Јеһова фәрјадларымызы ешидир
«Рәббин ҝөзү салеһләрин үзәриндәдир, гулаглары онларын фәрјадларына ачыгдыр». МӘЗ. 34:15
1, 2. а) Бу ҝүн инсанларын чоху һансы һиссләри кечирир? б) Бу бизи нә үчүн һејрәтләндирмир?
ИЗТИРАБ... Бу һисс сизә танышдырмы? Әҝәр беләдирсә, онда тәк дејилсиниз. Милјонларла инсан һәјатын ҝүндәлик чәтинликләринин өһдәсиндән ҝәлмәк үчүн мүбаризә апарыр. Бәзиләринә бу, демәк олар ки, дөзүлмәз ҝөрүнүр. Онларын һиссләри: «Тагәтим кәсилди, чох әзилмишәм, үрәјимдәки изтираба ҝөрә аһ-зар едирәм. Үрәјим чырпыныр, ҝүҹүм түкәнди, ҝөзләримин нуру да сөндү» дејән Давудун һиссләринә чох охшајыр (Мәз. 38:8, 10).
2 Мәсиһчи олдуғумуз үчүн, һәјатын сыхынтылары бизи һејрәтә салмыр. Чүнки биз баша дүшүрүк ки, ‘ағрылар’ Исанын ‘иштиракынын’ (ЈД) габагҹадан дејилән әламәтинин бир һиссәсидир (Марк 13:8; Мат. 24:3). ‘Ағрылар’ кими тәрҹүмә олунан јунан сөзү үмумиликдә фәлакәт вә ја сыхынтылара аид едилә биләр. Бу сөз јашадығымыз «чәтин» зәманәдә инсанларын изтирабларынын неҹә шиддәтли олдуғуну дәгигликлә тәсвир едир! (2 Тим. 3:1).
Јеһова изтирабларымызы ҝөрүр
3. Аллаһын халгы нәји јахшы баша дүшүр?
3 Јеһованын халгы јахшы баша дүшүр ки, онлар бу фәлакәтләрдән мүдафиә олунмајыблар вә чох еһтимал ки, вәзијјәт ҝет-ҝедә даһа да писләшәҹәк. Аллаһын хидмәтчиләри олан бизләр, бәшәријјәтин үзләшдији чәтинликләрдән башга, иманымызы сарсытмаға чалышан ‘дүшмәнимиз олан шејтанла’ да мүбаризә апарырыг (1 Пет. 5:8). Инсан чох асанлыгла «рүсвајчылыг гәлбими гырды, ҝөр неҹә бичарәјәм. Чох ахтардым, һалыма јанан тапылмады, һеј ахтардым, тәсәлли верән олмады» дејән Давуд кими ејни һиссләрә гапыла биләр (Мәз. 69:20).
4. Изтираб чәкәркән бизә нә тәсәлли верир?
4 Давуд тамамилә үмидсиз олдуғунуму нәзәрдә тутурду? Хејр. Елә һәмин мәзмурда онун сонра дедији сөзләрә диггәт јетирәк: «Рәбб фәгирләри ешидир, Өз әсир халгына хор бахмыр» (Мәз. 69:33). Һәрдән өзүмүзү изтирабларымызын әсири кими һисс едә биләрик. Јахуд бизә елә ҝәлә биләр ки, вәзијјәтимизи әсл мәнада баша дүшән јохдур вә бу, доғрудан да белә ола биләр. Анҹаг Јеһованын чәкдијимиз изтираблары баша дүшдүјүнү билмәк, Давуд кими, бизә дә тәсәлли верә биләр (Мәз. 34:15).
5. Сүлејман падшаһ нәјә әмин иди?
5 Давудун оғлу Сүлејман Јерусәлимдәки мәбәдин һәсролунма мәрасиминдә буну вурғулады. (2 Салнамәләр 6:29-31 ајәләрини оху.) О, Јеһоваја јалварды ки, ‘өз бәласы вә дәрди’ үчүн Она мүраҹиәт едән һәр бир сәмими гәлбли инсаны ешитсин. Аллаһ изтираб ичиндә олан бу инсанларын дуаларына неҹә һај верәҹәкди? Сүлејман билдирди ки, о, Аллаһын дуалары динләмәклә јанашы, һәм дә онлара көмәк едәҹәјинә әминдир. Нәјә ҝөрә? Она ҝөрә ки, О, сөзүн әсл мәнасында ‘инсанын үрәјиндә’ нә олдуғуну билир.
6. Гајғыларын өһдәсиндән неҹә ҝәлә биләрик вә нә үчүн?
6 Биз дә ‘өз бәла вә дәрдләримизә’, шәхси изтирабларымыза ҝөрә Јеһоваја дуа едә биләрик. Онун бизим нә чәкдијимизи баша дүшдүјүнү вә гајғымыза галдығыны билмәк, бизә тәсәлли ҝәтирәҹәк. Һәвари Петер: «Бүтүн гајғынызы Онун үзәринә гојун, чүнки сизин гајғыныза галан Одур» дејәрәк буну тәсдиг етмишдир (1 Пет. 5:7). Јеһова бизимлә баш верәнләрә етинасыз јанашмыр. Иса Јеһованын мәһәббәт долу гајғысыны белә вурғуламышдыр: «Мәҝәр ики сәрчә гушу бир ассаријә сатылмырмы? Вә Атанызын һөкмү олмадыгда, онлардан һеч бири јерә дүшмәз. Сизин исә башыныздакы сачлар да белә сајылмышдыр. Одур ки, горхмајын; сиз бир чох сәрчәдән даһа дәјәрлисиниз» (Мат. 10:29-31).
Јеһованын көмәјинә архаланын
7. Һансы көмәји алаҹағымыза әмин ола биләрик?
7 Әмин ола биләрик ки, биз изтираб ичиндә оланда Јеһова бизә көмәк етмәк истәјир вә О буна гадирдир. «Аллаһ бизә сығынаҹагдыр, гүввәтдир, дар ҝүндә чох көмәк едир» (Мәз. 34:15-18; 46:1). Аллаһ бизә неҹә көмәк едир? Ҝөрүн 1 Коринфлиләрә 10:13 ајәсиндә нә јазылыб: «Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тәмин едәҹәкдир ки, таб ҝәтирә биләсиниз». Јеһова ја проблеми арадан галдыра биләр, ја да таб ҝәтирә билмәмиз үчүн ҝүҹ верә биләр. Һәр ики һалда Јеһова бизә көмәк едәҹәк.
8. Аллаһын көмәјиндән неҹә фајдалана биләрик?
8 Биз бу көмәкдән неҹә фајдалана биләрик? Ҝөрүн бизә нә мәсләһәт верилир: «Бүтүн гајғынызы Онун үзәринә гојун». Бу о демәкдир ки, биз бүтүн гајғыларымызын мәсулијјәтини, мәҹази мәнада, Јеһоваја веририк. Биз даһа нараһат олмамаға чалышыр вә Онун еһтијаҹларымызы өдәјәҹәјинә сәбирлә етибар едирик (Мат. 6:25-32). Бу ҹүр етибар биздән һәлимлик, өз ҝүҹүмүзә вә мүдриклијимизә архаланмамағы тәләб едир. «Аллаһын ҝүҹлү әлинин һимајәси алтында» тәвазөкар олмагла биз Аллаһын јанында нә гәдәр кичик олдуғумузу гәбул едирик. (1 Петер 5:6 ајәсини оху.) Бу да өз нөвбәсиндә Аллаһын јол вердији һәр шејин өһдәсиндән ҝәлмәјә көмәк едир. Биз проблемин дәрһал һәлл олунмасыны истәјә биләрик, анҹаг биз инанырыг ки, Јеһова бизим хејримизә нә вахт вә неҹә һәрәкәт едәҹәјини јахшы билир (Мәз. 54:7; Јешаја 41:10).
9. Давуд һансы гајғы јүкүнү Јеһоваја вермәли иди?
9 Давудун Мәзмур 55:22 ајәсиндәки сөзләрини хатырлајын: «Сән гајғы јүкүнү Рәббә вер, гој сәнә дајаг олсун. О һеч вахт салеһә сарсынты вермәз». Давуд бу сөзләри јазаркән ҝүҹлү изтираб ичиндә иди (Мәз. 55:4). Мәлумдур ки, Давуд бу мәзмуру оғлу Авшалом падшаһлығы әлә кечирмәк истәјәндә јазмышдыр. Давудун ән чох етибар етдији мүшавири Авшаломла әлбир олду. Давуд һәјатыны хилас етмәк үчүн Јерусәлимдән гачмаг мәҹбуријјәтиндә галды (2 Шам. 15:12-14). Һәтта бу чәтин вәзијјәтдә дә Давуд Аллаһа етибар едирди вә онун үмидләри боша чыхмады.
10. Сыхынтыларла үзләшәндә нә етмәлијик?
10 Давуд кими, бизә дә үзләшдијимиз һәр бир сыхынтыја ҝөрә дуада Јеһоваја мүраҹиәт етмәк ваҹибдир. Ҝәлин һәвари Павелин бунунла бағлы бизи нәјә тәшвиг етдијини нәзәрдән кечирәк. (Филипилиләрә 4:6, 7 ајәләрини оху.) Белә сәмими дуанын нәтиҹәси нә олаҹаг? ‘Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләримизи вә дүшүнҹәләримизи горујаҹагдыр’.
11. «Аллаһын... сүлһү» үрәкләримизи вә дүшүнҹәләримизи неҹә горујур?
11 Дуа етсәк вәзијјәтимиз дәјишәҹәкми? Ола биләр. Анҹаг баша дүшмәлијик ки, Јеһова дуаларымыза һәмишә бизим истәдијимиз кими ҹаваб вермир. Бунунла белә, сыхынтылар бизи үстәләмәсин дејә, дуа бизә дахили раһатлығымызы горумаға көмәк едәҹәк. Пис һиссләрдән үрәјимиз сыхыланда «Аллаһын... сүлһү» бизә сакитлик ҝәтирә биләр. Шәһәри дүшмән һүҹумундан горујан һәрби гарнизон кими «Аллаһын... сүлһү» дә үрәјимизи вә дүшүнҹәләримизи горујаҹаг. О, һәм дә шүбһәләрә, горхуја вә пис фикирләрә галиб ҝәлмәјә көмәк едәҹәк, тәләсик вә дүшүнҹәсиз һәрәкәтләр етмәкдән бизи горујаҹаг (Мәз. 145:18).
12. Инсанын гәлб раһатлығыны неҹә горуја биләҹәјини нүмунә әсасында ҝөстәрин.
12 Инсан сыхынты ичиндә оланда гәлб раһатлығыны неҹә горуја биләр? Бизим вәзијјәтимизә охшар нүмунәни нәзәрдән кечирәк. Тутаг ки, киминсә мүдири чох кобуддур. Анҹаг ишчи ҝедиб өз нараһатлығыны ширкәтин саһибилә бөлүшә биләр. Ширкәтин саһиби хејирхаһ вә ағыллы адамдыр. О, ишчини әмин едир ки, вәзијјәти баша дүшүр вә тезликлә мүдири вәзифәсиндән азад едәҹәк. Ишчи өзүнү неҹә һисс едәҹәк? О, мүдирин сөзләринә инандығы вә тезликлә нә баш верәҹәјини билдији үчүн, мүәјјән мүддәт әрзиндә чәтинликләрлә үзләшмәли олса белә, ишини давам етдирәҹәк. Бунун кими, биз дә билирик ки, Јеһова вәзијјәтимизи баша дүшүр вә О бизи әмин едир ки, тезликлә «бу дүнјанын рәиси... чөлә атылаҹагдыр» (Јәһ. 12:31). Бу неҹә дә тәсәлливериҹидир!
13. Дуа етмәклә јанашы нә етмәлијик?
13 Бәс проблемимизи дуада Јеһоваја данышмаг кифајәт едирми? Әлбәттә ки јох. Биздән даһа чох шеј тәләб олунур. Дуаларымыза ујғун һәрәкәт етмәлијик. Шаул падшаһ Давуду өлдүрмәк үчүн евинә адам ҝөндәрәндә Давуд дуа етди: «Еј Аллаһым, мәни дүшмәнләримдән гуртар, әлејһдарларымын әлиндән һифз ет. Мәни шәр иш ҝөрәнләрдән хилас ет, мәни ганичәнләрдән азад ет» (Мәз. 59:1, 2). Дуа етмәклә јанашы, Давуд һәм дә арвадынын сөзүнә гулаг асды вә хилас олмаг үчүн лазыми аддымлар атды (1 Шам. 19:11, 12). Буна бәнзәр тәрздә, биз дә сыхынтыларымызын өһдәсиндән ҝәлмәк вә ола билсин, вәзијјәтимизи јахшылашдырмаг үчүн практики мүдриклик үчүн дуа едә биләрик (Јаг. 1:5).
Таб ҝәтирмәк үчүн ҝүҹү һарадан ала биләрик?
14. Сыхынтылы анларда таб ҝәтирмәјә бизә нә көмәк едә биләр?
14 Ола биләр, изтираблы анларымыз дәрһал арадан галдырылмасын. Белә вәзијјәт, һәтта бир мүддәт давам едә биләр. Белә олан һалда бизә таб ҝәтирмәјә нә көмәк едәҹәк? Биринҹиси, јадда сахлајын ки, чәтинликләрә бахмајараг, Јеһоваја сәдагәтлә хидмәт едәндә Ону севдијимизи сүбут едирик (Һәв. иш. 14:22). Әјјубу иттиһам едәркән Шејтанын дедији сөзләри јадыныза салын: «Әјјуб Аллаһдан бош јерәми горхур? Ҹанына, евинә, вар-дөвләтинә сипәр олуб ону горујан Сән дејилсәнми? Әлинин бүтүн әмәјинә бәрәкәт вермисән, сүрүләри бүтүн өлкәни бүрүјүб. Инди бир әл узадыб онун вар-јохуну әлиндән ал, о, ҝөзүнүн габағында мүтләг Сәнә ләнәт едәҹәк» (Әјј. 1:9-11). Әјјуб өз нөгсансызлығы илә Шејтанын иттиһамларынын ағ јалан олдуғуну сүбут етди. Сыхынтылы вәзијјәтләрә таб ҝәтирмәклә, бизим дә Шејтанын јаланчы олдуғуну сүбут етмәк имканымыз јараныр. Дөзүмлү олмағымыз өз нөвбәсиндә үмидимизи вә етибарымызы мөһкәмләндирир (Јаг. 1:4).
15. Һансы нүмунәләр бизи мөһкәмләндирә биләр?
15 Икинҹиси, унутмајын ки, «дүнјадакы гардашларыныз да ејни әзаблары чәкирләр» (1 Пет. 5:9). Бәли, «сиз һәр инсанын башына ҝәләндән башга бир имтаһана мәруз галмадыныз» (1 Кор. 10:13). Буна ҝөрә дә, диггәтинизи өз чәтинликләринизә ҹәмләшдирмәкдәнсә, башгаларынын нүмунәләри үзәриндә дүшүнәрәк ҝүҹ вә ҹәсарәт әлдә едә биләрсиниз (1 Салон. 1:5-7; Ибр. 12:1). Изтираблара сәдагәтлә таб ҝәтирән шәхсләрин нүмунәси үзәриндә дүшүнмәјә вахт ајырын. Сизин вәзијјәтә охшар вәзијјәтлә үзләшән адамларын һәјат һекајәләрини әдәбијјатларымыздан тапыб охумусунузму? Бунлар сизи чох мөһкәмләндирә биләр.
16. Мүхтәлиф сынагларла үзләшән заман Аллаһ бизи неҹә мөһкәмләндирир?
16 Үчүнҹүсү, јадда сахлајын ки, Јеһова «мәрһәмәтли Ата вә һәр ҹүр тәсәлли верән Аллаһдыр. О, бизә һәр сыхынтымызда тәсәлли верир ки, биз дә һәр ҹүр сыхынты ичиндә оланлара, Аллаһын бизә вердији тәсәлли илә тәсәлли верә биләк» (2 Кор. 1:3, 4). Санки Аллаһ јанымызда дајаныб ки, тәкҹә индики дејил, «һәр сыхынтымызда» бизи руһландырсын вә мөһкәмләндирсин. Бунун сајәсиндә биз сонра ‘һәр ҹүр сыхынты ичиндә олан’ башга адамлара тәсәлли верә биләрик. Павел бу сөзләрин доғрулуғуну өз шәхси тәҹрүбәсиндә һисс етмишди (2 Кор. 4:8, 9; 11:23-27).
17. Мүгәддәс Китаб бизә һәјатын чәтинликләринин өһдәсиндән ҝәлмәјә неҹә көмәк едир?
17 Дөрдүнҹүсү, биздә Аллаһын Кәламы олан Мүгәддәс Китаб вар. О, «тәлим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин» (2 Тим. 3:16, 17). Аллаһын Кәламынын сајәсиндә биз садәҹә олараг ‘һәр ҹүр хејирли иш үчүн тәҹһиз едилмирик’, һәм дә онун көмәјилә биз һәјатын чәтинликләринин өһдәсиндән ҝәлирик. Јунан дилиндән «тәҹһиз етмәк» кими тәрҹүмә едилән сөз һәрфи мәнада «јарагландырылмыш» мәнасыны верир. Бу сөзү гәдим заманларда сәјаһәтә чыхмаг үчүн һәр шејлә тәҹһиз едилмиш гајыг вә ја һансы иш үчүн дүзәлдилмишдисә, ону јеринә јетирән дәзҝаһ һаггында ишләдирдиләр. Ејни тәрздә, Јеһова бизи Кәламы васитәсилә гаршымыза чыхан истәнилән чәтинлијин өһдәсиндән ҝәлмәк үчүн лазым олан һәр шејлә тәмин едир. Буна ҝөрә дә дејә биләрик: «Әҝәр Аллаһ буна јол верирсә, демәли, Онун көмәклији илә таб ҝәтирә биләрәм».
Бүтүн изтирабларымыздан гуртулуш
18. Диггәтимизи нәјин үзәриндә ҹәмләшдирсәк, бундан сонра да сәдагәтлә таб ҝәтирә биләрик?
18 Бешинҹиси, Јеһованын тезликлә бәшәријјәти бүтүн изтираблардан азад едәҹәјини һеч вахт јаддан чыхармајын (Мәз. 34:19; 37:9-11; 2 Пет. 2:9). Нәтиҹә етибарилә, Аллаһ бизи тәкҹә индики изтираблардан хилас етмәјәҹәк, һәм дә әбәди һәјаты верәҹәк. Бу һәјат ја Иса илә бирликдә ҝөјләрдә, ја да јерүзү Ҹәннәтдә әбәди јашамаг демәкдир.
19. Сәдагәтлә таб ҝәтирмәк неҹә мүмкүндүр?
19 Һәлә ки, о вахт ҝәлиб чатмајыб, биз бу пис дүнјанын сыхынтылары илә мүбаризә апармаға давам етмәлијик. Бүтүн бунларын бир даһа олмајаҹағы вахты неҹә дә һәсрәтлә ҝөзләјирик! (Мәз. 55:6-8). Ҝәлин јадымызда сахлајаг ки, сәдагәтлә таб ҝәтирмәјимиз Шејтанын јаланчы олдуғуну сүбут едир. Гој дуаларымыз вә гардашларымызын да ејни сынагларла үзләшдијини јадда сахламағымыз бизә даим ҝүҹ версин. Аллаһын Кәламындан мәһарәтлә истифадә едәрәк бундан сонра да там тәҹһиз едилмиш олун. Һеч вахт јол вермәјин ки, ‘һәр ҹүр тәсәлли верән Аллаһын’ мәһәббәт долу гајғысына етибарыныз сарсылсын. Јадда сахлајын ки, Јеһованын «ҝөзү салеһләрин үзәриндәдир, гулаглары онларын фәрјадларына ачыгдыр» (Мәз. 34:15).
Ҹаваб верә биләрсинизми?
• Давуд чәтинликләрлә үзләшәндә һансы һиссләри кечирирди?
• Сүлејман падшаһ нәјә әмин иди?
• Јеһованын јол вердији чәтинликләрин өһдәсиндән неҹә ҝәлә биләрик?
[13-ҹү сәһифәдәки шәкил]
Сүлејман әмин иди ки, Јеһова изтираб ичиндә олан халгынын дадына чатаҹаг
[15-ҹи сәһифәдәки шәкил]
Давуд дуада өз гајғы јүкүнү Јеһоваја верди, сонра исә дуасына ујғун давранды