Јығынҹағын мүсбәт аб-һавасыны гору

«Гој Ағамыз Иса Мәсиһ өз лүтфү илә овгатыныза хејир-дуа версин» (ФИЛИП. 4:23).

АШАҒЫДАКЫЛАР ЈЫҒЫНҸАҒЫН МҮСБӘТ АБ-ҺАВАСЫНЫ ГОРУМАҒА НЕҸӘ КӨМӘК ЕДИР?

Һәмиманлыларымызла үнсијјәт

Хидмәтә ҹан јандырмаг

Ҹидди ҝүнаһлар барәдә ағсаггаллара мәлумат вермәк

1. Филипи вә Тиатирадакы мәсиһчиләр нәјә ҝөрә тәрифә лајиг идиләр?

БИРИНҸИ әсрдәки Филипи јығынҹағынын үзвләри мадди ҹәһәтдән корлуг чәксәләр дә, чох әлиачыг идиләр вә баҹы-гардашлара тәглид едиләси әсил мәһәббәт ҝөстәрирдиләр (Филип. 1:3—5, 9; 4:15, 16). Буна ҝөрә дә һәвари Павел онлара үнванладығы мәктубун јекунунда јазмышды: «Гој Ағамыз Иса Мәсиһ өз лүтфү илә овгатыныза хејир-дуа версин» (Филип. 4:23). Иззәтләнмиш Иса Мәсиһ ејни овгаты, јәни әһвал-руһијјәни тәзаһүр етдирән Тиатирадакы мәсиһчиләрә демишди: «Мән сәнин ишләриндән, мәһәббәтиндән, инамындан, хидмәтиндән вә дөзүмүндән хәбәрдарам. Билирәм ки, сәнин ахырынҹы ишләрин әввәлкиләрдән даһа чохдур» (Вәһј 2:19).

2. Бизим әһвал-руһијјәмиз јығынҹағымызын үмуми аб-һавасына неҹә тәсир ҝөстәрир?

² Јеһованын Шаһидләринин һәр бир јығынҹағы онда үстүнлүк тәшкил едән мүәјјән әһвал-руһијјәни тәзаһүр етдирир. Мәсәлән, бәзи јығынҹаглар, әсас етибарилә, меһрибанлығы вә мәһәббәти илә таныныр. Диҝәрләри исә Падшаһлығын тәблиғ ишини сәјлә дәстәкләмәләри, еләҹә дә таммүддәтли хидмәтә ҹан јандырмалары илә сечилир. Һәр биримиз ајры-ајрылыгда мүсбәт әһвал-руһијјә инкишаф етдирәндә јығынҹағын бирлијини мөһкәмләндирир вә онун руһани инкишафына өз төһфәмизи веририк (1 Кор. 1:10). Лакин мәнфи әһвал-руһијјә јығынҹағымызын руһани ҹәһәтдән мүрҝүләмәсинә, хидмәтә етинасыз мүнасибәт ҝөстәрмәсинә вә һәтта јығынҹагда јол верилән ҝүнаһлара ҝөз јуммағымыза ҝәтириб чыхара биләр (1 Кор. 5:1; Вәһј 3:15, 16). Бәс сизин јығынҹағынызда һансы аб-һава һөкм сүрүр? Јығынҹагда мүсбәт аб-һаванын олмасында шәхсән сәнин һансы пајын ола биләр?

ЈЫҒЫНҸАГДА МҮСБӘТ АБ-ҺАВАНЫН ОЛМАСЫНДА СӘНИН РОЛУН

3, 4. «Чохлу ҹамаат арасында» Јеһоваја неҹә шүкүр едә биләрик?

³ Мәзмурчу охујурду: «Чохлу ҹамаат арасында Сәнә [Јеһоваја] шүкүр едәҹәјәм, чохсајлы халг арасында Сәнә һәмд едәҹәјәм» (Мәз. 35:18). Мәзмурчу Јеһованын диҝәр хидмәтчиләри арасында оларкән Она һәмд етмәкдән чәкинмирди. «Ҝөзәтчи гүлләси»нин арашдырылмасы да дахил олмагла, һәр һәфтә кечирилән јығынҹаг ҝөрүшләриндә шәрһ вермәјимиз вә иманымызы ифадә етмәјимиз гејрәт руһу ҝөстәрмәјә имкан верир. Јахшы оларды ки, һәр биримиз өзүмүздән сорушаг: «Јығынҹагда иштирак етмәк шәрәфиндән там јарарланыраммы? Ҝөрүшләрә јахшы һазырлашыраммы? Мәналы, фајдалы шәрһләр верирәмми? Бир аилә башчысы кими, ушагларыма габагҹадан шәрһләр һазырламаға вә өз сөзләри илә ҹаваб вермәјә көмәк едирәмми?»

⁴ Мәзмурчу Давуд дүзҝүн оланы етмәк гәтијјәтини Аллаһа нәғмәләр охумагла әлагәләндирди. О демишди: «Еј Аллаһ, гәлбим Сәнә мөһкәм бағланыб, мөһкәм бағланыб, гој илаһи охујум, Сәни тәрәннүм едим» (Мәз. 57:7). Мәсиһчи ҝөрүшләриндә ифа едилән нәғмәләр Јеһоваја мәтин үрәклә илаһи охумаг вә Ону тәрәннүм етмәк үчүн ҝөзәл бир фүрсәтдир. Әҝәр бәзи нәғмәләрин сөзләри илә таныш дејилсинизсә, нә үчүн онлары аиләви ибадәт заманы мәшг етмәјәсиниз? Гој һәр биримиз Јеһоваја өмүр боју илаһи сөјләмәјә вә нә гәдәр варыг, Ону тәрәннүм етмәјә гәти гәрарлы олаг (Мәз. 104:33).

5, 6. Гонагпәрвәрлик вә сәхавәтлилик неҹә ҝөстәрә биләрик? Бунун сајәсиндә јығынҹагда һансы аб-һава инкишаф едир?

⁵ Баҹы-гардашларымыза гонагпәрвәрлик ҝөстәрмәк јығынҹағымызда мәһәббәти артырмағын диҝәр үсулудур. «Ибраниләрә мәктуб»унун сонунҹу фәслиндә Павелин белә бир нәсиһәти вар: «Аранызда даим гардашлыг мәһәббәти олсун. Гонагпәрвәрлији јаддан чыхармајын» (Ибр. 13:1, 2). Сәјјар нәзарәтчиләри вә онларын һәјат јолдашларыны, јахуд да јығынҹағымызын таммүддәтли хидмәтчиләрини наһара дәвәт етмәк гонагпәрвәрлик ҝөстәрмәк үчүн ҝөзәл имкандыр. Биз вахташыры олараг наһара вә ја аиләви ибадәтә дуллары, натамам аиләләри вә башгаларыны да дәвәт едә биләрик.

⁶ Павел Тимотејә тапшырмышды ки, баҹы-гардашлары јахшылыг етмәјә, хејирли ишләрлә зәнҝин олмаға, сәхавәтли вә әл тутмаға һазыр олмаға, өзләри үчүн саламат галаҹаг хәзинә јығмаға, јәни әсил һәјатдан бәрк-бәрк јапышмагдан өтрү ҝәләҹәк үчүн мөһкәм тәмәл гојмаға тәшвиг етсин (1 Тим. 6:17—19). Павел һәмиманлыларына сәхавәтлилик руһу инкишаф етдирмәји төвсијә едирди. Һәтта игтисади вәзијјәтин ағыр олдуғу дөврдә дә сәхавәтлилик ҝөстәрә биләрик. Буну етмәјин ҝөзәл үсулларындан бири еһтијаҹы оланлары өз машынымызла хидмәтә вә ја јығынҹаг ҝөрүшләринә апарыб-ҝәтирмәкдир. Бәс мәһәббәтин вә хејирхаһлығын бу ҹүр тәзаһүрүндән јарарлананлар барәдә нә демәк олар? Онлар миннәтдарлыг ҝөстәрсәләр, мәсәлән, јанаҹағын ҝет-ҝедә баһалашдығы бир дөврдә хәрҹләрин мүәјјән гисмини имканлары дахилиндә өдәсәләр, јығынҹагда мүсбәт аб-һаванын инкишафында онларын да пајы олаҹаг. Үстәлик, мәҝәр биз баҹы-гардашларымызын өзләрини лазымлы олдугларыны вә севилдикләрини һисс етмәләри үчүн онларла даһа чох вахт кечирмәли дејилик? «Иман гардашларымыза јахшылыг» едәндә, еләҹә дә онлара вахт ајырмаға вә вәсаитләримизи бөлүшмәјә һазыр оланда нәинки онлара олан мәһәббәтимиз артыр, һәм дә јығынҹагда меһрибан вә мүсбәт аб-һава инкишаф едир (Галат. 6:10).

7. Башгалары барәдә шәхси мәлуматы сирр сахламаг јығынҹагдакы мүсбәт аб-һаваны горунмаға неҹә көмәк едир?

⁷ Һәмиманлыларымызла бизим арамызда мәһәббәт телләрини мөһкәмләндирән диҝәр амилләрә дә диггәт јетирәк. Бу, достлуг вә мәхфиликдир. (Сүлејманын мәсәлләри 18:24 ајәсини оху.) Әсил достлар һеч вахт бир-биринин сиррини башгаларына ачмыр. Һәмиманлымыз сиррини аләмә јајмајаҹағымыза әмин олараг дәрин фикир вә һиссләрини бизимлә бөлүшәндә арамыздакы мәһәббәт даһа да мөһкәмләнир. Ҝәлин сирр сахламағы баҹаран етибарлы дост олмагла јығынҹагда һөкм сүрән мәһәббәти вә аиләјә хас олан меһрибан аб-һаваны горујуб сахлајаг (Сүл. мәс. 20:19).

ХИДМӘТӘ ҸАН ЈАНДЫР

8. Лаодикијадакы мәсиһчиләрә һансы мәсләһәт верилмишди вә нәјә ҝөрә?

⁸ Лаодикија јығынҹағына мүраҹиәтиндә Иса демишди: «Сәнин ишләриндән хәбәрдарам. Сән нә сојугсан, нә дә исти. Каш ки ја сојуг, ја да исти олајдын. Мадам ки, нә исти, нә дә сојуг, садәҹә илыгсан, сәни јерә түпүрәҹәјәм» (Вәһј 3:15, 16). Лаодикијадакы мәсиһчиләр хидмәтдә әввәлки кими ҹанфәшанлыг ҝөстәрмирдиләр. Ҝөрүнүр, бу ҹүр әһвал-руһијјә араларындакы мүнасибәтләрә дә тәсирсиз өтүшмүрдү. Буна ҝөрә дә Иса мәһәббәтлә онлара нөвбәти мәсләһәти верди: «Мәнә әзиз олан адамлары мән мәзәммәт вә тәрбијә едирәм. Она ҝөрә дә гејрәтли ол вә төвбә ет» (Вәһј 3:19).

9. Тәблиғ хидмәтинә мүнасибәтимиз јығынҹағын аб-һавасына неҹә тәсир едир?

⁹ Әҝәр јығынҹағымызын сағлам вә мүсбәт әһвал-руһијјәсини горумаг истәјириксә, ҹанла-башла хидмәт етмәлијик. Јығынҹаг јашадығымыз әразидә тәвазөкар инсанлары ахтармаг, еләҹә дә онлара һәгигәти өјрәтмәк мәгсәдилә тәшкил олунуб. Бу сәбәбдән биз шаҝирд һазырламаг ишиндә, Иса кими, шөвглә иштирак етмәлијик (Мат. 28:19, 20; Лука 4:43). Хидмәтә нә гәдәр чох ҹан јандырсаг, бир о гәдәр дә Аллаһын әмәкдашлары кими бир олаҹаг (1 Кор. 3:9). Баҹы вә ја гардашымызын хидмәтдә иманыны неҹә мүдафиә етдијини вә руһани дәјәрләрә ҝөрә миннәтдарлығыны неҹә тәзаһүр етдирдијини мүшаһидә едәндә она олан мәһәббәт вә һөрмәтимиз артыр. Үстәлик, хидмәтдә онларла «чијин-чијинә» әмәкдашлыг етмәк јығынҹагдакы бирлији мөһкәмләндирир. (Сефанја 3:9 ајәсини оху.)

10. Хидмәтимизин кејфијјәтини јахшылашдырмаг јығынҹағын үмуми аб-һавасына неҹә тәсир едир?

¹⁰ Хидмәтимизин кејфијјәтини јахшылашдырмаға сәј ҝөстәрмәјимиз дә башгаларына мүсбәт тәсир бағышлајыр. Тәблиғдә гаршылашдығымыз инсанлара даһа чох мараг ҝөстәрәндә вә онларын үрәјинә јол тапмаг баҹарығымызы јахшылашдырмаға ҹан атанда даһа бөјүк шөвглә хидмәт едирик (Мат. 9:36, 37). Бу ҹүр шөвг әмәкдашларымыза да сирајәт едир. Иса шаҝирдләрини хидмәтә тәк-тәк јох, ики-ики ҝөндәрирди (Лука 10:1). Бунун сајәсиндә онлар руһланыр вә бир-бириндән өјрәнирдиләр, үстәлик, хидмәтә даһа чох ҹан јандырырдылар. Мәҝәр хидмәтә ҹан јандыран тәблиғчиләрлә әмәкдашлыг етмәк бизим үчүн хош дејил? Онларын шөвглә хидмәт етмәси бизи руһландырыр вә хидмәтимизи давам етдирмәјә стимул верир (Ром. 1:12).

ӨЗҮНҮ ДЕЈИНҜӘНЛИКДӘН ВӘ ҜҮНАҺДАН ҜӨЗЛӘ

11. Мусанын ҝүнләриндә бәзи исраиллиләр неҹә әһвал-руһијјә тәзаһүр етдирирдиләр вә бу, онлара нәјин баһасына баша ҝәлди?

¹¹ Јеһованын исраиллиләрдән халг тәшкил етмәсиндән ҹәми-ҹүмләтаны бир нечә һәфтә сонра онларда наразылыг вә дејинҝәнлик руһу баш галдырды. Бу, Јеһоваја вә Онун нүмајәндәләринә гаршы үсјан галдырмаларында өзүнү бүрузә верди (Чых. 16:1, 2). Мисирдән чыхан исраиллиләрин чох аз гисминә Вәд едилмиш дијара дахил олмаға иҹазә верилди. Һәтта Муса белә ораја дахил олмаг имканындан мәһрум олду, чүнки Исраил иҹмасынын тәзаһүр етдирдији пис әһвал-руһијјәјә дүзҝүн мүнасибәт ҝөстәрмәмишди (Ганун. т. 32:48—52). Мәнфи әһвал-руһијјәнин гурбаны олмамаг үчүн биздән нә тәләб олунур?

12. Өзүмүзү дејинҝәнлик руһундан неҹә горуја биләрик?

¹² Биз еһтијатлы олмалыјыг ки, үрәјимиздә дејинҝәнлик руһу көк салмасын. Бунун баш вермәмәси үчүн тәвазөкарлыг вә сәлаһијјәтли шәхсләрә гаршы һөрмәт инкишаф етдирмәклә јанашы, киминлә отуруб-дурдуғумуза да ҹидди фикир вермәлијик. Пис әјләнҹә сечиминин, јахуд Мүгәддәс Китаб принсипләринә һөрмәт етмәјән синиф вә ја иш јолдашларымызла чох вахт кечирмәјин нәтиҹәләри аҹынаҹаглы олаҹаг. Мәнфи әһвал-руһијјәјә малик олан вә ја мүстәгиллик руһуну јајан инсанларла үнсијјәти мәһдудлашдырмаг мүдрик һәрәкәтдир (Сүл. мәс. 13:20).

13. Јығынҹаға позуҹу тәсир ҝөстәрән дејинҝәнлик руһанилијимизә зәрәр вуран һансы пис давраныш тәрзләринә ҝәтириб чыхара биләр?

¹³ Јығынҹаға позуҹу тәсир ҝөстәрән дејинҝәнлик руһанилијимизә зәрәр вуран башга пис давраныш тәрзләринә дә ҝәтириб чыхара биләр. Мәсәлән, дејинҝәнлик јығынҹағын сүлһ вә бирлијини тәһлүкәјә атыр. Үстәлик, даима һәмиманлыларымыздан ҝилеј-ҝүзар едириксә, бу, онларын хәтринә дәјә биләр. Еһтимал вар ки, сонрадан бу, бөһтан вә тәһгир кими ҝүнаһлара чеврилсин (Лев. 19:16; 1 Кор. 5:11). Биринҹи әсрдә јығынҹагдакы дејинҝән инсанлар «һакимијјәти сајмыр вә Аллаһын шәрәфли инсанлары барәсиндә тәһгирамиз сөзләр» дејирдиләр (Јәһуда 8, 16). Әлбәттә ки, Јеһова јығынҹагда мәсулијјәт јүкү дашыјан гардашлара гаршы дејинән бу инсанлара рәғбәт бәсләмирди.

14, 15. а) Ҹидди ҝүнаһлара ҝөз јумсаг, бу, бүтүн јығынҹаға неҹә тәсир ҝөстәрә биләр? б) Баҹы вә ја гардашын ҝизлиҹә ҝүнаһ ишләтдијини билириксә, нә етмәлијик?

¹⁴ Туталым, сән киминсә спиртли ичкиләрдән суи-истифадә етмәк, порнографијаја бахмаг вә ја әхлагсыз һәјат тәрзи сүрмәк кими ҝизли ҝүнаһ ишләтдијини билмисән. Бу вахт сән нә едәҹәксән? (Ефес. 5:11, 12). Бу кими ҹидди ҝүнаһлара ҝөз јумсаг, Јеһованын мүгәддәс руһунун јығынҹагда сәрбәст фәалијјәт ҝөстәрмәсинә манечилик төрәтмиш олаҹағыг вә бүтүн јығынҹағын сүлһүнү тәһлүкә алтына атаҹағыг (Галат. 5:19—23). Коринфдәки еркән мәсиһчиләр пислији араларындан кәсиб атмалы олдуглары кими, бу ҝүн дә јығынҹаға позуҹу тәсир ҝөстәрән һәр бир шеј ондан кәнар едилмәлидир ки, онун сағлам вә мүсбәт аб-һавасына хәләл дәјмәсин. Јығынҹагда сүлһүн һөкм сүрмәси үчүн сән нә едә биләрсән?

¹⁵ Јухарыда гејд олундуғу кими, мүәјјән мәсәләләрдә, хүсусилә дә башгалары өз фикир вә һиссләрини бизимлә бөлүшәндә мәхфилији горумаг ваҹибдир. Киминсә барәдә мәхфи мәлуматлары јајмаг дүзҝүн дејил вә бизим тәрәфимиздән бу, гәддарлыг оларды. Лакин ҹидди ҝүнаһ төрәдилдикдә бу барәдә ағсаггаллара мәлумат верилмәлидир, чүнки Мүгәддәс Китаба әсасән, онларын бу ҹүр мәсәләләри арашдырмаг сәлаһијјәти вар. (Левилиләр 5:1 ајәсини оху.) Беләликлә, әҝәр биз һәр һансы баҹы вә ја гардашын ҹидди ҝүнаһа јол вердијини билириксә, ону тәшвиг етмәлијик ки, көмәк үчүн ағсаггаллара мүраҹиәт етсин (Јаг. 5:13—15). Әҝәр һәмин шәхс гојулан вахт әрзиндә буну етмирсә, бу барәдә өзүмүз ағсаггаллара демәлијик.

16. Ҹидди ҝүнаһ барәдә ағсаггаллара мәлумат вермәк јығынҹағын аб-һавасыны горумаға неҹә көмәк едир?

¹⁶ Мәсиһчи јығынҹағы руһани сығынаҹагдыр вә ҹидди ҝүнаһлар барәдә хәбәр вермәклә ону горумалыјыг. Әҝәр ҝүнаһ ишләдән шәхс ағсаггалларын төһмәтини вә ислаһ тәдбирләрини гәбул едиб төвбә едирсә, артыг о, јығынҹағын аб-һавасы үчүн тәһлүкә мәнбәји дејил. Бәс әҝәр ҹидди ҝүнаһ ишләдән кәс төвбә етмир вә ағсаггалларын мәһәббәтлә вердији мәсләһәтләри гулагардына вурурса, онда неҹә? Онун јығынҹагдан кәнар едилмәси арамыздакы позуҹу амилин «мәһв»и, јәни хариҹ едилмәси илә нәтиҹәләнир. Јығынҹағын овгаты, јәни аб-һавасы исә горунуб сахланылыр. (1 Коринфлиләрә 5:5 ајәсини оху.) Бәли, јығынҹағын аб-һавасына зәрәр дәјмәсин дејә һәр биримиздән дүзҝүн аддымлар атмаг, ағсаггаллар шурасы илә әмәкдашлыг етмәк вә баҹы-гардашларымызын рифаһыны дүшүнмәк тәләб олунур.

«РУҺУН БИРЛИЈИНИ» ГОРУ

17, 18. «Руһун бирлијини» горумаға бизә нә көмәк едир?

¹⁷ «Һәвариләрдән һәвәслә тәлим [алмалары]» Исанын еркән давамчыларына јығынҹагда бирлији инкишаф етдирмәјә көмәк едирди (Һәв. иш. 2:42). Онлар Мүгәддәс Китабын мәсләһәтләрини вә ағсаггалларын вердији ҝөстәришләри гијмәтләндирирдиләр. Бизим ҝүнләрдәки ағсаггалларын садиг вә ағыллы нөкәрлә әмәкдашлыг етмәләри сајәсиндә һәм бүтүн јығынҹаг руһланыр, һәм дә бирлик горунуб сахланылыр (1 Кор. 1:10). Јеһованын тәшкилатынын Мүгәддәс Китаба әсасланан ҝөстәришләринә вә ағсаггалларын рәһбәрлијинә табе оланда «сүлһүн бирләшдириҹи телләри ичиндә руһун бирлијини горумаға» үрәкдән чалышдығымызы ҝөстәририк (Ефес. 4:3).

¹⁸ Буна ҝөрә дә ҝәлин јығынҹагда сағлам вә мүсбәт аб-һаваны горумаг үчүн әлимиздән ҝәләни әсирҝәмәјәк. Әҝәр белә етсәк, әмин ола биләрик ки, «Ағамыз Иса Мәсиһ өз лүтфү илә» овгатымыза, јәни әһвал-руһијјәмизә хејир-дуа верәҹәк (Филип. 4:23).

[19-ҹу сәһифәдәки шәкил]

Мәналы, фајдалы шәрһләр һазырламагла јығынҹағын мүсбәт аб-һавасына өз төһфәни верирсәнми?

[20-ҹи сәһифәдәки шәкил]

Нәғмәләримизи јахшы өјрәнмәклә јығынҹағын мүсбәт аб-һавасыны гору