«Өзүнүзү имтаһан един»
«Өзүнүзү јохлајын, ҝөрүн иман јолундасынызмы? Өзүнүзү имтаһан един» (2 КОРИНФЛИЛӘРӘ 13:5).
1, 2. а) Е’тигадымызын доғру олуб-олмадығына даир јаранан шүбһә бизә неҹә тә’сир ҝөстәрә биләр? б) I әсрин Коринф јығынҹағында јаранан һансы вәзијјәт бә’зиләриндә сечдикләри јолун доғру олуб-олмадығына даир шүбһә ојада биләрди?
БИР НӘФӘР јол илә ҝедәркән јолајрыҹына јахынлашыр. Һара дөнәҹәјини билмәдији үчүн јолдан кечән бир нәфәрдән сорушур. Лакин онун анлашылмаз ҹавабы һәмин адамы даһа да чашдырыр. Чашгынлыг ичиндә олдуғундан өз јолуна давам едә билмир. Ејнилә е’тигадымызын дүз олуб-олмадығына даир шүбһәләр дә бизә белә тә’сир ҝөстәрә биләр. Мүтәрәддидлик бизим гәрар гәбул етмәк баҹарығымыза тә’сир едә вә һансы јолла ҝетмәли олдуғумуза даир шүбһә ојада биләр.
2 Јунаныстандакы I әсрин Коринф јығынҹағында бә’зи мәсиһчиләрә ејни тәрздә тә’сир едә биләҹәк бир вәзијјәт јаранмышды. «Фөвгәлһәвариләр» һәвари Павелин нүфузуну шүбһә алтына гојараг дејирдиләр: «Мәктубларында о ҹидди вә гүввәтли, шәхси ҝөркәми исә тә’сирсиз, нитги исә әһәмијјәтсиздир» (2 Коринфлиләрә 10:7-12; 11:5, 6). Бу ҹүр нөгтеји-нәзәрә ҝөрә, Коринф јығынҹағынын бә’зи үзвләриндә сечдикләри јолун доғру олуб-олмадығына даир шүбһә јарана биләрди.
3, 4. Павелин коринфлиләрә вердији мәсләһәт нәјә ҝөрә биздә дә мараг ојадыр?
3 Павел Коринф јығынҹағыны ерамызын 50-ҹи илиндә ораја ҝәлдији заман тәшкил етмишди. О, «Аллаһын кәламыны өјрәдәрәк, бир ил алты ај» Коринфдә јашады. О заман «коринфлиләрдән бир чоху... иман едиб вәфтиз олдулар» (Һәвариләрин ишләри 18:5-11). Павел Коринфдә јашајан баҹы-гардашларынын руһани рифаһы үчүн чох гајғы ҝөстәрирди. Бундан әлавә, коринфлиләр мүәјјән мәсәләләрә даир мәсләһәт үчүн она јазырдылар (1 Коринфлиләрә 7:1). Павел дә онлара чох гијмәтли мәсләһәт вермишди.
4 Павел јазырды: «Өзүнүзү јохлајын, ҝөрүн иман јолундасынызмы? Өзүнүзү имтаһан един» (2 Коринфлиләрә 13:5). Бу мәсләһәти тәтбиг етмәклә Коринфдәки гардашлар өзләрини јолларынын доғру олуб-олмадығына даир шүбһәләрдән горуја биләрдиләр. Павелин мәсләһәтинә неҹә әмәл етмәк олар? Иман јолунда олуб-олмадығымызы неҹә јохлаја биләрик? Вә өзүмүзү имтаһан етмәк нә демәкдир?
«Өзүнүзү јохлајын, ҝөрүн иман јолундасынызмы?»
5, 6. Иман јолунда олуб-олмадығымызы јохламагда бизә һансы еталон көмәк едир вә нәјә ҝөрә ону идеал еталон адландырмаг олар?
5 Адәтән кими вә ја нәји исә јохламаг үчүн, ваһид кими, еталон вә ја стандартдан истифадә едирләр. Белә һалда сөһбәт е’тигадымызын дејил, өзүмүзүн — һәр биримизин ајры-ајрылыгда јохланылмасындан ҝедир. Биз камил еталона маликик. Давудун мәзмурунда дејилир: «Рәббин гануну камилдир, ҹаны тәзәләјир, Рәббин өјүдү е’тибарлыдыр, наданы мүдрик едир. Рәббин гајда-ганунлары дүздүр, үрәји севиндирир, Рәббин әмрләри пакдыр, ҝөзләри ајдын едир» (Мәзмур 19:7, 8). Мүгәддәс Китабда Јеһованын камил ганунлары вә е’тибарлы хатырлатмалары, әдаләтли гајда-ганунлары вә тәмиз әмрләри јазылмышдыр. Өзүмүзү јохламаг үчүн, онлар ҝөзәл еталондур.
6 Һәвари Павел Аллаһын илһамланмыш Кәламы һаггында дејир: «Аллаһын кәламы ҹанлы вә тә’сирли, һәр ҹүр икиағызлы гылынҹдан итидир; о, ҹанла руһу, ојнагларла илији бир-бириндән ајыраҹаг гәдәр дәлиб кечир вә үрәјин дүшүнҹә вә нијјәтләрини ајырд едир» (Ибраниләрә 4:12). Аллаһын кәламы үрәјимизи јохлаја вә дахилимиздә оланлары ашкара чыхара биләр. Лакин ити вә бөјүк гүввәјә малик олан Аллаһын Кәламынын бизим үчүн дә ҹанлы олмасы үчүн биз нә едә биләрик? Мәзмурчу бу суалын ҹавабыны чох ајдын верир. О, Јеһованын ‘ганунундан зөвг алан, ҝеҹә-ҝүндүз бу тә’лиматы дәрин дүшүнән’ адамы хошбәхт адландырыр (Мәзмур 1:1, 2). Јеһованын гануну Онун Кәламы олан Мүгәддәс Китабда јазылыб. Биз Јеһованын Кәламыны охумагдан һәзз алмалыјыг. Ону охумаг вә үзәриндә дүшүнмәк үчүн вахт ајырмалыјыг. Аллаһын Кәламы бизи јохласын дејә, орада јазыланларын бизә тә’сир ҝөстәрмәсинә јол вермәлијик.
7. Иман јолунда олуб-олмадығымызы јохламағын әсас үсулу һансыдыр?
7 Иман јолунда олуб-олмадығымызы јохламағын әсас үсулу — Аллаһын Кәламыны охумаг вә охудугларымызын үзәриндә дүшүнмәк, һәмчинин давранышымызын өјрәндикләримизә мүвафиг олуб-олмадығыны јохламагдыр. Аллаһын Кәламыны баша дүшмәкдә көмәјимиз олдуғу үчүн севинә биләрик.
8. «Садиг вә ағыллы гул» тәрәфиндән һазырланан нәшрләр иман јолунда олуб-олмадығымызы јохламагда бизә неҹә көмәк едә биләр?
8 Јеһова «садиг вә ағыллы гул» тәрәфиндән һазырланан нәшрләр васитәсилә бизә тә’лим вә нәсиһәт верир. Бу нәшрләрдә Мүгәддәс Јазылар изаһ едилир (Матта 24:45). Мисал үчүн, «Јеһоваја јахынлаш»a китабында олан фәсилләрин чохунун ахырында «Дүшүнмәк үчүн суаллар» адлы чәрчивәни ҝөтүрәк. Бу суаллар дүшүнмәк үчүн чох ҝөзәл имкан јарадыр. «Ҝөзәтчи Гүлләси» вә «Ојанын!» журналларында мүзакирә олунан мүхтәлиф мөвзулар да иман јолунда олуб-олмадығымызы јохламагда бизә көмәк едир. Бу јахынларда «Ҝөзәтчи Гүлләси»ндә олан мәгаләләрдә «Сүлејманын мәсәлләри» китабы мүзакирә олунурду. Һәмин мәгаләләри охујан бир баҹымыз дејир: «Онлар чох фајдалы мәгаләләрдир. Нитгимин, давранышымын вә дүшүнҹә тәрзимин Јеһованын әдаләтли нормаларына мүвафиг олуб-олмадығыны јохламаға көмәк едир».
9, 10. Иман јолунда олуб-олмадығымызы јохламаг үчүн Јеһова бизә һансы көмәји тәгдим едир?
9 Биз һәмчинин јығынҹаг ҝөрүшләриндә вә конгресләрдә дә бол-бол рәһбәрлик алыр вә руһланырыг. Аллаһ бүтүн бунлары Јешајанын һагларында пејғәмбәрлик етдији кәсләрә верир. Јешаја јазыр: «Сон ҝүнләрдә Рәббин еви олан дағ дағларын зирвәсиндә мөһкәм дураҹаг, тәпәләрдән јухары уҹалаҹаг. Бүтүн милләтләр она сары ҝәләҹәк. Чох халглар ҝәлиб дејәҹәк: “Ҝәлин Рәббин дағына... галхаг, гој Рәбб бизә Өз јолуну өјрәтсин, биз Онун јолу илә ҝедәк”» (Јешаја 2:2, 3). Әлбәттә, Јеһованын јоллары илә бағлы бу ҹүр нәсиһәтә малик олмаг бизим үчүн әсл хејир-дуадыр!
10 Һәмчинин руһани ҹәһәтдән габилијјәтли олан инсанларын, о ҹүмләдән мәсиһчи ағсаггалларын да мәсләһәтләрини гејд етмәк олар. Мүгәддәс Китаб онлар һаггында дејир: «Гардашлар, әҝәр бир адам бир ҹинајәт үстә тутулса белә, сиз руһаниләр, ону һәлимлик руһу илә ислаһ един; сән дә јолдан чыхарылмамаг үчүн өзүнә фикир вер» (Галатијалылара 6:1). Ислаһ олунмағымыз үчүн тәгдим олунан бу ҹүр көмәјә ҝөрә биз неҹә дә миннәтдарыг!
11. Иманда олуб-олмадығымызы јохламаг өзүнә нәји дахил едир?
11 Нәшрләримиз, мәсиһчи ҝөрүшләри, тә’јин олунмуш гардашлар — бунларын һамысы Јеһовадан олан бәхшишләрдир. Лакин иман јолунда олуб-олмадығыны јохламаг үчүн, һәр кәс өзүнү тәһлил етмәлидир. Буна ҝөрә дә нәшрләримизи охујаркән вә ја Мүгәддәс Китаб нәсиһәтләрини динләјәркән өзүмүздән сорушмалыјыг: «Бу мәнә аиддирми? Мән белә едирәмми? Мәсиһчи е’тигадларына садиг галыраммы?» Бу тәрздә алдығымыз мә’лумата ҝөстәрдијимиз мүнасибәт руһани вәзијјәтимизә дә тә’сир ҝөстәрир. Мүгәддәс Китабда дејилир: «Нәфсани адам, Аллаһын Руһуна даир һәгигәтләри гәбул етмир, чүнки о бунлары ағылсызлыг һесаб едир... Руһани адам исә һәр шеј һаггында мүһакимә јүрүдә биләр» (1 Коринфлиләрә 2:14, 15). Китабларда, журналларда вә диҝәр нәшрләримиздә охудугларымыза, јығынҹаг ҝөрүшләриндә вә ағсаггаллардан ешитдикләримизә ҝөрә миннәтдарлыг һисси дујмалыјыг.
«Өзүнүзү имтаһан един»
12. Өзүнү имтаһан етмәк нә демәкдир?
12 Өзүнү имтаһан етмәк өзүнә гијмәт вермәк демәкдир. Бәли, биз һәгигәтдә ола биләрик, бәс руһанилијимиз һансы сәвијјәдәдир? Өзүнү имтаһан етмәјә, јеткин олдуғуна сүбутлар ахтармаг вә руһани бәхшишләрә ҝөрә миннәтдар олмаг дахилдир.
13. Ибраниләрә 5:14 ајәсинә әсасән, јеткинлијимизи субут едән нәдир?
13 Мәсиһчи кими јеткин олдуғумуза нә шәһадәт едир? Һәвари Павел јазырды: «Гүввәтли јемәк исә камилләр үчүндүр. Чүнки онларын һиссләри алышдырылараг, хејирлә шәри ајырд етмәк үчүн тәрбијә едилмишдир» (Ибраниләрә 5:14). Дәркетмә габилијјәтимизи ‘тәрбијә етмәклә’ вә ја мәшг етдирмәклә јеткин олдуғумузу субут етмиш олуруг. Неҹә ки идманчы һәр һансы идман нөвүндә наилијјәт газанмаг үчүн даима мәшг едиб әзәләләрини ҝүҹләндирмәлидир, еләҹә дә биз Мүгәддәс Китаб принсипләрини тәтбиг едәрәк дәркетмә габилијјәтимизи мәшг етдирмәлијик.
14, 15. Аллаһын Кәламынын дәринликләрини өјрәнмәк үчүн биз нәјә ҝөрә сә’ј ҝөстәрмәлијик?
14 Дәркетмә габилијјәтимизи мәшг етдирмәздән әввәл билик әлдә етмәлијик. Бунун үчүн сә’јлә шәхси өјрәнмә илә мәшғул олмаг ваҹибдир. Өзүмүз мүнтәзәм шәкилдә Мүгәддәс Китабы — хүсусилә Аллаһын Кәламынын дәринликләрини — өјрәнәндә дәркетмә габилијјәтимиз јахшылашыр. Сон илләр әрзиндә «Ҝөзәтчи Гүлләси»ндә бир чох дәрин мөвзулар мүзакирә олунмушдур. Дәрин һәгигәтләри ачыглајан мәгаләләрә мүнасибәтимиз неҹәдир? Орада «чәтин анлашылан бә’зи мәсәләләр» олдуғу үчүн онлардан гачынмаға мејлимиз вармы? (2 Петер 3:16). Әксинә, биз бу кими мәгаләләрдә дејиләнләри дәрк етмәк үчүн даһа чох сә’ј ҝөстәририк (Ефеслиләрә 3:18).
15 Бәс әҝәр шәхси өјрәнмә кечирмәк бизим үчүн чәтиндирсә, онда неҹә? Шәхси өјрәнмәдән ләззәт алмағы өјрәнмәк вә руһани иштаһа инкишаф етдирмәк чох ваҹибдирb (1 Петер 2:2). Јеткинлијә доғру ирәлиләмәк үчүн гүввәтли јемәклә — Аллаһын Кәламынын даһа дәрин һәгигәтләри илә гидаланмаг лазымдыр. Әкс тәгдирдә дәркетмә габилијјәтимиз мәһдуд галаҹаг. Лакин јеткинлик јалныз билији гаврамаг баҹарығында әкс олунмур. Чалышганлыгла кечирдијимиз шәхси өјрәнмә заманы әлдә едилән биликләри ҝүндәлик һәјатымызда тәтбиг етмәлијик.
16, 17. «Кәламын иҹрачысы» олмаға даир шаҝирд Јагуб һансы мәсләһәти верир?
16 Бизим неҹә инсан олдуғумузу һәгигәтә миннәтдар олмағымыздан — имандан ирәли ҝәлән әмәлләримиздән ҝөрмәк олар. Тә’сирли әјани нүмунәдән истифадә едәрәк, шаҝирд Јагуб бу саһәдә бизим неҹә даврана биләҹәјимизи тәсвир едир: «Аллаһ кәламыны јалныз ешитмәклә кифајәтләниб, өзүнүзү алдатмајын; бу кәламын иҹрачысы да олун. Чүнки кәламы ешидиб ону иҹра етмәјән, ҝүзҝүдә өз сифәтинин ҹизҝиләрини сејр едән адама бәнзәјир: О өз-өзүнә бахыр, кәнара чәкилир вә дәрһал неҹә олдуғуну унудур. Лакин ким камил гануна, азадлыг ганунуна диггәтлә бахыб она бағлы галарса вә унутган динләјиҹи дејил, иҹраедиҹидирсә, өз әмәлиндә хошбәхт олаҹагдыр» (Јагуб 1:22-25).
17 Башга сөзлә, Јагуб белә дејир: Аллаһын кәламынын камил ганунунун ҝүзҝүсүнә диггәтлә бахыб өзүнүзә гијмәт верин. Бу саһәдә сә’ј ҝөстәрин вә Аллаһын кәламындан анладыгларынызын әсасында өзүнүзә нәзәр салын. Сонра исә ҝөрдүкләринизи унутмајын. Лазым олан дәјишикликләри един. Бу мәсләһәтә риајәт етмәк бә’зән асан олмур.
18. Нәјә ҝөрә Јагубун мәсләһәтинә риајәт етмәк асан дејил?
18 Мисал үчүн, Падшаһлыг һаггындакы хәбәрин тәблиғ ишиндә иштирак етмәк тәләбинә диггәт јетирәк. Павел јазыр: «Салеһлик үчүн үрәклә иман едилир, хилас олмаг үчүн исә ағызла ачыгҹа сөјләнир» (Ромалылара 10:10, И–93). Хиласедиҹи хәбәри һәр кәсә бәјан етмәк үчүн, бир сыра дәјишикликләр етмәк лазымдыр. Чохларымыз үчүн тәблиғ етмәк бир о гәдәр дә асан дејил. Бу ишдә сә’јлә иштирак етмәк вә һәјатымызда она ән ваҹиб јери ајырмаг үчүн даһа чох дәјишиклик вә фәдакарлыг тәләб олунур (Матта 6:33). Лакин биз Аллаһын тапшырығыны јеринә јетирдикдә севинирик, чүнки бу иш Јеһованы иззәтләндирир. Демәк олармы ки, биз Падшаһлығын сә’јли тәблиғчиләријик?
19. Бизим имандан ирәли ҝәлән әмәлләримиз өзүнә нәји дахил етмәлидир?
19 Бизим имандан ирәли ҝәлән әмәлләримиз өзүнә нәји дахил етмәлидир? Павел дејир: «Мәндән нә өјрәндинизсә, нә гәбул етдинизсә, нә ешитдинизсә вә мәндә нә ҝөрдүнүзсә, онлара әмәл един вә сүлһ верән Аллаһ сизинлә олаҹагдыр» (Филипилиләрә 4:9). Өјрәндикләримизи, гәбул етдикләримизи, ешитдикләримизи вә ҝөрдүкләримизи — бир сөзлә, мәсиһчи кими һәср олунмағымыза вә һәјат тәрзимизә дахил олан һәр бир шеји тәтбиг етмәјимиз јеткинлијимизә шәһадәт едир. Јеһова Јешаја пејғәмбәр васитәсилә дејир: «Јол будур, ҝедин бу јола» (Јешаја 30:21).
20. Јығынҹаг үчүн бөјүк хејир-дуа оланлар кимләрдир?
20 Аллаһын Кәламыны чалышганлыгла өјрәнән, хош хәбәри сә’јлә тәблиғ едән, Аллаһа сәдагәтләрини горујан вә Падшаһлыг ишини гәтијјәтлә дәстәкләјән гадын вә кишиләр јығынҹаг үчүн бөјүк хејир-дуадырлар. Бу ҹүр мәсиһчиләр јығынҹаға сабитлик әһвал-руһијјәси ҝәтирир. Онлар чох фајдалы ишләр ҝөрүрләр, хүсусилә дә она ҝөрә ки, јығынҹаға тәзә ҝәлән бир чох инсанлара гајғы ҝөстәрир вә онлары дәстәкләјирләр. Павелин иман јолунда олуб-олмадығымызы јохламаг вә өзүмүзү имтаһан етмәк мәсләһәтини үрәкдән гәбул етмәклә, биз дә башгаларына мүсбәт тә’сир ҝөстәрмиш олуруг.
Аллаһын ирадәсини севинҹлә јеринә јетирин
21, 22. Аллаһын ирадәсини јеринә јетирмәкдән биз неҹә севинҹ һисси дуја биләрик?
21 Гәдим Исраилин падшаһы олан Давуд охујурду: «Еј Аллаһым, Сәнин истәјинә әмәл етмәк мәнә зөвг верир, ганунун гәлбимдәдир» (Мәзмур 40:8). Давуд Јеһованын ирадәсини јеринә јетирмәјә шад иди. Нәјә ҝөрә? Она ҝөрә ки, Јеһованын ганунлары онун үрәјиндә иди. Давуд һансы јол илә ҝедәҹәјинә шүбһә етмирди.
22 Әҝәр Јеһованын гануну үрәјимиздәдирсә, һансы јол илә ҝетмәли олдуғумуза шүбһә етмирик. Јеһованын ирадәсини севинҹлә јеринә јетиририк. Буна ҝөрә дә ҝәлин Јеһоваја бүтүн үрәклә хидмәт етмәк үчүн вар ҝүҹүмүзлә чалышаг (Лука 13:24).
[Һашијәләр]
a Јеһованын Шаһидләри тәрәфиндән дәрҹ олунуб.
b Өјрәнмәјә даир фајдалы мәсләһәтләри Јеһованын Шаһидләри тәрәфиндән дәрҹ олунан «Теократик Хидмәт Мәктәбиндә тә’лим алырыг» (рус.) китабынын 27-32-ҹи сәһифәләриндә тапмаг олар.
Јадыныздадырмы?
• Иман јолунда олуб-олмадығымызы неҹә јохлаја биләрик?
• Өзүмүзү имтаһан етмәк нә демәкдир?
• Бизим јеткин мәсиһчи олдуғумуз нәдән ҝөрүнүр?
• Имандан ирәли ҝәлән әмәлләримиз өзүмүзә гијмәт вермәкдә неҹә көмәк едир?
[13-ҹү сәһифәдәки шәкил]
Иман јолунда олуб-олмадығымызы јохламағын әсас үсулуну билирсинизми?
[14-ҹү сәһифәдәки шәкил]
Дәркетмә габилијјәтимизи мәшг етдирмәклә мәсиһчи јеткинлијимизи әкс етдиририк.
[15-ҹи сәһифәдәки шәкилләр]
Кәламын унутган динләјиҹиләри дејил, иҹраедиҹиләри олараг биз өзүмүзү имтаһан едирик.