Јеһова ‘Ондан диләјәнләрә мүгәддәс руһу верир’
«Мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (ЛУКА 11:13).
1. Мүгәддәс руһун көмәјинә хүсусилә нә вахт еһтијаҹ дујуруг?
«МӘН өзүм бунун өһдәсиндән ҝәлә билмәздим. Јалныз мүгәддәс руһун көмәјилә бу сынаға таб ҝәтирирәм!» Сән дә нә вахтса белә һиссләр кечирмисәнми? Бир чох мәсиһчиләрә бу һиссләр танышдыр. Ола билсин, кимсә ҹидди хәстәлијә тутулдуғуну биләндә, өмүр-ҝүн јолдашыны итирәндә, јахуд бир заманлар јашамағы севән инсан депрессијаја гапыланда бу һиссләри кечириб. Һәјатын ағрылы-аҹылы ҝүнләриндә чохлары чәкдикләри әзијјәтә јалныз Јеһованын мүгәддәс руһунун вердији «ән үстүн гүдрәт» сајәсиндә таб ҝәтирдикләрини баша дүшүрләр (2 Коринфлиләрә 4:7-9; Мәзмур 40:1, 2).
2. а) Һәгиги мәсиһчиләр һансы чәтинликләрлә үзләширләр? б) Бу мәгаләдә һансы суаллары мүзакирә едәҹәјик?
2 Һәгиги мәсиһчиләр бу аллаһсыз дүнјада ҝет-ҝедә артан тәзјигләр вә мүгавимәтләрлә мүбаризә апармалы олурлар (1 Јәһја 5:19). Үстәлик, Шејтан Иблисин өзү дә Мәсиһин давамчыларына һүҹум едир. О, ‘Аллаһын әмрләринә риајәт едиб, Исаја олан шәһадәтләринә бағлы галанлара’ гаршы амансыз мүһарибә апарыр (Вәһј 12:12, 17). Буна ҝөрә дә, бу ҝүн әввәлкиндән даһа чох Аллаһын руһунун көмәјинә еһтијаҹ дујдуғумуз тәәҹҹүблү дејил. Биз Јеһованын бол-бол вердији мүгәддәс руһу неҹә ала биләрик? Аллаһын сынаглар заманы еһтијаҹымыз олан ҝүҹү бизә вермәјә һазыр олдуғуну һарадан билирик? Исанын чәкдији ики мәсәли арашдырмагла бу суалларын ҹавабыны тапмаг олар.
Тә’кидлә дуа един
3, 4. Иса һансы мәсәли данышды вә ону дуаја неҹә тәтбиг етди?
3 Бир дәфә шаҝирдләрдән бири Исадан хаһиш етди: «Ја Рәбб!.. бизә дуа етмәји өјрәт» (Лука 11:1). Ҹавабында Иса шаҝирдләринә бир-бирилә бағлы ики мәсәл данышды. Биринҹиси, евинә гонаг ҝәлән киши, икинҹиси исә, оғлунун хаһишини динләјән ата һаггында иди. Ҝәлин бу мәсәлләри арашдыраг.
4 Иса мәсәлә белә башлады: «Фәрз едәк ки, сизләрдән бирисинин досту вар. Ҝеҹә јарысы онун евинә ҝәлиб дејир: “Достум! Мәнә үч чөрәк борҹ вер, чүнки јолдан јаныма бир достум ҝәлиб, она тәклиф едәҹәк бир шејим јохдур”. О да ичәридән она ҹаваб верәрәк дејир: “Мәни нараһат етмә, гапы артыг бағлыдыр вә ушагларым мәнимлә бәрабәр јатагдадырлар; галхыб сәнә бир шеј верә билмәрәм”. Сизә дејирәм ки, әҝәр о, достлуг наминә галхыб вермәсә дә, досту үзә салдығындан галхыб нә гәдәр истәјирсә она верәҹәкдир». Сонра Иса бу мәсәли дуаја тәтбиг едәрәк деди: «Мән сизә дејирәм: Диләјин, сизә вериләҹәк; ахтарын, тапаҹагсыныз; гапыны дөјүн, сизә ачылаҹаг. Чүнки һәр диләјән алыр, ахтаран тапыр вә гапы дөјәнә ачылыр» (Лука 11:5-10).
5. Хаһишини тә’кидлә билдирән ев саһибинин нүмунәсиндән ҝөрүндүјү кими, биз неҹә дуа етмәлијик?
5 Бу әјани нүмунәдән неҹә дуа етмәк лазым олдуғуну өјрәнирик. Диггәт јетирин ки, киши «үзә салдығындан» истәдијини ала билди (Лука 11:8). «Үзә салмаг» ифадәсинә Мүгәддәс Китабда јалныз бир дәфә раст ҝәлинир. Үмумијјәтлә бу пис хүсусијјәт олса да, хејирхаһ ишләр үчүн үзә салмаг вә ја тә’кид ҝөстәрмәк тә’рифә лајигдир. Мәсәлдәки ев саһиби һаггында да белә демәк олар. О өзүнә лазым олан шеји тә’кидлә истәмәјә утанмады. Исанын чәкдији бу нүмунә ҝөстәрир ки, биз тә’кидлә дуа етмәлијик. Јеһова бизим ‘диләмәјә, ахтармаға, гапыны дөјмәјә’ давам етмәјимизи истәјир. Ҹавабында О, диләјәнләрә мүгәддәс руһу верәҹәк.
6. Исанын ҝүнләриндә гонағы неҹә гаршылајырдылар?
6 Иса бизә тәкҹә неҹә дуа етмәли олдуғумузу дејил, һәм дә нә үчүн белә етмәли олдуғумузу ҝөстәрди. Бу ибрәт дәрсини јахшы баша дүшмәк үчүн, әввәлҹә мәсәли динләјәнләрин гонаға неҹә мүнасибәт ҝөстәрдикләрини нәзәрдән кечирмәлијик. Мүгәддәс Јазылардан ҝөрүрүк ки, о дөврдә јашајан инсанлар, хүсусилә Аллаһын хидмәтчиләри гонағын гајғысына галмағы өзләринә борҹ билирдиләр (Јарадылыш 18:2-5; Ибраниләрә 13:2). Гонағы јахшы гаршыламамаг ајыб сајылырды (Лука 7:36-38, 44-46). Буну јадда сахлајараг, ҝәлин Исанын сөјләдији һекајәтә бир даһа нәзәр салаг.
7. Исанын мәсәлиндәки ев саһиби достуну јухудан ојатмаға нә үчүн чәкинмәди?
7 Мәсәлдәки кишинин евинә ҝеҹә јарысы гонаг ҝәлир. О, гонағын габағына јемәк гојмағы өзүнә борҹ билир, лакин мә’лум олур ки, ‘тәклиф едәҹәк бир шеји јохдур’. Чәтин вәзијјәтә дүшән ев саһиби нә олурса-олсун чөрәк тапмалыдыр. Буна ҝөрә дә, о, чәкинмәдән достунун јанына ҝедир вә ону јухудан ојадараг дејир: «Достум! Мәнә үч чөрәк борҹ вер». О, истәдијини алмајынҹа әл чәкмир. Гонағын габағына јалныз чөрәк гојдугдан сонра әсл гонагпәрвәрлик ҝөстәрәрди.
Нә гәдәр чох еһтијаҹ дујуругса, бир о гәдәр дә тә’кидлә хаһиш етмәлијик
8. Мүгәддәс руһ үчүн тә’кидлә дуа етмәјә бизи нә тәшвиг едәҹәк?
8 Бу нүмунә бизә тә’кидлә дуа етмәјин сәбәби һагда нә өјрәдир? Ев јијәси баша дүшүрдү ки, гонағы лајигинҹә гаршыламаг үчүн чөрәк мүтләг лазымдыр, буна ҝөрә дә тә’кидлә достундан чөрәк истәди (Јешаја 58:5-7). Чөрәксиз о, гонағын габағына чыха билмәзди. Биз дә баша дүшүрүк ки, мәсиһчи хидмәтини иҹра етмәк үчүн бизә Аллаһын мүгәддәс руһу мүтләг лазымдыр. Буна ҝөрә дә, тә’кидлә Аллаһа мүгәддәс руһ үчүн дуа едирик (Зәкәријјә 4:6). Мүгәддәс руһ олмадан Аллаһа хидмәт едә билмәрик (Матта 26:41). Бу нүмунәдән һансы ваҹиб нәтиҹәни чыхарырыг? Әҝәр биз Аллаһын руһуна сон дәрәҹәдә еһтијаҹымыз олдуғуну дәрк едириксә, дуаларымызда ону тә’кидлә истәјәҹәјик.
9, 10. а) Аллаһдан мүгәддәс руһу нә үчүн тә’кидлә диләмәли олдуғумузу нүмунә әсасында ҝөстәрин. б) Өзүмүзә һансы суалы вермәлијик вә нә үчүн?
9 Ҝәлин бу нүмунәни бизим ҝүнләрә тәтбиг едәк. Тәсәввүр един ки, аилә үзвләриниздән киминсә һалы ҝеҹә јарысы писләшир. Мәҝәр сиз һәкими ојатмаздынызмы? Әҝәр бу кичик насазлыгдырса, әлбәттә ки, јох. Лакин онун үрәји тутубса, һәкимә зәнҝ етмәјә утанмаздыныз. Нијә? Чүнки вәзијјәт тәһлүкәлидир. Баша дүшүрсүнүз ки, һәкимин көмәји мүтләг лазымдыр. Һәким чағырмасаныз, хәстә өлә биләр. Һәгиги мәсиһчиләрин дә вәзијјәти тәһлүкәлидир. Чүнки Шејтан «нә’рә чәкән... аслан кими» бизи даим ашырмаға чалышыр (1 Петер 5:8). Руһани ҹәһәтдән сағ галмаг үчүн, Аллаһын руһунун көмәји мүтләг лазымдыр. Аллаһдан көмәк истәмәсәк, бу, фаҹиә илә нәтиҹәләнә биләр. Буна ҝөрә дә, Аллаһдан тә’кидлә мүгәддәс руһ диләјирик (Ефеслиләрә 3:14-16). Јалныз белә етдикдә ‘ахыра гәдәр сәбир етмәк’ үчүн гүввәмиз олаҹаг (Матта 10:22; 24:13).
10 Бу сәбәбдән вахташыры өзүмүздән сорушмалыјыг: «Мән нә дәрәҹәдә тә’кидлә дуа едирәм?» Јадда сахла ки, јалныз Аллаһын көмәјинә еһтијаҹ дујдуғумузу дәрк етдијимиз һалда, дуада Аллаһдан мүгәддәс руһу тә’кидлә диләјәҹәјик.
Әминликлә дуа етмәјә бизи нә тәшвиг едир?
11. Иса ата вә оғул мәсәлини дуаја неҹә тәтбиг етди?
11 Исанын чәкдији биринҹи мәсәлдә дуа едәнин, икинҹи мәсәлдә исә, дуалары динләјән Јеһова Аллаһын әһвал-руһијјәси вурғуланыр. Иса суал верди: «Аранызда елә бир ата вармы ки, оғлу... балыг истәрсә, она балыг әвәзинә илан версин? Јахуд, јумурта истәрсә, она әгрәб версин?» Иса бу мәсәли дә дуаја тәтбиг етди: «Беләликлә, мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!» (Лука 11:11-13).
12. Оғулун хаһишини динләјән атанын нүмунәси Јеһованын дуаларымыза ҹаваб вермәјә һазыр олдуғуну неҹә ҝөстәрир?
12 Оғулун хаһишинә ҹаваб верән атанын нүмунәсиндә Иса Јеһованын дуада Она мүраҹиәт едәнләрә неҹә јанашдығыны ҝөстәрир (Лука 10:22). Әввәлҹә бу ики нүмунә арасындакы фәргә фикир верин. Биринҹи нүмунәдәки көнүлсүз көмәк едән кишидән фәргли олараг, Јеһова ушағынын хаһишини һәвәслә јеринә јетирән гајғыкеш атаја бәнзәјир (Мәзмур 50:15). Иса Јеһованы инсанла мүгајисә едәрәк Онун көмәјә һазыр олдуғуну даһа ајдын шәкилдә ҝөстәрир. Әҝәр ата мирас алдығы ҝүнаһ үзүндән ‘пис олдуғу һалда’ оғлуна јахшы һәдијјәләр верирсә, биз хејирхаһ сәмави Атамызын Өз хидмәтчиләринә мүгәддәс руһ верәҹәјини даһа чох ҝөзләмәли дејиликми?! (Јагуб 1:17).
13. Јеһоваја дуа едәндә нәјә әмин ола биләрик?
13 Бурада бизим үчүн һансы ибрәт дәрси вар? Әмин ола биләрик ки, сәмави Атамыздан мүгәддәс руһ истәјәндә, о, хаһишимизә бөјүк мәмнунијјәтлә ҹаваб верир (1 Јәһја 5:14). Биз Јеһоваја дөнә-дөнә дуа едәндә, О һеч вахт «Мәни нараһат етмә, гапы артыг бағлыдыр» демәјәҹәк (Лука 11:7). Әксинә, Иса чағырырды: «Диләјин, сизә вериләҹәк; ахтарын, тапаҹагсыныз; гапыны дөјүн, сизә ачылаҹаг» (Лука 11:9, 10). Бәли, Јеһова Ону ‘чағыраркән бизә ҹаваб верәҹәк’ (Мәзмур 20:9; 145:18).
14. а) Сынагларла үзләшән бә’зи мәсиһчиләри һансы јанлыш фикир нараһат едир? б) Сынагларла үзләшәндә Јеһоваја нәјә ҝөрә әминликлә дуа едә биләрик?
14 Исанын ҝәтирдији гајғыкеш ата нүмунәси, һәмчинин ҝөстәрир ки, Јеһованын хејирхаһлығы инсан хејирхаһлығындан гат-гат үстүндүр. Буна ҝөрә дә, һеч вахт фикирләшмәмәлијик ки, үзләшдијимиз сынаглар Аллаһын биздән наразы олдуғунун әламәтидир. Белә дүшүнмәјимизи истәјән гаты дүшмәнимиз олан Шејтандыр (Әјјуб 4:1, 7, 8; Јәһја 8:44). Мүгәддәс Китаб өзүмүзү белә үзмәјә һеч бир әсас вермир. Јеһова бизи «писликлә... имтаһан етмир» (Јагуб 1:13). Исанын Лука 11:11-13 ајәләриндәки сөзләринә мүвафиг олараг, Јеһова бизи «илан» вә ја «әгрәб» тимсалында сынаглара мә’руз гојмур. Сәмави Атамыз «Ондан диләјәнләрә јахшы шејләр» верир (Матта 7:11). Јеһованын хејирхаһлығыны вә бизә көмәк етмәјә һазыр олдуғуну нә гәдәр јахшы дәрк едәриксә, бир о гәдәр дә әминликлә Она дуа етмәјә ҹан атарыг. Белә олдугда биз дә мәзмурчунун сөзләринә шәрик олаҹағыг: «Аллаһ мәни динләди, дуамын сәсини ешитди» (Мәзмур 10:17; 66:19).
Мүгәддәс руһ көмәкчимиздир
15. а) Иса мүгәддәс руһа даир нәји вә’д етди? б) Мүгәддәс руһ бизә неҹә көмәк едир?
15 Өлүмүндән бир аз әввәл Иса мүгәддәс руһ һаггында данышаркән һәвариләрини бир даһа Јеһованын көмәк етмәјә һазыр олдуғуна әмин етди: «Мән дә Атадан хаһиш едәҹәјәм ки, О, даим сизинлә бәрабәр олмаг үзрә сизә башга бир Тәсәлливериҹи [«көмәкчи», ЈД] версин» (Јәһја 14:16). Бунунла Иса вә’д етди ки, көмәкчи, јә’ни мүгәддәс руһ, бизим ҝүнләр дә дахил олмагла, һәмишә онун давамчылары илә олаҹаг. Мүгәддәс руһ бу ҝүн бизә неҹә көмәк едир? Мәсәлән, мүхтәлиф сынаглара таб ҝәтирмәјимизә көмәк едир. Неҹә? Өзү сынаглара мә’руз галмыш һәвари Павел коринфлиләрә мәктубунда Аллаһын руһунун она неҹә көмәк етдијини тәсвир едир. Ҝәлин онун јаздыгларыны гысаҹа арашдыраг.
16. Павел кими биз дә һансы вәзијјәтә дүшә биләрик?
16 Әввәлҹә Павел һәмиманлыларына ‘бәдәниндәки нештәр’ илә, јә’ни һансыса сынагла мүбаризә апардығыны сөјләди. Сонра о деди: «Үч дәфә Рәббә [Јеһоваја] јалвардым ки, ону мәндән узаглашдырсын» (2 Коринфлиләрә 12:7, 8). Лакин Јеһова бу ‘нештәрини’ ондан узаглашдырмады. Бәлкә сән дә ејни вәзијјәтдәсән. Павел кими сән дә Јеһованын сынағы сәндән узаглашдырмасы үчүн тә’кидлә вә әминликлә дуа етмисән. Дөнә-дөнә хаһиш етдијинә бахмајараг, проблем олдуғу кими галыр. Бу о демәкдирми ки, Јеһова сәнин дуаларына ҹаваб вермир вә Онун руһу сәнә көмәк етмир? Гәтијјән јох! (Мәзмур 10:1, 17). Һәвари Павелин сонра дедији сөзләрә диггәт јетирәк.
17. Јеһова Павелин дуаларына неҹә ҹаваб верди?
17 Јеһова Павелә «лүтфүм сәнә јетәр; чүнки Мәним гүдрәтим зәифликдә камилләшир» ҹавабыны вердији үчүн о демишдир: «Буна ҝөрә, даһа чох өз зәифликләримлә мәмнунијјәтлә өјүнәҹәјәм ки, Мәсиһин гүдрәти ичимдә сакин олсун [«чадыр кими үзәримдә олсун», ЈД]» (2 Коринфлиләрә 12:9; Мәзмур 147:5). Павел, Аллаһын, санки үзәриндә гурулан чадыр кими, Мәсиһ васитәсилә ону мүдафиә етдијини өз үзәриндә һисс етмишди. Јеһова бу ҝүн дә дуаларымыза ејни тәрздә ҹаваб верир. О Өз хидмәтчиләрини санки чадыр кими мүдафиә едир.
18. Сынаглара нәјин сајәсиндә таб ҝәтирә биләрик?
18 Дүздүр, чадыр јағышы вә ја күләји дајандырмыр, анҹаг мүәјјән дәрәҹәдә онлардан мүдафиә едир. Ејнилә «Мәсиһин гүдрәти» васитәсилә тәгдим олунан сығынаҹаг бизи сынаг вә чәтинликләрдән азад етмир. Лакин бизи бу дүнјанын писликләриндән вә онун рәһбәри олан Шејтанын һүҹумларындан руһани ҹәһәтдән мүдафиә едир (Вәһј 7:9, 15, 16). Буна ҝөрә дә әҝәр сынаглар ‘сәндән узаглашмырса’, әмин ол ки, Јеһова апардығын мүбаризәдән хәбәрдардыр вә ‘фәрјадыны’ ҹавабсыз гојмур (Јешаја 30:19; 2 Коринфлиләрә 1:3, 4). Павел јазырды: «Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз» (1 Коринфлиләрә 10:13; Филипилиләрә 4:6, 7).
19. Биз нә етмәлијик вә нә үчүн?
19 Бу аллаһсыз дүнјанын ‘ахыр ҝүнләриндә’ «чәтин анлар» ҝәлиб (2 Тимотејә 3:1). Лакин бу о демәк дејил ки, чәтин анлар Аллаһын хидмәтчиләри үчүн дөзүлмәз олаҹаг. Нә үчүн? Чүнки Јеһова Ондан тә’кидлә вә әминликлә мүгәддәс руһ истәјән һәр кәсә ону бол-бол вә һәвәслә верир. Мүгәддәс руһ исә көмәјимизә чатыр вә бизи мүдафиә едир. Буна ҝөрә дә, ҝәлин, дуаларымызда һәр ҝүн Аллаһдан мүгәддәс руһ истәјәк (Мәзмур 34:6; 1 Јәһја 5:14, 15).
Неҹә ҹаваб верәрдиниз?
• Аллаһдан мүгәддәс руһ алмаг үчүн нә етмәлијик?
• Јеһоваја мүгәддәс руһ үчүн дуа едәндә Онун ҹаваб верәҹәјинә нә үчүн әмин ола биләрик?
• Мүгәддәс руһ сынаглара таб ҝәтирмәјә неҹә көмәк едир?
[15-ҹи сәһифәдәки шәкил]
Гајғыкеш ата мәсәлиндән Јеһова һаггында нә өјрәнирик?