Бу сыхынтылы вахтларда Аллаһла јеријин

«Һанок [Ханок] Аллаһ илә јеријирди; вә ҝөздән гејб олду; чүнки ону Аллаһ алды» (ЈАРАДЫЛЫШ 5:24, КМ).

1. Зәманәмизин һансы хүсусијјәтләри һәјатымызы чәтинләшдирир?

СЫХЫНТЫЛЫ вахтлар! Бу сөзләр Хиласкар Падшаһлығын 1914-ҹү илдә бәргәрар олдуғу андан бәшәријјәтин дүчар олдуғу иғтишаш вә зоракылыг долу илләрини неҹә дә дүзҝүн тәсвир едир! О вахтдан артыг «ахыр ҝүнләр» башлајыб. Аҹлыг, хәстәликләр, зәлзәләләр вә мүһарибәләр кими фәлакәтләр әввәлләр ҝөрүнмәдији дәрәҹәдә вүс’­әт алмышдыр (2 Тимотејә 3:1; Вәһј 6:1-8). Бу ҹүр һадисәләр Јеһованын хидмәтчиләриндән дә јан кечмир. Һамымыз јашадығымыз бу дөврүн чәтинликләри вә гејри-сабитлији илә мүәјјән дәрәҹәдә гаршылашырыг. Игтисади чәтинликләр, сијаси иғтишашлар, ҹинајәткарлыг, хәстәликләр вә бир сыра проблемләр һәјатымызы чох ағырлашдырыр.

2. Јеһованын хидмәтчиләри һансы чәтинликләрлә гаршылашырлар?

² Бүтүн бунлара әлавә олараг, Јеһованын хидмәтчиләри Шејтанын даима төрәтдији шиддәтли мүгавимәтләрлә үзләширләр. Бундан ҝөрүнүр ки, Шејтан «Аллаһын әмрләринә риајәт едиб, Исаја олан шәһадәтләринә бағлы галан» инсанлара гаршы мүһарибә апарыр (Вәһј 12:17). Һәр биримиз ајрылыгда мүгавимәтләрә мә’руз галмасаг да, бүтүн мәсиһчиләр Шејтан Иблисин бу дүнјаја һопмуш руһуна вә онун өзүнә гаршы дурмалы олурлар (Ефеслиләрә 2:2; 6:12). Шејтанын руһу иш јеримиздә, мәктәбдә вә јахуд да тәмиз ибадәтлә марагланмајанларын әһатәсиндә олдуғумуз истәнилән јердә бизә тә’сир едә биләр. Бунун үчүн биздән даима ајыг олмаг тәләб олунур.

Милләтләрин јолу илә дејил, Аллаһла јеријин

3, 4. Мәсиһчиләр бу дүнјадан һансы мә’нада фәргләнирләр?

³ Биринҹи әсрдә јашајан мәсиһчиләр дә, дүнјанын руһуна гаршы мәтинликлә мүгавимәт ҝөстәрирдиләр. Буна ҝөрә дә онлар мәсиһчи јығынҹағына аид олмајанлардан чох фәргләнирдиләр. Бу фәрг һаггында Павел белә јазырды: «Беләликлә, мән буну дејир вә Рәбб адына шәһадәт едирәм ки, сиз артыг бүтпәрәстләр кими һәрәкәт етмәјәсиниз. Онлар ағылларынын бош дүшүнҹәләринә ҝөрә давранырлар; зеһинләри гаранлыглашмыш, ичләриндә олан ҹаһиллијә вә үрәкләринин дујғусузлуғуна ҝөрә Аллаһын һәјатына јад олмушдулар. Онлар һәр ҹүр һәссаслығы итирәрәк, һәр нөв мурдарлығы аҹҝөзлүклә ишләмәк үчүн, өзләрини сәфаләтә тәслим етдиләр» (Ефеслиләрә 4:17-19).

⁴ Бу сөзләр һәм Павелин, һәм дә бизим ҝүнләримиздә мөвҹуд олан руһани вә әхлаги зүлмәти неҹә дә дәгигликлә тәсвир едир! Еркән мәсиһчиләр кими, биз дә бу дүнјанын милләтләри кими ‘һәрәкәт етмирик’, әксинә, биз Аллаһла јеримәји өзүмүзә шәрәф санырыг. Дүздүр, бә’зиләри соруша биләр: «Ахы гејри-камил, әһәмијјәтсиз инсанлар Јеһова Аллаһла неҹә јеријә биләрләр?» Амма Мүгәддәс Китаб ҝөстәрир ки, бу мүмкүндүр. Үстәлик, Јеһова Өзү, буну инсанлардан ҝөзләјир. Ерамыздан әввәл сәккизинҹи әсрдә, Микеја пејғәмбәр ашағыдакы сөзләри јазмышдыр: «Еј инсанлар, Аллаһ... сиздән бундан башга нә истәјир ки? Адил олун, мәһәббәт ҝөстәрмәји севин, Аллаһынызын өнүндә [«Аллаһынызла», ЈД] һәлим үрәклә ҝәзин» (Микеја 6:8).

Аллаһла неҹә вә нә үчүн јеримәлијик?

5. Гејри-камил бир инсан Аллаһла неҹә јеријә биләр?

⁵ Биз һәр шејә гадир вә ҝөзә ҝөрүнмәјән Аллаһла неҹә јеријә биләрик? Ајдындыр ки, бурада һәрфи мә’нада «јеримәк» нәзәрдә тутулмур. Мүгәддәс Китабда «јеримәк» сөзү чох вахт «мүәјјән едилмиш јолла ҝетмәк» мә’насыны дашыјырa. Демәли, Аллаһла јеримәк Онун ҝөстәрдији вә Она мәгбул олан јолла ҝетмәк демәкдир. Бу ҹүр һәјат тәрзи бизи инсанларын әксәријјәтиндән фәргләндирсә дә, бу, мәсиһчи үчүн јеҝанә дүзҝүн јолдур. Нә үчүн белә демәк олар? Ҝәлин бир нечә сәбәби арашдыраг.

6, 7. Аллаһла јеримәк нә үчүн ән јахшы һәјат јолудур?

⁶ Биринҹиси, Јеһова Јараданымыз вә һәјатымызын Мәмбәјидир. Һәјатымызы горумаг үчүн О, бизи һәр бир шејлә тә’мин едир (Вәһј 4:11). Буна ҝөрә, һансы јолла јеримәјимизә даир ҝөстәриш вермәјә, јалныз Аллаһын һаггы вар. Һәмчинин, һеч бир шеј Аллаһла јеримәк гәдәр бизә фајда ҝәтирмәјәҹәк. Јеһова, Онунла јеријәнләрин ҝүнаһларынын бағышланмасы үчүн гајғы ҝөстәрәрәк онлара әбәди һәјата даир сарсылмаз бир үмид вериб. Бизим севҝи долу сәмави Атамыз, һәмчинин, онунла јеријәнләри мүдрик мәсләһәтләрлә дә тә’мин едир. Гејри-камиллијимизә вә Шејтанын һакимијјәти алтында олан дүнјада јашамағымыза бахмајараг, бу мәсләһәтләрин сајәсиндә елә индидән һәјатымызы уғурлу едә биләрик (Јәһја 3:16; 2 Тимотејә 3:15, 16; 1 Јәһја 1:8; 2:25; 5:19). Икинҹиси, Аллаһла јеримәји үрәкдән арзулајырыгса, бу, јығынҹагда сүлһә вә бирлијә сәбәб олаҹаг (Колослулара 3:15, 16).

⁷ Нәһајәт сонунҹу вә ән ваҹиб сәбәб будур: биз Аллаһла јеријәркән, һәлә Еден бағында һөкмранлыға даир галдырылмыш мүһүм мүбаһисәли суалда кимин тәрәфини тутдуғумузу нүмајиш етдиририк (Јарадылыш 3:1-6). Өз һәјат тәрзимизлә бүтөвлүклә Јеһованын тәрәфиндә дајандығымызы ҝөстәрир вә инсанлар үзәриндә һөкмранлыг етмәјә, јалныз Онун һүгугу олдуғуну ҹәсарәтлә бәјан едирик (Мәзмур 83:18). Буну етмәклә биз, нүмунәви дуанын ‘адын мүгәддәс тутулсун вә ирадән олсун’ сөзләринә ујғун һәрәкәт едирик (Матта 6:9, 10). Аллаһла јеримәји гәрара аланлар неҹә дә мүдрик бир аддым атмышлар! Онлар әмин ола биләрләр ки, һәјатда ән дүзҝүн истигамәт алыблар, чүнки ‘тәк һикмәтли’ Јеһовадыр вә О, һеч вахт сәһв етмир (Ромалылара 14:26).

8. Ханокун вә Нуһун ҝүнләри бизим ҝүнләримизи нә илә хатырладыр?

⁸ Бәс инсанларын чохунун Јеһоваја хидмәт етмәк истәмәдикләри бу сыхынтылы зәманәдә бир мәсиһчи кими һәјат сүрмәк мүмкүндүрмү? Гәдимдә јашајан садиг кишиләрин нүмунәсини нәзәрдән кечирәркән бу суала ҹаваб ала биләрик. Онлар чәтин вахтларда јашасалар да, нөгсансызлыгларыны горујуб сахлаја билмишдиләр. Мәсәлән, онлардан бири Ханок, о бири исә Нуһ иди. Онларын икиси дә бизим ҝүнләримизә бәнзәр зәманәдә јашајырдылар. Пислик баш алыб ҝедирди. Нуһун ҝүнләриндә јер үзү зоракылыг вә әхлагсызлыгла долмушду. Буна бахмајараг, Ханок да, Нуһ да дүнјанын руһуна мүгавимәт ҝөстәрир вә Аллаһла јеријирдиләр. Онлар буна неҹә мүвәффәг олурдулар? Бу суала ҹаваб вермәк үчүн бу мәгаләдә Ханокун, нөвбәти мәгаләдә исә Нуһун нүмунәсини нәзәрдән кечирәҹәјик.

Ханок сыхынтылы вахтларда Аллаһла јеријирди

9. Ханок һаггында нә билирик?

⁹ Мүгәддәс Китабда Аллаһла јеријәнләр сырасында Ханокун ады биринҹи чәкилир. Мүгәддәс Јазылара әсасән, «Метушелаһын атасы олдугдан сонра, Һанок [Ханок] үч јүз ил Аллаһ илә јериди» (Јарадылыш 5:22, КМ). Ханок 365 ил өмүр сүрмүшдү. Онун һәјаты бизимки илә мүгајисәдә чох узун олса да, о дөвр үчүн гыса иди. Бундан сонра охујуруг: «Һанок [Ханок] Аллаһ илә јериди; вә ҝөздән гејб олду; чүнки ону Аллаһ алды» (Јарадылыш 5:24, КМ). Чох ҝүман, Јеһова Ханоку алыб, ону өлүләр дијарына көчүрдү ки, дүшмәнләри она зәрәр јетирмәсин (Ибраниләрә 11:5, 13). Бу гыса ајәләр истисна олмагла, Мүгәддәс Китаб Ханок һаггында ајры һеч бир мә’лумат вермир. Амма әлимиздә олан мә’лумата әсасланараг демәк олар ки, Ханокун ҝүнләри сыхынтылы иди.

10, 11. а) Адәмлә Һәвванын гијамындан сонра мә’нәви позғунлуг нә дәрәҹәдә вүс’әт алды? б) Ханок нәји пејғәмбәрлик едирди вә инсанлар бу хәбәрә неҹә мүнасибәт бәсләјирди?

¹⁰ Мәсәлән, ҝәлин, Адәмин ҝүнаһындан сонра инсанлар арасында мә’нәви позғунлуғун ҝениш јајылмасы һаггында дүшүнәк. Мүгәддәс Китабда дејилир ки, Адәмин илк оғлу Габил, гардашы Һабили өлдүрмәклә, бәшәр тарихиндә илк инсан гатили олду (Јарадылыш 4:8-10). Һабилин гәтлиндән сонра Адәмлә Һәвванын Шет адлы башга бир оғлу олду. Онун һаггында охујуруг: «Шетин дә бир оғлу олду вә адыны Енош гојду. О заман инсанлар Рәббин адыны чағырмаға башлады» (Јарадылыш 4:25, 26). Тәәссүфләр олсун ки, инсанларын «Рәббин адыны чағырмалары» дөнүклүклә бағлы идиb. Енош доғуландан бир чох илләр сонра Габилин нәслиндән олан Лемек ики арвады үчүн маһны бәстәләмишди. Бу маһныда Лемек, ону јаралајан бир ҝәнҹ оғланы өлдүрдүјү һаггында охујур вә хәбәрдарлыг едирди: «Габил үчүн једди гат гисас алынаҹагса, Лемек үчүн јетмиш једди гат алынаҹаг» (Јарадылыш 4:10, 19, 23, 24).

¹¹ Бу фактларын һамысы ҝөстәрир ки, Шејтанын Еден бағында әсасыны гојдуғу мә’нәви позғунлуг Адәмин нәсли арасында чох тез јајылан залымлыға сәбәб олду. Бу ҹүр залым дүнјада Ханок Јеһова Аллаһын пејғәмбәрлик сөзләрини е’лан едирди. Бу илһамланмыш сөзләр һәлә дә өз актуаллығыны итирмәјиб. Јәһуда Ханокун нә һагда пејғәмбәрлик етдијини јазырды: «Будур, Рәбб [Јеһова] он минләрҹә мүгәддәсләри илә ҝәлди ки, бүтүн инсанлара һөкм етсин вә араларында аллаһсызларын һамысыны Аллаһа һөрмәт етмәдән ҝөрдүкләри бүтүн аллаһсыз ишләр вә аллаһсыз ҝүнаһкарларын Она гаршы сөјләдикләри бүтүн сәрт сөзләр үчүн ифша етсин» (Јәһуда 14, 15). Бу сөзләр сонунҹу дәфә Һар-Меҝидонда һәјата кечәҹәк (Вәһј 16:14, 16). Шүбһә јохдур ки, Ханокун сөзләри бир чох «аллаһсыз ҝүнаһкарлары» әсәбиләшдирирди. Јеһова пејғәмбәринә мәһәббәт ҝөстәрәрәк ону бу ҹүр инсанларын әлиндән гуртарды.

Аллаһла јеримәк үчүн Ханока нә көмәк едирди?

12. Ханоку мүасирләриндән нә фәргләндирән нә иди?

¹² Адәмлә Һәвва Еден бағында оларкән Шејтана гулаг асдылар вә Адәм Јеһоваја гаршы гијам галдырды (Јарадылыш 3:1-6). Онларын оғлу Һабил исә башга јол сечди вә Јеһова онун сечиминдән разы галды (Јарадылыш 4:3, 4). Әфсуслар олсун ки, Адәмин нәслиндән оланларын әксәријјәти Һабил кими дејилди. Амма бир нечә јүз ил сонра доғулан Ханок Һабилә бәнзәјирди. Бәс Ханоку Адәмин нәслиндән олан башга адамлардан фәргләндирән нә иди? Бу суала һәвари Павел белә ҹаваб верир: «Һанок [Ханок] иман васитәсилә дүнјадан көчүрүлдү ки, өлүмү ҝөрмәсин; вә о тапыла билмәди, чүнки Аллаһ ону дүнјадан көчүрмүшдү. Зира көчүрүлмәздән габаг, о, Аллаһа мәгбул олдуғуна даир шәһадәт алды» (Ибраниләрә 11:5). Ханок иманларыјла ҝөзәл өрнәк олан, [Исадан әввәл јашамыш] «бөјүк шаһидләр булудунун» бир һиссәси иди (Ибраниләрә 12:1). Мәһз иман, Ханока көмәк едирди ки, бизим һәјатымыздан үч гат узун олан 365 иллик өмрүнү Аллаһа мәгбул шәкилдә јашасын.

13. Ханок неҹә имана малик иди?

¹³ Ханокун вә башга шаһидләрин иманыны тәсвир едән Павел јазмышды: «Иман исә үмид едилән шејләрә е’тимад, ҝөрүнмәјән һәгигәтләрә инамдыр» (Ибраниләрә 11:1). Бәли, иман үмид етдијимиз шејләрин мүтләг һәјата кечмәсинә әсасланан мөһкәм әминлик һиссидир. Бу үмид о гәдәр ҝүҹлүдүр ки, гаршымызда гојдуғумуз һәјати ваҹиб мәгсәдләрә дә өз тә’сирини ҝөстәрир. Башгалары белә етмәсә дә, бу ҹүр иман Ханоку Аллаһла јеримәјә тәшвиг едирди.

14. Ханокун иманы, еһтимала ҝөрә, һансы дәгиг биликләрә әсасланырды?

¹⁴ Һәгиги иманын бүнөврәси дәгиг биликдир. Бәс, Ханок һансы билијә малик иди? (Ромалылара 10:14, 17; 1 Тимотејә 2:4). Шүбһәсиз, о, Еден бағында баш верәнләрдән хәбәрдар иди. Инсанларын ораја дахил олмасы гадаған едилсә дә, ҝүман ки, о вахтлар һәлә дә мөвҹуд олан Еден бағында һәјатын неҹә олмасыны да билирди (Јарадылыш 3:23, 24). Ханок һәмчинин Аллаһын инсанлара даир нијјәтини дә билирди. Бу нијјәт Адәмин өвладларынын бүтүн јер үзәрини долдуруб ону әввәлки Ҹәннәт һалына салмасындан ибарәтдир (Јарадылыш 1:28). Бундан башга, Ханок Јеһованын башга бир вә’дини дә — Шејтанын башындан вураҹаг вә онун јаланларынын пис нәтиҹәләрини арадан галдыраҹаг Зүрријјәтин ҝәлиши барәсиндәки вә’дини дә унутмурду (Јарадылыш 3:15, КМ). Јәһуда китабында јазылдығы кими, Ханок да Шејтанын зүрријјәтинин мәһв олунмасы һаггында пејғәмбәрлик едирди. Ханок Јеһоваја инандығы үчүн Аллаһын ‘Ону ахтаранлара мүкафат вердијинә’ шүбһә етмирди (Ибраниләрә 11:6). Беләликлә, Ханок бизим гәдәр билмәсә дә, мөһкәм иманын бүнөврәсини гојмаг үчүн кифајәт гәдәр билијә малик иди. Бу ҹүр иманла о, сыхынтылы вахтларда нөгсансызлығыны горујуб сахлаја билди.

Ханокдан нүмунә ҝөтүрүн

15, 16. Ханокдан неҹә нүмунә ҝөтүрә биләрик?

¹⁵ Биз дә Ханок кими, бу сыхынтылы вахтларда Јеһованы севиндирмәк истәдијимиз үчүн Ханокдан нүмунә ҝөтүрмәлијик. Буна ҝөрә Јеһова вә Онун нијјәтләри һаггында дәгиг биликләрә јијәләнмәли вә бу биликләри һәјатымыз боју горујуб сахламалыјыг. Амма бу кифајәт дејил. Биз бу дәгиг биликләри һәјатымызда рәһбәр тутмалыјыг (Мәзмур 119:101; 2 Петер 1:19). Биз Аллаһын дүшүнҹә тәрзинә јијәләнмәли вә һәмишә чалышмалыјыг ки, һәр бир фикримиз вә һәрәкәтимиз Она мәгбул олсун.

¹⁶ Ханокун дөврүндә башгаларынын да Јеһоваја хидмәт едиб-етмәмәләри һаггында бизим һеч бир мә’луматымыз јохдур. Лакин ајдындыр ки, о ја Аллаһа тәк хидмәт едирди, ја да бир азлыға аид иди. Биз дә бу дүнјада азлыг тәшкил едирик, амма руһдан дүшмүрүк. Бизә гаршы ким чыхырса-чыхсын, Јеһова бизә мүтләг көмәк едәҹәк (Ромалылара 8:31). Ханок аллаһсызларын јахынлашмагда олан мәһвини ҹәсарәтлә бәјан едирди. Биз дә «Падшаһлыг һаггында олан бу Мүждә»ни истеһзаја, тә’гиб вә мүгавимәтләрә бахмајараг ҹәсарәтлә тәблиғ едирик (Матта 24:14, И–93). Ханок мүасирләринин чоху илә мүгајисәдә узун өмүр сүрмәди. Буна бахмајараг, онун үмиди бу дүнја илә бағлы дејилди. О, диггәтини даһа мөһтәшәм шејләрә јөнәлтмишди (Ибраниләрә 11:10, 35). Биз дә диггәтимизи Јеһованын нијјәтләринин јеринә јетмәсинә јөнәлдирик. Бу сәбәбдән дә бу дүнјадан там сурәтдә истифадә етмирик (1 Коринфлиләрә 7:31). Бунун әвәзинә ҝүҹүмүздән вә әлимиздәки имканлардан илк нөвбәдә Јеһованын ишини јеринә јетирмәк үчүн истифадә едирик.

17. Ханокдан фәргли олараг, биз һансы биликләрә саһибик вә буна ҝөрә нә етмәлијик?

¹⁷ Ханок инанырды ки, вә’д едилмиш Зүрријјәт јер үзүнә Јеһованын тә’јин етдији вахтда ҝәләҹәк. Бу Зүрријјәтин, јә’ни Иса Мәсиһин јер үзәринә ҝәлмәсиндән вә өзүнү фидијә гурбаны кими тәгдим етмәсиндән артыг 2000 илә јахын вахт кечиб. Онун фидијә гурбанлығы Ханок кими кечмишин садиг хидмәтчиләринә вә һәмчинин бизләрә әбәди јашамаг имканы ачыр. Инди Аллаһын Падшаһлығынын Падшаһы олан Зүрријјәт, Шејтаны ҝөјдән јерә атыб. Бунун нәтиҹәси әтрафымызда баш алыб ҝедән бәлалар вә фәлакәтләрдир (Вәһј 12:12). Ҝөрдүјүмүз кими, биз Ханокдан даһа чох билијә маликик. Гој, бизим дә иманымыз онун иманы кими ҝүҹлү олсун. Гој, Аллаһын вә’дләринин јеринә јетәҹәјинә олан әминлијимиз, етдијимиз һәр бир шејә өз тә’сирини ҝөстәрсин. Ҝәлин, Ханок кими, биз дә сыхынтылы вахтларда јашамағымыза бахмајараг, Аллаһла јеријәк!

[Һашијәләр]

Неҹә ҹаваб верәрдиниз?

• Аллаһла јеримәк нә демәкдир?

• Аллаһла јеримәк нә үчүн ән јахшы һәјат јолудур?

• Сыхынтылы вахтларда јашамасына бахмајараг, Аллаһла јеримәјә Ханока нә көмәк едирди?

• Биз Ханокдан неҹә нүмунә ҝөтүрә биләрик?

[25-ҹи сәһифәдәки шәкил]

Ханок иман васитәсилә «Аллаһла јеријирди».

[27-ҹи сәһифәдәки шәкил]

Биз Јеһованын вә’дләринин јеринә јетәҹәјинә там әминик.

[Иҹазә илә]

Woman, far right: FAO photo/B. Imevbore; collapsing building: San Hong R-C Picture Company