“Сәбирлилији ҝејин”

“Мәрһәмәт... вә сәбирлилији ҝејин” (КОЛОСЛУЛАРА 3:12, И-93).

1. Сәбирлә бағлы ҝөзәл нүмунә сөјләјин.

ФРАНСАНЫН ҹәнуб-гәрбиндә јашајан Режи, 1952-ҹи илдә Јеһованын вәфтиз олунмуш Шаһиди олду. Онун арвады, әринин Јеһоваја хидмәт етмәсинә мане олмаг үчүн, чох илләр әрзиндә әлиндән ҝәләни едирди. Мәсиһчи ҝөрүшләринә ҝедә билмәсин дејә, әринин автомобилинин шинләрини дешмәјә чалышырды; һәтта бир дәфә евдән-евә хидмәти заманы әринин архасынҹа дүшүб, ев саһибләринә Падшаһлыг һаггындакы хош хәбәри тәблиғ едәркән ону лаға гојмушду. Арамсыз мүгавимәтләрә бахмајараг, Режи сәбирли олмагда давам едирди. Буна ҝөрә дә о, бүтүн мәсиһчиләрә ҝөзәл нүмунәдир, чүнки Јеһова өз хидмәтчиләриндән башгаларына мүнасибәтдә сәбирли олмағы тәләб едир.

2. “Сәбир” кими тәрҹүмә олунан јунан сөзү һәрфи мә’нада нә демәкдир вә нәји нәзәрдә тутур?

² “Сәбир” кими тәрҹүмә едилән гәдим јунан сөзү Азәрбајҹан дилиндә олан “Инҹил” китабында 13 дәфә “сәбир”, бир дәфә исә “тәһәммүл” ифадәсинә тәрҹүмә олунуб”. Һәм ибрани, һәм дә јунан дилиндә сәбир мә’насыны верән сөз алтында дөзмәк, таб ҝәтирмәк вә киминсә ҝеҹ гәзәбләнән олдуғу нәзәрдә тутулур.

3. Мәсиһчиләрин сәбирлилијә олан нөгтеји-нәзәрләри, биринҹи әсрдәки јунанларын нөгтеји-нәзәриндән неҹә фәргләнирди?

³ Биринҹи әсрдә Јунан халгы сәбир кејфијјәтини нәҹиблик һесаб етмирди. Стоик философлар бу сөзү һеч вахт истифадә етмирдиләр. Мүгәддәс Китаб үзрә алим Вилјам Барклинин сөзләринә ҝөрә, сәбир “јунанлыларын нәҹиблик һаггындакы тәсәввүрләринә тамам зидд олмушдур”. Јунанлар, “тәһгирә вә ја һагсызлыға дөзмәмәји” үстүн тутурдулар. Баркли јазырды: “Нәјин баһасына олурса-олсун интигам алмаға чалышан адам јунанларын идеалы сајылырды. Мәсиһчиләр үчүн исә, имканы олса белә, гисас алмајан шәхс идеал сајылыр”. Јунанлар сәбирлилији зәифлик һесаб етсәләр дә, башга вәзијјәтләрдә олдуғу кими, бу һалда да “Аллаһын “ағылсызлыг” дејилән шеји инсанларын мүдриклијиндән даһа үстүндүр вә Аллаһын “зәифлик” дејилән шеји инсанлардан даһа ҝүҹлүдүр” принсипи әдаләтлидир (1 Коринфлиләрә 1:25).

Мәсиһин вердији сәбирлилик нүмунәси

4, 5. Сәбирлилијә даир Иса һансы ҝөзәл нүмунәни верди?

⁴ Јеһовадан сонра, сәбирлилијә даир ән ҝөзәл нүмунә верән икинҹи шәхс Мәсиһ Исадыр. Ҝүҹлү тәзјиг алтында оланда белә, Иса валеһедиҹи тәрздә өзүнә һаким олмағы баҹарды. Онун һаггында пејғәмбәрҹәсинә дејилмишди: “Онунла пис даврандылар, фәгәт алчалдылдығы заман ағзыны ачмады; боғазланмаға апарылан гузу кими вә гырхыҹылар өнүндә дилсиз дуран гојун кими, ағзыны ачмады” (Ишаја 53:7).

⁵ Јер үзүндәки хидмәти әрзиндә Иса неҹә дә һејрәт доғуран сәбир тәзаһүр етдирирди! О, дүшмәнләринин мәкрли суалларына вә әлејһдарларынын тәһгиринә давам ҝәтирирди (Матта 22:15-46; 1 Петер 2:23). Араларында кимин бөјүк олдуғу барәдә дәфәләрлә мүбаһисә едән шаҝирдләри илә сәбирлә давранырды (Марк 9:33-37; 10:35-45; Лука 22:24-27). Әлә верилдији ҝеҹә “ојаг дурун” хаһишинә бахмајараг, Петер, Јагуб вә Јәһја јатанда, Иса неҹә дә һејранедиҹи тәмкинлилик ҝөстәрди! (Матта 26:36-41).

6. Исанын сәбирли олмасындан Павел һансы фајданы әлдә етди вә бундан биз нә өјрәнирик?

⁶ Иса, өлүб дирилдикдән сонра да сәбирли олмаға давам едирди. Әввәлләр мәсиһчиләри тә’гиб едән һәвари Павел дә буна әмин олду. О јазырды: “Бу сөз е’тимада вә һәр вәҹһлә гәбул олунмаға лајигдир ки, Мәсиһ Иса ҝүнаһкарлары хилас етмәк үчүн дүнјаја ҝәлди. О ҝүнаһкарлардан ән јаманы мәнәм. Лакин мән мәһз она ҝөрә мәрһәмәтә наил олдум ки, Мәсиһ Иса Өз камил тәһәммүлүнү илк олараг мәним үзәримдә зүһур етдирсин вә әбәди һәјат үчүн Она иман етмәли оланларын нүмунәси олум” (1 Тимотејә 1:15, 16). Әҝәр кечмишимиздән асылы олмајараг Исаја үрәкдән иман едириксә, о, бизә гаршы да сәбирли олаҹаг; бир шәртлә ки, “төвбәјә лајиг ишләр” ҝөрәк (Һәвариләрин ишләри 26:20; Ромалылара 2:4). Мәсиһин Кичик Асијадакы једди јығынҹаға ҝөндәрдији хәбәрдән ҝөрүнүр ки, сәбирли олмасына бахмајараг, о, биздән ирәлиләјишләр дә ҝөзләјир (Вәһј, 2-ҹи вә 3-ҹү фәсилләр).

Руһун сәмәрәси

7. Сәбир илә руһун сәмәрәси арасында һансы бағлылыг вар?

⁷ Галатијалылара јаздығы мәктубун 5-ҹи фәслиндә, Павел ҹисмани тәбиәтин әмәлләри илә руһун сәмәрәсини мүгајисә едир (Галатијалылара 5:19-23). Сәбир Јеһоваја хас олан кејфијјәтләрдән бири олдуғундан, бу кејфијјәт өз башланғыҹыны Ондан алыр вә Онун руһунун сәмәрәсидир (Чыхыш 34:6, 7). Павелин садаладығы “мәһәббәт, севинҹ, сүлһ... лүтфкарлыг, јахшылыг, сәдагәт, һәлимлик, өзүнә һаким олмаг” кими руһун сәмәрәси арасында сәбир дөрдүнҹү јердәдир (Галатијалылара 5:22, 23). Буна ҝөрә дә Аллаһын хидмәтчиләри, Аллаһа мәгбул сәбир тәзаһүр етдирдикдә, буну мүгәддәс руһун тә’сири алтында едирләр.

8. Сәбирлилији өзүнә дахил едән руһун сәмәрәсини инкишаф етдирмәкдә бизә нә көмәк едәр?

⁸ Лакин бу о демәк дејил ки, Јеһова инсаны мүгәддәс руһа табе олмаға мәҹбур едир. Мүгәддәс руһун тә’сиринә биз көнүллү сурәтдә табе олмалыјыг (2 Коринфлиләрә 3:17; Ефеслиләрә 4:30). Ҝөрдүјүмүз һәр бир ишдән асылы олмајараг, мүгәддәс руһун сәмәрәсини инкишаф етдирдикдә, онун бизә тә’сир ҝөстәрмәсинә јол веририк. Ҹисмани тәбиәтин әмәлләрини вә руһун сәмәрәсини садалајаркән Павел әлавә едир: “Мадам ки, биз Руһа ҝөрә јашајырыг, Руһа ҝөрә дә рәфтар едәк. Алданмајын: Аллаһа истеһза едилмәз. Чүнки инсан нәји әкәрсә, ону да бичәҹәкдир. Өз ҹисмани тәбиәти үчүн әкән, о тәбиәтдән өлүм бичәҹәкдир; Руһ үчүн әкән исә, Руһдан әбәди һәјат бичәҹәкдир” (Галатијалылара 5:25; 6:7, 8). Сәбирлилији мүвәффәгијјәтлә инкишаф етдирмәк үчүн, мүгәддәс руһун мәсиһчиләрдә һасил етдији диҝәр сәмәрәләрин үзәриндә дә ишләмәлијик.

“Мәһәббәт сәбирлидир”

9. Еһтимал олундуғу кими, Павелин Коринфдәки јығынҹаға “мәһәббәт сәбирлидир” јазмасынын сәбәби нә олмушдур?

⁹ Павел ҝөстәрди ки, мәһәббәтлә сәбирлилик арасында сых бағлылыг вар. О јазырды: “Мәһәббәт сәбирлидир” (1 Коринфлиләрә 13:4). Мүгәддәс Китаб үзрә алим Алберт Барнзын сөзләринә ҝөрә, Павел буну, Коринфдәки мәсиһчи јығынҹағында мүнагишә вә һөҹәтләшмә олдуғу үчүн гејд етмишди (1 Коринфлиләрә 1:11, 12). Барнз јазыр: “Бурада [“сәбир” мә’насында] истифадә едилән сөз, һирсләнмәкдә вә тез гәзәбләнмәкдә тәзаһүр олунан тәләсиклијә зидд гојулуб. Бу сөз алтында, пис давраныша вә һүҹумлара УЗУН МҮДДӘТ ТАБ ҜӘТИРМӘЈӘ јол верән әһвал- руһијјә нәзәрдә тутулур”. Мәһәббәт вә сәбир, шүбһәсиз ки, бу ҝүн дә мәсиһчи јығынҹағында әмин-аманлығын олмасына чох көмәк едир.

10. а) Сәбирли олмагда мәһәббәт бизә неҹә көмәк едир вә бунунла әлагәдар һәвари Павел бизә һансы мәсләһәти верир? б) Мүгәддәс Китаб үзрә бир алим Аллаһын сәбри вә хејирхаһлығы барәдә нә демишдир? (Һашијәјә бахын.)

¹⁰ “Мәһәббәт сәбирли, хејирхаһдыр. Мәһәббәт... өз мәнфәәтини ахтармаз, һирсләнмәз”. Ҝөрдүјүнүз кими, сәбирли олмағымыз үчүн мәһәббәт бизә чох саһәләрдә көмәк едирa (1 Коринфлиләрә 13:4, 5). Мәһәббәт, бир-биримизлә сәбирлә јола ҝетмәјә, һәмчинин һамымызын гејри-камил вә һәр биримизин нөгсанларымыз олдуғуну јадда сахламаға имкан верир. Нәзакәтли вә бағышлајан олмағымыза көмәк едир. Һәвари Павел бизи тәшвиг едир: “Там тәвазөкарлыг вә һәлимликлә, сәбирлә давраныб, бир-биринизә мәһәббәтлә тәһәммүл един, Руһун вәһдәтини сүлһ бағы илә сахламаға сә’ј ҝөстәрин” (Ефеслиләрә 4:1-3).

11. Мәсиһчи коллективләриндә сәбир нәјә ҝөрә хүсусилә ваҹибдир?

¹¹ Јығынҹагларда, Бејт-Елләрдә, миссионер евләриндә, тикинти бригадаларында, һәр-һансы теократик мәктәбләрдә - бир сөзлә, бүтүн мәсиһчи коллективләриндә һәр бир кәсин сәбирлилији, үмуми әмин-аманлыға вә хошбәхтлијә көмәк едир. Хасијјәтләрдә, зөвгләрдә, тәрбијәдә, нәзакәт вә ҝиҝијена гајдаларына даир тәсәввүрләрдә олан мүхтәлифлик үзүндән бә’зән хошаҝәлмәз вәзијјәтләр јарана биләр. Бу, аиләләрә дә аиддир. Белә һалда сәбирли олмаг чох ваҹибдир (Сүлејманын мәсәлләри 14:29; 15:18; 19:11). Сәбирли олмаг - јахшылыға үмид бәсләјәрәк, писликләрә таб ҝәтирмәк һәр бир кәсдән тәләб олунур (Ромалылара 15:1-6).

Сәбир, сарсылмаз галмаға көмәк едир

12. Чәтин вәзијјәтләрдә сәбирли олмаг нәјә ҝөрә ваҹибдир?

¹² Сәбир, сонсуз вә ја тез һәлл едилмәси мүмкүн олмајан кими ҝөрүнән хошаҝәлмәз вәзијјәтләрә таб ҝәтирмәкдә бизә көмәк едир. Мәгаләнин әввәлиндә ады чәкилән Режи илә дә белә олмушдур. Јеһоваја хидмәт етмәкдә узун илләр арвады она мане олмушдур. Лакин бир дәфә ҝөзү јашлы әринин јанына ҝәлиб, деди: “Бунун һәгигәт олдуғуну билирәм. Мәнә көмәк ет. Мүгәддәс Китабы өјрәнмәк истәјирәм”. Нәтиҹәдә о, Јеһованын Шаһиди кими вәфтиз олунду. Режи дејир: “Бу сүбут едир ки, Јеһова мүбаризә, сәбир вә сарсылмазлыгла кечән һәмин илләрә хејир-дуа верди”. Режинин сәбри мүкафатландырылды.

13. Сарсылмазлығы горумагда Павелә нә көмәк етди вә бу саһәдә онун нүмунәси бизә неҹә көмәк едә биләр?

¹³ Ерамызын биринҹи јүзиллијиндә сәбирлилијин ҝөзәл нүмунәсини һәвари Павел верди (2 Коринфлиләрә 6:3-10; 1 Тимотејә 1:16). Өмрүнүн чох һиссәсини јашајамыш олан Павел, ҝәнҹ досту Тимотејә нәсиһәт верәркән, бүтүн мәсиһчиләрин сынагларла гаршылашаҹагларыны билдирди. Павел диггәти өз нүмунәсинә јөнәлтди вә сарсылмаз галмаг үчүн лазым олан әсас мәсиһчи кејфијјәтләрини садалады. О јазырды: “Сән исә мәним тә’лим, давраныш, мәгсәд, иман, сәбир, мәһәббәт, тәһәммүл, тә’гибләр, Антакја, Конја вә Листрада башыма ҝәлән изтирабларын изи илә ҝетдин. Нә ҹүр тә’гибләрә тәһәммүл етдим! Вә һамысындан мәни Рәбб хилас етди. Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр” (2 Тимотејә 3:10-12; Һәвариләрин ишләри 13:49-51; 14:19-22). Сарсылмаз галмаг үчүн һамымыза иман, мәһәббәт вә сәбир лазымдыр.

Сәбирлилији ҝејинәрәк

14. Павел, Аллаһа мәгбул олан сәбир кими кејфијјәтләри нә илә мүгајисә етди вә Колос мәсиһчиләринә һансы нәсиһәти верди?

¹⁴ Һәвари Павел сәбирлилији вә Аллаһа мәгбул олан диҝәр кејфијјәтләри палтарла мүгајисә етмишдир. Мәсиһчи, “көһнә мәнлијә” хас олан әмәлләри “бир јана” гојараг, бу палтары ҝејинмәлидир (Колослулара 3:5-10). О јазырды: “Аллаһын сечилмишләри, мүгәддәсләри вә севимлиләри кими үрәкдән шәфгәт, хејирхаһлыг, тәвазөкарлыг, һәлимлик вә сәбирлилик ҝејин; бир-биринизә тәһәммүл един вә биринизин диҝәриндән шикајәти варса, бағышласын. Мәсиһ [“Јеһова”, ЈД] сизи бағышладығы кими, сиз дә бир-биринизи бағышлајын. Бүтүн бунларла јанашы, камил бирлијин бағы олан мәһәббәти ҝејин” (Колослулара 3:12-14).

15. Мәсиһчиләрин сәбирлилији вә Аллаһа мәгбул олан диҝәр кејфијјәтләри “ҝејинмәләри” һансы сәмәрәләри ҝәтирир?

¹⁵ Јығынҹағын үзвләри шәфгәт, хејирхаһлыг, тәвазөкарлыг, һәлимлик вә сәбирлилик “ҝејинәндә”, проблемләри һәлл етмәји вә Јеһоваја хидмәтләрини давам етдирмәји баҹарырлар. Сәбирлилик, хүсусилә дә мәсиһчи ағсаггалларына лазымдыр. Бә’зән онлар мәсиһчиләрдән кими исә мәзәммәт етмәли олурлар, амма буну мүхтәлиф тәрздә етмәк олар. Павел, Тимотејә јаздығы мәктубунда ән јахшы әһвал-руһијјәни белә тәсвир етмишдир: “Там сәбирлә вә тә’лимлә игна, мәзәммәт, тәшвиг ет” (2 Тимотејә 4:2). Бәли, Јеһованын гојунлары илә рәфтар едәркән һәмишә сәбирли олмаг, онларын ләјагәтләринә гаршы һөрмәт вә нәҹиблик тәзаһүр етдирмәк лазымдыр (Матта 7:12; 11:28; ­Һәвариләрин ишләри 20:28, 29; Ромалылара 12:10).

“Һамыја гаршы сәбирли”

16. Әҝәр “һамыја гаршы сәбирлә” давранарыгса, нәјә наил ола биләрик?

¹⁶ Јеһова бүтүн бәшәријјәтә сәбирли олдуғу үчүн, биз “һамыја гаршы сәбирли” олмаға мә’нәвијјатҹа борҹлујуг (1 Салониклиләрә 5:14). Бу, Шаһид олмајан гоһумларымыз, гоншуларымыз, синиф вә иш јолдашларымызла сәбирли олмаг демәкдир. Бә’зән иш јериндә вә ја мәктәбдә илләр узуну аҹы сөзләрә, јахуд бирбаша мүгавимәтләрә мә’руз галан Шаһидләр, габагҹадан јаранмыш јанлыш фикирләри арадан галдырмышлар (Колослулара 4:5, 6). Һәвари Петер јазырды: “Иман ҝәтирмәјәнләр арасында мүсбәт һәјат сүрүн ки, пислик едәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12).

17. Мәһәббәт вә сәбирдә Јеһованы неҹә тәглид едә биләрик вә бу бизә нә үчүн лазымдыр?

¹⁷ Јеһованын сәбри милјонларла инсанлар үчүн хилас мә’насыны дашыјаҹагдыр (2 Петер 3:9, 15). Мәһәббәт вә сәбирдә Јеһованы тәглид етсәк, Аллаһын Падшаһлығы һаггындакы хош хәбәри сәбирлә тәблиғ етмәјә вә башгаларыны Мәсиһин Падшаһлыг һакимијјәтинә табе олмағы өјрәтмәјә давам едәҹәјик (Матта 28:18-20; Марк 13:10). Әҝәр биз тәблиғ етмәји дајандырсаг, Јеһованын сәбринә сәрһәд гојмаг истәдијимизи вә Онун инсанлары төвбәјә ҝәтирмәклә әлагәдар сәбир етмәсинин мәгсәдини анламадығымызы ҝөстәрмиш оларыг (Ромалылара 2:4).

18. Павел колослулар үчүн неҹә дуа едирди?

¹⁸ Кичик Асијанын Колос шәһәриндә јашајан мәсиһчиләрә ҝөндәрдији мәктубунда Павел јазырды: “Буна ҝөрә дә ешитдијимиз ҝүндән сизин үчүн дуа едиб, јалвармагдан ваз кечмирик ки, там һикмәт вә руһани идракла Аллаһын ирадәсини бүтүнлүклә гаврајасыныз ки, Рәббә лајиг шәкилдә һәрәкәт едиб, Ону һәр ҹәһәтдән разы саласыныз; һәр ҹүр хејирли ишдә сәмәрә вериб, Аллаһы танымагда тәрәгги едәсиниз, там тәһәммүл вә севинҹлә сәбир ҝөстәрмәниз үчүн Онун иззәтли гүввәтинә ҝөрә һәр ҹүр гүдрәтлә мөһкәмләнәсиниз” (Колослулара 1:9-11).

19, 20. а) Јеһованын давам едән сәбрини сынаг сајмамаг үчүн бизә нә көмәк едәҹәкдир? б) Сәбирли олмағымыз һансы фајдалары ҝәтирәҹәк?

¹⁹ Әҝәр бүтүн инсанларын хилас олуб, һәгигәти дәрк етмәләринә даир “Аллаһын ирадәсини бүтүнлүклә” гаврајырыгса, Јеһованын индијә кими ҝөстәрдији сәбир бизим үчүн сынаг олмајаҹаг (1 Тимотејә 2:4). Биз “һәр ҹүр хејирли ишдә”, хүсусән дә “Падшаһлыг һаггында олан бу Мүждә”нин тәблиғ ишиндә сәмәрә верәҹәјик (Матта 24:14, И-93). Бу иши сәдагәтлә јеринә јетирмәјә давам етсәк, Јеһова, “там тәһәммүл вә севинҹлә” сәбирли олмағымыз үчүн, бизи “һәр ҹүр гүдрәтлә” мөһкәмләндирәҹәк. Бу нәсиһәтә риајәт едәрәк, Јеһоваја “лајиг шәкилдә һәрәкәт” едәҹәјик вә “Ону һәр ҹәһәтдән” разы салдығымызы дәрк етдијимиз үчүн дахили раһатлыг һисси дујаҹағыг.

²⁰ Биз, Јеһованын сәбир етмәсиндә олан мүдриклијә там әмин олмалыјыг. Белә сәбир һәм бизим үчүн, һәм дә тәблиғимизи вә вердијимиз тә’лими динләјән инсанлар үчүн хилас демәкдир (1 Тимотејә 4:16). Әҝәр биз, руһун сәмәрәси олан мәһәббәт, лүтфкарлыг, јахшылыг, һәлимлик вә өзүнә һаким олмаг хүсусијјәтләрини тәзаһүр етдиририксә, севинҹлә сәбир едә биләҹәјик. Аилә үзвләримизлә, һәмчинин јығынҹагдакы гардаш вә баҹыларла әмин-аманлыг ичиндә даһа јахшы јашајаҹағыг. Сәбир, иш вә синиф јолдашларымызла да һөвсәләли давранмағымыза көмәк едәҹәк. Сәбримизин мәгсәди исә, ганунсузлары хилас етмәк вә сәбирли Аллаһымыз Јеһованы иззәтләндирмәк олаҹаг.

[Һашијә]

Изаһ едә биләрсинизми?

• Мәсиһ һансы саһәләрдә сәбирлилијин ҝөзәл нүмунәсини верди?

• Сәбирлилији инкишаф етдирмәкдә бизә нә көмәк едәҹәкдир?

• Аиләләрә, мәсиһчи коллективләринә вә ағсаггаллара сәбир неҹә фајда ҝәтирир?

• Сәбирли олмағымыз бизә вә башгаларына һансы фајданы ҝәтирәҹәк?

[15-ҹи сәһифәдәки шәкил]

Һәтта ән ҝәрҝин вәзијјәтләрдә белә Иса шаҝирдләри илә сәбирлә давранырды.

[16-ҹы сәһифәдәки шәкил]

Мәсиһчи ағсаггаллары, гардашларла мүнасибәтдә сәбирлилик нүмунәси вермәјә тәшвиг олунурлар.

[17-ҹи сәһифәдәки шәкил]

Мәһәббәт вә сәбирдә Јеһованы тәглид едәриксә, хош хәбәрин тәблиғини давам етдирәҹәјик.

[18-ҹи сәһифәдәки шәкил]

Павел дуа едирди ки, мәсиһчиләр “севинҹлә сәбир” етсинләр.