Сизи сәмими-гәлбдән дәвәт едирик

ОЛА БИЛСИН, јашадығыныз әразидә Јеһованын Шаһидләринин ҝөрүшләринин кечирилдији јерин, Падшаһлыг Залынын јанындан кечәндә ичәридә нә баш вердији сизи марагландырыб. Бәс сиз билирдинизми ки, онларын һәфтәлик ҝөрүшләринә һамы ҝәлә биләр? Бурада гонаглары ҝөрмәјә һәмишә шаддырлар.

Амма сиздә бәзи суаллар јарана биләр. Нә үчүн Јеһованын Шаһидләри бирликдә јығышырлар? Һәмин ҝөрүшләрдә нә баш верир? Јеһованын Шаһиди олмајанлар ҝөрүшләр һаггында һансы фикирдәдирләр?

‘Халгы топлајын’

Гәдим заманлардан бәри инсанлар Аллаһ һаггында өјрәнмәк вә Она ибадәт етмәк үчүн бир јерә јығылырлар. Тәхминән 3 500 ил бундан әввәл исраиллиләрә дејилмишди: «Халгын киши, гадын вә ушагларыны, һәмчинин шәһәриниздә јашајан јаделлиләри топлајын. Гој һамы ешидиб өјрәнсин вә Аллаһыныз Рәбдән горхуб, ганунун бүтүн сөзләринә дәгиг әмәл етсин» (Ганунун тәкрары 31:12). Беләликлә, Исраилдә һәм ҝәнҹләрә, һәм дә јашлылара Јеһова Аллаһа ибадәт едиб, табе олмағы өјрәдирдиләр.

Әсрләр сонра, мәсиһчи јығынҹағы тәшкил олунанда, ҝөрүшләр һәгиги ибадәтин ваҹиб сәҹијјәви хүсусијјәти олараг галмаға давам едирди. Һәвари Павел јазмышды: «Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бәзиләринин адәт етдикләри кими өз јығынҹагларымызы тәрк етмәјәк» (Ибраниләрә 10:24, 25). Аилә үзвләри бирликдә вахт кечирәндә аилә неҹә мөһкәмләнирсә, мәсиһчиләр дә ибадәт етмәк үчүн јығыланда, Аллаһа ибадәт етмәк истәјәнләр арасында мәһәббәт телләри елә мөһкәмләнир.

Мүгәддәс Јазыларда олан бу нүмунәләрә ујғун олараг, Јеһованын Шаһидләри һәфтәдә ики дәфә Падшаһлыг Залында ҝөрүшүрләр. Ҝөрүшләр ора ҝәләнләрә Мүгәддәс Китаб принсипләрини гијмәтләндирмәјә, баша дүшмәјә вә тәтбиг етмәјә көмәк едир. Бүтүн дүнјада ҝөрүшләр мүмкүн гәдәр ејни програм үзрә кечирилир вә һәр ҝөрүшүн өз мәгсәди вар. Ҝөрүшләрдән әввәл вә сонра иштирак едәнләр тәравәтләндириҹи үнсијјәтләри илә бир-бирини руһландырыр (Ромалылара 1:12). Бу ҝөрүшләр неҹә кечирилир?

Мүгәддәс Китаба әсасланан мәрузә

Әксәријјәтин ҝәлдији илк ҝөрүш, адәтән һәфтә сону кечирилән Мүгәддәс Китаба әсасланан ачыг мәрузәдир. Иса Мәсиһ чох вахт халг гаршысында нитглә чыхыш едирди, онларын ичиндә ән мәшһуру Дағүстү тәблиғдир (Матта 5:1; 7:28, 29). Һәвари Павел Афинада халга мүраҹиәт етмишди (Һәвариләрин ишләри 17:22-34). Бу нүмунәләрә ујғун олараг, Јеһованын Шаһидләринин ҝөрүшләриндә, хүсусилә ҝениш күтлә үчүн һазырланан мәрузә сөјләнилир. Бу инсанлардан бәзиләри ҝөрүшә илк дәфә ҝәлирләр.

Ҝөрүш «Јеһоваја һәмд нәғмәләри охујун» китабындан сечилмиш маһны илә башлајырa. Арзу едәнләр ајаға галхыб һамы илә бирликдә маһныны охуја биләр. Гыса дуадан сонра тәҹрүбәли натиг 30 дәгигәлик мәрузәни тәгдим едир. («Актуал мөвзулара даир мәрузәләр» чәрчивәсинә бахын). Онун чыхышы тамамилә Мүгәддәс Китаба әсасланыр. Натиг тез-тез динләјиҹиләри мүвафиг ајәләри ачмаға вә охунаркән онлары изләмәјә дәвәт едир. Буна ҝөрә дә, истәсәниз өзүнүзлә Мүгәддәс Китаб ҝәтирә биләрсиниз вә ја ҝөрүшдән әввәл һәр һансы Јеһованын Шаһидиндән Мүгәддәс Китаб хаһиш едә биләрсиниз.

«Ҝөзәтчи Гүлләси»нин өјрәнилмәси

Јеһованын Шаһидләринин әксәр јығынҹагларында ачыг мәрузәдән сонра «Ҝөзәтчи Гүлләси»нин өјрәнилмәси, Мүгәддәс Китаба әсасланан мөвзунун суал-ҹаваб шәклиндә бир саатлыг мүзакирәси кечирилир. Бу ҝөрүш, иштиракчылары Павелин ҝүнләриндәки веријалылары тәглид етмәјә тәшвиг едир. Онлар «һәр ҝүн Мүгәддәс Јазылары арашдырараг Аллаһ кәламыны бөјүк шөвглә» гәбул етмишдиләр (Һәвариләрин ишләри 17:11).

«Ҝөзәтчи Гүлләси»нин өјрәнилмәси маһны илә башлајыр. Апарыҹы бу журналын тәлим нәшриндәки мәгаләни мүзакирә едир вә орада ҝәтирилән суаллары верир. Журналын бир нүсхәсини Јеһованын Шаһидләринин бириндән әлдә едә биләрсиниз. Бу јахынларда мүзакирә олунмуш мөвзулардан бәзиләри бунлардыр: «Валидејнләр, ушагларынызы мәһәббәтлә тәрбијә един», «Һеч кимә пислик әвәзинә пислик етмәјин» вә «Бүтүн изтираблара тезликлә сон гојулаҹаг». Ҝөрүш суал-ҹаваб шәклиндә кечирилсә дә, динләјиҹиләрин иштирак етмәси көнүллүдүр вә адәтән шәрһләри мөвзуну вә ајәләри әввәлҹәдән охујуб, үзәриндә дүшүнәнләр верирләр. Ҝөрүшә маһны вә дуа илә јекун вурулур (Матта 26:30; Ефеслиләрә 5:19).

Јығынҹағын Мүгәддәс Китаб өјрәнмәси

Һәр һәфтә бир ахшам Јеһованын Шаһидләри Падшаһлыг Залында јенә дә ҝөрүшүб, 1 саат 45 дәгигә сүрән үч һиссәли ҝөрүш кечирирләр. Биринҹи һиссә 25 дәгигә давам едән Јығынҹағын Мүгәддәс Китаб өјрәнмәсидир. Бу, иштиракчылара Мүгәддәс Китабла даһа јахшы таныш олмаға, дүшүнҹә тәрзләрини вә әһвал-руһијјәләрини дүзәлтмәјә вә Мәсиһин шаҝирди кими тәрәгги етмәјә көмәк едир (2 Тимотејә 3:16, 17). «Ҝөзәтчи Гүлләси»нин өјрәнилмәсиндә олдуғу кими, бу ҝөрүшдә дә Мүгәддәс Китаб мөвзусу суал-ҹаваб шәклиндә мүзакирә олунур. Шәрһләр көнүллү верилир. Мүгәддәс Китаб өјрәнмәси үчүн вәсаит Јеһованын Шаһидләри тәрәфиндән дәрҹ олунан ја китаб, ја да брошүра олур.

Бәс ҝөрүшдә нә үчүн Мүгәддәс Китаба әсасланан нәшрләр истифадә олунур? Һәлә гәдимдә, Мүгәддәс Китабын јазылдығы дөврдә Аллаһын Кәламыны садәҹә охумагла кифајәтләнмирдиләр. ‘Аллаһын Ганун китабындан охујуб ајдынлашдырыр вә мәнасыны ҹамаата изаһ едирдиләр ки, охунан ајәләр баша дүшүлсүн’ (Неһемја 8:8). Сон илләр «Јешаја», «Даниел» вә «Вәһј» китабларыны арашдыран нәшрләр бу ҝөрүшдә иштирак едәнләрә Мүгәддәс Китабын һәмин һиссләрини баша дүшмәјә көмәк етмишдир.

Теократик Хидмәт Мәктәби

Јығынҹағын Мүгәддәс Китаб өјрәнмәсинин ардынҹа Теократик Хидмәт Мәктәби башлајыр. Бу 30 дәгигәлик ҝөрүш мәсиһчиләрә ‘өјрәтмәк баҹарығыны’ инкишаф етдирмәјә көмәк едир (2 Тимотејә 4:2, ЈД). Мәсәлән, һеч елә олубму ки, ушағыныз, јахуд достунуз Аллаһ вә ја Мүгәддәс Китаб һаггында суал версин вә сиз буна јахшы ҹаваб вермәјә чәтинлик чәкәсиниз? Теократик Хидмәт Мәктәбиндә чәтин суаллара Мүгәддәс Китаба әсасланан руһландырыҹы ҹаваб вермәји өјрәнә биләрсиниз. Беләликлә, биз: «Јорғунлара сөзлә дајаг олмағы билим дејә Худавәнд Рәбб мәнә савадлыларын дилини верди» дејән Јешаја пејғәмбәрин сөзләрини тәкрарлаја биләрик (Јешаја 50:4).

Теократик Хидмәт Мәктәби иштирак едәнләрин өтән һәфтә әрзиндә Мүгәддәс Китабдан охумалы олдуғу парчаја әсасланан нитглә башлајыр. Нитгиндән сонра натиг динләјиҹиләри охунан парчадан тапдыглары фајдалы фикирләр барәдә гыса шәрһ вермәјә дәвәт едир. Бу мүзакирәдән сонра мәктәбә јазылан шаҝирдләр өз тапшырыглары илә чыхыш едирләр.

Шаҝирдләрин тапшырығына күрсүдән Мүгәддәс Китабы охумаг вә ја башгасына Мүгәддәс Китаб мөвзусуну неҹә баша салмағы сәһнәләшдирмәк дахил олур. Һәр тапшырыгдан сонра тәҹрүбәли мәсләһәтчи шәрһләрини «Теократик Хидмәт Мәктәбиндә тәлим алырыг» китабына әсасландырараг шаҝирди өһдәсиндән јахшы ҝәлдији шејләрә ҝөрә тәрифләјир. Сонра тәкликдә онун нәдә јахшылаша биләҹәјинә даир мәсләһәт верир.

Програмын ҹанлы кечән бу һиссәси нәинки јалныз шаҝирдләрә, һәмчинин өзүнүн охумаг, данышмаг вә өјрәтмәк габилијјәтини инкишаф етдирмәк истәјән һәр бир динләјиҹијә фајда вермәк үчүн нәзәрдә тутулуб. Теократик Хидмәт Мәктәбиндән сонра Мүгәддәс Китаб парчасына әсасланан маһны илә Хидмәти ҝөрүшә кечид алыныр.

Хидмәти ҝөрүш

Хидмәти ҝөрүш програмын сонунҹу һиссәсидир. Чыхышлар, сәһнәҹикләр, мүсаһибәләр вә шәрһләр сајәсиндә динләјиҹиләр Мүгәддәс Китаб һәгигәтини еффектив сурәтдә өјрәтмәји мәнимсәјирләр. Иса Мәсиһ өз шаҝирдләрини тәблиғә ҝөндәрмәздән әввәл онлары бир јерә топлајыб, әтрафлы ҝөстәришләр вермишди (Лука 10:1-16). Мүждәчи ишинә там һазыр олан шаҝирдләр мараглы һадисәләрлә гаршылашмышдылар. Сонра исә онлар баш верәнләри Исаја нәгл едирдиләр (Лука 10:17). Шаҝирдләр башларына ҝәлән һадисәләри тез-тез бир-бири илә дә бөлүшүрдүләр (Һәвариләрин ишләри 4:23; 15:4).

Хидмәти ҝөрүшүн 35 дәгигәлик програмы «Бизим Падшаһлыг Хидмәтимиз» адланан ајлыг бүллетендә дәрҹ едилир. Бу јахынларда мүзакирә едилән бәндләрдән бәзиләри бунлардыр: «Јеһоваја аиләнизлә бирҝә хидмәт един», «Дөнә-дөнә ҝәлмәјимизин сәбәби» вә «Тәблиғ хидмәтиндә Мәсиһи тәглид ет». Програм маһны илә сона чатыр вә јығынҹағын бир үзвүнә јекун дуаны етмәк тапшырылыр.

Гонагларын тәәссүратлары

Јығынҹағын үзвләри чалышырлар ки, һәр кәс өзүнү раһат һисс етсин. Мәсәлән, Ендрү Јеһованын Шаһидләри һаггында чохлу пис әһвалатлар ешитмишди. Амма илк дәфә јығынҹаға ҝәләндә ҝөрдүјү хош мүнасибәтдән һејрәтә ҝәлди. Ендрү бөлүшүр: «Белә јердә олмаг чох хош иди. Адамларын неҹә меһрибан олмасыны вә мәнимлә марагландыгларыны ҝөрәндә чох тәәҹҹүбләндим». Канададан олан Ашел адлы јенијетмә дә бу фикирдәдир: «Ҝөрүш чох мараглы иди! Фикирләри изләмәк асан иди».

Бразилијада јашајан Жүзе давакар инсан кими танынырды. Буна рәғмән, ону јашадығы әразидәки Падшаһлыг Залына дәвәт етмишдиләр. Ҝөрүн о нә дејир: «Падшаһлыг Залында оланлар ким олдуғуму билсәләр дә, мәни сәмими гаршыладылар». Јапонијада јашајан Атсуши бөлүшүр: «Етираф етмәлијәм ки, илк дәфә Јеһованын Шаһидләринин јығынҹағына ҝедәндә өзүмү бир аз јад мүһитдә һисс едирдим. Бунунла белә, баша дүшүрдүм ки, бу инсанларда гәрибә бир шеј јохдур. Онлар сәмими олараг чалышырдылар ки, өзүмү раһат һисс едим».

Сизи дә дәвәт едирик

Јухарыдакы шәрһләрдән ҝөрүндүјү кими, Падшаһлыг Залындакы ҝөрүшләрә ҝәлмәјин фајдасы чохдур. Сиз Аллаһ һаггында өјрәнәҹәксиниз вә бурада Мүгәддәс Китаба әсасланараг верилән тәлим васитәсилә Јеһова Аллаһ сизи өз хејриниз үчүн өјрәдәҹәк (Јешаја 48:17).

Јеһованын Шаһидләринин ҝөрүшләри пулсуздур вә һеч кимдән ианә етмәк тәләб олунмур. Јашадығыныз әразидәки Падшаһлыг Залында кечирилән ҝөрүшдә иштирак етмәк истәјәрдинизми? Биз сизи сәмими гәлбдән ҝөрүшләрә дәвәт едирик.

[Һашијә]

[29-ҹу сәһифәдәки чәрчивә]

Актуал мөвзулара даир мәрузәләр

Ашағыдакылар да дахил олмагла, Мүгәддәс Китаба әсасланан 170 мөвзуда мәрузәләр сөјләнилир:

◼ Инсанларын мәншәји илә бағлы нәјә инанмағымыз әһәмијјәт кәсб едирми?

◼ Ҹинси әлагәјә вә никаһа гаршы Аллаһа мәгбул нөгтеји-нәзәр

◼ Аллаһ јери тәләф едәнләрин ҹәзасыны верәҹәк

◼ Һәјат гајғыларынын өһдәсиндән неҹә ҝәлмәк олар?

◼ Буҝүнкү һәјат — һәр шеј бунунла гуртарырмы?

[29-ҹу сәһифәдәки шәкил]

Мүгәддәс Китаб әсасланан мәрузә

[29-ҹу сәһифәдәки шәкил]

«Ҝөзәтчи Гүлләси»нин өјрәнилмәси

[30-ҹу сәһифәдәки шәкил]

Јығынҹағын Мүгәддәс Китаб өјрәнмәси

[30-ҹу сәһифәдәки шәкил]

Теократик Хидмәт Мәктәби

[31-ҹи сәһифәдәки шәкил]

Хидмәти ҝөрүш