Руһ Аллаһын дәрин дүшүнҹәләрини арашдырыр
«Руһ һәр шеји, Аллаһын дәрин дүшүнҹәләрини белә арашдырыр» (1 КОР. 2:10).
1. Павел 1 Коринфлиләрә 2:10 ајәсиндә мүгәддәс руһун һансы ролуну вурғулајыр вә бунунла әлагәдар һансы суаллар мејдана чыхыр?
ЈЕҺОВАНЫН мүгәддәс руһунун неҹә фәалијјәт ҝөстәрдијини ҝөрәндә үрәјимиз миннәтдарлыгла долур! Мүгәддәс Јазыларда руһ «көмәкчи» (ЈД), әнам, шаһид вә вәсатәтчи адланыр (Јәһ. 14:16; Һәв. иш. 2:38; Ром. 8:16, 26, 27). Һәвари Павел мүгәддәс руһун даһа бир ваҹиб ролуну вурғулајыр: «Руһ һәр шеји, Аллаһын дәрин дүшүнҹәләрини белә арашдырыр» (1 Кор. 2:10). Ҝөрдүјүмүз кими, Јеһова дәрин руһани һәгигәтләри ачыгламаг үчүн Өз мүгәддәс руһундан истифадә едир. Онун көмәји олмадан Јеһованын нијјәтләри һаггында нә гәдәр дәрин анлајыша малик олардыг? (1 Коринфлиләрә 2:9—12 ајәләрини оху.) Лакин бир нечә суал мејдана чыхыр: мүгәддәс руһ «Аллаһын дәрин дүшүнҹәләрини» неҹә арашдырыр? Ерамызын I әсриндә Јеһова бу һәгигәтләри кимләрин васитәсилә ачыглајырды? Бизим ҝүнләрдә руһ «Аллаһын дәрин дүшүнҹәләрини» неҹә вә кимләрин васитәсилә арашдырыр?
2. Иса Мәсиһ мүгәддәс руһун һансы ики јолла фәалијјәт ҝөстәрәҹәјини билдирмишди?
2 Иса руһун ики јолла фәалијјәт ҝөстәрәҹәјини билдирмишди. Өлүмүндән бир гәдәр әввәл о, һәвариләринә демишди: «Мәним адымла Атанын ҝөндәрәҹәји Тәсәлливериҹи [«көмәкчи», ЈД], Мүгәддәс Руһ сизә һәр шеји өјрәдәҹәк вә сизә сөјләдијим һәр шеји сизә хатырладаҹагдыр» (Јәһ. 14:26). Бурадан ајдын олур ки, мүгәддәс руһ шаҝирдләри һәм өјрәдәҹәк, һәм дә билдикләрини онлара хатырладаҹагды. Бу о демәкдир ки, руһ мәсиһчиләрин әввәлләр баша дүшмәдикләри шејләри анламаға вә вахтилә изаһ олунан һәгигәтләри јадларына салмаға, еләҹә дә онлары дүзҝүн тәтбиг етмәјә көмәк едәҹәкди.
Биринҹи әсрдә
3. Исанын һансы сөзләри Аллаһын дәрин дүшүнҹәләринин тәдриҹән ачыгланмалы олдуғуну ҝөстәрирди?
3 Иса шаҝирдләринә онлар үчүн јени олан бир чох һәгигәтләр өјрәдирди. Лакин онлар һәлә чох шеј өјрәнмәли идиләр. Иса һәвариләринә демишди: «Сизә сөјләјәҹәк даһа чох сөзләрим вар; амма инди бунлар сиздә сығмаз. О, јәни һәгигәт Руһу ҝәлдикдә, сизә һәр һәгигәтә јол ҝөстәрәҹәк» (Јәһ. 16:12, 13). Бунунла Иса демәк истәјирди ки, мүгәддәс руһун көмәјилә дәрин руһани һәгигәтләр тәдриҹән ачыгланаҹаг.
4. Ерамызын 33-ҹү илинин Пентикост ҝүнүндә мүгәддәс руһ Петерә нә өјрәтди вә она нәләри хатырлатды?
4 Исанын вәд етдији «һәгигәт Руһу» ерамызын 33-ҹү илинин Пентикост ҝүнү Јерусәлимдә топлашан 120 мәсиһчинин үзәринә төкүлдү. Бунун сүбутлары ҝөз габағында иди (Һәв. иш. 1:4, 5, 15; 2:1—4). Мүгәддәс руһун сајәсиндә шаҝирдләр мүхтәлиф дилләрдә «Аллаһын мөһтәшәм ишләри барәдә» данышмаға башладылар (Һәв. иш. 2:5—11). Артыг јени бир шеји ачыгламағын вахты иди. Әсрләр өнҹә Јоел пејғәмбәр мүгәддәс руһун төкүлмәси барәдә хәбәр вермишди (Јоел 2:28—32). Бу һадисәнин шаһиди оланлардан һеч бири һәмин пејғәмбәрлијин бу ҹүр јеринә јетәҹәјини ҝөзләмирди; һәвари Петер исә галхыб һадисәләрин ҝедишатына изаһат верди. (Һәвариләрин ишләри 2:14—18 ајәләрини оху.) Мүгәддәс руһ Петерә ачыглады ки, шаҝирдләрлә баш верән бу һадисә гәдим пејғәмбәрлијин јеринә јетмәсидир. Үстәлик, мүгәддәс руһ Петерә әввәл билдикләрини хатырламаға көмәк етди; бунун сајәсиндә о, тәкҹә Јоелин пејғәмбәрлијини дејил, һәмчинин Давудун ики мәзмуруну да ситат ҝәтирди (Мәз. 16:8—11; 110:1; Һәв. иш. 2:25—28, 34, 35). Бәли, орада топлашанларын ҝөрдүкләри вә ешитдикләри, һәгигәтән дә, Аллаһын дәрин дүшүнҹәләри иди.
5, 6. а) Ерамызын 33-ҹү илинин Пентикост ҝүнүндән сонра јени әһдлә әлагәдар јаранан һансы суаллара ҹаваб тәләб олунурду? б) Бу суаллар кимләрин васитәсилә галдырылды вә онлара даир гәрар неҹә гәбул олунду?
5 Еркән мәсиһчиләр үчүн һәлә чох шеји изаһ етмәк лазым иди. Мәсәлән, Пентикост ҝүнүндә гүввәјә минән јени әһдлә әлагәдар бәзи суаллар ортаја чыхмышды. Ҝөрәсән, јени әһдә тәкҹә јәһудиләр вә прозелитләрми дахил иди? Гејри-јәһудиләр дә јени әһдә гәбул олуна вә мүгәддәс руһла мәсһ олуна биләрдими? (Һәв. иш. 10:45). Гејри-јәһудиләрдән олан кишиләр әввәлҹә сүннәт олунмалы вә Мусанын Гануна риајәт етмәли идиләрми? (Һәв. иш. 15:1, 5). Бу суаллар олдугҹа бөјүк әһәмијјәт кәсб едирди. Белә дәрин мәсәләләри баша дүшмәк үчүн Јеһованын руһуна еһтијаҹ варды. Бәс руһ кимләрин васитәсилә фәалијјәт ҝөстәрәҹәкди?
6 Ҹаваб тәләб едән бу суалларын һәр бири мәсул гардашлар тәрәфиндән рәһбәрлик шурасынын диггәтинә чатдырылды. Рәһбәрлик шурасынын һәмин ҝөрүшүндә иштирак едән Петер, Павел вә Барнаба Јеһованын сүннәт олунмамыш гејри-јәһудиләрә диггәт јетирмәсиндән данышдылар (Һәв. иш. 15:7—12). Рәһбәрлик шурасы Ибраниҹә Мүгәддәс Јазыларда дејиләнләрә әсасланараг бу һадисәләри мүзакирә етди вә мүгәддәс руһун көмәји илә гәрар чыхартды. Сонра онлар бу гәрар барәдә јазылы шәкилдә јығынҹаглара хәбәр вердиләр. (Һәвариләрин ишләри 15:25—30; 16:4, 5 ајәләрини оху; Ефес. 3:5, 6.)
7. Дәрин һәгигәтләр нәјин сајәсиндә ачыгланды?
7 Бир чох башга мәсәләләрә исә Јәһјанын, Петерин, Јагубун вә Павелин Аллаһдан илһам алараг гәләмә алдыглары мәктубларда ајдынлыг ҝәтирилди. Лакин Јунанҹа Мүгәддәс Јазылар тамамландыгдан бир мүддәт сонра пејғәмбәрлик әнамы вә билијин мөҹүзәви шәкилдә верилмәси дајандырылды (1 Кор. 13:8). Бундан сонра да мүгәддәс руһ мәсиһчиләри өјрәтмәјә, билдикләрини хатырламаға вә еләҹә дә Аллаһын дәрин дүшүнҹәләрини арашдырмаға көмәк едәҹәкдими? Пејғәмбәрлијә әсасән, бәли!
Ахыр заманда
8, 9. Ахыр ҝүнләрдә кимләр вә һансы мәнада парламалы идиләр?
8 Сон ҝүнләр һаггында мәләк белә бир пејғәмбәрлик сөјләди: «Ағыллы адамлар ҝөј гүббәсинин парылтысы кими, чохуну салеһлијә дөндәрәнләр улдузлар кими әбәди вә даим парлајаҹаг... вә билик артаҹаг» (Дан. 12:3, 4). Бурада ағыллы адамлар вә парлајаҹаг оланлар алтында кимләр нәзәрдә тутулур? Исанын дәлиҹә вә буғда мәсәли буна ајдынлыг ҝәтирир. О, ‘дөврүн сону’ һаггында демишди: «О заман салеһләр Аталарынын Сәлтәнәтиндә ҝүнәш кими парлајаҹаглар» (Мат. 13:39, 43). Иса вердији изаһатында ҝөстәрди ки, «салеһләр» ‘сәмави Сәлтәнәтин оғуллары’, јәни мәсһ олунмуш мәсиһчиләрдир (Мат. 13:38).
9 Мәсһ олунмушларын һамысымы парламалы иди? Демәк олар ки, бәли. Чүнки онларын һамысы тәблиғ вә шаҝирд һазырламаг ишиндә иштирак етмәли вә јығынҹагда бир-бирләрини мөһкәмләндирмәли идиләр. Бунунла да онлар диҝәр мәсиһчиләрә нүмунә олмалы идиләр (Зәк. 8:23). Бундан әлавә, ахыр ҝүнләрдә дәрин һәгигәтләр ачыгланаҹагды. Елә Даниелин пејғәмбәрлији дә ахыр замана гәдәр «мөһүрлү галаҹаг»ды (Дан. 12:9). Бәс бу һәгигәтләри мүгәддәс руһ неҹә вә кимләрин васитәсилә арашдыраҹагды?
10. а) Ахыр ҝүнләрдә руһ дәрин һәгигәтләри кимләрин васитәсилә ачыглајыр? б) Јеһованын бөјүк руһани мәбәди һаггындакы һәгигәтә неҹә ајдынлыг ҝәтирилди? Изаһ един.
10 Бизим ҝүнләрдә һансыса руһани мәсәләјә ајдынлыг ҝәтирмәјин вахты чатанда мүгәддәс руһ «садиг вә ағыллы гул»ун үмумдүнја мәркәзи идарәсиндәки мәсул тәмсилчиләринә әввәлләр баша дүшүлмәјән дәрин һәгигәтләри анламаға көмәк едир (Мат. 24:45; 1 Кор. 2:13). Рәһбәрлик Шурасынын үзвләри топлашыб дәјишикликләр етмәјин лазым олуб-олмадығыны мүзакирә едирләр (Һәв. иш. 15:6). Сонра онлар мүәјјән гәрара ҝәлирләр вә әҝәр еһтијаҹ варса, дәгигләшдирилмиш изаһаты һамынын нәзәринә чатдырмаг үчүн дәрҹ едирләр (Мат. 10:27). Вахт кечдикҹә мүәјјән шејләрә ајдынлыг ҝәтирмәк лазым ҝәләрсә, онлар буну дүрүстлүклә изаһ едирләр. («Мүгәддәс руһ руһани мәбәдин нә олдуғуну неҹә ачыглајыб?» чәрчивәсинә бахын.)
Мүгәддәс руһ бизә бу ҝүн һансы фајданы ҝәтирир?
11. Мүгәддәс руһун ојнадығы ролдан бүтүн мәсиһчиләр һансы фајданы әлдә едирләр?
11 Ҝөрдүјүмүз кими мүгәддәс руһ Аллаһын дәрин дүшүнҹәләрини садиг вә ағыллы гулун васитәсилә ачыглајыр. Анҹаг руһун бу ролундан бүтүн мәсиһчиләр фајда әлдә едирләр. Еркән мәсиһчиләр кими, биз дә арашдырма апарыр, сонра да мүгәддәс руһун бизә баша дүшмәјә көмәк етдији мәлуматы хатырлајыр вә тәтбиг едирик (Лука 12:11, 12). Нәшрләримиздәки дәрин руһани һәгигәтләри баша дүшмәк үчүн һансыса хүсуси тәһсилә еһтијаҹ јохдур (Һәв. иш. 4:13). Аллаһын дәрин дүшүнҹәләрини даһа јахшы баша дүшмәк үчүн биз нә едә биләрик? Ҝәлин бир нечә мәсләһәти нәзәрдән кечирәк.
12. Биз һансы һалларда дуада Јеһовадан мүгәддәс руһ диләмәлијик?
12 Аллаһдан мүгәддәс руһ дилә. Мүгәддәс Китаба әсасланан материалы нәзәрдән кечирмәздән өнҹә Аллаһдан мүгәддәс руһун көмәјини диләмәлијик. Һәтта өзүмүз шәхсән нәјисә охујуб-арашдыранда вә ја буна ајырдығымыз вахт аз олса белә, буну етмәјә дәјәр. Чүнки белә сәмими хаһишләр Аллаһымыза чох хошдур. Иса Мәсиһин гејд етдији кими, Јеһова Ондан диләјәнләрә мүгәддәс руһундан мәмнунијјәтлә верир (Лука 11:13).
13, 14. Аллаһын дәрин дүшүнҹәләрини баша дүшмәкдә ҝөрүшләрә һазырлашмаг һансы ролу ојнајыр?
13 Ҝөрүшләрә һазырлаш. Биз гул синфи васитәсилә «вахтлы-вахтында» руһани гида алырыг. Бу «гул» Аллаһын Кәламына әсасланан материаллар һазырламагла, өјрәнмәк үчүн програмлар тәртиб етмәклә вә ибадәт ҝөрүшләри тәшкил етмәклә өз вәзифәсини јеринә јетирир. Буна ҝөрә дә тәгдим олунан мәлуматы бүтүн ‘гардашлығын’ диггәтлә нәзәрдән кечирмәси олдугҹа ваҹибдир (1 Пет. 2:17; Колос. 4:16; Јәһуда 3). Биз верилән ҝөстәришләрә ҹанла-башла әмәл етмәклә мүгәддәс руһла әмәкдашлыг етмиш олуруг (Вәһј 2:29).
14 Мәсиһчи ҝөрүшләринә һазырлашанда, јахшы оларды ки, ҝәтирилән һәр ајәни ачыб охујаг вә онларын мөвзу илә неҹә бағлы олдуғу үзәриндә дүшүнәк. Әҝәр буну өзүмүзә вәрдиш етсәк, Мүгәддәс Китабы ҝетдикҹә даһа јахшы баша дүшәҹәјик (Һәв. иш. 17:11, 12). Һәмчинин һәмин ајәләр бизим јаддашымыза һәкк олунаҹаг вә лазым ҝәләндә мүгәддәс руһ онлары јадымыза салмаға көмәк едәҹәк. Үстәлик, ајәләри Мүгәддәс Китабда ҝөзләримизлә ҝөрәндә онларын јери јадымызда галаҹаг вә лазым оланда онлары асанлыгла тапа биләҹәјик.
15. Нәјә ҝөрә биз нәшрләримизи мүнтәзәм олараг охумалыјыг вә сән буну нә вахт едирсән?
15 Бүтүн нәшрләримизи оху. Дәрҹ олунан бәзи нәшрләр ҝөрүшләримиздә арашдырылмаса да, онларын фајдасы данылмаздыр. Һәтта ҝениш охуҹу күтләси үчүн нәзәрдә тутулан нәшрләримиз јазыларкән Аллаһын хидмәтчиләри олан бизләр дә нәзәрә алынырыг. Бу јүксәктемпли дүнјада биз чох вахт кимисә, јахуд нәјисә ҝөзләмәли олуруг. Фүрсәтдән истифадә едәрәк бу вахт охумадығымыз нәшрләри вә ја мәгаләләри охуја биләрик. Бәзиләри исә ҝәзәркән вә ја нәглијјатда ҝедәркән нәшрләримизин аудиојазыларына гулаг асырлар. Дәгиг арашдырмалар нәтиҹәсиндә әрсәјә ҝәлмиш вә орта сәвијјәли охуҹунун баша дүшәҹәји тәрздә јазылмыш нәшрләримиз руһани һәгигәтләри даһа јахшы баша дүшмәјә көмәк едир (Һаб. 2:2).
16. Јаранан суаллары гејд едәрәк онлары арашдырмағын һансы фајдасы вар?
16 Охудугларынын үзәриндә дүшүн. Аллаһын Кәламыны вә ја она әсасланан нәшрләри охујаркән онларын үзәриндә дәриндән дүшүнмәјә вахт ајыр. Онлары диггәтлә охујанда суалларын јарана биләр. Суалларыны гејд ет вә онлары арашдыр. Адәтән, биздә мараг ојадан мөвзулары дәриндән арашдырырыг. Јијәләндијимиз јени биликләри руһани хәзинәмизә јығырыг, лазым ҝәләндә дә ҝөтүрүб истифадә едирик (Мат. 13:52).
17. Сиз һансы програм үзрә аиләви вә ја шәхси өјрәнмә кечирирсиниз?
17 Аиләви ибадәт үчүн вахт тәјин ет. Рәһбәрлик Шурасы һамымыза һәр һәфтәнин бир ахшамыны вә ја һәфтә әрзиндә башга бир вахты аиләви вә ја шәхси өјрәнмәјә сәрф етмәји мәсләһәт ҝөрүр. Ҝөрүшләрин ҹәдвәлиндә едилән дәјишикликләр бу мәсләһәтә әмәл етмәјә имкан јарадыр. Сиз, адәтән, аиләви ибадәт ахшамларында нәји мүзакирә едирсиниз? Бәзиләри Мүгәддәс Китабы охујур, суал доғуран ајәләри арашдырыр вә өз нүсхәләриндә гыса гејдләр апарырлар. Бир чох аиләләр өјрәнмә заманы арашдырдыглары материалы өзләринә тәтбиг етмәјә чалышырлар. Бәзи аилә башчылары исә аиләләринин тәләбатларына ујғун материаллар сечир, јахуд да аилә үзвләринин мүзакирә етмәк истәдији мөвзу вә ја суаллары арашдырырлар. Чох еһтимал ки, сизин мүзакирә етмәк истәдијиниз башга мөвзулар да варa.
18. Нәјә ҝөрә Мүгәддәс Јазыларын дәрин һәгигәтләрини арашдырмагдан чәкинмәмәлијик?
18 Исанын сөзләринә ҝөрә мүгәддәс руһ көмәкчи кими фәалијјәт ҝөстәрәҹәкди. Буна ҝөрә дә ҝәлин Мүгәддәс Јазыларын дәрин һәгигәтләрини арашдырмагдан чәкинмәјәк. Бу ҹүр һәгигәтләр бизә ‘Аллаһы танымаға’ көмәк едир вә биз онлары арашдырмаға дәвәт олунуруг. (Сүлејманын мәсәлләри 2:1—5 ајәләрини оху.) Бу һәгигәтләрин сајәсиндә биз «Аллаһын Ону севәнләр үчүн һазырладығы шејләри» даһа јахшы баша дүшүрүк. Јеһованын Кәламы һаггында даһа чох өјрәнмәјә сәј ҝөстәрдикҹә мүгәддәс руһ бизә «һәр шеји, Аллаһын дәрин дүшүнҹәләрини белә» арашдырмаға көмәк едәҹәк (1 Кор. 2:9, 10).
[Һашијә]
a «Бизим Падшаһлыг Хидмәтимиз»ин 2008-ҹи ил октјабр сајынын 8-ҹи сәһифәсинә бах.
Неҹә ҹаваб верәрдиниз?
• «Аллаһын дәрин дүшүнҹәләрини» ачыгламаг үчүн мүгәддәс руһ бизә һансы ики үсулла көмәк едир?
• Биринҹи әсрдә мүгәддәс руһ дәрин һәгигәтләри кимләрин васитәсилә ачыглајырды?
• Бизим ҝүнләрдә мүгәддәс руһ мүәјјән мәгамлара ајдынлыг ҝәтирмәк үчүн неҹә фәалијјәт ҝөстәрир?
• Мүгәддәс руһун ојнадығы ролундан фајдаланмаг үчүн сән нә едә биләрсән?
[22-ҹи сәһифәдәки чәрчивә]
Мүгәддәс руһ руһани мәбәдин нә олдуғуну неҹә ачыглајыб?
Биринҹи әсрдә мүгәддәс руһун ачдығы Аллаһын дәрин дүшүнҹәләринә мүгәддәс мәскән, јәни чадыр вә сонрадан тикилән мәбәд дахил иди. Бунлар даһа бөјүк шејләри тәмсил едирди. Ибраниләрә 8:2 ајәсиндә Павел буну ‘һәгиги Чадыр — инсанын дејил, Рәббин гурдуғу Чадыр’ адландырыр. Бу, бөјүк руһани мәбәд — Иса Мәсиһин фидјә гурбанлығы вә баш каһин олмасы сајәсиндә Аллаһа јахынлашмағы мүмкүн едән гурулуш иди.
Ерамызын 29-ҹу илиндә Иса вәфтиз олунду вә Јеһова ону ҝәләҹәк камил фидјә гурбаны кими гәбул етди. Бунунла да һәмин ‘һәгиги Чадыр’ пејда олду (Ибр. 10:5—10). Өлүмүндән вә дирилдилмәсиндән сонра Иса Мәсиһ Ән Мүгәддәс јерә дахил олараг ҝәтирдији гурбанын дәјәрини ‘Аллаһын һүзуруна’ тәгдим етди (Ибр. 9:11, 12, 24).
Башга мәктубда исә һәвари Павел мәсһ олунмуш мәсиһчиләри Јеһова үчүн уҹалдылан мүгәддәс мәбәд кими тәсвир едир (Ефес. 2:20—22). Демәк олармы ки, бу мәбәд сонралар «Ибраниләрә мәктуб»да хатырланан ‘һәгиги Чадырла’ ејни шејдир? Он илләр әрзиндә Јеһованын хидмәтчиләри бунун мәһз белә олдуғуну дүшүнүрдүләр. Онлара елә ҝәлирди ки, мәсһ олунмуш мәсиһчиләр јер үзүндә Јеһованын ҝөјдәки мәбәдиндә «дашлар» олмаг үчүн һазырланыр (1 Пет. 2:5).
Лакин 1970-ҹи илләрин әввәлләриндә гул синфинин мәсул үзвләри баша дүшдүләр ки, Павелин «Ефеслиләрә мәктуб»унда һаггында бәһс етдији мәбәд Јеһованын бөјүк руһани мәбәди ола билмәзди. Әҝәр ‘һәгиги Чадыр’ дирилмиш мәсһ олунмуш мәсиһчиләрдән ибарәт олсајды, онда бу чадыр Ағамызын иштиракы заманы онларын дирилмәси башлајандан сонра пејда оларды (1 Салон. 4:15—17). Лакин Павелин сөзләриндән ҝөрүрүк ки, бу чадыр артыг онун дөврүндә мөвҹуд иди: «Бу чадыр тәјин едилмиш вахта гәдәр бир нүмунә кими дурмалы иди вә бу вахт артыг јетишиб» (Ибр. 9:9, ЈД).
Бу вә диҝәр ајәләри мүгајисә етдикдән сонра ајдын олду ки, һал-һазырда руһани мәбәд тикилмир, о артыг чохдан мөвҹуддур, ејни заманда мәсһ олунмуш мәсиһчиләр мәбәдин тикинтисиндә истифадә олунмаг үчүн һазырланан «дашлар»ы тәмсил етмир. Әксинә, мәсһ олунмуш мәсиһчиләр руһани мәбәдин ичәри һәјәтиндә вә Мүгәддәс јердә «һәмд гурбаныны» ҝәтирмәклә Аллаһа хидмәт едирләр (Ибр. 13:15).
[23-ҹү сәһифәдәки шәкил]
«Аллаһын дәрин дүшүнҹәләрини» даһа јахшы неҹә баша дүшә биләрик?