлар Јеһованын Оғлуна табе етдирдији ‘һәр шејин’ бир һиссәсидир. Онлар һәмчинин Мәсиһин «садиг вә ағыллы гул»а һәвалә етдији ‘маликанәјә’ дахилдирләр (Мат. 24:45-47). Буна ҝөрә, јер үзүндә јашамаг үмиди олан бу инсанлар Мәсиһин онларын Башы олдуғуну гәбул етмәли, садиг вә ағыллы гула, онун Рәһбәрлик Шурасына вә јығынҹагда нәзарәтчи тәјин олунан гардашлара табе олмалыдырлар (Ибр. 13:7, 17). Бу, мәсиһчи бирлијини мөһкәмләндирир.

11. Бирлијимиз нәјә әсасланыб вә Павел даһа һансы мәсләһәти верир?

¹¹ Белә бирлик «камил бирлијин бағы олан» мәһәббәтә әсасланыб (Колос. 3:14). Павел ромалылара мәктубунун 12-ҹи фәслиндә вурғулајыр ки, мәһәббәтимиз «ријасыз» олмалыдыр вә биз ‘гардашлыг севҝиси илә бир-биримизи шәфгәтлә севмәлијик’. Бу, гаршылыглы һөрмәт доғурур. Һәвари дејир: «Бир-биринизи һөрмәтдә габаглајын». Әлбәттә, мәһәббәти сентименталлыгла, јәни һәддән артыг һәссаслыгла гарышдырмамалыјыг. Јығынҹағын тәмиз галмасы үчүн биз әлимиздән ҝәләни етмәлијик. Мәһәббәтлә мәсләһәт вердикдән сонра Павел әлавә едир: «Писликдән икраһ един, јахшылыға сарылын».

Гонагпәрвәрлик

12. Гәдим Македонијадакы мәсиһчиләрин гонагпәрвәрлијиндән нә өјрәнә биләрик?

¹² Ромалылара 12:13 ајәсини оху. Гардашлара олан мәһәббәтимиз бизи имкан дахилиндә онларын ‘еһтијаҹларыны рәф етмәјә’ тәшвиг едәҹәк. Касыб олсаг белә, малик олдуғумуз шејләри башгалары илә бөлүшә биләрик. Македонијалы мәсиһчиләр һаггында Павел јазырды: «Бөјүк сыхынтыларла имтаһан олундуглары һалда, онлар бол-бол севинҹә маликдирләр; вә онларын дәрин јохсуллуғу сәхавәтләриндән өтрү һәддиндән артыг зәнҝинлијә чеврилмишдир. Чүнки онлар имканлары дахилиндә вә, мән шаһидәм, имканлары хариҹиндә дә көнүллү даврандылар. Онлар артыг дәрәҹәдә тәкид едиб, биздән хаһиш етдиләр ки, һәдијјәләрини ҝөтүрәк вә [Јәһудејада] мүгәддәсләрә хидмәт етмәк ишиндә иштирак үчүн онлара иҹазә верәк» (2 Кор. 8:2-4). Македонијадакы мәсиһчиләр, касыб олмаларына бахмајараг, чох сәхавәтли идиләр. Онлар еһтијаҹ ичиндә олан Јәһудејадакы гардашлары илә бөлүшмәји өзләринә шәрәф билирдиләр.

13. ‘Гонагпәрвәр олмаға ҹан атмаг’ нә демәкдир?

¹³ «Гонагпәрвәр олмаға ҹан атын» кими тәрҹүмә олунан јунан ифадәси алтында тәшәббүс ҝөстәрмәк нәзәрдә тутулур. Биз кимисә јемәјә дәвәт етмәклә гонагпәрвәрлик ҝөстәрә биләрик. Мәһәббәтдән ирәли ҝәлән гонагпәрвәрлик, һәгигәтән дә, тәрифә лајигдир. Лакин тәшәббүсү үзәримизә ҝөтүрсәк, ҝөрәҹәјик ки, гонагпәрвәрлик ҝөстәрмәк үчүн чохлу имканлар вар. Мадди вәзијјәтимиз вә ја зәиф сәһһәтимиз уҹбатындан башгаларыны јемәјә дәвәт едә билмириксә, онда кимисә бир финҹан гәһвә вә ја чај ичмәјә дәвәт етмәклә дә гонагпәрвәрлик ҝөстәрә биләрик.

14. а) Јунан дилиндән тәрҹүмә олунан «гонагпәрвәрлик» сөзү һансы ики сөзүн бирләшмәсиндән әмәлә ҝәлир? б) Әҹнәбиләрә неҹә гајғы ҝөстәрә биләрик?

¹⁴ Гонагпәрвәрлик бизим башгаларына олан мүнасибәтимизи әкс етдирир. «Гонагпәрвәрлик» кими тәрҹүмә олунан јунан сөзү «мәһәббәт» вә «гәриб» сөзләринин бирләшмәсиндән әмәлә ҝәлир. Танымадығымыз адамлара вә ја әҹнәбиләрә мүнасибәтимиз неҹәдир? Јығынҹағымызын әразисиндә јашајан әҹнәбиләрә хош хәбәри тәблиғ етмәк үчүн башга дил өјрәнмәјимиз дә гонагпәрвәрлик ҝөстәрмәјин үсулларындан биридир. Әлбәттә, чохларымызын башга дил өјрәнмәк имканы јохдур. Бунунла белә, «Бүтүн халглардан олан инсанлар үчүн хош хәбәр» брошүрасында Мүгәддәс Китаб хәбәринин бир чох дилләрдә чап олунмасы сајәсиндә әҹнәбиләрә көмәк едә биләрик. Сән бу брошүранын көмәји илә хидмәтдә јахшы нәтиҹәләр әлдә едә билмисән?

Башгаларынын һиссләринә шәрик олун

15. Ромалылара 12:15 ајәсиндәки мәсләһәтә даир Иса һансы нүмунәни гојмушдур?

¹⁵ Ромалылара 12:15 ајәсини оху. Павелин бу ајәдәки мәсләһәтини ики сөзлә ифадә етмәк олар: шәфгәт ҝөстәрин. Биз башгаларынын һиссләрини баша дүшмәји, һәтта севинҹ вә кәдәрләринә шәрик олмағы өјрәнмәлијик. Әҝәр руһән һәрарәтлијиксә, бу, өзүнү бүрузә верәҹәк. Мәсиһин 70 шаҝирди тәблиғдән севинҹлә гајыдыб, әлдә етдикләри јахшы нәтиҹәләр барәдә данышанда Иса ‘руһән севинди’ (Лука 10:17-21). О, онларын севинҹинә шәрик олду. Досту Лазар өләндә исә о, ағлајанларла ағлады (Јәһ. 11:32-35).

16. Биз шәфгәт һиссини неҹә ҝөстәрә биләрик вә хүсусилә кимләр буну етмәлидир?

¹⁶ Биз шәфгәт ҝөстәрмәкдә Исаны тәглид етмәлијик. Һәмиманлымыз севинәндә биз дә онунла севинмәлијик. Ејни заманда, баҹы-гардашларымызын ағры-аҹыларына гаршы да һәссас олмалыјыг. Изтираб чәкән һәмиманлыларымыза вахт ајырыб диггәтлә гулаг асмагла онларын ағрыларыны азалда биләрик. Бәзән ешитдикләримиз үрәјимизә елә ҝүҹлү тәсир едә биләр ки, ҝөз јашларымызы сахлаја билмәјиб ағлајарыг (1 Пет. 1:22). Шәфгәт ҝөстәрмәјә даир Павелин вердији мәсләһәтә хүсусилә ағсаггаллар риајәт етмәлидирләр.

17. Ромалылара 12-ҹи фәсилдә арашдырдығымыз ајәләрдән нә өјрәндик вә нөвбәти мәгаләдә сөһбәт нәдән ҝедәҹәк?

¹⁷ «Ромалылара мәктуб»ун 12-ҹи фәслиндә арашдырдығымыз ајәләрдә верилән мәсләһәтләри өз һәјатымызда вә баҹы-гардашларла мүнасибәтдә тәтбиг едә биләрик. Нөвбәти мәгаләдә исә биз бу фәслин галан ајәләрини нәзәрдән кечирәҹәјик. Бу ајәләрдә мәсиһчи олмајанлара, еләҹә дә бизи тәгиб едән вә мүгавимәт ҝөстәрән инсанлара неҹә јанашмалы олдуғумуз ҝөстәрилир.

[Һашијә]

Тәкрар үчүн суаллар

• «Руһән һәрарәтли» олдуғумуз нәдән ҝөрүнмәлидир?

• Нәјә ҝөрә Аллаһа тәвазөкарлыгла хидмәт етмәлијик?

• Һәмиманлыларымыза гаршы неҹә шәфгәт ҝөстәрә биләрик?

[4-ҹү сәһифәдәки шәкил]

Биз нә үчүн мәсиһчи фәалијјәтиндә иштирак едирик?

[6-ҹы сәһифәдәки шәкил]

Әҹнәбиләрин Падшаһлыг һаггында өјрәнмәсинә һәр биримиз неҹә көмәк едә биләрик?