Иман вә Аллаһ горхусу бизи ҹәсарәтләндирир
‘Ҹәсарәтли вә мөһкәм ол. Аллаһын Рәбб сәнинләдир’ (ЈЕШУА 1:9).
1, 2. а) Инсан ҝөзү илә баханда исраиллиләрин Кән’ан халглары үзәриндә гәләбә газанмаға үмидләри вар идими? б) Јеһова Јешуаны нәјә әмин етди?
ЕРАМЫЗДАН әввәл, 1473-ҹү илдә Исраил халгы Вә’д едилмиш дијара дахил олмаға һазырлашырды. Муса гаршыда дуран чәтинликләри онлара хатырладараг деди: ‘Бу ҝүн сиздән даһа бөјүк, даһа гүдрәтли милләтләрин торпагларыны ирс олараг алмаг үчүн Иордан чајыны кечмәк әрәфәсиндәсиниз. Онларын шәһәрләри бөјүк, һасарлары ҝөјләрә чатыр. Бу ҝүҹлү, уҹабој халг Анаглылардыр. Онларын барәләриндә белә ешитмисиниз: «Анаглыларын гаршысында ким дајана биләр?»’ (Ганунун тәкрары 9:1, 2). Бәли, бу нәһәнҝ дөјүшчүләр халг арасында зәрб-мәсәлә чеврилмишди. Бундан әлавә, бә’зи Кән’ан халглары јахшы силаһланмышдылар, онларын ордуларында атлар вә тәкәрләриндә дәмир дәрјазлары олан дөјүш арабалары вар иди (Һакимләр 4:13).
2 Бу халглардан фәргли олараг, исраиллиләр көләликдән азад едилмиш, 40 ил дә сәһрада јашамышдылар. Инсан ҝөзү илә баханда онларын гәләбә газанмаға үмидләри чох аз иди. Лакин Муса иман ҝөзү илә Јеһованын Өз халгына башчылыг етдијини ‘ҝөрүрдү’ (Ибраниләрә 11:27). О, исраиллиләрә деди: ‘Өнүнүздә ҝедән Аллаһыныз Рәбб онлары гыраҹаг, гаршынызда бојун әјдирәҹәк’ (Ганунун тәкрары 9:3; Мәзмур 33:16, 17). Мусанын өлүмүндән сонра Јеһова Јешуаны әмин етди ки, она дајаг олаҹаг. О деди: «Галх, сән вә бүтүн бу халг Иордан чајыны кечиб Исраил өвладларына верәҹәјим торпаға ҝедин. Бүтүн өмрүн боју һеч кәс сәнә гаршы чыха билмәјәҹәк. Муса илә олдуғум кими сәнинлә дә олаҹағам» (Јешуа 1:2, 5).
3. Јешуанын иманыны вә ҹәсарәтини мөһкәмләндирән нә иди?
3 Јешуа Јеһовадан дәстәк вә рәһбәрлик алмаг үчүн Гануну охумалы, үзәриндә дүшүнмәли вә она риајәт етмәли иди. Јеһова деди: «Онда јолун уғурлу олаҹаг вә мүвәффәгијјәт газанаҹагсан. Сәнә ҹәсарәтли вә мөһкәм олмағы әмр едән Мән дејиләмми? Горхма вә руһдан дүшмә, чүнки Аллаһын Рәбб ҝедәҹәјин һәр јердә сәнинләдир» (Јешуа 1:8, 9). Јешуа Јеһованын сөзләринә гулаг асдығы үчүн ҹәсарәтли, мөһкәм вә онун јолу уғурлу олду. Әфсуслар олсун ки, Јешуанын мүасирләринин әксәријјәти Аллаһын сөзләринә әһәмијјәт вермәди. Бунун нәтиҹәсиндә, онлар мүвәффәгијјәтсизлијә уғрадылар вә сәһрада өлдүләр.
Имансыз вә ҹәсарәтсиз халг
4, 5. а) Он кәшфијјатчынын әһвал-руһијјәси Јешуа вә Калевин әһвал-руһијјәсиндән нә илә фәргләнирди? б) Халг имансызлыг ҝөстәрәндә Јеһова һансы һиссләри кечирирди?
4 Бу һадисәләрдән гырх ил әввәл, исраиллиләр илк дәфә Кән’анын сәрһәдләринә јахынлашанда, Муса дијары јохламаг үчүн 12 кәшфијјатчы ҝөндәрди. Кәшфијјатчылардан ону горху ичиндә ҝери гајытды. Онлар гышгырырдылар: «Орада ҝөрдүјүмүз һәр кәс уҹа бојлудур. Орада нәһәнҝ адамларын нәслиндән олан Анаглылары ҝөрдүк. Онларын јанында өзүмүзү чәјирткә бојда һисс етдик». Доғурданмы тәкҹә анаглылар јох, орада јашајан «һәр кәс» дә нәһәнҝ иди? Хејр. Анаглылар Дашгындан габаг јашамыш нәһәнҝ адамларын нәслиндән идиләрми? Әсла јох! Онларын бу шиширтмәләри уҹбатындан бүтүн халгы горху бүрүдү. Исраиллиләр һәтта Мисирә, көләликдә олдуглары өлкәјә гајытмаг истәдиләр! (Сајлар 13:31–14:4).
5 Лакин кәшфијјатчылардан икиси, Јешуа вә Калев Вә’д едилмиш дијара ҝирмәјә ҹан атырдылар. Онлар дејирдиләр: «Онлары мәғлуб едә биләрик. Мүдафиәчиләри онлары атыб ҝетмишдир, амма Рәбб бизимләдир. Онлардан горхмајын!» (Сајлар 14:9). Јешуа вә Калевин никбинлији әсассыз идими? Јох! Јешуа вә Калев бүтүн халг илә бирҝә Јеһованын Мисир падшаһлығыны вә онун аллаһларыны Он бәла васитәсилә алчалтдығынын шаһиди олмушдулар. Онлар, һәмчинин Јеһованын фир’ону вә онун ордусуну Гырмызы дәниздә батырдығыны да ҝөрмүшдүләр (Мәзмур 136:15). Ајдын олур ки, он кәшфијјатчынын вә онларын сөзүнә ујанларын горхуја дүшмәси үзүрсүз иди. «Нә вахтадәк бу халг Мәнә һөрмәтсизлик едәҹәк? Араларында етдијим әламәтләри ҝөрә-ҝөрә нә вахта гәдәр Мәнә иман ҝәтирмәјәҹәкләр?», — дејә Јеһова дәриндән кәдәрләндијини билдирди (Сајлар 14:11).
6. Ҹәсарәт иманла неҹә бағлыдыр вә бизим ҝүнләрдә бу нәдән ајдын олур?
6 Јеһова проблемин көкүнү үзә чыхартды, халгын үрәксизлији иманларынын чатышмадығыны нүмајиш етдирирди. Бәли, иман вә ҹәсарәт бир-бириндән ајрылмаздыр. Онларын арасындакы сых бағлылыг һәвари Јәһјанын сөзләриндән ҝөрүнүр. О, мәсиһчи јығынҹағы вә онун апардығы руһани мүһарибә һагда јазырды: «Дүнјаја галиб ҝәлән зәфәр будур: иманымыз» (1 Јәһја 5:4). Бизим ҝүнләрдә Јешуанын вә Калевин иманына бәнзәр иман, араларында ҹаван вә јашлы, сағлам вә ја сәһһәти зәиф олан алты милјондан артыг Јеһованын Шаһидини Падшаһлыг һаггында хош хәбәри тәблиғ етмәјә сөвг едир. Индијәдәк һеч бир дүшмән бу гүдрәтли, ҹәсарәтли ордуну сусдура билмәмишдир (Ромалылара 8:31).
‘Ҝери чәкилмәјин’
7. ‘Ҝери чәкилмәк’ ифадәси нә демәкдир?
7 Јеһованын хидмәтчиләри Павел кими хош хәбәри ҹәсарәтлә тәблиғ едирләр. О јазмышды: «Биз... ҝери чәкилиб, һәлак оланлардан дејилик; иман едиб, ҹанларынын хиласына наил оланларданыг» (Ибраниләрә 10:39). Павелин гејд етдији ‘ҝери чәкилмәк’ ифадәси ани горхуја дүшмәк демәк дејил, чүнки Аллаһын бир чох садиг хидмәтчиләринин һәјатында вахташыры белә анлар олур (1 Шамуел 21:12; 1 Падшаһлар 19:1-4). Бир Мүгәддәс Китаб лүғәтиндә изаһ едилир ки, бу ифадә «дөнмәк, узаглашмаг, имандан зәиф јапышмаг» мә’насыны дашыјыр. Һәмин лүғәтдә, һәмчинин гејд едилир ки, ‘ҝери чәкилмәк’, мәҹази мә’нада «јелкәни ендирәрәк» Аллаһа хидмәтдә «сүр’әти азалтмаг» кими дә ишләнә биләр. Әлбәттә ки, мөһкәм иманлары оланлар тә’гибләрә мә’руз галанда, хәстәләнәндә вә ја диҝәр сынагларла үзләшәндә «сүр’әтләрини азалтмаг» нијјәтиндә дејилләр. Онлар хидмәтләриндә ирәлиләјиш едир вә Јеһованын онларын гајғысына галдығына вә мәһдудијјәтләриндән хәбәрдар олдуғуна әминдирләр (Мәзмур 55:22; 103:14). Сәнин дә белә иманын вармы?
8, 9. а) Јеһова еркән мәсиһчиләрин иманыны неҹә мөһкәмләндирди? б) Иманымызы мөһкәмләндирмәк үчүн биз нә едә биләрик?
8 Бир дәфә һәвариләр иманларынын чатышмадығыны һисс едәрәк Исадан ‘иманларыны артырмағы’ хаһиш етдиләр (Лука 17:5). Иса онларын сәмими хаһишинә ҹаваб верди вә бу, ерамызын 33-ҹү илинин Пентикост ҝүнүндә хүсусилә ајдын олду. Һәмин ҝүн шаҝирдләрин үзәринә мүгәддәс руһ төкүлдү вә бунун сајәсиндә онлар Аллаһын Кәламыны вә нијјәтини даһа јахшы анладылар (Јәһја 14:26; Һәвариләрин ишләри 2:1-4). Шаҝирдләрин иманы мөһкәмләнди вә онлар фәал тәблиғ етмәјә башладылар. Мүгавимәтләрә бахмајараг, хош хәбәр ‘ҝөј алтында олан һәр мәхлуга тәблиғ едилди’ (Колослулара 1:23; Һәвариләрин ишләри 1:8; 28:22).
9 Әҝәр биз дә иманымызы мөһкәмләндирмәк вә хидмәтдә ирәли ҝетмәк истәјириксә, Мүгәддәс Китабы охумалы, онун үзәриндә дүшүнмәли вә мүгәддәс руһ алмаг үчүн дуа етмәлијик. Јешуа, Калев вә еркән мәсиһчиләр кими, јалныз Аллаһын һәгигәтләрини бејнимиздә вә үрәјимиздә һәкк етмәклә биз руһани мүһарибәдә давам ҝәтирмәк вә гәләбә газанмаг үчүн лазыми ҹәсарәт верән иман әлдә едәҹәјик (Ромалылара 10:17).
Садәҹә Аллаһын мөвҹудлуғуна инанмаг кифајәт дејил
10. Һәгиги имана саһиб олмаг нә демәкдир?
10 Аллаһын гәдимдәки садиг хидмәтчиләринин нүмунәләри ҝөстәрир ки, ҹәсарәт вә дөзүмү верән иман дејәндә садәҹә Аллаһын мөвҹудлуғуна инанмаг нәзәрдә тутулмур (Јагуб 2:19). Иманлы адам Јеһованы бир шәхсијјәт кими таныјыр вә Она там е’тибар етмәји баҹарыр (Мәзмур 78:5-8; Сүлејманын мәсәлләри 3:5, 6). О, Аллаһын ганун вә принсипләринә риајәт етмәјин өз хејринә олдуғуна үрәкдән инаныр (Јешаја 48:17, 18). О, һәм дә Јеһованын бүтүн вә’дләрини јеринә јетирәҹәјинә вә ‘Ону ахтаранлара мүкафат верәҹәјинә’ там әминдир (Ибраниләрә 11:1, 6; Јешаја 55:11).
11. Јешуа илә Калевә иман вә ҹәсарәтләринә ҝөрә һансы хејир-дуалар верилмишдир?
11 Белә иман даима инкишаф едир. Өјрәндијимиз һәгигәтләри һәјатымызда тәтбиг едәндә, фајдасыны ‘даданда’, дуаларымызын ҹавабларыны ‘ҝөрәндә’ вә ја Јеһованын рәһбәрлијини һәјатымызда һисс едәндә иманымыз даһа чох мөһкәмләнир (Мәзмур 34:8; 1 Јәһја 5:14, 15). Биз әмин ола биләрик ки, Јешуа вә Калев Аллаһын хејирхаһлығыны даддыгҹа онларын иманы даһа дәрин көк салырды (Јешуа 23:14). Мәсәлән, Аллаһын вә’д етдији кими, онлар сәһрада 40 ил долашандан сонра сағ галдылар (Сајлар 14:27-30; 32:11, 12). Онлар Кән’анын алтыиллик истиласында фәал иштирак етмиш, Аллаһ онлара узун өмүр вә ҹан сағлығы вермиш, онлар һәтта шәхси торпаг саһәси алмышдылар. Јеһова Она садиг галанлары вә ҹәсарәтлә хидмәт едәнләри сәхавәтлә мүкафатландырыр (Јешуа 14:6, 9-14; 19:49, 50; 24:29).
12. Јеһова Өз «кәламыны» һансы мә’нада ‘үстүн тутур’?
12 Јеһованын Јешуа вә Калевә бәсләдији севҝи долу хејирхаһлығы мәзмурчунун сөзләрини јадымыза салыр: «Исмини, кәламыны һәр шејдән [«кәламыны исминдән», ЈД] үстүн тутмусан» (Мәзмур 138:2). Јеһова вә’дләринә ады илә заманәт верәндә, вә’дләринин јеринә јетмәси ҝөзләдијимиздән артыг олур (Ефеслиләрә 3:20). Бәли, Јеһова һеч вахт Ондан ‘зөвг аланларын’ үмидини боша чыхармыр (Мәзмур 37:3, 4).
‘Аллаһа мәгбул’ инсан
13, 14. Нәјә ҝөрә Ханока иман вә ҹәсарәт лазым иди?
13 Мәсиһчилик дөврүндән әввәл јашамыш Аллаһын диҝәр садиг шаһиди Ханока диггәт јетирәк. Онун да нүмунәси бизә иман вә ҹәсарәтә аид чох шеј өјрәдә биләр. Пејғәмбәрлик етмәјә башламаздан әввәл о, еһтимал ки, иман вә ҹәсарәтинин сынагдан кечириләҹәјини билирди. Ханок буну һарадан билирди? Јеһова Еден бағында Шејтан Иблисин хидмәтчиләрилә Өз хидмәтчиләри арасында дүшмәнчилик олаҹағыны билдирмишди (Јарадылыш 3:15). Ханок бу әдавәтин бәшәр тарихинин башланғыҹында — Габил, гардашы Һабили өлдүрәндә мејдана чыхдығыны билирди. Мараглыдыр ки, онларын атасы Адәм, Ханок анадан оландан сонра тәхминән 310 ил јашамышды (Јарадылыш 5:3-18).
14 Бунлара бахмајараг, ҹәсарәтли Ханок «Аллаһа јахын олду» вә Јеһоваја гаршы сөјләдикләри бүтүн ‘сәрт сөзләрә’ ҝөрә мүасирләрини мүһакимә етди (Јарадылыш 5:22; Јәһуда 14, 15). Ханок һәгиги ибадәти ҹәсарәтлә мүдафиә етдији үчүн, еһтимал ки, онун чохлу дүшмәнләри вар иди, бу исә Ханокун һәјатыны тәһлүкә гаршысына гојурду. Буна ҝөрә дә, Јеһова ону өлүм әзабындан гуртартды. Ханок ‘Аллаһа мәгбул олдуғуна даир шәһадәт алдыгдан’ сонра, Јеһова ону һәјатдан өлүмә ‘көчүрдү’. Ҝөрүнүр, бу заман Јеһова она пејғәмбәрлик рө’јасы верәрәк ону хүсуси вәзијјәтә гәрг етмишдир (Ибраниләрә 11:5, 13; Јарадылыш 5:24).
15. Ханок Јеһованын мүасир хидмәтчиләри үчүн һансы ҝөзәл нүмунәни гојмушдур?
15 Ханокун ‘көчүрүлмәсини’ гејд етдикдән сонра Павел, ‘иман етмәдән Аллаһа мәгбул олмағын гејри-мүмкүнлүјүнү’ јазмагла иманын ваҹиблијини бир даһа вурғулады (Ибраниләрә 11:6). Иман Ханока Јеһова илә јеримәк вә Онун һөкм хәбәрини аллаһсыз инсанлара е’лан етмәк үчүн ҹәсарәт верирди. Беләликлә Ханок бизим үчүн ҝөзәл нүмунә гојмушдур. Биз дә һәгиги ибадәтә гаршы чыхан вә һәр ҹүр писликлә долу дүнјада Ханокун ишинә бәнзәр бир иш ҝөрүрүк (Мәзмур 92:7; Матта 24:14; Вәһј 12:17).
Аллаһ горхусундан ирәли ҝәлән ҹәсарәт
16, 17. Авдија ким иди вә о һансы вәзијјәтә дүшмүшдү?
16 Иманла бәрабәр Аллаһ гаршысында еһтирам долу горху бизи ҹәсарәтләндирир. Ҝәлин Илјас пејғәмбәрин вә Исраилин шимал падшаһлығында һөкмранлыг едән Ахавын дөврүндә јашамыш вә Аллаһдан горхан инсанын ҝөзәл нүмунәсинә нәзәр салаг. Ахавын падшаһлығы дөврүндә Баала ибадәт мисли ҝөрүнмәмиш мигјасда јајылмышды. Баалын 450, Ашеранын исә 400 пејғәмбәри Ахавын арвады ‘Изевелин сүфрәсиндә јемәк јејирди’. Ашера бүтләри киши ҹинсијјәт үзвүнүн рәмзи иди (1 Падшаһлар 16:30-33; 18:19).
17 Јеһованын барышмаз дүшмәни Изевел һәгиги ибадәтин көкүнү Исраилдән кәсмәк истәјирди. О, Јеһованын бә’зи пејғәмбәрләрини өлдүрмүшдү, һәтта Илјасы да өлдүрмәк истәјирди. Лакин Илјас Јеһованын ҝөстәришинә әмәл едәрәк Иордан чајынын о тајына гачды (1 Падшаһлар 17:1-3; 18:13). Шимали падшаһлыгда һәгиги ибадәтдә галмағын нә гәдәр чәтин олдуғуну тәсәввүр едә биләрсәнми? Бәс әҝәр сән падшаһ сарајында хидмәт едирсәнсә, онда неҹә? Аллаһдан горхан вә Ахавын сарај рәиси олан Авдија мәһз белә вәзијјәтә дүшмүшдүa (1 Падшаһлар 18:3).
18. Авдија нәјин сајәсиндә Јеһованын ҝөркәмли хидмәтчиси олмушдур?
18 Сөзсүз, Авдија Јеһоваја ибадәт едәркән еһтијатлы иди вә мүдрикликлә давранырды. Лакин о иманындан дөнмәди. 1 Падшаһлар 18:3 ајәсиндә дејилир: «Авдија Рәбдән чох горхурду». Һәгигәтән дә, Авдијанын Аллаһ гаршысында бөјүк горхусу вар иди! Аллаһ гаршысында сағлам горху ону чох ҹәсарәтләндирирди. Бу, Изевел Јеһованын пејғәмбәрләрини өлдүрдүкдән дәрһал сонра етдији һәрәкәтиндән ајдын ҝөрүнүр.
19. Авдијанын ҝөрдүјү һансы иш онун ҹәсарәтли инсан олдуғуну ҝөстәрир?
19 Биз охујуруг: «Изевел Рәббин пејғәмбәрләрини гырыб өлдүрән заман Авдија пејғәмбәрләрдән јүз нәфәри апарыб онлары әлли-әлли олараг мағараларда ҝизләтмиш, чөрәк вә су илә тә’мин етмишди» (1 Падшаһлар 18:4). Јүз нәфәри ҝизлиҹә једиздирмәјин нә гәдәр тәһлүкәли бир иш олдуғуну тәсәввүр един. Авдијанын бу һәрәкәти јалныз Ахавын вә Изевелин дејил, сараја тез-тез ҝәлиб-ҝедән 850 јаланчы пејғәмбәрин дә нәзәринә чарпа биләрди. Бундан савајы, Исраилдә јашајан бир чох бүтпәрәстләр дә, кәндлидән тутмуш рәисәдәк, Авдијанын ишинин үстүнү ачмаг, бунунла да падшаһын вә мәләкәнин рәғбәтини газанмаг үчүн һеч бир имканы әлдән вермәздиләр. Буна бахмајараг, Авдија бүтүн бу бүтпәрәстләрин дүз ҝөзүнүн габағында ҹәсарәтлә Јеһованын пејғәмбәрләринин гајғысына галырды. Аллаһ горхусу неҹә дә бөјүк гүввәдир!
20. Аллаһ горхусу Авдијаја неҹә көмәк етди вә онун нүмунәси сәнә неҹә көмәк едир?
20 Бәли, Авдија Аллаһдан горхдуғу үчүн ҹәсарәтли инсан иди, буна ҝөрә дә Јеһова ону дүшмәнләриндән мүдафиә етди. Сүлејманын мәсәлләри 29:25 ајәсиндә дејилир: «Инсандан горхан өзүнү тәләјә салар, амма Рәббә ҝүвәнән архајын јашар». Авдија һеч дә гејри-ади инсан дејилди; о, ишинин үстүнүн ачылаҹағындан вә өлдүрүләҹәјиндән горхурду. Биз дә онун јериндә олсајдыг һәмин һиссләри кечирәрдик (1 Падшаһлар 18:7-9, 12). Буна бахмајараг, Аллаһ горхусу инсан гаршысында горхуја үстүн ҝәлмәкдә она көмәк едирди. Авдија һәр биримиз, хүсусилә дә азадлығыны, һәтта һәјатыны итирмәк тәһлүкәси илә гаршылашараг Јеһоваја хидмәт едәнләр үчүн чох ҝөзәл нүмунәдир (Матта 24:9). Ҝәлин һамымыз «Аллаһа мәгбул еһтирам вә ихласкарлыгла» хидмәт едәк (Ибраниләрә 12:28).
21. Нөвбәти мәгаләдә нә мүзакирә олунаҹаг?
21 Иман вә Аллаһ горхусу бизә ҹәсарәтли олмаға көмәк едән јеҝанә хүсусијјәтләр дејил; мәһәббәт һәтта даһа бөјүк гүввәдир. «Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг руһу вермишдир», — дејә, һәвари Павел јазырды (2 Тимотејә 1:7). Нөвбәти мәгаләдә, бу чәтин ҝүнләрдә Аллаһа ҹәсарәтлә хидмәт етмәк үчүн мәһәббәтин бизә неҹә көмәк етдијини ҝөрәҹәјик (2 Тимотејә 3:1).
[Һашијә]
a Бу, пејғәмбәр Авдија дејил.
Ҹаваб верә биләрсинизми?
• Јешуа вә Калев нәјин сајәсиндә ҹәсарәтли идиләр?
• Һәгиги иман нәдир?
• Аллаһын һөкм хәбәрини ҹәсарәтлә бәјан етмәјә Ханока нә көмәк едирди?
• Аллаһ горхусу ҹәсарәтли олмағымыза неҹә көмәк едир?