Мәсиһчиләр руһән вә һәгигәтән ибадәт едирләр
“Аллаһ Руһдур вә Она ибадәт едәнләрин руһән вә һәгигәтән ибадәт етмәләри ҝәрәкдир” (ЈӘҺЈА 4:24).
1. Јеһоваја һансы ибадәт мәгбулдур?
ЈЕҺОВАНЫН ваһид Оғлу Иса Мәсиһ, Атасына һансы ибадәтин мәгбул олдуғуна даир шүбһә јери гојмады. Иса, Сухар шәһәри јахынлығындакы су гујусунун јанында самаријалы гадынла һәјәҹанландырыҹы һәгигәти бөлүшәрәк деди: “Сиз билмәдијинизә ибадәт едирсиниз, биз билдијимизә ибадәт едирик; чүнки гуртулуш јәһудиләрдәндир. Амма һәгиги ибадәт едәнләрин Атаја руһән вә һәгигәтән ибадәт едәҹәкләри саат ҝәлир вә ҝәлди дә. Чүнки Ата Өзүнә бу ҹүр ибадәт едәнләр ахтарыр. Аллаһ Руһдур вә Она ибадәт едәнләрин руһән вә һәгигәтән ибадәт етмәләри ҝәрәкдир” (Јәһја 4:22-24). Биз бу сөзләри неҹә баша дүшмәлијик?
2. Самаријалыларын ибадәти нәјә әсасланырды?
2 Самаријалылар јалан дини нөгтеји-нәзәрләрә малик идиләр. Онлар Мүгәддәс Јазыларын тәкҹә илк беш китабынын Аллаһдан илһам алдығыны вә бу китабларын јалныз өзләри тәрәфиндән едилән тәрҹүмәсини гәбул едирдиләр. Бу беш китабы исә Самаријалыларын Төвраты адландырырдылар. Самаријалылар әслиндә Аллаһы танымырдылар, јәһудиләрә исә Мүгәддәс Китаб биликләри һәвалә едилмишди (Ромалылара 3:1, 2). Садиг јәһудиләр вә башга инсанлар Јеһованын илтифатындан фајдаланмаг имканына малик идиләр. Бәс бунун үчүн онлардан нә тәләб олунурду?
3. Аллаһа “руһән вә һәгигәтән” ибадәт етмәк үчүн нә тәләб олунур?
3 Јеһованы мәмнун етмәк үчүн, кечмишдә јашајан јәһудиләр, самаријалылар вә башга инсанлар нә етмәли идиләр? Онлар Аллаһа “руһән вә һәгигәтән” ибадәт етмәли идиләр. Биздән дә ејни шеј тәләб олунур. Доғрудур ки, биз Аллаһа руһ јүксәклији илә, јә’ни сә’јлә хидмәт етмәлијик вә бу хидмәтә бизи мәһәббәт вә иманла долу үрәк тәшвиг етмәлидир. Амма Аллаһа руһән ибадәт етмәк үчүн биздә Аллаһын мүгәддәс руһунун олмасы вә онун рәһбәрлијинә итаәткарлыг ҝөстәрмәјимиз хүсусилә ваҹибдир. Аллаһын Кәламыны өјрәнмәјин вә һәјатымызда тәтбиг етмәјин васитәсилә дүшүнҹә тәрзимизи Аллаһын дүшүнҹә тәрзинә ујғунлашдырмалыјыг (1 Коринфлиләрә 2:8-12). Бундан әлавә, Јеһоваја мәгбул олсун дејә, ибадәтимиз һәгигәтдә иҹра олунмалыдыр. Ибадәтимиз, Аллаһын Кәламы олан Мүгәддәс Китабда Аллаһ вә Онун нијјәтләри һаггында јазылан мә’лумата ујғун ҝәлмәлидир.
Һәгигәти тапмаг мүмкүндүр
4. Һәгигәт һаггында һансы фикирләр мөвҹуддур?
4 Фәлсәфәни өјрәнән бә’зи инсанлар белә бир нәтиҹәјә ҝәлмишләр ки, бәшәријјәт мүтләг һәгигәти тапмаг игтидарында дејил. Исвечли мүәллиф Алф Алберг јазмышдыр: “Бир чох фәлсәфи суалларын маһијјәти беләдир ки, онлара мүәјјән ҹаваб вермәк мүмкүн дејил”. Бәс һәгигәтин јалныз нисби олдуғу доғрудурму? Иса Мәсиһ белә дүшүнмүрдү.
5. Иса дүнјаја нә үчүн ҝәлмишди?
5 Нөвбәти һадисәләрин шаһиди олдуғумузу тәсәввүр едәк: ерамызын 33-ҹү илинин башланғыҹыдыр, Иса Рома валиси Понти Пилатын гаршысында дајаныб. Иса Пилата дејир: “Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим”. Пилат сорушур: “Һәгигәт нәдир?”. Лакин о, өз суалына ҹаваб ҝөзләмир (Јәһја 18:36-38).
6. а) “Һәгигәт” сөзү неҹә мүәјјән едилир? б) Иса давамчыларына нәји һәвалә етмишди?
6 “Һәгигәт” сөзү “доғрудан, һәгигәтән олмуш вә ја олан шеј, һадисә” кими мүәјјән едилир (“Азәрбајҹан дилинин изаһлы лүғәти”). Бәс Иса үмуми һәгигәт һаггындамы шәһадәт едирди? Хејр. О, конкрет һәгигәти нәзәрдә тутурду. Иса давамчыларына бу һәгигәти вә’з етмәји һәвалә едәрәк деди: “Бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20). Индики дүнја системинин сону ҝәлмәздән әввәл, Исанын әсл давамчылары бүтүн јер үзүндә ‘Мүждәнин һәгигәтини’ бәјан едәҹәкләр (Матта 24:3; Галатијалылара 2:14). Бунунла Исанын сөзләри јеринә јетмәлидир: “Падшаһлыг һаггында олан бу Мүждә милләтләрин һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир” (Матта 24:14, И–93). Буна ҝөрә дә, Падшаһлыг һаггындакы хош хәбәри тәблиғ едәрәк, бүтүн халглара һәгигәти өјрәдән кәсләрин ким олдуғуну мүәјјән етмәк олдугҹа ваҹибдир.
Һәгигәти өјрәнмәјин јолу
7. Јеһованын руһани һәгигәт Мәнбәји олдуғуну неҹә сүбут едәрдиниз?
7 Јеһова руһани һәгигәтин Мәнбәјидир. Мәзмурчу Давуд Јеһованы “һәгигәт Аллаһы” адландырмышды (Мәзмур 31:5; 43:3). Иса е’тираф едирди ки, онун Атасынын сөзү һәгигәтдир; о һәмчинин дејирди: “Пејғәмбәрләрин китабларында: “Онларын һамысыны да Аллаһ өјрәдәҹәкдир” дејә јазылмышдыр. Атамы ешидиб, өјрәнән һәр кәс Мәним јаныма ҝәләҹәкдир” (Јәһја 6:45; 17:17; Ишаја 54:13). Бурадан ајдын олур ки, һәгигәти ахтаранлар “Даһи Тә’лиматчы” олан Јеһова тәрәфиндән тә’лим алаҹаглар (Ишаја 30:20,ЈД, 21). Һәгигәти ахтаран кәсләрә “Аллаһ билијини” әлдә етмәк ҝәрәкдир (Сүлејманын мәсәлләри 2:5). Јеһова һәгигәти мәһәббәтлә өјрәдир вә ону мүхтәлиф јолларла чатдырыр.
8. Аллаһ һәгигәти һансы јолларла өјрәдир вә чатдырырды?
8 Мәсәлән, Аллаһ Гануну исраиллиләрә мәләкләрин васитәсилә вермишди (Галатијалылара 3:19). Тајфа башчылары олан Ибраһим вә Јагуба хејир-дуа верәҹәјини јухуда вә’д етмишди (Тәквин 15:12-16; 28:10-19). Аллаһ, һәтта Өзү ҝөјләрдән данышды, мәсәлән, Иса вәфтиз олунан заман јер үзүндә һәјәҹанландырыҹы сөзләр ешидилди: “Бу Мәним севимли Оғлумдур, Ондан чох мәмнунам” (Матта 3:17). Биз Аллаһа, Мүгәддәс Китабы јазанларын васитәсилә һәгигәти чатдырдығына ҝөрә дә миннәтдар ола биләрик (2 Тимотејә 3:16, 17). Беләликлә, биз Аллаһын Кәламыны өјрәнмәклә “һәгигәтә иман” әлдә едирик (2 Салониклиләрә 2:13).
Һәгигәт вә Аллаһын Оғлу
9. Аллаһ һәгигәти өз Оғлунун васитәсилә неҹә ачырды?
9 Аллаһ инсанлара һәгигәти хүсусилә дә Оғлу Иса Мәсиһин васитәсилә ачырды (Ибраниләрә 1:1-3). Һәгигәти Иса кими данышан јох иди (Јәһја 7:46). Һәтта ҝөјә галхдыгдан сонра белә, Иса Атасындан ҝәлән һәгигәти ачырды. Мәсәлән, һәвари Јәһја Иса Мәсиһ тәрәфиндән вәһј алды. “Аллаһ бу вәһји Мәсиһә верди ки, тезликлә баш вермәси ваҹиб олан һадисәләри гулларына ҝөстәрсин” (Вәһј 1:1-3).
10, 11. а) Исанын шәһадәт етдији һәгигәт нә илә бағлыдыр? б) Исанын сајәсиндә һәгигәт неҹә ҝерчәкләширди?
10 Иса Понти Пилата, јер үзүнә һәгигәтә шәһадәт етмәк үчүн ҝәлдијини сөјләди. Хидмәти әрзиндә Иса аҝаһ етди ки, бу һәгигәт, Мәсиһин рәһбәрлији алтында олан сәмави Падшаһлыг васитәсилә Јеһованын али һакимијјәтинә бәраәт газандырмагла бағлыдыр. Лакин Иса үчүн һәгигәтә шәһадәт етмәк, тәблиғ етмәкдән вә өјрәтмәкдән даһа чох әһәмијјәт кәсб едирди. Иса һәгигәти һәјата кечирирди, һәгигәт исә ҝерчәкләширди. Бу сәбәбдән, һәвари Павел јазырды: “Буна ҝөрә, гој һеч ким јемәк вә ичмәк үзүндән, јахуд бајрам, һилал вә ја шәнбә мәсәләси үзүндән сизи мәһкум етмәсин; чүнки бунлар, ҝәләҹәк шејләрин көлҝәсидир, әсли исә Мәсиһә мәхсусдур” (Колослулара 2:16, 17).
11 Мәсәлән, габагҹадан дејилдији кими, Иса Бејтлеһемдә анадан олдугда һәгигәт ҝерчәкләшди (Мика 5:2; Лука 2:4-11). Мәсиһин 69 “һәфтә”, јә’ни иллик һәфтәдән сонра ҝәләҹәји һагда Даниелин пејғәмбәрлик сөзләри һәјата кечдикдә дә һәгигәт ҝерчәк олду. Бу, габагҹадан дејиләнләрә там мүвафиг олараг, ерамызын 29-ҹу илиндә Иса вәфтиз олунан вә мүгәддәс руһла мәсһ едиләрәк өзүнү Аллаһа һәср едән заман баш верди (Даниел 9:25; Лука 3:1, 21, 22). Иса Падшаһлығын тәблиғчиси кими хидмәт едәрәк инсанлара ишыг ҝәтирән заман да һәгигәт ҝерчәкләшмәјә давам едирди (Ишаја 9:1, 2, 6, 7; 61:1, 2; Матта 4:13-17; Лука 4:18-21). Нәһајәт, Иса өлдүкдән вә дирилдикдән сонра да һәгигәт ҝерчәк олду (Мәзмур 16:8-11; Ишаја 53:5, 8, 11, 12; Матта 20:28; Јәһја 1:29; Һәвариләрин ишләри 2:25-31).
12. Нәјә ҝөрә Иса: “Һәгигәт... Мәнәм” дејә билди?
12 Һәгигәт Иса Мәсиһдә ҹәмләшдији үчүн, о, белә дејә билди: “Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз” (Јәһја 14:6). Инсанлар, Исанын Аллаһын нијјәтиндәки ролуну е’тираф етмәклә “һәгигәт тәрәфдары” олдугда, руһән азад олурлар (Јәһја 8:32-36; 18:37). Мәҹази мә’нада гојунларла мүгајисә едилән инсанлар һәгигәти гәбул едиб, иманла Мәсиһин јолуну изләдикләри үчүн, әбәди һәјата наил олаҹаглар (Јәһја 10:24-28).
13. Һансы үч саһәјә даир Мүгәддәс Китаб һәгигәтини өјрәнәҹәјик?
13 Исанын вә онун Аллаһдан илһам алмыш шаҝирдләринин өјрәтдикләри һәгигәтин мәҹмусу, һәгиги мәсиһчи иманынын әсасыны тәшкил едир. Буна ҝөрә дә ‘имана ујғун давранан’ кәсләр ‘һәгигәтдә јеријирләр’ (Һәвариләрин ишләри 6:7; 3 Јәһја 3, 4, И–93). Бәс бу ҝүн кимләр һәгигәтдә јеријир? Кимләр бүтүн халглары һәгигәтә өјрәдир? Биз бу суаллары нәзәрдән кечирәрәк диггәтимизи илк мәсиһчиләрә ҹәмләшдирәҹәк вә өјрәнәҹәјик ки, 1) е’тигада, 2) ибадәтә вә 3) давраныша даир Мүгәддәс Китаб һәгигәти нәдән ибарәтдир.
Һәгигәт вә е’тигад
14, 15. Илк мәсиһчиләрин вә Јеһованын Шаһидләринин Мүгәддәс Јазылара олан мүнасибәтләри һаггында нә дејәрдиниз?
14 Илк мәсиһчиләр Јеһованын Кәламында јазыланлара бөјүк еһтирам бәсләјирдиләр (Јәһја 17:17). Е’тигад вә дини һәјата ҝәлдикдә исә, Кәлам онлар үчүн ме’јар кими хидмәт едирди. II вә III әсрләрдә јашамыш Искәндәријјәли Климент демишди: “Камиллијә ҹан атан кәсләр, инандыглары шејә Мүгәддәс Јазыларда сүбут тапмајынҹа һәгигәтин ахтарышына сон гојмајаҹаглар”.
15 Илк мәсиһчиләр кими, Јеһованын Шаһидләри дә Мүгәддәс Китаба бөјүк еһтирам бәсләјирләр. Онлар инанырлар ки, “һәр Мүгәддәс Јазы Аллаһдан илһам алмыш вә тә’лим... үчүн фајдалыдыр” (2 Тимотејә 3:16). Ҝәлин, илк мәсиһчиләрин бә’зи е’тигадларына, Јеһованын мүасир хидмәтчиләринин Мүгәддәс Китаба әсас дәрслик кими истинад едәрәк әлдә етдикләри билик нөгтеји-нәзәриндән бахаг.
Ҹан һаггында һәгигәт
16. Ҹан һаггында олан һәгигәт нәдән ибарәтдир?
16 Илк мәсиһчиләр Мүгәддәс Јазыларда дејиләнләрә инандыглары үчүн ҹан һаггында һәгигәти өјрәдирдиләр. Онлар билирдиләр ки, Аллаһ инсаны јаратдыгда инсан “јашајан ҹан олду” (Тәквин 2:7). Бундан башга, онлар е’тираф едирдиләр ки, инсанын ҹаны өлүр (Һезекиел 18:4; Јагуб 5:20). Онлар һәмчинин билирдиләр ки, “өлүләр бир шеј билмәзләр” (Ваиз 9:5, 10).
17. Өлүләр үчүн һансы үмидин мөвҹуд олдуғуну неҹә изаһ едәрдиниз?
17 Ејни заманда Исанын илк шаҝирдләри мөһкәм үмидә малик идиләр ки, Аллаһын јаддашында олан өлүләр дирилдиләҹәкләр, јә’ни һәјата гајтарылаҹаглар. Бу е’тигады Павел ајдын олараг изаһ етди: “Мән дә Аллаһа үмид едирәм ки, һәм салеһ, һәм дә салеһ олмајан өлүләрин дирилмәси олаҹагдыр” (Һәвариләрин ишләри 24:15). Һәтта сонракы дөврләрдә јашамыш вә өзүнү мәсиһчи һесаб едән Минуси Феликс јазырды: “Елә бир ағылсыз вармы ки, илк дәфә Аллаһ тәрәфиндән јаранан инсанын, елә Онун тәрәфиндән јенидән јарадыла билмәјәҹәјини ҹүр’әтлә исрар етсин?” Илк мәсиһчиләр кими, Јеһованын Шаһидләри дә инсанын ҹаны, өлүмү вә дирилмәси һаггында Мүгәддәс Китаб һәгигәтинин тәрәфдарыдырлар. Инди исә Аллаһын вә Мәсиһин охшарлығына диггәт јетирәк.
Һәгигәт вә Үч үгнум
18, 19. Нәјә ҝөрә демәк олар ки, Үч үгнум Мүгәддәс Китаб тә’лими дејил?
18 Илк мәсиһчиләр Аллаһы, Мәсиһи вә мүгәддәс руһу Үч үгнум һесаб етмирдиләр. “Британија енсиклопедијасы”нда дејилир: “Әһди Ҹәдиддә нә “Үч үгнум” сөзү, нә дә онун һаггында ајдын шәкилдә ифадә олунмуш еһкам вар; Иса вә онун давамчылары, “динлә, еј Исраил: Аллаһымыз Рәбб бир олан Рәббдир” сөзләри јазылан Әһди Әтигин бир һиссәсини — “Шма”ны инкар етмәк нијјәтиндә дејилдиләр (Тәс. 6:4)” (“The Encyclopædia Britannica”). Мәсиһчиләр нә Рома үчлүјүнә, нә дә һәр һансы башга танрылара ибадәт едирдиләр. Онлар Исанын, јалныз Јеһоваја ибадәт етмәјин ҝәрәклијини ҝөстәрән сөзләринә мүвафиг олараг јашајырдылар (Матта 4:10). Бундан әлавә, онлар Мәсиһин: “Ата Мәндән үстүндүр” сөзләринә инанырдылар (Јәһја 14:28). Јеһованын мүасир Шаһидләри дә бу ҹүр нөгтеји-нәзәрә саһибдирләр.
19 Исанын илк давамчылары Аллаһ, Мәсиһ вә мүгәддәс руһ арасында олан фәрги ҝөзәл ајырд едирдиләр. Онлар шаҝирдләри Үч үгнум наминә дејил, 1) Ата, 2) Оғул вә 3) мүгәддәс руһ наминә вәфтиз едирдиләр. Јеһованын Шаһидләри дә бу ҝүн Мүгәддәс Китаб һәгигәтләрини өјрәдир вә буна мүвафиг олараг, Аллаһ, Оғул вә мүгәддәс руһ арасында ајдын фәрг гојурлар (Матта 28:19).
Һәгигәт вә вәфтиз
20. Вәфтиз олунмаг истәјәнләр нәји билмәлидирләр?
20 Иса давамчыларына һәвалә етмишди ки, инсанлара һәгигәти өјрәдәрәк шаҝирдләр һазырласынлар. Вәфтиз үчүн олан тәләбләрә мүвафиг олсунлар дејә, инсанлар Мүгәддәс Китабын әсас тә’лимләрини билмәлидирләр. Мәсәлән, онлар Атанын вә Оғул Иса Мәсиһин тутдуғу мөвгеји вә һакимијјәти гәбул етмәлидирләр (Јәһја 3:16). Вәфтиз олунмаг истәјәнләр һәмчинин ону да баша дүшмәлидирләр ки, мүгәддәс руһ шәхсијјәт јох, Аллаһын фәал гүввәсидир (Тәквин 1:2).
21, 22. Сиз неҹә изаһ едәрдиниз: нәјә ҝөрә јалныз иман едән кәсләр вәфтиз олуна биләрләр?
21 Илк мәсиһчиләр јалныз шүурлу тәрздә вәфтиз олунмаг истәјәнләри, ҝүнаһларындан төвбә едән вә Аллаһын ирадәсини јеринә јетирмәк үчүн өзүнү Она там һәср едән кәсләри вәфтиз едирдиләр. Ерамызын 33-ҹү илинин Пентикост ҝүнүндә Јерусәлимә јығылан јәһудиләрин вә прозелитләрин Мүгәддәс Јазылардан артыг бир гәдәр биликләри варды. Мәсиһ олан Исадан данышан Петерин “сөзүнү севинҹлә гәбул едән” үч минә јахын инсан “вәфтиз олду” (Һәвариләрин ишләри 2:41; 3:19-4:4; 10:34-38).
22 Мәсиһчи вәфтизи јалныз иман едәнләр үчүндүр. Самаријанын сакинләри һәгигәти гәбул етдиләр вә “Аллаһын Падшаһлығы вә Иса Мәсиһин исми һаггында Мүждәни јајан Филипә иман етдикләри заман, кишиләр вә гадынлар” вәфтиз олундулар (Һәвариләрин ишләри 8:12, И–93). Јеһова һаггында билик әлдә едән, мөһкәм иманлы прозелит олан һәбәшистанлы бир хәдим Филипин сөјләдији Мәсиһ һаггындакы пејғәмбәрлијин иҹрасы илә илк өнҹә разылашды вә јалныз сонра вәфтиз олунду (Һәвариләрин ишләри 8:34-36). Даһа сонра Петер Корнелиуса вә јәһуди олмајан башга кәсләрә деди ки, “[Аллаһдан] горхан вә һагг иш ҝөрән Она мәгбулдур” вә Иса Мәсиһә иман едән һәр бир кәсин ҝүнаһлары бағышланаҹагдыр (Һәвариләрин ишләри 10:35, 43; 11:18). Бүтүн бунлар Исанын ‘шаҝирдләр һазырламаг... әмр етдији һәр шејә риајәт етмәји онлара өјрәтмәк’ тапшырығына мүвафигдир (Матта 28:19, 20; Һәвариләрин ишләри 1:8). Бу принсипә Јеһованын Шаһидләри дә риајәт едирләр — онлар вәфтизә јалныз Мүгәддәс Јазылар һаггында әсас биликләрә саһиб олан вә өзләрини Аллаһа һәср едән кәсләри бурахырлар.
23, 24. Мәсиһчиләрин дүзҝүн вәфтиз олунма гајдасы неҹәдир?
23 Иман едәнләрин дүзҝүн вәфтиз олунма гајдасы там суја батырылмагдыр. Иса Иордан чајында вәфтиз олунараг судан чыхды (Марк 1:10). Һәбәшистанлы хәдим, ҝөрүндүјү кими, ҝөлдә вәфтиз олунду. Онлар Филиплә бәрабәр ‘суја ҝирдиләр’, сонра бирликдә ‘судан чыхдылар’ (Һәвариләрин ишләри 8:36-40). Мүгәддәс Китабда вәфтизин мәҹази дәфнлә әлагәләндирилмәси дә суја там батырылмаға ишарә едир (Ромалылара 6:4-6; Колослулара 2:12).
24 Бир мәнбәдә дејилир: “Әһди Ҹәдиддә вәфтиз едилмә илә әлагәдар ајры-ајры һадисәләрин тәсвиринә әсасән, вәфтиз олунан кәси суја батырырдылар” (“The Oxford Companion to the Bible”). Бир франсыз әсәринә әсасән “илк мәсиһчиләр су олан һәр бир јердә суја там батырылмагла вәфтиз олунурдулар” (“Larousse du XXe Siècle”, Paris, 1928-ҹи ил). “Исадан сонра Христианлығын зәфәри” адлы китабда исә гејд едилир: “Әсаслы сурәтдә иҹра олунан вәфтиз, әввәл иманы е’тираф етмәји, сонра исә Мәсиһ наминә бүтүнлүклә суја батырылманы тәләб едирди” (“After Jesus—The Triumph of Christianity”).
25. Нөвбәти мәгаләдә нәји мүзакирә едәҹәјик?
25 Јухарыда илк мәсиһчиләрин Мүгәддәс Китаба әсасланан е’тигадлары вә адәтләри барәдә јалныз бир нечә нүмунәни мүзакирә етдик. Онларла Јеһованын Шаһидләри арасында олан е’тигадлара даир башга охшарлыглары да ҝөстәрмәк олар. Нөвбәти мәгаләдә, инсанлары һәгигәтә өјрәдән кәсләри мүәјјән етмәјин даһа башга әламәтләрини мүзакирә едәҹәјик.
Сиз неҹә ҹаваб верәрдиниз?
• Аллаһ һансы ибадәти тәләб едир?
• Иса Мәсиһин сајәсиндә һәгигәт неҹә ҝерчәкләширди?
• Ҹан вә өлүм һаггында һәгигәт нәдән ибарәтдир?
• Мәсиһчи вәфтизи неҹә иҹра едилир вә вәфтиз олунанлардан нә тәләб олунур?
[12-ҹи сәһифәдәки шәкил]
Иса Пилата деди: “Мән... ҝәлмишәм ки, һәгигәтә шәһадәт едим”.
[13-ҹү сәһифәдәки шәкил]
Изаһ едә биләрсинизми, нәјә ҝөрә Иса деди ки, “Һәгигәт... Мәнәм”?
[14-ҹү сәһифәдәки шәкил]
Мәсиһчи вәфтизинә даир һәгигәт нәдән ибарәтдир?