Јеһованын ҝүнү нәји ифша едәҹәк?
«Рәббин Ҝүнү исә, ҝеҹә ҝәлән оғру кими ҝәләҹәкдир. Јер вә орада олан бүтүн ишләр тамамилә јандырылаҹагдыр [«ифша олунаҹаг», ЈД]» (2 ПЕТ. 3:10).
1, 2. а) Индики пис системә неҹә сон гојулаҹаг? б) Һансы суаллары нәзәрдән кечирәҹәјик?
ИНДИКИ пис систем илк јаланын — инсанларын Јеһовадан асылы олмадан јер үзүнү мүвәффәгијјәтлә идарә едә биләҹәкләри фикринин үзәриндә гурулуб (Мәз. 2:2, 3). Јалан үзәриндә гурулан бир шеј әбәди гала биләрми? Әсла! Бунунла белә, биз Шејтан дүнјасынын өз-өзүнә мәһв олаҹағыны ҝөзләмәмәлијик. О, Аллаһын тәјин етдији вахтда вә Онун мүәјјән етдији үсулла мәһв едиләҹәк. Аллаһын бу пис дүнјаја гаршы чыхмасы Онун әдаләт вә мәһәббәтини мүкәммәл шәкилдә әкс етдирәҹәк (Мәз. 92:7; Сүл. мәс. 2:21, 22).
2 Һәвари Павел јазырды: «Рәббин Ҝүнү исә, ҝеҹә ҝәлән оғру кими ҝәләҹәкдир. О Ҝүндә ҝөјләр бөјүк ҝурулту илә кечәҹәкләр, үнсүрләр јанараг әријәҹәкләр, јер вә орада олан бүтүн ишләр тамамилә јандырылаҹагдыр [«ифша олунаҹаг», ЈД]» (2 Пет. 3:10). Бурада ады чәкилән «ҝөјләр» вә «јер» нәји тәмсил едир? Јанараг әријәҹәк «үнсүрләр», јәни тәркиб һиссәләр нә демәкдир? Һәмчинин Петер ‘јер вә орада олан бүтүн ишләрин ифша олунаҹағыны’ демәклә нәји нәзәрдә тутурду? Бу суаллара ҹаваб тапмаг бизә јахын ҝәләҹәкдә баш верәҹәк ваһимә доғуран һадисәләрә һазыр олмаға көмәк едәҹәк.
Ҝөјләр вә јер кечиб ҝедәҹәк
3. 2 Петер 3:10 ајәсиндә һаггында данышылан «ҝөјләр» нәји тәмсил едир вә онлар неҹә кечиб ҝедәҹәк?
3 Мүгәддәс Китабда «ҝөјләр» ифадәси мәҹази мәнада ишләнәндә чох вахт тәбәәләри үзәриндә һөкмранлыг едән һакимијјәт даирәләринә аид едилир (Јешаја 14:13, 14; Вәһј 21:1, 2). Кечиб ҝедәҹәк ҝөјләр Аллаһдан узаглашан бәшәр ҹәмијјәти үзәриндә һөкмранлыг едән инсан һакимијјәтләрини тәмсил едир. Онларын «ҝурулту илә» вә ја башга тәрҹүмәјә әсасән, «нәрилти илә» кечиб ҝетмәси бу ҝөјләрин сүрәтлә мәһв олунаҹағыны ҝөстәрир.
4. «Јер» нәдир вә о, неҹә мәһв едиләҹәк?
4 «Јер» Аллаһдан узаглашмыш бәшәријјәти тәмсил едир. Белә дүнја Нуһун ҝүнләриндә мөвҹуд иди вә Дашгын заманы Аллаһ тәрәфиндән мәһв едилди. «Индики ҝөјләр вә јер исә ода верилмәк үчүн ејни кәлам илә сахланыб, аллаһсыз адамларын мәһкәмә вә һәлак ҝүнүнә гәдәр һифз олунурлар» (2 Пет. 3:7). Дашгын пис инсанларын һамысыны ејни вахтда мәһв етсә дә, бу дүнја тәдриҹән, ‘бөјүк мәшәггәт’ заманы мәһв олунаҹаг (Вәһј 7:14). Мәшәггәтин биринҹи мәрһәләсиндә Аллаһ бу дүнјанын сијаси рәһбәрләрини ‘Бөјүк Бабили’ мәһв етмәјә тәшвиг едәҹәк вә бунунла дини фаһишәјә нифрәт етдијини ҝөстәрәҹәк (Вәһј 17:5, 16; 18:8). Сонра бөјүк мәшәггәтин ахырынҹы мәрһәләси олан Һар-Меҝидон мүһарибәсиндә Јеһова Өзү Шејтанын дүнјасынын галан һиссәсини јер үзүндән силәҹәк (Вәһј 16:14, 16; 19:19—21).
‘Үнсүрләр әријәҹәк’
5. Символик үнсүрләрә нә дахилдир?
5 Әријәҹәк үнсүрләр нәдир? Мүгәддәс Китаб лүғәти «үнсүрләр»ә «башланғыҹ принсипләр» вә ја «елементар биликләр» кими тәриф верир. Орада дејилир ки, бу сөз «нитгин тәркиб һиссәси олан һәрфләрә аид едилирди». Беләликлә, Петерин ишләтдији «үнсүрләр» сөзү бу дүнјада мөвҹуд олан вә Аллаһын бәјәнмәдији хүсусијјәтләрә, мәгсәдләрә, дүшүнҹә вә һәјат тәрзинә сәбәб олан әсас шејләрә шамил едилир. ‘Үнсүрләрә’ «итаәтсиз инсанларда фәал олан» ‘дүнјанын руһу’ дахилдир. (1 Кор. 2:12; Ефеслиләрә 2:1—3 ајәләрини оху.) Һәмин руһ, јәни ‘һава’ Шејтан дүнјасыны бүрүјүб. Бу, инсанлары «һавадакы һакимијјәтин» тәкәббүрлү вә итаәтсиз ‘һөкмраны’ олан Шејтанын дүшүнҹә тәрзини әкс етдирәрәк онун кими дүшүнмәјә, арзуламаға, данышмаға вә һәрәкәт етмәјә вадар едир.
6. Дүнјанын руһу өзүнү неҹә бүрузә верир?
6 Буна ҝөрә дә дүнјанын руһуна јолуханлар биләрәкдән вә ја билмәјәрәкдән Шејтанын онларын дүшүнҹә вә үрәкләринә тәсир етмәсинә јол верирләр. Бунунла да инсанлар онун дүшүнҹә тәрзини вә нөгтеји-нәзәрини әкс етдирирләр, нәтиҹәдә Аллаһын ирадәсини нәзәрә алмајараг истәдикләри кими һәрәкәт едирләр. Онлар һәр шејә тәкәббүрлә вә худбинликлә јанашыр, һакимијјәтә гаршы үсјанкар мөвге тутур, ‘ҹисмани еһтирасын, ҝөзләрин еһтирасынын’ гулу олурлар. (1 Јәһја 2:15—17 ајәләрини оху.)a
7. ‘Үрәјимизи горумаг’ нәјә ҝөрә ваҹибдир?
7 Буна ҝөрә дә дост, әдәбијјат вә әјләнҹә сечиминдә, һәмчинин интернет сәһифәләринә бахаркән Аллаһдан ҝәлән мүдриклији тәзаһүр етдирәрәк ‘үрәјимизи горумаг’ неҹә дә ваҹибдир! (Сүл. мәс. 4:23). Һәвари Павел јазырды: «Гардашлар, диггәтли олун ки, Мәсиһә дејил, инсан әнәнәсинә, дүнјанын ибтидаи гүввәтләринә әсасланараг, фәлсәфә вә бош һијлә илә кимсә сизи әсир алмасын» (Колос. 2:8). Јеһованын ҝүнү јахынлашдыгҹа бу әмрин әһәмијјәти даһа да артыр, чүнки о ҝүнүн ҝөрүнмәмиш «истиси» Шејтан дүнјасынын Аллаһын гәзәбинин истиси гаршысында аҹиз олдуғуну сүбут едәрәк бүтүн ‘үнсүрләри’ әридәҹәк. Бу, бизә Малаки 4:1 ајәсиндәки: «Соба кими јанан о ҝүн ҝәлир. Бүтүн мәғрурлар вә пислик едәнләр саман кими олаҹаг. Ҝәлән о ҝүн онлары јандыраҹаг» сөзләрини хатырладыр.
Јер вә орада олан бүтүн ишләр тамамилә ифша олунаҹаг
8. Јер вә орадакы ишләр неҹә «ифша олунаҹаг»?
8 Петер јер вә орада олан бүтүн ишләрин тамамилә ифша олунаҹағыны дејәркән нәји нәзәрдә тутурду? «Ифша олунаҹаг» ифадәсини һәмчинин «ашкара чыхармаг» вә ја «үзә чыхармаг» кими дә тәрҹүмә етмәк олар. Бунунла Петер демәк истәјирди ки, Јеһова бөјүк мәшәггәт заманы Шејтан дүнјасынын Она вә Онун Падшаһлығына гаршы дурдуғуну вә мәһвә лајиг олдуғуну ҝөстәрәрәк ону ифша едәҹәк. Һәмин дөврә аид Јешаја 26:21 ајәсиндә јазылан пејғәмбәрликдә белә дејилир: «Рәбб јер үзүнүн сакинләрини гәбаһәтләри үзүндән ҹәзаландырмаг үчүн Өз мәскәниндән ҝәлир. Торпаг уддуғу ганы үзә чыхараҹаг, өлдүрүләнләри артыг ҝизләтмәјәҹәк».
9. а) Биз нәји рәдд етмәлијик вә нәјә ҝөрә? б) Нәји инкишаф етдирмәлијик вә нә үчүн?
9 Јеһованын ҝүнүндә дүнјанын вә онун пис руһунун тәсири алтында формалашмыш инсанлар әсил үзләрини ҝөстәрәҹәк, һәтта бир-бирини гана гәлтан едәҹәкләр. Бу ҝүн мәшһур олан зоракы әјләнҹәләрин бир чох нөвләри әксәр инсанларын зеһнини, ола билсин, «бир-биринин үстүнә һүҹум чәкәҹәкләри» вахт үчүн формалашдырыр (Зәк. 14:13). Буна ҝөрә дә Аллаһын нифрәт етдији тәкәббүр вә зоракылыға мәһәббәт кими хүсусијјәтләрин биздә јаранмасына сәбәб ола биләҹәк һәр шеји — филмләри, китаблары, видеоојунлары вә саирәни рәдд етмәјимиз неҹә дә ваҹибдир! (2 Шам. 22:28; Мәз. 11:5) Әксинә, ҝәлин Јеһованын ҝүнүнүн символик «истисинә» гаршы дурмаға көмәк едәҹәк Аллаһын мүгәддәс руһунун сәмәрәсини инкишаф етдирәк (Галат. 5:22, 23).
«Јени ҝөјләр вә јени јер»
10, 11. «Јени ҝөјләр» вә «јени јер» нәдир?
10 2 Петер 3:13 ајәсини оху. «Јени ҝөјләр» 1914-ҹү илдә «диҝәр халгларын вахты» тамамланан заман тәсис олунан Аллаһын сәмави Падшаһлығыдыр (Лука 21:24). Бу һөкумәт Иса Мәсиһдән вә әксәријјәти артыг сәмави мүкафатыны алан 144 000 нәфәрдән тәшкил олунуб. Вәһј китабында бу сечилмишләр ‘мүгәддәс шәһәр, јени Јерусәлим, өз әри [«нишанлысы», ЈД] үчүн һазырланмыш бәзәкли бир ҝәлин кими ҝөјдән, Аллаһын јанындан енән’ кими тәсвир олунур (Вәһј 21:1, 2, 22—24). Неҹә ки, гәдим Исраилдә һөкумәт Јерусәлимдә јерләширди, еләҹә дә Јени Јерусәлим вә онун Нишанлысы јени системин һакимијјәтини тәшкил едир. Бу сәмави шәһәр ‘ҝөјдән енәрәк’ диггәтини јерә јөнәлдәҹәк.
11 «Јени јер» Аллаһын Падшаһлығына һәвәслә табе олдугларыны ҝөстәрән јени инсан ҹәмијјәтидир. Аллаһын халгынын артыг индидән зөвг алдығы руһани ҹәннәт ҝөзәл ‘ҝәләҹәк дүнјада’ өз лајигли јерини тутаҹаг (Ибр. 2:5). Биз јени системин һиссәси неҹә ола биләрик?
Јеһованын мөһтәшәм ҝүнүнә һазыр ол
12. Нәјә ҝөрә Јеһованын ҝүнү дүнјаны дәһшәтә салаҹаг?
12 Һәм Павел, һәм дә Петер габагҹадан демишдиләр ки, Јеһованын ҝүнү ‘оғру кими’ — хәлвәт вә ҝөзләнилмәдән ҝәләҹәк. (1 Салониклиләрә 5:1, 2 ајәләрини оху.) Онун гәфил ҝәлиши бу ҝүнү интизарла ҝөзләјән мәсиһчиләри белә һејрәтә салаҹаг (Мат. 24:44). Дүнја исә дәһшәт ичиндә олаҹаг. Павел јазырды: «Инсанлар [Јеһовадан үз дөндәрәнләр]: “Сүлһ вә тәһлүкәсизлик”, — дејәндә гәфләтән һамилә гадыны доғуш ағрылары тутдуғу кими, онлар да һәлака уғрајаҹаг вә гәтијјән хилас олмајаҹаглар» (1 Салон. 5:3).
13. «Сүлһ вә тәһлүкәсизлик» чағырышы бизи алдатмасын дејә нә едә биләрик?
13 Онларын «сүлһ вә тәһлүкәсизлик» чағырышы садәҹә олараг ҹинләрин ујдурдуғу нөвбәти јалан олаҹаг, лакин Јеһованын хидмәтчиләри буна алданмајаҹаглар. Павел јазырды: «Сиз гаранлыгда дејилсиниз ки, о ҝүн сизи оғру кими јахаласын. Ахы һамыныз нур оғуллары вә ҝүн оғулларысыныз» (1 Салон. 5:4, 5). Беләликлә, ҝәлин ишыгда галаг, Шејтан дүнјасынын гаранлығындан исә узаг олаг. «Севимлиләр, бунлары габагҹадан биләрәк еһтијат един ки, позғун адамларын хатасы илә јолдан аздырылмајасыныз вә сабит вәзијјәтиниздән ајрылмајасыныз», — дејә Петер јазырды (2 Пет. 3:17).
14, 15. а) Јеһова бизи шәрәфә неҹә лајиг ҝөрүр? б) Аллаһдан илһам алмыш һансы сөзләрин үзәриндә дүшүнмәлијик?
14 Диггәт јетирин ки, Јеһова садәҹә олараг бизә «еһтијат един» дејиб, сонра да гырагда дурмур. Әксинә, О, ҝәләҹәкдә баш верәҹәк һадисәләрлә бағлы әсас шејләри ‘габагҹадан билдирәрәк’ бизи шәрәфә лајиг ҝөрүр.
15 Тәәссүфләр олсун ки, бәзиләри ојаг дурмағын ваҹиблији илә әлагәдар дејилән хатырлатмалара лагејд вә һәтта сајмазјана јанашырлар. Онлар: «Ејни шеји нечә илләрдир ки, ешидирик» дејә биләрләр. Лакин бу инсанлар јадда сахламалыдырлар ки, белә демәклә, әслиндә, тәкҹә садиг вә ағыллы гулун јох, Јеһова вә Онун Оғлунун дедикләрини шүбһә алтына гојурлар. Јеһова дејиб: «Ҝөзләјин» (Һаб. 2:3). Иса да буна бәнзәр сөзләр демишди: «Ојаг дурун; чүнки Рәббинизин һансы ҝүн ҝәләҹәјини билмәзсиниз» (Мат. 24:42). Бундан әлавә, Петер дә јазырды: «Сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүрәтләндирәрәк мүгәддәс вә Аллаһа ихласкар бир һәјат јашамалысыныз» (2 Пет. 3:11, 12). Садиг гул синфи вә онун Рәһбәрлик Шурасы бу ҹидди сөзләрә һеч вахт бармагарасы бахмајаҹаг!
16. Биз һансы дүшүнҹә тәрзиндән узаг олмалыјыг вә нә үчүн?
16 Бәли, Ағасынын ҝеҹикдијини дүшүнән гул «пис»дир (Мат. 24:48). Бу пис гул 2 Петер 3:3, 4 ајәләриндә тәсвир олунан инсанлара аиддир. Петер јазырды: «Ахыр ҝүнләрдә өз еһтирасларына ҝөрә һәрәкәт едән ришхәндчиләр... ҝәләҹәк». Онлар Јеһоваја итаәт едәрәк Онун ҝүнүнү јаддашында мөһкәм сахлајанлара истеһза едәҹәкләр. Бәли, диггәтләрини Падшаһлығын марагларына ҹәмләмәк әвәзинә, белә ришхәндчиләрин фикри-зикри өзләриндә вә худбин арзуларындадыр. Ҝәлин һеч вахт бу ҹүр итаәтсиз олмајаг вә тәһлүкәли дүшүнҹә тәрзинин баш галдырмасына јол вермәјәк! Биз баша дүшмәлијик ки, баш верәҹәк һадисәләрин вахтыны билмәјә јалныз Јеһова Аллаһын һаггы чатыр вә бу сәбәбдән вахта ҝөрә һәддән артыг нараһат олмамалыјыг. Бунун әвәзинә, ҝәлин Падшаһлығын тәблиғи вә шаҝирд һазырламаг иши илә мәшғул олараг ‘Рәббимизин сәбрини гуртулуш һесаб едәк’. (2 Пет. 3:15; Һәвариләрин ишләри 1:6, 7 ајәләрини оху.)
Гуртулуш Аллаһына ҝүвән
17. Исанын Јерусәлимдән гачмаг хәбәрдарлығына садиг мәсиһчиләр неҹә һај вердиләр вә нәјә ҝөрә?
17 Ерамызын 66-ҹы илиндә Рома әсҝәрләри Јәһудејаны ишғал етдикдән сонра, садиг мәсиһчиләр имкан јаранан кими, Исанын Јерусәлимдән гачмаг хәбәрдарлығына әсасән даврандылар (Лука 21:20—23). Нәјә ҝөрә онлар ҹәлд вә тәрәддүд етмәдән һәрәкәт етдиләр? Шүбһәсиз, онлар Исанын бу хәбәрдарлығыны гулагларында сырға етмишдиләр. Онлар белә гәрар гәбул етдикләринә ҝөрә, Исанын да габагҹадан дедији кими, чәтинликләрлә үзләшәҹәкләрини ҝөзләјирдиләр. Бунунла јанашы, онлар Јеһованын Өз садиг хидмәтчиләрини һеч вахт тәрк етмәдијини дә билирдиләр (Мәз. 55:22).
18. Исанын Лука 21:25—28 ајәләриндә јазылан сөзләри јахынлашмагда олан бөјүк мәшәггәтә бахышына неҹә тәсир едир?
18 Биз Јеһоваја тамамилә ҝүвәнмәлијик, чүнки индики дүнја бәшәријјәтин тарихиндә ән бөјүк мәшәггәти јашајанда бизи јалныз О хилас едә биләҹәк. Бөјүк мәшәггәт башлајандан мүәјјән вахт сонра, ејни заманда дүнјанын галан һиссәсинә Јеһованын Өз һөкмүнү иҹра етмәсиндән әввәл «инсанлар горхудан вә дүнја үзәринә ҝәлән фәлакәтләри ҝөзләмәкдән һушуну итирәҹәкләр». Аллаһын дүшмәнләри горхудан тир-тир әсдији һалда, Јеһованын садиг хидмәтчиләри горхмајаҹаглар. Әксинә, тезликлә хилас олаҹагларыны биләрәк севинәҹәкләр. (Лука 21:25—28 ајәләрини оху.)
19. Нөвбәти мәгаләдә нәји мүзакирә едәҹәјик?
19 Бәли, дүнјадан вә онун ‘үнсүрләриндән’ узаг галанлары неҹә дә мөһтәшәм ҝәләҹәк ҝөзләјир! Нөвбәти мәгаләдә изаһ олундуғу кими, һәјаты газанмаг үчүн пис шејләрдән гачмаг һәлә аздыр. Биз Јеһованын бәјәндији хүсусијјәтләрә јијәләнмәли вә Ону разы салан ишләри ҝөрмәлијик (2 Пет. 3:11).
[Һашијә]
a Дүнјанын руһунун сәбәб олдуғу хүсусијјәтләр һаггында әлавә мәлуматы «Мүгәддәс Јазыларын әсасында мүлаһизә» китабынын 135—139-ҹу сәһифәләриндә (рус.) тапа биләрсиниз.
Неҹә ҹаваб верәрдиниз?
• Индики ‘ҝөјләр вә јер’
«үнсүрләр»
«јени ҝөјләр вә јени јер»
нәји тәмсил едир?
• Нәјә ҝөрә бүтүнлүклә Аллаһа ҝүвәнмәлијик?
[5-ҹи сәһифәдәки шәкил]
Сән үрәјини неҹә горуја вә дүнјадан узаг гала биләрсән?
[6-ҹы сәһифәдәки шәкил]
‘Рәббимизин сәбрини гуртулуш һесаб етдијимизи’ неҹә ҝөстәрә биләрик?