‘Ҝөрүн сиз неҹә инсан олмалысыныз’!
«Бүтүн бунлар белә мәһв олаҹагса, ҝөрүн сиз мүгәддәс давранышда вә Аллаһа сәдагәтдә неҹә инсан олмалысыныз»! (2 ПЕТ. 3:11, ЈД).
1 Нәјә ҝөрә Петерин јаздығы икинҹи мәктуб онун ҝүнләриндә јашајан мәсиһчиләр үчүн вахтында олан хәбәрдарлыг иди?
ҺӘВАРИ Петер Аллаһдан илһам алмыш икинҹи мәктубуну јазанда мәсиһчи јығынҹағынын үзвләри артыг бир чох тәгибләрә синә ҝәрмишдиләр. Амма бу, онларын сәјини азалтмамыш вә инкишафыны зәифләтмәмишди. Буна ҝөрә дә Иблис әввәлләр дәфәләрлә уғурлу алынан үсула әл атды. Петерин дедији кими, Шејтан ‘ҝөзләри даима зина ахтаран’ (ЈД) вә ‘үрәји тамаһкарлыға алышдырылан’ јаланчы мүәллимләр васитәсилә Аллаһын халгыны јолдан чыхармаға чалышырды (2 Пет. 2:1—3, 14; Јәһуда 4). Буна ҝөрә дә Петер икинҹи мәктубунда бизи сәмими-гәлбдән Аллаһа садиг галмаға дәвәт едир.
2. Петерин јаздығы икинҹи мәктубун үчүнҹү фәслиндә диггәт нәјә јөнәлдилир вә биз өзүмүзә һансы суаллары вермәлијик?
2 Петер јазырды: «Лакин бу чадырда [«бәдәндә», ЈД] галдығым мүддәтдә хатырлатмагла сизи ојандырмағы доғру һесаб едирәм. Чүнки билирәм ки,.. чадырымы тезликлә бир тәрәфә гојаҹағам. Буна ҝөрә дә сәј ҝөстәрәҹәјәм ки, мән бу дүнјадан көчдүкдән сонра да, бунлары һәмишә јада саласыныз» (2 Пет. 1:13—15). Петер тезликлә өләҹәјини билсә дә, истәјирди ки, вахтында верилән бу хатырлатмалар узун илләр јашасын. Һәгигәтән дә, бу хатырлатмалар Мүгәддәс Китаба дахил олду вә һал-һазырда һәр биримизин онлары охумаг имканы вар. Бу мәктубун 3-ҹү фәсли диггәти индики системин ‘ахыр ҝүнләринә’ вә символик ҝөјләрин вә јерин мәһв едилмәсинә јөнәлтдијиндән бизим үчүн хүсуси әһәмијјәт кәсб едир (2 Пет. 3:3, 7, 10). Петер бизә һансы мәсләһәти верир? Онун бу мәсләһәтини тәтбиг етмәк бизә Јеһованын лүтфүнү газанмаға неҹә көмәк едәҹәк?
3, 4. а) Петер мәсиһчиләри нәјә тәшвиг етди вә онлара һансы хәбәрдарлығы верди? б) Һансы үч амили нәзәрдән кечирәҹәјик?
3 Шејтан дүнјасынын сону һагда данышдыгдан сонра Петер дејир: «Ҝөрүн сиз мүгәддәс давранышда вә Аллаһа сәдагәтдә неҹә инсан олмалысыныз»! (2 Пет. 3:11, 12). Орижинал мәтнә әсасән, о суал вермир, нида едир. Петер билирди ки, јалныз Јеһованын ирадәсини јеринә јетирәнләр вә Она мәгбул хүсусијјәтләр тәзаһүр етдирәнләр ‘гисас ҝүнүндән’ сағ чыхаҹаглар (Јешаја 61:2). Буна ҝөрә дә һәвари әлавә едир: «Сиз исә, еј севимлиләр, бунлары габагҹадан биләрәк еһтијат един ки, позғун адамларын [јаланчы мүәллимләрин] хатасы илә јолдан аздырылмајасыныз вә сабит вәзијјәтиниздән ајрылмајасыныз» (2 Пет. 3:17).
4 Петер ‘габагҹадан биләнләрин’ арасында олараг билирди ки, ахыр ҝүнләрдә нөгсансызлыгларыны горумаг үчүн мәсиһчиләр хүсусилә ајыг-сајыг олмалыдырлар. Сонралар һәвари Јәһја бунун сәбәбини ачыг-ајдын изаһ етди. О, Шејтанын ҝөјдән атылдығыны вә ‘бөјүк гәзәблә’ ‘Аллаһын әмрләринә риајәт едиб, Исаја олан шәһадәтләринә бағлы галанлара’ гаршы чыхдығыны габагҹадан ҝөрмүшдү (Вәһј 12:9, 12, 17). Аллаһын мәсһ олунмуш сәдагәтли хидмәтчиләри садиг әмәкдашлары олан ‘башга гојунларла’ бирҝә гәләбә газанаҹаглар (Јәһ. 10:16). Бәс шәхсән бизим һаггымызда нә демәк олар? Нөгсансызлығымызы горујаҹағыгмы? Буна наил олмаг үчүн: 1) Аллаһын бәјәндији хүсусијјәтләри инкишаф етдирмәјә; 2) әхлаги, руһани ҹәһәтдән нөгсансыз вә ләкәсиз галмаға вә 3) сынаглара дүзҝүн мүнасибәт бәсләмәјә чалышмалыјыг. Ҝәлин бу амилләри бир-бир арашдыраг.
Аллаһын бәјәндији хүсусијјәтләри инкишаф етдирин
5, 6. Һансы хүсусијјәтләри инкишаф етдирмәлијик вә нәјә ҝөрә бунун үчүн ‘сәј сәрф етмәк’ лазымдыр?
5 Икинҹи мәктубунун әввәлиндә Петер јазыр: «Бүтүн сәјинизи сәрф едәрәк, иманыныза фәзиләт, фәзиләтинизә билик, билијинизә нәфсә һаким олмағы, нәфсә һаким олмаға тәһәммүл, тәһәммүлүнүзә Аллаһа ихлас, ихласыныза гардаш севҝиси вә гардаш севҝисинә мәһәббәти әлавә един. Әҝәр бунлар сиздә варса вә артырса, Рәббимиз Иса Мәсиһи танымагда фәалијјәтсиз вә сәмәрәсиз галмајаҹагсыныз» (2 Пет. 1:5—8).
6 Бәли, Аллаһын бәјәндији хүсусијјәтләри инкишаф етдирмәјә көмәк едән ишләрлә мәшғул олмаг үчүн ‘сәј сәрф етмәлијик’. Мәсәлән, бүтүн мәсиһчи ҝөрүшләриндә иштирак етмәјә, Мүгәддәс Китабы һәр ҝүн охумаға вә јахшы шәхси өјрәнмә графикинә риајәт етмәјә чалышмалыјыг. Бунлардан әлавә, мүнтәзәм, мәмнунедиҹи вә фајдалы аиләви ибадәт ахшамы кечирмәк үчүн дә сәј тәләб олунур. Әсасыны јахшы гојсаг, хүсусилә фајдасыны ҝөрәндән сонра бу шејләр тәдриҹән вәрдиш һалына кечәҹәк.
7, 8. а) Аиләви ибадәт ахшамы илә бағлы бәзиләри нә дејир? б) Аиләви ибадәт сәнә һансы фајданы ҝәтирир?
7 Аиләви ибадәт ахшамы илә бағлы бир баҹы јазыр: «Бунун сајәсиндә о гәдәр шеј өјрәнирик ки...» Башга бир баҹы исә белә дејир: «Дүзүнү десәм, китабөјрәнмә ҝөрүшүнүн артыг кечирилмәјәҹәјини ешидәндә чох мәјус олдум, чүнки бу, мәним ән севдијим ҝөрүш иди. Анҹаг инди аиләви ибадәт ахшамы кечирмәјә башладыгдан сонра баша дүшдүм ки, Јеһова нәјә вә нә заман еһтијаҹ дујдуғумузу биздән јахшы билир». Бир аилә башчысы нөвбәти сөзләри дејир: «Аиләви ибадәт ахшамынын ҝәтирдији фајданы сөзлә ифадә етмәк гејри-мүмкүндүр. Ҝөрүшү еһтијаҹ дујдуғумуз шејләрә ујғунлашдырмағын һәм мәнә, һәм дә јолдашыма бөјүк фајдасы дәјир. Һәр икимиз мүгәддәс руһун сәмәрәсини даһа да јахшы тәзаһүр етдирдијимизи вә хидмәтдә һәмишәкиндән даһа чох севинҹ дујдуғумузу һисс едирик». Диҝәр аилә башчысы исә бөлүшүр: «Ушаглар шәхсән өзләри тәдгигат апарараг биликләрини артырырлар вә бу да онлара мәмнунлуг ҝәтирир. Бу, Јеһованын вәзијјәтимиздән аҝаһ олдуғуна вә дуаларымыза ҹаваб вердијинә әминлијимизи бирә-беш артырыр». Аллаһын ҝөзәл руһани әнамларына ҝөрә сән дә миннәтдарсанмы?
8 Аз әһәмијјәтли ишләрин аиләви ибадәти кечирмәјә мане олмасына јол вермәјин. Бир әр-арвад сөјләјир: «Сон дөрд һәфтә иди ки, ҹүмә ахшамлары аиләмиздә нә исә баш верирди вә бу, демәк олар ки, аиләви ибадәти кечирмәјә мане олурду, анҹаг биз буна имкан вермирдик». Сөзсүз ки, һәрдән графикиниздә дәјишикликләр едә биләрсиниз. Бунунла белә, аиләви ибадәт ахшамыны, бир һәфтә дә олсун, тәхирә салмамаға гәти гәрарлы олун!
9. Јеһова Јеремјаја неҹә дәстәк олду вә биз онун нүмунәсиндән нә өјрәнә биләрик?
9 Јеремја пејғәмбәр бизим үчүн ҝөзәл нүмунәдир. О, Јеһовадан алдығы руһани гидаја еһтијаҹ дујурду вә ону јүксәк гијмәтләндирирди. Бу, она чатдырдығы хәбәрә лагејд јанашан инсанлара тәһәммүллә тәблиғ етмәјә имкан верирди. «Онун [Јеһованын] сөзү сүмүкләримдә һәбс едилән,.. јанан бир од олду», — дејә о сөјләмишди (Јер. 20:8, 9). Һәмчинин Аллаһын сөзләри она Јерусәлимин мәһви илә сон һәддә чатан чәтинликләрә дөзмәјә көмәк етди. Бу ҝүн бизим әлимиздә там шәкилдә Аллаһын Кәламы вар. Ону сәјлә өјрәнмәклә вә һәр шејә Аллаһын нөгтеји-нәзәри илә бахмагла, Јеремја кими, биз дә хидмәтдә севинҹимизи горумаға, сынаглар заманы садиглијимизи итирмәмәјә, еләҹә дә әхлаги вә руһани ҹәһәтдән тәмиз галмаға мүвәффәг олаҹағыг (Јаг. 5:10).
«Нөгсансыз, ләкәсиз» галын
10, 11. Нәјә ҝөрә өзүмүзү «нөгсансыз, ләкәсиз» сахламаға вар ҝүҹүмүзлә чалышмалыјыг вә бунун үчүн биздән нә тәләб олунур?
10 Биз мәсиһчиләр ахыр ҝүнләрдә јашадығымызы билирик. Буна ҝөрә дә дүнјанын тамаһкарлыг, ҹинси әхлагсызлыг вә зоракылыг кими Јеһованын нифрәт етдији әмәлләрлә долу олмасы бизи тәәҹҹүбләндирмир. Шејтанын стратеҝијасыны бир сөзлә белә ифадә етмәк олар: «Аллаһын хидмәтчиләри горхмадыларса, бәлкә, онлары јолдан чыхара билдим» (Вәһј 2:13, 14). Буна ҝөрә дә биз Петерин мәһәббәтлә вердији хәбәрдарлыг үзәриндә ҹидди дүшүнмәлијик: «[«Вар ҝүҹүнүзлә чалышын», ЈД] ки, Онун [Аллаһын] һүзурунда нөгсансыз, ләкәсиз вә сүлһ ичиндә тапыласыныз» (2 Пет. 3:14).
11 «Вар ҝүҹүнүзлә чалышын» ифадәси Петерин бундан әввәл дедији ‘бүтүн сәјинизи сәрф един’ нәсиһәтинә бәнзәјир. Петери бу һиссләри ифадә етмәјә илһамландыран Јеһова билир ки, Шејтан дүнјасынын натәмиз әмәлләриндән тәмиз галараг өзүмүзү «нөгсансыз, ләкәсиз» сахламаг үчүн чалышмалыјыг. Вар ҝүҹүмүзлә чалышмаг өзүнә үрәјимиздә дүзҝүн олмајан арзуларын көк салмасына имкан вермәмәји дахил едир. (Сүлејманын мәсәлләри 4:23; Јагуб 1:14, 15 ајәләрини оху.) Бура һәмчинин мәсиһчи һәјат тәрзимизә мәәттәл галанлара вә бизи ‘сөјәнләрә’ гаршы мөһкәм дурмаг дахилдир (1 Пет. 4:4).
12. Лука 11:13 ајәси бизи нәјә әмин едир?
12 Гејри-камиллијимиз уҹбатындан дүзҝүн оланы етмәк бизим үчүн әсил мүбаризәдир (Ром. 7:21—25). Сәмими-гәлбдән диләјәнләрә Өз мүгәддәс руһуну сәхавәтлә верән Јеһоваја ҝүвәндијимиз тәгдирдә бу мүбаризәдә гәләбә газана биләрик (Лука 11:13). Бу руһ да, өз нөвбәсиндә, биздә Аллаһын бәјәндији хүсусијјәтләри инкишаф етдирир вә јалныз һәјатда гаршылашдығымыз имтаһанлара јох, һәмчинин Јеһованын ҝүнү јахынлашдыгҹа артан чәтинликләрә гаршы дурмаға да көмәк едир.
Гој сынаглар сизи мөһкәмләндирсин
13. Һәјатда гаршылашдығымыз чәтинликләрә таб ҝәтирмәјә бизә нә көмәк едә биләр?
13 Һәлә ки бу системдә јашајырыг, бизи мүхтәлиф чәтинликләр ҝөзләјир. Анҹаг руһдан дүшмәк әвәзинә, нәјә ҝөрә сынаглара Јеһоваја мәһәббәтини сүбут етмәјә, еләҹә дә Она вә Онун Кәламына етибарыны мөһкәмләндирмәјә фүрсәт кими бахмајасан? Шаҝирд Јагуб јазырды: «Еј гардашларым, мүхтәлиф имтаһанлара дүшәндә, буну бөјүк бир севинҹлә гәбул един. Билин ки, иманынызын сынанмасы тәһәммүл һасил едир» (Јаг. 1:2—4). Һәмчинин јадда сахла ки, Јеһова ‘Она ихлас едәнләри имтаһандан неҹә хилас етмәји билир’ (2 Пет. 2:9).
14. Јусифин нүмунәси сәни неҹә руһландырыр?
14 Доғма гардашлары тәрәфиндән гул кими сатылан Јагубун оғлу Јусифин нүмунәсинә нәзәр салаг (Јар. 37:23—28; 42:21). Белә мәрһәмәтсиз давранышын гурбаны олан Јусифин иманы зәифләдими? Башына белә бәдбәхтлијин ҝәлмәсинә јол вердијинә ҝөрә Аллаһа гәзәбләндими? Аллаһын сөзү бунун белә олмадығыны ајдын шәкилдә дејир! Анҹаг Јусифин сынаглары бунунла битмәди. Сонралар о, зорламаға ҹәһд етмәкдә јаландан иттиһам олунараг зиндана атылды. Амма бу дәфә дә о, Аллаһа садиглијиндән дөнмәди (Јар. 39:9—21). Әксинә, сынагларын ону мөһкәмләндирмәсинә јол верди вә буна ҝөрә дә бол-бол мүкафатландырылды.
15. Наоминин нүмунәсиндән нә өјрәнә биләрик?
15 Нәзәрә ал ки, сынаглар бизи кәдәрләндирә, һәтта руһдан сала биләр. Јәгин, Јусиф дә һәрдән белә һиссләр кечирирди. Сөзсүз ки, буну Аллаһын диҝәр хидмәтчиләри һаггында да демәк олар. Ҝәлин һәјат јолдашыны вә ики оғлуну итирән Наоминин нүмунәсинә бахаг. «Мәнә Наоми демәјин, мәнә Мара [мәнасы «аҹы» демәкдир] дејин, чүнки Күлли-Ихтијар һәјатымы аҹы етди» (Рут 1:20, 21, һашијә). Наоминин мүнасибәти тәбии вә башадүшүләндир. Јусиф кими, о да Аллаһа иманынын вә Онунла мүнасибәтләринин итирилмәсинә, ја да садиглијинә хәтәр јетирилмәсинә имкан вермәди. Јеһова исә, буна ҹаваб олараг, бу дәјәрли гадыны мүкафатландырды (Рут 4:13—17, 22). Үстәлик, Аллаһ Шејтанын вә онун пис дүнјасынын вурдуғу бүтүн зәрәри јерүзү Ҹәннәтдә арадан галдыраҹаг. «Әввәлки ишләр бир даһа хатырланмајаҹаг, һеч јада дүшмәјәҹәк» (Јешаја 65:17).
16. Дуаја мүнасибәтимиз неҹә олмалыдыр вә нәјә ҝөрә?
16 Һансы сынагларла үзләшмәјимиздән асылы олмајараг, Аллаһын мәһәббәти бизә ҝүҹ верәҹәк. (Ромалылара 8:35—39 ајәләрини оху.) Шејтан бизи усанмадан руһдан салмаға чалышса да, ‘сағлам дүшүнҹәли вә дуаларда ајыг олдуғумуз’ тәгдирдә онун арзусу үрәјиндә галаҹаг (1 Пет. 4:7, ЈД). Иса демишди: «Буна ҝөрә дә бүтүн баш верәҹәк бу фәлакәтләрдән гачынмаға лајиг олмаг вә Инсан Оғлунун һүзуруна чыха билмәк үчүн, һәр ан дуа един [«јалварын», ЈД] вә ајыг олун» (Лука 21:36). Диггәт јетир ки, Иса бурада дуанын чох ваҹиб формасы олан ‘јалвармаг’ сөзүнү ишләтмишди. Бизи јалвармаға чағырмагла Иса демәк истәјирди ки, инди онун вә Атасынын гаршысында дурмағымыза ҹидди јанашмағын әсил вахтыдыр. Јеһованын ҝүнүндән јалныз Онун вә Оғлунун ҝөзүндә лүтф газанан инсанлар сағ чыхмаға үмид едә биләрләр.
Јеһоваја хидмәтдә фәал олун
17. Әҝәр саһәндә тәблиғ етмәк чәтиндирсә, кечмишдә јашајан пејғәмбәрләрин ҝөзәл нүмунәләриндән нә өјрәнә биләрсән?
17 Руһани ишләрдә иштирак етмәк бизи мөһкәмләндирир. Бу, бизә Петерин сөзләрини хатырладыр: «Ҝөрүн сиз мүгәддәс давранышда вә Аллаһа сәдагәтдә неҹә инсан олмалысыныз» (2 Пет. 3:11, ЈД). Ән ваҹиб иш хош хәбәри бәјан етмәкдир (Мат. 24:14). Дүздүр, бәзи әразиләрдә инсанларын лагејд мүнасибәтинә, тәгибләрә, јахуд садәҹә олараг инсанларын ҝүндәлик ишләрә башлары гарышдығына ҝөрә тәблиғ етмәк чәтин ола биләр. Јеһованын кечмишдә јашајан хидмәтчиләри дә бу ҹүр мүнасибәтлә гаршылашырдылар. Бунунла белә, онлар һеч вахт тәслим олмурдулар, әксинә, «дәфәләрлә» Аллаһын вердији хәбәри чатдырырдылар. (2 Салнамәләр 36:15, 16 ајәләрини оху; Јер. 7:24—26.) Бүтүн бунлара давам ҝәтирмәјә онлара нә көмәк етди? Онлар алдыглары тапшырыға дүнјанын јох, Аллаһын нөгтеји-нәзәри илә бахырдылар. Һәмчинин Аллаһын адыны бәјан етмәји ән бөјүк шәрәф һесаб едирдиләр (Јер. 15:16).
18. Падшаһлығын тәблиғ иши Аллаһын адыны ҝәләҹәкдә неҹә иззәтләндирәҹәк?
18 Биз дә Јеһованын адыны вә нијјәтини бәјан етмәк шәрәфинә маликик. Бир дүшүн: мәһз бизим тәблиғ хидмәтимизин нәтиҹәсиндә Аллаһын дүшмәнләри Онун һөкм ҝүнү илә үз-үзә ҝәләндә Јеһова вә Онун нијјәти һаггында ешитдикләрини инкар едә билмәјәҹәкләр. Бәли, неҹә ки кечмишдә фирон она гаршы чыхан Шәхсин Јеһова олдуғуну билди, еләҹә дә онлар буну биләҹәкләр (Чых. 8:1, 20; 14:25). Һәмин вахтда да Јеһова хидмәтчиләринин һәгигәтән дә Онун нүмајәндәләри олдугларыны ачыг-ашкар билдирәҹәк. (Језекел 2:5; 33:33 ајәләрини оху.)
19. Јеһованын сәбриндән фајдаланмаг истәдијимизи неҹә ҝөстәрә биләрик?
19 Икинҹи мәктубунун сонуна јахын Петер һәмиманлыларына јазыр: «Рәббимизин сәбрини дә гуртулуш һесаб един» (2 Пет. 3:15). Бәли, ҝәлин Јеһованын сәбриндән фајдаланмаға давам едәк. Буну неҹә едә биләрик? Аллаһын бәјәндији хүсусијјәтләри инкишаф етдирмәклә, ‘нөгсансыз, ләкәсиз’ галмагла, сынаглара дүзҝүн мүнасибәт бәсләмәклә вә Падшаһлыг иши илә мәшғул олмагла буна наил ола биләрик. Белә етмәклә, биз «јени ҝөјләр вә јени јер»лә бағлы сонсуз хејир-дуалар алаҹағыг (2 Пет. 3:13).
Јадыныздадырмы?
• Аллаһын бәјәндији хүсусијјәтләри неҹә инкишаф етдирә биләрик?
• «Нөгсансыз, ләкәсиз» галмаг неҹә мүмкүндүр?
• Јусиф вә Наоми бизә һансы нүмунәни гојуб?
• Тәблиғ ишиндә иштирак етмәк нәјә ҝөрә бөјүк шәрәфдир?
[9-ҹу сәһифәдәки шәкил]
Әрләр, сизә вә аиләнизә Аллаһын бәјәндији хүсусијјәтләри инкишаф етдирмәјә нә көмәк едәҹәк?
[10-ҹу сәһифәдәки шәкилләр]
Јусифин сынаглара таб ҝәтирмәсиндән нә өјрәнә биләрик?