Мәсиһин дүшүнҹә тәрзини горујуб сахлајын
«Мәсиһ Исада олан фикир сизин аранызда да олсун» (ФИЛИП. 2:5).
1. Мәсиһин дүшүнҹә тәрзини нәјә ҝөрә мәнимсәмәјә чалышмалыјыг?
«МӘНИМ јаныма ҝәлин... Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз»,— дејә Иса Мәсиһ сәсләјир (Мат. 11:28, 29). Бу сәмими дәвәт Исанын дүшүнҹә тәрзини неҹә дә ҝөзәл әкс етдирир! Һеч бир инсан бизә онун кими јахшы нүмунә ола билмәз. Аллаһын гүдрәтли Оғлу олмасына бахмајараг, о, һәр кәсә, хүсусилә дә әзијјәт чәкәнләрә шәфгәт вә нәвазишлә јанашырды.
2. Исанын дүшүнҹә тәрзини әкс етдирән һансы саһәләрә диггәт јетирәҹәјик?
2 Бу вә нөвбәти ики мәгаләдә Исанын дүшүнҹә тәрзини өзүмүздә неҹә инкишаф етдирәҹәјимизи вә горујуб сахлајаҹағымызы, һәмчинин һәјатымызда ‘Мәсиһин ағлыны’ неҹә әкс етдирәҹәјимизи арашдыраҹағыг (1 Кор. 2:16). Биз, әсасән, беш саһәјә — Исанын һәлимлик вә тәвазөкарлығына, лүтфкарлығына вә ја хејирхаһлығына, Аллаһа итаәткарлығына, ҹәсарәт вә түкәнмәз мәһәббәтинә диггәт јетирәҹәјик.
Мәсиһин һәлимлијиндән ибрәт ҝөтүрүн
3. а) Иса һәлимлијә даир шаҝирдләринә нә өјрәтди? б) Иса шаҝирдләринин зәифлијинә неҹә реаксија ҝөстәрди?
3 Аллаһын камил Оғлу Иса гејри-камил вә ҝүнаһлы инсанлар арасында хидмәт етмәк үчүн көнүллү олараг јер үзүнә ҝәлди. О билирди ки, бәзиләри ону өлдүрәҹәкләр. Бунунла белә, Иса һәмишә севинҹини горујур вә өзүнә һаким олмағы баҹарырды (1 Пет. 2:21-23). Башгаларынын гүсурлары вә гејри-камиллији үрәјимизә тохунанда ‘Исанын [нүмунәсинә] бахмаг’ ону тәглид етмәјимизә көмәк едәҹәк (Ибр. 12:2). Иса шаҝирдләрини өз бојундуруғу алтына ҝирмәјә вә ондан өјрәнмәјә дәвәт едирди (Мат. 11:29). Онлар Исадан нә өјрәнә биләрдиләр? Һәр шејдән әввәл, Иса һәлим иди вә шаҝирдләринин сәһвләринә бахмајараг, онлара гаршы сәбирли иди. Өлүмүндән әввәлки ҝеҹә Иса һәвариләринин ајагларыны јумагла онлара ‘гәлбән тәвазөкар’ олмаға даир һеч вахт јаддашларындан силинмәјәҹәк бир нүмунә верди. (Јәһја 13:14-17 ајәләрини оху.) Бир гәдәр сонра, Петерин, Јагубун вә Јәһјанын ‘ојаг дура’ билмәдијини ҝөрән Иса онларын зәифлијинә анлајышла јанашды. «Шимон, сән јатмысанмы? — дејә о сорушду. — Ојаг дуруб дуа един ки, имтаһана уғрамајасыныз. Доғрудан да руһ гејрәтли, бәдән исә зәифдир» (Марк 14:32-38).
4, 5. Исанын нүмунәси башгаларынын гүсурларына дүзҝүн мүнасибәт ҝөстәрмәкдә бизә неҹә көмәк едир?
4 Һәмиманлыларымыздан кимсә рәгабәт руһу ҝөстәрәндә, тез-тез күсәндә, јахуд ағсаггалларын вә ја «садиг вә ағыллы гул»ун ҝөстәришләринә дәрһал һај вермәјәндә бу, бизә неҹә тәсир едир? (Мат. 24:45-47). Ола билсин, биз бу дүнјанын инсанларындан хошаҝәлмәз һәрәкәтләр ҝөзләјир вә онларын сәһвләрини бағышлајырыг, анҹаг гардашларымызын бу кими гүсурларына ҝөз јума билмирик. Башгаларынын нөгсанлары бизим әсәбимизлә ојнајырса, өзүмүздән сорушмалыјыг: «‘Мәсиһин ағлыны’ даһа јахшы неҹә әкс етдирә биләрәм?» Бир шеји јаддан чыхарма ки, шаҝирдләри Мәсиһин дүшүнҹә тәрзини әкс етдирмәјәндә белә о, һеч вахт шаҝирдләриндән үмидини үзмүрдү.
5 Һәвари Петерин нүмунәсинә нәзәр салаг. Иса Петери гајыгдан дүшүб сујун үстү илә онун јанына ҝәлмәјә чағыранда о, бир мүддәт сујун үстү илә јериди. Бирдән о, фыртынаны ҝөрдү вә батмаға башлады. Иса өзүндән чыхыб: «Әҹәб олду! Гој бу, сәнә дәрс олсун»,— дедими? Хејр! «Иса о анда әлини узадыб ону тутду вә деди: “Еј аз иманлы адам, нә үчүн шүбһә етдин?”» (Мат. 14:28-31). Әҝәр биз дә гардашымызын иманынын чатышмадығыны ҝөрүрүксә, јардым әлимизи узадыб иманыны мөһкәмләндирмәкдә она көмәк едә биләрикми? Исанын Петерлә һәлимҹәсинә рәфтар етмәсиндән мәһз буну өјрәнирик.
6. Иса һәвариләринә нүфузлу мөвге тутмаға даир нә өјрәтди?
6 Араларында кимин ән бөјүк олдуғуна даир шаҝирдләрин сонсуз вә гызғын мүбаһисәләриндә Петер дә иштирак едирди. Јагубла Јәһја Падшаһлыгда Исанын сағында вә солунда отурмаг истәјирдиләр. Буну ешидән Петер вә диҝәр һәвариләр чох һиддәтләндиләр. Иса билирди ки, бу ҹүр дүшүнҹә тәрзи онлара боја-баша чатдыглары ҹәмијјәтдә ашыланмышды. Иса онлары јанына чағырыб деди: «Билирсиниз ки, милләтләрин башчылары онлара һөкмдарлыг едәрләр, вә ағалары үзәрләриндә һакимијјәт сүрәрләр. Сизин аранызда белә олмамалыдыр. Лакин аранызда бөјүк олмаг истәјән, диҝәрләринин нөкәри олсун. Вә аранызда биринҹи олмаг истәјән, диҝәрләринин гулу олсун». Сонра Иса өз нүмунәсинә ишарә едиб деди: «Инсан Оғлу Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир» (Мат. 20:20-28).
7. Һәр биримиз јығынҹагда сүлһүн олмасы үчүн өз төһфәмизи неҹә верә биләрик?
7 Исанын һәлимлик нүмунәси үзәриндә дүшүнмәк бизә гардашларымыз арасында өзүмүзү ‘һамыдан кичик’ кими апармаға көмәк едә биләр (Лука 9:46-48). Бу, бирлијә сәбәб олур. Бөјүк бир аиләнин гајғыкеш башчысы кими, Јеһова истәјир ки, Онун өвладлары ‘гардаш олуб, бир јашасынлар’, јәни бир-бирләри илә јола ҝетсинләр (Мәз. 133:1). Иса Атасына дуа едирди ки, бүтүн һәгиги мәсиһчиләр арасында бирлик һөкм сүрсүн. Бунун сајәсиндә дүнја онун Аллаһ тәрәфиндән ҝөндәрилдијини вә ону севдији кими, давамчыларыны да севдијини биләҹәкди (Јәһ. 17:23). Беләликлә, арамыздакы бирлик бизим Мәсиһин давамчысы олдуғумуза дәлаләт едир. Белә бирлик телләри бизә севинҹ ҝәтирсин дејә биз башгаларынын гејри-камиллијинә Мәсиһ кими јанашмалыјыг. Иса бағышлајан иди вә өјрәдирди ки, биз јалныз башгаларыны бағышладығымыз тәгдирдә бағышланаҹағымыза үмид едә биләрик. (Матта 6:14, 15 ајәләрини оху.)
8. Узун илләр Аллаһа хидмәт едән инсанларын нүмунәсиндән нә өјрәнә биләрик?
8 Узун илләр Мәсиһи тәглид едәнләрин иманларыны тәглид етмәклә дә чох шеј өјрәнә биләрик. Иса кими, бу баҹы-гардашлар да, адәтән, башгаларынын гејри-камиллијинә анлајышла јанашырлар. Онлар Мәсиһи тәглид едәрәк шәфгәт ҝөстәрмәјин нәинки ‘гүввәтсизләрин зәифликләринә дөзмәјә’, һәтта бирлик јаратмаға көмәк етдијини өјрәнмишләр. Үстәлик, бу, бүтүн јығынҹағы Мәсиһин дүшүнҹә тәрзини әкс етдирмәјә тәшвиг едир. Бу баҹы-гардашлар истәјирләр ки, һәмиманлылары һәвари Павелин Ромадакы мәсиһчиләрин малик олмаларыны истәдији дүшүнҹә тәрзинә јијәләнсинләр: «Гој тәһәммүл вә тәсәлли верән Аллаһ, Мәсиһ Исаја әсасән сизә, өз аранызда һәмфикир олмағы еһсан етсин ки, сиз јекдилликлә, бир ағыздан... Иса Мәсиһин Атасы олан Аллаһа иззәт верәсиниз» (Ром. 15:1, 5, 6). Бәли, Јеһоваја бирҝә ибадәт етмәјимиз Она иззәт ҝәтирир.
9. Нәјә ҝөрә Исанын нүмунәсини тәглид етмәк үчүн мүгәддәс руһа еһтијаҹымыз вар?
9 Иса ‘гәлбдән тәвазөкарлығы’ Аллаһын мүгәддәс руһунун сәмәрәсинин тәркиб һиссәләриндән бири олан һәлимликлә әлагәләндирди. Буна ҝөрә дә Исанын нүмунәсини арашдырмагла јанашы, онун нүмунәсини дүзҝүн тәглид етмәјимиз үчүн Јеһованын руһуна еһтијаҹымыз вар. Биз Аллаһын мүгәддәс руһу үчүн дуа етмәли вә онун сәмәрәси олан «мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг» кими кејфијјәтләри инкишаф етдирмәлијик (Галат. 5:22, 23). Исанын гојдуғу һәлимлик вә тәвазөкарлыг нүмунәсини тәглид етмәклә биз сәмави Атамыз Јеһованы разы салаҹағыг.
Иса башгаларына гаршы лүтфкар иди
10. Исанын лүтфкарлығы нәдән ҝөрүнүрдү?
10 Лүтфкарлыг да мүгәддәс руһун сәмәрәсинин бир һиссәсидир. Иса башгаларына гаршы һәмишә лүтфкар олуб. Иса ону сәмими-гәлбдән ахтаранларын һамысыны ‘меһрибанлыгла гәбул едирди’ (Лука 9:11, ЈД). Биз онун лүтфкарлыг ҝөстәрмәсиндән нә өјрәнә биләрик? Лүтфкар инсан меһрибан, мүлајим, шәфгәтли вә хејирхаһ олур. Иса мәһз белә инсан иди. Онун инсанлара јазығы ҝәлирди, «чүнки чобансыз гојунлар кими тагәтсиз вә дағыныг идиләр» (Мат. 9:35, 36).
11, 12. а) Исанын әмәлдә шәфгәт ҝөстәрмәсинә даир нүмунә чәкин. б) Абзасда чәкилән нүмунәдән нә өјрәндиниз?
11 Исанын инсанлара садәҹә јазығы ҝәлмирди, онлара көмәк етмәк үчүн о, әлиндән ҝәләни дә әсирҝәмирди. Бир нүмунәјә нәзәр салаг. Дүз 12 ил иди ки, бир гадын гејри-нормал ганахмадан әзијјәт чәкирди. О билирди ки, Мусанын Ганунуна әсасән, сәһһәти уҹбатындан башгалары илә бирҝә Аллаһа ибадәт едә билмәз вә она тохунан һәр кәс натәмиз сајылыр (Лев. 15:25-27). Анҹаг Исанын халг арасында газандығы ад вә инсанларла рәфтары, ҝөрүнүр, ону әмин етди ки, Исанын ону сағалтмаға ҝүҹү вә истәји вар. Гадын өз-өзүнә дејирди: «Һеч олмаса, анҹаг палтарына тохунсам, сағалаҹағам». О, ҹәсарәтини топлајыб онун палтарына тохунду вә дәрһал сағалдығыны һисс етди.
12 Иса киминсә она тохундуғуну һисс едиб әтрафа бојланды ки, онун ким олдуғуну ҝөрсүн. Гадын Гануну поздуғуна ҝөрә мәзәммәт ешидәҹәјиндән горхараг Исанын ајагларына јыхылыб, һәр шеји етираф етди. Иса бу мәзлум гадыны мәзәммәт етдими? Гәтијјән! Она тәсәлли вериб деди: «Гызым! Иманын сәни хилас етди. Сүлһ илә ҝет» (Марк 5:25-34). Бу ҹүр ҝөзәл сөзләр ешитмәк неҹә дә хош иди!
13. а) Исанын дүшүнҹә тәрзи фәрисејләринкиндән нә илә фәргләнирди? б) Иса ушагларла неҹә рәфтар едирди?
13 Дашүрәкли фәрисејләрдән фәргли олараг, Мәсиһ сәлаһијјәтиндән истифадә едәркән һеч вахт башгаларынын чијнинә ағыр јүк гојмурду (Мат. 23:4). Әксинә, о, хејирхаһлыгла вә сәбирлә инсанлара Јеһованын јолларыны өјрәдирди. Иса өз давамчыларына даим нәҹиб мәһәббәт бәсләјир вә хејирхаһлыг ҝөстәрирди. О, әсил дост иди (Сүл. мәс. 17:17; Јәһ. 15:11-15). Һәтта ушаглар да өзләрини онун јанында раһат вә сәрбәст һисс едирдиләр. Онларын әһатәсиндә олмаг Исаја да хош иди. Иса о гәдәр мәшғул дејилди ки, ушагларла вахт кечирмәјә вахты олмасын. Бир дәфә валидејнләр балаҹа ушагларыны Исанын јанына ҝәтирдиләр ки, онлара тохунсун. О дөврдәки дин рәһбәрләри кими һәлә дә өзләри барәдә јүксәк фикирдә олан шаҝирдләр исә буна мане олмаға чалышдылар. Онларын бу һәрәкәти Исанын хошуна ҝәлмәди. О, онлара деди: «Гојун ушаглар Мәним јаныма ҝәлсинләр! Онлара мане олмајын! Чүнки Аллаһын Сәлтәнәти беләләрининдир». Сонра ушаглары нүмунә ҝәтирәрәк онлара ваҹиб бир дәрс верди: «Сизә доғрусуну дејирәм: ким Аллаһын Сәлтәнәтини көрпә бир ушаг кими гәбул етмәзсә, ораја әсла ҝирә билмәз» (Марк 10:13-15).
14. Ушаглара диггәт ајырмағымыз онлара һансы фајданы ҝәтирир?
14 Бу ушаглардан бәзиләринин бөјүјәндә Иса Мәсиһин ‘онлары гуҹаглајыб, хејир-дуа вермәсини’ һансы һиссләрлә хатырладығыны бир анлыға тәсәввүрүнә ҝәтир! (Марк 10:16). Буҝүнкү ушаглар да онлара сәмими мараг ҝөстәрән ағсаггаллары вә башга инсанлары мәһәббәтлә јада салаҹаглар. Ән ваҹиби исә, кичик јашларындан јығынҹаг тәрәфиндән гајғы илә әһатә олунан бу көрпәләр Јеһованын руһунун Өз халгы үзәриндә олдуғуну өјрәнирләр.
Хејирхаһлығын олмадығы дүнјада хејирхаһ олун
15. Нәјә ҝөрә бу дүнјада хејирхаһлығын олмамасы бизи тәәҹҹүбләндирмәли дејил?
15 Јашадығымыз дөврдә бир чохлары башгаларына хејирхаһлыг етмәк үчүн вахт тапмыр. Буна ҝөрә дә Јеһованын халгы һәр ҝүн мәктәбдә, иш јериндә, сәфәрдә вә хидмәтдә бу дүнјанын руһу илә гаршылашмалы олур. Бу ҹүр пис аб-һава бәзән бизи руһдан салса да, тәәҹҹүбләндирмәли дејил. Чүнки Јеһова Павел васитәсилә һәгиги мәсиһчиләри габагҹадан хәбәрдар етмишдир ки, «ахыр ҝүнләрдә» онлар «худбин,.. шәфгәтсиз» инсанларла растлашаҹаглар (2 Тим. 3:1-3).
16. Мәсиһи тәглид едәрәк јығынҹагда неҹә хејирхаһлыг тәзаһүр етдирә биләрик?
16 Лакин һәгиги мәсиһчи јығынҹағындакы аб-һава, бу залым дүнјада һөкм сүрән руһдан фәргли олараг, бизи тәравәтләндирир. Исаны тәглид етмәклә һәр биримиз бу ҝөзәл мүһитә рәнҝ гата биләрик. Неҹә? Илк нөвбәдә ону гејд едәк ки, һәмиманлыларымыз сәһһәтләри илә бағлы вә ја башга ҹидди проблемләрлә үзләшдикләри үчүн бизим көмәјимизә вә дәстәјимизә еһтијаҹ дуја биләрләр. Белә проблемләр јашадығымыз «ахыр ҝүнләрдә» ҝетдикҹә чохалса да, онлар һеч дә јени дејил. Еркән мәсиһчиләр дә ејни проблемләрдән әзијјәт чәкирдиләр. О вахт мәсиһчиләрин бир-бирләринә көмәк етмәләри мүнасиб олдуғу кими, бизим ҝүнләрдә дә мүнасибдир. Мисал үчүн, Павел мәсиһчиләри ‘ҹәсарәтсизләри [‘гәмҝинләри’, ЈД] руһландырмаға, зәифләрә јардым етмәјә, һамыја гаршы сәбирли олмаға’ тәшвиг едирди (1 Салон. 5:14). Бу, өзүнә Мәсиһ кими хејирхаһлыг етмәји дахил едир.
17, 18. Исанын хејирхаһлығыны неҹә тәглид едә биләрик? Нүмунәләр чәкин.
17 Биз мәсиһчиләр гардашларымызы ‘меһрибанлыгла гәбул етмәли’, Исанын өз давамчылары илә даврандығы кими давранмалы, илләр боју таныдығымыз вә һәтта илк дәфә ҝөрдүјүмүз инсанлара гајғы ҝөстәрмәлијик (3 Јәһ. 5-8). Иса инсанлара шәфгәт ҝөстәрмәкдә тәшәббүсү үзәринә ҝөтүрдүјү кими, биз дә һәр заман башгалары үчүн тәравәт мәнбәји олмалыјыг (Јешаја 32:2; Мат. 11:28-30).
18 Һәр биримиз башгаларынын рифаһы илә фәал сурәтдә марагланмагла хејирхаһлыг тәзаһүр етдирә биләр. Бунун үчүн имканлар ахтар. Тәшәббүсү өз үзәринә ҝөтүр! «Гардашлыг севҝиси илә бир-биринизи шәфгәтлә севин» вә «бир-биринизи һөрмәтдә габаглајын»,— дејә Павел тәшвиг едирди (Ром. 12:10). Бу, Мәсиһин нүмунәсини тәглид етмәји, башгалары илә сәмими вә хејирхаһлыгла давранмағы вә ‘ријасыз мәһәббәт’ тәзаһүр етдирмәји өјрәнмәк демәкдир (2 Кор. 6:6). Павел Мәсиһә хас олан бу ҹүр мәһәббәти белә тәсвир едир: «Мәһәббәт сәбирли, хејирхаһдыр. Мәһәббәт пахыллыг етмәз. Мәһәббәт ловғаланмаз, гүррәләнмәз» (1 Кор. 13:4). Һәмишә баҹы-гардашларымыздан ҝилеј-ҝүзар етмәк әвәзинә, јахшы оларды ки, бу нәсиһәтә диггәт јетирәк: «Бир-биринизә гаршы хејирхаһ, шәфгәтли олун, Аллаһ Мәсиһ васитәсилә сизи үрәкдән бағышладығы кими, сиз дә бир-биринизи үрәкдән бағышлајын» (Ефес. 4:32).
19. Иса кими хејирхаһ олмаг һансы сәмәрәләри ҝәтирир?
19 Мәсиһә хас олан хејирхаһлыг хүсусијјәтини өзүмүздә јетишдирмәк вә ону һәмишә вә һәр вәзијјәтдә әмәлдә тәзаһүр етдирмәк сајсыз-һесабсыз хејир-дуалар ҝәтирир. Јеһованын руһу һеч бир манеә илә үзләшмәдән јығынҹагда фәалијјәт ҝөстәрәҹәк вә онун һәр бир үзвүнә руһун ҝөзәл сәмәрәсини јетишдирмәкдә көмәк едәҹәк. Бундан әлавә, һәм өзүмүз Исанын изләри илә ҝедәндә, һәм дә башгаларына буну етмәјә көмәк едәндә бир халг кими иҹра етдијимиз севинҹ ҝәтирән ибадәтимиз Аллаһын гәлбини фәрәһләндирәҹәк. Гој башгаларына гаршы мүнасибәтимиздә һәмишә Исаја хас олан һәлимлик вә хејирхаһлыг ҝөрүнсүн!
Изаһ едә биләрсинизми?
• Иса ‘һәлим вә гәлбдән тәвазөкар’ олдуғуну неҹә ҝөстәрмишди?
• Исанын лүтфкар вә ја хејирхаһ олмасы нәдән ҝөрүнүр?
• Гејри-камил дүнјада Мәсиһ кими неҹә һәлим вә лүтфкар ола биләрик?
[8-ҹи сәһифәдәки шәкил]
Әҝәр гардашымыз, Петер кими, иманда зәифлик ҝөстәрирсә, она јардым әлимизи узадаҹағыгмы?
[10-ҹу сәһифәдәки шәкил]
Јығынҹагда меһрибан аб-һаванын олмасы үчүн сән һансы төһфәни верә биләрсән?