“Бүтүн инсанлара там һәлимлик” ҝөстәрин
“Иманлылара хатырлат ки... мүлајим олуб, бүтүн инсанлара там һәлимлик ҝөстәрсинләр” (ТИТУСА 3:1, 2).
1. Нәјә ҝөрә һәлимлик ҝөстәрмәк һәмишә асан олмур?
ҺӘВАРИ Павел јазырды: “Мән Мәсиһи тәглид етдијим кими, сиз дә мәни тәглид един” (1 Коринфлиләрә 11:1). Аллаһын бүтүн хидмәтчиләри бу мәсләһәтә сә’јлә риајәт етмәјә чалышырлар. Бунун асан олмадығыны е’тираф етмәк лазымдыр, чүнки улу валидејнләримиздән мирас алдығымыз худбин мејлләр Мәсиһин нүмунәсини дәгиг изләмәјә имкан вермир (Ромалылара 3:23; 7:21-25). Бунунла белә, әҝәр сә’ј ҝөстәрсәк, һәр биримиз һәлимлији тәзаһүр етдирә биләрик. Лакин бунун үчүн тәкҹә өз ирадәмиз кифајәт етмәз. Нәјә ҝөрә?
2. “Бүтүн инсанлара там һәлимлик” ҝөстәрмәкдә бизә нә көмәк едә биләр?
2 Аллаһа мәгбул һәлимлик — мүгәддәс руһун сәмәрәсинин бир һиссәсидир. Аллаһын фәал гүввәсинә нә гәдәр чох табе олсаг, бу сәмәрә биздә бир о гәдәр дә чох нәзәрә чарпаҹаг. Јалныз о заман биз “бүтүн инсанлара там һәлимлик” ҝөстәрә биләҹәјик (Титуса 3:2). Ҝәлин, Исаны неҹә тәглид едә вә башгаларынын бизимлә үнсијјәтдән тәравәт дујмалары үчүн неҹә даврана биләҹәјимизи нәзәрдән кечирәк (Матта 11:29; Галатијалылара 5:22, 23).
Аиләдә
3. Дүнјанын руһу аиләләрә неҹә тә’сир ҝөстәрир?
3 Һәлимлији ҝөстәрмәјин ән чох ваҹиб олдуғу саһәләрдән бири аиләдир. Үмумдүнја Сәһијјә Тәшкилатынын вердији мә’лумата ҝөрә, гадынларын сағламлығыны, јол гәзалары вә малјарија хәстәлијиндән чох аилә дахилиндә баш верән зоракылыглар тәһлүкә алтына гојур. Мәсәлән, Лондонда гејдә алынан вә зоракылыгла төрәдилән ҹинајәтләрин дөрддә бир һиссәси аиләдә баш верир. Полисләр, чох вахт гәзәб вә гышгыра-гышгыра данышараг өз һиссләрини ҹиловламајан инсанларла гаршылашырлар. Даһа писи одур ки, бә’зи әр-арвадлар мүнасибәтләриндә әдавәтә јол вермишләр. Бүтүн бунлар “дүнјанын руһуну”н ҝөстәрдији тә’сирин аҹы нәтиҹәләридир вә бу ҹүр давранышлара мәсиһчи аиләләриндә јер јохдур (Ефеслиләрә 4:31; 1 Коринфлиләрә 2:12).
4. Һәлимлик аиләјә неҹә тә’сир едир?
4 Дүнјанын руһуна гаршы дурмаг үчүн бизә Аллаһын руһу лазымдыр. “Рәббин Руһу һарада исә, азадлыг да орададыр” (2 Коринфлиләрә 3:17). Мәһәббәт, јахшылыг, өзүнә һаким олмаг вә сәбир кими кејфијјәтләр, гејри-камил инсанларын аилә телләрини мөһкәмләндирир (Ефеслиләрә 5:33). Бир чох аиләләрин һәјатыны зәһәрләјән сөјүш вә мүбаһисәләр зәмининдә кәскин шәкилдә сечилән һәлимлик евдә ҝөзәл атмосфер јарадыр. Инсанын дедији сөзләр ваҹибдир, лакин онун сөзләринин бағышладығы тә’сир һәмин сөзләри неҹә демәсиндән асылыдыр. Һәјәҹан вә нараһатчылыг һиссләри һәлимликлә ифадә олундугда ҝәрҝинлик азалыр. Мүдрик Сүлејман падшаһ демишдир: “Һәлим ҹаваб һирси јатырар, сәрт сөз гәзәби аловландырар” (Сүлејманын мәсәлләри 15:1, МКШ).
5. Дини бахышлары ајры олан аиләләрдә һәлимлик неҹә көмәк едир?
5 Һәлимлик дини бахышлары ајры олан аиләләрдә хүсусилә ваҹибдир. Јахшы ишләрлә тамамланан һәлимлик, һәтта “зидд ҝедән” кәсләри дә Јеһова үчүн фәтһ етмәјә көмәк едәҹәкдир. Петер мәсиһчи гадынларына белә бир мәсләһәт верир: “Өз әрләринизә табе олун ки, бә’зиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр. Гој сизин бәзәјиниз, сач һөрмә, гызыл тахма вә тәмтарагла ҝејинмә кими заһири шејләрдән ибарәт олмасын. Ҝизли олан дахили варлығыныз, һәлим вә сакит руһун фаниләшмәз ҝөзәллији илә сизин бәзәјиниз олсун. Бу, Аллаһын гаршысында чох гијмәтлидир” (1 Петер 3:1-4).
6. Һәлимлик, валидејнләрлә ушаглары бир-бирләринә неҹә јахынлашдырыр?
6 Валидејнләрлә ушаглар арасындакы мүнасибәтләр, хүсусилә дә Јеһоваја гаршы мәһәббәт аз олдугда ҝәрҝинләшә биләр. Лакин мәсиһчи аиләләриндә һамы бир-биринә һәлимликлә јанашмалыдыр. Павел аталара мәсләһәт верирди: “Ушагларынызы гәзәбләндирмәјин, анҹаг онлары Рәббин тәрбијә вә нәсиһәти илә бөјүдүн” (Ефеслиләрә 6:4). Аиләдә һәлимлик һөкм сүрдүкдә, ушагларла валидејнләр арасында сых достлуг мүнасибәти јараныр. Беш оғулдан бири олан Дин хатырлајыр: “Атам һәлим инсан иди. Јадыма ҝәлмир ки, јенијетмә дөврүмдә белә, онунла арамызда мүбаһисә олсун. О, бә’зән нәдәнсә мә’јус олдугда белә мүлајимлијини горујурду. Елә олурду ки, тәнбеһ олараг о, мәни отағыма јоллајыр, јахуд һансыса үстүнлүкләрдән мәһрум едирди, амма арамызда һеч вахт мүбаһисә олмазды. О, бизә јалныз ата дејил, һәм дә дост иди. Она ҝөрә дә, биз онун ганыны гаралтмаг истәмирдик”. Ҝөрдүјүмүз кими, һәлимлик валидејнләрлә ушаглары бир-бирләринә јахынлашдырыр.
Хидмәтдә
7, 8. Тәблиғ хидмәтиндә һәлимлик ҝөстәрмәк нәјә ҝөрә чох ваҹибдир?
7 Һәлимлијин ҝөстәрилмәси ваҹиб олан диҝәр саһәләрдән бири дә, тәблиғ хидмәтидир. Биз Падшаһлыг һаггында хош хәбәри тәблиғ едәркән, мүхтәлиф характерли инсанларла гаршылашырыг. Бә’зиләри ҝәтирдијимиз үмидвериҹи хәбәри севинҹлә гәбул етдикләри һалда, башгалары мүхтәлиф сәбәбләр үзүндән пис мүнасибәт ҝөстәрә биләрләр. Елә бурада һәлимлик кејфијјәти, дүнјанын ән узаг јерләринә гәдәр шаһидлик етмәк тапшырығыны јеринә јетирмәкдә бизә көмәк едәҹәкдир (Һәвариләрин ишләри 1:8; 2 Тимотејә 4:5).
8 Һәвари Павел јазырды: “Мәсиһи Рәбб кими үрәкләриниздә тәгдис един. Малик олдуғунуз үмид барәсиндә сиздән һесабат истәјән һәр кәсә һәмишә ҹаваб вермәк үчүн һазыр олун” (1 Петер 3:15, И–93). Мәсиһин нүмунәси даима үрәјимиздә јашадығы үчүн, бизимлә кобуд данышан инсанлара шәһадәтлик едәрәк бүтүн гүввәмизлә һәлимлик вә һөрмәт тәзаһүр етдирмәјә чалышырыг. Бу ҹүр давраныш чох вахт ҝөзәл нәтиҹәләр верир.
9, 10. Тәблиғ хидмәтиндә һәлимлијин дәјәрини ҝөстәрән һадисәни данышын.
9 Бир дәфә бир әр-арвадын гапысыны дөјүрләр. Әри Кит отагда галыр, арвады исә гапыны ачмаға ҝедир. Ҝәләнләрин Јеһованын Шаһиди олдугларыны билдикдә, гадын Шаһидләри ушагларла амансыз давранмагда иттиһам етмәјә башлајыр. Гардашымыз сакитлији горујуб, мүлајимликлә дејир: “Мән сизи баша дүшүрәм. Иҹазә верин, Јеһованын Шаһидләринин нәјә инандыгларыны изаһ едим”. Бүтүн сөһбәти ешидән Кит гапыја јахынлашыб, сөһбәти кәсир.
10 Сонрадан һәмин әр-арвад гонагла кобуд рәфтар етдикләринә ҝөрә пешман олдулар. Шаһидин ҝөстәрдији һәлимлик онлара дәрин тә’сир бағышламышды. Онларын тәәҹҹүбүнә сәбәб олараг, һәмин гардаш бир һәфтәдән сонра јенидән гајытды вә Кит илә арвады, онун нәјә инандығыны Мүгәддәс Китабын васитәсилә изаһ етмәсинә иҹазә вердиләр. Ахырда әр-арвад: “Сон ики ил әрзиндә башга Шаһидләрлә чох сөһбәт етмишик”, дејә вурғуладылар. Онлар Мүгәддәс Китабы өјрәнмәјә разы олуб, сонунда Јеһоваја һәср олундугларыны вәфтизлә символлашдырдылар. Онлара илк дәфә ҝәлән Шаһидин ҝөстәрдији сә’ј әбәс олмады! Илләр кечдикдән сонра һәмин Шаһид Кит вә арвады илә јенидән ҝөрүшдүкдә артыг онларын руһани баҹы-гардаш олдугларыны өјрәнди. Ҝөрдүјүмүз кими, һәлимлик ҝөзәл сәмәрәләр ҝәтирди.
11. Һәлимлик киминсә һәгигәти гәбул етмәсинә неҹә зәмин һазырлаја биләр?
11 Һаролд һәрби хидмәтдә икән чәкдији әзијјәтләр үзүндән гәддарлашмыш вә Аллаһын мөвҹудлуғуна шүбһә етмәјә башламышды. Бу аз имиш кими, сәрхош сүрүҹүнүн уҹбатындан әлил галмышды. Онун јанына Јеһованын Шаһидләри ҝәлдикдә, Һаролд онларын бир даһа ҝәлмәмәсини тәләб етмишди. Бир дәфә Билл адлы Шаһид, Һаролдун гоншулуғунда јашајан марагланан адама баш чәкмәли иди. О, сәһвән башга гапыны дөјдү. Һаролд ики әл ағаҹынын көмәји илә галхыб гапыны ачдыгда, Билл дәрһал үзр диләјәрәк, онун гоншуларына баш чәкмәк истәдијини билдирди. Һаролд өзүнү неҹә апарды? Мә’лум олду ки, о, телевизија хәбәрләриндән Шаһидләрин гыса бир мүддәтдә Падшаһлыг Залы тикдикләрини ешидиб. Бу гәдәр инсанларын чијин-чијинә ишләдикләрини ҝөрән Һаролд Шаһидләрә олан мүнасибәтини дәјишмишди. Билин мүлајимлији вә һәлимлији, һәмчинин сәмимиликлә үзр истәмәси Һаролда дәрин тә’сир бағышлады вә Шаһидләрин онун јанына ҝәлмәсинә разылыг верди. О, Мүгәддәс Китабы өјрәнмәјә башлады, мүвәффәгијјәтләр әлдә етди вә нәтиҹәдә Јеһованын вәфтиз олунмуш хидмәтчиси олду.
Јығынҹагда
12. Мәсиһчи јығынҹағынын үзвләри һансы дүнјәви мејлләрә гаршы дурмалыдырлар?
12 Һәлимлији ҝөстәрмәјин чох ваҹиб олдуғу үчүнҹү саһә — мәсиһчи јығынҹағыдыр. Мүасир ҹәмијјәтдә тоггушмалар ади һалдыр. Һәјата ҹисмани нөгтеји-нәзәрдән бахан инсанлар үчүн мүбаһисәләр, чәкишмәләр вә савашлар нормал һесаб олунур. Олур ки, бу ҹүр дүнјәви мејлләр ҝизлиҹә јығынҹаға дахил олур вә мүбаһисәләр, бәһсләр шәклиндә өзүнү бүрузә верир. Белә вәзијјәтләри һәлл етмәк лазым ҝәлдикдә, мәс’ул гардашлар кәдәрләнирләр. Буна бахмајараг, Јеһоваја вә һәмиманлылара олан мәһәббәтләри онлары бүдрәмиш кәсләри ислаһ етмәјә тәшвиг едир (Галатијалылара 5:25, 26).
13, 14. Зидд ҝедәнләри һәлимликлә ислаһ етсәк, һансы нәтиҹәни ҝөрә биләрик?
13 Биринҹи әсрдә Павел вә онун әмәкдашы Тимотеј јығынҹағын бә’зи үзвләри уҹбатындан јаранан чәтинликләрлә гаршылашдылар. Павел Тимотеји тәшвиг едирди ки, “шәрәфсиз” истифадә үчүн габлара бәнзәјән гардашлардан өзүнү горусун. Павел изаһ едир: “Рәббин гулу исә тоггушмаја баш гошмамалы, амма һамы илә сакит рәфтар етмәли, өјрәтмәјә һазыр олмалы, һагсызлыглара таб ҝәтирмәлидир. Зидд ҝедәнләри исә һәлимликлә ислаһ етмәлидир”. Биз ҝәрҝин вәзијјәтләрдә дә һәлимлик ҝөстәрдикдә, чох вахт бу, зидд ҝедән кәсләри өз тәнгиди мүнасибәтләрини јенидән нәзәрдән кечирмәјә тәшвиг едир. Павелин даһа сонра јаздығы кими, Јеһова да өз нөвбәсиндә “онлара һәгигәти дәрк етмәк үчүн төвбәјә фүрсәт” верә биләр (2 Тимотејә 2:20, 21, 24, 25). Диггәт јетирин ки, Павел һәлимлији сакит рәфтар вә таб ҝәтирмәклә әлагәләндирир.
14 Павел тәблиғ етдији һәгигәтә мүвафиг һәјат сүрүрдү. Коринф јығынҹағында “фөвгәлһәвариләр” үзүндән проблемләр јарананда Павел гардашлара јазмышды: “Аранызда һазыр икән тәвазөкар, гаиб икән исә сизә гаршы ҹәсур олан мән Павел, шәхсән, Мәсиһин һәлимлији вә јумшаглығы наминә риҹа едирәм” (2 Коринфлиләрә 10:1; 11:5). Бәли, Павел доғрудан да Мәсиһи тәглид едирди. Диггәт јетирин ки, о, гардашларына “Мәсиһин һәлимлији” илә јалварырды. О, һөкмлү вә амиранә тондан гачынырды. Онун мәсләһәти, сөзсүз ки, јығынҹағын һәссас үрәкли үзвләринә тә’сир бағышламышды. Павел јығынҹагдакы ҝәрҝин мүнасибәтләри јүнҝүлләшдирмиш, сүлһ вә бирлик үчүн әсас гојмушду. Мәҝәр һәр биримиз өзүмүзү бу ҹүр апармаға чалышмалы дејиликми? Мәсиһин вә Павелин нүмунәсини хүсусилә дә ағсаггаллар изләмәлидир.
15. Мәсләһәти һәлимликлә вермәк нәјә ҝөрә ваҹибдир?
15 Гардашлара көмәк етмәк мәс’улијјәти јалныз јығынҹагда әмин-аманлыг вә бирлик тәһлүкә алтында олдугда иҹра олунмур. Гардашлар мәһәббәтлә верилән рәһбәрлијә, мүнасибәтләрдә ҝәрҝинлик јаранмаздан чох әввәл еһтијаҹ дујурлар. “Гардашлар, әҝәр бир адам бир ҹинајәт үстә тутулса белә, сиз руһаниләр, ону... ислаһ един” дејә, Павел тәшвиг едир. Бу неҹә мүмкүндүр? “Һәлимлик руһу илә... сән дә јолдан чыхарылмамаг үчүн өзүнә фикир вер” (Галатијалылара 6:1). “Һәлимлик руһуну” горумаг һәмишә асан олмур, хүсусилә дә она ҝөрә ки, бүтүн мәсиһчиләр, о ҹүмләдән мәс’ул гардашлар да ҝүнаһлы мејлләрин тә’сиринә дүчар ола биләрләр. Бунунла белә, һәлимлик сајәсиндә бүдрәјән кәсин ислаһ олунмасы бир гәдәр јүнҝүл кечәҹәк.
16, 17. Мәсләһәти гәбул етмәмәк истәјини арадан нә галдыра биләр?
16 “Ислаһ етмәк” кими тәрҹүмә едилмиш јунан сөзү, һәмчинин сынан сүмүкләри бирләшдирмәк кими ағрылы әмәлијјаты да тәсвир едә биләр. Шәфгәтли һәким сынан сүмүкләри бирләшдирәндә, һәмин әмәлијјатын мүсбәт ҹәһәтләриндән данышыр. Онун сакит сәси хәстәјә тәсәлли верир. Әввәлҹәдән дејилмиш бир нечә сөз ағрыны јүнҝүлләшдирмәјә көмәк едир. Руһани ислаһ да ағрылы ола биләр. Лакин һәлимлијин сајәсиндә она таб ҝәтирмәк асан олаҹаг, бу исә ҝөзәл мүнасибәтләри бәрпа етмәјә јол ачаҹаг вә бүдрәјән кәсә өз давранышыны дүзәлтмәјә көмәк едәҹәкдир. Һәтта мәсләһәт әввәлҹә чох пис гаршыланса да, көмәк едән кәс тәрәфиндән ҝөстәрилән һәлимлик, Мүгәддәс Китабын вердији сағлам мәсләһәти гәбул етмәмәк истәјини ‘гырмаға’ көмәк едәр (Сүлејманын мәсәлләри 25:15).
17 Ким исә башгасынын ислаһ олунмасына көмәк едәндә, һәмишә тәһлүкә вар ки, онун мәсләһәти тәнгид кими гәбул едилсин. Мүгәддәс Китаб үзрә бир алим өз шәрһиндә дејир: “Биз кимә исә төһмәт верәндә, өзүмүздән разы олмаг тәһлүкәсинә дүшә биләрик, бу сәбәбдән һәлимлијә бөјүк еһтијаҹымыз вар”. Тәвазөкарлыгдан ҝәлән һәлимлик, мәсләһәт верән мәсиһчијә бу тәһлүкәдән гачынмаға көмәк едәҹәк.
“Бүтүн инсанлара”
18, 19. а) Мәсиһчиләрин дүнјанын һаким даирәләринә һәлимликлә јанашмалары нәјә ҝөрә чәтин олур? б) Мәсиһчиләрин һаким даирәләрә һәлимликлә јанашмаларына нә көмәк едәр вә бу һансы ҝөзәл сәмәрәләри ҝәтирә биләр?
18 Чохларынын һәлимлик ҝөстәрмәкдә чәтинлик чәкдикләри саһә, дүнјәви һакимләрә гаршы мүнасибәтдир. Бир гајда олараг, сәлаһијјәт верилмиш бә’зи инсанлар өзләрини сәрт апарыр вә инсанлара шәфгәт ҝөстәрмирләр (Ваиз 4:1; 8:9). Лакин Јеһоваја олан мәһәббәтимиз Онун ән јүксәк һакимијјәтини е’тираф етмәјә вә инсан һакимијјәтләринә борҹлу олдуғумуз нисби табечилик ҝөстәрмәјә көмәк едәҹәк (Ромалылара 13:1, 4; 1 Тимотејә 2:1, 2). Һәтта вәзифәли шәхсләр бизим Јеһоваја үмумхалг гаршысында хидмәтимизи мәһдудлашдырмаға чалышдыгда белә, биз һәмд гурбанлары ҝәтирмәк үчүн һәлә дә мүмкүн олан имканлары мәмнунијјәтлә ахтарырыг (Ибраниләрә 13:15).
19 Вәзијјәт һәр неҹә олса да, биз тәҹавүзкарлыға әл атмырыг. Мүдрик давранмаға чалышыр, ејни заманда да һеч вахт дүзҝүн принсипләрдә ҝүзәштә ҝетмирик. Мәһз бу ҹүр давранмагла, бизим гардашларымыз дүнјанын 234 өлкәсиндә хидмәтләрини мүвәффәгијјәтлә давам едирләр. Биз Павелин ‘рәисләрә вә һаким даирәләрә табе олмаг, итаәт етмәк, һәр нөв хејирхаһ иш ҝөрмәјә һазыр олмаг, һеч кимә ифтира атмамаг, гејри-давакар, мүлајим олмаг, бүтүн инсанлара там һәлимлик ҝөстәрмәк’ мәсләһәтинә риајәт едирик (Титуса 3:1, 2).
20. Һәлимлик ҝөстәрән кәсләри һансы мүкафат ҝөзләјир?
20 Һәр ким ки, һәлимлик ҝөстәрир, бол-бол хејир-дуалар алаҹаг. “Һәлимләр нә бәхтијардырлар! — демишдир Иса,— чүнки јери мирас алаҹаглар” (Матта 5:5). Һәлимлијин сајәсиндә Мәсиһин руһла мәсһ едилмиш гардашлары хошбәхтлик әлдә едир вә Падшаһлығын јер үзүндәки маликанәсиндә идарә етмәјә надир имкан алырлар. “Башга гојунлар”дан олан “бөјүк... издиһам” да һәлимлик тәзаһүр етдирир вә јер үзәриндә олаҹаг Ҹәннәти сәбирсизликлә ҝөзләјирләр (Јәһја 10:16; Вәһј 7:9; Мәзмур 37:11). Неҹә дә ҝөзәл ҝәләҹәкдир! Буна ҝөрә дә, ҝәлин Павелин Ефес шәһәриндәки мәсиһчиләрә вердији хатырлатманы һеч заман унутмајаг: “Беләликлә, Рәбб үчүн мәһбус олан мән, сизә јалварырам ки, алдығыныз дә’вәтә лајиг бир һәјат сүрәсиниз. Там тәвазөкарлыг вә һәлимликлә” (Ефеслиләрә 4:1, 2).
Тәкрар
• Аиләдә
• тәблиғ хидмәтиндә
• јығынҹагда
• һәлимлик ҝөстәрән инсанлар һансы хејир-дуалары алырлар?
• Һәлим инсанлара һансы мүкафат вә’д едилмишдир?
[25-ҹи сәһифәдәки шәкил]
Һәлимлик, дини бахышлары ајры олан аиләләрдә хүсусилә ваҹибдир.
[25-ҹи сәһифәдәки шәкил]
Һәлимлик аилә телләрини мөһкәмләндирир.
[26-ҹы сәһифәдәки шәкил]
Һәгигәти һәлимликлә вә дәрин еһтирамла мүдафиә един.
[28-ҹи сәһифәдәки шәкил]
Бүдрәјән кәсә һәлимликлә верилмиш мәсләһәти гәбул етмәк асан олур.