Мәсиһин дүшүнҹә тәрзини әкс етдирин

“Гој тәһәммүл вә тәсәлли верән Аллаһ, Мәсиһ Исаја әсасән сизә, өз аранызда һәмфикир олмағы еһсан етсин [“сизә, Мәсиһ Исанын малик олдуғу дүшүнҹә тәрзини өз аранызда әкс етдирмәји бәхш етсин”, ЈД]” (РОМАЛЫЛАРА 15:5).

1. Инсанын дүшүнҹә тәрзи онун һәјатына неҹә тә’сир едир?

ИНСАНЫН дүшүнҹә тәрзи онун һәјатына нәзәрә чарпаҹаг дәрәҹәдә тә’сир едир. Инсан истәр е’тинасыз вә ја чалышган, мүсбәт вә ја мәнфи дүшүнҹә тәрзли, истәрсә дә инадкар вә ја әмәкдашлыға һазыр, һеч нә илә гане олмајан вә ја һәр шеј үчүн миннәтдар олсун - онун мүхтәлиф вәзијјәтләрдә өзүнү неҹә апараҹағы вә әтрафдакыларын она неҹә јанашмалары бүтүн бунлардан асылыдыр. Инсанын дүшүнҹә тәрзи јахшы оланда, һәтта кифајәт гәдәр чәтин вәзијјәтләрдә белә, севинҹини горујуб сахлаја биләр. Һәтта објектив нөгтеји-нәзәрдән һәр шеј јахшы оланда да, дүшүнҹә тәрзи пис олан инсана елә ҝәлир ки, әтрафындакы ишләр өз гајдасында дејил.

2. Инсанда бу вә ја диҝәр дүшүнҹә тәрзи һарадан јараныр?

² Мәнфи вә ја мүсбәт дүшүнҹә тәрзини јетишдирмәк олар, ону һәтта јетишдирмәк лазымдыр да. “Коллирин Енсиклопедијасы”нда јени доғулан көрпә һаггында дејилир: “Нәтиҹәдә онда олаҹаг дүшүнҹә тәрзини, о өзү әлдә едир вә ја јетишдирир; бу, хариҹи дил вә ја башга вәрдишләрин өјрәнилмәсини хатырладыр”. Биз дүшүнҹә тәрзини неҹә јетишдиририк? Бу чох шејдән асылыдыр, лакин бизи әһатә едән мүһитин вә үнсијјәтин бу ишдә ролу аз дејил. Һәмин енсиклопедијада гејд едилир: “Тәдриҹән биз, јахын үнсијјәтдә олдуғумуз инсанларын дүшүнҹә тәрзини мәнимсәјир вә ја она вәрдиш едирик”. Буна бәнзәр бир фикир мин илләр әввәл Мүгәддәс Китабда јазылыб: “Һикмәтлиләрлә ҝәзән адам һикмәтли олур; фәгәт ағылсызларын досту зәрәр ҝөрүр” (Сүлејманын мәсәлләри 13:20; 1 Коринфлиләрә 15:33).

Дүзҝүн дүшүнҹә тәрзинә нүмунә

3. Нүмунәви дүшүнҹә тәрзи кимдә олмушдур вә бунда биз она неҹә бәнзәјә биләрик?

³ Бүтүн башга мүнасибәтләрдә олдуғу кими, Иса Мәсиһ, дүшүнҹә тәрзинә мүнасибәтдә дә ҝөзәл нүмунә верди. О деди: “Мәним сизә етдијим кими сиз дә едәсиниз дејә, сизә бир нүмунә ҝөстәрдим” (Јәһја 13:15). Иса кими олмаг үчүн, биз илк нөвбәдә онун һаггында олан билијимизи артырмалыјыгa. Биз онун һәјатыны өјрәнирик ки, һәвари Павелин сөзләринә риајәт едәк: “Сиз бунун үчүн чағырылдыныз. Чүнки Мәсиһ дә бизә бир нүмунә гојараг, бизим үчүн изтираб чәкди ки, биз Онун изләри илә ҝедәк” (1 Петер 2:21). Бизим мәгсәдимиз, баҹардыгҹа даһа чох Исаја бәнзәмәкдир. Бунун үчүн исә, онда олан дүшүнҹә тәрзини инкишаф етдирмәк лазымдыр.

4, 5. Ромалылара 15:1—3 ајәләриндә Исанын дүшүнҹә тәрзинин һансы саһәсинә диггәт јетирилир вә мәсиһчиләр Исаја неҹә бәнзәјә биләрләр?

⁴ Иса Мәсиһин дүшүнҹә тәрзиндә олмаг нә демәкдир? Павелин Ромалылара јаздығы мәктубун 15-ҹи фәсли, бу суала ҹаваб вермәкдә бизә көмәк едир. Павел, бу фәслин илк ајәләриндә Исанын диггәтә лајиг бир хүсусијјәти барәдә дејир: “Биз гүввәтлиләр гүввәтсизләрин зәифликләринә дөзмәли вә өз гајғымыза галмамалыјыг. Һәр биримиз јахшылыг наминә өз гоншумузун гајғысына галмалыјыг ки, о руһән инкишаф етсин. Она ҝөрә ки, Мәсиһ дә Өз гајғысына галмамышды, амма неҹә ки, јазылмышдыр: “Сәни рүсвај едәнләрин һәгарәти Мәним үзәримә дүшдү”” (Ромалылара 15:1—3).

⁵ Мәсиһчиләр тәшвиг олунурлар ки, Исанын дүшүнҹә тәрзини тәглид едәрәк, јалныз өзләрини мәмнун етмәјә јох, тәвазөкарлыгла башгаларынын да еһтијаҹларына гајғы ҝөстәрмәјә һазыр олсунлар. Доғрудан да, башгаларына тәвазөкарлыгла көнүллү сурәтдә хидмәт етмәк, “гүввәтлиләрин” фәргләндириҹи хүсусијјәтидир. Дүнјада јашамыш бүтүн инсанлардан руһани ҹәһәтҹә гүввәтли олан Иса, өзү барәдә дејирди: “Инсан Оғлу Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир” (Матта 20:28). Биз мәсиһчиләр дә, башгаларына, о ҹүмләдән “гүввәтсизләрә” хидмәт етмәк истәјирик.

6. Мүгавимәт вә тәзјигә ҝөстәрдији мүнасибәтдә, биз Исаја неҹә бәнзәјә биләрик?

⁶ Исанын башга бир ҝөзәл хүсусијјәти ондан ибарәт иди ки, онун дүшүнҹә тәрзи һәмишә мүсбәт, давранышы исә нүмунәви олмушду. Иса, һеч заман јол вермирди ки, әтрафындакы инсанларын мәнфи дүшүнҹә тәрзи, онун Аллаһа хидмәтинә олан шәхси мүнасибәтинә тә’сир ҝөстәрсин; биз дә ејнилә белә етмәлијик. Аллаһа сәдагәтлә ибадәт етдијинә ҝөрә Исаны тәһгир вә тә’гиб едән заман, о, дөзүм вә сәбирлә буна таб ҝәтирирди. Иса билирди ки, “јахшылыг наминә өз гоншусунун гајғысына галмаға” чалышан шәхсләр, онлара инанмајан вә онлары баша дүшмәјән дүнјанын тәрәфиндән мүгавимәтә мә’руз гала биләрләр.

7. Иса сәбирлилији неҹә ҝөстәрди вә нәјә ҝөрә биз дә белә давранмалыјыг?

⁷ Дүзҝүн дүшүнҹә тәрзини Иса башга ҹәһәтләрдә дә ҝөстәрирди. О, Јегованын нијјәтләри илә әлагәдар һеч вахт сәбирсизлик етмирди, анҹаг тәмкинликлә онларын јеринә јетмәсини ҝөзләјирди (Мәзмур 110:1; Матта 24:36; Һәвариләрин ишләри 2:32—36; Ибраниләрә 10:12, 13). Бундан әлавә, Иса өз давамчылары илә дә һөвсәләсиз рәфтар етмирди. Иса онлара деди: “Мәндән өјрәнин”; чүнки о, “һәлим” иди, буна ҝөрә дә онун өјүд-нәсиһәтләри гүввә верир вә руһландырырды. “Гәлбдән тәвазөкар” олдуғу үчүн исә, о, һеч заман мәғрур вә ја ловға дејилди (Матта 11:29). Павел бизи бу ишдә Исаја бәнзәмәјә тәшвиг едир: “Мәсиһ Исада олан фикир сизин аранызда да олсун. Аллаһ сурәтиндә олдуғу һалда О, Аллаһла бәрабәрлији, имтинасы мүмкүн олмајан бир һагг сајмады. Лакин Өзүнү һеч едәрәк, Өзүнү гул сурәтинә салыб, инсанлара охшар олду” (Филипилиләрә 2:5—7).

8, 9. а) Биз нә үчүн худбин олмајан дүшүнҹә тәрзи үзәриндә ишләмәлијик? б) Әҝәр Исанын нүмунәсинә дәгигликлә әмәл етмәјә мүвәффәг олмуругса, нәјә ҝөрә руһдан дүшмәк лазым дејил вә Павел бу ҹәһәтдән неҹә јахшы нүмунә верди?

⁸ Башгаларына хидмәт етмәк вә онларын тәлабатларыны өзүмүзүнкүндән үстүн тутмаг истәдијимизи демәк асандыр. Лакин әҝәр өз дүшүнҹә тәрзимизи виҹданла нәзәрдән кечирсәк бәлкә дә ашкар олунар ки, үрәјимиз буна там мә’нада мејлли дејил. Нә үчүн? Биринҹиси, она ҝөрә ки, биз Адәмлә Һәввадан худбинлик хүсусијјәтини мирас алмышыг; икинҹиси исә, она ҝөрә ки, биз, худбинлијә тәһрик едән дүнјада јашајырыг (Ефеслиләрә 4:17, 18). Чох һалларда худбин олмајан дүшүнҹә тәрзини јетишдирмәк үчүн, анаданҝәлмә гејри-камиллик мејлләринә гаршы дуран тәфәккүрү инкишаф етдирмәк лазымдыр. Бунун үчүн гәтијјәтли олмаг вә сә’ј ҝөстәрмәк тәләб олунур.

⁹ Исанын гојдуғу камил нүмунәнин зәмининдә ачыг-ашкар гејри-камиллијимиз, бә’зән бизи руһдан сала биләр. Онун дүшүнҹә тәрзини әлдә етмәк бизә гејри-мүмкүн ҝөрүнә биләр. Лакин Павелин үмидвериҹи сөзләринә фикир верин: “Чүнки билирәм ки, мәндә, јә’ни ҹисмани тәбиәтимдә јахшы шеј јашамыр; јахшы шеј етмәк истәји мәндә вар, амма тәтбиг етмәјә ҝүҹүм чатмыр. Истәдијим јахшы шеји етмирәм, лакин истәмәдијим пис иши ҝөрүрәм. Чүнки Аллаһын Ганунундан дахили варлығыма ҝөрә зөвг алырам. Лакин мән үзвләримдә башга бир ганун да ҝөрүрәм ки, о, ағлымын тәсвиб етдији ганун илә мүбаризә едир вә үзвләримдә олан ҝүнаһ ганунуна мәни әсир едир” (Ромалылара 7:18, 19, 22, 23). Дүздүр, Павелин гејри-камиллији, Аллаһын ирадәсини истәдији кими јеринә јетирмәјиндә она дәфәләрлә мане олмушдур, амма Павелин ҝөстәрдији дүшүнҹә тәрзи - Јегова вә Онун ганунлары барәдә фикирләшмәси вә бунунла әлагәдар онда јаранан һиссләр - нүмунәви олмушдур. Буна биз дә наил ола биләрик.

Дүзҝүн олмајан дүшүнҹә тәрзини дәјиширик

10. Павел филипилиләри һансы дүшүнҹә тәрзини инкишаф етдирмәјә тәшвиг едирди?

¹⁰ Елә олурму ки, кимәсә дүзҝүн олмајан дүшүнҹә тәрзини дәјишмәк лазым ҝәлә? Бәли. Ҝөрүнүр ки, биринҹи әсрдәки бә’зи мәсиһчиләрә буну етмәк лазым иди. Павел, Филипилиләрә ҝөндәрдији мәктубунда, мәсиһчиләрдә һансы дүшүнҹә тәрзинин олмасындан данышырды. О јазырды: “Бу о демәк дејил ки, мән инди она [даһа еркән дирилмә васитәсилә ҝөјләр һәјатына] наил олмушам, јахуд инди камилләшмишәм; амма тәләсирәм ки, мүкафаты әлдә едим, чүнки Мәсиһ мәни бунун үчүн әлдә етди. Гардашлар, мән һесаб етмирәм ки, ону әлдә етмишәм. Јалныз бир шеј едирәм, архада галан һәр шеји унудуб, гаршыда олана чатмаға ҹан атараг, Аллаһын Мәсиһ Иса васитәсилә етдији јүксәк дә’вәтә дахил олан мүкафат үчүн һәдәфә доғру гачырам. Беләликлә, арамызда ким камил исә белә дүшүнсүн” (Филипилиләрә 3:12—15).

11, 12. Малик олаҹағымыз дүшүнҹә тәрзини Јегова бизә неҹә ашкар едир?

¹¹ Павелин сөзләриндән ҝөрүнүр ки, инсан мәсиһчи олдугдан сонра руһән инкишаф етмәјин ваҹиблијини һисс етмирсә, онун дүшүнҹә тәрзи дүз дејилдир. Һәмин шәхс Мәсиһин дүшүнҹә тәрзини мәнимсәмәјиб (Ибраниләрә 4:11; 2 Петер 1:10; 3:14). Демәк олармы ки, бу адам үмидсиз вәзијјәтдәдир? Әсла јох. Әҝәр биз, дүшүнҹә тәрзимизи һәгигәтән дә дәјишмәк истәјириксә, Аллаһ бу ишдә бизә көмәк едә биләр. Даһа сонра Павел дејир: “Әҝәр сиз бир мөвзуда башга ҹүр дүшүнүрсүнүзсә, Аллаһ буну да сизә ачаҹагдыр” (Филипилиләрә 3:15).

¹² Анҹаг һансы дүшүнҹә тәрзинә малик олмағымызы Јегованын бизә ашкар етмәсини истәјириксә, гүввә сәрф етмәлијик. Аллаһын Кәламыны, дуа едәрәк “садиг вә ағыллы гул”ун нәшр етдији әдәбијјатларын көмәји илә өјрәнмәк “башга ҹүр дүшүнән” кәсләрә дүзҝүн дүшүнҹә тәрзини инкишаф етдирмәкдә көмәк едәҹәкдир (Матта 24:45). “Аллаһын ҹәмијјәтини... ҝүдмәк” үчүн, мүгәддәс руһла тә’јин олунан мәсиһчи ағсаггаллары белә инсанлара севинҹлә көмәк едәҹәкләр (Һәвариләрин ишләри 20:28). Биз Јеговаја чох миннәтдарыг ки, О, бизим гејри-камиллијимизи нәзәрә алыр вә мәһәббәтлә бизә көмәк ҝөстәрир! Ҝәлин бу көмәји гәбул едәк.

Башгаларындан өјрәнирик

13. Мүгәддәс Китабын Ејуб һаггында сөјләдикләри, дүзҝүн дүшүнҹә тәрзинә аид бизи нәјә өјрәдир?

¹³ Ромалылара јаздығы мәктубун 15-ҹи фәслиндә Павел ҝөстәрир ки, тарихи нүмунәләр үзәриндә дәриндән фикирләшмәк, дүшүнҹә тәрзини дәјишмәкдә бизә көмәк едә биләр. О, јазыр: “Бундан әввәл јазыланларын һамысы бизә тә’лим олараг јазылды ки, тәһәммүл вә Мүгәддәс Јазыларын тәсәллиси илә үмидимиз олсун” (Ромалылара 15:4). Кечмишдә Јегованын бә’зи садиг хидмәтчиләриндән тәләб олунурду ки, дүшүнҹә тәрзләрини дәјишсинләр. Мәсәлән, Ејуб бүтөвлүкдә јахшы дүшүнҹә тәрзинә малик иди. О, һеч заман писликләри Јеговадан ҝөрмүрдү вә әзабларын онда Аллаһа гаршы шүбһә ојатмасына јол вермирди (Ејуб 1:8, 21, 22). Лакин өзүнә бәраәт газандырмаға мејлли иди. Јегова Елиһуну тәшвиг етди ки, бу мејлин өһдәсиндән ҝәлмәкдә Ејуба көмәк етсин. Инҹимәк әвәзинә, Ејуб тәвазөкарлыгла дүшүнҹә тәрзини дәјишмәјин зәрури олдуғуна разылашды вә дәрһал бу саһәдә ишә башлады (Ејуб 42:1—6).

14. Ҝөстәрдијимиз дүшүнҹә тәрзинә аид бизә мәсләһәт вериләндә, Ејуба неҹә бәнзәјә биләрик?

¹⁴ Әҝәр мәсиһчиләрдән бири, нәдә исә дүзҝүн дүшүнҹә тәрзи ҝөстәрмәдијимизи бизә хејирхаһлыгла дејәрсә, биз Ејуб кими давранарыгмы? Ҝәлин онун кими, Аллаһы һеч нәдә “ҝүнаһкар ҝөрмәјәк” (Ејуб 1:22, ЈД). Әҝәр наһагдан әзаб чәкириксә, ҝәлин шикајәтләнмәјәк вә өз чәтинликләримиздә Јегованы тагсыркар тутмајаг. Јеговаја хидмәтимиздә һансы шәрәфли имтијазлары јеринә јетирсәк дә, “һеч бир гијмәти олмајан гуллар” олдуғумузу јадда сахлајараг, өзүмүзә һагг газандырмајаг (Лука 17:10).

15. а) Исанын бә’зи давамчыларында һансы сәһв дүшүнҹә тәрзи ашкар олунду? б) Петер јахшы дүшүнҹә тәрзини неҹә әкс етдирди?

¹⁵ Биринҹи әсрдә Исаны динләјәнләрдән бә’зиләри сәһв дүшүнҹә тәрзи ҝөстәрмишдиләр. Бир дәфә Иса, чәтин анлашылан фикир сөјләди. Буна ҹаваб олараг, “шаҝирдләриндән бир чоху буну ешитдикдә: Бу чәтин сөздүр. Ону ким динләјә биләр? - дедиләр”. Ајдын мәсәләдир ки, белә дејәнләрин дүшүнҹә тәрзләри дүзҝүн дејилди. Бу да она ҝәтириб чыхартды ки, онлар Исаны динләмәкдән әл чәкдиләр. Биз охујуруг: “Бу замандан е’тибарән шаҝирдләриндән бир чоху Ондан ајрылыб, артыг Онунла ҝәзмирди”. Бәс онларын һамысынынмы дүшүнҹә тәрзи сәһв иди? Хејр. Даһа сонра дејилир: “Буна ҝөрә Иса Оникиләрә деди: “Јохса сиз дә ҝетмәк истәјирсиниз?” Шимон Петер Она ҹаваб верди: “Ја Рәбб, биз кимин јанына ҝедә биләрик?”” Сонра Петер, әслиндә өз суалына өзү ҹаваб верир: “Әбәди һәјатын сөзләри Сәндәдир” (Јәһја 6:60, 66—68). Неҹә дә ҝөзәл дүшүнҹә тәрзидир! Мүгәддәс Китабын нөгтеји-нәзәриндә чәтин разылаша биләҹәјимиз изаһат вә ја дәјишикликлә растлашдығымыз заман, мәҝәр Петердә олан дүшүнҹә тәрзини әкс етдирмәк јахшы олмазмы? Нәји исә һәмин ан баша дүшмәдијимизә ҝөрә Јеговаја хидмәти дајандырмаг вә ја “сәһиһ сөзләри”н әксинә данышмаг неҹә дә ағылсызлыг оларды! (2 Тимотејә 1:13)

16. Исанын ҝүнләриндә јәһуди дин хадимләри һансы сарсыдыҹы мүнасибәти ҝөстәрдиләр?

¹⁶ Биринҹи әсрин јәһуди дин хадимләриндә Исанын дүшүнҹә тәрзи јох иди. Иса Лазары дирилтдији заман баш верән һадисә ҝөстәрир ки, онлар Исаны динләмәји инадкарлыгла рәдд едирдиләр. Бу мө’ҹүзә, дүзҝүн дүшүнҹә тәрзи олан инсанларын һамысы үчүн, Исанын Аллаһ тәрәфиндән ҝөндәрилдијинә шәксиз сүбут иди. Лакин охујуруг: “Буна ҝөрә баш каһинләр вә фәрисејләр бир Синедрион топлајыб дедиләр: “Нә едәк? Бу Адам бир чох мө’ҹүзәләр ҝөстәрир. Ону белә бурахсаг, һамы Она иман ҝәтирәҹәк; ромалылар да ҝәлиб һәм јеримизи, һәм дә халгымызы јох едәҹәкләр””. Онлар һансы гәрара ҝәлдиләр? “Елә о ҝүндән е’тибарән гәрара алдылар ки, Исаны өлдүрсүнләр”. Онлар, Исаны өлдүрмәк разылығындан әлавә, онун мө’ҹүзә ҝөстәрмәк габилијјәтинин ҹанлы сүбутуну да мәһв етмәк нијјәтиндә олдулар: “Баш каһинләр Лазары да өлдүрмәји араларында гәт етдиләр” (Јәһја 11:47, 48, 53; 12:9—11). Әҝәр белә бир дүшүнҹә тәрзи биздә јарансајды вә һәгигәтдә севиндирмәли олан шејләр бизи әсәбиләшдирсәјди, бу неҹә дә пис оларды! Бәли, бу чох тәһлүкәли оларды!

Мәсиһин мүсбәт дүшүнҹә тәрзини тәглид едирик

17. а) Даниел һансы шәраитләрдә ҹәсарәт ҝөстәрди? б) Иса ҹәсарәтини неҹә ҝөстәрди?

¹⁷ Јегованын хидмәтчиләри мүсбәт дүшүнҹә тәрзини горујуб сахлајырлар. Даниелин дүшмәнләри, отуз ҝүн әрзиндә падшаһдан савајы башга бир танрыја вә ја инсана һәр һансы бир хаһишлә мүраҹиәт етмәји гадаған едән ганунун сәранҹамына наил олмаға сөзләшдикләри заман, Даниел анлады ки, бу, онун Јегова Аллаһла олан мүнасибәтинә гәсд етмәкдир. О, 30 ҝүн әрзиндә Аллаһа дуа етмәдими? Әксинә, Даниел адәти үзрә, ҝүндә үч дәфә Јеговаја дуа етмәји ҹәсарәтлә давам етдирди (Даниел 6:6—17). Иса да дүшмәнләринин ону горхутмаларына јол вермирди. Бир дәфә шәнбә ҝүнү, о, әли гурумуш бир адамла растлашды. Иса билирди ки, әҝәр шәнбә ҝүнүндә кимәсә шәфа верәрсә, бу, орада иштирак едән јәһудиләрин чохуна хош ҝәлмәјәҹәк. О, ачыг-ашкар хаһиш етди ки, онлар бу барәдә өз фикирләрини десинләр. Онлар имтина етдикдә, Иса һәмин адама шәфа верди (Марк 3:1—6). Иса өз тапшырығыны һеч заман унутмурду вә ону лазым билдији кими јеринә јетирирди.

18. Бизә нә үчүн мүгавимәт ҝөстәрирләр вә дүшмәнләрин мәнфи дүшүнҹә тәрзинә биз неҹә мүнасибәт ҝөстәрмәлијик?

¹⁸ Бу ҝүн Јегованын Шаһидләри дәрк едирләр ки, дүшмәнләрдә мүмкүн олан мәнфи реаксијаларын онларда да горху һисси јаратмасына јол вермәк олмаз. Әкс тәгдирдә, онларын дүшүнҹә тәрзләри Мәсиһинкинә мүвафиг олмајаҹаг. Јегованын Шаһидләринә - бәзиләри онларын һаггында һәгигәти билмәдикләри үчүн, диҝәрләри исә онларын өзүнә вә ја онларын мүждәләринә нифрәт етдикләри үчүн - мүгавимәт ҝөстәрәнләрин сајы аз дејил. Лакин онларын гејри-сәмими нијјәтләринин мүсбәт дүшүнҹә тәрзимизә тә’сир етмәсинә јол вермәјәк. Аллаһа неҹә ибадәт етмәји башгаларынын бизә дигтә етмәләринә һеч заман јол вермәк олмаз.

19. Биз неҹә ҝөстәрә биләрик ки, Мәсиһдә олан дүшүнҹә тәрзи биздә дә вар?

¹⁹ Нә гәдәр чәтин олса да Иса, давамчыларына вә Аллаһын гурулушуна һәмишә мүсбәт дүшүнҹә тәрзи ҝөстәрирди (Матта 23:2, 3). Биз ону тәглид етмәлијик. Бәли, бизим гардашларымыз гејри-камилдирләр, анҹаг ахы биз дә еләјик. Бундан әлавә, үмумдүнја гардашлығындан башга, белә ҝөзәл вә һәгиги мә’нада сәдагәтли олан достлары биз һарадан тапа биләрик? Јегова бизә һәлә ки өз јазылы Кәламынын там изаһыны вермәјиб, амма һансы дини груп биздән чох дәрк едир? Белә исә ҝәлин Иса Мәсиһин малик олдуғу дүзҝүн дүшүнҹә тәрзини һәмишә өзүмүздә горујуб сахлајаг. Дүзҝүн дүшүнҹә тәрзини горујуб сахламаг үчүн биз, һәмчинин Јегованы да ҝөзләмәлијик. Бу һагда нөвбәти мөвзуда бәһс олунаҹаг.

[Һашијә]

Сиз неҹә изаһ едәрдиниз

• Дүшүнҹә тәрзимиз һәјатымыза неҹә тә’сир едир?

• Иса Мәсиһин дүшүнҹә тәрзини тәсвир един.

• Ејубун дүшүнҹә тәрзиндән нәјә өјрәнмәк олар?

• Ҝөстәрилән мүгавимәтләри һансы дүшүнҹә тәрзи илә гаршыламаг дүзҝүн оларды?

[18-ҹи сәһифәдәки шәкилләр]

Дүшүнҹә тәрзи дүзҝүн олан мәсиһчи башгаларына көмәк етмәјә ҹәһд ҝөстәрир

[21-ҹи сәһифәдәки шәкил]

Аллаһын Кәламыны дуа едәрәк өјрәнмәк, Мәсиһин дүшүнҹә тәрзини мәнимсәмәкдә бизә көмәк едир