Тәвазөкарлыг хүсусијјәтини инкишаф етдирин
«Аранызда ән тәвазөкар кимдирсә, бөјүк одур» (ЛУКА 9:48).
ҸАВАБ ВЕРӘ БИЛӘРСИНИЗМИ?
Тәвазөкар олмаға бизә нә көмәк едә биләр?
Һансы мәнада тәвазөкар олан «бөјүк»дүр?
Никаһда, јығынҹагда вә башгалары илә мүнасибәтдә тәвазөкарлығы неҹә тәзаһүр етдирә биләрик?
1, 2. Иса һәвариләринә нәји өјрәдирди вә нә үчүн?
ЕРАМЫЗЫН 32-ҹи или иди. Иса вә онун һәвариләри Галилеја вилајәтиндә идиләр. Һәвариләрдән бәзиләринин арасында кимин ән бөјүк олдуғуна даир мүбаһисә дүшдү. Мүждәчи Лука јазыр: «Онлар кимин ән бөјүк олаҹағы барәдә мүбаһисә етмәјә башладылар. Иса онларын үрәјиндәкиләри билдијиндән балаҹа бир ушағы ҝөтүрүб јанына гојду вә белә деди: “Бу балаҹа ушағы мәним хатиримә гәбул едән мәни дә гәбул едир; мәни гәбул едән исә мәни ҝөндәрәни дә гәбул едир. Аранызда ән тәвазөкар кимдирсә [«аранызда ким кичик кими давранырса», һашијә], бөјүк одур”» (Лука 9:46—48). Иса сәбирлә, амма гәти шәкилдә тәвазөкар олмағын ваҹиблијини баша дүшмәјә көмәк етди.
2 Иса һәвариләрини биринҹи әсрдәки јәһудиләрин әксәријјәтинин тәзаһүр етдирдији тәвазөкарлығы тәглид етмәјәми чағырырды? Хејр, әслиндә, онлар һеч дә белә давранмырдылар. О дөврдәки иҹтимаи шәраит барәдә «Әһди-Ҹәдидин илаһијјат лүғәти» белә изаһ едир: «Һәр бир ишдә даима кимин ән бөјүк олдуғуна даир суал јаранырды вә һәр бир инсан өз шәрәфи үчүн нараһат олурду» («Тһеолоҝиҹал Диҹтионарј оф тһе Неw Тестамент»). Иса шаҝирдләринин башгаларындан фәргләнмәсини истәјирди.
3. а) «Кичик кими» давранмаг нә демәкдир вә бу нәјә ҝөрә чәтин ола биләр? б) Бу мәгаләдә һансы суаллар арашдырылаҹаг?
3 «Кичик кими» тәрҹүмә олунан јунан сөзү садә, тәвазөкар, һәлим, әһәмијјәтсиз, јахуд башгаларына нисбәтән даһа аз һөрмәтә вә нүфуза малик олмаг демәкдир. Иса һәвариләринә ушаглар кими һәлим вә тәвазөкар олмағы өјрәдирди. Бу мәсләһәт биринҹи әсрдә олдуғу кими, бу ҝүн дә һәгиги мәсиһчиләр үчүн тәтбиг олунандыр. Бизим үчүн тәвазөкарлыг ҝөстәрмәк чәтин ола биләр, хүсусилә дә бәзи һалларда. Гејри-камиллијимиз бизи шөһрәтпәрәстлијә вә өзүмүзү башгаларындан үстүн тутмаға сөвг едә биләр. Һәмчинин, Шејтан дүнјасы бизә тәсир едир ки, егоист, мәғрур вә ја башгаларыны идарә етмәјә мејилли олаг. Тәвазөкарлыг хүсусијјәтини инкишаф етдирмәјә бизә нә көмәк едә биләр? «Аранызда ән тәвазөкар кимдирсә, бөјүк одур», — демәклә Иса нәји нәзәрдә тутурду? Һәјатымызын һансы саһәсиндә тәвазөкарлыг тәзаһүр етдирмәлијик?
«АЛЛАҺЫН ХЕЈИР-ДУАСЫ НЕҸӘ ДӘ БОЛДУР, ҺИКМӘТИ ВӘ БИЛИЈИ ДӘРИН БИР ҮММАНДЫР!»
4, 5. Тәвазөкарлығы инкишаф етдирмәјә бизә нә көмәк едә биләр? Нүмунә ҝәтирин.
4 Тәвазөкарлыг тәзаһүр етдирмәјин үсулларындан бири Јеһованын ҝүҹүнүн бизимки илә мүгајисәдә нә гәдәр чох олдуғуну баша дүшмәјимиздир. Доғрудан да, «Онун ағлы дәркедилмәздир» (Јешаја 40:28). Јеһованын әзәмәти барәдә Павел јазмышды: «Аллаһын хејир-дуасы неҹә дә болдур, һикмәти вә билији дәрин бир үммандыр! Онун һөкмләри ағласығмаз, јоллары тәдгиголунмаздыр!» (Ром. 11:33). Павелин тәхминән 2000 ил бундан әввәл дедији сөзләрдән сонра бәшәријјәт билик саһәсиндә хејли инкишаф етсә дә, бу сөзләр һәлә дә гүввәдәдир. Нә гәдәр чох билијә малик олсаг да, Јеһова Аллаһ, Онун ишләри вә дүшүнҹә тәрзи барәдә өјрәнмәји дајандырмамагла тәвазөкар олдуғумузу ҝөстәрәҹәјик.
5 Аллаһын јаратдыглары барәдә һәр шеји билмәјин мүмкүн олмадығыны дәрк етмәк Леојаa тәвазөкар олмаға көмәк етди. Ҝәнҹ икән онун елмә бөјүк марағы варды. Леонун Каинат һаггында баҹардығы гәдәр чох билик әлдә етмәк арзусу олдуғундан о, астрофизиканы өјрәнирди вә сонда ваҹиб бир гәнаәтә ҝәлди: «Өјрәндикләримдән белә бир нәтиҹә чыхартдым ки, тәкҹә мүасир елми нәзәријјә илә инсанлар каинаты там дәрк едә билмәз. Буна ҝөрә дә мән һүгугшүнаслығы өјрәнмәјә башладым». Бир мүддәтдән сонра Лео рајон прокурору, даһа сонра исә һаким олду. Сонрадан һәјат јолдашы илә бирликдә Јеһованын Шаһидләри илә Мүгәддәс Китабы өјрәнмәјә башлады, һәгигәти гәбул едиб өзләрини Аллаһа һәср етдиләр. Али тәһсилли олмасына бахмајараг, Леоја тәвазөкар олмаға нә көмәк етди? О, тәрәддүд етмәдән ҹаваб верир: «Јеһова вә каинат барәдә нә гәдәр чох билсәк дә, һәлә кәшф олунмамыш шејләр чохдур».
6, 7. а) Јеһова бизә һансы саһәдә нүмунә гојуб? б) Аллаһын лүтфү инсаны неҹә јүксәлдир?
6 Јеһова Аллаһын бизә ҝөстәрдији мүнасибәт дә тәвазөкар олмагда бизә көмәк едир. Мәсәлән, ҝәлин «биз Аллаһын әмәкдашларыјыг» сөзләри үзәриндә бир гәдәр дүшүнәк (1 Кор. 3:9). Тәсәввүр едирсиниз, Каинатын Һөкмдары Јеһова бизләри Өз әмәкдашы һесаб едир! О, бизи Мүгәддәс Китабдакы хош хәбәри мүждәләмәк шәрәфинә лајиг ҝөрүб. Руһани мәнада «беҹәрән» Јеһова Аллаһ Өзү олса да, «әкиб-суламаг» ишини бизә һәвалә едиб вә бу ишдә биз Онунла әмәкдашыг (1 Кор. 3:6, 7). Уҹа Аллаһын бизим кими ҝүнаһлы инсанларла белә рәфтар етмәси бизи тәвазөкар олмаға тәшвиг етмәлидир.
7 Аллаһын бу ҹүр мүнасибәти мәзмурлар јазан Давуду риггәтә ҝәтирмишди: «Сән мәнә гуртулуш галханыны вердин, етдијин көмәклә Сән мәни јүксәлтдин» (2 Шам. 22:36). Давуд дәрк едирди ки, Исраилдә тутдуғу шәрәфли мөвгејә ону Јеһова јүксәлдиб. Аллаһ-Таала уҹа дәрҝаһындан бир нөв Давуда тәрәф әјиләрәк она, ади чобана нәзәр салмышды (Мәз. 113:5—7). Јеһованын лүтфкарлығындан биз дә бәһрәләнирик. Мәҝәр биз дә малик олдуғумуз һәр шеји — хүсусијјәтләри, габилијјәт вә мәсулијјәтләри Јеһовадан алмамышыг? (1 Кор. 4:7). Өзүнү «кичик» тутан инсанын Јеһованын ҝөзүндә дәјәри јүксәлир (Лука 9:48). Ҝәлин ҝөрәк бу неҹә ола биләр.
«АРАНЫЗДА ӘН ТӘВАЗӨКАР КИМДИРСӘ, БӨЈҮК ОДУР»
8. Јеһованын тәшкилатынын бир һиссәси олмаг үчүн тәвазөкарлыг тәзаһүр етдирмәк нәјә ҝөрә ваҹибдир?
8 Тәвазөкар инсанлар Аллаһын тәшкилатында олдуглары вә јығынҹағы дәстәкләдикләри үчүн хошбәхтдирләр. Мисал үчүн, Петра адлы ҝәнҹ бир гадын мәсиһчи аиләсиндә бөјүјүб боја-баша чатмышды. О, истәдији кими јашамаг үчүн јығынҹағы тәрк етди. Илләр сонра Петра јығынҹагла әлагәсини јенидән бәрпа етди. О, Јеһованын тәшкилатында олдуғу вә јығынҹағы дәстәкләдији үчүн инди чох хошбәхтдир. Она дүшүнҹә тәрзини дәјишмәјә нә көмәк етди? О јазыр: «Аллаһын тәшкилатында өзүмү евимдәки кими һисс етмәк үчүн мәнә ики ваҹиб кејфијјәти — тәвазөкарлығы вә һәлимлији баша дүшмәк вә инкишаф етдирмәк лазым иди».
9. Тәвазөкар инсан руһани гидаја неҹә јанашыр вә бу, нәјә ҝөрә олдугҹа ваҹибдир?
9 Тәвазөкар инсан Јеһованын вердији јахшы шејләрә — руһани гидаја ҝөрә Она үрәкдән миннәтдардыр. Буна ҝөрә дә белә инсан мүнтәзәм олараг диггәтлә Мүгәддәс Китабы өјрәнир, «Ҝөзәтчи гүлләси» вә «Ојанын!» журналларыны мүталиә едир. Јеһованын бир чох садиг хидмәтчиләри кими һәмин инсан алдығы јени нәшрләри китабханасына гојмаздан әввәл, онлары охујур. Биз Мүгәддәс Јазылара әсасланан нәшрләри охујуб-арашдырмагла тәвазөкарлыг тәзаһүр етдирәндә руһән инкишаф едирик. Беләҹә, Јеһова да биздән хидмәтдә там шәкилдә истифадә едә билир (Ибр. 5:13, 14).
10. Јығынҹагда биз неҹә тәвазөкарлыг ҝөстәрә биләрик?
10 Тәвазөкар инсанын «бөјүк», јәни Јеһованын ҝөзүндә дәјәрли олмасынын диҝәр үсулу да вар. Һәр бир јығынҹагда ағсаггал кими хидмәт етмәк үчүн Јеһованын мүгәддәс руһунун рәһбәрлији алтында мүвафиг гардашлар сечилир. Онлар јығынҹаг ҝөрүшләри, тәблиғ хидмәти вә ағсаггал башчәкмәси кими руһани ишләри низама салырлар. Тәвазөкарлыг тәзаһүр етдириб бу тәдбирләри дәстәкләмәклә јығынҹагда һөкм сүрән севинҹә, сүлһә вә бирлијә өз төһфәмизи веририк. (Ибраниләрә 13:7, 17 ајәләрини оху.) Әҝәр сән ағсаггал вә ја хидмәти көмәкчисәнсә, Јеһованын сәнә һәвалә етдији мәсулијјәтләри миннәтдарлыгла иҹра едәрәк тәвазөкарлыг ҝөстәрирсәнми?
11, 12.Бизи Јеһованын тәшкилатында дәјәрли едән нәдир вә нәјә ҝөрә?
11 Јеһованын тәшкилатында тәвазөкар инсанлар олдугҹа дәјәрлидир, чүнки онларын бу ҹүр әһвал-руһијјәси башгаларыны руһландырыр. Шаҝирдләриндән бәзиләри һәмин дөврдә мөвҹуд олан руһун тәсири алтына дүшдүкләри үчүн Иса онлары тәвазөкар олмаға сәсләјирди. Лука 9:46 ајәсиндә јазылыб: «Бундан сонра онлар кимин ән бөјүк олаҹағы барәдә мүбаһисә етмәјә башладылар». Ола биләрми ки, биз дә өзүмүзү һәмиманлыларымыздан вә ја диҝәрләриндән үстүн тутмаға башлајаг? Бу ҝүн дүнјанын руһуну әкс етдирән бир чохлары бизи худбинлијә вә ловғалыға тәһрик едир. Ҝәлин тәвазөкарлыг ҝөстәрәрәк бу кими хүсусијјәтләрдән узаг олаг. Әҝәр белә даврансаг вә Јеһованын ирадәсини биринҹи јерә гојсаг, бизимлә үнсијјәт баҹы-гардашларымыза тәравәт бәхш едәҹәк.
12 Әҝәр биз Исанын «кичик кими» давранмаг мәсләһәтини баша дүшүрүксә, онда һәјатымызын һәр бир саһәсиндә тәвазөкарлыг тәзаһүр етдирәҹәјик. Ҝәлин үч вәзијјәтә диггәт јетирәк.
ТӘВАЗӨКАР ОЛМАҒА ЧАЛЫШЫН
13, 14. Әр вә ја арвад тәвазөкарлығы неҹә ҝөстәрмәлидир вә бу, онларын мүнасибәтләринә неҹә тәсир едә биләр?
13 Никаһда. Бу ҝүн бир чох инсанлар өз шәхси мәнафеләрини ҝүдүр. Башгаларынын һүгуглары онлары марагландырмыр. Тәвазөкар инсан исә Павелин Ромадакы мәсиһчиләрә јаздығы мәсләһәти әлдә рәһбәр тутур. Павел јазырды: «Буна ҝөрә дә ҝәлин сүлһә апаран вә руһландыран шејләрә ҹан атаг» (Ром. 14:19). Тәвазөкар инсан һәр кәслә, хүсусилә дә өмүр-ҝүн јолдашы илә сүлһдә олур.
14 Ҝәлин әјләнҹә мәсәләсинә нәзәр салаг. Бу мәсәләдә ҹүтлүкләрин сечими фәргли ола биләр. Ола билсин, әр бош вахтында евдә сакитҹә отуруб китаб охумағы хошлајыр. Арвад исә наһар етмәк үчүн һараса ҝетмәк вә ја достлары илә ҝөрүшмәк истәјир. Әҝәр әр тәвазөкарлыг ҝөстәрирсә, јалныз өзүнүн јох, һәјат јолдашынын хошладығы вә хошламадығы шејләри нәзәрә алырса, гадына белә әрә һөрмәт ҝөстәрмәк даһа асан олаҹаг. Һәмчинин киши ҝөрәндә ки, һәјат јолдашы јалныз өз истәкләрини дејил, онун да истәкләрини нәзәрә алыр, онда кишинин арвадына олан мәһәббәти вә һөрмәти даһа да артаҹаг. Әр вә арвад һәр икиси тәвазөкарлыг ҝөстәрәндә онларын мүнасибәтләри мөһкәмләнир. (Филипилиләрә 2:1—4 ајәләрини оху.)
15, 16. Давуд 131-ҹи мәзмурда исраиллиләри нәјә тәшвиг едирди вә бу, бизим јығынҹагдакы давранышымыза неҹә тәсир етмәлидир?
15 Јығынҹагда. Бүтүн дүнјада бир чох инсанлар өз истәкләринин дәрһал һәјата кечмәсини истәјирләр. Онлар сәбирсиздирләр, ҝөзләмәк онлар үчүн әсил сынагдыр. Тәвазөкарлыг хүсусијјәтини инкишаф етдирмәк бизә үмидимизи Јеһоваја бағламаға көмәк едәҹәк. (Мәзмур 131:1—3 ајәләрини оху.) Әҝәр тәвазөкар олсаг вә Јеһоваја үмид бағласаг, хејир-дуа алаҹаг, тәһлүкәсизлик, тәсәлли вә севинҹ әлдә едәҹәјик. Тәәҹҹүблү дејил ки, Давуд Исраил халгыны үмидләрини сәбирлә Јеһоваја бағламаға тәшвиг едирди!
16 Ејнилә, сән дә тәвазөкарлыгла үмидини Јеһоваја бағласан, раһатлыг тапаҹагсан (Мәз. 42:5). Ола билсин, сән јахшы иш ҝөрмәји истәјирсән, буна ҝөрә дә «нәзарәтчи вәзифәсинә» ҹан атырсан (1 Тим. 3:1—7). Әлбәттә, бунун үчүн, илк нөвбәдә, мүгәддәс руһун көмәји илә нәзарәтчијә лазым олан кејфијјәтләр инкишаф етдирмәлисән. Бәс әҝәр истәјинә наил олмаг үчүн башгаларына нисбәтән даһа чох ҝөзләмәли олурсанса, онда неҹә? Хидмәтдә мәсулијјәт алмағы сәбирлә ҝөзләјән тәвазөкар инсан Јеһоваја севинҹлә хидмәт едәҹәк вә алдығы һәр бир тәјинатдан севинҹ дујаҹаг.
17, 18. а) Әҝәр башгаларыны бағышлајыр вә онлардан үзр истәјириксә, бу һансы фајданы ҝәтирәҹәк? б) Сүлејманын мәсәлләри 6:1—5 ајәләриндә һансы мәсләһәт верилир?
17 Башгалары илә мүнасибәтдә. Бир чохларына үзр истәмәк чәтиндир. Лакин Аллаһын хидмәтчиләри өз сәһвләрини етираф етмәклә вә үзр истәмәклә тәвазөкарлыг руһу инкишаф етдирирләр. Онлар һәмчинин башгаларынын сәһвләрини бағышламаға да һазырдырлар. Тәкәббүрлүлүк ајрылыг вә нифаг салдығы һалда, үзр истәмәк јығынҹагда сүлһүн олмасына көмәк едир.
18 Тәвазөкарлыг ҝөстәрмәли вә үзр истәмәли олдуғумуз башга саһә дә вар. Тутаг ки, биз киминләсә мүгавилә бағламышыг, анҹаг биздән асылы олмајан сәбәбләр уҹбатындан вердијимиз сөзүн үстүндә дура билмәмишик. Белә олан һалда, баш верәнләр бүтөвлүклә бизим сәһвимиз олмаса да, биз өз сәһвимизи анламалы вә ону етираф етмәлијик. (Сүлејманын мәсәлләри 6:1—5 ајәләрини оху.)
19. Нәјә ҝөрә Мүгәддәс Китабын бизи тәвазөкарлыг руһу тәзаһүр етдирмәк мәсләһәтинә ҝөрә миннәтдар олмалыјыг?
19 Биз неҹә дә миннәтдарыг ки, Мүгәддәс Китаб бизи тәвазөкарлыг руһу инкишаф етдирмәјә тәшвиг едир! Бәзән бу руһу тәзаһүр етдирмәк чәтин олса да, Јараданла мүгајисәдә тутдуғумуз мөвгејә дүзҝүн јанашмаг вә Онун бизә олан лүтфүнү гијмәтләндирмәк бизи ҝөзәл хүсусијјәтләр инкишаф етдирмәјә тәшвиг едәҹәк. Белә етмәклә биз Јеһованын дәјәрли хидмәтчиси олаҹағыг. Буна ҝөрә дә ҝәлин һәр биримиз тәвазөкар олмаг үчүн әлимиздән ҝәләни едәк.
[Һашијә]
a Адлар дәјишдирилиб.
[16–ҹы сәһифәдәки шәкил]
Јеһова бизи хош хәбәри тәблиғ етмәк шәрәфинә лајиг ҝөрүб
[19–ҹу сәһифәдәки шәкилләр]
Тәвазөкарлыг ҝөстәрмәк үчүн һансы имканларын вар?