‘Руһун гылынҹындан’ мәһарәтлә истифадә ет
«Руһун гылынҹыны, јәни Аллаһын сөзүнү ҝөтүрүн» (ЕФЕС. 6:17).
1, 2. Падшаһлығын тәблиғчиләринә олан тәләбаты ҝөрәрәк биз неҹә давранмалыјыг?
ИЗДИҺАМЫН руһани еһтијаҹ ичиндә олдуғуну ҝөрән Иса шаҝирдләринә деди: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин». Бу сөзләри дедикдән сонра Иса иши өз ахарына бурахмады. О, «он ики шаҝирдини јанына чағырыб» онлары тәблиғә, јәни ‘мәһсул’ бичиминә ҝөндәрди (Мат. 9:35—38; 10:1, 5). Бир гәдәр сонра Иса «јетмиш башга адам тәјин едиб, онлары ики-ики... ҝөндәрди» ки, ејни иши ҝөрсүнләр (Лука 10:1, 2).
2 Падшаһлығын тәблиғчиләринә бу ҝүн дә бөјүк еһтијаҹ вар. Бүтүн дүнјада 2009-ҹу илдә Мәсиһин Хатирә Ҝеҹәсинә ҝәләнләрин сајы 18 168 323 нәфәр олмушдур. Бу, Јеһованын Шаһидләринин үмуми сајындан 10 милјон нәфәр чохдур. Һәгигәтән дә, тарлалар бичинә һазырдыр (Јәһ. 4:34, 35). Буна ҝөрә дә биз дуада даһа чох ишчиләр диләмәлијик. Бәс биз хаһишимизә ујғун неҹә даврана биләрик? Бунун үчүн Падшаһлығын тәблиғи вә шаҝирд һазырламаг ишиндә сәјлә иштирак едәрәк даһа еффектив олмаг тәләб олунур (Мат. 28:19, 20; Марк 13:10).
3. Аллаһын руһу бизим бир хидмәтчи кими пүхтәләшмәјимиздә әсас етибарилә неҹә көмәк едир?
3 Өтән мәгаләдә ‘Аллаһын сөзүнү ҹәсарәтлә сөјләмәкдә’ мүгәддәс руһун бизә неҹә көмәк етдијини нәзәрдән кечирдик (Һәв. иш. 4:31). Һәмчинин бу руһ бизә мәһарәтли хидмәтчи олмагда да көмәк едә биләр. Хидмәтдә пүхтәләшмәјин үсулларындан бири Јеһова Аллаһын тәгдим етдији вәсаитдән — Онун Кәламы олан Мүгәддәс Китабдан баҹарыгла истифадә етмәкдир. Бу Кәлам мүгәддәс руһун сәмәрәсидир (2 Тим. 3:16). Орада гәләмә алынан хәбәр Аллаһдан илһам алыб. Тәблиғдә Мүгәддәс Китаб һәгигәтләрини мәһарәтлә чатдыранда, демәли, бизи мүгәддәс руһ истигамәтләндирир. Буну неҹә едә биләҹәјимизи мүзакирә етмәздән өнҹә, ҝәлин бу Кәламын нә гәдәр бөјүк тәсирә малик олдуғу үзәриндә дүшүнәк.
‘Аллаһын кәламы тәсирлидир’
4. Мүгәддәс Китаб инсанда һансы дәјишикликләри етмәјә гадирдир?
4 Аллаһын кәламы неҹә дә бөјүк гүввәјә маликдир! (Ибр. 4:12). Мәҹази мәнада Мүгәддәс Китабдакы хәбәр инсанын дүзәлтдији истәнилән икиағызлы гылынҹдан итидир, чүнки о, сүмүклә илији бир-бириндән ајырыр. Мүгәддәс Китаб һәгигәти инсан гәлбинин дәринликләринә чатыр вә онун дүшүнҹә вә һиссләринә тәсир ҝөстәрәрәк әслиндә неҹә инсан олдуғуну үзә чыхарыр. Бу һәгигәт инсана тәсир ҝөстәрмәјә вә ону, сөзүн әсил мәнасында, дәјишмәјә гадирдир. (Колослулара 3:10 ајәсини оху.) Бәли, Аллаһын Кәламы һәјатлары дәјишә биләр!
5. Мүгәддәс Китаб һансы саһәләрдә бизә рәһбәрлик верә биләр вә бунун нәтиҹәси неҹә олаҹаг?
5 Бундан әлавә, Мүгәддәс Китаб мисилсиз һикмәт хәзинәсидир. Орада бу кешмәкешли дүнјада неҹә јашамаг лазым олдуғуну ҝөстәрән фајдалы мәлуматлар вар. Онун Кәламы нәинки бизим һәр бир аддымымызы, һәтта бүтүн јолумузу ишыгландырыр (Мәз. 119:105). Проблемләрлә гаршылашанда вә ја дост, әјләнҹә, иш, ҝејим кими саһәләрдә сечим етмәк лазым ҝәләндә онун көмәји данылмаздыр (Мәз. 37:25; Сүл. мәс. 13:20; Јәһ. 15:14; 1 Тим. 2:9). Аллаһын Кәламындакы принсипләри тәтбиг етмәк бизә башгалары илә јола ҝетмәјә көмәк едир (Мат. 7:12; Филип. 2:3, 4). Мәҹази мәнада јолумузун јахшы ишыгландырылмасы сајәсиндә биз гәрарларымызын нәјә ҝәтириб чыхараҹағыны нәзәрә ала биләрик (1 Тим. 6:9). Мүгәддәс Јазылар һәм дә Аллаһын ҝәләҹәјә даир нијјәтини ачыглајыр вә бу нијјәтә ујғун јашамағымыза көмәк едир (Мат. 6:33; 1 Јәһ. 2:17, 18). Инсан Аллаһын принсипләрини әлдә рәһбәр тутарса, һәјаты, һәгигәтән дә, мәналы олаҹаг!
6. Руһани мүһарибәдә Мүгәддәс Китаб нә дәрәҹәдә ҝүҹлү силаһдыр?
6 Апардығымыз руһани мүһарибәдә Мүгәддәс Китабын нә гәдәр бөјүк гүввәјә малик олдуғу барәдә дә дүшүн. Павел Аллаһын кәламыны ‘Руһун гылынҹы’ адландырыр. (Ефеслиләрә 6:12, 17 ајәләрини оху.) Мүгәддәс Китабын хәбәрини баҹарыгла тәгдим едәндә о, инсанлары Шејтанын руһани көләлијиндән азад едә биләр. Бу гылынҹ инсанларын һәјатыны алан јох, хилас едән гылынҹдыр. Буна ҝөрә дә ҝәлин бу гылынҹдан мәһарәтлә истифадә едәк.
Ондан дүзҝүн истифадә ет
7. Нәјә ҝөрә ‘Руһун гылынҹындан’ дүзҝүн истифадә етмәји өјрәнмәк ваҹибдир?
7 Әсҝәр тәлим заманы силаһдан истифадә етмәји өјрәндији вә мәшг етдији тәгдирдә ондан дөјүшдә мәһарәтлә истифадә едә биләҹәк. Руһани мүһарибәдә ‘Руһун гылынҹындан’ истифадә етмәк барәдә дә ејни шеји демәк олар. «Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән»,— дејә Павел јазмышды (2 Тим. 2:15).
8, 9. Мүгәддәс Китабын мәғзини баша дүшмәкдә бизә нә көмәк едә биләр? Нүмунә чәкин.
8 Хидмәтдә ‘һәгигәт сөзүнү доғрулугла өјрәтмәјә’ бизә нә көмәк едәҹәк? Мүгәддәс Китабы башгаларына ајдын шәкилдә өјрәтмәк үчүн ҝәрәк әввәлҹә онун мәғзини өзүмүз јахшы баша дүшәк. Бунун үчүн биз охудуғумуз ајәнин вә ја парчанын контекстинә диггәт јетирмәлијик. Лүғәтә әсасән, контекст — «мәтнин (она дахил олан ајрыҹа сөз вә ја ифадәнин мәнасыны мүәјјән етмәк үчүн) мәнаҹа битмиш һиссәси»дир.
9 Мүгәддәс Китаб парчасыны дүзҝүн баша дүшмәк үчүн ондан әввәл вә сонра ҝәлән ајәләри нәзәрдән кечирмәк тәләб олунур. Павелин Галатијалылара 5:13 ајәсиндә јаздығы сөзләр буну чох ҝөзәл тәсвир едир. Орада охујуруг: «Гардашлар, сиз азадлыға дәвәт олунмушсунуз. Анҹаг бу азадлығы ҹисмани тәбиәт үчүн фүрсәтә чевирмәјин, амма бир-биринизә мәһәббәтлә гуллуг един». Павел бурада нәдән азад олмаг барәдә данышыр: јалан тәлимләрдән, ҝүнаһ вә өлүмдән, јохса башга бир шејдән? Контекст ҝөстәрир ки, Павел ‘Ганунун ләнәтиндән хилас олунмағы’ нәзәрдә тутурду (Галат. 3:13, 19—24; 4:1—5). О, мәсиһчи азадлығына истинад едирди. Бу азадлығы гијмәтләндирәнләр бир-бирләринә мәһәббәтлә хидмәт едирдиләр. Мәһәббәти олмајанлар исә бир-бирләринә шәр атыр вә мүнагишәләрә гошулурдулар (Галат. 5:15).
10. Мүгәддәс Китабы дәгиг баша дүшмәк үчүн биз һансы мәлуматлары нәзәрдән кечирмәлијик вә онлары һарадан тапмаг олар?
10 Ајәнин мәнасыны дүзҝүн баша дүшмәк үчүн әлавә мәлуматлары да нәзәрдән кечирмәк лазымдыр: китабын јазычысы кимдир вә о, нә вахт вә һансы шәртләр алтында јазылыб. Һәмчинин онун һансы мәгсәдлә јазылдығыны вә мүмкүнсә, һәмин дөврдә јашајан инсанларын адәт-әнәнәләрини, давраныш вә дәјәрләрини, о ҹүмләдән неҹә ибадәт етдикләрини нәзәрдән кечирмәк дә фајдалы олардыa.
11. Ајәләри изаһ едәркән нәјә јол верилмәмәлидир?
11 ‘Һәгигәт сөзүнү доғрулугла өјрәтмәк’ садәҹә Мүгәддәс Китаб һәгигәтләрини дүзҝүн изаһ етмәк демәк дејил. Диггәтли олмаг лазымдыр ки, Мүгәддәс Китабы инсанлара һәдә-горху ҝәлмәк мәгсәдилә истифадә етмәјәк. Иблис тәрәфиндән сынаға чәкилмиш Иса кими, биз дә Мүгәддәс Китабдан һәгигәти мүдафиә етмәк үчүн истифадә едә биләрик, амма о, башгаларыны горхутмаг үчүн әлимиздә дәјәнәк олмамалыдыр (Ганун. т. 6:16; 8:3; 10:20; Мат. 4:4, 7, 10). Биз һәвари Петерин «Рәбб Аллаһы үрәкләриниздә тәгдис един. Малик олдуғунуз үмид барәсиндә сиздән һесабат истәјән һәр кәсә һәмишә мүлајимликлә вә еһтирамла ҹаваб вермәк үчүн һазыр олун» мәсләһәтинә әмәл етмәлијик (1 Пет. 3:15).
12, 13. Аллаһын Кәламындакы һәгигәт һансы ‘истеһкамлары јыхмаға’ гадирдир? Нүмунә чәкин.
12 Дүзҝүн тәгдим олундугда Аллаһын Кәламындакы һәгигәтин сајәсиндә нәләрә наил олмаг олар? (2 Коринфлиләрә 10:4, 5 ајәләрини оху.) Мүгәддәс Китаб һәгигәти «истеһкамлары» јыхмаға, јәни јалан тәлимләри, зәрәрли адәт-әнәнәләри вә гејри-камил инсан мүдриклијинин әкси олан фәлсәфи идејалары ифша етмәјә гадирдир. Мүгәддәс Китабын көмәји илә һәм дә «Аллаһын билијинә гаршы дуран» истәнилән фикри арадан галдырмаг мүмкүндүр. Аллаһын Кәламындакы тәлимләр инсанлара дүшүнҹә тәрзләрини һәгигәтә ујғунлашдырмаға көмәк едә биләр.
13 Һиндистанда јашајан 93 јашлы бир гадынын нүмунәсинә бахаг. Ушаглыгдан она реинкарнасија тәлими ашыланмышды. Хариҹдә јашајан оғлу онунла мәктуб васитәсилә Мүгәддәс Китабы өјрәнмәјә башлајанда гадын Јеһова вә Онун вәдләри һагда өјрәндикләрини бөјүк мәмнунијјәтлә гәбул едирди. Лакин реинкарнасија тәлими онун зеһниндә о гәдәр дәрин көк салмышды ки, оғлу өлүләрин вәзијјәти барәдә јазанда гадын өз наразылығыны билдирди: «Сәнин Мүгәддәс Китабындакы бу һәгигәти һеч ҹүр ағлыма сығышдыра билмирәм. Бүтүн динләр өјрәдир ки, инсанларын дахилиндә өлмәз бир шеј вар. Мән һәмишә инанмышам ки, бәдән өлүр, һәмин шеј исә башга бәдәнләрдә јашамаға давам едир вә бу, 8 400 000 дәфә баш верир. Ахы бу, неҹә јалан ола биләр?! Белә чыхыр ки, әксәр динләр сәһвдир?» ‘Руһун гылынҹы’ белә дәрин көк салмыш тәлими арадан галдырмаға гадирдирми? Онлар бу суалы Мүгәддәс Китаб әсасында мүзакирә етдикдән бир нечә һәфтә сонра гадын оғлуна јазды: «Нәһајәт ки, мән өлүләрин вәзијјәти һаггында һәгигәти баша дүшмәјә башладым. Дирилмә заманы өлән әзизләримизә говушаҹағымызы билмәк мәнә бөјүк севинҹ бәхш едир. Үмидварам ки, Аллаһын Падшаһлығы тезликлә ҝәләҹәк».
Инсанлары инандырмаға чалыш
14. Динләјиҹини инандырмаг нә демәкдир?
14 Мүгәддәс Китабдан хидмәтдә мәһарәтлә истифадә етмәк садәҹә ондан ситат ҝәтирмәк демәк дејил. Павел кими, биз дә ‘игнаедиҹи’, јәни инандырыҹы тәрздә данышмалыјыг. (Һәвариләрин ишләри 19:8, 9; 28:23 ајәләрини оху.) «Инандырмаг» сөзүнүн мәнасы «өз тәрәфинә чәкмәк» демәкдир. Һансыса бир шејә инандырылан инсанын «әминлији о гәдәр ҝүҹлү олур ки, артыг о, буна етибар етмәјә башлајыр». Биз кимисә Мүгәддәс Китабын һәр һансы тәлимини гәбул етмәјә инандыранда онун етибарыны газанырыг, белә ки, о, бу тәлимин һәгигилијинә инанмаға башлајыр. Бунун үчүн динләјиҹимизи сөзләримизин һәгигәт олдуғуна инандырмалыјыг. Ҝәлин бахаг, буну неҹә етмәк олар.
15. Диггәти Аллаһын Кәламына неҹә јөнәлтмәк олар ки, инсанда она гаршы һөрмәт һисси јарансын?
15 Диггәти Аллаһын Кәламына елә јөнәлт ки, инсанда она гаршы һөрмәт һисси јарансын. Ајә охумаздан өнҹә мүзакирә етдијиниз мөвзуја даир Аллаһын нөгтеји-нәзәрини өјрәнмәјин ваҹиблијини вурғула. Суалы вериб һәмсөһбәтинин ҹавабыны динләдикдән сонра сөһбәтә белә давам етмәк олар: «Ҝәлин ҝөрәк, буна даир Аллаһын нөгтеји-нәзәрини неҹә өјрәнмәк олар» вә ја: «Аллаһ бу мәсәлә барәдә нә дүшүнүр?» Ајәни охумаздан өнҹә бу сөзләри демәклә сән Мүгәддәс Китабын Аллаһдан олдуғуну гејд едир вә һәмсөһбәтиндә она гаршы бөјүк һөрмәт һасил едирсән. Аллаһа инанан, лакин Мүгәддәс Китаб илә јахындан таныш олмајан инсана тәблиғ едәндә буну етмәк хүсусилә ваҹибдир (Мәз. 19:7—10).
16. Ајәләри дүзҝүн изаһ етмәјә сәнә нә көмәк едә биләр?
16 Ајәләри охумагла кифајәтләнмә — онлары изаһ ет. Павел өјрәтдикләрини ‘изаһ вә сүбут етмәјә’ адәт етмишди (Һәв. иш. 17:3). Чох вахт ајәдә бир нечә фикир олур, амма сәнә тәкҹә мүзакирә етдијиниз мөвзуја аидијјәти олан һиссәни гејд етмәк лазымдыр. Буну һәмин фикри тәкрарламагла, башга сөзлә ифадә етмәклә вә ја һәмсөһбәтинә фикри баша дүшмәјә көмәк едән суаллар вермәклә етмәк олар. Сонра ајәнин һәмин һиссәсинин мәғзини изаһ ет. Бундан сонра һәмсөһбәтинә һәмин ајәнин шәхсән она һансы аидијјәти олдуғуну ҝөрмәјә көмәк ет.
17. Мүгәддәс Јазыларын әсасында неҹә мүлаһизә јүрүтмәк олар ки, инсан дедикләримизә инансын?
17 Мүгәддәс Јазыларын әсасында инандырыҹы тәрздә мүлаһизә јүрүт. Павел мәнтиглә данышараг вә үрәкләрә тәсир етмәјә чалышараг инандырыҹы шәкилдә «Мүгәддәс Јазылар һаггында данышырды» — мүлаһизә јүрүдүрдү (Һәв. иш. 17:2, 4). Сән дә динләјиҹиләринин үрәјинә јол тапмаға чалыш. Һәмсөһбәтинә гаршы лагејд олмадығыны ҝөстәрән нәзакәтли суаллар вермәклә онун үрәјиндәкиләри ‘чәкиб чыхармаға’ чалыш (Сүл. мәс. 20:5). Амма јерсиз суаллар вермә. Ајдын вә мәнтиги шәкилдә фикирләр јүрүт. Онлары сүбут етмәк үчүн инандырыҹы фактлар ҝәтир. Сәнин сөзләрин тамамилә Аллаһын Кәламына әсасланмалыдыр. Далбадал ики-үч ајә охујуб һеч бир изаһат вермәмәкдәнсә, бир ајә охујуб ону изаһ етмәк вә нүмунә ҝәтирмәк даһа јахшыдыр. Һәмчинин әсаслы дәлилләр ҝәтирмәк дә сәнин сөзләрини санбаллы едә биләр. Бәзән арашдырма апармаг вә әлавә мәлумат ҝәтирмәк лазым ҝәлә биләр. Јухарыда хатырланан 93 јашлы гадына өлмәз руһ тәлиминин нәјә ҝөрә бу гәдәр ҝениш јајылдығыны изаһ етмәк лазым ҝәлирди. Онун Мүгәддәс Китабын бу мөвзу һагда өјрәтдикләрини гәбул етмәси үчүн инандығы тәлимин көкүнүн һаралара ҝедиб чыхдығыны вә бир чох динләрә неҹә кечдијини билмәси чох ваҹиб идиb.
Ондан мәһарәтлә истифадә етмәјә давам ет
18, 19. Нәјә ҝөрә ‘Руһун гылынҹындан’ даһа сонра да мәһарәтлә истифадә етмәлијик?
18 Мүгәддәс Китабда ‘бу дүнјанын индики сурәтинин кечиб ҝетдији’, јәни сәһнәсинин дәјишдији гејд олунур. Пис инсанлар ҝетдикҹә даһа бетәр олурлар (1 Кор. 7:31; 2 Тим. 3:13). Бу сәбәбдән бундан сонра да ‘истеһкамлары јыхмаг’ үчүн ‘Руһун гылынҹындан, јәни Аллаһын сөзүндән’ истифадә етмәк олдугҹа ваҹибдир.
19 Биз чох хошбәхтик ки, биздә Аллаһын Кәламы олан Мүгәддәс Китаб вар вә онун көмәји илә дәрин көк салмыш јалан тәлимләри арадан галдырмаг вә һәлим инсанларын үрәјинә јол тапмаг мүмкүндүр! Һеч бир ‘истеһкам’ онун ичиндәки хәбәр гәдәр ҝүҹлү ола билмәз. Буна ҝөрә дә ҝәлин Аллаһын Падшаһлығыны бәјан едәркән ‘руһун гылынҹындан’ мәһарәтлә истифадә етмәк үчүн әлимиздән ҝәләни едәк.
[Һашијәләр]
a Мүгәддәс Јазылара дахил олан китаблар һаггында әлавә мәлуматы «Һәр Мүгәддәс Јазы Аллаһдан илһам алмыш вә фајдалыдыр» брошүраларындан, «Мүгәддәс Јазыларын дәрк едилмәси» (инҝ.) енсиклопедијасындан вә «Ҝөзәтчи Гүлләси»нин «Јеһованын Кәламы ҹанлыдыр» рубрикасындан тапмаг олар.
b «Инсан өләндә нә баш верир?» брошүрасынын 5—16-ҹы сәһифәләринә бахын.
Сиз нә өјрәндиниз?
• Аллаһын Кәламы нә дәрәҹәдә бөјүк гүввәјә маликдир?
• «Һәгигәт сөзүнү» неҹә ‘доғрулугла өјрәдә’ биләрик?
• Мүгәддәс Китаб ‘истеһкамлары’ јыхмаға гадирдирми?
• Инандырыҹы шәкилдә тәблиғ етмәк баҹарығыны неҹә јахшылашдыра биләрсән?
[12-ҹи сәһифәдәки чәрчивә/шәкил]
Аллаһын Кәламындан инандырыҹы шәкилдә неҹә истифадә етмәк олар?
▪ Инсанда Мүгәддәс Китаба гаршы һөрмәт һасил ет
▪ Ајәләри изаһ ет
▪ Һәмсөһбәтинин үрәјинә јол тапмаг үчүн инандырыҹы шәкилдә мүлаһизә јүрүт
[11-ҹи сәһифәдәки шәкил]
‘Руһун гылынҹындан’ мәһарәтлә истифадә етмәји өјрәнмәк ваҹибдир