«Пислијә јахшылыг илә галиб ҝәл»
«Пислијә мәғлуб олма, пислијә јахшылыг илә галиб ҝәл» (РОМАЛЫЛАРА 12:21).
1. Һарадан билирик ки, пислијә галиб ҝәлмәк мүмкүндүр?
ҺӘГИГИ ибадәтә шиддәтлә мүгавимәт ҝөстәрәнләрин гаршысында мөһкәм дајанмаг мүмкүндүрмү? Бизи аллаһсыз дүнјаја ҝери чәкмәк истәјән гүввәләрә галиб ҝәлмәк олармы? Һәр ики суала ҹаваб бәлидир! Нә үчүн белә дејирик? Ҹаваб һәвари Павелин ромалылара јаздығы мәктубдан бәллидир. О јазырды: «Пислијә мәғлуб олма, пислијә јахшылыг илә галиб ҝәл» (Ромалылара 12:21). Јеһоваја бел бағласаг вә дүнјаја тәслим олмамаг гәрарында гәтијјәтли олсаг, пислик бизә галиб ҝәлә билмәјәҹәк. Бундан башга, «пислијә... галиб ҝәл» ифадәси ҝөстәрир ки, писликлә мүбаризә апарсаг, ону мәғлуб едәрик. Јалныз сајыглығы итирәнләр вә мүбаризәни дајандыранлар пис дүнјанын вә онун гәддар һөкмдары Шејтан Иблисин гаршысында јениләҹәкләр (1 Јәһја 5:19).
2. Нәјә ҝөрә биз Неһемјанын һәјатындан бә’зи һадисәләрә нәзәр салаҹағыг?
2 Павелин дөврүндән тәхминән 500 ил әввәл Јерусәлимдә јашајан Аллаһын хидмәтчиси писликлә мүбаризә апармаға даир јухарыда дејиләнләрин һәгигәт олдуғуну ҝөстәрди. Һәмин Аллаһ адамы Неһемја нәинки аллаһсызларын мүгавимәтинә давам ҝәтирди, һәм дә пислијә јахшылыгла галиб ҝәлди. О, һансы чәтинликләрлә үзләшди? Онларын өһдәсиндән неҹә ҝәлди? Онун нүмунәсини неҹә изләјә биләрик? Бу суаллара ҹаваб тапмаг үчүн ҝәлин Неһемјанын һәјатындан бә’зи һадисәләрә нәзәр салагa.
3. Неһемја һансы шәраитдә јашајырды вә о, һансы мөһтәшәм иши ҝөрдү?
3 Неһемја Фарс падшаһы Артахшастанын сарајында хидмәт едирди. Неһемја имансызларын арасында јашаса да, өз ‘зәманәсинә ујғунлашмамышды’ (Ромалылара 12:2). Јәһудада көмәјә еһтијаҹ јарананда о, раһат һәјатындан кечиб, Јерусәлимә ҝетмәк үчүн тәһлүкәли јоллары гәт етди вә шәһәрин диварыны бәрпа етмәк кими чәтин ишә ҝиришди (Ромалылара 12:1). Неһемја Јерусәлимин валиси олса да, исраиллиләрлә бирликдә «дан сөкүләндән улдузлар ҝөрүнәнә гәдәр» чијин-чијинә чалышырды. Нәтиҹәдә, икиҹә ајын ичиндә иш баша чатды! (Неһемја 4:21; 6:15). Бу әсл иҝидлик иди, чүнки тикинти заманы исраиллиләр мүхтәлиф ҹүр мүгавимәтләрлә гаршылашмышдылар. Неһемјанын дүшмәнләри кимләр иди? Онлар һансы мәгсәди ҝүдүрдүләр?
4. Неһемјанын дүшмәнләринин мәгсәди нә иди?
4 Неһемјанын дүшмәнләри Јәһуда јахынлығында јашајан Санбаллат, Товија вә Ҝешем иди. Бу нүфузлу мә’мурлар Аллаһын халгына нифрәт етдикләри үчүн «Исраил өвладларынын хејринә чалышан бир нәфәрин [Неһемјанын] ҝәлдијини ешитдикдә чох һирсләндиләр» (Неһемја 2:10, 19). Онлар тикинтини дајандырмаг гәрарына ҝәлдиләр, һәтта бунун үчүн мәкрли план да ҹыздылар. Бәс Неһемја ‘пислијә мәғлуб олаҹагмы’?
‘Ганы гаралды вә гәзәбләнди’
5, 6. а) Неһемјанын дүшмәнләри тикинти ишинин ҝетдијини ешидәндә нә етдиләр? б) Неһемја нә үчүн дүшмәнләринин гаршысында горхуја дүшмәди?
5 Неһемја ҹәсарәтлә халгы сәсләди: «Ҝәлин Јерусәлимин диварыны бәрпа едәк». Халг да: «Буралары бәрпа едәк», — дејә һај верди. Неһемјанын сөјләдији кими, «бу хејирли иш үчүн һамы әлбир олду», лакин дүшмәнләр онлара «хор бахараг әлә салыб дедиләр: “Бу нә ишдир тутурсунуз? Јохса сиз падшаһа гаршы үсјан галдырырсыныз?”» Истеһзалар вә јалан иттиһамлар Неһемјаны горхуја салмады. О, дүшмәнләринә деди: «Ҝөјләрин Аллаһы ишимизи уғурлу едәҹәк. Онун гуллары олан бизләр галхыб бураны бәрпа едәҹәјик» (Неһемја 2:17-20). Неһемја ‘хејирли иши’ баша чатдырмаға гәти гәрарлы иди.
6 Дүшмәнләрдән бири — Санбаллат диварын тикилмәсини ешидәндә «ганы гаралды, гәзәбләнди» вә: «Бу јазыг Јәһудиләр нә едирләр?.. Мәҝәр јанмыш виранәликдән јенидән дашлар јарадаҹаглар?» — дејә ришхәнд едәрәк ҝүҹ верди сөзләрә. Товија да она гошулуб дејирди: «Әҝәр тикдикләри даш диварын үстүнә бир түлкү чыхарса, ора дағылаҹаг» (Неһемја 4:1-3). Неһемја бүтүн бунларын мүгабилиндә нә етди?
7. Неһемја дүшмәнләринин иттиһамларына неҹә мүнасибәт ҝөстәрди?
7 Неһемја дүшмәнләринин тә’нәсинә садәҹә олараг мәһәл гојмурду. О, Аллаһын әмрини јеринә јетирмәјә давам едир, интигам алмаға чалышмырды (Левилиләр 19:18). О, һәр шеји Јеһованын өһдәсинә бурахараг дуа етди: «Ешит, еј Аллаһымыз, чүнки бизә хор бахырлар. Гој һәгарәтләри өз башларына дүшсүн!» (Неһемја 4:4). Неһемја Јеһованын «гисас Мәнимдир, әвәзини Мән верәҹәјәм» сөзләринә е’тибар едирди (Ганунун тәкрары 32:35). О, халгла бирликдә ‘диварын бәрпасыны давам етдирди’. Онлар јол вермәдиләр ки, башлары башга шејә гарышсын. Нәтиҹәдә, «диварын... һәр јери һүндүрлүјүнүн јарысына гәдәр битишдирилди. Чүнки халг үрәкдән чалышырды» (Неһемја 4:6). Һәгиги ибадәтә дүшмән кәсиләнләр тикинтини дајандыра билмәдиләр! Неһемјадан неҹә нүмунә ҝөтүрә биләрик?
8. а) Үзәримизә јалан иттиһамлар јағдырыланда Неһемјаны неҹә тәглид едә биләрик? б) Интигам алмамағын мүдрик һәрәкәт олдуғуну ҝөстәрән башына ҝәлән, јахуд ешитдијин һадисәни даныш.
8 Ола биләр, мәктәбдә, ишдә, һәтта евдә үстүмүзә истеһзалар вә иттиһамлар јағдырырлар. Анҹаг чох вахт јалан иттиһамларын өһдәсиндән ҝәлмәјин ән јахшы үсулу Мүгәддәс Китабын ‘сусмағын өз вахты вар’ принсипинә риајәт етмәкдир (Ваиз 3:1, 7). Неһемја кими биз дә өзүмүзү сәрт ҹаваб гајтармагдан сахлајырыг (Ромалылара 12:17). Биз «әвәзини Мән верәҹәјәм» дејән Јеһоваја бел бағлајыб, дуада Она үз тутуруг (Ромалылара 12:19; 1 Петер 2:19, 20). Бу ҹүр давранмагла дүшмәнләримизә јол вермирик ки, бу ҝүн јеринә јетирилмәли олан руһани ишдән — Аллаһын Падшаһлығы һаггында хош хәбәри тәблиғ етмәк вә шаҝирд һазырламаг ишиндән бизи јајындырсынлар (Матта 24:14; 28:19, 20). Һәр дәфә мүгавимәтләрә рәғмән тәблиғдә иштирак едәндә Неһемја кими сәдагәтли олдуғумузу ҝөстәририк.
‘Биз сәни өлдүрәҹәјик’
9. Дүшмәнләр бу дәфә нә етдиләр вә Неһемја ҹавабында һансы тәдбири ҝөрдү?
9 Неһемјанын ҝүнләриндә һәгиги ибадәтин дүшмәнләри «Јерусәлим диварынын бәрпа ишләринин ирәлиләдијини» ешидәндә гылынҹларыны чәкдиләр ки, ‘Јерусәлимә һүҹум етсинләр’. Јәһудиләрин вәзијјәти чыхылмаз ҝөрүнүрдү. Шималдан самаријалылар, шәргдән аммонлулар, ҹәнубдан әрәбләр, гәрбдән исә ашдодлулар онлара дүшмән кәсилмишди. Јерусәлим әһатәјә алынмышды, исраиллиләр тәләдә идиләр! Бу вәзијјәтдә онлар нә етмәли идиләр? Неһемја дејир: «Биз Аллаһымыза дуа етдик». Дүшмәнләр иши дајандырмаг үчүн: «Јәһудиләрин арасына ҝириб онлары өлдүрәк», — дејә һәдә-горху ҝәлирдиләр. Онлара ҹаваб олараг, Неһемја ишчиләрә ‘гылынҹла, низә илә, ох-каманла’ шәһәри мүдафиә етмәји тапшырды. Дүздүр, инсан нөгтеји-нәзәриндән бир дәстә јәһуди бөјүк дүшмән гүввәләри гаршында аҹиз ҝөрүнүрдү, лакин Неһемја: «Онлардан горхмајын! Бөјүк вә зәһмли Худавәнди хатырлајын!» — дејәрәк халга үрәк-дирәк верирди (Неһемја 4:7-9, 11, 13, 14).
10. а) Неһемјанын дүшмәнләринин бирдән-бирә фикирләриндән дашынмасына нә сәбәб олду? б) Неһемја һансы тәдбирләри ҝөрдү?
10 Ҝөзләнилмәдән һадисәләрин ахары дәјишилди. Дүшмәнләр һүҹум етмәк фикриндән дашындылар. Сәбәб нә иди? Неһемја јазыр: «Аллаһ онларын нијјәтини боша чыхармышды». Анҹаг Неһемја баша дүшүрдү ки, тәһлүкә һәлә совушмајыб. Буна ҝөрә дә ағыллы тәрпәниб ишдә дәјишиклик етди. О вахтдан «јүк дашыјан фәһләләр бир әли илә иш ҝөрүр, о бири әли илә силаһ тутурду». Неһемја һәм дә дүшмән һүҹум етдији тәгдирдә ишчиләри хәбәрдар етмәк үчүн «шејпурчу» гојду. Һәр шејдән әлавә, Неһемја халгы архајын етди: «Аллаһымыз бизим үчүн вурушаҹаг» (Неһемја 4:15-20). Руһланмыш вә һүҹума һазыр олан ишчиләр ишә давам едирдиләр. Бу һадисә бизә нәји өјрәдир?
11. Тәблиғ ишинин гадаған едилдији өлкәләрдә јашајан мәсиһчиләрә пислијә таб ҝәтирмәкдә нә көмәк едир вә онлар пислијә јахшылыг илә неҹә галиб ҝәлирләр?
11 Һәрдән һәгиги мәсиһчиләр шиддәтли мүгавимәтләрә мә’руз галырлар. Бә’зи өлкәләрдә һәгиги ибадәтин гаты дүшмәнләри бөјүк гүввәјә саһибдирләр. Инсан нөгтеји-нәзәри илә бахсаг, һәмин өлкәләрдә һәмиманлыларымызын вәзијјәти чыхылмаздыр. Анҹаг орадакы мәсиһчиләр әминдирләр ки, ‘Аллаһ онлар үчүн вурушаҹаг’. Һәгигәтән дә, е’тигадларына ҝөрә тә’гиб едиләнләр Јеһованын онларын дуаларына ҹаваб вердијини вә ҝүҹлү дүшмәнләрин ‘нијјәтини боша чыхардығыны’ дәфәләрлә ҝөрмүшләр. Тәблиғ ишинин гадаған едилдији өлкәләрдә дә мәсиһчиләр хош хәбәри тәблиғ етмәк үчүн јоллар тапырлар. Јерусәлимин диварыны бәрпа едәнләр ишләриндә дәјишиклик етдикләри кими, Јеһованын Шаһидләри дә һүҹумлара мә’руз галанда еһтијатлы тәрпәниб тәблиғ үсулларыны дәјиширләр. Анҹаг сөзсүз ки, онлар силаһ галдырмырлар (2 Коринфлиләрә 10:4). Һәтта онлара гаршы зор ишләдиләндә белә, тәблиғ ишинә сон гојмурлар (1 Петер 4:16). Әксинә, мәрд баҹы-гардашларымыз ‘пислијә јахшылыг илә галиб ҝәлирләр’.
‘Ҝәл ҝөрүшәк’
12, 13. а) Неһемјанын дүшмәнләри һансы һијләјә әл атдылар? б) Неһемја нә үчүн дүшмәнләринин тәклифини рәдд етди?
12 Неһемјанын дүшмәнләри ачыг һүҹумлардан бир шеј чыхмадығыны ҝөрәндә һијләјә әл атдылар. Онлар үч план гурдулар.
13 Әввәлҹә Неһемјаны алдатмаг истәдиләр. Онлар Неһемјаја дедиләр: «Ҝәл Оно дүзәнлијиндәки кәндләрин бириндә ҝөрүшәк». Оно Јерусәлим илә Самаријанын арасында јерләширди. Дүшмәнләр тәклиф едирдиләр ки, Неһемја анлашылмазлығы һәлл етмәк үчүн јолун јарысына гәдәр ҝәлиб онларла ҝөрүшсүн. Неһемја дүшүнә биләрди: «Ағыллы фикирдир. Вурушмагданса, данышыглар апармаг даһа јахшыдыр». Амма Неһемја тәклифи рәдд етди. Сәбәбини исә белә изаһ етди: «Онлар мәнә пислик етмәк нијјәтиндә иди». Неһемја онларын мәгсәдини баша дүшдүјү үчүн алданмады. О, дөрд дәфә дүшмәнләринә деди: «Бөјүк бир иш ҝөрүрәм вә ораја енә билмәрәм. Бу иши гојуб јаныныза ендијим мүддәт әрзиндә иш нә үчүн дајансын?» Неһемјанын ҝүзәштә ҝетмәси үчүн дүшмәнләрин ҝөстәрдији бүтүн ҹәһдләр боша чыхды. О, ишиндән јајынмады (Неһемја 6:1-4).
14. Неһемја дүшмәнләринин иттиһамына неҹә ҹаваб верди?
14 Сонра дүшмәнләр шајиәләр јајдылар ки, ҝуја Неһемја Артахшаста падшаһа гаршы ‘үсјан етмәк нијјәтиндәдир’. Онлар Неһемјаја бир дә тәклиф етдиләр: «Ҝәл бу барәдә бирликдә мәсләһәтләшәк». Неһемја јенә дә дүшмәнләринин нијјәтини баша дүшдүјү үчүн тәклифләрини рәдд етди. О дејир: «Һамы бизи горхутмаға чалышыб дејирди: “Бу ишдән әлләри сојујаҹаг вә бу иш баш тутмајаҹаг”». Анҹаг бу дәфә Неһемја: «Дедијин шејләрин һеч бири олмајыб, сән онлары өзүндән ујдурмусан», — дејәрәк дүшмәнләринин јаланыны тутду. Үстәлик, о, дуада Јеһовадан көмәк диләди: «Ај Аллаһ, инди Сән әлләримә гүввәт вер!» О архајын иди ки, Јеһованын көмәји илә бу мәкрли план боша чыхаҹаг вә тикинтини баша вураҹаг (Неһемја 6:5-9).
15. Јаланчы пејғәмбәр Неһемјаја һансы мәсләһәти верди вә нә үчүн Неһемја ону гәбул етмәди?
15 Ән ахырда Неһемјанын дүшмәнләри исраилли Шемајаны пулла өз тәрәфләринә чәкдиләр ки, Неһемјаны Аллаһын ганунуну позмаға тәһрик етсин. Шемаја Неһемјаја деди: «Ҝәл Аллаһын евиндә мә’бәддә ҝөрүшәк вә гапыларыны бағлајаг. Чүнки сәни өлдүрмәјә адамлар ҝәләҹәк». Шемајанын сөзләринә ҝөрә, Неһемјаја суи-гәсд һазырланырды вә о, мә’бәддә ҝизләнмәклә ҹаныны хилас едә биләрди. Амма Неһемја каһин дејилди. Аллаһын евиндә ҝизләнмәји ҝүнаһ оларды. Бәс ҝөрәсән, о, һәјатыны гуртармаг үчүн Аллаһын гануну позаҹагдымы? Неһемја ҹаваб верди: «Ким мәним јеримдә олса сағ галсын дејә мә’бәдә ҝирәр? Ҝирмәрәм» (КМ). Неһемја нәјә ҝөрә тора дүшмәди? Чүнки билирди ки, Шемаја исраилли олса да, ону «Аллаһ ҝөндәрмәмишди». Үстәлик, һәгиги пејғәмбәр һеч вахт она Аллаһын ганунуну позмағы мәсләһәт ҝөрмәзди. Неһемја јенә дә дүшмәнләринә мәғлуб олмады. Чох кечмәмиш о јазды: «Елул ајынын ијирми бешиндә, әлли ики ҝүн әрзиндә диварын тикинтиси тамамланды» (Неһемја 6:10-15; Сајлар 1:51; 18:7).
16. а) Өзүнү јаландан дост-гардаш адландыранларла вә иттиһамчыларла неҹә давранмалыјыг? б) Евдә, мәктәбдә вә ја ишдә е’тигадыныздан дөнмәдијинизи неҹә ҝөстәрирсиниз?
16 Бизим дә габағымыза өзләрини дост-гардаш кими гәләмә верән вә ја бизи нәдәсә ҝүнаһландыран дүшмәнләр чыха биләр. Ола билсин, кимсә бизим ҝүзәштә ҝетмәјимизи истәјәр. Онлар бизи инандырмаға чалышарлар ки, Јеһоваја хидмәтдә сә’јимизи һеч олмаса бир азҹа азалтсаг, дүнјәви мәгсәдләрә дә чата биләрик. Анҹаг Аллаһын Падшаһлығыны һәјатымызда биринҹи јерә гојдуғумуз үчүн биз ҝүзәштә ҝетмирик (Матта 6:33; Лука 9:57-62). Дүшмәнләр бизим һаггымызда шајиәләр дә јајырлар. Неҹә ки, Неһемјаны дөвләтә гаршы үсјан галдырмагда иттиһам етмишдиләр, бә’зи өлкәләрдә бизим дә дөвләт үчүн тәһлүкәли олдуғумузу иддиа едирләр. Бә’зи иттиһамлар мәһкәмәләр васитәсилә тәкзиб олунуб. Лакин һәр бир вәзијјәтин нәтиҹәси неҹә олурса-олсун, биз инамла Јеһоваја дуа едирик ки, ишләри истәдији сәмтә јөнәлтсин (Филипилиләрә 1:7). Өзләрини Јеһованын хидмәтчиси кими таныдан инсанлар да бизә мүгавимәт ҝөстәрә биләрләр. Неҹә ки, јәһуди Неһемјаны өз һәјатыны гуртармаг үчүн Аллаһын ганунуну позмаға тәһрик едирдисә, дөнүкләр дә бизи Јеһованын мүәјјән ганунундан чыхмаға тәһрик едә биләр. Лакин биз онларын бүтүн тәклифләрини рәдд едирик, чүнки билирик ки, һәјатымыз Аллаһын ганунларыны позмагла дејил, онлара әмәл етмәклә хилас олунур! (1 Јәһја 4:1). Бәли, Јеһованын көмәји илә биз һәр ҹүр пислијә галиб ҝәлә биләрик.
Писликләрә бахмајараг хош хәбәри тәблиғ едирик
17, 18. а) Шејтан вә онун тәрәфдарларынын мәгсәди нәдир? б) Сиз нә етмәјә гәти гәрарлысыныз вә нә үчүн?
17 Аллаһын Кәламы Исанын мәсһ олунмуш гардашлары һаггында дејир: «Онлар... шәһадәт етдикләри тәблиғ илә [Шејтана] галиб ҝәлдиләр» (Вәһј 12:11). Беләликлә, пислијин мәнбәји олан Шејтана галиб ҝәлмәклә Падшаһлыг һаггында хош хәбәри тәблиғ етмәк арасында бирбаша бағлылыг вар. Тәәҹҹүблү дејил ки, Шејтан усанмадан јердәки мәсһ олунмушлары вә ‘бөјүк издиһамы’ тә’гиб едир (Вәһј 7:9; 12:17).
18 Ҝөрдүјүмүз кими, мүгавимәтләр тәһгир, зор ишләтмәк һәдә-горхусу вә ја илк бахышдан сезилмәјән башга формаларда ола биләр. Һәр бир һалда Шејтанын мәгсәди ејнидир — тәблиғ ишини дајандырмаг. Лакин онун бүтүн ҹәһдләри боша чыхаҹаг, чүнки Неһемја кими Аллаһын халгы да ‘пислијә јахшылыг илә галиб ҝәлмәјә’ гәти гәрарлыдыр. Онлар буну Јеһова «бәсдир» дејинҹәјә гәдәр хош хәбәри јајмагла едәҹәкләр! (Марк 13:10; Ромалылара 8:31; Филипилиләрә 1:27, 28).
[Һашијә]
a Бу һадисәләр һаггында даһа әтрафлы мә’лумат алмаг үчүн Неһемја 1:1-4; 2:1-6, 9-20; 4:1-23; 6:1-15 ајәләрини охујун.
Хатырлајырсынызмы?
• Аллаһын хидмәтчиләринин кечмишдә вә инди үзләшдији мүгавимәтләр һансылардыр?
• Неһемјанын дүшмәнләринин башлыҹа мәгсәди нә иди, бәс Аллаһын халгынын буҝүнкү дүшмәнләри нәјә наил олмаг истәјирләр?
• Биз пислијә јахшылыгла неҹә галиб ҝәлирик?
[29-ҹу сәһифәдәки чәрчивә/шәкил]
«Неһемја» китабындан өјрәндикләримиз:
Аллаһын хидмәтчиләри үзләширләр
• истеһзалар
• һәдә-горху
• һијләләрлә
Һијләјә әл ата биләрләр
• јаланчы достлар
• иттиһамчылар
• јаланчы гардашлар
Аллаһын хидмәтчиләри пислијә галиб ҝәлирләр
• Онун вердији тапшырыгдан јајынмамагла
[27-ҹи сәһифәдәки шәкил]
Неһемја вә онун әмәкдашлары шиддәтли мүгавимәтләрә бахмајараг, Јерусәлимин диварыны бәрпа етдиләр.
[31-ҹи сәһифәдәки шәкил]
Һәгиги мәсиһчиләр хош хәбәри ҹәсарәтлә тәблиғ едирләр.