Јеһованын Кәламы ҹанлыдыр
«Галатијалылара», «Ефеслиләрә», «Филипилиләрә» вә «Колослулара» мәктублардан диггәтәлајиг фикирләр
ИУДАИЗМ тәрәфдарларынын бәзи мәсиһчиләри тәмиз ибадәтдән дөндәрмәсини ешидән Павел «Галатијанын иманлы ҹәмијјәтләринә» тәсирли мәктуб јазыр (Галат. 1:2). Ерамызын 50-52-ҹи илләри арасында јазылан бу мәктубда ачыг мәсләһәт вә ҹидди нәсиһәт верилир.
Тәхминән он ил сонра «Мәсиһ Исанын мәһбусу» кими Ромада олан Павел Ефес, Филипи вә Колосдакы јығынҹаглара мәктуб јазыб ағыллы мәсләһәт верир вә онлары мәһәббәтлә руһландырыр (Ефес. 3:1). Мүгәддәс Јазыларын «Галатијалылара», «Ефеслиләрә», «Филипилиләрә» вә «Колослулара» китабларындакы сөзләрә диггәт јетирмәјин бу ҝүн бизә дә фајдасы ола биләр (Ибр. 4:12).
НӘЈИН ӘСАСЫНДА ‘САЛЕҺ САЈЫЛЫРЛАР’?
Иудаизмин тәрәфдарлары һијләҝәрликлә Павели нүфуздан салмаға чалышдыглары үчүн о, тәрҹүмеји-һалынын мүәјјән тәфәррүатларыны ҝәтирәрәк өз һәварилијини мүдафиә едир (Галат. 1:11–2:14). Онларын јалан тәлимләри илә мүбаризә апарараг, Павел гејд едир: «Инсан Мүгәддәс Гануна риајәт етмәклә јох, јалныз Иса Мәсиһә иман васитәсилә салеһ сајылыр» (Галат. 2:16).
Павел дејир ки, Мәсиһ мәсиһчи азадлығындан һәзз алмалары үчүн ‘Ганун алтында оланлары азад етди’. Павел ҹидди сурәтдә Галатијалылара нәсиһәт верир: «Мөһкәм дурун вә јенидән әсарәтин бојундуруғуну тахмајын» (Галат. 4:4, 5; 5:1).
Мүгәддәс Китаб суалларына ҹаваблар:
3:16-18, 28, 29 — Ибраһимлә бағланан әһд һәлә дә гүввәдәдирми? Бәли. Ганун әһди Аллаһын Ибраһимлә бағладығы әһди әвәз етмирди, она әлавә иди. Буна ҝөрә дә, Ибраһимлә бағланан әһд Ганун ‘ләғв едилдикдән’ сонра да гүввәдә галды (Ефес. 2:15). Онун вәдләри Ибраһимин һәгиги ‘нәслинин’ әсас һиссәси олан Мәсиһ Исаја вә ‘Мәсиһинкиләрә’ өтүрүлүр.
6:2 — ‘Мәсиһин Гануну’ нәдир? Бу Ганун Мәсиһин бүтүн әмрләринин вә тәлимләринин мәҹмусудур. Бу Гануна хүсусилә дә ‘бир-биримизи севмәк’ әмри дахилдир (Јәһ. 13:34).
6:8 — Биз ‘Руһ үчүн’ неҹә әкирик? Буну Аллаһын руһунун бизә сәрбәст тәсир етмәсинә јол верән һәјат тәрзи сүрмәклә едирик. Руһ үчүн әкмәк руһун верилмәсинә шәраит јарадан ишләрдә үрәкдән иштирак етмәји өзүнә дахил едир.
Бизим үчүн ибрәт дәрсләри:
1:6-9. Јығынҹагда проблем баш галдыранда мәсиһчи ағсаггаллар ләнҝимәдән һәрәкәтә кечмәлидирләр. Онлар Мүгәддәс Јазылардан истифадә етмәклә јанашы сағлам мүһакимә јүрүтмәклә јанлыш фикирләри дәрһал рәдд едә биләрләр.
2:20. Фидијә Аллаһын шәхсән бизә вердији һәдијјәдир. Биз ону белә гәбул етмәлијик (Јәһ. 3:16).
5:7-9. Пис достлуг ‘һәгигәтә итаәт етмәмизә’ мане ола биләр. Ондан гачмаг мүдрик давранышдыр.
6:1, 2, 5. «Руһаниләр» бизә јүкүмүзү дашымаға, мәсәлән, билмәдән сәһв аддым атмағын нәтиҹәсиндә дүшдүјүмүз чәтин вәзијјәтин вә ја нараһатчылығын өһдәсиндән ҝәлмәјә көмәк едә биләрләр. Руһани мәсулијјәтләримизин јүкүнә ҝәлдикдә исә, бу јүкү өзүмүз дашымалыјыг.
‘ҺӘР ШЕЈИН МӘСИҺИН БАШЧЫЛЫҒЫ АЛТЫНДА БИРЛӘШДИРИЛМӘСИ’
Ефеслиләрә мәктубунда мәсиһчи бирлијини вурғулајараг, Павел ‘вахт тамам олдугда һәм ҝөјләрдә, һәм дә јердә олан һәр шејин Мәсиһин башчылығы алтында бирләшдирилмәсиндән’ данышыр. Мәсиһ һамынын ‘иманда бирлијә чатмасы’ үчүн «инсанлар тимсалында һәдијјәләр» (ЈД) вермишдир (Ефес. 1:10; 4:8, 13).
Аллаһы иззәтләндирмәк вә бирлији горумаг үчүн мәсиһчиләр ‘јени мәнлији ҝејинмәли’ вә ‘Мәсиһ горхусу илә бир-бирләринә табе олмалыдырлар’. Онлара һәм дә бүтүн руһани зиреһләри ҝејинәрәк ‘Иблисин һијләләринә гаршы дурмаг’ лазымдыр (Ефес. 4:24; 5:21, И–93; 6:11).
Мүгәддәс Китаб суалларына ҹаваблар:
1:4-7 — Мәсһ олунмуш мәсиһчиләр һансы мәнада доғулмаздан чох әввәл тәјин олунмушлар? Онлар ајры-ајры шәхсләр кими јох, бир груп вә ја синиф кими тәјин олунмушлар. Бу, ҝүнаһлы бәшәријјәт мөвҹуд олмаздан әввәл баш вермишдир. Һәвванын илк ҝүнаһлы инсана һамилә галмасындан әввәл дејилән Јарадылыш 3:15 ајәсиндәки пејғәмбәрлијә Аллаһын Мәсиһлә бирликдә бәзи давамчыларынын ҝөјдә идарә етмәсинә даир нијјәти дә дахилдир (Галат. 3:16, 29).
2:2 — Дүнјанын руһу һансы мәнада һава кимидир вә онун һакимијјәти һарададыр? ‘Дүнјанын руһу’ — мүстәгиллик вә итаәтсизлик руһу — нәфәс алдығымыз һава кими һәр јандадыр (1 Кор. 2:12). Онун һакимијјәти, јәни ҝүҹү инандырыҹы, даими вә арамсыз олмасындадыр.
2:6 — Мәсһ олунмуш мәсиһчиләр һәлә јердә икән неҹә «сәмави аләмдә» ола биләрләр? Бурадакы ‘сәмави аләм’ ифадәси онларын вәд олунмуш сәмави мирасларына аид дејил. Әксинә, бу онларын ‘вәд олунмуш Мүгәддәс Руһ илә мөһүрләнмәләри’ нәтиҹәсиндә малик олдуглары јүксәк руһани мөвгеләридир (Ефес. 1:13, 14).
Бизим үчүн ибрәт дәрсләри:
4:8, (ЈД), 11-15. Иса Мәсиһ ‘бир орду әсири Өзү илә апарды’, јәни онлары Шејтанын нәзарәтиндән ҝөтүрдү ки, мәсиһчи јығынҹағынын инкишафы үчүн һәдијјә кими истифадә етсин. Биз үзәримиздә рәһбәрлик едәнләрә итаәт едиб, табе олмагла вә јығынҹағын ишләриндә онларла әмәкдашлыг етмәклә ‘мәһәббәтлә Мәсиһә доғру һәр ҹәһәтдән бој ата’ биләрик (Ибр. 13:7, 17).
5:22-24, 33. Гадын әринә табе олмагла јанашы, она һөрмәт дә етмәлидир. О буну, әри һаггында јахшы данышараг вә гәрарларынын уғурла һәјата кечмәси үчүн әлиндән ҝәләни едәрәк, ‘һәлим вә сакит руһ’ ҝөстәрмәклә вә она еһтирам етмәклә едир (1 Пет. 3:3, 4; Тит. 2:3-5).
5:25, 28, 29. Әр өзүнү ‘једирдији’ кими, арвадыны да физики, емосионал вә руһани ҹәһәтдән јахшы тәмин етмәлидир. О, һәмчинин арвадына кифајәт гәдәр вахт ајырмагла, сөзүндә вә һәрәкәтиндә нәвазишлә давранмагла ону бәсләмәлидир.
6:10-13. Шәр гүввәләрлә мүбаризә апармаг үчүн бизә сидг-үрәкдән Аллаһын бүтүн руһани зиреһләрини ҝејинмәк лазымдыр.
‘О ӘЈАРА ҜӨРӘ ҺӘРӘКӘТ ЕДӘК’
Павелин филипилиләрә мәктубунда мәһәббәт вурғуланыр. О дејир: «Дуа едирәм ки, мәһәббәтиниз билик вә һәр ҹүр идрак бахымындан ҝетдикҹә даһа чох артсын». Онлара өзүнәархајынлыг тәләсиндән гачмаға көмәк едәрәк о нәсиһәт верир: «Өз хиласынызы баша чатдырмаг үчүн горху вә ләрзә илә һәрәкәт един» (Филип. 1:9; 2:12).
Павел јеткин мәсиһчиләри ‘Аллаһын јүксәк дәвәтинә дахил олан мүкафат үчүн һәдәфә доғру гачмаға’ тәшвиг едир. О дејир: «Һансы сәвијјәјә чатдыгса, о әјара ҝөрә дә һәрәкәт едәк» (Филип. 3:14-16).
Мүгәддәс Китаб суалларына ҹаваблар:
1:23 — Павели ‘ики тәрәфдән сыхышдыран’ нә иди вә о, нәјин һәсрәтиндә иди? Үзләшдији шәраитләрә ҝөрә, о, гаршысында ачылан ики имкан: һәјат вә өлүм тәрәфиндән сыхышдырылырды (Филип. 1:21). Һансы сечими етдијини демәмиш, Павел «ајрылмаг вә Мәсиһ илә олмаг» һәсрәтиндә олдуғуну бәјан едир (Филип. 3:20, 21; 1 Салон. 4:16). Онун бу арзусу Јеһованын онун үчүн һазырладығы мүкафаты Мәсиһин «иштиракы» (ЈД) заманы гәбул едәндә јеринә јетди (Мат. 24:3).
2:12, 13 — ‘Һәм истәмәмизә, һәм дә иҹра етмәмизә’ Аллаһ неҹә сәбәб олур? Јеһованын мүгәддәс руһу хидмәтдә әлимиздән ҝәләни етмәк арзусуну артырмаг үчүн үрәјимизә вә ағлымыза тәсир едә биләр. Демәли, ‘өз хиласымызы баша чатдыраркән’ биз көмәксиз дејилик.
Бизим үчүн ибрәт дәрсләри:
2:5-11. Исанын нүмунәсиндән ҝөрүндүјү кими, тәвазөкарлыг зәифлијин јох, мәнәви ҝүҹүн әламәтидир. Бундан башга, Јеһова тәвазөкарлары уҹалдыр (Сүл. мәс. 22:4).
3:13. ‘Архада галан шеј’ ҝәлирли иш, варлы аиләдән олмағын ачдығы имканлар вә ја төвбә едиб ‘тәмизләндијимиз’ кечмиш ҹидди ҝүнаһларымыз кими шејләр ола биләр (1 Кор. 6:11). Биз бүтүн бунлары унутмалы, јәни онларла бағлы нараһатчылыгдан азад олмалы вә ‘гаршыда олана чатмаға ҹан атмалыјыг’.
4:14-16. Мадди ҹәһәтдән корлуг чәксәләр дә, филипилиләр сәхавәт ҝөстәрмәкдә бизә ҝөзәл нүмунә гојмушлар (2 Кор. 8:1-6).
‘ИМАНДА МӨҺКӘМЛӘНИН’
Колослулара мәктубунда Павел јаланчы мүәллимләрин јанлыш бахышларыны ифша едир. О, мүлаһизә јүрүдәрәк билдирир ки, хилас Ганунун тәләбләриндән јох, ‘иманда мөһкәм вә сабит дурмагдан’ асылыдыр. Павел колослулары ‘Мәсиһ Исанын јолунда јеримәјә, Онда көк салыб, инкишаф етмәјә вә иманда мөһкәмләнмәјә’ тәшвиг едир. Бу онлара неҹә тәсир етмәлидир? (Колос. 1:23; 2:6, 7).
Павел јазыр: «Бүтүн бунларла јанашы, камил бирлијин бағы олан мәһәббәти ҝејин. Мәсиһин сүлһү гој үрәкләриниздә һаким олсун». Һәвари онлара дејир: «Һәр нә етсәниз, инсанлар үчүн јох, Рәбб үчүн едир кими, ҹанла-башла един». О, јығынҹағын хариҹиндәкиләрлә ‘һикмәтли давранмағы’ тапшырыр (Колос. 3:14, 15, 23; 4:5).
Мүгәддәс Китаб суалларына ҹаваблар:
2:8 — Павелин чәкиндирдији ‘дүнјанын ибтидаи гүввәтләри’ нәдир? Бунлар Шејтан дүнјасынын елементләридир, јәни ону тәшкил едән, рәһбәрлик едән, башга сөзлә, һәрәкәтә ҝәтирән әсас шејләр вә ја принсипләрдир (1 Јәһ. 2:16). Фәлсәфи фикирләр, вар-дөвләтә һәрислик вә бу дүнјанын јалан динләри онларын сырасына дахилдир.
4:16 — Нәјә ҝөрә Лаодикијалылара јазылан мәктуб Мүгәддәс Китаба дахил дејил? Ола биләр, һәмин мәктубда бу ҝүн бизим үчүн ваҹиб олан мәлумат јох иди. Јахуд диҝәр каноник мәктублардакы фикирләр орада тәкрар олунурду.
Бизим үчүн ибрәт дәрсләри:
1:2, 20. Аллаһын Өз лүтфүндән ирәли ҝәләрәк тәгдим етдији фидијә виҹданымызы ҝүнаһдан тәмизләјә вә бизә дахили сүлһ верә биләр.
2:18, 23. «Мүтилик» — башгаларында тәәссүрат ојатмаг үчүн мадди шејләри рәдд етмәклә вә ја бәдәнә әзијјәт вермәклә ҝөстәрилән ријакар һәлимлик — инсанын ‘ҹисмани ағлы илә ловғаландығыны’ ҝөсрәрир.