Руһун рәһбәрлији алтында јашајырсанмы?
«Сәнин Руһун јахшыдыр, дүз јер үчүн мәнә јол ҝөстәр» (МӘЗ. 143:10).
1, 2. а) Јеһова хидмәтчиләринә дәстәк олмаг үчүн мүгәддәс руһундан неҹә истифадә едир? Нүмунәләр чәк. б) Мүгәддәс руһ јалныз хүсуси һаллардамы фәалијјәт ҝөстәрир? Изаһ ет.
МҮГӘДДӘС РУҺУН фәалијјәти барәдә фикирләшәндә ағлына илк ҝәлән нә олур? Ола билсин, Ҝидеонун вә Шимшонун мөһтәшәм ишләри (Һак. 6:33, 34; 15:14, 15). Бәлкә дә, еркән мәсиһчиләрин ҹәсарәти вә ја Синедрионун гаршысында дураркән Стефанын үзүндәки раһатлыг (Һәв. иш. 4:31; 6:15). Јахуд да бејнәлхалг конгресләрдәки севиндириҹи аб-һава; битәрәф мөвгеләринә ҝөрә һәбсә атылан гардашларын нөгсансызлығы вә ја тәблиғ ишинин мисли ҝөрүлмәмиш дәрәҹәдә ҝениш јајылмасы. Бүтүн бу нүмунәләр мүгәддәс руһун фәалијјәтиндән хәбәр верир.
2 Бәс бу о демәкдирми ки, мүгәддәс руһ јалныз хүсуси һалларда, јахуд да чыхылмаз вәзијјәтләрдә фәалијјәт ҝөстәрир? Хејр. Аллаһын Кәламында дејилир ки, мәсиһчиләр ‘руһун рәһбәрлији алтында јашамалыдырлар’, ‘руһа мүвафиг һәрәкәт етмәлидирләр’ (Галат. 5:16, 18, 25). Бу ифадәләр ҝөстәрир ки, мүгәддәс руһ давамлы шәкилдә ҝүндәлик һәјатымыза да тәсир ҝөстәрә биләр. Буна ҝөрә дә биз һәр ҝүн Јеһоваја јалвармалыјыг ки, руһу васитәсилә дүшүнҹәләримизә, данышығымыза вә әмәлләримизә истигамәт версин. (Мәзмур 143:10 ајәсини оху.) Мүгәддәс руһун һәјатымыза манеәсиз тәсир ҝөстәрмәсинә јол верәндә о, дахилимиздә инсанлара хош тәсир едән вә Аллаһа иззәт ҝәтирән хүсусијјәтләр јетишдирир.
3. а) Руһун рәһбәрлији алтында јашамаг үчүн нә етмәлијик? б) Биз һансы суаллары нәзәрдән кечирәҹәјик?
3 Мүгәддәс руһун рәһбәрлији алтында јашамаг нәјә ҝөрә ваҹибдир? Чүнки руһа гаршы чыхан башга бир гүввә бизә ағалыг етмәк истәјир. Сөһбәт Мүгәддәс Китабда ‘бәдән’ адландырылан гүввәдән ҝедир вә бу сөз алтында ҝүнаһлы бәдәнимизин мејилләри, Адәмдән мирас алдығымыз гејри-камиллик нәзәрдә тутулур. (Галатијалылара 5:17 ајәсини оху.) Елә исә, мүгәддәс руһун рәһбәрлији алтында јашамаг нә демәкдир? Ҝүнаһлы бәдәнимизин мејилләрини дәф етмәјә бизә нә көмәк едәҹәк? Ҝәлин бу суаллары арашдыраг вә руһун бәһрәсинә дахил олан диҝәр алты хүсусијјәти — сәбир, јахшылыг, хејирхаһлыг, иман, һәлимлик вә тәмкинлији нәзәрдән кечирәк (Галат. 5:22, 23).
Һәлимлик вә сәбирјығынҹагда сүлһү горујур
4. Һәлимлик вә сәбир јығынҹагда сүлһү неҹә горујур?
4 Колослулара 3:12, 13 ајәләрини оху. Һәлимлик вә сәбир јығынҹагда сүлһүн горунмасында бөјүк рол ојнајыр. Һәр ики хүсусијјәт бизә көмәк едир ки, башгалары илә мүлајим давранаг, кимсә бизи гыҹыгландыранда сакитлији горујаг, еләҹә дә башгалары сөз вә ја һәрәкәтләри илә гәлбимизә тохунанда әвәз чыхмајаг. Әҝәр һәмиманлымызла арамызда анлашылмазлыг баш верибсә, сәбир бизи руһдан дүшмәдән проблеми һәлл етмәк үчүн әлимиздән ҝәләни етмәјә тәшвиг едәҹәк. Һәгигәтәнми јығынҹагда бу ики хүсусијјәти тәзаһүр етдирмәјә еһтијаҹ вар? Бәли, чүнки һәр биримиз гејри-камилик.
5. Павеллә Барнабанын арасында нә баш вермишди вә бу, нәји ҝөстәрир?
5 Павеллә Барнабанын арасында баш верәнләри јадымыза салаг. Онлар узун илләр әрзиндә бирҝә хош хәбәри тәблиғ едирдиләр. Һәр икисинин тәрифәлајиг хүсусијјәтләри вар иди. Амма ҝүнләрин бир ҝүнү онларын арасында ‘гызғын чәкишмә’ баш верди вә онлар бир-бириндән ајрылдылар (Һәв. иш. 15:36—39). Бу һадисә ҝөстәрир ки, һәтта Аллаһын садиг хидмәтчиләри арасында белә фикир ајрылығы гачылмаздыр. Әҝәр ики мәсиһчи арасында анлашылмазлыг баш верибсә, онлар нә едә биләрләр ки, сөһбәт гызғын мүбаһисәјә чеврилмәсин вә мүнасибәтләринә зәрәр дәјмәсин?
6, 7. а) Һәмиманлымызла сөһбәт гызғын мүбаһисәјә чеврилмәсин дејә һансы Мүгәддәс Китаб мәсләһәтинә әмәл етмәлијик? б) Јагуб 1:19, 20 ајәләриндәки мәсләһәтә риајәт етмәк һансы фајданы ҝәтирир?
6 Павеллә Барнаба арасындакы фикир ајрылығы гәфләтән јаранды вә бу, «гызғын чәкишмәјә» сәбәб олду. Әҝәр мәсиһчи јаранмыш проблем барәдә һәмиманлысы илә сөһбәт едәркән өзүндән чыхаҹағыны һисс едирсә, јахшы оларды ки, Јагуб 1:19, 20 ајәләриндәки мәсләһәтә әсасән даврансын. Бу ајәләрдә дејилир: «Гој һәр бир инсан ешитмәјә һазыр олсун, данышмаға вә гәзәбләнмәјә тәләсмәсин. Чүнки инсанын гәзәби ону Аллаһын тәләб етдији салеһлијә апармыр». Вәзијјәтдән асылы олараг, о, сөһбәти дәјишә, мүзакирәни башга вахта кечирә вә ја мүбаһисә гызышмамыш үзр истәјиб ораны тәрк едә биләр (Сүл. мәс. 12:16; 17:14; 29:11).
7 Бу мәсләһәтә риајәт етмәјин һансы фајдасы вар? Бу арада о сакитләшә, мәсәлә барәдә дуа едә вә һәмиманлысына неҹә ҹаваб верәҹәјини ҝөтүр-гој едә биләр. Белә давранан мәсиһчи мүгәддәс руһун она истигамәт вермәсинә јол верир (Сүл. мәс. 15:1, 28). Мүгәддәс руһун тәсири алтында о, һәлимлик вә сәбир хүсусијјәтләрини тәзаһүр етдирәҹәк. Онда она Ефеслиләрә 4:26, 29 ајәләриндәки мәсләһәтә риајәт етмәк асан олаҹаг. Орада охујуруг: «Гәзәбләнсәниз дә ҝүнаһ ишләмәјин... Гој дилиниздән һеч бир пис сөз чыхмасын, анҹаг зәрурәтә ҝөрә иманы мөһкәмләндирән сөз сөјләјин ки, сизи динләјәнләрә фајда ҝәтирсин». Һәгигәтән дә, һәлимлик вә сәбир хүсусијјәтләринә бүрүнәндә јығынҹагда бирлијин вә сүлһүн олмасында бизим дә пајымыз олур.
Гој јахшылыг вә хејирхаһлыгаиләнизә тәравәт ҝәтирсин
8, 9. Јахшылыг вә хејирхаһлыг нәдир вә онлар евдә һансы аб-һаваны јарадыр?
8 Ефеслиләрә 4:31, 32; 5:8, 9 ајәләрини оху. Исти ҝүндә мүлајим күләк вә сәрин су адама тәравәт вердији кими, јахшылыг вә хејирхаһлыг да бизи тәравәтләндирир. Аиләдә онлар хош аб-һава јарадыр. Јахшылыг фајдалы ишләрдә вә нәзакәтли сөзләрдә өзүнү бүрузә верир. Үрәји исиндирән бу хүсусијјәт башгаларына сәмими марагдан доғур. Јахшылыг кими, хејирхаһлыг да башгаларына фајда ҝәтирән вә әмәлләрдә тәзаһүр олунан мүсбәт хүсусијјәтдир. Онун сәҹијјәви ҹәһәти әлиачыглыгдыр (Һәв. иш. 9:36, 39; 16:14, 15). Амма бу хүсусијјәт өзүнә даһа чох шеј дахил едир.
9 Хејирхаһлыг мәнәви ҹәһәтдән гүсурсуз олмаг демәкдир. Бу јалныз бизим әмәлләримизлә јох, дахилән неҹә инсан олмағымызла да бағлыдыр. Аиләси үчүн мејвә доғрајан бир гадыны тәсәввүр едәк. О, мејвәләри дилимләјир вә һәр дилимин ширин вә дәјмиш, үздә вә ичиндә чүрүк јерин олмадығына әмин олмаг үчүн диггәтлә нәзәрдән кечирир. Ејнилә, мүгәддәс руһун јетишдирдији хејирхаһлыг да мәсиһчинин һәјатынын бүтүн саһәләринә тәсир едир.
10. Мәсиһчи аиләләринә руһун бәһрәсини јетишдирмәјә нә көмәк едәҹәк?
10 Аиләләриндә бир-бири илә хејирхаһлыгла давранмаға вә бир-биринә јахшылыг етмәјә мәсиһчиләрә нә көмәк едәҹәк? Бу мәсәләдә ваҹиб ролу Аллаһын Кәламынын вердији дәгиг билик ојнајыр (Колос. 3:9, 10). Бәзи аилә башчылары руһун бәһрәсини тәшкил едән хүсусијјәтләри арашдырмағы һәфтәлик аиләви ибадәт програмларына дахил етмишләр. Онлары арашдырмаг чәтин дејил. Бунун үчүн доғма дилиндә олан вәсаитләрдән истифадә едәрәк һәр бир хүсусијјәт барәдә материал тап. Бир хүсусијјәт үчүн бир нечә һәфтә ајырараг һәр һәфтә ҹәми бир нечә абзас мүзакирә етмәк олар. Ҝәтирилән ајәләри охумағы вә аиләнлә мүзакирә етмәји унутма. Өјрәндикләрини тәтбиг етмәјә чалыш вә Јеһовадан хаһиш ет ки, сәнә хејир-дуа версин (1 Тим. 4:15; 1 Јәһ. 5:14, 15). Бу, мәсиһчиләрә аиләләриндә бир-бирләри илә даһа јахшы рәфтар етмәјә көмәк едә биләрми?
11, 12. Ики мәсиһчи аиләси хејирхаһлыг вә јахшылыг хүсусијјәтләрини арашдырмагдан һансы фајданы әлдә етди?
11 Никаһларыны мөһкәмләндирмәк мәгсәдилә бир ҝәнҹ аилә руһун бәһрәсини даһа дәриндән арашдырмаг гәрарына ҝәлмишди. Бунун онлара һансыса хејри дәјдими? Баҹы дејир: «Биләндә ки, јахшылыг хүсусијјәтинә сәдагәт дә дахилдир, биз бир-биримизлә тамамилә башга ҹүр рәфтар етмәјә башладыг вә индијәдәк мүнасибәтләримиз дәјишмәјиб. Биз бир-биримизә ҝүзәштә ҝетмәји вә бағышламағы өјрәндик. Һәмчинин охудугларымыз бизә јериндә олараг “чох сағ ол” вә “үзр истәјирәм” демәјин ваҹиблијини дәрк етмәјә көмәк етди».
12 Вахтилә араларында проблемләр олан диҝәр ҹүтлүк исә мүнасибәтләриндә хејирхаһлығын чатышмадығыны баша дүшмүшдү. Онлар хејирхаһлығын нә демәк олдуғуну бирҝә арашдырмаг гәрарына ҝәлдиләр. Әр бунун һансы бәһрәләри ҝәтирдијини хатырлајараг дејир: «Бу хүсусијјәти арашдыранда анладыг ки, бир-биримизә һәмишә шүбһә илә јанашмаг әвәзинә, етибар етмәли вә бир-биримизин мүсбәт ҹәһәтләрини ҝөрмәлијик. Биз бир-биримизә гаршы даһа диггәтли олмаға башладыг. Мән баша дүшдүм ки, хејирхаһ олмаг һәм дә јолдашыма өз фикирләрини ачыг сөјләмәјә имкан вермәк вә дедикләринә ҝөрә ондан инҹимәмәк демәкдир. Бунун үчүн мән гүруруму сындырмалы идим. Һәр икимиз хејирхаһлыг хүсусијјәтини әмәлдә ҝөстәрмәјә башлајанда артыг өзүмүзә бәраәт газандырмаға, диҝәрини исә борҹлу чыхартмаға сон гојдуг. Бундан сонра үрәјимиз хејли раһатлашды». Руһун бәһрәсини арашдырмаг сәнин дә аиләнә фајда ҝәтирә биләр.
Тәкликдә оларкән иманыны ҝөстәр
13. Руһанилијимизә зәрәр дәјмәсин дејә биз өзүмүзү нәдән ҝөзләмәлијик?
13 Мәсиһчи һәм ҹамаат гаршысында, һәм дә тәкликдә оланда ајдын ҝөрүнмәлидир ки, она мүгәддәс руһ рәһбәрлик едир. Бу ҝүн Шејтан дүнјасында ијрәнҹ шәкилләр вә инсанын әхлагыны позан әјләнҹәләр ҝениш јајылыб. Бу, бизим руһанилијимиз үчүн тәһлүкәли ола биләр. Бәс мәсиһчи нә етмәлидир? Аллаһын Кәламы бизә нәсиһәт едир: «Өзүнүзү һәр ҹүр чиркабдан вә писликдән тәмизләјин вә сизи хилас етмәјә гадир олан сөзүн гәлбиниздә әкилмәсинә һәлимликлә јол верин» (Јаг. 1:21). Ҝөрәк руһун бәһрәсинә дахил олан иман бизә Јеһованын ҝөзүндә тәмиз галмаға неҹә көмәк едир.
14. Имансызлыг инсанын пис јола гәдәм гојмасына неҹә сәбәб ола биләр?
14 Әҝәр биздә әсил иман оларса, Јеһова бизим үчүн реал олаҹаг. Амма О, бизим үчүн реал дејилсә, биз асанлыгла сәһв јола гәдәм гојаҹағыг. Гәдим заманларда Аллаһын халгы арасында баш верәнләри хатырлајаг. Јеһова Језекел пејғәмбәрә халгынын ҝизлиндә һансы ишләрлә мәшғул олдуғуну ҝөстәрди. Мүгәддәс Китабда дејилир: «Еј бәшәр оғлу, ҝөрүрсәнми Исраил нәслинин ағсаггаллары өз бүтләринин отагларында, гаранлыг јерләрдә нә едир? Она ҝөрә ки онлар “Рәбб бизи ҝөрмүр, Рәбб өлкәни тәрк етди” дејир» (Јез. 8:12). Проблемин көкүнүн нәдә олдуғуна диггәт јетирдинми? Онлар дүшүнүрдүләр ки, Јеһова онларын әмәлләриндән бихәбәрдир. Јеһова онлар үчүн реал дејилди.
15. Јеһоваја иман етмәјимиз бизи неҹә мүдафиә едир?
15 Инди исә Јусифин нүмунәсинә бахаг. Аиләсиндән вә халгындан узаг дүшсә дә, о, Потифарын арвады илә јахынлыг етмәкдән имтина етди. Нәјә ҝөрә? О демишди: «Мән неҹә бу бөјүк пислији едиб Аллаһын өнүндә ҝүнаһа бата биләрәм?» (Јар. 39:7—9). Бәли, Јеһова онун үчүн реал иди. Әҝәр Аллаһ бизим үчүн дә реалдырса, онда тәкликдә әхлагы позан филмләрә, верилишләрә бахмајаҹағыг вә Аллаһын зәһләси ҝетдији диҝәр ишләрлә мәшғул олмајаҹағыг. Биз: «Тәмиз үрәклә евимдә јашајаҹағам, ијрәнҹ шејләрдән ҝөзүмү чәкәҹәјәм», — дејә охујан мәзмурчу кими, Аллаһ гаршысында тәмиз галмаға гәти гәрарлы олаҹағыг (Мәз. 101:2, 3).
Тәмкинли олмагла үрәјини гору
16, 17. а) «Сүлејманын мәсәлләри» китабында ганмаз бир ҹаванын ҝүнаһын тәләсинә дүшмәси неҹә тәсвир олунур? б) Јашымыздан асылы олмајараг, бу, һәр кәсин башына неҹә ҝәлә биләр? (26-ҹы сәһифәдәки шәклә бах.)
16 Руһун бәһрәсинә дахил олан сонунҹу хүсусијјәт тәмкинликдир, јәни өзүнә һаким олмагдыр. Бу, бизә Аллаһын мүһакимә етдији шејләрә «јох» демәјә вә үрәјимизи горумаға көмәк едир (Сүл. мәс. 4:23). Сүлејманын мәсәлләри 7:6—23 ајәләриндә тәсвир олунан бир һадисәјә нәзәр салаг. Орада «ганмаз бир ҹаваны»н фаһишәнин һијләсинә неҹә ујдуғундан бәһс олунур. О, «гадынын евинин тининә јахын күчәдән» кечән заман онун тәләсинә дүшүр. Ола билсин, ҝәнҹ садәҹә мараг хатиринә орадан кечмәк фикринә дүшмүшдү. Һәр шеј чох тез баш верди. О, ахмаг јола гәдәм гојдуғуну вә бу јолун фәлакәтә апардығыны дәрк етмирди.
17 Бу ҝәнҹ фаҹиә илә нәтиҹәләнән сәһвдән неҹә гачына биләрди? «Онун јолуна дөнмә» мәсләһәтинә әмәл етмәклә (Сүл. мәс. 7:25). Бурада бизим үчүн дә дәрс вар: әҝәр мүгәддәс руһун бизә тәсир етмәсини истәјириксә, өзүмүзү ширникдириҹи вәзијјәтләрә мәруз гојмамалыјыг. Мәсиһчинин ‘ганмаз ҹаванын’ ахмаг јолуна гәдәм гојмасына нә ҝәтириб чыхара биләр? Телевизија каналларыны ора-бура чевирмәк вә ја бош-бошуна Интернетдә бир сәһифәдән о бири сәһифәјә кечмәк. Бу заман онун гаршысына тәсадүфән еһтирас ојадан сәһнәләр чыха биләр, јахуд да о, өзү биләрәкдән белә сәһнәләри ахтармаға башлаја биләр. Ола билсин, һәмин инсанда тәдриҹән порнографијаја бахмаг кими чиркин вәрдиш јарансын. Нәтиҹәдә, бу, онун виҹданыны ләкәләјәҹәк вә Аллаһла мүнасибәтләрини позаҹаг. Бу вәрдиш һәтта онун һәјаты баһасына баша ҝәлә биләр. (Ромалылара 8:5—8 ајәләрини оху.)
18. Мәсиһчи үрәјини горумаг үчүн һансы тәдбирләри ҝөрә биләр вә бу, өзүнә һаким олмагла неҹә әлагәлидир?
18 Әлбәттә, әҝәр биз тәсадүфән әдәбсиз шәкилләрлә вә сәһнәләрлә растлашырыгса, онда өзүмүзү әлә алараг дәрһал бир тәдбир ҝөрмәлијик. Әмин ола биләрик ки, биз буну баҹараҹағыг. Амма ән јахшысы одур ки, ширникдириҹи вәзијјәтләрин јаранмасына үмумијјәтлә јол вермәјәк (Сүл. мәс. 22:3). Лазыми сәрһәдләр гојмаг вә онлары кечмәмәк үчүн ҝәрәк өзүмүзә һаким олмағы баҹараг. Мәсәлән, компүтери һамынын ҝөрә биләҹәји јердә ишләтмәк бизим үчүн мүдафиә ола биләр. Бәзиләри јалныз башгаларынын јанында компүтердән истифадә етмәк вә ја телевизора бахмаг, диҝәрләри исә үмумијјәтлә Интернетә гошулмамаг гәрарына ҝәлибләр. (Матта 5:27—30 ајәләрини оху.) Ҝәлин биз дә өзүмүзү вә аиләмизи горумаг үчүн әлимиздән ҝәләни әсирҝәмәјәк. Онда Јеһоваја ‘сидги-үрәкдән, тәмиз виҹданла вә ријасыз имандан доған мәһәббәтлә’ ибадәт едә биләҹәјик (1 Тим. 1:5).
19. Мүгәддәс руһун һәјатымыза рәһбәрлик етмәсинә јол вермәк һансы хејир-дуалары ҝәтирир?
19 Мүгәддәс руһун фәалијјәти нәтиҹәсиндә әрсәјә ҝәлән бәһрәнин бир чох фајдасы вар. Һәлимлик вә сәбир јығынҹагда сүлһү горујур. Јахшылыг вә хејирхаһлыг аиләни даһа хошбәхт едир. Иман вә тәмкинлик хүсусијјәтләри сајәсиндә исә бизим Јеһова илә мүнасибәтләримиз сых олаҹаг вә Онун гаршысында тәмизлији горујаҹағыг. Галатијалылара 6:8 ајәсиндә даһа бир хејир-дуа јазылыб: «Руһ үчүн әкән руһдан әбәди һәјат бичәҹәк». Бәли, Мәсиһин фидјә гурбанлығы сајәсиндә Јеһова Онун руһунун рәһбәрлији алтында јашајанлара ҝәләҹәкдә бу руһ васитәсилә әбәди һәјат бәхш едәҹәк.
Неҹә ҹаваб верәрдиниз?
• Һәлимлик вә сәбир јығынҹагда сүлһү неҹә горујур?
• Мәсиһчиләрә аиләләриндә јахшылыг вә хејирхаһлыг хүсусијјәтләрини тәзаһүр етдирмәјә нә көмәк едәҹәк?
• Иман вә тәмкинлик сајәсиндә мәсиһчи үрәјини неҹә горуја биләр?
[24-ҹү сәһифәдәки шәкил]
Сөһбәт гызғын мүбаһисәјә чеврилмәсин дејә нә едә биләрсән?
[25-ҹи сәһифәдәки шәкил]
Мүгәддәс руһун бәһрәсини арашдырмаг һансы хејир-дуалары ҝәтирир?
[26-ҹы сәһифәдәки шәкил]
Иман вә тәмкинлик тәзаһүр етдирәрәк һансы тәһлүкәләрин гаршысыны алаҹағыг?