Ҹәсарәтлә тәблиғ едәрәк Исаны тәглид един
«Биз Аллаһымыздан ҹәсарәт алдыг ки,.. сизә Аллаһын Мүждәсини елан едәк» (1 САЛОН. 2:2).
1. Нәјә ҝөрә Падшаһлыг һаггында хош хәбәр бу гәдәр ҹәлбедиҹидир?
ЈАХШЫ хәбәр ешитмәк һамыја хошдур! Ән јахшы хәбәр исә Аллаһын Падшаһлығы һаггында хош хәбәрдир. Бу хош хәбәр бизә әзаб-әзијјәтин, хәстәликләрин, ағры-аҹынын вә өлүмүн тезликлә арадан галдырылаҹағына үмид верир. Бу хәбәр ону гәбул едәнләрә әбәди һәјата јол ачыр, Аллаһын нијјәтини ачыглајыр вә Онунла јахын мүнасибәтләри неҹә гура биләҹәкләрини ҝөстәрир. Ола билсин, сән дүшүнүрдүн ки, хош хәбәр һамынын севинҹинә сәбәб олаҹаг. Амма әфсуслар олсун ки, бу, белә дејил.
2. Исанын: «Мән... ајырмаға ҝәлмишәм» сөзләрини изаһ един.
2 Иса шаҝирдләринә демишди: «Фикирләшмәјин ки, јер үзүнә сүлһ ҝәтирмәјә ҝәлмишәм; Мән сүлһ дејил, гылынҹ ҝәтирмәјә ҝәлдим. Чүнки Мән оғулу атадан, гызы анадан вә ҝәлини гајнанадан ајырмаға ҝәлмишәм; вә инсанын дүшмәнләри өз евинин сакинләри олаҹагдыр» (Мат. 10:34-36). Хош хәбәри севинҹлә гәбул етмәк әвәзинә, әксәр инсанлар ону рәдд едир. Бәзиләри, һәтта јахын аилә үзвләри белә бу хәбәри тәблиғ едәнләрә дүшмән кәсилир.
3. Тәблиғ етмәк тапшырығыны јеринә јетирмәк үчүн биздән нә тәләб олунур?
3 Биз Исанын бәјан етдији һәгигәтләри тәблиғ едирик. О вахт олдуғу кими, бу ҝүн дә чохлары бу хәбәрә ејни ҹүр һај верир. Бу, тәәҹҹүблү дејил. Чүнки Иса шаҝирдләринә демишди: «“Гул ағасындан үстүн дејилдир”. Әҝәр Мәни тәгиб етдиләрсә, сизи дә тәгиб едәҹәкләр» (Јәһ. 15:20). Бир чох өлкәләрдә ачыг-ашкар тәгибләрлә үзләшмәсәк дә, тәблиғ етдијимиз инсанлар тәрәфиндән әдавәт вә лагејдликлә гаршыланырыг. Буна ҝөрә дә хош хәбәри ҹәсарәтлә тәблиғ етмәк үчүн биздән иман вә мәтин олмаг тәләб олунур. (2 Петер 1:5-8 ајәләрини оху.)
4. Тәблиғ етмәк үчүн нәјә ҝөрә Павелә «ҹәсарәт» лазым иди?
4 Ола билсин, бәзән хидмәтдә иштирак етмәк сәнә чәтиндир вә јахуд хидмәтин бәзи саһәләри сәни горхудур. Әҝәр беләдирсә, јадда сахла ки, сән тәк дејилсән. Һәвари Павел һәгигәти чох јахшы баша дүшән, ҹәсарәтли вә горхмаз тәблиғчи олса да, тәблиғ етмәк бәзән онун үчүн дә чәтин олурду. О, Салоникдәки мәсиһчиләрә јазмышды: «Билдијиниз кими, габагҹа Филипидә әзаб чәкиб, тәһгир олундуғумуз һалда, биз Аллаһымыздан ҹәсарәт алдыг ки, бөјүк мүгавимәтә бахмајараг, сизә Аллаһын Мүждәсини елан едәк» (1 Салон. 2:2). Һәвари Павел вә әмәкдашы Сила Филипидә һакимләр тәрәфиндән дәјәнәклә дөјүләрәк, зиндана атылыб гандалландылар (Һәв. иш. 16:16-24). Буна бахмајараг, Павел вә Сила ‘ҹәсарәтләниб’ тәблиғ етмәјә давам етдиләр. Бәс биз буну неҹә едә биләрик? Бу суала ҹаваб тапмаг үчүн ҝәлин ҝөрәк, гәдим заманларда Аллаһын хидмәтчиләри нәјин сајәсиндә Јеһова һаггында һәгигәтләри бәјан едә билирдиләр вә онларын нүмунәсини биз неҹә тәглид едә биләрик.
Онлар әдавәтә ҹәсарәтлә синә ҝәрдиләр
5. Нәјә ҝөрә Јеһоваја садиг оланлардан һәр заман ҹәсарәтли олмаг тәләб олунурду?
5 Әлбәттә, ән бөјүк ҹәсарәт вә горхмазлығы Иса Мәсиһ ҝөстәрмишдир. Бунунла белә, бәшәр тарихинин та башланғыҹындан Јеһованын бүтүн садиг хидмәтчиләринин ҹәсарәтә еһтијаҹы олуб. Нәјә ҝөрә? Еден бағында галдырылан үсјандан сонра Јеһова Өз хидмәтчиләри илә Шејтанын хидмәтчиләри арасында дүшмәнчилик олаҹағыны сөјләди (Јар. 3:15). Бу дүшмәнчилик тез бир заманда, салеһ инсан Һабил гардашы тәрәфиндән өлдүрүләндә өзүнү бүрузә верди. Сонралар Дашгындан габаг јашамыш садиг Ханок да бу дүшмәнчилијә туш ҝәлди. О, пејғәмбәрлик едирди ки, Аллаһ он минләрҹә мүгәддәсләри илә ҝәлиб аллаһсызлара һөкм едәҹәк (Јәһуда 14, 15). Бу хәбәр инсанларын әксәријјәти тәрәфиндән рәғбәтлә гаршыланмады. Инсанлар Ханока нифрәт едирдиләр вә Јеһова онун һәјатына сон гојмасајды, чох еһтимал ки, онлар ону өлдүрәҹәкдиләр. Ханок неҹә дә ҹәсарәтли иди! (Јар. 5:21-24).
6. Нәјә ҝөрә фиронла данышаркән Мусаја ҹәсарәт лазым иди?
6 Өзүнү тәкҹә аллаһларын тәмсилчиси јох, о ҹүмләдән ҝүнәш танрысы Ранын оғлу — аллаһ һесаб едән фиронла данышан Мусанын ҝөстәрдији ҹәсарәт һаггында да фикирләшәк. Ола билсин ки, о, диҝәр фиронлар кими, өз сурәтинә ибадәт едирди. Фиронун сөзү ганун иди; о јалныз әмр верирди. Гүдрәтли, мәғрур вә инадкар фирон башгаларынын дедији илә отуруб-дурмаға алышмамышды. Һәлим чобан олан Муса мәһз белә бир инсанын һүзуруна дәвәт едилмәмиш вә арзуолунмаз гонаг кими тәкрар-тәкрар ҝәлмәк мәҹбуријјәтиндә иди. Муса нә һагда хәбәрдарлыг едирди? Виранедиҹи бәлалар һаггында. Бәс о һансы тәләби ирәли сүрүрдү? О, фиронун бир нечә милјонлуг гулунун өлкәдән бурахылмасыны истәјирди! Сәнҹә, бунун үчүн Мусаја ҹәсарәт лазым иди? Сөзсүз ки! (Сај. 12:3; Ибр. 11:27).
7, 8. а) Аллаһын гәдимдә јашамыш хидмәтчиләри һансы сынагларла үзләширдиләр? б) Онлар һәмин дөврдә тәмиз ибадәти ҹәсарәтлә дәстәкләмәк үчүн һарадан ҝүҹ алырдылар?
7 Сонракы дөврләрдә јашамыш пејғәмбәрләр вә Аллаһын диҝәр садиг хидмәтчиләри тәмиз ибадәти ҹәсарәтлә мүдафиә етмәјә давам едирдиләр. Шејтан дүнјасынын онлара рәһми ҝәлмирди. Павел дејир: «Онлар дашландылар, мишарланыб бөлүндүләр, ишҝәнҹәләрлә сынандылар, гылынҹдан кечирилиб өлдүрүлдүләр; гојун дәрисиндән вә кечи ҝөнүндән палтара бүрүнүб авара ҝәздиләр, јохсуллуға, сыхынтыја вә ҹәфаја мәруз галдылар» (Ибр. 11:37). Аллаһын бу садиг хидмәтчиләринә мөһкәм дурмагда нә көмәк едирди? Бир нечә ајә әввәл һәвари Павел Һабилин, Ибраһимин, Саранын вә башгаларынын сынаглара нәјин сајәсиндә таб ҝәтирдикләрини гејд едир. О дејир ки, ‘онлар вәд едилмиш шејләри алмадылар, амма бу шејләри [иманла] узагдан ҝөрүб хош гаршыладылар’ (Ибр. 11:13). Шүбһә јохдур ки, Илјас, Јеремја вә мәсиһчиликдән әввәл јашамыш вә ҹәсарәтлә һәгиги ибадәтин тәрәфини тутмуш Аллаһын диҝәр садиг хидмәтчиләри фикирләрини Јеһованын вәдләринә ҹәмләдикләри үчүн мәтин дура билмишләр (Тит. 1:2).
8 Гәдимдә јашамыш бу садиг хидмәтчиләр парлаг вә ҝөзәл ҝәләҹәјә үмид едирдиләр. Онлар дирилиб камиллијә говушаҹаг, һәмчинин Мәсиһ Исанын вә онун 144 000 һакимијјәт шәрикинин каһинләр кими хидмәт етмәләри сајәсиндә ‘чүрүклүјә олан көләликдән азад олунаҹаглар’ (Ром. 8:21). Бундан әлавә, Јеһованын Јеремјаја вердији вәддә әкс олунан тәминат да она вә Аллаһын гәдимдә јашамыш диҝәр хидмәтчиләринә ҹәсарәт верирди: «“Онлар сәнинлә вурушаҹаг, анҹаг ҝүҹләри чатмајаҹаг, чүнки сәни гуртармаг үчүн Мән сәнинлә олаҹағам” Рәбб белә бәјан едир» (Јер. 1:19). Аллаһын ҝәләҹәјимизә вә бизи руһани ҹәһәтдән мүдафиә едәҹәјинә даир вердији вәдләр үзәриндә дүшүнәндә биз дә мөһкәмләнирик. (Сүл. мәс. 2:7; 2 Коринфлиләрә 4:17, 18 ајәләрини оху.)
Исаны ҹәсарәтлә тәблиғ етмәјә мәһәббәт тәшвиг едирди
9, 10. Иса ҹәсарәтли олдуғуну а) дин рәһбәрләринин, б) әсҝәрләрин, в) баш каһинин, г) Пилатын гаршысында неҹә ҝөстәрди?
9 Нүмунәмиз олан Иса ҹәсарәтини мүхтәлиф шәкилдә тәзаһүр етдирирди. Мәсәлән, һакимијјәт вә нүфуз саһиби олан инсанлар она нифрәт етсәләр дә, о, Аллаһын инсанлара чатдырмаг истәдији хәбәри дәјишмәдән, олдуғу кими сөјләјирди. О, нүфузлу дин рәһбәрләринин икиүзлүлүјүнү вә јалан тәлимләрини горхмадан ифша едирди. Һәмин инсанлар мүһакимә олунмаға лајиг идиләр, буна ҝөрә дә Иса сөзү бирбаша онларын үзүнә дејирди. Бир дәфә о демишди: «Вај һалыныза, дин алимләри вә фәрисејләр, икиүзлүләр! Чүнки сиз ағардылмыш мәгбәрәләрә бәнзәјирсиниз: чөлү ҝөзәл ҝөрүнүр, ичи исә өлү сүмүкләри вә һәр ҹүр мурдарлыгла долудур. Сиз дә беләҹә инсанлара заһирән салеһ ҝөрүнүрсүнүз, дахилән исә икиүзлүлүк вә фәсадла долусунуз» (Мат. 23:27, 28).
10 Бир дәстә әсҝәр Исаны тутмаг үчүн Ҝетсамани бағына ҝәләндә о, ҹәсарәтлә онларын гаршысына чыхды (Јәһ. 18:3-8). Сонра о, Синедриона ҝәтирилиб баш каһин тәрәфиндән сорғу-суала чәкилди. Һәтта баш каһинин ону өлдүрмәк үчүн бәһанә ахтардығыны билсә дә, Иса горхмадан Мәсиһ вә Аллаһын Оғлу олдуғуну тәсдигләди. Сөзүнә давам едәрәк әлавә етди ки, онлар онун «Гадирин сағында отурдуғуну вә ҝөјүн булудлары илә ҝәлдијини» ҝөрәҹәкләр (Марк 14:53, 57-65). Тезликлә Иса ону азад етмәк сәлаһијјәти олан Пилатын гаршысында дајанмалы олду. Амма она гаршы ирәли сүрүлән иттиһамлара ҹаваб вермәди (Марк 15:1-5). Бунун үчүн бөјүк ҹәсарәт тәләб олунурду.
11. Ҹәсарәт мәһәббәтлә неҹә бағлыдыр?
11 Иса Пилата деди: «Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим» (Јәһ. 18:37). Јеһова Исаја хош хәбәри тәблиғ етмәји тапшырмышды вә о, сәмави Атасыны севдији үчүн бу тапшырығы јеринә јетирмәкдән мәмнунлуг дујурду (Лука 4:18, 19). Иса инсанлары да севирди. О, инсанларын һәјатынын чох ағыр олдуғуну билирди. Биз дә Аллаһа вә инсанлара дәрин мәһәббәт бәсләдијимиздән ҹәсарәтлә вә горхмадан шаһидлик едирик (Мат. 22:36-40).
Мүгәддәс руһ бизә ҹәсарәтлә тәблиғ етмәјә ҝүҹ верир
12. Еркән мәсиһчиләрин севинҹинә нә сәбәб олмушду?
12 Исанын өлүмүндән бир нечә һәфтә сонра Јеһованын јени хилас оланлары онларын сырасына гошдуғу үчүн шаҝирдләр чох севинирдиләр. Һәтта бир ҝүнүн ичиндә тәхминән 3 000 адам — бир чох өлкәләрдән Јерусәлимә Пентикост бајрамыны гејд етмәк үчүн ахышан јәһудиләр вә прозелитләр вәфтиз олунду! Ҝөрүнүр, шәһәрдә һамы бу һагда данышырды! Мүгәддәс Китабда дејилир: «Һәр адамын ҹанына горху дүшүрдү. Вә һәвариләр васитәси илә чох харигәләр вә әламәтләр ҝөстәрилирди» (Һәв. иш. 2:41, 43).
13. Нәјә ҝөрә гардашлар ҹәсарәт үчүн дуа едирдиләр вә бундан сонра нә баш верди?
13 Гәзәб ичиндә олан дин рәһбәрләри Петер вә Јәһјаны һәбс едиб онлары бүтүн ҝеҹәни зинданда сахладылар вә онлара Иса һаггында данышмағы гадаған етдиләр. Азадлыға бурахылдыгдан сонра онлар башларына ҝәләнләри гардашлара данышдылар вә үзләшдикләри тәгибләр һаггында дуа едәрәк Јеһовадан хаһиш етдиләр: «Ја Рәбб... Өз гулларына гүввә вер ки, Сәнин сөзүнү там ҹәсарәтлә сөјләсинләр». Бәс сонра нә баш верди? ‘Һамы Мүгәддәс Руһла долду вә Аллаһын сөзүнү ҹәсарәтлә сөјләмәјә’ башлады (Һәв. иш. 4:24-31).
14. Мүгәддәс руһ тәблиғ ишиндә бизә неҹә көмәк едир?
14 Фикир верин ки, шаҝирдләрә Аллаһын Кәламыны ҹәсарәтлә данышмаға көмәк едән Јеһованын гүдрәтли мүгәддәс руһу иди. Һәгигәти башгаларына, һәтта хош хәбәрә мүгавимәт ҝөстәрән инсанлара белә данышмаг ҹәсарәтини верән Јеһовадыр. Јеһовадан мүгәддәс руһ диләсәк, ону вермәјә гадир олдуғуна вә мүтләг верәҹәјинә әмин ола биләрик. Јеһованын көмәјилә биз дә ҹәсарәтли олаҹаг вә истәнилән сынагдан галиб чыхаҹағыг. (Мәзмур 138:3 ајәсини оху.)
Мәсиһчиләр бу ҝүн дә ҹәсарәтлә тәблиғ едирләр
15. Бу ҝүн һәгигәт инсанлары бир-бириндән неҹә ајырыр?
15 Кечмишдә олдуғу кими, бизим ҝүнләрдә дә һәгигәт инсанлары бир-бириндән ајырыр. Бәзиләри хош хәбәрә мүсбәт һај вердикләри һалда, диҝәрләри бизим Аллаһа нәјә ҝөрә мәһз бу ҹүр ибадәт етдијимизи ја баша дүшмүр, ја да мөвгејимизә һөрмәт етмирләр. Исанын дедији кими, бәзиләри бизи тәнгид едир, әлә салыр, һәтта нифрәтлә јанашырлар (Мат. 10:22). Бәзән биз күтләви информасија васитәләри илә јајылан јалан мәлуматын вә гәрәзли тәблиғатын гурбаны олуруг (Мәз. 109:1-3). Буна бахмајараг, Јеһованын халгы хош хәбәри бүтүн јер үзүндә ҹәсарәтлә бәјан едир.
16. Һансы һадисә ҝөстәрир ки, хидмәтдә ҹәсарәтли олмағымыз инсанларын бахышларыны дәјишә биләр?
16 Ҹәсарәтли олмағымыз инсанларын Падшаһлыг һаггындакы хош хәбәрә мүнасибәтини дәјишә биләр. Гырғызыстандан олан бир баҹы башына ҝәләнләри белә нәгл едир: «Хидмәтдә мәнә бир нәфәр деди: “Мән Аллаһа инанырам, амма христианларын Аллаһына јох. Бир дә бу гапыја ҝәлсәниз, итими ачыб үстүнүзә бурахаҹағам!” Онун архасында зәнҹирләнмиш бөјүк бир булдог дајанмышды. Анҹаг “Падшаһлыг һаггында хәбәр” силсиләсиндән олан “Јалан динин сону јахындыр!” адлы 37 №-ли трактатын пајланмасы үзрә кампанија кечириләндә һәмин кишинин диҝәр аилә үзвләриндән киминләсә сөһбәт етмәк үмидилә онун гапысыны бир даһа дөјмәк гәрарына ҝәлдим. Бу сәфәр дә гапыны һәмин киши ачды. Дәрһал үрәјимдә Јеһоваја дуа едиб, кишијә дедим: “Саламәлејкүм, үч ҝүн әввәлки сөһбәтимиз јадымдадыр, итинизи дә хатырлајырам. Анҹаг евиниздән јан кечә билмәдим. Чүнки мән дә сизин кими ваһид һәгиги Аллаһа инанырам. Аллаһ Ону рүсвај едән динләри тезликлә јер үзүндән силәҹәк. Сиз бу һагда бу трактатдан даһа чох өјрәнә биләрсиниз”. Тәәҹҹүблү олса да, киши трактаты ҝөтүрдү. Сонра мән башга гапыја тәрәф ҝетдим. Бир нечә дәгигәдән сонра ҝөрдүм ки, киши әлиндә трактат мәнә јетишиб деди: “Мән буну охудум. Аллаһын гәзәбинә туш ҝәлмәмәк үчүн нә етмәлијәм?”». Һәмин киши Мүгәддәс Китабы өјрәнмәјә вә ҝөрүшләрә ҝәлмәјә башлады.
17. Бир баҹынын ҹәсарәти үрәјиндә инсан горхусу олан гадыны неҹә мөһкәмләндирди?
17 Бизим ҹәсарәтли олмағымыз башгаларыны да ҹәсарәтләндирә биләр. Русијада белә бир әһвалат баш вермишдир. Бир баҹы автобусда ҝедәркән јанындакы сәрнишинә журнал тәклиф етди. Бу заман бир киши јериндән сычрајыб журналы баҹынын әлиндән алды вә әзиб јерә атды. Онун үстүнә гышгырараг тәһгир етмәјә башлады. Ондан үнваныны истәди вә тәләб етди ки, бир даһа бу кәндә ајаг басмасын. Баҹы үрәјиндә дуа едиб Исанын сөзләрини јадына салды: «Бәдәни өлдүрүб ҹаны өлдүрә билмәјәнләрдән... горхмајын» (Мат. 10:28). О, сакитҹә јериндән галхыб кишијә: «Сизә үнван верән дејиләм, бу кәнддә дә тәблиғ етмәјә давам едәҹәјәм»,— дејиб автобусдан дүшдү. Баҹы Мүгәддәс Китабы өјрәтдији бир гадынын да һәмин автобусда олдуғундан хәбәрсиз иди. Гадынын үрәјиндә инсан горхусу олдуғундан о, мәсиһчи ҝөрүшләринә ҝәлмирди. Баҹымызын ҹәсарәтини ҝөрән бу гадын бундан сонра јығынҹаглара ҝетмәк гәрарына ҝәлди.
18. Иса кими ҹәсарәтлә тәблиғ етмәкдә сәнә нә көмәк едәҹәк?
18 Аллаһдан узаг олан бу дүнјада Иса кими тәблиғ етмәк үчүн ҹәсарәт тәләб олунур. Бу ишдә сәнә нә көмәк едә биләр? Диггәтини ҝәләҹәјә ҹәмлә. Аллаһа вә инсанлара гаршы мәһәббәтинин сөнмәсинә јол вермә. Дуада Јеһовадан ҹәсарәт дилә. Һәмишә јадда сахла ки, тәк дејилсән — Иса сәнинләдир (Мат. 28:20). Мүгәддәс руһ сәни мөһкәмләндирәҹәк. Јеһова да, өз нөвбәсиндә, сәни хејир-дуаландыраҹаг вә көмәјини сәндән әсирҝәмәјәҹәк. Буна ҝөрә дә ҝәлин даима ҹәсарәтли олаг вә дејәк: «Рәбб мәнә јардымчыдыр, мән горхмарам; инсан мәнә нә едә биләр?» (Ибр. 13:6).
Неҹә ҹаваб верәрдиниз?
• Нәјә ҝөрә Аллаһын хидмәтчиләри ҹәсарәтли олмалыдырлар?
• Ҹәсарәтли олмаг барәдә...
Мәсиһдән өнҹә јашамыш садиг инсанлардан нә өјрәндиниз?
Иса Мәсиһдән нә өјрәндиниз?
еркән мәсиһчиләрдән нә өјрәндиниз?
мүасир мәсиһчиләрдән нә өјрәндиниз?
[21-ҹи сәһифәдәки шәкил]
Иса дин рәһбәрләрини ҹәсарәтлә ифша едирди
[23-ҹү сәһифәдәки шәкил]
Јеһова тәблиғ етмәјимиз үчүн бизә ҹәсарәт верир