Мәсиһ һаггында пејғәмбәрликләр

ЈӘҺУДИ халгы Јешајанын вә диҝәр пејғәмбәрләрин Мәсиһ һаггында јаздыгларыны биләрәк, узун мүддәт әрзиндә онун ҝәлишини ҝөзләмишдиләр. Исанын ҝүнләриндә дә бир чох јәһудиләрин «ҝөзү јолда» иди ки, тезликлә Мәсиһ зүһур едәҹәк (Лука 3:15). Мараглыдыр ки, Мүгәддәс Китаб пејғәмбәрликләринә Мәсиһин һәјаты илә бағлы гејри-ади тәфсилатлар дахилдир. Ади инсан нә бу һадисәләри габагҹадан дејә биләрди, нә дә онларын Исанын үзәриндә һәјата кечмәсинә тәсир едә биләрди.

Мәсиһин доғулмасы илә бағлы тәфәррүатлар. Јешаја габагҹадан хәбәр вермишди ки, Мәсиһ бакирә гыздан доғулаҹаг. Исанын мөҹүзәли шәкилдә доғулмасыны тәсвир етдикдән сонра һәвари Матта јазмышдыр: «Бүтүн бунлар, Рәббин пејғәмбәр васитәсилә сөјләдикләри јеринә јетсин дејә баш верди: “Будур, бакирә гыз бојлу галаҹаг, бир Оғул доғаҹаг”» (Матта 1:22, 23; Јешаја 7:14). Јешаја һәм дә демишди ки, Мәсиһ Давудун нәслиндән ҝәләҹәк, о, һәтта Давудун атасы Јессејин адыны да чәкмишди. Иса һәгигәтән дә Давудун нәслиндән ҝәлди (Матта 1:6, 16; Лука 3:23, 31, 32). Буна ҝөрә дә, Исанын доғулмасындан әввәл Ҹәбрајыл мәләк онун анасы Мәрјәмә деди: «Аллаһ Она атасы Давудун тахтыны верәҹәкдир» (Лука 1:32, 33; Јешаја 11:1-5, 10; Ромалылара 15:12).

Мәсиһин һәјаты илә бағлы тәфәррүатлар. Артыг јеткинлик јашына чатмыш Иса синагогда, нөвбәти сөзләр дә дахил олмагла, Јешајанын пејғәмбәрлијини уҹа сәслә охуду: «Рәббин Руһу үзәримдәдир, чүнки јохсуллара Мүждәни билдирмәк үчүн О Мәни мәсһ етди». Пејғәмбәрлији өзүнә шамил едәрәк Иса деди: «Ешитдијиниз бу Јазы бу ҝүн иҹра едилди» (Лука 4:17-21; Јешаја 61:1, 2). Јешаја, һәмчинин хәбәр вермишди ки, Иса сағалмаға еһтијаҹы оланларла хејирхаһлыгла, һәлимлик вә тәвазөкарлыгла рәфтар едәҹәк. Матта јазыр: «Онун ардынҹа чох адам ҝетди вә Иса онларын һамысыны сағалтды. Амма онлара мөһкәм тапшырды ки, Онун ким олдуғуну билмәсинләр; та ки, Јешаја пејғәмбәр васитәсилә сөјләнән сөз јеринә јетсин... “О, нә мүбаһисә вә нә дә фәрјад едәҹәкдир... Әзилмиш гамышы гырмајаҹаг”» (Матта 8:16, 17; 12:10-21; Јешаја 42:1-4; 53:4, 5).

Мәсиһин изтираблары илә бағлы тәфәррүатлар. Јешаја пејғәмбәрлик етмишди ки, Исраилдә әксәријјәт Мәсиһи гәбул етмәјәҹәк, әксинә, о, чохлары үчүн «бүдрәмә дашы» олаҹаг (1 Петер 2:6-8; Јешаја 8:14, 15). Доғрудан да, Исанын бир чох мөҹүзәләр ҝөстәрмәсинә бахмајараг, инсанлар «она иман етмирдиләр. Бүтүн бунлар Јешаја пејғәмбәрин: “Ја Рәбб, вердијимиз хәбәрә ким инанды?”... кәламы јеринә јетсин дејә олду» (Јәһја 12:37, 38; Јешаја 53:1). Јәһудиләрин Исаја Мәсиһ кими иман ҝәтирмәмәләринин сәбәбләриндән бири, јанлыш олса да, ҝениш јајылан бир фикир иди: онлар елә дүшүнүрдүләр ки, Мәсиһ халгы Рома мүстәмләкәчилијиндән дәрһал азад едәҹәк вә јер үзүндә Давудун мүстәгил падшаһлығыны бәрпа едәҹәк. Иса әзаб чәкдији вә өлдүјү үчүн јәһудиләрин чоху ону Мәсиһ кими гәбул етмәдиләр. Лакин, әслиндә, Јешаја Мәсиһин падшаһ олмаздан әввәл изтираблар чәкәҹәјини демишди.

«Јешаја» китабында Мәсиһин пејғәмбәрлик сөзләри јазылыб: «Мәни дөјәнләр үчүн белими ачдым... Тәһгирләрдән, түпүрҹәкләрдән үзүмү ҝизләтмәдим». Матта Исанын мәһкәмәси вахты баш верәнләри хәбәр верир: «О заман үзүнә түпүрүб Она јумруг вурдулар; бәзиләри дә... үзүнә силлә вурурдулар» (Јешаја 50:6; Матта 26:67, 68). Јешаја јазмышды: «О изтираб чәкди, амма ағзыны ачмады». Буна мүвафиг олараг, Пилат Исадан јәһудиләрин иттиһамлары барәдә сорушанда, Иса ‘онун һеч бир сөзүнә ҹаваб вермәди, вали сон дәрәҹәдә тәәҹҹүбләнди’ (Јешаја 53:7; Матта 27:12-14; Һәвариләрин ишләри 8:28, 32-35).

Мәсиһин өлүмү илә бағлы тәфәррүатлар. Јешајанын пејғәмбәрлији јалныз Иса өләндә дејил, сонра да јеринә јетирди. Јешаја демишди: «Гәбри пис адамларын јанында гурулду, дөвләтли адамын јанында дәфн олунду» (Јешаја 53:9). Зиддијјәтли кими ҝөрүнән бу пејғәмбәрлик неҹә јеринә јетди? Иса ики гулдурун арасында едам олунду (Матта 27:38). Анҹаг сонра Јусиф адлы зәнҝин бир ариматејалы Исанын ҹәсәдини өзүнүн јени ојулмуш гәбринә гојду (Матта 27:57-60). Вә нәһајәт, Исанын өлүмү илә Јешајанын ән ваҹиб пејғәмбәрликләриндән бири јеринә јетмиш олду. Јешаја Мәсиһ һаггында јазыр: «Мәним салеһ гулум өз билији илә чохларына бәраәт газандыраҹаг, онларын шәр әмәлләринин јүкүнү үзәринә ҝөтүрәҹәк». Доғрудан да, Исанын өлүмү фидијәни тәмин етди ки, бүтүн садиг инсанларын үзәриндән ҝүнаһын јүкү ҝөтүрүлсүн (Јешаја 53:8, 11; Ромалылара 4:25).

Мүтләг јеринә јетәҹәк пејғәмбәрликләр

Мәсиһин ким олдуғуну Мүгәддәс Китаб әсасында сүбут етмәк үчүн һәвариләр вә Исанын өзү Мүгәддәс Јазыларын башга китабларындан чох «Јешаја» китабындан ситат ҝәтирирдиләр. Анҹаг ҝәләҹәк һаггында јалныз «Јешаја» китабында хәбәр верилмирди. Ибраниҹә Мүгәддәс Јазыларын бир чох диҝәр пејғәмбәрликләриндә дә Иса, онун Падшаһлығы вә Падшаһлығын ҝәләҹәкдә һәјата кечирәҹәји јахшы шејләр һагда пејғәмбәрликләр вардыa (Һәвариләрин ишләри 28:23; Вәһј 19:10). Бу пејғәмбәрликләрин јеринә јетәҹәји нә гәдәр јәгин иди? Иса ону динләјән јәһудиләрә демишди: «Санмајын ки, Мән Мүгәддәс Гануну вә пејғәмбәрләрин јазыларыны [јәни Ибраниҹә Мүгәддәс Јазылары] позмаға ҝәлдим; Мән позмаг үчүн јох, иҹра етмәк үчүн ҝәлдим. Чүнки сизә доғрусуну дејирәм: Ҝөј вә јер кечиб кетмәдән, һәр шеј иҹра олмадан, Ганундан ән кичик бир һәрф вә ја нөгтә белә јох олмајаҹагдыр» (Матта 5:17, 18).

Иса, һәмчинин өзүнә вә ҝәләҹәјә даир Мүгәддәс Китаб пејғәмбәрликләринин јеринә јетмәсинә ишарә едирди (Даниел 9:27; Матта 15:7-9; 24:15). Бундан әлавә, Иса вә онун шаҝирдләри онларын ҝүнләриндән сонра јеринә јетәҹәк һадисәләри пејғәмбәрлик етмишдиләр. Онлардан чоху бизим ҝүнләрдә јеринә јетир. Нөвбәти мәгаләдә бунлар вә ҝәләҹәкдә јеринә јетәҹәк башга Мүгәддәс Китаб пејғәмбәрликләри мүзакирә олунаҹаг.

[Һашијә]

[4-ҹү сәһифәдәки шәкил]

«Бакирә гыз... бир Оғул доғаҹаг»

[5-ҹи сәһифәдәки шәкил]

‘Тәһгирләрдән үзүмү ҝизләтмәдим’