Миннәтдарлығымызы нә үчүн билдирмәлијик?

«Әзизим Ракел, Мәни руһландырдығын үчүн сәнә чох-чох миннәтдарам. Бәлкә өзүнүн дә хәбәрин јохдур, анҹаг сәнин инсаны руһландыран тәбиәтин вә хош сөзләрин мәнә чох көмәк етди». Ҹенифер

ҺЕЧ елә олубму ки, кимсә сизә ҝөзләмәдијиниз бир һалда өз миннәтдарлығыны билдирсин? Әҝәр билдирибсә, шүбһәсиз, миннәтдарлыг сөзләри сизә хош тәәссүрат бағышлајыб. Чүнки гијмәтләндирилмәк вә башгаларынын миннәтдарлығыны газанмаг тәбии истәкдир (Матта 25:19-23).

Миннәтдарлыг сөзләри адәтән инсанлары бир-биринә јахынлашдырыр. Бундан башга, миннәтдарлығыны билдирән шәхс башгаларынын јахшы ишләрини һеч вахт нәзәрдән гачырмајан Иса Мәсиһин изләри илә ҝедир (Марк 14:3-9; Лука 21:1-4).

Тәәссүфләр олсун ки, инсанларын јазылы вә ја шифаһи тәрздә миннәтдарлыгларыны билдирмәси ҝетдикҹә надир һала чеврилир. Мүгәддәс Китабда хәбәрдарлыг едилмишди ки, «ахыр ҝүнләрдә» инсанлар «нанкор» олаҹаглар (2 Тимотејә 3:1, 2). Еһтијатлы олмасаг, бу ҝүн ҝениш јајылмыш нашүкүрлүк биздә ојанан зәриф миннәтдарлыг һиссини боға биләр.

Валидејнләр өвладларына тәшәккүр етмәји өјрәтмәк үчүн һансы практики аддымлары ата биләрләр? Кимләрә миннәтдарлығымызы билдирмәлијик? Әтрафымызда бу гәдәр нанкор адамын олмасына бахмајараг, нә үчүн миннәтдар инсан олмалыјыг?

Аиләдә

Валидејнләр ушагларыны тәмин етмәк үчүн чох зәһмәт чәкирләр. Анҹаг һәрдән валидејнләрә елә ҝәлир ки, онларын әзијјәти гијмәтләндирилмир. Вәзијјәти дүзәлтмәк үчүн онлар нә едә биләрләр? Бу һалда үч амил ваҹибдир.

1) Нүмунә. Ушағын тәрбијәсинин бир чох саһәләриндә олдуғу кими, бу саһәдә дә нүмунә ҝөзәл мүәллимдир. Мүгәддәс Китабда гәдим исраилли чалышган ана һаггында јазылмышдыр: «Өвладлары ајаға галхыб ону алгышлајыр». Бу ушаглар миннәтдарлығы билдирмәји һарадан өјрәнибләр? Ајәнин икинҹи һиссәси ҹаваб верир: «Әри ону тәрифләјир» (Сүлејманын мәсәлләри 31:28). Бир-биринә миннәтдарлыгларыны билдирән валидејнләр ушагларына ҝөстәрирләр ки, бу ҹүр сөзләр гаршы тәрәфә мәмнунлуг ҝәтирир, аилә мүнасибәтләрини мөһкәмләндирир, һәм дә бу, јеткинлијин әламәтидир.

Стивен адлы ата дејир: «Јолдашыма јемәјә ҝөрә тәшәккүр етмәклә ушагларыма нүмунә вермәјә чалышырдым». Бунун нәтиҹәси нә олду? Стивен дејир: «Гызларымын икиси дә буна фикир верирдиләр вә бу онлара миннәтдарлығы билдирмәјин лазым олдуғуну даһа јахшы анламаға көмәк етди». Әҝәр аиләлисинизсә, һәјат јолдашыныза бир о гәдәр дә нәзәрә чарпмајан ҝүндәлик ишләрә ҝөрә һәмишә тәшәккүр едирсинизми? Ушагларыныза етмәли олдуглары ишләрә ҝөрә дә «чох сағ ол» дејирсинизми?

2) Тәрбијә. Миннәтдарлыг һиссини ҝүлә бәнзәтмәк олар. Ҝөзәл бәһрә версинләр дејә, икисинә дә гуллуг ҝөстәрмәк тәләб олунур. Валидејнләр ушагларына миннәтдар олмаға, һәмчинин ону ифадә етмәјә неҹә көмәк едә биләрләр? Мүдрик падшаһ Сүлејман ваҹиб бир амили вурғулајараг јазырды: «Салеһ инсан ҹаваб вермәздән әввәл гәлбиндә дүшүнәр» (Сүлејманын мәсәлләри 15:28).

Валидејнләр, ушагларыныза алдыглары истәнилән һәдијјәнин архасында дуран зәһмәт вә сәхавәт һаггында дүшүнмәји өјрәдә биләрсинизми? Бу ҹүр дүшүнмәк миннәтдарлығын јетишмәси үчүн мүнбит шәраитдир. Үч ушаг бөјүдән Марија дејир: «Киминсә һәдијјә вермәсинин нә демәк олдуғуну, јәни онун шәхсән сәнин һаггында дүшүнүб, сәнинлә нә дәрәҹәдә марагландығыны отуруб ушаглара баша салмаг вахт тәләб едир. Анҹаг дүшүнүрәм ки, чәкдијим зәһмәтә дәјәр». Бу ҹүр сөһбәтләр ушаглара миннәтдарлыгларыны билдирән заман јалныз нә демәли олдугларыны дејил, һәмчинин нә үчүн демәли олдугларыны өјрәнмәјә көмәк едир.

Һикмәтли валидејнләр чалышырлар ки, ушаглары һамынын онлара јахшылыг етмәјә борҹлу олдуғуну фикирләшмәсинләрa. Сүлејманын мәсәлләри 29:21 ајәсиндә гулла рәфтар етмәк барәсиндәки хәбәрдарлыг ејнилә ушаглара да тәтбиг едилир: «Ким әркөјүн гул бөјүтсә, ахырда бу она дәрд верәр».

Лап балаҹа ушаглара миннәтдарлыг етмәји неҹә өјрәтмәк олар? Үч ушаг анасы Линда дејир: «Әримлә мән ушагларымызы һәвәсләндирирдик ки, јаздығымыз миннәтдарлыг мәктубуна шәкил чәксинләр вә ја адларыны јазсынлар». Дүздүр, шәкил садә, хәтләри исә чәтин охунан ола биләр, анҹаг ушаглар бундан чох шеј өјрәнәҹәкләр.

3) Исрарлы олмаг. Һәр биримиз худбиндлијә анаданҝәлмә мејллијик вә бу мејл миннәтдарлыг һиссини боға биләр (Јарадылыш 8:21; Матта 15:19). Анҹаг Мүгәддәс Китаб Аллаһын хидмәтчиләрини тәшвиг едир: «Руһән вә әглән јениләшин. Вә Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејинин» (Ефеслиләрә 4:23, 24).

Анҹаг тәҹрүбәли валидејнләр билирләр ки, ушаға ‘јени мәнлији ҝејинмәјә’ көмәк етмәк һеч дә асан дејил. Јухарыда хатырланан Стивен дејир: «Гызларымыза һим-ҹим етмәдән, өз хошлары илә “сағ ол” демәји өјрәтмәк үчүн чох вахт кечди». Анҹаг Стивен вә арвады тәслим олмадылар. Стивен давам едир: «Исрарлы олмағын сајәсиндә гызларымызы буна алышдырдыг. Инди онларын башгаларына миннәтдарлыгларыны билдирмәләри илә фәхр едирик».

Дост вә јахынлара

Чох вахт «сағ ол» демәмәјимизин сәбәби нанкор дејил, садәҹә унутган олмағымыздыр. Садәҹә миннәтдар олмаг јох, ону һәм дә ифадә етмәк доғруданмы ваҹибдир? Бу суала ҹаваб вермәк үчүн, ҝәлин Иса вә бир нечә ҹүзамлынын һадисәсини нәзәрдән кечирәк.

Иса Јерусәлимә ҝедәндә ҹүзама тутулмуш он нәфәрә раст ҝәлди. Мүгәддәс Китабда дејилир: «[Онлар] јүксәк сәслә дедиләр: “Иса устад, бизә мәрһәмәт ет!” О, онлары ҝөрүб деди: “Ҝедин, өзүнүзү каһинләрә ҝөстәрин”. Вә онлар јолда икән сафлашдылар. Онлардан бири исә, сағалдығыны ҝөрәндә, јүксәк сәслә Аллаһы һәмд-сәна едәрәк, ҝери дөндү. Вә үзүгојлу Исанын ајагларына дүшәрәк, Она тәшәккүр етди; бу адам да самаријалы иди» (Лука 17:11-16).

Диҝәрләринин миннәтдарлыгларыны билдирмәмәләри Исанын нәзәриндән гачдымы? Даһа сонра нәгл едилир: «Онда Иса деди: “Сафлашанлар он нәфәр дејилдиләрми? Бәс галан доггуз нәфәри һаны? Бу әҹнәбидән башга ҝери дөнүб Аллаһы һәмд-сәна едән олмадымы?”» (Лука 17:17, 18).

Диҝәр доггуз ҹүзамлы һеч дә пис адам дејилдиләр. Бир аз әввәл онлар Исаја иман етдикләрини ачыгҹа билдирмиш вә һәвәслә онун Јерусәлимә ҝедиб өзләрини каһинләрә ҝөстәрмәк әмринә табе олмушдулар. Шүбһәсиз ки, онлар Исанын хејирхаһлығына ҝөрә дәрин миннәтдарлыг дујурдулар, анҹаг миннәтдарлыгларыны она билдирмәдиләр. Мәсиһ онларын бу һәрәкәтинә тәәссүфләнди. Бәс биз неҹә? Кимсә бизимлә јахшы рәфтар едәндә дәрһал «чох сағ ол» дејир, јеринә дүшәндә исә, миннәтдарлыг мәктубу јазырыгмы?

Мүгәддәс Китаб дејир ки, «мәһәббәт... кобуд давранмаз, өз мәнфәәтини ахтармаз» (1 Коринфлиләрә 13:4, 5). Буна ҝөрә, миннәтдарлығы сәмими гәлбдән билдирмәк тәкҹә етик гајдалара дахил дејил, һәм дә мәһәббәтин тәзаһүрүдүр. Ҹүзамлыларла баш верән һадисәдән өјрәнирик ки, Мәсиһи разы салмаг истәјән адам милләтиндән, иргиндән вә дининдән асылы олмајараг, һамыја гаршы мәһәббәтли вә миннәтдар олур.

Өзүнүздән сорушун: «Ахырынҹы дәфә һачан танышыма, иш вә ја мәктәб јолдашыма, хәстәхана ишчиләринә, дүканчыја, јахуд мәнә көмәји дәјән башга адама тәшәккүрүмү билдирмишәм?» Нә үчүн «сағ ол» демәклә вә ја башга үсулларла бир-ики ҝүн әрзиндә нечә дәфә миннәтдарлығынызы билдирдијинизи гејд етмәјәсиниз? Белә гејдләр сизә көмәк едәҹәк ки, миннәтдарлығынызы даһа јахшы неҹә билдирә биләҹәјинизи ҝөрәсиниз.

Әлбәттә, миннәтдарлығымыза ән чох лајиг олан Јеһова Аллаһдыр. ‘Һәр бир јахшы бәхшиш вә һәр камил һәдијјәни’ верән Одур (Јагуб 1:17). Ахырынҹы дәфә нә вахт Аллаһа сизин үчүн етдији бир шејә ҝөрә сәмими гәлбдән миннәтдарлығынызы билдирмисиниз? (1 Салоникилиләрә 5:17, 18).

Башгалары миннәтдарлыгларыны билдирмәсәләр дә

Етдијимиз јахшылыға ҝөрә кимсә миннәтдарлыг етмәјә биләр. Бәс башгалары буну етмәсәләр дә, биз нә үчүн миннәтдарлығымызы билдирмәлијик? Тәкҹә бир сәбәбә диггәт јетирәк.

Миннәтдарлыг һиссиндән мәһрум адамлара јахшылыг етмәклә мәрһәмәтли Јараданымыз Јеһова Аллаһы тәглид етмиш олаҹағыг. Ҝөстәрдији мәһәббәти чохларынын гијмәтләндирмәмәси Јеһованы онлара јахшылыг етмәкдән сахламыр (Ромалылара 5:8; 1 Јәһја 4:9, 10). О, «Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир». Әҝәр биз нанкор дүнјада јашамағымыза бахмајараг, миннәтдар олмаға чалышырыгса, ‘ҝөјләрдә олан Атамызын оғуллары олдуғумузу’ сүбут едәҹәјик (Матта 5:45).

[Һашијә]

[23-ҹү сәһифәдәки јазы]

Бир-ики ҝүн әрзиндә нечә дәфә «сағ ол» дедијинизи гејд един

[23-ҹү сәһифәдәки шәкил]

Миннәтдарлыг билдирмәкдә өвладларыныза нүмунә верин

[23-ҹү сәһифәдәки шәкил]

Һәтта балаҹа ушаглара да миннәтдарлыгларыны билдирмәји өјрәтмәк олар