“Иман ҝәтирмәјәнләр арасында мүсбәт һәјат сүрүн”
“Һамыја һөрмәт един. Гардашлығы севин” (1 ПЕТЕР 2:17).
1, 2. а) Бир гәзет мүхбири Јеһованын Шаһидләри һаггында һансы фикри сөјләди? б) Нә үчүн Јеһованын Шаһидләри һәмишә јүксәк давраныш нормаларына риајәт етмәјә ҹан атырлар?
БИР нечә ил бундан габаг Амарилло шәһәринин (АБШ, Техас штаты) бир гәзет мүхбири мүхтәлиф килсәләри зијарәт етмиш вә апардығы тәдгигатларын нәтиҹәләри һагда јазмышды. Бир груп инсанлар она хүсуси тәәссүрат бағышламышды. О дејирди: “Мән үч ил әрзиндә Јеһованын Шаһидләри тәрәфиндән Амарилло Шәһәр Мәркәзиндә кечирилән иллик конгресләрдә иштирак етмишәм. Бир дәфә дә олсун, Шаһидләр арасында сигарет чәкән, пивә банкасы ачан, јахуд әдәбсиз данышан ҝөрмәдим. Һәлә индијәдәк бу гәдәр тәмиз, бу гәдәр тәрбијәли, садә ҝејимли вә хошгәлбли инсанлара раст ҝәлмәмишдим”. Јеһованын Шаһидләри һаггында тез-тез бу ҹүр фикирләр јазырлар. Нәјә ҝөрә Шаһидләрин иманына шәрик олмајан инсанлар онлары белә тез-тез тә’рифләјирләр?
2 Адәтән Аллаһын хидмәтчиләрини онларын нүмунәви давранышларына ҝөрә тә’рифләјирләр. Дүнјада давраныш нормалары позулса да, Јеһованын Шаһидләри јүксәк әхлаг нормаларына риајәт етмәји өзләринә борҹ вә ибадәтләринин бир һиссәси һесаб едирләр. Онлар билирләр ки, онларын һәрәкәтләри Јеһова вә иман гардашлары һаггында башгаларынын фикринә тә’сир ҝөстәрир вә мүсбәт давранышлары тәблиғ етдикләри һәгигәтә гаршы инсанларда хош мүнасибәт јарадыр (Јәһја 15:8; Титуса 2:7, 8). Буна ҝөрә дә, ҝәлин мүсбәт давранышымызла Јеһованын вә Онун Шаһидләринин тәмиз адыны неҹә горујаҹағымызы вә буну етмәклә һансы фајдалары әлдә едәҹәјимизи нәзәрдән кечирәк.
Аиләдә
3. Мәсиһчи аиләләрини нәдән горумаг лазымдыр?
3 Аиләдәки давранышымыз барәдә дүшүнәк. “Јени Инквизиторлар: Дин азадлығы вә дини пахыллыг” китабынын мүәллифләри Герһард Безир вә Ервин Шојх јазырлар: “[Јеһованын Шаһидләринин] фикринҹә аиләни хүсусилә горумаг лазымдыр” (“Die Neuen Inquisitoren: Religionsfreiheit und Glaubensneid”). Доғру гејд едилмишдир. Һәгигәтән дә, инди аиләни чох тәһлүкәләрдән горумаг лазымдыр. Бу ҝүн “валидејнләринә итаәт етмәјән” ушаглар, “шәфгәтсиз” вә “нәфсини сахламајан” бөјүкләр вар (2 Тимотејә 3:2, 3). Индики аиләләрдә әр-арвад зоракылыға әл атыр, валидејнләр өвладларыны һәр мә’нада тәһгир вә тәҹавүз едир вә ја онларын гејдинә галмырлар, ушаглар исә валидејнләринә гулаг асмыр, наркотик маддәләр гәбул едир, әхлагсызлыгла мәшғул олур, ја да евдән гачырлар. Бүтүн бунлар, јашадығымыз дүнјанын зәрәрли руһунун ҝөстәрдији тә’сирин нәтиҹәсидир (Ефеслиләрә 2:1, 2). Аиләләримизи бу руһдан горумалыјыг. Неҹә? Јеһованын аилә үзвләри үчүн вердији өјүд вә рәһбәрлијә риајәт етмәклә.
4. Мәсиһчи аиләсинин үзвләри бир-бирләринин гаршысында һансы мәс’улијјәтләри дашыјырлар?
4 Мәсиһчи олан әр-арвадлар баша дүшүрләр ки, емосионал, руһани вә физики ҹәһәтдән онлар бир-бирләринин гаршысында мәс’улијјәт дашыјырлар (1 Коринфлиләрә 7:3-5; Ефеслиләрә 5:21-23; 1 Петер 3:7). Мәсиһчи валидејнләри өвладларына гаршы ҹидди мәс’улијјәт дашыјырлар (Сүлејманын мәсәлләри 22:6; 2 Коринфлиләрә 12:14; Ефеслиләрә 6:4). Мәсиһчи аиләсиндә бөјүјән ушаглар исә бөјүдүкҹә баша дүшүрләр ки, онларын да өз мәс’улијјәтләри вар (Сүлејманын мәсәлләри 1:8, 9; 23:22; Ефеслиләрә 6:1; 1 Тимотејә 5:3, 4, 8). Аиләдәки мәс’улијјәтләри јеринә јетирмәкдә сә’ј, гәтијјәт, һәмчинин мәһәббәт вә фәдакарлыг руһу тәләб олунур. Лакин аилә үзвләри Аллаһын вердији мәс’улијјәтләри нә гәдәр виҹданла јеринә јетирсәләр, бир о гәдәр дә бир-бирләри вә јығынҹаг үчүн хејир-дуадырлар. Ән башлыҹасы исә одур ки, онлар аиләнин Баниси олан Јеһова Аллаһы иззәтләндирәҹәкләр (Тәквин 1:27, 28; Ефеслиләрә 3:15).
Мәсиһчи гардашлығы
5. Мәсиһчи гардашларымызла үнсијјәтдә олмаг, бизә нә кими хејир-дуалар ҝәтирир?
5 Бир мәсиһчи кими бизим һәм јығынҹагда, һәм дә ‘дүнјадакы гардашлығы’ тәшкил едән һәмиманлыларымыз гаршысында да мәс’улијјәтимиз вар (1 Петер 5:9). Јығынҹагла олан мүнасибәтимиз руһани сағламлығымыз үчүн олдугҹа ваҹибдир. Һәмиманлыларымызла ҝөрүшәрәк онларла үнсијјәтдән гүввә әлдә едир, һәмчинин “садиг вә ағыллы гул”ун тәгдим етдији бәсләјиҹи руһани гиданы гәбул едирик (Матта 24:45-47). Проблемләримиз варса, Мүгәддәс Китаб принсипләринә әсасланан сағлам мәсләһәт үчүн гардашларымыза мүраҹиәт едә биләрик (Сүлејманын мәсәлләри 17:17; Ваиз 4:9; Јагуб 5:13-18). Еһтијаҹ ичиндәјиксә, гардашларымыз бизи тәрк етмәзләр. Аллаһын тәшкилатынын бир һиссәси олмаг неҹә дә бөјүк хејир-дуадыр!
6. Павел башга мәсиһчиләрин гаршысында мәс’улијјәт дашыдығымызы неҹә ҝөстәрди?
6 Лакин биз јығынҹаға јалныз алмаг үчүн дејил, һәмчинин вермәк үчүн дә ҝәлирик. Ахы, Иса демишдир: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35). Вермәјә һазыр олмағын ваҹиблијини һәвари Павел вурғуламышдыр: “Играр етдијимиз үмиди тәрәддүд етмәдән мөһкәм тутаг; зира вә’ди верән Аллаһа јахынлашаг. Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг. Бә’зиләринин адәт етдикләри кими өз јығынҹагларымызы тәрк етмәјәк. Амма хүсусән, о Ҝүнүн јахынлашдығыны ҝөрдүјүмүз нисбәтдә бир-биримизи даһа чох үрәкләндирәк” (Ибраниләрә 10:23-25).
7, 8. Јығынҹаг үзвләринә вә башга өлкәләрдә јашајан мәсиһчиләрә сәхавәтлә вермәјә һазыр олдуғумузу неҹә ҝөстәририк?
7 Биз јығынҹаг ҝөрүшләриндә шәрһләр верәрәк, јахуд програмда башга ҹүр иштирак едәрәк ‘үмидимизи играр етмиш’ олуруг. Сөзсүз ки, бунунла гардашларымызы руһландырырыг. Јығынҹагдан әввәл вә сонра үнсијјәт етмәјимизлә дә онлары руһландырырыг. Зәифләрә јардым етмәк, мә’јус вә хәстә оланлара тәсәлли вермәк үчүн, бу, чох мүнасиб вахтдыр (1 Салониклиләрә 5:14). Сәмими мәсиһчиләр бу саһәдә вермәк ҹәһәтдән сәхавәтлидирләр, буна ҝөрә дә ҝөрүшләримизә илк дәфә ҝәләнләрин чохуна арамызда ҝөрдүкләри мәһәббәт хош тәәссүрат бағышлајыр (Мәзмур 37:21; Јәһја 15:12; 1 Коринфлиләрә 14:25).
8 Лакин мәһәббәтимиз јалныз өз јығынҹағымызла мәһдудлашмыр. Бу мәһәббәт дүнјадакы бүтүн гардашларымызы әһатә едир. Мәсәлән, Падшаһлыг Заллары Фондуна ианә етмәк үчүн һәр Залда гојулмуш гутулар буна шәһадәтдир. Бизим Падшаһлыг Залы, ола билсин, јахшы вәзијјәтдәдир, лакин билирик ки, минләрлә баҹы-гардашларымызын ҝөрүш үчүн мүнасиб јерләри јохдур. Падшаһлыг Заллары Фондуна ианә етмәклә, шәхсән танымасаг да һәмин гардашлара мәһәббәт ҝөстәрмиш олуруг.
9. Јеһованын Шаһидләринин бир-бирләрини севдикләринин әсас сәбәби нәдир?
9 Нә үчүн Јеһованын Шаһидләри бир-бирләрини севирләр? Чүнки буну Иса бујуруб (Јәһја 15:17). Вә онлар арасындакы мәһәббәт ону ҝөстәрир ки, һәм ајры-ајры инсанлара, һәм дә үмумиликдә бүтүн гардашлыға Аллаһын мүгәддәс руһу тә’сир едир. Мәһәббәт “руһун сәмәрәси”нин бир һиссәсидир (Галатијалылара 5:22, 23). Јеһованын Шаһидләри ‘бир чохларынын севҝиси сојудуғу’ дүнјада јашасалар да, Мүгәддәс Китабы өјрәндикләри, мәсиһчи ҝөрүшләриндә иштирак етдикләри вә даима Аллаһа дуа етдикләринә ҝөрә севмәк онлар үчүн тәбиидир (Матта 24:12).
Јашадығымыз дүнја
10. Јашадығымыз дүнјада һансы мәс’улијјәти дашыјырыг?
10 Павелин “играр етдијимиз үмид” кәлмәси бизә даһа бир мәс’улијјәти хатырладыр. Бу “играр” һәлә иман гардашымыз олмајанлара хош хәбәри тәблиғ етмәкдән ибарәтдир (Матта 24:14; 28:19, 20; Ромалылара 10:9, 10, 13-15). Тәблиғ етмәк дә вермәк демәкдир. Чүнки тәблиғ иши вахт, гүввә, һазырлыг, тә’лим вә мадди имкан тәләб едир. Павел буну да јазырды: “Мән јунанлара вә јунан олмајанлара, мүдрикләрә вә ҹаһилләрә борҹлујам. Беләликлә, мән Ромада јашајан сизләрә дә вар ҝүҹүмлә Мүждәни тәблиғ етмәјә һазырам” (Ромалылара 1:14, 15). Биз Павелин нүмунәсини тәглид етмәли вә бу “борҹу” вермәкдә сәхавәтли олмалыјыг.
11. Јашадығымыз дүнјаја мүнасибәтдә Мүгәддәс Китабын һансы ики принсипини рәһбәр тутур, лакин нәји е’тираф едирик?
11 Һәмиманлымыз олмајан кәсләр гаршысында даһа һансыса мәс’улијјәт дашыјырыгмы? Әлбәттә. ‘Бүтүн дүнјанын шәририн һакимијјәти алтында‘ олдуғуну, сөзсүз ки, дәрк едирик (1 Јәһја 5:19). Исанын өз шаҝирдләри һаггында дедикләриндән хәбәрдарыг: “Мән дүнјадан олмадығым кими, онлар да дүнјадан дејилләр”. Бунунла белә бу дүнјада јашајыр, јашајышымызы тә’мин едир вә онун тәгдим етдији хидмәтләрдән истифадә едирик (Јәһја 17:11, 15, 16). Демәли, јашадығымыз дүнјада бә’зи мәс’улијјәтләримиз вар. Бунлар һансылардыр? Бу суала һәвари Павел ҹаваб вермишди. О, Јерусәлимин мәһв едилмәсиндән бир аз әввәл, Кичик Асијада јашајан мәсиһчиләрә мәктуб јазмышды. Бу мәктубун бир парчасы јашадығымыз дүнјаја гаршы таразлығы горумағымыза көмәк едир.
12. Мәсиһчиләр һансы мә’нада “гәрибләр вә ҝәлмәләр” кимидирләр вә буна ҝөрә дә онлар нәдән гачынмалыдырлар?
12 Әввәлҹә Петер белә деди: “Севимлиләрим, сиздән хаһиш едирәм ки, ҹана гаршы дөјүшән ҹисмани еһтираслардан гәрибләр вә ҝәлмәләр кими узаглашын” (1 Петер 2:11). Исанын һәгиги давамчылары руһани мә’нада “гәрибләр вә ҝәлмәләр” кимидирләр, онларын һәјаты әбәди һәјата олан үмид әтрафында дөвр едир. Бу, руһла мәсһ едилмишләр үчүн ҝөјдә, “башга гојунлар” үчүн исә ҝәләҹәкдә јер үзү ҹәннәтдә јашамаг үмиддир (Јәһја 10:16; Филипилиләрә 3:20, 21; Ибраниләрә 11:13; Вәһј 7:9, 14-17). Бәс ҹисмани еһтираслар нәдир? Ҹисмани еһтираслара варлы олмаг истәји, ҹәмијјәтдә јүксәк вәзифәјә чатмаг арзусу, әхлагсыз ҹисмани еһтираслар, һәмчинин “һәсәд” вә “тамаһкарлыг” дахилдир (Колослулара 3:5; 1 Тимотејә 6:4, 9; 1 Јәһја 2:15, 16).
13. Ҹисмани еһтираслар һансы мә’нада “ҹана гаршы дөјүшүр”?
13 Бу ҹүр еһтираслар һәгигәтән дә ‘ҹанымыза гаршы дөјүшүр’. Онлар Аллаһла олан мүнасибәтимизи зәифләдир, демәли, үмидимизи (‘ҹанымызы’, јә’ни һәјатымызы) тәһлүкә алтына гојур. Мәсәлән, әҝәр биз әхлагсыз бир шејә мараг инкишаф етдиририксә, ‘бәдәнләримизи дири, мүгәддәс, Аллаһа мәгбул гурбан кими’ тәгдим едә биләҹәјикми? Вар-дөвләт јығмаг тәләсинә дүшәриксә, “әввәлҹә Онун [Аллаһын] Падшаһлығыны” ахтара биләҹәјикми? (Ромалылара 12:1, 2; Матта 6:33, И–93; 1 Тимотејә 6:17-19). Ән јахшысы Мусанын нүмунәсини тәглид едәрәк, бу дүнјанын алдадыҹы тәләләрини рәдд етмәк вә Јеһоваја хидмәти һәјатымызда биринҹи јерә гојмагдыр (Матта 6:19, 20; Ибраниләрә 11:24-26). Бу, јашадығымыз дүнјада таразлыға наил олмаг үчүн ваҹиб амилдир.
“Мүсбәт һәјат сүрүн”
14. Биз мәсиһчиләр нәјә ҝөрә мүсбәт һәјат сүрмәјә чалышырыг?
14 Башга бир һәјати ваҹиб принсип Петерин нөвбәти сөзләриндән ҝөрүнүр: “Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12). Мәсиһчиләр кими биз нүмунәви олмаға чалышырыг. Мәктәбдә чалышган шаҝирдләрик. Иш јериндә, мүдиријјәтин һәрәкәти зәннимизҹә ағласығмаз ҝөрүнсә дә, биз сә’јлә чалышыр вә дүрүст давранырыг. Фәргли дини бахышлара малик олан аиләдә Јеһованын Шаһиди олан әр, јахуд арвад Аллаһын принсипләринә риајәт етмәк үчүн хүсуси сә’ј ҝөстәрир. Бу һәмишә асан дејил, лакин билирик ки, мүсбәт һәјат сүрмәјимиз Јеһованы севиндирир вә Шаһид олмајан кәсләрә чох вахт ҝөзәл тәәссүрат бағышлајыр (1 Петер 2:18-20; 3:1).
15. Јеһованын Шаһидләринин јүксәк әхлаглы давранышларынын ҝениш сурәтдә е’тираф едилдијини һарадан билирик?
15 Јеһованын Шаһидләринин әксәријјәтинин јүксәк давраныш нормаларына риајәт етмәләри, илләр әрзиндә онлар һаггында јазылан мә’луматлардан ҝөрүнүр. Мисал үчүн, Италијада чап олунан “Ил Темпо” гәзетиндә дејилирди: “Иш јолдашлары Јеһованын Шаһидләринин дүрүст ишчиләр олдуғуну сөјләјирләр; е’тигадларына о дәрәҹәдә әминдирләр ки, һансыса фикирләрә алудә олмуш кими ҝөрүнсәләр дә, онларын риајәт етдикләри јүксәк әхлаг нормалары һөрмәтә лајигдир”. Арҝентинанын Буенос-Ајрес шәһәриндә чыхан “Һералд” гәзетиндә дејилирди: “Будур, артыг узун илләрдир ки, Јеһованын Шаһидләри әмәксевәр, сағлам дүшүнҹәли, гәнаәтҹил вә Аллаһдан горхан вәтәндашлар олдугларыны әмәлдә ҝөстәрирләр”. Дин үзрә рус мүтәхәссиси Сергеј Иваненко јазмышдыр: “Јеһованын Шаһидләри бүтүн дүнјада гануна дәгиг табе олмалары, хүсусилә дә верҝиләри сон дәрәҹә дәгигликлә өдәмәләри илә танынырлар”. Зимбабведә Јеһованын Шаһидләринин вилајәт конгресинин кечирилдији мүәссәнин мүдири белә демишдир: “Мән, Шаһидләрин кағызлары јердән галдырдыгларыны, ајагјолларыны неҹә тәмизләдикләрини ҝөрмүшәм. Сиздән сонра әрази әввәлкиндән даһа тәмиз һала дүшүр. Ҝәнҹләриниз тәрбијәлидир. Каш ки, бүтүн дүнја Јеһованын Шаһидләри илә долу олајды”.
Аллаһа мәгбул табелик
16. Дүнјәви һакимијјәтләрә неҹә јанашырыг вә нәјә ҝөрә?
16 Петер, һәмчинин бизим дүнјәви һакимләрлә мүнасибәтимиз һаггында да данышыр. О дејир: “Рәбб наминә һәр ҹүр бәшәри мүәссисәјә, истәр али һаким олдуғуна ҝөрә һөкмдара, истәрсә дә пислик едәнләри ҹәзаландырмаг, јахшылыг едәнләри дә тә’рифләмәк үчүн онун тәрәфиндән ҝөндәрилән валиләрә табе олун. Чүнки Аллаһын ирадәси будур ки, јахшылыг едиб, ағылсыз адамларын ҹаһиллијини сусдурасыныз” (1 Петер 2:13-15). Биз низам-интизамы тә’мин едән һөкумәтин вердији фајдалара ҝөрә миннәтдарыг вә Петерин дедији кими, һөкумәтин ганунларына табе олур, верҝиләри өдәјирик. Һөкумәтә гануну позанлары ҹәзаландырмаға Аллаһ тәрәфиндән сәлаһијјәт верилдијини е’тираф едирик, лакин дүнјәви һакимијјәтләрә илк нөвбәдә “Рәбб наминә” табе олуруг. Бу Аллаһын ирадәсидир. Бундан әлавә, әҝәр биз гануну поздуғумуза ҝөрә ҹәзаландырылсаг, Јеһованын адына ләкә ҝәтирмиш оларыг (Ромалылара 13:1, 4-7; Титуса 3:1; 1 Петер 3:17).
17. “Ағылсыз адамлар” бизә гаршы чыхдыгда нәјә әмин ола биләрик?
17 Әфсуслар олсун ки, һакимијјәтдә олан бә’зи “ағылсыз адамлар” бизләри тә’гиб едир, јахуд башга јолларла бизә гаршы чыхырлар, мәсәлән, бизим һаггымызда јалан јајан груплар тәшкил едирләр. Лакин Јеһоваја мәгбул олан заманда онларын јаланлары үзә чыхаҹаг вә “ҹаһиллији” андыран данышыглары сусдурулаҹагдыр. Мәсиһчи давранышымыз сајәсиндә тутдуғумуз мөвге кимин һаглы олдуғуну ҝөстәрир. Елә бу сәбәбдән һакимијјәтин дүрүст нүмајәндәләри чох вахт бизи јахшы ишләримизә ҝөрә тә’рифләјирләр (Ромалылара 13:3; Титуса 2:7, 8).
Аллаһын гуллары
18. Бир мәсиһчи кими һансы саһәләрдә азадлығымыздан суи-истифадә етмәкдән гачынмалыјыг?
18 Петер хәбәрдарлыг едир: “Азадлар кими давранын вә азадлығыныздан пислик үчүн пәрдә кими дејил, Аллаһын гуллары кими истифадә един” (1 Петер 2:16; Галатијалылара 5:13). Бу ҝүн Мүгәддәс Китабын һәгигәтләрини билмәк бизи јалан дини тә’лимләрдән азад едир (Јәһја 8:32). Бундан башга, бизә ирадә азадлығы верилиб вә биз сечмәк имканына маликик. Лакин биз азадлығымыздан суи-истифадә етмирик. Биз достлары, ҝејим-кечими, әјләнҹәни, һәтта јејиб-ичмәји сечәркән Исанын һәгиги давамчыларынын өз истәкләринә ҝөрә јашамадыгларыны вә онларын Аллаһын гулу олдугларыны унутмуруг. Биз, ҹисмани истәкләримизин, јахуд бу дүнјанын кечиҹи дәбинә гул олмағы дејил, Јеһоваја хидмәт етмәји сечмишик (Галатијалылара 5:24; 2 Тимотејә 2:22; Титуса 2:11, 12).
19-21. а) Дүнјәви һакимијјәтләрин нүмајәндәләринә неҹә јанашырыг? б) Бә’зиләри “гардашлығы” севдикләрини неҹә ҝөстәрирләр? в) Һәр шејдән ваҹиб олан мәс’улијјәт һансыдыр?
19 Даһа сонра Петер дејир: “Һамыја һөрмәт един. Гардашлығы севин, Аллаһдан горхун, һөкмдара һөрмәт един” (1 Петер 2:17). Јеһова Аллаһ инсанлара јүксәк рүтбәләрдә чалышмаға јол вердији үчүн, биз бу инсанлара лазыми һөрмәтлә јанашырыг. Биз, онлар үчүн һәтта дуа едирик ки, Аллаһа сәдагәтимизи горујараг, хидмәтимизи сүлһ ичиндә давам етдирмәјә имкан версинләр (1 Тимотејә 2:1-4). Ејни заманда да биз “гардашлығы” севирик. Биз гардашларымызын зәрәринә дејил, һәр заман хејринә чалышырыг.
20 Мәсәлән, Африка өлкәләринин бириндә етник әдавәтин һөкм сүрдүјү бир заманда Јеһованын Шаһидләринин давранышы үмуми фонда сечилирди. Бир Исвечрә гәзетиндә дејилирди: “1995-ҹи илдә “Африкалыларын Һагглары” тәшкилаты... сүбут етди ки, баш вермиш һәмин [тоггушмаларда] Јеһованын Шаһидләриндән савајы бүтүн килсәләр иштирак етмишдир” (“Реформиерте Прессе”). Дүнја һәмин фаҹиәви һадисәдән хәбәр тутанда, Јеһованын Авропадакы Шаһидләри дәрһал һәмин өлкәдә јашајан гардашларына вә һадисәдән зәрәр чәкән башга инсанлара гида мәһсуллары вә дәрманлар ҝөндәрдиләр (Галатијалылара 6:10). Онлар Сүлејманын мәсәлләри 3:27 ајәсиндә јазылан сөзләрә риајәт етдиләр: “Јахшылыға һаггы олан адамлара, әлиндән ҝәлдији гәдәр јахшылығы әсирҝәмә”.
21 Лакин үзәримиздә дүнјәви һакимләрә һөрмәт етмәкдән вә һәтта гардашлығы севмәкдән дә ваҹиб бир мәс’улијјәт вар. Сөһбәт нәдән ҝедир? Петер демишдир: “Аллаһдан горхун”. Јеһованын гаршысында олан борҹумуз, һәр һансы инсана олан борҹдан даһа чохдур. Нәјә ҝөрә? Вә биз Аллаһын вә дүнјәви һакимијјәтләрин гаршысында олан мәс’улијјәтимизи неҹә таразлашдыра биләрик? Бу суалларын ҹавабыны нөвбәти мәгаләдә тапа биләрик.
Хатырлајырсынызмы?
• Мәсиһчиләрин аиләдә нә кими мәс’улијјәтләри вар?
• Вермәјә һазыр олдуғумузу јығынҹагда неҹә ҝөстәрә биләрик?
• Јашадығымыз дүнјада һансы мәс’улијјәти дашыјырыг?
• Бизим јүксәк әхлаглы давранышымыз һансы сәмәрәләри ҝәтирир?
[19-ҹу сәһифәдәки шәкил]
Мәсиһчи аиләси неҹә бөјүк севинҹ мәнбәји ола биләр?
[20-ҹи сәһифәдәки шәкилләр]
Нәјә ҝөрә Јеһованын Шаһидләри бир-бирләрини севирләр?
[20-ҹи сәһифәдәки шәкилләр]
Шәхсән танымадығымыз гардашлара мәһәббәт ҝөстәрә биләрикми?