Бирлик вә мараглы планларла јадда галан ҝөрүш

ҜӨЗӘТЧИ ГҮЛЛӘСИ, Мүгәддәс Китаб вә Трактатлар Ҹәмијјәтинин (Пенсилванија) сајҹа 127-ҹи иллик ҝөрүшү, һәр заман олдуғу кими, бөјүк севинҹә сәбәб олмушду. Бу ҝөрүш 2011-ҹи ил октјабрын 1-дә, шәнбә ҝүнү кечирилмишди! Дүнјанын һәр јериндән дәвәт олунан гонаглар Ҹерси-Сити шәһәриндәки (АБШ, Нју–Ҹерси) Јеһованын Шаһидләринин Конгрес залында топлашмышдылар.

Бөјүк севинҹ ичиндә олан гонаглары Рәһбәрлик Шурасынын үзвү Герит Лөш саламлады. Гардаш 85 өлкәдән олан нүмајәндәләрә мүраҹиәтиндә араларында бејнәлхалг бирлијин һөкм сүрдүјүнү гејд етди. Инсанлар үчүн ҝөзәл шаһидлик олан бу бирлик һәм дә Јеһоваја иззәт ҝәтирир. Үмумијјәтлә, бирлик мөвзусу ҝөрүш әрзиндә тез-тез тәкрарланырды.

МЕКСИКАДАН ШАД ХӘБӘРЛӘР

Програмын биринҹи һиссәси Јеһованын халгы арасындакы бирлијин бариз нүмунәси иди. Мексика Бет-Елиндән Балтасар Перла һәмин филиалда хидмәт едән үч нәфәрдән мүсаһибә ҝөтүрдү. Онлар Мәркәзи Америкадакы алты филиалын Мексика филиалына бирләшдирилмәси барәдә данышдылар. Бунун сајәсиндә Мексикадакы Бет-Ел аиләси даһа да бејнәлмиләл олду. Башга өлкәләрдән баҹы-гардашларын Мексика Бет-Ел аиләсинин үзвү олмасы сајәсиндә һамы гаршылыглы олараг руһланды. Санки, Аллаһ әлинә бөјүк позан ҝөтүрүб милләтләр арасындакы сәрһәдләри силмишди.

Бу бирләшмә чәтинликләрсиз өтүшмәди. Онлардан бири филиалларын фәалијјәти дајандырылдығы өлкәләрдә тәблиғчиләрин өзләрини Јеһованын тәшкилатындан тәҹрид олунмуш һисс етмәләри иди. Онлара көмәк етмәк мәгсәдилә һәр јығынҹаға тәһлүкәсиз електрон үнван верилди. Бунун сајәсиндә һәтта уҹгар әразиләрдә олан јығынҹаглар да филиалла бирбаша әлагә сахлаја биләрләр.

ЈАПОНИЈАДАН СОН ХӘБӘРЛӘР

Јапонија филиалындан олан Ҹејмс Линтон 2011-ҹи илин март ајында бурада баш верән зәлзәлә вә сунамидән сонра гардашларымызын вәзијјәти барәдә мәлумат верди. Һәмин фәлакәт заманы бир чох һәмиманлыларымыз өз доғмаларыны, еләҹә дә әшјаларыны итирмишдиләр. Зәрәр дәјмиш әразидән кәнарда јашајан баҹы-гардашлар зәрәрчәкмиш һәмиманлыларымыза 3100 ев вә јүзләрлә нәглијјат васитәси тәгдим етмишдиләр. Реҝионал тикинти комитәләри илә әмәкдашлыг едән көнүллүләр гардашларын евләрини тәмир етмәк үчүн ҝеҹәләрини ҝүндүзләринә гатыб ишләјирдиләр. 1700-дән чох көнүллү тәләбат олан јерләрдә хидмәт едирди. Бирләшмиш Штатлардан ҝәлән 575 көнүллүдән ибарәт бир груп Падшаһлыг залларынын бәрпасы илә мәшғул олурду.

Зәрәрчәкәнләрин руһани вә емосионал тәләбатларына да бөјүк диггәт јетирилирди. 400-дән чох ағсаггал онлара баш чәкиб руһландырырды. Рәһбәрлик Шурасынын гајғысыны мәркәзи идарәдән олан филиаллар үзрә ики нәзарәтчини баҹы-гардашлары руһландырмаг үчүн һәмин әразијә ҝөндәрмәсиндән дә ҝөрмәк олар. Дүнјанын мүхтәлиф ҝушәләриндән олан Шаһидләрин онлара ҝөрә нараһат олдугларыны билдирмәләри һәмин баҹы-гардашлар үчүн бөјүк тәсәлли иди.

ҺҮГУГИ ГӘЛӘБӘЛӘР

Британија филиалындан Стивен Һарди бу јахынларда әлдә олунан һүгуги гәләбәләрдән данышаркән динләјиҹиләр бөјүк марагла она гулаг асырдылар. Мәсәлән, Франса һөкумәти бизим бу өлкәдә истифадә етдијимиз ассосиасијадан 82 милјон АБШ доллары дәјәриндә верҝи өдәмәји тәләб едирди. Авропа Инсан Һүгуглары Мәһкәмәси (АИҺМ) бизим хејримизә гәрар чыхаранда бу мәсәлә һәлл олунду. Һәмин гәрара әсасән, Франса һөкумәти дин азадлығыны мүдафиә едән Авропа Конвенсијасынын 9-ҹу маддәсини позмушду. Гәрарын ифадә тәрзи ҝөстәрди ки, бу мәсәлә һеч дә пулла бағлы дејилди: «Дини ассосиасијаны танымагдан имтина етмәк, ону бағламаг ҹәһди, еләҹә дә дини һәрәката гаршы истифадә олунан тәһгирамиз данышыг — бунларын һамысы Конвенсијанын 9-ҹу маддәсинин мүдафиә етдији һүгуга мүдахиләдир».

АИҺМ-нин Ермәнистанла әлагәдар чыхардығы гәрар да бизим хејримизә олду. 1965-ҹи илдән АИҺМ бу мөвгедә иди ки, Авропа Конвенсијасы инсанлары иҹбари һәрби хидмәтдән горумур. Авропа мәһкәмәсинин ән јүксәк органы олан Бөјүк Палата гәт етмишди ки, шикајәтчиләри «һәрби хидмәтдән имтина етмәјә һәрби хидмәтә ҝетмәк борҹу илә ҹидди вә дәфедилмәз зиддијјәт тәшкил едән мөһкәм дини етигадлары тәшвиг етдији» һалларда, онларын бу һүгугу Авропа Конвенсијасы тәрәфиндән мүдафиә едилмәлидир. Бу гәрар Ермәнистанын, еләҹә дә Азәрбајҹан вә Түркијә кими дөвләтләрин үзәринә бу һүгугу танымаг өһдәлијини гојур.

ТИКИНТИ ЛАЈИҺӘЛӘРИ

Нөвбәти мәрузә илә Рәһбәрлик Шурасынын үзвү Гај Пирс чыхыш етди. О вурғулады ки, бурада иштирак едәнләрин һамысыны Нју–Јорк штатындакы тикинти лајиһәләримиз марагландырыр. Гардаш Уолкиллдә, Патерсонда, еләҹә дә Уорик вә Таксидода (Нју–Јорк) бу јахынларда алынан јени торпаг саһәләриндәки ишләрин ҝедишаты барәдә видеофилм тәгдим етди. 2014-ҹү илдә Уолкиллдә тикинтиси баша чатдырылмасы планлашдырылан јени јашајыш бинасында 300 әлавә отаг олаҹаг.

Уорикдәки 100 һектарлыг торпаг саһәмизә даир дә планларымыз вар. Пирс гардаш деди: «Јеһованын Уориклә әлагәдар нијјәтинин нәдән ибарәт олдуғуна әмин олмасаг да, биз Јеһованын Шаһидләринин үмумдүнја мәркәзини бураја көчүрмәк планыны ҹызырыг». Тикинти ҝедән мүддәтдә машын аваданлыгларыны вә тикинти материалларыны Уорикдән 10 километр шималда јерләшән 20 һектарлыг торпаг саһәсиндә сахламаг планлашдырылыр. Пирс гардаш сөзүнә давам едәрәк деди: «Тикинтијә башламаг үчүн иҹазә алдыгдан сонра үмидварыг ки, бүтүн лајиһәни дөрд илә баша чатдыраҹағыг. Сонра Бруклиндәки әмлакымызы сатмаг олар».

Гардаш сорушду: «Бу о демәкдирми ки, Рәһбәрлик Шурасы бөјүк мүсибәтин јахын олдуғуна даир фикрини дәјишиб? Гәтијјән јох, — дејә гардаш ҹаваб верди. — Әҝәр бөјүк мүсибәт бизим планларымыза мане олса, бу, ҝөзәл, һәтта әла олаҹаг!»

ӨЗҮНҮЗҮ НӘРИЛДӘЈӘН ШИРДӘН ҜӨЗЛӘЈИН

Нөвбәти мәрузәчи — Рәһбәрлик Шурасынын диҝәр үзвү Стивен Летт 1 Петер 5:8 ајәсини мүзакирә етди: «Ајыг-сајыг олун, ојаг дурун. Дүшмәниниз Иблис нәрилдәјән шир кими ҝәзиб удмаға адам ахтарыр». Летт гардаш гејд етди ки, ширләрин мүәјјән ҹәһәтләри Петерин Иблиси бу һејванла мүгајисәсини мүнасиб едир.

Ширләр инсанлардан даһа ҝүҹлү вә ҹәлд олдуғу үчүн биз Шејтанла тәкбәтәк мүбаризә апармаға вә ја ону «өтүб-кечмәјә» чалышмамалыјыг. Биз Јеһованын көмәјинә мөһтаҹыг (Јешаја 40:31). Шир өз шикарыны пусгуда дурараг овлајыр. Шејтанын гурбаны олмамаг үчүн өзүмүзү руһани зүлмәтдән ҝөзләмәлијик, чүнки мәһз белә вахтда Шејтан ова чыхыр. Ширләр зәрәрсиз антилоплары вә јатан бала зебралары өлдүрдүјү кими, Шејтан да мәрһәмәтсиздир вә бөјүк мәмнунијјәтлә ахырымыза чыхарды. Шир гарныны дојуздурдугдан сонра онун шикары, адәтән, танынмаз һала дүшдүјү кими, Шејтанын да руһани гурбанларынын «ахырлары әввәлләриндән даһа бетәр олур» (2 Пет. 2:20). Буна ҝөрә дә биз Шејтана гаршы мөһкәм дурмалыјыг вә өјрәндијимиз Мүгәддәс Китаб принсипләриндән икиәлли јапышмалыјыг (1 Пет. 5:9).

ЈЕҺОВАНЫН ЕВИНДӘКИ ЈЕРИНИ ГИЈМӘТЛӘНДИР

Даһа сонра Рәһбәрлик Шурасынын диҝәр үзвү Самуел Һерд чыхыш етди. О деди: «Бизим һамымызын Јеһованын евиндә јеримиз вар». Һәр бир мәсиһчинин Јеһованын «евиндә» — Онун руһани мәбәдиндә, јәни Исанын фидјә гурбанлығы сајәсиндә бизә Она ибадәт етмәјимизә имкан верән гурулушда јери вар. Биз Аллаһын евиндәки јеримизи гијмәтләндирмәли вә орада олмағы шәрәф һесаб етмәлијик. Давуд кими, биз дә бүтүн өмрүмүз боју Рәббин евиндә јашамағы арзулајырыг (Мәз. 27:4).

Һерд гардаш Мәзмур 92:12—14 ајәләринә истинад едәрәк сорушду: «Јеһова бизим тәрәгги етмәјимиз үчүн неҹә шәраит јарадыб?» О ҹаваб верди: «Аллаһ руһани ҹәннәтдә бизи исиндирир, горујур вә һәгигәт сулары илә тәравәтләндирир». Гардаш: «Ҝәлин бүтүн бу шејләрә ҝөрә Она миннәтдар олаг. Ҝәлин Јеһованын евиндә олмағымызла гане олаг вә бурада гыса мүддәт јох, әбәдијјән галаг», — дејә динләјиҹиләри тәшвиг етди.

МӘСИҺЧИЛӘР АЛЛАҺЫН КӘЛАМЫНА ҺӨРМӘТ БӘСЛӘЈИРЛӘР

Нөвбәти нитги Рәһбәрлик Шурасынын диҝәр үзвү Девид Сплејн сөјләди. О, һәгиги мәсиһчиләрин Аллаһын Кәламына һәмишә һөрмәт бәсләдијини изаһ етди. Биринҹи әсрдә сүннәт мәсәләсини һәлл етмәк үчүн онлар мәһз Мүгәддәс Китабдан истифадә етмишдиләр (Һәв. иш. 15:16, 17). Лакин икинҹи әсрдә өзүнү Мәсиһин давамчылары адландыран вә јунан фәлсәфәсинә бәләд олан бәзи шәхсләр өз интеллектуал тәләбатларыны тәмин етмәји Мүгәддәс Јазылардан үстүн тутмаға башладылар. Сонрадан диҝәрләри Мүгәддәс Китаб тәлимләрини Килсә аталарынын, еләҹә дә Рома императорларынын фикирләри илә әвәз етдиләр. Бунун уҹбатындан чохсајлы јалан тәлимләр јаранды.

Сплејн гардаш изаһ етди ки, Исанын чәкдији мәсәлә әсасән, јер үзүндә һәгигәти мүдафиә едән һәгиги мәсһ олунмуш мәсиһчиләр олаҹагды (Мат. 13:24—30). Биз онларын ким олдуғуну әминликлә дејә билмәрик. Амма әсрләр әрзиндә бир чох инсанлар Мүгәддәс Китаба зидд олан тәлимләрә, адәт вә әнәнәләрә гаршы чыхмышлар. 9-ҹу әсрдә архијепископ Лионлу Агобард, 12-ҹи әсрдә Пјер де Брујс, Лозанналы Һенри, Валдо, 14-ҹү әсрдә Ҹон Уиклиф, 16-ҹы әсрдә Вилјам Тиндал, еләҹә дә 19-ҹу әсрдә Һенри Гру вә Ҹорҹ Сторз онлардан бәзиләри иди. Бу ҝүн Јеһованын Шаһидләри Аллаһын Кәламындакы гајдалара әмәл етмәјә давам едирләр вә Мүгәддәс Китабы һәгигәтин әсасы кими гәбул едирләр. Мәһз бу сәбәбә ҝөрә Рәһбәрлик Шурасы 2012-ҹи илин иллик ајәси кими Јәһја 17:17 ајәсини сечиб: «Сәнин сөзүн һәгигәтдир».

ТӘЛИМ ВӘ ХИДМӘТ САҺӘСИНДӘ СЕВИНДИРИҸИ ДӘЈИШИКЛИКЛӘР

Рәһбәрлик Шурасынын үзвү Ентони Морис хүсуси тәјинатлы мүждәчиләр вә хүсуси пионерләрлә бағлы дәјишикликләри елан етди. 2012-ҹи илин сентјабр ајындан етибарән бәзи өлкәләрдә Мәсиһчи Әр-арвадлар үчүн Мүгәддәс Китаб Мәктәби кечириләҹәк. Ҝилеад Мәктәбинин мәгсәди дәјишилди. Өтән илин октјабр ајындан башлајараг Ҝилеад Мәктәбиндә хүсуси таммүддәтли хидмәтин мүәјјән нөвләриндә олан һәмиманлыларымыз — Ҝилеад Мәктәбини кечмәјән хүсуси тәјинатлы мүждәчиләр, хүсуси пионерләр, сәјјар нәзарәтчиләр вә бет-еллиләр тәлим кечирләр. Мәзунлар истәр филиаллардан, истәр сәјјар хидмәтдә, истәрсә дә сых әһалиси олан әразиләрдә јығынҹаглары хидмәтдә фәал олмаға тәшвиг етмәклә Аллаһын халгыны мөһкәмләндирмәк үчүн истифадә олунаҹаглар.

Үстәлик, хүсуси пионерләр тәблиғчиләрин ајағы дәјмәдији уҹгар вә тәҹрид олунмуш әразиләрә тәјин олунаҹаглар. 2012-ҹи илин јанварын бириндән етибарән Субај Гардашлар үчүн Мүгәддәс Китаб Мәктәбини, еләҹә дә Мәсиһчи Әр-арвадлар үчүн Мүгәддәс Китаб Мәктәбини битирән бәзи мәзунлар мүвәггәти олараг хүсуси пионер тәјин олунурлар вә онлар тәблиғчиләрин олмадығы вә ја аз олдуғу уҹгар әразиләрә ҝөндәрилирләр. Онларын тәјинаты бир илдән үч иләдәк давам едир. Өз хидмәтләриндә мүвәффәгијјәтли оланлар даими тәјинат алаҹаглар.

2011-ҹи илин иллик ҝөрүшү чох севиндириҹи кечди. Тәблиғ фәалијјәтимизи ҝенишләндирмәк вә үмумдүнја гардашлығымызда һөкм сүрән бирлији мөһкәмләндирмәк мәгсәдилә едилән бу дәјишикликләрә Јеһованын хејир-дуа вермәсини ҝөзләјирик. Бунларын һамысы Јеһованын даһа чох иззәтләнмәси үчүн едилир.

[18 вә 19–ҹу сәһифәдәки чәрчивә/шәкилләр]

МҮСАҺИБӘЛӘР

Програмын јаддагалан һиссәләриндән бири дә Рәһбәрлик Шурасынын вәфат етмиш үзвләринин һәјат јолдашларындан ҝөтүрүлән мүсаһибәләр олду. Мүсаһибәдә дул галмыш доггуз баҹыдан беши — Марина Сидлик, Едит Сјутер, Мелита Јарач, Мелба Берри вә Сидни Барбер иштирак едирди. Онлар һәгигәтә неҹә ҝәлдикләриндән вә таммүддәтли хидмәтә неҹә башладыгларындан нәгл етдиләр. Һәр бири динләјиҹиләрлә дәјәрли хатирәләрини, әрләри барәдә дүшүнҹәләрини, еләҹә дә хидмәтдә алдыглары хејир-дуалардан данышды. Мүсаһибәнин сонунда һамы шөвглә «Садиг гадынлар, мәсиһчи баҹылар» адлы 86 нөмрәли маһныны ифа етди.

[Шәкилләр]

(Јухарыда) Даниел вә Марина Сидлик; Грант вә Едит Сјутер; Теодор вә Мелита Јарач

(Ашағыда) Ллојд вә Мелба Берри; Кери вә Сидни Барбер

[16–ҹы сәһифәдәки хәритә]

(Хәритәјә нәшрин өзүндә бахын)

Мексика филиалына бирләшдирилән алты филиал

МЕКСИКА

ГВАТЕМАЛА

ҺОНДУРАС

САЛВАДОР

НИКАРАГУА

КОСТА-РИКА

ПАНАМА

[17–ҹи сәһифәдәки шәкил]

Јеһованын Шаһидләринин Уорикдә (Нју-Јорк штаты) мәркәзи идарәсинин лајиһәси