«Бүтүн адамларла сүлһдә олун»
«Мүмкүнсә, әлиниздән ҝәлдији гәдәр бүтүн адамларла сүлһдә олун» (РОМ. 12:18).
1, 2. а) Иса давамчыларыны нә барәдә хәбәрдар етмишди? б) Тәгибләрә неҹә мүнасибәт ҝөстәрмәјә даир мәсләһәтләри һарадан тапа биләрик?
ИСА давамчыларыны хәбәрдар етмишди ки, онлар бүтүн дүнја халглары тәрәфиндән тәгиб олунаҹаглар. Өлүмүндән әввәлки ҝеҹә о, бунун сәбәбини белә изаһ етмишди: «Әҝәр дүнјадан олсајдыныз, дүнја ондан оланы севәрди. Һалбуки дүнјадан дејилсиниз, Мән сизи дүнјадан сечдим; бунун үчүн дүнја сизә нифрәт едир» (Јәһ. 15:19).
2 Һәвари Павел бу сөзләрин һәгигилијинә өз тәҹрүбәсиндә әмин олмушду. Павел ҝәнҹ әмәкдашы Тимотејә икинҹи мәктубунда јазыр: ‘Сән мәним тәлим, давраныш, мәгсәд, иман, сәбир, мәһәббәт, тәһәммүл, тәгиб вә изтирабларымын изи илә ҝетдин’. Сонра исә әлавә едир: «Аллаһ јолунда Мәсиһ Исаја бағлы олараг јашамаг истәјәнләрин һамысы да тәгибә мәруз галаҹагдыр» (2 Тим. 3:10-12). Ромадакы мәсиһчиләрә јаздығы мәктубунун 12-ҹи фәслиндә Павел тәгибләрә неҹә мүнасибәт ҝөстәрмәјә даир онлара мүдрик мәсләһәтләр вермишди. Онун сөзләри сон ҝүнләрдә јашајан бизләр үчүн рәһбәрликдир.
«Јахшы шејләрә диггәт јетирин»
3, 4. Ромалылара 12:17 ајәсини а) дини ҹәһәтдән бөлүнмүш аиләдә, б) гоншуларла мүнасибәтдә неҹә тәтбиг етмәк олар?
3 Ромалылара 12:17 ајәсини оху. Павел изаһ едир ки, әдавәтлә үзләшәндә әвәзини чыхмаға чалышмамалыјыг. Онун мәсләһәтинә хүсусилә дә дини ҹәһәтдән бөлүнмүш аиләләрдә әмәл етмәк ваҹибдир. Мәсиһчи һәјат јолдашына ҹаваб гајтармаг вә әвәзиндә онунла пис рәфтар етмәк истәји илә мүбаризә апармалыдыр. «Пислик әвәзинә пислик етмәјин» нәтиҹәси јахшы олмур. Әксинә, бу ҹүр давраныш вәзијјәти даһа да ҝәрҝинләшдирә биләр.
4 «Бүтүн инсанларын гаршысында јахшы шејләрә диггәт јетирин»,— демәклә Павел даһа јахшы јол тәклиф едир. Әри онун иманы һаггында хошаҝәлмәз фикир сөјләјәндә белә она хејирхаһ мүнасибәт ҝөстәрмәјә давам едән гадын ҝәрҝинлији азалда биләр (Сүл. мәс. 31:12). Һал-һазырда Бет-Ел аиләсинин үзвү олан Карлос, атасынын ҝүҹлү мүгавимәтләринә бахмајараг, анасынын хејирхаһ галыб евә неҹә гајғы ҝөстәрдији һагда данышыр: «О, һәмишә бизә атамыза һөрмәт ҝөстәрмәји өјрәдирди. О һәтта мәндән тәләб едирди ки, атамла бирҝә хошламадығым бир ојуну ојнајым. Ојундан сонра атамын кефи ачылырды». Нәһајәтдә, Карлосун атасы Мүгәддәс Китабы өјрәнмәјә башлады вә вәфтиз олду. ‘Бүтүн инсанларын гаршысында јахшы шејләрә диггәт јетирмәјә’ ҝәлдикдә исә, Јеһованын Шаһидләри фәлакәтләр заманы гоншуларына јардым етмәклә чох вахт гәрәзли мүнасибәти арадан галдырырлар.
«Јанан көмүр» илә мүгавимәтләрин өһдәсиндән ҝәлин
5, 6. а) Дүшмәнләрин башына «јанан көмүр» јығмаг нә демәкдир? б) Ромалылара 12:20 ајәсиндә јазылан мәсләһәтә риајәт етмәјин јахшы нәтиҹәләр ҝәтирдијини ҝөстәрән бир нүмунә данышын.
5 Ромалылара 12:20 ајәсини оху. Павел бу ајәни јазаркән, шүбһәсиз ки, Сүлејманын мәсәлләри 25:21, 22 ајәсиндән ситат ҝәтирирди: «Дүшмәнин аҹдырса, ону једиздир, сусуздурса, она су вер. Белә етмәклә санки башына көз төкәрсән, бунун әвәзини Рәбдән аларсан». «Ромалылара мәктуб»ун 12-ҹи фәслинин контекстини нәзәрә алсаг, чәтин ки Павел мәҹази көмүрләри бизә дүшмән кәсиләнләри ҹәзаландырмаг вә ја рүсвај етмәк мәгсәдилә истифадә етмәли олдуғумузу демәк истәјирди. Әксинә, ҝөрүнүр, бу мәсәлдә вә Павелин ромалылара вердији мәсләһәтдә кечмишдә филизин неҹә әридилмәсинә ишарә едилир. ХЫХ әсрдә јашамыш инҝилис алими Чарлз Бриҹес гејд етмишдир: «Чәтин әријән металын јалныз алтына јох, үстүнә дә одлу көз јығ. Чох аз дашүрәкли адам тапылар ки, сәбирин, фәдакарлығын вә алышыб-јанан мәһәббәтин ҝүҹү она тәсир етмәсин».
6 Хејирхаһ әмәлләримиз бизә мүгавимәт ҝөстәрәнләрин үрәјини, «јанан көмүр» кими, јумшалда биләр вә һәтта, ола билсин, дүшмәнчилији арадан галдырар. Хејирхаһ ишләр инсанларын Јеһованын хидмәтчиләринә вә онларын тәблиғ етдији хәбәрә даһа јахшы мүнасибәт ҝөстәрмәсинә тәсир едә биләр. Һәвари Петер јазмышды: «Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр» (1 Пет. 2:12).
«Бүтүн адамларла сүлһдә олун»
7. Иса шаҝирдләринә һансы сүлһү гојмушдур вә бу сүлһ бизә неҹә тәсир етмәлидир?
7 Ромалылара 12:18 ајәсини оху. Иса һәвариләри илә кечирдији сонунҹу ахшам онлара деди: «Аранызда сүлһ гојуб ҝедирәм; сизә Өз сүлһүмү верирәм» (Јәһ. 14:27). Мәсиһин шаҝирдләринә гојуб ҝетдији сүлһ онларын Јеһова Аллаһ вә Онун севимли Оғлу тәрәфиндән севилиб рәғбәт газандыгларыны билмәкдән ирәли ҝәлән гәлб раһатлығыдыр. Бу дахили сүлһ бизи башгалары илә әмин-аманлыг ичиндә јашамаға тәшвиг етмәлидир. Һәгиги мәсиһчиләр сүлһ јарадан вә сүлһсевәрдирләр (Мат. 5:9).
8. Евдә вә јығынҹагда сүлһү неҹә јарада биләрик?
8 Аилә дахилиндә сүлһ јаратмағын үсулларындан бири фикир ајрылыгларыны мүмкүн гәдәр тез һәлл етмәкдир (Сүл. мәс. 15:18; Ефес. 4:26). Буну мәсиһчи јығынҹағына да шамил етмәк олар. Һәвари Петер сүлһә ҹан атмагла дили сахламағын арасында әлагә олдуғуну ҝөстәрир (1 Пет. 3:10, 11). Јагуб да дилдән дүзҝүн истифадә етмәјә, гысганҹлыгдан вә мүбаһисәләрдән гачынмаға даир ҹидди мәсләһәт вердикдән сонра јазыр: «Јухарыдан назил олан һикмәт әввәлән сафдыр, сонра да сүлһпәрвәр, мүлајим, итаәткар, мәрһәмәтли вә хејирли бәһрә илә долу, гәрәзсиз вә ријасыздыр. Салеһлијин бәһрәси дә сүлһ јараданлар үчүн сүлһ ичиндә әкилир» (Јаг. 3:17, 18).
9. «Бүтүн адамларла сүлһдә» олмаға чалышаркән нәји јадда сахламалыјыг?
9 Павел Ромалылара 12:18 ајәсиндә тәкҹә аиләдә вә јығынҹагда дејил, һәм дә ‘бүтүн адамларла сүлһдә олмалы’ олдуғумузун ваҹиблијини вурғулајыр. Бүтүн адамлар дедикдә, гоншулар, иш вә мәктәб јолдашлары, еләҹә дә тәблиғдә гаршылашдығымыз инсанлар нәзәрдә тутулур. Анҹаг о: «Мүмкүнсә, әлиниздән ҝәлдији гәдәр»,— демәклә мәсләһәтинә дәгиглик ҝәтирир. Бу о демәкдир ки, ‘бүтүн адамларла сүлһдә олмаг’ үчүн әлимиздән ҝәләни етмәлијик, лакин бир шәртлә ки, Аллаһын әдаләтли принсипләриндән кәнара чыхмајаг.
Гисас Јеһованындыр
10, 11. Павел Ромалылара 12:19 ајәсиндә һансы мәсләһәти верир вә бу, нәјә ҝөрә мүнасибдир?
10 Ромалылара 12:19 ајәсини оху. Һәтта фәалијјәтимизә вә хош хәбәримизә ‘зидд ҝедәнләрлә’, еләҹә дә гаты дүшмәнләримизлә «һәлимликлә» давранараг ‘һагсызлыглара таб ҝәтирмәлијик’ (2 Тим. 2:23-25). Павел мәсиһчиләрә гисас алмамағы, лакин ‘Аллаһын гәзәбинә јол вермәји’ мәсләһәт ҝөрүр. Биз, бир мәсиһчи кими, билирик ки, гисас алмаг ихтијары бизә верилмәјиб. Мәзмурчу јазырды: «Гәзәби ат, һиддәтдән чәкин, нараһат олма, бунлар инсаны шәрә салар» (Мәз. 37:8). Ејни заманда Сүлејман да мәсләһәт едир: «Демә “бу пислијин әвәзини чыхаҹағам” Рәбби ҝөзлә, гој О сәни хилас етсин» (Сүл. мәс. 20:22).
11 Әлејһдарларымыз бизә хәтәр јетирәндә јахшы оларды ки, буну Јеһованын өһдәсинә бурахаг. О, мүнасиб билдији вахтда онлары мүтләг ҹәзаландыраҹаг. Павел әлавә едир: «Чүнки јазылмышдыр: “Рәбб дејир: Гисас Мәнимдир, әвәзини Мән верәҹәјәм”». (Ганунун тәкрары 32:35 ајәси илә мүгајисә ет.) Әҝәр гисас алмаға чалышырыгса, јалныз Јеһованын ихтијары чатдығы бир иши үзәримизә ҝөтүрәрәк өзүмүзә архајын давранмыш олуруг. Үстәлик, Јеһованын: «Әвәзини Мән верәҹәјәм» вәдинә етибар етмәдијимизи ҝөстәририк.
12. Јеһованын гәзәби нә вахт вә неҹә изһар олунаҹаг?
12 Павел ромалылара мәктубунун әввәлиндә дејир: «Һәгигәти һагсызлыға әсир едән инсанларын һәр ҹүр аллаһсызлыг вә һагсызлығына гаршы Аллаһын гәзәби ҝөјдән кәшф олунур» (Ром. 1:18). Јеһованын гәзәби ‘бөјүк мәшәггәтдә’ Оғлу васитәсилә ҝөјдән изһар олунаҹаг (Вәһј 7:14). Павелин башга мәктубунда јаздығы кими, бу, «Аллаһын адил һөкмүнүн» сүбуту олаҹаг: «Сизә әзаб верәнләрә әзабла, вә әзаб чәкән сизләрә бизимлә бирликдә раһатлыгла әвәзини вермәк Аллаһ өнүндә доғру ишдир. Бу, Рәбб Исанын гүдрәтли мәләкләри илә аловлу атәш ичәрисиндә ҝөјдән зүһур етдији заман олаҹагдыр. Рәббимиз Иса Мәсиһ Аллаһы танымајан вә Өзү барәсиндәки Мүждәјә итаәт етмәјәнләрә ҹәза верәҹәкдир» (2 Салон. 1:5-8).
Пислијә јахшылыг илә галиб ҝәлин
13, 14. а) Мүгавимәтләрлә гаршылашанда нәјә ҝөрә тәәҹҹүбләнмирик? б) Бизи тәгиб едәнләрә неҹә хејир-дуа верә биләрик?
13 Ромалылара 12:14, 21 ајәләрини оху. Јеһованын Өз ирадәсини јеринә јетирәҹәјинә там әмин олараг бүтүн ҝүҹүмүзү бизә верилән тапшырыға — «Сәлтәнәт һаггында олан... мүждә»ни «бүтүн дүнјада» тәблиғ етмәјә јөнәлдә биләрик (Мат. 24:14). Биз билирик ки, Исанын хәбәрдарлыг етдији кими, мәсиһчи фәалијјәтимиз дүшмәнләрин гәзәбинә сәбәб олаҹаг. О демишди: «Мәним адыма ҝөрә бүтүн халглар сизә нифрәт едәҹәкләр» (Мат. 24:9). Буна ҝөрә дә мүгавимәтләрлә үзләшәндә биз тәәҹҹүбләнмир вә ја руһдан дүшмүрүк. Һәвари Петер јазырды: «Севимлиләрим, санки башыныза гәрибә бир иш ҝәлирмиш кими, аранызда баш вериб, сизи сынамаг үчүн олан одлу имтаһана тәәҹҹүб етмәјин. Лакин Мәсиһин әләмләриндә иштирак етдијинизә ҝөрә севинин ки, Онун иззәтинин зүһурунда бөјүк шәнликлә севинәсиниз» (1 Пет. 4:12, 13).
14 Бизи тәгиб едәнләрә нифрәт бәсләмәкдәнсә, онлардан бәзиләринин билмәдән белә даврандыгларыны нәзәрә алараг онлара тәблиғ етмәјә чалышмалыјыг (2 Кор. 4:4). Ејни заманда, чалышмалыјыг ки, Павелин нөвбәти мәсләһәтинә риајәт едәк: «Сизи тәгиб едәнләрә хејир-дуа един; ләнәт дејил, хејир-дуа един» (Ром. 12:14). Әлејһдарларымыза хејир-дуа вермәјин үсулларындан бири онлар үчүн дуа етмәкдир. Иса Дағүстү тәблиғиндә демишди: «Дүшмәнләринизи севин, сизә нифрәт едәнләрә јахшылыг един. Сизә ләнәт охујанлара хејир-дуа верин вә сизә әзијјәт верәнләр үчүн дуа един» (Лука 6:27, 28). Һәвари Павел шәхси тәҹрүбәсиндән билирди ки, мәсиһчиләри тәгиб едәнләрдән кимсә бир ҝүн Мәсиһин садиг шаҝирди вә Јеһованын гејрәтли хидмәтчиси ола биләр (Галат. 1:13-16, 23). Диҝәр мәктубунда Павел гејд едир: «Бизи сөјүрләр, биз хејир-дуа веририк; бизи говурлар, биз таб ҝәтиририк; бизә ифтира атырлар, биз јумшаг ҹаваб веририк» (1 Кор. 4:12, 13).
15. Пислијә јахшылыгла галиб ҝәлмәјин ән јахшы үсулу һансыдыр?
15 Беләликлә, һәгиги мәсиһчиләр Ромалылара 12-ҹи фәслин сон ајәсиндә јазыланлара риајәт едирләр: «Пислијә мәғлуб олма, пислијә јахшылыг илә галиб ҝәл». Бүтүн писликләрин көкүндә Шејтан Иблис дурур (Јәһ. 8:44; 1 Јәһ. 5:19). Һәвари Јәһјаја назил олан вәһјдә Иса ачыглајыр ки, онун мәсһ олунмуш гардашлары Шејтана ‘Гузунун ганы васитәсилә вә шәһадәт етдикләри тәблиғ илә галиб ҝәлирләр’ (Вәһј 12:11). Бу, ону ҝөстәрир ки, Шејтана вә онун пис тәсири алтында олан дүнјаја јахшылыгла галиб ҝәлмәјин ән јахшы үсулу Падшаһлыг һаггында хош хәбәри тәблиғ етмәкдир.
«Үмидлә севинин»
16, 17. «Ромалылара мәктуб»ун 12-ҹи фәслиндән а) һәјатымызы нәјә сәрф етмәли; б) һәмиманлыларымызла неҹә давранмалы; в) әлејһдарларымыза неҹә мүнасибәт ҝөстәрмәли олдуғумуза даир нә өјрәндик?
16 Павелин Ромадакы мәсиһчиләрә јаздығы мәктубун 12-ҹи фәслинә гысаҹа нәзәр салмағымыз бизә чох шеји хатырлатды. Өјрәндик ки, Јеһованын һәср олунмуш хидмәтчиләри кими, биз гурбанлар ҝәтирмәјә һазыр олмалыјыг. Аллаһын руһу илә һәрәкәтә ҝәтириләрәк биз бу гурбанлары көнүллү олараг тәгдим едирик, чүнки ағылла ҝөтүр-гој етмәјин сајәсиндә бунун Аллаһын ирадәси олдуғуну дәрк етмишик. Биз руһән алышыб-јаныр вә алдығымыз мүхтәлиф әнамлардан сәјлә истифадә едирик. Биз мәсиһчи бирлијимизи горумаг үчүн әлимиздән ҝәләни едәрәк Аллаһымыза тәвазөкарлыгла хидмәт едирик. Һәмчинин гонагпәрвәр олмаға ҹан атыр вә сәмими шәфгәт һисси ҝөстәририк.
17 Һәмчинин «Ромалылара мәктуб»ун 12-ҹи фәслиндә мүгавимәтләрлә үзләшәркән неҹә давранмалы олдуғумуза даир чохлу мәсләһәтләр верилир. Биз һеч вахт пислијә писликлә ҹаваб вермәмәлијик, мүгавимәтләрин өһдәсиндән хејирхаһлыгла ҝәлмәјә чалышмалыјыг. Мүгәддәс Китаб принсипләриндән кәнара чыхмамаг шәрти илә, әлимиздән ҝәлдији гәдәр һамы илә сүлһ ичиндә јашамаға чалышмалыјыг. Бу мәсләһәт аиләдә, јығынҹагда, гоншуларла мүнасибәтдә, ишдә, мәктәбдә вә тәблиғ хидмәтиндә тәтбиг олунандыр. Һәтта ачыг әдавәтлә үзләшсәк белә, гисасын Јеһоваја мәхсус олдуғуну јадда сахлајараг пислијә јахшылыгла галиб ҝәлмәјә чалышмалыјыг.
18. Ромалылара 12:12 ајәсиндә һансы үч мәсләһәт верилир?
18 Ромалылара 12:12 ајәсини оху. Бүтүн бу мүдрик вә практики мәсләһәтләрдән әлавә, Павел даһа үч мәсләһәт верир. Онун вердији мәсләһәтләрә Јеһованын көмәји олмадан риајәт етмәк мүмкүн олмадығы үчүн Павел бизә «дуада мәтанәтли» олмағы мәсләһәт ҝөрүр. Бу, бизә онун «сыхынтыја дөзүмлү» олмаг мәсләһәтинә риајәт етмәјә көмәк едәҹәк. Вә нәһајәт, биз фикримизи Јеһованын ҝәләҹәјә даир вердији вәдләрә јөнәлтмәли, ҝөјдә вә ја јер үзүндә әбәди һәјат ‘үмидинә севинмәлијик’.
Тәкрар үчүн суаллар
• Тәгибләрә неҹә мүнасибәт ҝөстәрмәлијик?
• Һансы саһәләрдә сүлһ јаратмаға чалышмалыјыг вә неҹә?
• Нәјә ҝөрә гисас алмамалыјыг?
[8-ҹи сәһифәдәки шәкил]
Гоншуларымыза әл тутмаг гәрәзли фикирләри арадан галдыра биләр
[9-ҹу сәһифәдәки шәкил]
Јығынҹагда сүлһ јаратмаға чалышырсанмы?