Јеһоваја чијин-чијинә хидмәт етмәјә давам един
“Бир үрәклә [“чијин-чијинә”, ЈД] Рәббә гуллуг етмәк үчүн һамысы Рәббин исмини чағырсынлар дејә, халглара о заман тәмиз додаг [“тәмиз дил”, ЈД] верәҹәјәм” (ТСЕФАНЈА 3:9).
1. Тсефанја 3:9 ајәсиндәки вә’д неҹә јеринә јетир?
ЈЕР үзүндә тәхминән 6 000 дилдә данышылыр. Бундан савајы, мүхтәлиф шивәләр вә јерли ләһҹәләр дә мөвҹуддур. Лакин Азәрбајҹан дилиндән тутмуш Зулу дилинә гәдәр мүхтәлиф дилләрин мөвҹуд олмасына бахмајараг, Аллаһ һәгигәтән дә чох ҝөзәл бир тәдбир ҝөрүб. О, елә едиб ки, бүтүн дүнјада инсанлар јеҝанә тәмиз дили өјрәниб, һәмин дилдә даныша билсинләр. Бунунла Тсефанја пејғәмбәрин васитәсилә верилән вә’д јеринә јетир: “Бир үрәклә [“чијин-чијинә”, ЈД] Рәббә гуллуг етмәк үчүн һамысы Рәббин исмини чағырсынлар дејә, [мән Јеһова Аллаһ] халглара о заман тәмиз додаг [“тәмиз дил”, ЈД] верәҹәјәм” (Тсефанја 3:9).
2. “Тәмиз дил” нәдир вә онун сајәсиндә нә мүмкүндүр?
2 “Тәмиз дил”, Аллаһын Кәламы олан Мүгәддәс Китабда јазылмыш Аллаһын һәгигәтидир. Бу, хүсусилә дә, Јеһованын адыны иззәтләндирәҹәк, Онун һакимијјәтинә бәраәт газандыраҹаг вә инсанлара хејир-дуалар ҝәтирәҹәк Аллаһын Падшаһлығы илә бағлы һәгигәтдир (Матта 6:9, 10). Тәмиз дилдә, јә’ни дүнјада руһани ҹәһәтдән тәмиз олан јеҝанә дилдә һәр милләтдән вә иргдән олан инсанлар данышырлар. Бунун сајәсиндә онлар Јеһоваја “бир үрәклә”, “чијин-чијинә” хидмәт едә билирләр.
Ајры-сечкилијә јер јохдур
3. Јеһоваја бирликдә хидмәт етмәјимиз нәјин сајәсиндә мүмкүндүр?
3 Бир мәсиһчи кими, арамызда һөкм сүрән бејнәлхалг әмәкдашлыға ҝөрә миннәтдарыг. Падшаһлыг һаггындакы хош хәбәри чохлу дилләрдә тәблиғ етсәк дә, биз Аллаһа бирликдә хидмәт едирик (Мәзмур 133:1). Бу, һансы өлкәдә јашамағымыздан асылы олмајараг, Јеһоваја иззәт ҝәтирән јеҝанә тәмиз дилдә данышмағымызын сајәсиндә мүмкүндүр.
4. Нәјә ҝөрә Аллаһын халгы арасында ајры-сечкилик олмалы дејил?
4 Аллаһын халгы арасында ајры-сечкилик олмалы дејил. Буну һәвари Петер ерамызын 36-ҹы илиндә гејри-јәһуди олан јүзбашы Корнелиусун евиндә тәблиғ едән заман ајдын шәкилдә ҝөстәрди. О деди: “Доғрудан да дәрк едирәм ки, Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур” (Һәвариләрин ишләри 10:34, 35). Буна ҝөрә дә мәсиһчи јығынҹағында ајры-сечкилијә, тәрәфҝирлијә вә груплашмалара јер јохдур.
5. Јығынҹагда ајрылыг јаратмаг нәјә ҝөрә дүзҝүн дејил?
5 Бир тәләбә гыз Падшаһлыг Залында олдугдан сонра јазмышдыр: “Адәтән килсәләрә ҝәлән инсанлар мүәјјән бир иргин, јахуд етник групун нүмајәндәләри олур. [...] Јеһованын Шаһидләри исә һамысы бирликдә әјләшмиш вә милләтләрә бөлүнмәмишләр”. Амма гәдим Коринфдәки јығынҹағын үзвләри арасында ајрылыг мөвҹуд иди. Коринфлиләр ихтилафлар јарадараг, Аллаһын бирлик вә сүлһ ҝәтирән мүгәддәс руһуна мүгавимәт ҝөстәрирдиләр (Галатијалылара 5:22). Әҝәр биз дә јығынҹагда кичик груплара ајрылсаг, руһун рәһбәрлијинә зидд ҝетмиш оларыг. Бу сәбәбдән, ҝәлин һәвари Павелин коринфлиләрә дедији сөзләри јадда сахлајаг: “Рәббимиз Иса Мәсиһин ады илә, еј гардашларым, сизә јалварырам ки, һамыныз ејни дүшүнҹәдә олун вә аранызда ајрылыг олмасын вә сиз бир фикирдә вә ејни рә’јдә бирләшәсиниз” (1 Коринфлиләрә 1:10). Павел бирлијин ваҹиблијини ефеслиләрә јаздығы мәктубунда да вурғулајыр (Ефеслиләрә 4:1-6, 16).
6, 7. Јагуб ајры-сечкилијә даир һансы мәсләһәти верди вә онун сөзләрини неҹә тәтбиг етмәк олар?
6 Мәсиһчиләрдән һәмишә ајры-сечкилик салмамаг тәләб олунуб (Ромалылара 2:11). Биринҹи әсрин јығынҹагларында бә’зиләри варлыларла мүнасибәтдә ајры-сечкилик салдыгларына ҝөрә, шаҝирд Јагуб јазырды: “Еј гардашларым! Иззәтли Рәббимиз Иса Мәсиһә иманынызы ајры-сечкиликлә давам етдирмәјин. Чүнки әҝәр топлашдығыныз јерә гызыл үзүк тахмыш, гәшәнҝ палтар ҝејмиш бир адам ҝирәрсә, вә јохсул, чиркли палтар ҝејмиш адам да ҝирәрсә, вә сиз гәшәнҝ палтары олана диггәт вериб: “Бујурун, сиз бурада әјләшин”, јохсула исә: “Сән орада дур”, јахуд “Бурада пајәндазымын јанында отур”, — дејәрсинизсә, өз аранызда ајры-сечкилик етмирсинизми? Вә пис дүшүнҹәли һакимләр олмурсунузму?” (Јагуб 2:1-4).
7 Јығынҹаға гызыл үзүклү, тәмтәраглы палтарда ҝәләнләрлә бәрабәр јохсул вә көһнә палтар ҝејмиш јени адамлар ҝәләндә, варлылар хүсуси гаршыланырды. Варлылары јахшы јердә әјләшдирир, јохсуллары исә ајаг үстә сахлајыр, јахуд јердә киминсә ајағы јанында отурмағы тәклиф едирдиләр. Лакин Аллаһ Исанын фидијә гурбанлығыны һәм варлылар, һәм дә јохсуллар үчүн тәгдим етмишдир (Ејуб 34:19; 2 Коринфлиләрә 5:14). Буна ҝөрә дә, әҝәр Јеһованы разы салмаг вә Она чијин-чијинә хидмәт етмәк истәјириксә, ајры-сечкилик салмамалы, јахуд “мәнфәәт әлдә етмәк үчүн инсанлара” јалтагланмамалыјыг (Јәһуда 4, 16).
Дејинҝәнликдән гачынын
8. Исраиллиләрин дејинҝәнлији үзүндән нә баш верди?
8 Бирлијимизи горумаг вә Аллаһын илтифатыны итирмәмәк үчүн, Павелин “һәр шеји шикајәтсиз... един” мәсләһәтинә диггәт јетирмәлијик (Филипилиләрә 2:14, 15). Мисир көләлијиндән азад олунан исраиллиләр сәдагәтсизлик ҝөстәрмиш вә Муса илә Һаруна, әслиндә исә Јеһоваја гаршы дејинмәјә башламышдылар. Бу сәбәбдән, Јешу, Калеб вә левилиләрдән савајы, 20 јашындан јухары олан кишиләрин һеч бири Вә’д едилән дијара дахил олмамыш вә сәһрадакы 40 иллик сәјаһәтләри әрзиндә өлмүшдүләр (Сајлар 14:2, 3, 26-30; 1 Коринфлиләрә 10:10). Бәли, дејинҝәнликләри онлара баһа баша ҝәлди!
9. Дејинҝәнлији уҹбатындан Мирјамын башына нә ҝәлди?
9 Бу, бүтүн халгын дејиндији заман нә баш вердијини ҝөстәрир. Бәс ајры-ајры инсанлар дејинәндә неҹә? Бир дәфә Мусанын баҹысы Мирјам вә онун гардашы Һарун дејинмәјә башладылар: “Рәбб јалныз Муса васитәсиләми сөјләди? Бизим васитәмизлә дә сөјләмәдими?” Мүгәддәс Китабда даһа сонра дејилир: “Рәбб [буну] ешитди” (Сајлар 12:1, 2). Бу дејинмәнин нәтиҹәси нә олду? Аллаһ, ҝөрүндүјү кими, ишин сәбәбкары олан Мирјамы алчалтды. Неҹә? О, ҹүзам хәстәлијинә тутулду вә тәмиз олана гәдәр 7 ҝүн әрзиндә дүшәрҝәдән кәнарда галмалы олду (Сајлар 12:9-15).
10, 11. Дејинҝәнлијин гаршысы алынмазса нәтиҹәси нә ола биләр? Нүмунәдә ҝөстәрин.
10 Дејинҝәнлик, садәҹә киминсә сәһв һәрәкәтләринә ҝөрә наразылыг ифадә етмәк дејил. Даим дејинән инсанлар Аллаһа дејил, өзләринә диггәт јетирәрәк, өз һиссләринә вә вәзифәләринә һәддиндән артыг әһәмијјәт верирләр. Бу ҹүр әһвал-руһијјәнин гаршысы алынмадыгда, руһани гардашларын арасында ихтилафлар јарадыр вә онларын Јеһоваја чијин-чијинә хидмәт етмәк сә’јләринә мане олур. Иш орасындадыр ки, дејинҝән инсанлар башгаларынын онлара јазығы ҝәләҹәјинә үмид едәрәк, һәмишә шикајәтләнирләр.
11 Мәсәлән, ким исә һансыса ағсаггалын мә’рузәләрлә неҹә чыхыш етдијини вә ја вәзифәсини неҹә јеринә јетирдијини тәнгид едә биләр. Әҝәр шикајәтчи инсаны динләјириксә, биз дә онун кими дүшүнмәјә башлајаҹағыг. Еһтимал ки, наразылыг тохуму бејнимизә дүшәнә гәдәр ағсаггалын һәрәкәтләри бизи һеч дә нараһат етмирди, амма инди онлар бизи әсәбиләшдирир. Нәтиҹәдә, артыг ағсаггалын етдији һеч бир шеј хошумуза ҝәлмир вә биз дә ондан шикајәтләнмәјә башлаја биләрик. Бу ҹүр давраныша Јеһованын халгынын јығынҹағында јер јохдур.
12. Дејинҝәнлик Аллаһла олан мүнасибәтимизә неҹә тә’сир ҝөстәрә биләр?
12 Аллаһын сүрүсүнү отармаг мәс’улијјәтини дашыјан кәсләрә гаршы дејинҝәнлик деди-годуја сәбәб ола биләр. Гардашлара гаршы бу ҹүр дејинҝәнлик вә ја бөһтан Јеһова илә мүнасибәтимизә зәрәрли тә’сир ҝөстәрә биләр (Чыхыш 22:28). Башгаларыны аҹылајан вә төвбә етмәјән кәсләр Аллаһын Падшаһлығыны мирас алмајаҹаглар (1 Коринфлиләрә 5:11; 6:10). Шаҝирд Јәһуда, ‘һакимијјәти һеч сајан, иззәтли варлыглары сөјән’, јә’ни јығынҹагдакы мәс’улијјәтли кишиләри сөјән дејинҝәнләр һаггында јазырды (Јәһуда 8). Бу ҹүр дејинҝәнләр Аллаһа хош дејилди вә әҝәр биз онларын пис јолундан чәкинириксә, мүдрик давранмыш олуруг.
13. Нәјә ҝөрә шикајәтләрин һамысы сәһв дејил?
13 Әлбәттә, шикајәтләрин һамысы Аллаһын наразылығына сәбәб олмур. Аллаһ “Содом вә Һоморраја гаршы галхан фәрјада” е’тинасызлыг ҝөстәрмәмиш, һәмин позғун шәһәрләри мәһв етмишдир (Јарадылыш 18:20, 21; 19:24, 25, МКШ). Ерамызын 33-ҹү илинин Пентикост ҝүнүндән сонра Јерусәлимдә “јунанҹа данышан јәһудиләр ибраниҹә данышан јәһудиләрдән шикајәтләнмәјә башладылар. Чүнки онларын дул гадынлары ҝүндәлик јардым алмагдан мәһрум едилмишдиләр”. Онда “он ики һәвари”, “һагларында јахшы шәһадәт олунан... једди нәфәр” адамы “бу иш үчүн”, јә’ни јемәк пајланмасы үчүн тә’јин едиб вәзијјәти дүзәлтди (Һәвариләрин ишләри 6:1-6). Бизим ҝүнләрдә дә ағсаггаллар әсасландырылмыш шикајәтләрә ‘гулагларыны тутмалы’ дејилләр (Сүлејманын мәсәлләри 21:13, МКШ). Һәмиманлыларыны тәнгид етмәјин әвәзинә, ағсаггаллар онлары руһландырмалы вә инкишаф етдирмәлидирләр (1 Коринфлиләрә 8:1).
14. Дејинҝәнликдән гачынмаг үчүн һансы хүсусијјәт хүсусилә ваҹибдир?
14 Һәр биримиз дејинҝәнликдән гачынмалыјыг, чүнки наразылыг ифадә едән әһвал-руһијјә руһани ҹәһәтдән зәрәрлидир. Бу ҹүр мәнфи дүшүнҹә тәрзи бирлијимизи поза биләр. Бунданса, ҝәлин, һәмишә мүгәддәс руһун биздә мәһәббәт хүсусијјәти инкишаф етдирмәсинә јол верәк (Галатијалылара 5:22). Мәһәббәтин “падшаһлыг ганунуна” итаәт етмәк, Јеһоваја чијин-чијинә хидмәтимизи давам етдирмәјә көмәк едәҹәкдир (Јагуб 2:8, И–93; 1 Петер 4:8; 1 Коринфлиләрә 13:4-8).
Бөһтандан гачынын
15. Гејбәтлә бөһтан арасындакы фәрги неҹә изаһ едәрдиниз?
15 Дејинҝәнлик зәрәрли гејбәтләрә ҝәтириб чыхара биләр, бу сәбәбдән биз нә данышдығымыза диггәт јетирмәлијик. Гејбәт — инсанлар вә онларын ишләри һаггында олан шајиәләр јајмаг демәкдир. Бөһтан исә, башга инсаны рүсвај едәрәк, онун һаггында биләрәкдән јалан шајиәләр јајмаг демәкдир. Бу ҹүр данышыглар пис вә Аллаһа хош ҝәлмәјән мәшғулијјәтдир. Аллаһ буна ҝөрә исраиллиләрә демишди: “Халгынын арасында бөһтан атмаг үчүн ҝәзмә” (Левилиләр 19:16, ЈД).
16. Павел бош сөһбәтләрә мејлли олан кәсләр һаггында нә демишдир вә онун сөзләри бизә неҹә аиддир?
16 Шајиәләрин јајылмасы бөһтана ҝәтириб чыхара биләр, буна ҝөрә дә, Павел бу ишлә мәшғул оланлары ҹәсарәтлә мәзәммәт етди. Павел, јығынҹагда көмәк алмаға лајиг олан дул гадынлары хатырладараг, һәмчинин ‘авара олуб, евдән евә ҝәзмәји... өјрәнән вә јалныз авара дејил, бошбоғаз олуб, башгаларынын ишинә бурунларыны сохан, сөјләнмәмәси лазым олан сөзләри сөјләјән’ гадынлар һаггында јазырды (1 Тимотејә 5:11-15). Әҝәр мәсиһчи гадын бөһтана ҝәтириб чыхараҹаг бош сөһбәтләрә мејлли олдуғуну ҝөрүрсә, она Павелин ‘бөһтанчы дејил, тәмкинли олмаг’ мәсләһәтинә диггәт јетирмәк ҝәрәкдир (1 Тимотејә 3:11). Сөзсүз ки, мәсиһчи кишиләр дә зәрәрли гејбәтләрдән гачынмалыдырлар (Сүлејманын мәсәлләри 10:19).
Мүһакимә етмәјин!
17, 18. а) Иса гардашларымызы мүһакимә етмәк мејли һаггында нә демишдир? б) Исанын дедикләрини неҹә тәтбиг едә биләрик?
17 Биз кимәсә бөһтан атмасаг да, ола билсин, башгаларыны мүһакимә етмәјә олан мејлә гаршы мүбаризә апармалы олуруг. Иса бу ҹүр дүшүнҹә тәрзини иттиһам едәрәк демишдир: “Мүһакимә етмәјин ки, мүһакимә олунмајасыныз. Чүнки нә һөкмлә мүһакимә етсәниз, онунла да мүһакимә олунаҹагсыныз; вә һансы өлчү илә өлчсәниз, о өлчү илә дә сизә өлчүләҹәкдир. Вә нә үчүн гардашынын ҝөзүндә түкү ҝөрүрсән, өз ҝөзүндә исә тири сечмирсән? Јахуд өз ҝөзүндә тир олдуғу һалда, гардашына неҹә дејәрсән ки, “Гој ҝөзүндәки түкү чыхарым”. Еј икиүзлү! Габагҹа өз ҝөзүндән тири чыхар. Онда гардашынын ҝөзүндәки түкү неҹә чыхармағы јахшы ҝөрәрсән” (Матта 7:1-5).
18 Әҝәр бизим өзүмүзә мәҹази “тир” дүзҝүн дүшүнмәјә мане олурса, гардашымыза неҹә ҹәсарәт едиб дејә биләрик ки, онун ҝөзүндән ади “түкү” чыхармаға көмәк едәк? Әҝәр Аллаһын неҹә мәрһәмәтли олдуғуну дәрк едириксә, руһани баҹы-гардашларымызы мүһакимә етмәјә мејлли олмајаҹағыг. Мәҝәр биз онлары сәмави Атамыз анладығы гәдәр анлаја биләрикми? Тәәҹҹүблү дејил ки, Иса бизә хәбәрдарлыг едәрәк демишдир: “Мүһакимә етмәјин ки, мүһакимә олунмајасыныз”. Гејри-камиллијимизи дүзҝүн гијмәтләндирмәк, Јеһованын ҝөзүндә јанлыш олан нәтиҹәләрә ҝәлмәкдән бизи чәкиндирәҹәкдир.
Зәриф, лакин шәрәфлидирләр
19. Һәмиманлыларымыза неҹә мүнасибәт бәсләмәлијик?
19 Әҝәр Аллаһа һәмиманлыларымызла чијин-чијинә хидмәт етмәјә гәрарлыјыгса, биз онлары нәинки мүһакимә етмәјәҹәк, һәтта һөрмәтдә габагламаға чалышаҹағыг (Ромалылара 12:10). Биз өзүмүзүн дејил, онларын мәнафејини ахтараҹаг вә һәр ҹүр, һәтта ән хошаҝәлмәз ҝөрүнән иши белә онлар үчүн бөјүк мәмнунијјәтлә јеринә јетирәҹәјик (Јәһја 13:12-17; 1 Коринфлиләрә 10:24). Бу ҹүр ҝөзәл әһвал-руһијјәни неҹә горуја биләрик? Јадда сахламаг лазымдыр ки, баҹы-гардашларымызын һәр бири Јеһованын ҝөзүндә дәјәрлидир вә инсан бәдәнинин үзвләри бир-биринә лазым олдуғу кими, биз дә бир-биримизә лазымыг (1 Коринфлиләрә 12:14-27).
20, 21. 2 Тимотејә 2:20, 21 ајәләриндә јазылан сөзләр бизим үчүн һансы мә’наны дашыјыр?
20 Әлбәттә, мәсиһчиләр садәҹә олараг хидмәтин шәрәфли хәзинәси һәвалә олунмуш зәриф сахсы габлардыр (2 Коринфлиләрә 4:7). Әҝәр биз мүгәддәс фәалијјәтимизлә Јеһоваја иззәт ҝәтирмәк истәјириксә, Онун вә Оғлунун гаршысында олан шәрәфли мөвгејимизи горујуб сахламалыјыг. Јалныз әхлаги вә руһани ҹәһәтдән тәмизлијимизлә Аллаһын истифадәси үчүн шәрәфли габлар сајыла биләрик. Бу һагда Павел јазырды: “Бөјүк евдә исә нәинки гызыл вә ҝүмүш, һабелә тахта вә сахсы габлар да вардыр; онлардан бә’зиси шәрәфли, бә’зиси дә шәрәфсиз истифадә үчүндүр. Беләликлә, ким өзүнү шәрәфсиз ишләрдән тәмизләсә, тәгдис олунмуш, Ағасынын истифадәсинә мүнасиб, һәр хејирли иш үчүн һазырланмыш, шәрәфли вәзифәјә лајиг габ олаҹагдыр” (2 Тимотејә 2:20, 21).
21 Аллаһын тәләбләринә мүвафиг давранмајан кәсләр “шәрәфсиз истифадә үчүн” олан “габдыр”. Анҹаг әҝәр Аллаһын ганунларына ујғун јашајырыгса, “тәгдис олунмуш, [јә’ни Јеһоваја хидмәт үчүн ајрылмыш]... һәр хејирли иш үчүн һазырланмыш, шәрәфли вәзифәјә лајиг габ” олаҹағыг. Буна ҝөрә дә, өзүмүздән соруша биләрик: Шәрәфли вәзифәјә лајиг “габаммы”? Һәмиманлыларыма мүсбәт тә’сир ҝөстәрирәмми? Јығынҹагда баҹы-гардашларымла чијин-чијинә әмәкдашлыг едирәмми?
Чијин-чијинә хидмәт етмәјә давам един
22. Мәсиһчи јығынҹағыны нә илә мүгајисә етмәк олар?
22 Мәсиһчи јығынҹағы аиләјә бәнзәјир. Бүтүн үзвләри Јеһоваја хидмәт едән аиләдә мәһәббәт, һәмрә’јлик, бир-биринин көмәјинә ҝәлмәјә һазырлыг руһу һөкм сүрүр. Аилә, һәрәсинин өзүнә мәхсус хасијјәти олан бир нечә нәфәрдән ибарәт ола биләр, лакин һәр кәсин өз ваҹиб јери вар. Буну ејнилә јығынҹаг һаггында да демәк олар. Һәр биримизин мүхтәлиф вә гејри-камил олдуғуна бахмајараг, Аллаһ бизи Исанын васитәсилә Өзүнә ҹәлб едир (Јәһја 6:44; 14:6). Јеһова вә Иса бизи севирләр вә биз, меһрибан бир аилә кими, әлбәттә, бир-биримизә мәһәббәт ҝөстәрмәлијик (1 Јәһја 4:7-11).
23. Биз нәји јаддан чыхармамалы вә нәдә гәтијјәтли олмалыјыг?
23 Аиләјә бәнзәр мәсиһчи јығынҹағында сәдагәтлә гаршылашаҹағымызы ҝөзләмәкдә һаглыјыг. Һәвари Павел јазырды: “Мән истәјирәм ки, кишиләр һәр јердә пак [“сәдагәтли”, ЈД] әлләр галдырыб, гәзәбләнмәјәрәк вә мүбаһисә етмәјәрәк дуа етсинләр” (1 Тимотејә 2:8). Беләликлә, Павел сәдагәти мәсиһчиләрин јығылдығы “һәр јердә” едилән үмуми дуа илә әлагәләндирди. Јығынҹағы дуада јалныз сәдагәтли кишиләр тәгдим етмәлидирләр. Әлбәттә ки, Аллаһ һамымыздан Она вә бир-биримизә сәдагәтли олаҹағымызы ҝөзләјир (Ваиз 12:13, 14). Ҝәлин, инсан бәдәнинин һиссәләри кими, бирликдә вә һәмаһәнҝ әмәкдашлыг етмәкдә гәтијјәтли олаг. Бир аилә кими Јеһоваја бирликдә хидмәт едәк. Һәр шејдән әввәл исә, унутмајаг ки, бир-биримизә лазымыг вә әҝәр Јеһоваја чијин-чијинә хидмәтимизи давам етдирсәк, Онун илтифатына вә хејир-дуаларына малик олаҹағыг.
Сиз неҹә ҹаваб верәрдиниз?
• Нәјин сајәсиндә Јеһованын халгы Она чијин-чијинә хидмәт едә билир?
• Нәјә ҝөрә мәсиһчиләр ајры-сечкиликдән гачынырлар?
• Сизин фикринизҹә дејинҝәнликдә пис олан нәдир?
• Һәмиманлыларымыза нәјә ҝөрә һөрмәт етмәлијик?
[15-ҹи сәһифәдәки шәкил]
Петер дәрк етди ки, “Аллаһ инсанларын кимлијинә бахмаз”.
[16-ҹы сәһифәдәки шәкил]
Аллаһын Мирјамы нәјә ҝөрә алчалтдығыны билирсинизми?
[18-ҹи сәһифәдәки шәкил]
Сәдагәтли мәсиһчиләр Јеһоваја чијин-чијинә мәмнунијјәтлә хидмәт едирләр.