Бир-биринизи инкишаф етдирин
1 Һәвари Павел һәмиманлыларыны мөһкәмләндирмәк үчүн әлиндән ҝәләни едирди (Һәв. иш. 14:19-22). Баҹы-гардашларымыз чәтин вәзијјәтә дүшәндә биз дә нараһат олур вә онлара көмәк етмәк истәјирик. Мүгәддәс Китаб ҝөстәрир ки, һәмиманлыларымызын рифаһы үчүн јалныз ағсаггаллар дејил, биз һамымыз гајғы ҝөстәрмәлијик (Ром. 15:1, 2). Бәс биз Мүгәддәс Китабын «бир-биринизә тәскинлик верин вә бир-биринизи инкишаф етдирин» дејә вердији мәһәббәт долу нәсиһәтинә неҹә риајәт едә биләрик? Ҝәлин буну етмәјин ики үсулуну нәзәрдән кечирәк (1 Салон. 5:11).
2 Башгаларынын тәләбатларыны ҝөрмәјә чалыш. Аллаһын Кәламында дејилир ки, Табитанын «етдији хејирли ишләр вә вердији сәдәгәләр лап чох иди» (Һәв. иш. 9:36, 39). О, инсанларын нәјә еһтијаҹ дујдуғуна диггәт јетирир вә онлара көмәк етмәк үчүн әлиндән ҝәләни едирди. Табита бизә неҹә дә ҝөзәл нүмунә гојуб! Сән һансыса јашлы баҹы вә ја гардашын јығынҹаға ҝетмәси үчүн машын лазым ҝәлдијини вә ја пионерин һәфтә ичи ҝүнләрдә ҝүнортадан сонра хидмәтә ҝетмәк үчүн әмәкдашы олмадығыны ҝөрә биләрсән. Әҝәр сән бир кимсәнин көмәјә еһтијаҹ дујдуғуну ҝөрүб өз көмәјини тәклиф етсән, онун нә дәрәҹәдә руһланаҹағыны тәсәввүр ет!
3 Руһани ишләр барәдә сөһбәтләр. Биз башгаларыны сөһбәтләримизлә дә инкишаф етдирә биләрик (Ефес. 4:29). Тәҹрүбәли бир ағсаггал өз мүшаһидәләри илә бөлүшәрәк белә дејир: «Әҝәр сән башгаларыны руһландырмаг истәјирсәнсә, онда руһани мөвзулар һагда даныш. Инкишафетдириҹи сөһбәтә башламаг үчүн садәҹә “Сән һәгигәтә неҹә ҝәлмисән?” дејә сорушмаг олар». Јығынҹагдакы ҝәнҹләрә, утанҹаглара вә руһдан дүшәнләрә сәмими мараг ҝөстәр (Сүл. мәс. 12:25). Дүнјанын тәклиф етдији популјар әјләнҹәләр һагда сөһбәтләрин руһани сөһбәтләри сыхышдырыб арадан чыхармасына јол вермә (Ром. 1:11, 12).
4 Бәс башгалары илә һансы инкишафетдириҹи фикирләри бөлүшмәк олар? Мүгәддәс Китабы охујан вә шәхси өјрәнмә заманы Јеһоваја олан миннәтдарлығыны артыран принсип тапмысан? Ачыг мә’рузәдә вә ја «Ҝөзәтчи Гүлләси»нин өјрәнилмәси заманы сәни руһландыран мараглы фикир ешитмисән? Вә ја иманыны мөһкәмләндирән һансыса һадисә сәнин үрәјинә тә’сир ҝөстәриб? Әҝәр сән бу ҹүр руһани ҹәваһираты топлајырсанса, онда башгаларыны руһландырмаг үчүн һәмишә сөз тапаҹагсан (Сүл. мәс. 2:1; Лука 6:45).
5 Ҝәлин, баҹы-гардашларымыза көмәјимизи тәклиф етмәклә вә дилимизи мүдрикҹәсинә истифадә етмәклә бир-биримизи инкишаф етдирәк (Сүл. мәс. 12:18).