Јеһова үчүн мүгәддәс олан шејләр сизин үчүн дә мүгәддәсдирми?
‘Диггәт един ки, һеч кимсә әхлагсыз вә јахуд мүгәддәс шејләри гијмәтләндирмәјән олмасын’ (ИБРАНИЛӘРӘ 12:15, 16, ЈД).
1. Јеһованын хидмәтчиләри дүнјада һөкм сүрән һансы әһвал-руһијјәјә шәрик дејилләр?
ИНСАНЛАРЫН ҝөзүндә мүгәддәс шејләр ҝетдикҹә даһа чох гијмәтдән дүшүр. Франсыз сосиологу Едгар Морин гејд едир: «Мә’нәвијјатын бүнөврәсини тәшкил едән тәмәлләр — Аллаһ, тәбиәт, вәтән, тарих, идрак артыг өзләринин данылмазлығыны итирмишләр... Инсанлар дәјәрләрини өзләри мүәјјән едирләр». Белә мүнасибәт «дүнјанын руһуну», јә’ни итаәтсиз инсанларда фәал олан руһу’ әкс етдирир (1 Коринфлиләрә 2:12; Ефеслиләрә 2:2). Јеһоваја һәср олунараг, Онун әдаләтли һөкмранлығына һәвәслә табе оланлар исә бу сајғысызлыг руһуна шәрик дејилләр (Ромалылара 12:1, 2). Онлар баша дүшүрләр ки, Јеһоваја ибадәтдә мүгәддәслик ваҹиб јери тутур. Һәјатымызда нәләри мүгәддәс сајмалыг? Бу мәгаләдә Аллаһын бүтүн хидмәтчиләри үчүн мүгәддәс олан беш шеји нәзәрдән кечирәҹәјик. Нөвбәти мәгаләдә исә мәсиһчи ҝөрүшләринин мүгәддәслијиндән данышылаҹаг. Бәс «мүгәддәс» сөзү әслиндә нә демәкдир?
2, 3. а) Аллаһын Кәламында Јеһованын мүгәддәслији неҹә вурғуланыр? б) Биз Јеһованын адыны неҹә мүгәддәс тутуруг?
2 Гәдим ибрани дилиндә «мүгәддәс» сөзү ајырмаг, ајры сахламаг мә’насыны дашыјыр. Аллаһын Кәламында «мүгәддәс» сөзү ади һалларда истифадә едилмәјән, јә’ни мүгәддәс сајылан шејләрә аид едилир. Јеһованын мүгәддәслији мүтләгдир. О, ‘Ән Мүгәддәс’ адланыр (Сүлејманын мәсәлләри 9:10; 30:3, ЈД). Гәдим Исраилдә баш каһинин чалмасына «Мүгәддәслик Јеһоваја мәхсусдур» (ЈД) сөзләри һәкк олунмуш гызыл лөвһәҹик тикилирди (Чыхыш 28:36, 37). Мүгәддәс Китабда Јеһованын тахтынын әтрафында дајанан керувлар вә серафларын: ‘Рәбб мүгәддәсдир, мүгәддәсдир, мүгәддәсдир!’ дејә нида етдикләри тәсвир едилир (Јешаја 6:2, 3; Вәһј 4:6-8). Мүгәддәс сөзүнүн тәкрарланмасы ҝөстәрир ки, Јеһова сон дәрәҹә мүгәддәс, саф вә тәмиздир. О, мүгәддәслик мәнбәјидир.
3 Јеһованын ады да мүгәддәсдир. Мәзмурчу нида едирди: «Гој бөјүк, зәһмли адына, о мүгәддәс олана шүкүр етсинләр!» (Мәзмур 99:3). Иса дуа етмәји өјрәдирди: «Еј ҝөјләрдә олан Атамыз, адын мүгәддәс тутулсун» (Матта 6:9). Исанын анасы Мәрјәм нида едирди: «Мәним гәлбим Рәбби јүксәлдир... Гадир мәним үчүн мөһтәшәм ишләр ҝөрдү; Онун ады мүгәддәсдир» (Лука 1:46, 49). Биз Јеһованын хидмәтчиләри олдуғумуз үчүн Онун адыны мүгәддәс тутур вә бу мүгәддәс ада ләкә ҝәтирәҹәк һәрәкәтләрдән узаг дуруруг. Бундан башга, биз Јеһованын мүгәддәслијә олан бахышына шәрикик, јә’ни Онун мүгәддәс сајдығы шејләр бизим үчүн дә мүгәддәсдир (Амос 5:14, 15).
Нәјә ҝөрә Исаја дәрин һөрмәт бәсләјирик?
4. Нә үчүн Иса Аллаһын Кәламында ‘мүгәддәс’ адландырылыр?
4 Мүгәддәс Аллаһын ‘ваһид Оғлу’ Иса мүгәддәс јарадылмышды (Јәһја 1:14; Колослулара 1:15; Ибраниләрә 1:1-3). Она ҝөрә дә о, «Аллаһын мүгәддәси» адланыр (Јәһја 6:69, һашијә). Аллаһ Исанын һәјатыны ҝөјдән јерә көчүрәндә онун мүгәддәслији итмәмишди, чүнки Мәрјәм ону мүгәддәс руһун тә’сири илә дүнјаја ҝәтирмишди. Мәләк она демишди: «Мүгәддәс Руһ сәнин үзәринә ҝәләҹәк... сәндән доғулаҹаг Мүгәддәсә Аллаһын Оғлу дејиләҹәкдир» (Лука 1:35). Јеһоваја дуа едәркән Јерусәлимдәки мәсиһчиләр ики дәфә Аллаһын оғлуну «мүгәддәс Гулун Иса» адландырмышдылар (Һәвариләрин ишләри 4:27, 30).
5. Иса јердә һансы мүгәддәс тапшырығы јеринә јетирди вә онун ганы нә үчүн гијмәтлидир?
5 Иса јер үзүндә мүгәддәс бир тапшырыг јеринә јетирмәли иди. О, ерамызын 29-ҹу илиндә вәфтиз олунанда Јеһованын мөһтәшәм руһани мә’бәдиндә Баш Каһин тә’јин олунду (Лука 3:21, 22; Ибраниләрә 7:26; 8:1, 2). О, һәм дә өзүнү фидијә олараг гурбан верди. Мәсиһин төкүлән ганы сајәсиндә ҝүнаһкарлар хилас ола биләҹәкләр (Матта 20:28; Ибраниләрә 9:14). Бу сәбәбдән Исанын ганы бизим үчүн «гијмәтли», јә’ни мүгәддәсдир (1 Петер 1:19).
6. Биз Иса Мәсиһә һансы мүнасибәти бәсләјирик вә нә үчүн?
6 Мәсиһчиләрин Падшаһ вә Баш Каһин олан Иса Мәсиһә дәрин һөрмәт бәсләдијини ҝөстәрәрәк һәвари Павел јазырды: «Аллаһ Ону [Өз оғлуну] чох уҹалтды вә Она бүтүн адлардан үстүн олан ады бәхш етди ки, ҝөјдә, јердә вә јерин алтында оланларын һамысы Исанын адына һөрмәтлә диз чөксүн. Вә Ата Аллаһын иззәти үчүн һәр дил играр етсин ки, Иса Мәсиһ Рәббдир» (Филипилиләрә 2:9-11). ‘Насеһимиз’, јә’ни Рәһбәримиз вә мәсиһчи јығынҹағынын Башы Падшаһ Иса Мәсиһә севинҹлә табе олмагла, Јеһованын мүгәддәс шејләрә олан бахышына шәрик олдуғумузу ҝөстәририк (Матта 23:10; Колослулара 1:18).
7. Мәсиһә табе олдуғумуз нәдән ҝөрүнүр?
7 Мәсиһә табе олмаг һәм дә, онун башчылыг етдији ишә нәзарәт етмәк үчүн тә’јин етдији гардашлара лајигинҹә һөрмәт ҝөстәрмәк демәкдир. Рәһбәрлик Шурасыны тәшкил едән руһла мәсһ едилмишләрин вә онларын филиалларда, вилајәт, рајон вә јығынҹагларда тә’јин етдији нәзарәтчиләрин вәзифәси мүгәддәс сајылмалыдыр. Биз Јеһованын бу гурулушуна дәрин һөрмәт бәсләмәли вә она табе олмалыјыг (Ибраниләрә 13:7, 17).
Мүгәддәс халг
8, 9. а) Исраил халгы һансы мә’нада мүгәддәс иди? б) Јеһова исраиллиләрә мүгәддәслик анлајышыны неҹә ашылады?
8 Јеһова исраиллиләрлә әһд бағлады. Бу әһдин сајәсиндә јени халг Аллаһын гаршысында хүсуси мөвгејә саһиб олду. Онлар башга халглардан ајрылыб, мүгәддәс сајылмаға башладылар. Јеһова онлара деди: «Сиз Мәним үчүн мүгәддәс олун, чүнки Мән Рәбб мүгәддәсәм. Мән сизи диҝәр халглардан ајырдым ки, сиз Мәним халгым оласыныз» (Левилиләр 19:2; 20:26).
9 Исраил халг кими тәшкил олунандан дәрһал сонра Јеһова она мүгәддәслик анлајышыны ашылады. Өлүм горхусу алтында онлар Он Ганунун верилдији даға тохунмамалы идиләр, чүнки һәмин вахт Сина дағы тәгдис едилмишди (Чыхыш 19:12, 23). Каһинләр, Һүзур чадыры, һәмчинин онун ичиндә олан һәр шеј исраиллиләр үчүн мүгәддәс олмалы иди (Чыхыш 30:26-30). Бәс мәсиһчи јығынҹағында вәзијјәт нә јердәдир?
10, 11. Нә үчүн мәсһ олунмушларын јығынҹағы мүгәддәсдир вә ‘башга гојунлар’ буна неҹә јанашырлар?
10 Јеһованын ҝөзүндә мәсһ олунмушларын јығынҹағы мүгәддәсдир (1 Коринфлиләрә 1:2). Јашадыглары дөврдән асылы олмајараг, јер үзүндәки мәсһ олунмушларын һамысы мүгәддәс мә’бәдә бәнзәдилирләр, анҹаг онлар Јеһованын мөһтәшәм руһани мә’бәдини тәшкил етмирләр. Јеһова мүгәддәс руһунун васитәсилә һәмин мә’бәддә мәскән салыб. Һәвари Павел јазмышды: «Онда [Иса Мәсиһдә] бүтүн тикинти һәмаһәнҝ дүзүләрәк Рәббә аид мүгәддәс бир мә’бәд олмаг үчүн јүксәлир; Онда сиз дә бирликдә тикилирсиниз ки, Аллаһын руһән мәскән салдығы бир јер оласыныз» (Ефеслиләрә 2:21, 22; 1 Петер 2:5, 9).
11 Сонра Павел мәсһ олунмушлара јазыр: «Мәҝәр билмирсиниз ки, сиз Аллаһын мә’бәдисиниз вә Аллаһын Руһу сиздә јашајыр?... Аллаһын мә’бәди мүгәддәсдир; бу мә’бәд исә сизсиниз» (1 Коринфлиләрә 3:16, 17). Јеһова мәсһ олунмушларын арасында руһу илә ‘мәскән салыб јеријир’ (2 Коринфлиләрә 6:16, 17). О, Өзүнүн садиг ‘гулуна’ даима рәһбәрлик едир (Матта 24:45-47). ‘Башга гојунлар’ үчүн ‘мә’бәд’ синфи илә әмәкдашлыг етмәк шәрәфдир (Јәһја 10:16; Матта 25:37-40).
Мәсиһчи һәјатымызда мүгәддәс сајдығымыз шејләр
12. Һәјатымызда нәләр мүгәддәсдир вә нә үчүн?
12 Тәәҹҹүблү дејил ки, мәсһ олунмушлар вә онларын әмәкдашлары һәјатларында бир чох шеји мүгәддәс сајырлар. Мәсәлән, бизим Јеһова илә мүнасибәтимиз мүгәддәсдир (1 Салнамәләр 28:9; Мәзмур 36:7). Биз бу мүнасибәтләри о дәрәҹәдә гијмәтләндиририк ки, Аллаһымыз Јеһова илә арамызда һеч нәјин вә һеч кимин дурмасына јол вермирик (2 Салнамәләр 15:2; Јагуб 4:7, 8). Јеһова илә јахын мүнасибәтләри горумагда дуа әвәзсиз рол ојнајыр. Дуа Даниел пејғәмбәр үчүн о гәдәр мүгәддәс иди ки, һәјаты үчүн тәһлүкә јарананда белә, о, Јеһоваја дуа етмәк адәтиндән дөнмәди (Даниел 6:7-11). Мәсһ олунмуш мәсиһчиләрин вә ја ‘мүгәддәсләрин дуалары’ мә’бәддә ибадәт заманы истифадә едилән бухура бәнзәдилир (Вәһј 5:8; 8:3, 4; Левилиләр 16:12, 13). Белә бәнзәтмә васитәсилә дуанын мүгәддәслији вурғуланыр. Каинатын Һөкмдары илә үнсијјәт етмәк неҹә дә бөјүк шәрәфдир! Шүбһәсиз, дуа етмәк үстүнлүјү бизим үчүн мүгәддәсдир!
13. Һансы гүввә мүгәддәсдир вә онун һәјатымызда фәалијјәт ҝөстәрмәсинә неҹә јол вермәлијик?
13 Мәсһ олунмушларын вә онларын әмәкдашларынын мүгәддәс сајдыглары даһа бир шеји — мүгәддәс руһу да гејд етмәк лазымдыр. Бу, Јеһованын фәал гүввәсидир. Мүгәддәс Аллаһ ондан Өз ирадәсинә мүвафиг олараг истифадә етдији үчүн о, мүгәддәс руһ, ‘гүдсијјәт Руһу’ адланыр (Јәһја 14:26; Ромалылара 1:4). Јеһова бу руһун васитәсилә Өз хидмәтчиләринә хош хәбәри тәблиғ етмәк үчүн ҝүҹ верир (Һәвариләрин ишләри 1:8; 4:31). Аллаһ руһуну «Она итаәт едәнләрә», ҹисмани арзулара ҝөрә дејил, ‘руһа ҝөрә һәрәкәт едәнләрә’ верир (Һәвариләрин ишләри 5:32; Галатијалылара 5:16, 25; Ромалылара 8:5-8). Һәр шејә гадир олан бу гүввә мәсиһчиләрә «руһун сәмәрәси» олан ҝөзәл кејфијјәтләри јетишдирмәјә, о ҹүмләдән, ‘мүгәддәс вә Аллаһа ихласкар бир һәјат јашамаға’ көмәк едир (Галатијалылара 5:22, 23; 2 Петер 3:11). Әҝәр бу гүввәни мүгәддәс санырыгса, ону ‘кәдәрләндирән’, јә’ни һәјатымызда онун фәалијјәтинә әнҝәл төрәдән һәрәкәтләрә јол вермәјәҹәјик (Ефеслиләрә 4:30).
14. Мәсһ олунмушлар һансы шәрәфи мүгәддәс санырлар вә башга гојунлар бу ишдә неҹә иштирак едирләр?
14 Биз һәм дә мүгәддәс Аллаһ Јеһованын адыны дашымаг вә Онун Шаһидләри олмаг шәрәфини мүгәддәс санырыг (Јешаја 43:10-12, 15). Јеһова мәсһ олунмуш мәсиһчиләри «Әһди-Ҹәдидин хидмәткарлары олмаға габил етди» (2 Коринфлиләрә 3:5, 6). Онлар Падшаһлыг һаггында мүждәни тәблиғ етмәк вә бүтүн халглардан шаҝирд һазырламаг тапшырығыны алмышлар (Матта 24:14; 28:19, 20). Мәсһ олунмушлар бу тапшырығы сәдагәтлә јеринә јетирирләр вә милјонларла сәмими инсан санки: «Гој сизинлә ҝедәк, чүнки Аллаһын сизинлә олдуғуну ешитмишик» дејәрәк онларын тәблиғинә һај верир (Зәкәријјә 8:23). Бу инсанлар севинҹлә Аллаһын мәсһ олунмуш «хидмәтчиләри» үчүн руһани мә’нада «әкинчилик вә бағбанлыг» едирләр. Беләликлә, башга гојунлар мәсһ олунмуш мәсиһчиләрә хидмәтләрини үмумдүнја мигјасында јеринә јетирмәјә көмәк едирләр (Јешаја 61:5, 6).
15. Һәвари Павел һансы иши мүгәддәс сајырды вә биз нә үчүн онун фикринә шәрикик?
15 Һәвари Павел хидмәтини мүгәддәс һесаб едирди. О өзү һаггында јазырды: «Диҝәр халглара Иса Мәсиһин хидмәткары олдум. Аллаһын Мүждәсини бир каһин сифәтилә јајырам [“Аллаһын хош хәбәринин мүгәддәс ишини иҹра едирәм”, ЈД]» (Ромалылара 15:16). Коринфдәки мәсиһчиләрә јаздығы мәктубунда Павел өз хидмәтини ‘сәрвәт’ адландырмышды (2 Коринфлиләрә 4:1, 7). Тәблиғ хидмәтиндә биз «Аллаһын [“мүгәддәс”, ЈД] сөзләрини» јајырыг (1 Петер 4:11). Буна ҝөрә дә, мәсһ олунмушлар вә ја ‘башга гојунлар’ синфинә аид олдуғумуздан асылы олмајараг, биз шаһидлик ишини мүгәддәс үстүнлүк сајырыг.
«Аллаһ горхусу илә камил гүдсијјәти әлдә едәк»
16. ‘Мүгәддәс шејләри гијмәтләндирмәјән адамлара’ чеврилмәмәкдә бизә нә көмәк едәҹәк?
16 Һәвари Павел һәмиманлыларыны хәбәрдар едирди ки, онлар ‘мүгәддәс шејләри гијмәтләндирмәјән’ адамлара чеврилмәсинләр. О, ‘мүгәддәс олмаг үчүн сә’ј ҝөстәрмәји’ вә ‘араларында бир аҹы көкүн бөјүјүб, әзијјәт вермәмәси вә бир чохларыны мурдар етмәмәси’ үчүн диггәтли олмағы мәсләһәт ҝөрүрдү (Ибраниләрә 12:14-16). «Аҹы көк» ифадәси јығынҹагда гәбул едилән гәрарлара тәнгиди јанашанлара аиддир. Мәсәлән, белә адамлар никаһын мүгәддәслији вә ја әхлаги тәмизлијә даир Јеһованын нөгтеји-нәзәри илә разылашмаја биләрләр (1 Салониклиләрә 4:3-7; Ибраниләрә 13:4). Јахуд да ‘һәгигәтдән үз дөндәрәнләрин’ сөјләдикләри ‘мурдар бошбоғазлыглары’, јә’ни дөнүк фикирләри јаја биләрләр (2 Тимотејә 2:16-18).
17. Нә үчүн мәсһ олунмуш мәсиһчиләр Јеһованын мүгәддәслијә олан бахышыны әкс етдирмәк үчүн сә’ј ҝөстәрмәлидирләр?
17 Павел мәсһ олунмуш гардашларына јазырды: «Еј севимли гардашларым, бу ҹүр вә’дләрә малик олараг, өзүмүзү һәр бир бәдән вә руһ мурдарлығындан тәмизләјәк вә Аллаһ горхусу илә камил гүдсијјәти әлдә едәк» (2 Коринфлиләрә 7:1). Бу сөзләр ҝөстәрир ки, ‘сәмави дә’вәтә ортаг олан’ мәсһ олунмуш мәсиһчиләр һәјатларынын һәр саһәсиндә Јеһованын мүгәддәслијә олан бахышына шәрик олдугларыны ҝөстәрмәлидирләр (Ибраниләрә 3:1). Һәвари Петер дә руһдан доғулан гардашларына нәсиһәт верирди: «Сөзә бахан ушаглар кими, ҹаһил икән гапылдығыныз әввәлки еһтираслара ујмајын. Әксинә, сизи чағыран Аллаһ мүгәддәс олдуғу кими, өзүнүз дә һәр һәрәкәтиниздә мүгәддәс олун» (1 Петер 1:14, 15).
18, 19. а) ‘Бөјүк издиһамын’ үзвләри Јеһованын мүгәддәс шејләрә олан бахышына шәрик олдугларыны неҹә ҝөстәрирләр? б) Нөвбәти мәгаләдә мәсиһчи һәјатымызын даһа һансы мүгәддәс саһәси мүзакирә едиләҹәк?
18 Бәс «бөјүк мәшәггәтдән» сағ чыхаҹаг ‘бөјүк издиһамын’ үзвләри неҹә? Онлар да өз һәјат тәрзи илә Јеһованын мүгәддәс шејләрә олан бахышына шәрик олдугларыны ҝөстәрмәлидирләр. «Вәһј» китабында јазылыб ки, бу адамлар руһани мә’бәдин јерүзү һәјәтиндә Јеһова үчүн ‘[«мүгәддәс», ЈД] хидмәти’ иҹра едирләр. ‘Бөјүк издиһама’ дахил оланлар, мәҹази дилдә десәк, ‘либасларыны јујуб, онлары Гузунун ганы илә ағардараг’ Мәсиһин фидијә гурбанлығына иман ҝәтирибләр (Вәһј 7:9, 14, 15). Бу, онлара Јеһованын өнүндә тәмиз ад газандырыр вә үзәрләринә ‘өзләрини һәр бир бәдән вә руһ мурдарлығындан тәмизләмәк вә Аллаһ горхусу илә камил гүдсијјәти әлдә етмәк’ мәс’улијјәтини гојур.
19 Јеһоваја ибадәт етмәк вә Онун Кәламыны өјрәнмәк үчүн мүнтәзәм кечирилән ҝөрүшләр дә мәсһ олунмуш мәсиһчиләрин вә онларын әмәкдашларынын һәјатында ваҹиб рол ојнајыр. Јеһова халгынын кечирдији ҝөрүшләри мүгәддәс һесаб едир. Нөвбәти мәгаләдә мәсиһчи һәјатымызын бу мүһүм саһәсиндә Јеһованын мүгәддәс шејләрә олан бахышыны неҹә вә нә үчүн бөлүшмәли олдуғумузу мүзакирә едәҹәјик.
Тәкрар үчүн суаллар
• Јеһованын Шаһидләри һансы дүнјәви дүшүнҹә тәрзинә шәрик дејилләр?
• Нә үчүн Јеһова мүгәддәс олан һәр бир шејин Мәнбәјидир?
• Мәсиһин мүгәддәслијинә һөрмәт етдијимиз нәдән бәллидир?
• Һәјатымызда нәләри мүгәддәс сајмалыјыг?
[23-ҹү сәһифәдәки шәкил]
Гәдим Исраилдә каһинләр, Һүзур чадыры вә онун ичиндәкиләр мүгәддәс һесаб едилирди.
[24-ҹү сәһифәдәки шәкил]
Јер үзүндәки мәсһ олунмуш мәсиһчиләр мүгәддәс мә’бәди тәшкил едирләр.
[25-ҹи сәһифәдәки шәкилләр]
Дуа вә иҹра етдијимиз хидмәт мүгәддәс ән’амдыр.