Јеҝанә Аллаһ олан Јеһова аиләсини бир јерә јығыр
«Сизә јалварырам... руһун бирлијини горумаға үрәкдән чалышын» (ЕФЕС. 4:1, 3).
НЕҸӘ ИЗАҺ ЕДӘРДИНИЗ?
Аллаһын «ишләрин идарәси»нин мәгсәди нәдир?
Биз «сүлһүн бирләшдириҹи телләри ичиндә руһун бирлијини» неҹә горујуруг?
Башгаларына гаршы хејирхаһ олмаға бизә нә көмәк едәҹәк?
1, 2. Јеһованын Јер күрәсинә вә бәшәријјәтә даир нијјәти нә иди?
АИЛӘ. Бу сөзү ешидәндә хәјалынызда нә ҹанланыр? Меһрибанчылыг? Сәадәт? Мүәјјән бир мәгсәдә чатмаг үчүн бирҝә чалышмаг? Јохса бөјүмәјә, јени шејләр өјрәнмәјә, фикирләри бөлүшмәјә имкан верән тәһлүкәсиз исти бир јува? Әҝәр сизин дә аиләниз сәмими вә гајғыкешдирсә, јәгин ки, бунларын һамысы. Аиләнин Баниси Јеһова Аллаһдыр (Ефес. 3:14, 15). Аллаһын нијјәти әзәлдән будур ки, ҝөјдә вә јердә јашајанларын һамысы бир аилә олуб тәһлүкәсизликдә јашасынлар, араларында гаршылыглы етибар вә әсил бирлик һөкм сүрсүн.
2 Лакин улу валидејнләримиз ҝүнаһа батан андан етибарән инсанлар Аллаһын бөјүк аиләсинин үзвү дејилләр. Буна бахмајараг, Аллаһын нијјәти пуча чыхмајыб. Аллаһ Адәмлә Һәвванын өвладларынын Ҹәннәтдә јашамаларынын гејдинә галаҹаг (Јар. 1:28; Јешаја 45:18). О, бу нијјәтини һәјата кечирмәк үчүн лазым олан һәр шеји һазырлајыб. Бу тәдбирләрдән бәзиләри һагда әсас мөвзусу бирлик олан «Ефеслиләрә мәктуб»да бәһс едилир. Ҝәлин бу мәктубдан бәзи ајәләрә диггәт јетирәк вә ҝөрәк Јеһованын ҝөјдә вә јердә јашајанлары бирләшдирмәк нијјәтинин һәјата кечмәсинә биз өз төһфәмизи неҹә верә биләрик.
ИШЛӘРИН ИДАРӘСИ ВӘ НАИЛИЈЈӘТЛӘР
3. Ефеслиләрә 1:10 ајәсиндәки «ишләрин идарәси» нәдир вә онун биринҹи мәрһәләси нә заман башлајыб?
3 Муса исраиллиләрә демишди: «Аллаһымыз...[Јеһова] јеҝанә Рәбдир» (Ганун. т. 6:4). Јеһованын нијјәти вә ишләри һармонија тәшкил едир. Аллаһ «тәјин едилмиш вахтын сонунда» ҝөјдә вә јердә олан шүурлу варлыгларын һамысыны бир аилә олмасы үчүн һазырламаға башлады. О, бу һазырлыг тәдбирләрини «ишләрин идарәси» адландырды. (Ефеслиләрә 1:8—10 ајәләрини оху.) Ишләрин идарәси ики мәрһәләдә һәјата кечирилир. Илк мәрһәлә заманы Аллаһ мәсһ олунмуш мәсиһчиләри ҝөјдә јашамаг үчүн һазырлајыр; бурада онлар Иса Мәсиһин башчылығы алтында хидмәтләринә давам едәҹәкләр. Биринҹи мәрһәлә ерамызын 33-ҹү илинин Әллинҹи ҝүн бајрамында башлајыб: бу заман Јеһова Мәсиһлә бирҝә ҝөјдә идарә едәҹәк инсанларын јығымына башлајыб (Һәв. иш. 2:1—4). Мәсиһин фидјә гурбанлығынын сајәсиндә мәсһ олунмуш мәсиһчиләр јашамаг үчүн салеһ елан едилибләр, буна ҝөрә дә онлар «Аллаһын өвладлары» кими өвладлыға ҝөтүрүлдүкләрини гәбул едирләр (Ром. 3:23, 24; 5:1; 8:15—17).
4, 5. Ишләрин идарәсинин икинҹи мәрһәләси нәдир?
4 Икинҹи мәрһәләјә исә Мәсиһин һөкмранлығы заманы јер үзүндә јарадылаҹаг Ҹәннәтдә јашајаҹаг инсанлары һазырламаг дахилдир. Бу групун илк һиссәсини бөјүк издиһам тәшкил едир (Вәһј 7:9, 13—17; 21:1—5). Мәсиһин Миниллик Һөкмранлығы заманы онлара милјардларла дирилмиш инсанлар гошулаҹаг (Вәһј 20:12, 13). Дирилмәнин арамызда бирлијин һөкм сүрдүјүнү ҝөстәрмәк үчүн әлимизә нә гәдәр фүрсәт верәҹәјини бир тәсәввүр един! Миниллијин сонунда «јердә оланлары» сон сынаг ҝөзләјир. Бу сынагдан садиг чыханлар Аллаһын јердәки өвладлары кими өвладлыға ҝөтүрүләҹәкләр (Ром. 8:21; Вәһј 20:7, 8).
5 Бу ҝүн Аллаһын ишләринин идарәсинин һәр ики мәрһәләси һәјата кечирилир. Бәс биз ајры-ајрылыгда Аллаһын ишләринин идарәсинин тәшкилинә өз төһфәмизи неҹә верә биләрик?
«РУҺУН БИРЛИЈИНИ» ГОРУЈУН
6. Һансы Мүгәддәс Китаб ајәләри ҝөстәрир ки, мәсиһчиләр бирҝә јығышмалыдырлар?
6 Мүгәддәс Јазыларда гејд олунур ки, мәсиһчиләр һәрфи мәнада бирҝә јығышмалыдырлар (1 Кор. 14:23; Ибр. 10:24, 25). Бу, ејни мәканда, мәсәлән, алыш-вериш мәркәзләриндә вә ја идман комплексләриндә бирҝә вахт кечирмәкдән даһа бөјүк мәна кәсб едир. Әсил бирлик бундан гат-гат үстүндүр. Биз бу ҹүр бирлијә Јеһованын ҝөстәришләринә әмәл едәндә вә Онун мүгәддәс руһунун бизи формалашдырмасына јол верәндә наил олуруг.
7. Руһун бирлијини горумаг нә демәкдир?
7 Дүздүр, Јеһова Мәсиһин фидјә гурбанлығы сајәсиндә мәсһ олунмуш мәсиһчиләри оғуллары кими, башга гојунлары исә достлары кими салеһ елан едиб. Лакин нә гәдәр ки биз бу системдә јашајырыг, арамызда фикир ајрылығы гачылмаздыр (Ром. 5:9; Јаг. 2:23). Әкс һалда, Јеһованын: «Бир-биринизә гаршы дөзүмлү олун», — мәсләһәтинә еһтијаҹ олмазды. Арамызда бирлик неҹә јараныр? Бунун үчүн биз «там тәвазөкарлыг, һәлимлик» инкишаф етдирмәлијик. Бундан әлавә, Павел бизи тәшвиг едир ки, «сүлһүн бирләшдириҹи телләри ичиндә руһун бирлијини горумаға үрәкдән [чалышаг]». (Ефеслиләрә 4:1—3 ајәләрини оху.) Бу мәсләһәти тәтбиг етмәк Аллаһын руһунун тәсиринә бојун әјмәк вә она дахилимиздә сәмәрә јетишдирмәјә имкан вермәк демәкдир. Инсанлар арасында һәмишә ајрылыг салан ҝүнаһлы бәдәнин әмәлләриндән фәргли олараг, руһун сәмәрәси араларында учурум оланлары бирләшдирир.
8. Ҝүнаһлы бәдәнин әмәлләри бирлији неҹә позур?
8 Ҝәлин ҝөрәк «ҝүнаһлы бәдәнин әмәлләри» инсанлары неҹә ајырыр. (Галатијалылара 5:19—21 ајәләрини оху.) Ҹинси әхлагсызлыг ону төрәдән инсаны Јеһовадан вә јығынҹагдан ајырыр, хәјанәт исә аилә үчүн бөјүк зәрбә ола биләр — о, ушаглары валидејнләриндән, ҝүнаһсыз тәрәфи исә һәјат јолдашындан ајырыр. Натәмизлик инсанын Аллаһла вә Ону севән инсанларла бирлијинә хәләл ҝәтирир. Мәлумдур ки, ики әшја бир-биринә јапышсын дејә һәр икисинин дә сәтһи тәмиз олмалыдыр. Инсан позғун давраныша јол вермәклә Аллаһын салеһлик ганунларына бөјүк һөрмәтсизлик етмиш олур. Ҝүнаһлы бәдәнин әмәлләри олан бунларын һамысы инсанлары бир-бириндән вә Аллаһдан ајырыр. Бу ҹүр давраныш тәрзи Јеһованын шәхсијјәтинә тамамилә зиддир.
9. «Сүлһүн бирләшдириҹи телләри ичиндә руһун бирлијини» горумаға чалышыб-чалышмадығымызы мүәјјән етмәк үчүн өзүмүзү неҹә јохлаја биләрик?
9 Буна ҝөрә дә һәр биримиз өзүмүздән сорушмалыјыг: «“Сүлһүн бирләшдириҹи телләри ичиндә руһун бирлијини” горумаг үчүн мән нә дәрәҹәдә үрәкдән чалышырам? Киминләсә арам дәјәндә өзүмү неҹә апарырам? Достларымын мәни дәстәкләјәҹәјинә үмид едәрәк наразылығымы чохлу сајда инсанларын гаршысында билдирирәмми? Һәмиманлымла сүлһү бәрпа етмәјә чалышмаг әвәзинә, ағсаггалларын ишә мүдахилә едәрәк мәним тәрәфими тутаҹагларыны ҝөзләјирәмми? Хәтринә дәјдијим баҹы вә ја гардаша проблем барәдә хатырлатмамаг үчүн ондан гачыраммы?» Бу кими һәрәкәтләр Јеһованын ҝөјдә вә јердә оланларын һамысыны Мәсиһдә бирләшдирмәк нијјәтинә төһфә вердијимизи ҝөстәрәҹәкми?
10, 11. а) Һәмиманлыларымызла сүлһдә олмаг нә дәрәҹәдә ваҹибдир? б) Сүлһ вә руһани фираванлыг үчүн ваҹиб олан әмәлләр һансылардыр?
10 Иса демишди: «Әҝәр бәхшиш ҝөтүрүб гурбанҝаһа ҝәлсән вә орада јадына дүшсә ки, гардашын сәндән инҹијиб, бәхшиши орада, гурбанҝаһын гаршысында гој. Әввәлҹә ҝет гардашынла барыш, сонра ҝәлиб бәхшишини тәгдим едәрсән. Рәгибинлә мәһкәмәјә ҝедәркән, һәлә јолда икән чалыш онун көнлүнү ал» (Мат. 5:23—25). Јагуб јазмышды ки, «салеһлик бәһрәсинин тохуму... сүлһпәрвәрләр үчүн әмин-аманлыг шәраитиндә әкилир» (Јаг. 3:17, 18). Демәли, сүлһ олмаса, биз салеһ даврана билмәрик.
11 Бир нүмунәјә бахаг. Һесабламалара ҝөрә, вахтилә мүһарибәләрин түғјан етдији бәзи өлкәләрдә 35 фаиздән чох торпаг саһәси әкин-бичин үчүн јарарсыздыр, чүнки сакинләр һәмин әразиләрин миналандығындан еһтијат едирләр. Миналар партлајанда фермерләр торпагларыны атыб ҝедирләр. Кәндлиләр иш тапмагда чәтинлик чәкирләр, шәһәрләр гида чатышмазлығы илә үзләшир. Ејнилә, әҝәр гардашларла сүлһү поза биләҹәк һәр һансы бир хүсусијјәтимиз варса, руһани инкишафдан дала галаҹағыг. Лакин әҝәр тез инсанлары бағышлајыр вә башгаларынын рифаһы үчүн чалышырыгса, әсил фираванлыг үчүн ҝөзәл шәраит јараныр.
12. Ағсаггаллар бирлијимизи горумагда бизә неҹә көмәк едә биләрләр?
12 «Инсанлар тимсалында һәдијјәләр» дә бирлији горујуб сахламагда ваҹиб рол ојнајыр. Онлар бизә «иманда бирлијә» јетишмәјә көмәк етмәк мәгсәдилә верилибләр (Ефес. 4:8, 13). Ағсаггаллар бизимлә мүгәддәс хидмәтдә иштирак едәндә вә Аллаһын Кәламына әсасланмыш мәсләһәтләр верәндә бизә инкишаф етмәјә вә јени шәхсијјәтә бүрүнмәјә көмәк едирләр (Ефес. 4:22—24). Онларын мәсләһәтләрини сәни Оғлунун рәһбәрлији алтында јени дүнјада јашамаг үчүн һазырлајан Јеһовадан ҝәлән рәһбәрлик кими гәбул едирсәнми? Еј ағсаггаллар, башгаларына дүзәлиш верәркән бу мәгсәди јадынызда сахламаға чалышырсынызмы? (Галат. 6:1).
«БИР-БИРИНИЗӘ ГАРШЫ ХЕЈИРХАҺ... ОЛУН»
13. Әҝәр биз Ефеслиләрә 4:25—32 ајәләриндәки мәсләһәтләрә риајәт етмәсәјдик, бу, нә илә нәтиҹәләнә биләрди?
13 Ефеслиләрә 4:25—29 ајәләриндә бизим хүсусилә гачмалы олдуғумуз әмәлләр ҝөстәрилир. Бура јалан, гәзәб, тәнбәллик вә тәһгирамиз данышыг дахилдир. Әксинә, биз руһи инкишаф үчүн фајдалы сөзләр демәлијик. Әҝәр инсан бу мәсләһәтләри гулагардына вурурса, о, Аллаһын руһуну кәдәрләндирмиш олур, чүнки бирлији јарадан гүввә мәһз бу мүгәддәс руһдур (Ефес. 4:30). Павелин нөвбәти мәсләһәтини тәтбиг етмәк дә сүлһ вә бирлији горумагда әвәзсиз рол ојнајыр: «Гој кин, һирс, гәзәб, гышгырыг, тәһгирамиз данышыг, үмумијјәтлә һәр ҹүр пислик сиздән узаг олсун. Бир-биринизә гаршы хејирхаһ, шәфгәтли олун, Аллаһ Мәсиһ васитәсилә сизи үрәкдән бағышладығы кими, сиз дә бир-биринизи үрәкдән бағышлајын» (Ефес. 4:31, 32).
14. а) «Хејирхаһ... олун» ифадәси нәји билдирир? б) Хејирхаһ олмаға бизә нә көмәк едәҹәк?
14 «Хејирхаһ... олун» ифадәси ҝөстәрир ки, бәзән биз бу ҹүр даврана билмирик вә бизә бу хүсусијјәти даһа чох инкишаф етдирмәк лазымдыр. Буна ҝөрә дә башгаларынын һиссләрини өзүмүзүнкүндән үстүн тутмағы өјрәнмәк чох ваҹибдир! (Филип. 2:4). Ола билсин ки, һәрдән ағлымыздан кечән фикри кимәсә десәк, бу, ҝүлүшә сәбәб ола, јахуд да бизи башгаларынын ҝөзүндә даһа ағыллы ҝөстәрә биләр. Бәс бу, хејирхаһлығын тәзаһүрү олардымы? Бу һагда габагҹадан фикирләшмәк бизә хејирхаһ олмаға көмәк едәҹәк.
АИЛӘДӘ МӘҺӘББӘТ ВӘ ҺӨРМӘТ ҜӨСТӘРМӘЈИ ӨЈРӘНМӘЈИН ВАҸИБЛИЈИ
15. Ефеслиләрә 5:28 ајәсиндә Павел Мәсиһин јығынҹагла мүнасибәтинин һансы ҹәһәтинә диггәт јетирир?
15 Мүгәддәс Китаб Мәсиһлә јығынҹаг арасында мүнасибәти әрлә арвад арасындакы мүнасибәтлә мүгајисә едир. Мәсиһин нүмунәси әрә арвадына рәһбәрлик вермәли, ону севмәли вә гајғысына галмалы олдуғуну, гадына исә әринә итаәт етмәли олдуғуну баша дүшмәјә көмәк етмәлидир (Ефес. 5:22—33). Павел: «Еләҹә дә әр арвадыны өз бәдәнини севдији кими севмәлидир», — дејәндә нәји нәзәрдә тутурду? (Ефес. 5:28). Бундан әввәл Павел Мәсиһин јығынҹағы неҹә севдијиндән данышырды. Биз охујуруг: «Мәсиһ дә јығынҹағы севди вә өзүнү онун јолунда фәда етди ки, ону Аллаһын сөзү васитәсилә јујуб тәмизләсин». Бәли, Јеһованын јенидән һәр шеји Мәсиһдә бирләшдирмәк нијјәтилә ајаглашмаг үчүн әр аиләсини руһани ҹәһәтдән гидаландырмалыдыр.
16. Әҝәр валидејнләр Јеһованын аиләдә онлара һәвалә етдији вәзифәни јеринә јетирсәләр, бунун нәтиҹәси нә олаҹаг?
16 Валидејнләр јадда сахламалыдырлар ки, Јеһова онлара ушагларыны тәрбијә етмәк вәзифәсини тапшырыб. Әфсуслар олсун ки, бу ҝүн чохлары доғмаларыны севмир (2 Тим. 3:1, 3). Бир чох аталар өз мәсулијјәтләриндән бојун гачырырлар вә бунунла онлар ушагларына бөјүк зәрбә вурмуш олурлар. Лакин Павел мәсиһчи аталара белә мәсләһәт вермишди: «Ушагларынызы әсәбиләшдирмәјин, онлары Јеһованын вердији тәрбијә вә өјүд-нәсиһәтлә бөјүдүн» (Ефес. 6:4). Ахы ушаглар мәһәббәт вә һакимијјәтә һөрмәт барәдә илк дәфә аиләдә өјрәнирләр. Ушагларына бу хүсусијјәтләри ашыламаға мүвәффәг олан валидејнләр Јеһованын ишләрин идарәсинә, јәни һамыны бирләшдирмәк мәгсәдинә ујғун давраныблар. Биз дә гәзәби, һиддәти, тәһгирамиз данышығы өзүмүздән узаглашдырмагла вә евимизи мәһәббәтин һөкм сүрдүјү исти јуваја чевирмәклә өвладларымыза мәһәббәт ҝөстәрмәк вә һакимијјәтә һөрмәт етмәклә бағлы ваҹиб дәрсләр өјрәдирик. Бу, онлары Аллаһын јени дүнјасындакы һәјата һазырлајаҹаг.
17. Иблисә гаршы дурмаг үчүн бизә нә лазымдыр?
17 Биз дәрк етмәлијик ки, Каинатда илк дәфә сүлһү позан Иблис Аллаһын ирадәсини јеринә јетирмәк сәјләримизә ҝүҹлү мүгавимәт ҝөстәрәҹәк. Чохлары мәһз Шејтанын истәдији кими јашајырлар, мәсәлән, бошанырлар, рәсми никаһ олмадан бирҝә јашајырлар вә ја ејниҹинсли инсанлар арасындакы никаһа нормал бахырлар. Анҹаг биз өз давраныш тәрзимизи вә бахышларымызы мүасир ҹәмијјәтин нормаларына ујғунлашдырмырыг. Бизим үчүн нүмунә Мәсиһдир (Ефес. 4:17—21). Буна ҝөрә дә Иблисә вә онун ҹинләринә уғурла мүгавимәт ҝөстәрмәјимиз үчүн Мүгәддәс Китаб бизи «Аллаһын вердији бүтүн јараглары» әјнимизә ҝејинмәјә тәшвиг едир. (Ефеслиләрә 6:10—13 ајәләрини оху.)
«МӘҺӘББӘТ ЈОЛУНДА ЈЕРИЈИН»
18. Мәсиһчи бирлијимизин ачары нәдир?
18 Мәсиһчи бирлијимизин һәгиги ачары мәһәббәтдир. Бизим үрәјимиз «бир Аға»мыз олан Иса Мәсиһә, бир Аллаһымыз олан Јеһоваја вә бир-биримизә олан мәһәббәтдән долуб-дашыр, бу да бизи «сүлһүн бирләшдириҹи телләри ичиндә руһун бирлијини горумаға» тәшвиг едир (Ефес. 4:3—6). Иса белә мәһәббәт барәдә дуа едирди: «Мән јалныз онлар үчүн јох, онлары ешидиб мәнә иман едәҹәк адамлар үчүн дә јалварырам ки, араларында бирлик олсун. Ата, Сән мәнимлә, мән дә Сәнинлә вәһдәтдә олдуғум кими, гој онлар да бизимлә вәһдәтдә олсунлар... Мән Сәнин адыны онлара ачдым вә јенә ачаҹағам ки, мәнә дујдуғун мәһәббәт онларда да олсун вә мән онларла вәһдәтдә олум» (Јәһ. 17:20, 21, 26).
19. Сиз нә етмәјә гәти гәрарлысыныз?
19 Ола биләр ки, гејри-камиллик уҹбатындан мүәјјән дәјишикликләр етмәк бизә чәтин ҝәлир. Белә олан һалда мәһәббәт бизи мәзмурчу кими дуа етмәјә тәшвиг етмәлидир: «Гәлбими сәмими ет, гој Сәнин исминдән горхум» (Мәз. 86:11). Ҝәлин Иблисин бизи севән Атамыздан вә Онун бәјәндији инсанлардан ајырмаг ҹәһдләринә мүгавимәт ҝөстәрмәјә гәти гәрарлы олаг. Сәјлә чалышараг аиләдә, хидмәтдә вә јығынҹагда «Аллаһын севимли өвладлары олдуғунуз үчүн Она бәнзәмәјә [чалышаг] вә мәһәббәт јолунда [јеријәк]» (Ефес. 5:1, 2).
[29–ҹу сәһифәдәки шәкил]
О, бәхшишини гурбанҝаһын гаршысында гојуб гардашы илә барышмаға ҝедир
[31–ҹи сәһифәдәки шәкил]
Валидејнләр, ушагларыныза башгаларына һөрмәт етмәји өјрәдин