Аллаһын Падшаһлығы илә бағлы пејғәмбәрлик сурәтләри ҝерчәкләшир
«Сиз јахшы едирсиниз ки, о сөзү [пејғәмбәрлик сөзүнү], гаранлыг јердә сачан бир чыраг кими тутурсунуз» (2 ПЕТЕР 1:19).
1. Бу ҝүн дүнјада һансы тәзады мүшаһидә етмәк олар?
АРДЫ-АРАСЫ кәсилмәјән бөһранлар јашадығымыз һәјатын әсас һиссәсинә чеврилиб. Еколожи фәлакәтләрдән үмумдүнја терроризминә гәдәр бәшәријјәтин дүшдүјү чәтинликләр санки нәзарәт алтындан чыхыр. Һәтта дүнја динләри дә көмәк етмәкдә аҹиздирләр. Әслинә галса, онлар чох вахт мәнфи рә’ј, нифрәт вә миллијјәтчилик ифтихары кими һиссләри шиддәтләндирәрәк мәсәләни даһа да чәтинләшдирирләр. Бәли, пејғәмбәрлик олундуғу кими ‘үммәтләри зүлмәт бүрүјүб’ (Јешаја 60:2). Анҹаг бунунла белә, милјонларла инсанлар ҝәләҹәјә әминликлә бахыр. Бу неҹә мүмкүндүр? Бу инсанлар «гаранлыг јердә ишыг сачан бир чыраға бәнзәјән» Аллаһын пејғәмбәрлик сөзүнә диггәт јетирирләр. Онлар Аллаһын Мүгәддәс Китабында јазылмыш «сөзләрини» аддымларыны јөнәлдән рәһбәрлик кими гәбул едирләр (2 Петер 1:19).
2. Даниелин «ахыр заман» һаггындакы пејғәмбәрлијиндән ҝөрүндүјү кими, руһани анлајышы јалныз кимләр ала биләр?
2 «Ахыр заман» һаггында Даниел пејғәмбәр јазмышды: «Чох адам өзүнү ора-бура вураҹаг вә билик артаҹаг. Чохлары пакланыб ләкәсиз вә тәмиз олаҹаг, пис адамлар исә шәр ишләриндән дөнмәјәҹәк. Пис адамлардан һеч бири бу сөзләри баша дүшмәјәҹәк, ағыллы адамлар исә баша дүшәҹәк» (Даниел 12:4, 10). Руһани анлајышы јалныз «өзләрини ора-бура вуранлар», јә’ни Аллаһын Кәламыны сә’јлә өјрәнәнләр, Онун нормаларына табе оланлар вә Аллаһын ирадәсини јеринә јетирмәкдән өтрү әлләриндән ҝәләни едән инсанлар ала биләр (Матта 13:11-15; 1 Јәһја 5:20).
3. 1870-ҹи илләрдә Мүгәддәс Китабын Тәдгигатчылары һансы ваҹиб һәгигәти анладылар?
3 Һәлә 1870-ҹи илләрдә, «сон ҝүнләр» башламаздан әввәл, Јеһова Аллаһ артыг «сәмави Сәлтәнәтин [Падшаһлығын] сирләринә» даир даһа бол анлајыш вермәјә башлады (2 Тимотејә 3:1-5; Матта 13:11). О вахт Мүгәддәс Китабын Тәдгигатчыларындан ибарәт кичик бир груп, ҝениш јајылмыш фикрә әкс олараг, Мәсиһин гајытмасынын ҝөзә ҝөрүнмәз олдуғуну анлады. Онлара ајдын олду ки, Иса тахтда отурдугдан сонра о мә’нада гајыдаҹагдыр ки, диггәтини јер үзәринә ҹәмләшдирсин. Шаҝирдләри Исанын ҝөрүнмәз иштиракынын башланмасыны ҝөрүнән әламәтин тәркиб һиссәсинин көмәклији илә дуја биләрдиләр (Матта 24:3-14).
Пејғәмбәрлик сурәтләри ҝерчәкләшәндә
4. Јеһова мүасир хидмәтчиләринин иманыны неҹә мөһкәмләндирир?
4 Мәсиһин ҝөркәминин дәјишилмәси ҝөрүнтүсү онун Падшаһлыг иззәтинин парлаг тәҹәссүмү иди (Матта 17:1-9). Бу ҝөрүнтү Петерин, Јагубун вә Јәһјанын иманыны хүсусилә мөһкәмләндирди, белә ки, о вахт Иса бир чох инсанларын Мүгәддәс Китаба әсасланмајан үмидләрини доғрултмадығындан, онлар ону тәрк едирдиләр. Ејнилә, бу сон ҝүнләрдә дә Јеһова о е’ҹазкар ҝөрүнтүнүн вә онунла бағлы бир чох пејғәмбәрликләрин јеринә јетмәсинә даир анлајышы вермәклә мүасир хидмәтчиләринин иманыны мөһкәмләндирир. Ҝәлин иманымызы мөһкәмләндирә биләҹәк бә’зи пејғәмбәрлик сурәтләрини нәзәрдән кечирәк.
5. Дан улдузу кими тәмсил едир вә о, нә вахт вә неҹә ‘доғмушду’?
5 Исанын ҝөркәминин дәјишилмәсинә истинад едәрәк һәвари Петер јазмышды: «Пејғәмбәрләрин сөзләри бизим үчүн даһа сабит олду. Сиз јахшы едирсиниз ки, ҝүн ағарыб, дан улдузу үрәкләриниздә доғунҹаја гәдәр, гаранлыг јердә ишыг сачан бир чыраға бәнзәјән бу сөзләрә диггәт едирсиниз» (2 Петер 1:19). Бурадакы Дан улдузу, јә’ни «парлаг дан улдузу» иззәтләнмиш Иса Мәсиһи тәмсил едир (Вәһј 22:16). Мәҹази мә’нада десәк, о, 1914-ҹү илдә, Аллаһын Падшаһлығынын ҝөјдә бәргәрар олдуғу заман ‘доғмушдур’. Бу һадисә дан јеринин сөкүлмәси, јә’ни јени дөврүн башланмасы илә әламәтдардыр (Вәһј 11:15). Исанын ҝөркәминин дәјишилмәси ҝөрүнтүсүндә Муса илә Илјас пејда олуб Иса илә сөһбәт едирләр. Бәс бу ҝөрүнтүдә онлар кими тәмсил едирләр?
6, 7. Исанын ҝөркәминин дәјишилмәси ҝөрүнтүсүндә Муса илә Илјас кими тәмсил едир вә Мүгәддәс Китаб онларын тәмсил етдикләри шәхсләр барәдә һансы ачыгламаны верир?
6 Муса илә Илјас Мәсиһин иззәтинә шәрик олдуглары үчүн бу ики садиг шаһид Исанын Падшаһлығында онунла бәрабәр идарә едәнләри тәмсил едир. Исанын һакимијјәт шәрикләринин олмасы Даниел пејғәмбәрә тахтда отурмуш Мәсиһ һаггында верилмиш ҝөрүнтүјә ујғун ҝәлир. Даниел бу ҝөрүнтүдә «Әзәлдән Вар Олан» Јеһова Аллаһын «бәшәр оғлуна бәнзәр бириси»нә «әбәди һакимијјәт» вердијини ҝөрмүшдүр. Амма Даниелин даһа сонра ҝөрдүјүнә диггәт јетирин. «Падшаһлыг, һакимијјәт вә ҝөјләрин алтындакы бүтүн падшаһлыгларын әзәмәти Һагг-Тааланын мүгәддәс халгына [мүгәддәсләринә] вериләҹәк» (Даниел 7:13, 14, 27). Демәли, Исанын ҝөркәминин дәјишилмәсиндән тәхминән беш әср өнҹә, Аллаһ Мәсиһин падшаһлыг әзәмәтиндә «мүгәддәсләрин» иштирак едәҹәјини ачыгламышды.
7 Даниелин ҝөрүнтүсүндәки «мүгәддәсләр» кимләрдир? Бу шәхсијјәтләри нәзәрдә тутараг һәвари Павел јазмышдыр: «Елә һәмин Руһ биздәки руһа шәһадәт едир ки, биз Аллаһын өвладларыјыг. Вә әҝәр өвладыјыгса, демәли, ејни заманда варисләрик, Аллаһын варисләријик; вә әҝәр Мәсиһлә бәрабәр иззәт газанмаг үчүн Онунла изтираб чәкириксә, Мәсиһин һәмварисләријик» (Ромалылара 8:16, 17). Беләликлә, мүгәддәсләр Исанын мәсһ едилмиш шаҝирдләридирләр. Вәһј китабында Иса белә дејир: «Мән галиб ҝәлиб, Атамла бәрабәр Онун тахтында неҹә отурдумса, галиб ҝәләнә дә иҹазә верәҹәјәм ки, Өз тахтымда Мәнимлә еләҹә отурсун». 144 000 нәфәрдән ибарәт олан һәјата гајтарылмыш бу ‘галибләр’ Иса илә бәрабәр бүтүн јер үзүнү идарә едәҹәкләр (Вәһј 3:21; 5:9, 10; 14:1, 3, 4; 1 Коринфлиләрә 15:53).
8. Исанын мәсһ едилмиш шаҝирдләринин фәалијјәти Муса вә Илјасын хидмәтини нә илә хатырладыр вә бу һансы фајданы ҝәтирир?
8 Бәс нәјә ҝөрә Муса илә Илјас мәсһ едилмиш мәсиһчиләри тәмсил едирләр? Мәсәлә ондадыр ки, мәсһ едилмишләр јер үзүндә јашајаркән Муса илә Илјасын ҝөрдүјү ишә бәнзәр иш ҝөрүрләр. Мәсәлән, онлар һәтта мүгавимәтләрлә үзләшәндә белә, Јеһованын шаһидләри кими хидмәт етмәјә давам едирләр (Јешаја 43:10; Һәвариләрин ишләри 8:1-8; Вәһј 11:2-12). Муса илә Илјас кими онлар да ҹәсарәтлә јалан дини ифша едәрәк сәмими гәлбли инсанлары Аллаһа һәдсиз сәдагәтлә хидмәт етмәјә тәшвиг едирләр (Чыхыш 32:19, 20; Ганунун тәкрары 4:22-24; 1 Падшаһлар 18:18-40). Бәс онларын фәалијјәти фајда ҝәтирирми? Әлбәттә ки, ҝәтирир! Онлар мәсһ едилмишләрин там сајыны јығмагдан әлавә, милјонларла «башга гојунлара» Иса Мәсиһә һазырлыгла табе олмаға көмәк етмишләр (Јәһја 10:16; Вәһј 7:4).
Мәсиһ фәтһ етмәк үчүн чыхыр
9. Вәһј 6:2 ајәсиндә Исанын бу ҝүн тутдуғу мөвге неҹә тәсвир едилир?
9 Бу ҝүн Иса сыпаја минмиш садә адам дејил, гүдрәтли Падшаһдыр. О, Мүгәддәс Китабда мүһарибә символу олан атын белиндә тәсвир едилиб (Сүлејманын мәсәлләри 21:31). Вәһј 6:2 ајәсиндә дејилир: «Бахыб ҝөрдүм ки, бир ағ ат дуруб, белиндәки атлынын да әлиндә јај вар. Она бир таҹ верилди вә о, фатеһ кими јола чыхды ки, фәтһ етсин». Бундан башга, Иса һаггында мәзмурчу Давуд јазмышды: «Рәбб Сәнин гүдрәтини, әсаны Сиондан ҝөндәрәҹәк, дүшмәнләринин үзәриндә сәнә һөкмранлыг верәҹәк» (Мәзмур 110:2).
10. а) Исанын фәтһ етмәк үчүн иззәтли чыхышы неҹә башланды? б) Мәсиһин илк гәләбәси үмумиликдә дүнјанын вәзијјәтинә неҹә тә’сир етди?
10 Әввәлҹә Иса ән ҝүҹлү дүшмәнләри олан Шејтан вә онун ҹинләри үзәриндә гәләбә чалды. Онлары ҝөјләрдән говараг јер үзүнә атды. Вахтларынын аз олдуғуну билән бу пис руһлар шиддәтли гәзәбләрини бәшәријјәтин үзәринә төкмәклә, бөјүк мүсибәтә сәбәб олмушлар. Бу мүсибәт «Вәһј» китабында үч атлы илә тәсвир едилир (Вәһј 6:3-8; 12:7-12). Исанын өз ‘ҝәлишинә вә дөврүн сонуна олаҹаг әламәтә’ даир пејғәмбәрлијинә әсасән, үч атлынын чыхышы мүһарибә, аҹлыг вә өлүмҹүл хәстәликләрә сәбәб олду (Матта 24:3, 7; Лука 21:7-11). Әсл доғуш ағрылары кими бу «ағрылар» да, шүбһәсиз ки, Мәсиһ ‘фәтһ етмәк үчүн чыхыб’, Шејтанын ҝөзлә ҝөрүнән тәшкилатыны јер үзүндән тамамилә силәнәдәк даһа да шиддәтләнәҹәкдир (Матта 24:8)a.
11. Мәсиһчи јығынҹағынын тарихи Мәсиһин падшаһлыг һакимијјәтинә неҹә шәһадәт едир?
11 Исанын падшаһлыг һакимијјәти һәмчинин бүтүн дүнјада Падшаһлыг һаггындакы хәбәри јајмаг тапшырығыны јеринә јетирмәк үчүн мәсиһчи јығынҹағыны мүһафизә етмәсиндән ҝөрүнүр. Бөјүк Бабил, јә’ни јалан динләрин үмумдүнја империјасы вә дүшмән мөвге тутан сијаси гүввәләр тәрәфиндән ҝөстәрилән сәрт мүгавимәтләрә бахмајараг, тәблиғ иши нәинки давам едир, һәмчинин сон илләр дүнја тарихиндә ҝөрүнмәз дәрәҹәдә вүс’әт алмышдыр (Вәһј 17:5, 6). Бу, Мәсиһин падшаһлыг сәлаһијјәтинә неҹә дә ҝөзәл шәһадәт едир! (Мәзмур 110:3).
12. Нә үчүн инсанларын әксәријјәти Мәсиһин ҝөрүнмәз иштиракыны дәрк етмирләр?
12 Тәәссүфләр олсун ки, бир чохлары, о ҹүмләдән өзләрини Мәсиһин давамчысы адландыран милјонларла инсанлар онун ҝөрүнмәз иштиракына шәһадәт едән јер үзүндәки ваҹиб һадисәләри дәрк етмирләр. Онлар, һәтта Аллаһын Падшаһлығыны е’лан едәнләрә истеһза едирләр (2 Петер 3:3, 4). Нәјә ҝөрә? Чүнки Шејтан онларын зеһинләрини кор едиб (2 Коринфлиләрә 4:3, 4). Әслиндә о һәлә чох әсрләр бундан әввәл өзләрини Мәсиһин давамчысы адландыран кәсләри руһани гаранлыг өртүјү илә бүрүмәјә башлады вә нәтиҹәдә онлар Падшаһлыға олан дәјәрли үмидләрини итирдиләр.
Падшаһлыг үмиди унудулур
13. Руһани гаранлыг өртүјү нәјә сәбәб олду?
13 Иса әввәлҹәдән хәбәрдарлыг етмишдир ки, тахыл илә бирликдә әкилмиш дәлиҹә буғдаја бәнзәјән дөнүкләр мәсиһчи јығынҹағына дахил олараг, бир чохларыны ардларынҹа чәкәҹәкләр (Матта 13:24-30, 36-43; Һәвариләрин ишләри 20:29-31; Јәһуда 4). Мүәјјән бир вахтдан сонра өзләрини Мәсиһин давамчысы адландыранлар бүтпәрәстләрә хас бајрамлары, мәрасимләри вә тә’лимләри гәбул етдиләр. Үстәлик онлары мәсиһчилијин бир һиссәси кими гәләмә верирдиләр. Мәсәлән, Милад бајрамы әсасыны бүтпәрәстлик танрылары Митра вә Сатурна һәср олунмуш ибадәт ајинләриндән ҝөтүрүр. Бәс өзләрини мәсиһчи адландыранлары мәсиһчилијә зидд ҝедән бајрамлары гәбул етмәјә вадар едән нә иди? Бир мәнбәдә белә дејилир: «Исанын анадан олма ҝүнү кими гејд едилән Милад бајрамы чохларынын Мәсиһин тезликлә гајытмасына олан үмидләринин пуч олмасы илә әлагәдар тә’сис едилмишди» («The New Encyclopædia Britannica», 1974).
14. Ориҝенлә Августинин тә’лимләри Падшаһлыг һаггындакы һәгигәти неҹә тәһриф етмишдир?
14 «Падшаһлыг» сөзүнүн мә’насынын нә дәрәҹәдә тәһриф олундуғуна диггәт јетирин. Бир китабда дејилир: «Ориҝендән [ЫЫЫ әсрин илаһијјатчысы] башлајараг “падшаһлыг” сөзү мәсиһчи олдугларыны иддиа едәнләрин тәсәввүрүндә инсанын дахили аләми илә бағлы олан јанлыш мә’на — Аллаһын Падшаһлығынын инсанларын үрәкләриндә олмасы мә’насыны кәсб етмәјә башлајыр» («The Kingdom of God in 20th-Century Interpretation»). Ориҝен өз тә’лимини нәјә әсасландырырды? Мүгәддәс Јазыларамы? Хејр, о, фикирләрини «Мәсиһин вә илк килсәнин анлајыш тәрзиндән тамамилә фәргләнән фәлсәфи принсипләрә вә бахышлара» әсасландырырды. Өзүнүн «Аллаһ шәһәри һаггында» әсәриндә Һиппонлу Августин (б. е. 354-430-ҹу илләр) килсәнин Аллаһын падшаһлығы олдуғуну иддиа едирди. Бу кими Мүгәддәс Јазылара зидд фикирләр христиан килсәләринә сијаси һакимијјәти әлә алмаг үчүн теоложи әсас верди. Вә онлар әсрләр боју бу һакимијјәтдән чох вахт кобудҹасына истифадә етмишләр (Вәһј 17:5, 18).
15. Галатијалылара 6:7 ајәсиндәки принсипи бир чох Христиан килсәләринә неҹә аид етмәк олар?
15 Бу ҝүн исә килсәләр әкдикләрини бичирләр (Галатијалылара 6:7). Онларын чоху нүфузлары илә бәрабәр килсә үзвләрини дә итирирләр. Белә вәзијјәт Авропада хүсусән нәзәрә чарпыр. Бир журнала әсасән «бу ҝүн Авропанын баш килсәләри ибадәт јерләри дејил, туристләрдән башга һеч кәсин зијарәт етмәдији музејләрә дөнүбләр» («Christianity Today»). Ејни вәзијјәтә дүнјанын башга јерләриндә дә раст ҝәлинир. Бу, јалан динләрә даир нәјә ишарә едир? Ҝөрәсән, дәстәкләјән тапылмадығындан онлар јох олаҹаглармы? Вә бу, һәгиги ибадәтә өз тә’сирини неҹә ҝөстәрәҹәк?
Аллаһын бөјүк ҝүнүнә һазыр олун
16. Нәјә ҝөрә Бөјүк Бабилә гаршы артан әдавәт диггәтә лајигдир?
16 Јатмыш вулкандан пүскүрән түстү вә күл партлајышын тезликлә баш верәҹәјиндән хәбәр вердији кими, бу ҝүн дә дүнјанын бир чох һиссәләриндә динләрә гаршы артан дүшмәнчилик онун сонунун јахын олдуғуна ишарә едир. Тезликлә, Јеһова руһани фаһишә олан Бөјүк Бабили ифша вә виран етмәк үчүн дүнјанын сијаси гүввәләрини бирләшмәјә тәшвиг едәҹәк (Вәһј 17:15-17; 18:21). Мәсиһчиләр бу һадисәдән вә «бөјүк мәшәггәти» тәшкил едән диҝәр амилләрдән горхмалыдырлармы? (Матта 24:21). Әлбәттә ки, јох! Әслиндә Аллаһ писләрә гаршы галхан заман, онларын севинмәк үчүн сәбәбләри олаҹагдыр (Вәһј 18:20; 19:1, 2). I әсрдә Јерусәлимлә вә орада јашајан мәсиһчиләрлә баш верән һадисәләри нәзәрдән кечирәк.
17. Нәјә ҝөрә Јеһованын садиг хидмәтчиләри индики системин сонуну әминликлә гаршылаја биләрләр?
17 Б. е. 66-ҹы илиндә Рома гошунлары Јерусәлими мүһасирәјә алдыглары заман, руһән ајыг мәсиһчиләр нә һәјәҹанландылар, нә дә дәһшәтә ҝәлдиләр. Аллаһын Кәламыны сә’јлә өјрәнмәләринин сајәсиндә онлар анладылар ки, шәһәрин виран олмасынын вахты јахынлашыб (Лука 21:20). Онлар һәмчинин Аллаһын онлара тәһлүкәсиз јерә гачмаг үчүн имкан јарадаҹағыны билирдиләр. Белә бир имкан јаранан кими, мәсиһчиләр шәһәри тәрк етдиләр (Даниел 9:26; Матта 24:15-19; Лука 21:21). Еләҹә дә бу ҝүн Аллаһы таныјан вә Онун Оғлуна табе олан кәсләр бу системин сонуну әминликлә гаршылаја биләрләр (2 Салониклиләрә 1:6-9). Бөјүк мәшәггәт башлајан заман онлар севинҹлә ‘јухары бахыб башларыны галдыраҹаглар, чүнки гуртулушлары јахынлашыр’ (Лука 21:28).
18. Гогун Јеһованын хидмәтчиләринин үзәринә һүҹуму нә илә нәтиҹәләнәҹәк?
18 Бөјүк Бабилин мәһвиндән сонра Шејтан Магогдан ҝәлән Гог ролунда Јеһованын сүлһпәрвәр Шаһидләринин үзәринә гәтијјәтлә һүҹум едәҹәк. Асанлыгла гәләбә чалаҹагларына үмид едәрәк, Гогун гошунлары «өлкәни бүрүјән бир булуд кими» јер үзүнә һүҹум едәҹәкләр. Онлары неҹә дә бөјүк мә’јуслуг ҝөзләјир! (Језекел 38:14-16, 18-23). Һәвари Јәһја јазырды: «Ҝөјү ачылмыш ҝөрдүм. Вә будур, бир ағ ат варды. Онун белиндә Отуран, Садиг вә Һәгиги адланыр... [...] Онун ағзындан ити бир гылынҹ чыхыр ки, онунла халглары вурсун». Бу ҝөзә ҝөрүнмәз «Шаһларын Шаһы» Јеһованын садиг хидмәтчиләрини хилас едәҹәк вә онларын дүшмәнләринин көкүнү кәсәҹәк (Вәһј 19:11-21). Исанын ҝөркәминин дәјишилмәси ҝөрүнтүсүнүн јүксәк нөгтәјә чатмасыны мүшаһидә етмәк неҹә дә һәјәҹанландырыҹы олаҹаг!
19. Мәсиһин там гәләбәси онун садиг давамчыларына һансы тә’сири бағышлајаҹаг вә онлар индидән һансы тәдбирләри ҝөрмәлидирләр?
19 Иса «бүтүн иманлылары һејрәтә ҝәтирмәк үчүн» ҝәләҹәкдир (2 Салониклиләрә 1:10). Аллаһын галиб Оғлу гаршысында еһтирамла дуранларын арасында олмаг истәрдинми? Онда иманыны мөһкәмләндирмәјә давам ет вә һазыр ол, чүнки инсан Оғлу зәнн етмәдијин саатда ҝәләҹәкдир (Матта 24:43, 44).
Ајыг олун
20. а) Аллаһын тә’јин етдији «садиг вә ағыллы гула» ҝөрә миннәтдарлығымызы неҹә ҝөстәрә биләрик? б) Өзүмүзә һансы суаллары вермәлијик?
20 «Садиг вә ағыллы гул» мүнтәзәм олараг Аллаһын халгыны руһани ҹәһәтдән ојаг олмаға вә ајыг дурмаға тәшвиг едир (Матта 24:45, 46; 1 Салониклиләрә 5:6). Бәс сән вахтында верилән бу хатырлатмалара ҝөрә миннәтдарсанмы? Һәјатында ваҹиб мәсәләләри биринҹилијинә ҝөрә ајырдығын заман онлары нәзәрә алырсанмы? Нәјә ҝөрә өзүндән сорушмајасан: «Ҝөјләрдә һөкмранлыг едән Аллаһын Оғлуну иман ҝөзләримлә ајдын ҝөрә билирәмми? Онун Бөјүк Бабилин вә Шејтанын системинин галан һиссәси үзәриндә Аллаһын һөкмүнү иҹра етмәјә һазыр олдуғуну ҝөрүрәмми?»
21. Нәјә ҝөрә бә’зиләри руһани ҹәһәтдән ҝөрмә габилијјәтләринин зәифләмәсинә јол вермишләр вә онлар тә’ҹили сурәтдә нә етмәлидирләр?
21 Јеһованын бә’зи хидмәтчиләри руһани ҹәһәтдән ҝөрмә габилијјәтләринин зәифләмәсинә јол вермишләр. Бәлкә онларын да Исанын илк шаҝирдләри илә олдуғу кими сәбир вә дөзүмләри чатмыр? Јохса онлара һәјатын гајғылары, вар-дөвләт далынҹа гачмаг мејли вә јахуд тә’гибләр тә’сир едир? (Матта 13:3-8, 18-23; Лука 21:34-36). Ола биләр ки, бә’зиләри «садиг вә ағыллы гулун» нәшрләриндәки мүәјјән мәгамлары анламагда чәтинлик чәкирләр. Бунлардан һансыса сәнинлә дә баш верибсә, онда биз сәни бүтүн гүввәни топлајараг јенидән Аллаһын Кәламыны өјрәнмәјә вә Јеһова илә мөһкәм, јахын мүнасибәтләри бәрпа етмәк үчүн Она јалвармаға тәшвиг едирик (2 Петер 3:11-15).
22. Исанын ҝөркәминин дәјишилмәси ҝөрүнтүсү вә онунла бағлы пејғәмбәрликләрин нәзәрдән кечирилмәси сәнә һансы тә’сири бағышлады?
22 Исанын ҝөркәминин дәјишилмәси ҝөрүнтүсү онун шаҝирдләринин руһланмаға дәрин еһтијаҹ дујдуглары заман верилмишдир. Бу ҝүн бизи мөһкәмләндирә биләҹәк даһа бөјүк имканларымыз вар. Бураја о мөһтәшәм ҝөрүнтүнүн вә онунла бағлы бир чох пејғәмбәрлик сурәтләринин ҝерчәкләшмәси дахилдир. Бу ҝөзәл һәгигәтләр вә онларын ҝәләҹәјимизә неҹә тә’сир едәҹәји барәдә дәриндән дүшүнәркән, гој бизим дә үрәјимиз һәвари Јәһјанын һиссләри илә бир олуб: «Амин. Ҝәл, ја Рәбб Иса!» дејә нида етсин (Вәһј 22:20).
[Һашијә]
a Јунан мәтнинин орижиналында Матта 24:8 ајәсиндәки «ағрылар» сөзү һәрфи мә’нада «доғуш ағрылары» мә’насыны дашыјыр. Бу о демәкдир ки, доғуш ағрылары кими, дүнјанын проблемләри дә бөјүк мәшәггәтдә өз јүксәк нөгтәсинә чатанадәк даһа тез-тез тәкрарланаҹаг, даһа ҝүҹлү вә узунмүддәтли олаҹагдыр.
Хатырлајырсынызмы?
• 1870-ҹи илләрдә Мүгәддәс Китабын Тәдгигатчыларындан ибарәт кичик груп Мәсиһин гајытмасына даир һансы һәгигәтләри анлады?
• Исанын ҝөркәминин дәјишилмәси ҝөрүнтүсү неҹә јеринә јетди?
• Мәсиһин тахтда отурмасы дүнјаја вә мәсиһчи јығынҹағына һансы тә’сири ҝөстәрди?
• Мәсиһ там гәләбә чалан заман, сағ галанлар арасында олмаг үчүн биз нә етмәлијик?
[24 вә 25-ҹи сәһифәләрдәки шәкилләр]
Пејғәмбәрлик сурәтләри ҝерчәкләшир.
[26-ҹы сәһифәдәки шәкилләр]
Мәсиһ фәтһ етмәк үчүн чыхан заман нә баш вердијини билирсәнми?