Иса Мәсиһ тәвазөкарлыг нүмунәси гојду
«Мән сизин үчүн нүмунә гојдум. Сизинлә неҹә даврандымса, сиз дә бир-биринизлә елә давранын» (ЈӘҺ. 13:15).
НЕҸӘ ҸАВАБ ВЕРӘРДИНИЗ?
Јер үзүнә ҝәлмәздән өнҹә Аллаһын Оғлу тәвазөкар олдуғуну неҹә ҝөстәрди?
Јер үзүндә јашајаркән Иса тәвазөкар олдуғуну неҹә ҝөстәрди?
Исанын тәвазөкарлығы бизә һансы фајдалары ҝәтирәҹәк?
1, 2. Јерүзү һәјатынын сон ҝеҹәсиндә Иса һәвариләринә һансы әјани ибрәт дәрсини верди?
ИСАНЫН јерүзү һәјатынын сон ҝеҹәсидир. О, бу ахшамы Јерусәлимдә бир евин јухары мәртәбәсиндәки отагда һәвариләри илә бирҝә кечирир. Шам јемәји вахты Иса әбасыны сојунуб кәнара гојур, дәсмал ҝөтүрүб белинә бағлајыр. Бир ләјәнә су төкүр вә шаҝирдләринин ајагларыны јујуб белиндәки дәсмалла гуруламаға башлајыр. Сонра о, әбасыны ҝејинир. Нәјә ҝөрә Иса бу ҹүр тәвазөкарлыг ҝөстәрди? (Јәһ. 13:3—5).
2 О, өзү изаһ етди: «Сизин үчүн нә етдијими баша дүшүрсүнүз?.. Әҝәр мән, Аға вә Мүәллим ола-ола, сизин ајагларынызы јудумса, сиз дә бир-биринизин ајагларыны јумалысыныз. Мән сизин үчүн нүмунә гојдум. Сизинлә неҹә даврандымса, сиз дә бир-биринизлә елә давранын» (Јәһ. 13:12—15). Иса ашағы сәвијјәли иши ҹанла-башла јеринә јетирмәклә һәвариләринин зеһниндә мөһкәм һәкк олунаҹаг вә ҝәләҹәкдә онлары тәвазөкарлыгла давранмаға тәшвиг едәҹәк әјани бир ибрәт дәрси верди.
3. а) Арашдырдығымыз һәр ики һадисәдә Иса тәвазөкарлығын ваҹиблијини неҹә вурғулады? б) Бу мәгаләдә нәји мүзакирә едәҹәјик?
3 Исанын һәвариләринин ајагларыны јумасы тәвазөкарлығын ваҹиблијини ҝөстәрән биринҹи һадисә дејилди. Бундан әввәл баш вермиш бир һадисәдә һәвариләрдән бәзиләри рәгабәт руһу тәзаһүр етдирәркән Иса балаҹа бир ушағы ҝөтүрүб јанына гојараг демишди: «Бу балаҹа ушағы мәним хатиримә гәбул едән мәни дә гәбул едир; мәни гәбул едән исә мәни ҝөндәрәни дә гәбул едир. Аранызда ән тәвазөкар кимдирсә, бөјүк одур» (Лука 9:46—48). Сонралар Иса өзләрини һамыдан үстүн тутан фәрисејләрлә сөһбәт едәркән белә сөзләр демишди: «Өзүнү јүксәлдән алчалдылаҹаг, өзүнү алчалдан исә јүксәлдиләҹәк» (Лука 14:11). Ајдын мәсәләдир ки, о, һәвариләринин тәвазөкар, јәни тәкәббүр вә ловғалыгдан узаг олмаларыны истәјирди. Исаны тәглид етмәк үчүн ҝәлин онун тәвазөкарлыг нүмунәсини арашдыраг. Биз һәмчинин бу хүсусијјәтин тәкҹә ону тәзаһүр етдирән инсана јох, еләҹә дә башгаларына неҹә фајда ҝәтирдијини ҝөрәҹәјик.
«МӘН ГАРШЫ ДУРМАДЫМ, ҜЕРИ ЧӘКИЛМӘДИМ»
4. Иса јер үзүнә ҝәлмәздән өнҹә, неҹә тәвазөкарлыг ҝөстәрирди?
4 Һәтта јер үзүнә ҝәлмәздән өнҹә дә, Аллаһын јеҝанә Оғлу тәвазөкарлыг ҝөстәрирди. Ҝөјдә јашадығы мүддәтдә о, сајсыз-һесабсыз минилликләр әрзиндә сәмави Атасы илә чијин-чијинә чалышырды. Мүгәддәс Јазыларын «Јешаја» китабында Ата илә Оғул арасындакы сых мүнасибәт барәдә белә сөзләр јазылыб: «Јорғунлара сөзлә дајаг олмағы билим дејә Худавәнд Рәбб мәнә савадлыларын дилини верди. О һәр сәһәр гулағымы ојадыр ки, савадлы адамлар кими динләјә билим. Худавәнд Рәбб гулағымы ачды, мән гаршы дурмадым, ҝери чәкилмәдим» (Јешаја 50:4, 5). Иса тәвазөкарлыг ҝөстәрир вә Атасынын өјрәтдикләринә диггәтлә гулаг асырды. О, сидг-үрәкдән һәгиги Аллаһдан өјрәнмәјә һазыр иди. Ҝөрүнүр, Иса Јеһованын ҝүнаһлы бәшәријјәтә һәлимликлә мәрһәмәт ҝөстәрдијини диггәтлә мүшаһидә едирди.
5. Иса Шејтанла мүбаһисә едәндә һәлимлик вә тәвазөкарлыгла бағлы неҹә нүмунә гојду?
5 Ҝөјдәки бүтүн варлыглар Иса кими тәвазөкар давранмадылар. Сонрадан Шејтан Иблис олан бир мәләк Јеһовадан өјрәнмәк әвәзинә, тәвазөкарлыг хүсусијјәтинә зидд ҝедәрәк мәғрур вә тәкәббүрлү олду, еләҹә дә Јеһоваја гаршы үсјан галдырды. Амма Иса нә мөвгејиндән наразы иди, нә дә сәлаһијјәтиндән худбин мәгсәдләр үчүн истифадә етмәјә мејилли. Һәтта Баш мәләк Микајыл кими, «Мусанын ҹәсәди үчүн Иблислә мүбаһисә едәндә» Иса сәлаһијјәтиндән суи-истифадә етмәди. Әксинә, Аллаһын Оғлу һәлимлик вә тәвазөкарлыг ҝөстәрди. О, Каинатын Али Һакими Јеһованын мәсәләни өз вахтында вә лазыми тәрздә һәлл едәҹәјини ҝөзләмәкдән мәмнунлуг дујурду. (Јәһуда 9 ајәсини оху.)
6. Мәсиһ кими хидмәт етмәк тәјинатыны гәбул етмәклә Иса тәвазөкар олдуғуну неҹә ҝөстәрди?
6 Шүбһәсиз ки, Иса јер үзүнә ҝәлмәздән өнҹә, Мәсиһ кими фәалијјәтилә бағлы бүтүн пејғәмбәрликләрин тәфсилатларындан хәбәрдар иди. Буна ҝөрә дә ону хошаҝәлмәз вәзијјәтләрин ҝөзләдијини чох еһтимал ки, Иса әввәлҹәдән билирди. Анҹаг Иса јер үзүндә јашамаг вә вәд олунмуш Мәсиһ кими өлмәк тәјинатыны гәбул етди. Аллаһын јеҝанә Оғлунун тәвазөкарлыг хүсусијјәтини вурғулајараг һәвари Павел јазмышды: «О, Аллаһын симасында олса да, Онун мөвгејинә ҝөз дикмәји, јәни Аллаһа бәрабәр олмағы фикринә белә ҝәтирмәди. Әксинә, о өзүнү һәр шејдән мәһрум етди вә гул сурәтини гәбул едиб инсан олду» (Филип. 2:6, 7).
ЈЕР ҮЗҮНӘ ҜӘЛМӘКЛӘ О, «ӨЗҮНҮ АЛЧАЛТДЫ»
7, 8. Иса ушаг оланда вә хидмәти заманы тәвазөкар олдуғуну неҹә ҝөстәрди?
7 Павел јазыр: «О, [Иса] инсан кими мөвҹуд оланда өзүнү алчалтды вә өлүмәдәк — ишҝәнҹә дирәји үзәриндә өләнәдәк итаәткар галды» (Филип. 2:8). Иса ушаг јашларындан бизим үчүн тәвазөкарлыг нүмунәси гојуб. Валидејнләринин — Јусифлә Мәрјәмин гејри-камил олмаларына бахмајараг, онларын сөзүндән чыхмамагла тәвазөкарлыг ҝөстәрирди (Лука 2:51). Бу, ҝәнҹләр үчүн ҝөзәл нүмунәдир. Валидејнләринә ҹанла-башла итаәт етдикләринә ҝөрә Јеһова онлары хејир-дуаландыраҹаг!
8 Бөјүјәндән сонра да Иса Јеһованын ирадәсини өзүнкүндән үстүн тутараг тәвазөкарлыг ҝөстәрирди (Јәһ. 4:34). Хидмәт етдији илләрдә Иса Мәсиһ Аллаһын шәхси адындан истифадә едир, сәмими инсанлара Јеһованын хүсусијјәтләри вә бәшәријјәтә даир вәдләри барәдә дәгиг билик әлдә етмәләринә көмәк едирди. О һәмчинин өјрәтдикләринә ујғун јашајырды. Мисал үчүн, нүмунәви дуасында Иса, илк нөвбәдә, Аллаһын адыны хатырлатмышды: «Сәмави Атамыз, гој адын мүгәддәс тутулсун» (Мат. 6:9). Бунунла Иса шаҝирдләринә ҝөстәрди ки, онларын ән ваҹиб мәгсәди Аллаһын адыны иззәтләндирмәк олмалыдыр. Елә онун өзүнүн дә ән үмдә мәгсәди бу иди. Јер үзү хидмәтинин сонунда Иса Јеһоваја дуасында белә дејә билмишди: «Сәнин адыны онлара ачдым вә јенә ачаҹағам» (Јәһ. 17:26). Үстәлик, о, хидмәти бојунҹа она һәвалә олунан ишләри јеринә јетирәркән Јеһоваја архаланырды (Јәһ. 5:19).
9. Зәкәријјә Мәсиһ һаггында нәји пејғәмбәрлик етмишди вә бу пејғәмбәрлик Исанын үзәриндә неҹә јеринә јетди?
9 Зәкәријјә Мәсиһлә бағлы нөвбәти пејғәмбәрлик сөзләрини демишди: «Еј Сион гызы, бөјүк севинҹлә ҹош, еј Јерусәлим гызы, һајгыр! Бах падшаһын сәнә тәрәф ҝәлир. О, әдаләтли вә хиласкардыр. О, итаәкардыр вә бир ешшәјә — ешшәјин баласы олан сыпаја миниб ҝәлир» (Зәк. 9:9). Ерамызын 33-ҹү илинин Пасха бајрамы әрәфәсиндә Иса Јерусәлимә дахил оларкән бу пејғәмбәрлик јеринә јетди. Ҹамаат өз әбаларыны јерә сәрир, һәмчинин ағаҹ будагларыны кәсиб јола дүзүрдүләр. Бүтүн шәһәр севинҹдән һарај салырды. Халг Исаны падшаһа лајиг тәрздә алгышласа да, о, тәвазөкар галмаға давам едирди (Мат. 21:4—11).
10. Сон нәфәсинәдәк Аллаһа ҹанла-башла итаәт етмәклә Иса нәји сүбут етди?
10 Иса Мәсиһин јер үзүндә тәвазөкарлыг вә итаәткарлыг ҝөстәрмәсинин ән зирвә нөгтәси ишҝәнҹә дирәјиндә өлмәси иди. Бунунла о сүбут етди ки, инсан ән ағыр сынагларла үзләшәндә белә, Аллаһа садиг гала биләр. О һәмчинин инсанын Јеһоваја худбин мәгсәдләрдән ирәли ҝәләрәк хидмәт етдијини иддиа едән Шејтанын јаланыны үзә чыхартды (Әјј. 1:9—11; 2:4). Мәсиһ мүкәммәл нөгсансызлыг ҝөстәрмәклә Јеһованын Али һөкмранлығынын ганунилијини вә әдаләтлилијини дәстәкләдијини ҝөстәрди. Сөзсүз ки, тәвазөкар Оғлунун сарсылмаз садиглијини ҝөрмәк Јеһованы чох севиндирирди. (Сүлејманын мәсәлләри 27:11 ајәсини оху.)
11. Иса Мәсиһин фидјә гурбанлығы итаәткар бәшәријјәт үчүн һансы имканы ачды?
11 Ишҝәнҹә дирәјиндә өлмәклә Иса бәшәријјәт үчүн өз ҹаныны фидјә олараг гурбан верди (Мат. 20:28). Фидјә сајәсиндә ҝүнаһлы бәшәријјәт үчүн салеһлијин һөкм сүрәҹәји јени дүнјада әбәди јашамаг имканы ачылды вә бу, әдаләт тәләбләринә ујғун олараг һәјата кечирилди. Павел јазмышды: «Бир салеһ әмәлин нәтиҹәсиндә һәр ҹүр инсан јашамаг үчүн салеһ елан едилир» (Ром. 5:18). Исанын өлүмү мәсһ олунмуш мәсиһчиләрә ҝөјләрдә өлмәз һәјат чәләнҝини алмаға, башга гојунлара исә јер үзүндә әбәдијјән јашамаға фүрсәт јаратды (Јәһ. 10:16; Ром. 8:16, 17).
МӘН «ГӘЛБӘН ТӘВАЗӨКАРАМ»
12. Иса гејри-камил бәшәријјәтлә давранышында тәвазөкарлығы вә һәлимлији неҹә тәзаһүр етдирирди?
12 Иса бүтүн зәһмәткешләри вә јүкү ағыр оланлары јанына ҝәлмәјә дәвәт едирди. О демишди: «Бојундуруғуму үзәринизә ҝөтүрүн вә мәнә бахыб өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мат. 11:28, 29). Тәвазөкарлыг вә һәлимлик һисси Исаны гејри-камил бәшәријјәтә хејирхаһ вә гәрәзсиз јанашмаға тәшвиг едирди. О, шаҝирдләринә гаршы һәддән артыг тәләбкар дејилди, онлары тәрифләјир вә руһландырырды. Иса онлары өзләрини габилијјәтсиз вә ја лазымсыз олдугларыны дүшүнмәјә вадар етмирди. О, онларла кобуд вә ја залымҹасына давранмырды. Әксинә, онлары әмин едирди ки, она јахынлашсалар вә тәлимләринә риајәт етсәләр, тәравәт дујаҹаглар, чүнки онун бојундуруғу асан вә јүкү јүнҝүлдүр. Јашындан, еләҹә дә киши вә ја гадын олмасындан асылы олмајараг, онлар өзләрини Исанын јанында раһат һисс едирдиләр (Мат. 11:30).
13. Иса садә халга јазығы ҝәлдијини неҹә ҝөстәрди?
13 Садә инсанлар сыхышдырылдыглары үчүн Исанын онлара јазығы ҝәлирди вә о, онлара көмәк етмәк үчүн әлиндән ҝәләни едирди. Јерихо шәһәри јахынлығында Иса ики кор диләнчи илә гаршылашды. Онлардан биринин ады Бартимеј иди, диҝәринин ады исә мәлум дејил. Онлар исрарла Исанын онлара көмәк етмәсини истәјирдиләр, анҹаг издиһам тәпинәрәк онлары сусдурмаға чалышырды. Бу диләнчиләри ҝөрмәмәзликдән ҝәлмәк неҹә дә асан оларды! Амма Иса онлары јанына чағырды вә онлара јазығы ҝәлдији үчүн ҝөзләрини ачды. Бәли, о, ҝүнаһлы бәшәријјәтә гаршы тәвазөкарлыг вә мәрһәмәт тәзаһүр етдирмәклә Атасы Јеһованы тәглид етди (Мат. 20:29—34; Марк 10:46—52).
ӨЗҮНҮ АЛЧАЛДАН ЈҮКСӘЛДИЛӘҸӘК
14. Исанын тәвазөкарлығы бизә һансы фајдалары ҝәтирәҹәк?
14 Иса Мәсиһин ҝөстәрдији тәвазөкарлыг бир чохларына бөјүк фајда вә севинҹ ҝәтирир. Севимли Оғлунун Она мәгбул итаәткарлыг ҝөстәрмәси Јеһованы севиндирирди. Исанын һәлим вә гәлбән тәвазөкар олмасы һәвариләринә вә шаҝирдләринә тәравәт ҝәтирирди. Онун нүмунәси, тәлимләри вә сәмими тәрифләри онларын руһани ҹәһәтдән инкишаф етмәләринә стимул верирди. Исанын тәвазөкарлығы садә инсанлара фајда ҝәтирирди, чүнки онлар онун көмәјини, тәлимләрини вә руһландырыҹы сөзләрини гәбул едирдиләр. Һәгигәтән дә, сатын алынмыш бүтүн бәшәријјәт Исанын фидјә гурбанлығындан әбәди хејир-дуалар бичәҹәк.
15. Исанын тәвазөкарлығы она һансы фајданы ҝәтирмишди?
15 Бәс Иса пејғәмбәр барәдә нә демәк олар? Тәвазөкарлыг онун өзүнә фајда ҝәтирмишдими? Әлбәттә, ҝәтирмишди. Чүнки о, шаҝирдләринә демишди: «Өзүнү алчалдан исә јүксәлдиләҹәк» (Мат. 23:12). Онун нүмунәси бу сөзләрин һәгигилијини сүбут едир. Павел изаһ едир: «Аллаһ ону даһа јүксәк мөвгејә уҹалтды вә она бүтүн адлардан үстүн бир ад бәхш етди ки, ҝөјдә, јердә вә јерин алтында оланларын һамысы Исанын ады гаршысында диз чөксүн, һәр ағыз Иса Мәсиһи Аға кими танысын вә Атамыз Аллаһа тәриф уҹалтсын». Исанын јер үзүндә јашадығы мүддәтдә ҝөстәрдији тәвазөкарлыг вә садиглик сајәсиндә Јеһова Аллаһ Оғлуну уҹалдараг ҝөјдә вә јердә јарадылан һәр шеј үзәриндә она һакимијјәт верди (Филип. 2:9—11).
ИСА ҺӘГИГӘТ ВӘ ТӘВАЗӨКАРЛЫГ НАМИНӘ АТЫНА МИНДИ
16. Аллаһын Оғлунун ҝәләҹәкдә дә тәвазөкарлыг тәзаһүр етдирәҹәјини нә ҝөстәрир?
16 Аллаһын Оғлу Иса ҝәләҹәкдә дә тәвазөкарлыг тәзаһүр етдирәҹәк. Мәзмурчу Исанын ҝөјдән дүшмәнләри илә неҹә вурушаҹағы барәдә пејғәмбәрлик едәрәк охујурду: «Һәгигәт, тәвазөкарлыг, салеһлик наминә атына мин» (Мәз. 45:4, Јени Дүнја тәрҹүмәси). Иса Мәсиһ Һар-Маҝедонда тәвазөкар, салеһ олан, еләҹә дә һәгигәти севән инсанлар уғрунда ат белиндә дөјүшәҹәк. Миниллик Һөкмранлығын сонунда, Падшаһ Мәсиһ «һакимијјәтләри вә игтидары» јох едәндән сонра нә баш верәҹәк? О, тәвазөкарлыг ҝөстәрәҹәк? Иса «падшаһлығы өз Атасы Аллаһа тәһвил верәҹәк». (1 Коринфлиләрә 15:24—28 ајәләрини оху.)
17, 18. а) Јеһованын хидмәтчиләринин Исанын тәвазөкарлыг нүмунәсини тәглид етмәләри нәјә ҝөрә ваҹибдир? б) Нөвбәти мәгаләдә нәји мүзакирә едәҹәјик?
17 Бәс бизим барәмиздә нә демәк олар? Исаны тәглид едәрәк тәвазөкарлыг тәзаһүр етдирәҹәјикми? Падшаһ Иса Мәсиһ Һар-Маҝедонда һөкм вермәк үчүн зүһур едәндә бизим агибәтимиз неҹә олаҹаг? Исанын ат белинә чыхмагда мәгсәди јалныз тәвазөкар вә итаәткар инсанлары хилас етмәкдир. Буна ҝөрә дә тәвазөкарлыг инкишаф етдирмәк хиласымыз үчүн олдугҹа ваҹибдир. Үстәлик, Иса кими, бизим дә тәвазөкарлыг тәзаһүр етдирмәјимиз һәм өзүмүзә, һәм дә башгаларына фајда ҝәтирәҹәк.
18 Исанын тәвазөкарлыг нүмунәсини тәглид етмәкдә бизә нә көмәк едәҹәк? Чәтин олса да, тәвазөкарлыг ҝөстәрмәк үчүн нә едә биләрик? Биз бу суаллары нөвбәти мәгаләдә мүзакирә едәҹәјик.
[12–ҹи сәһифәдәки шәкилләр]
Исанын тәвазөкарлыг нүмунәсиндән нә өјрәнә биләрик?
[13–ҹү сәһифәдәки шәкил]
Иса шәфгәт ҝөстәрмәјә даир нүмунә иди