Сонун јахынлашдығы вахтда ағыллы олаг
1 Аллаһын Кәламында дәфәләрлә дејилир ки, Јеһованын ҝүнү “оғру кими”, јә’ни ҝөзләнилмәдән, сүр’әтлә, һисс олунмадан ҝәләҹәкдир (1 Салон. 5:2; Мат. 24:43; 2 Пет. 3:10; Вәһј 3:3; 16:15). Иса демишдир: “Бунун үчүн сиз дә һазыр олун; чүнки Инсан Оғлу сизин зәнн етмәдијиниз саатда ҝәләҹәкдир” (Мат. 24:44). Биз, сонун јахын олдуғуну биләрәк руһән неҹә сајыг гала биләрик? Аллаһын Кәламы бизи “ағыллы” олмаға чағырыр (1 Пет. 4:7).
2 Ағыллы олмаг өзүнә, һәр шејә Јеһованын нөгтеји-нәзәри илә бахмағы дахил едир (Ефес. 5:17). Бу, өзүмүзү индики системдә “гәриб вә ҝәлмәләр кими” һесаб етмәјә, һәмчинин ән үстүн дәјәрләри ајырд едәрәк, ваҹиб олан шејләрә үстүнлүк вермәјә вә дүзҝүн гәрарлар гәбул етмәјә көмәк едир (1 Пет. 2:11; Филип. 1:10).
3 Гаршымыза руһани мәгсәдләр гојаг. Гаршымыза руһани мәгсәдләр гојмаг вә онлара наил олмаг ҹәһди ағыллы олмағымыза көмәк едәр. Һал-һазырда сән һансы руһани мәгсәдләрә ҹан атырсан? Гаршына Мүгәддәс Китабы һәр ҝүн охумаг, бүтүн јығынҹаг ҝөрүшләриндә иштирак етмәк, һәмишә олдуғундан бир аз да артыг тәблиғ етмәк вә ја журналларымызын бүтүн сајларыны охумаг кими мәгсәдләр гојурсанмы? Әҝәр гаршына мүвафиг мәгсәдләр гојур, онлара наил олмаг үчүн сә’јлә чалышыр вә Јеһовадан сә’јинә хејир-дуа вермәсини хаһиш едирсәнсә, әлдә олунан нәтиҹәләрә тәәҹҹүб едә биләрсән.
4 Бир ағсаггал, ҝәнҹ әр-арваддан онларын руһани мәгсәдләри барәдә сорушду. Әр-арвад онун суалы үзәриндә дүшүнүб белә нәтиҹәјә ҝәлдиләр ки, һәјатларыны садәләшдирсәләр вә борҹларыны гајтарсалар пионер хидмәтинә башламаг олар. Бу мәгсәдә наил олмаг үчүн борҹларыны гајтармаға чалышдылар вә онларын вахтыны вә ҝүҹүнү алан лазымсыз ишләрдән имтина етдиләр. Дүз бир илдән сонра мәгсәдләринә наил олдулар. Онлар инди нә дүшүнүрләр? Әр дејир: “Гаршымыза конкрет мәгсәдләр гојмасајдыг, инди һеч нәјә наил ола билмәздик. Инди биз хошбәхтик. Һәјатымыз даһа сакит вә севинҹлидир. Инди һәјатымыз әсл мә’на дашыјыр”.
5 Ҝәлин, Јеһованын ҝүнүнү ҝөзләјәрәк руһән сајыг, о ҹүмләдән, ағыллы олаг вә Аллаһын ирадәсини вар гүввәмизлә јеринә јетирәк (Тит. 2:11-13).