Сән Аллаһын иззәтини әкс етдирәҹәксәнми?
«Биз... Јеһованын иззәтини ҝүзҝү кими әкс етдиририк» (2 КОРИНФЛИЛӘРӘ 3:18, ЈД).
1. Муса нә ҝөрдү вә бундан сонра нә баш верди?
БУ, ИНСАНА верилән ҝөрүнтүләрдән ән мөһтәшәми иди. Муса Сина дағында тәк оларкән, онун гејри-ади бир истәји јеринә јетирилди. Она һеч бир инсанын ҝөрә билмәдији мәнзәрәнин шаһиди олмаг нәсиб олду. О, Јеһованын иззәтини ҝөрдү. Әлбәттә, Муса Јеһованын Өзүнү ҝөрмәди. Аллаһын ҝөркәми о гәдәр валеһедиҹидир ки, һеч бир инсан Ону ҝөрүб сағ гала билмәз. Буна ҝөрә Јеһова Мусанын јанындан кечәнәдәк ону «әли» илә өртдү. Ҝөрүнүр, О бурада мәләкдән истифадә етмишдир. Сонра Јеһова Аллаһ иҹазә верди ки, Муса Онун илаһи иззәтинин шө’ләсини ҝөрсүн. Јеһова, һәмчинин, Муса илә мәләк васитәсилә дә данышырды. Мүгәддәс Китабда бундан сонра нәләрин баш вердији барәдә јазылыб: «Муса... Сина дағындан енәндә... Рәблә [Јеһова илә] данышдығына ҝөрә үзү нур сачыр[ды]» (Чыхыш 33:18–34:7, 29).
2. Һәвари Павел мәсиһчиләрин әкс етдирдикләри иззәт һаггында нә јазырды?
2 Тәсәввүр ет ки, сән дә Муса илә о дағын үстүндәсән. Күлл-Ихтијар Аллаһын ҝөзгамашдыран ҹәлалыны ҝөрсәјдин, сәсини ешитсәјдин мәҝәр һәјәҹанланмаздынмы? Сәнҹә Ганун әһдинин васитәчиси олан Муса илә бәрабәр Сина дағындан енмәк бөјүк үстүнлүк дејилми? Бәс мәсиһчиләрин Аллаһын иззәтини Мусадан даһа үстүн шәкилдә әкс етдирдикләрини билирсәнми? Бу ҝөзәл фикир һәвари Павелин мәктубларынын бириндә гәләмә алыныб. Орада Павел, мәсһ едилмиш мәсиһчиләрин «Јеһованын иззәтини ҝүзҝү кими» әкс етдирдикләри барәдә јазырды (2 Коринфлиләрә 3:7, 8, 18, ЈД). Јер үзүндә јашамаг үмидинә малик олан мәсиһчиләр дә мүәјјән мә’нада Аллаһын иззәтини әкс етдирирләр.
Мәсиһчиләр Аллаһын иззәтини неҹә әкс етдирирләр?
3. Мусадан фәргли олараг, биз Јеһова һаггында биликләрә неҹә јијәләнмишик?
3 Бәс Аллаһын иззәтини биз неҹә әкс етдирә биләрик? Мусадан фәргли олараг, биз Јеһова Аллаһы нә ҝөрмүшүк, нә дә Онун сәсини ешитмишик. Буна бахмајараг, биз Јеһова һаггында Мусадан да чох билијә маликик. Мәсәлән, Иса, Муса өләндән 1 500 ил сонра јер үзүнә Мәсиһ кими ҝәлди. Демәли, Ганунун Исанын үзәриндә јеринә јетәҹәји вә онун бәшәријјәти ҝүнаһын вә өлүмүн зүлмкар әсарәтиндән хилас едәҹәји барәсиндә Муса һеч бир шеј билә билмәзди (Ромалылара 5:20, 21; Галатијалылара 3:19). Бундан башга, Муса Јеһованын нијјәтинин бөјүклүјү — Хиласкар Падшаһлыг вә онун јер үзүнә ҝәтирәҹәји Ҹәннәт һаггында чох мәһдуд билијә малик иди. Биз исә Јеһованын иззәтини физики ҝөзләримизлә дејил, Мүгәддәс Китаб тә’лимләринә әсасланан иманымызын ҝөзү илә ҝөрүрүк. Биз Јеһованын сәсини мәләк васитәсилә дејил, Мүгәддәс Китаб, хүсусән дә Мүждәләр васитәсилә ешидирик. Бу Мүждәләр Исанын тә’лимләрини вә хидмәтини чох ҝөзәл шәкилдә тәсвир едир.
4. а) Мәсһ едилмиш мәсиһчиләр Аллаһын иззәтини неҹә әкс етдирирләр? б) Јер үмидинә малик оланлар Аллаһын иззәтини неҹә әкс етдирә биләрләр?
4 Дүздүр, Јеһованын иззәтини әкс етдирәркән мәсиһчиләрин үзү нур сачмыр, амма башгалары илә Онун ҝөзәл шәхсијјәти вә нијјәтләри барәсиндә данышанда үзләри санки парлајыр. Јешаја пејғәмбәр бизим ҝүнләримиз һаггында пејғәмбәрлик едәркән демишдир ки, Аллаһын халгы Јеһованын ‘әзәмәтини милләтләр арасында бәјан едәҹәк’ (Јешаја 66:19). Һәмчинин, 2 Коринфлиләрә 4:1, 2 ајәләриндә охујуруг: «Бу ҹүр хидмәтә малик олдуғумуз үчүн... ҝизли, ејибли үсуллары рәдд етдик. Һијләҝәрлик илә һәрәкәт етмирик, Аллаһын кәламыны тәһриф етмирик, амма һәгигәти ачыг е’лан едәрәк өзүмүзү Аллаһ гаршысында һәр инсанын виҹданына тәгдим едирик». Павел бурада «Әһди-Ҹәдидин», јә’ни јени әһдин «хидмәткарлары» олан мәсһ едилмишләрә истинад едирди (2 Коринфлиләрә 3:6). Онларын хидмәтләри сајәсиндә сајсыз-һесабсыз инсанлар јер үзүндә әбәди јашамаг үмидини әлдә етмишләр. Һәм мәсһ едилмишләр, һәм дә јер үмидинә малик оланлар өз хидмәтләри васитәсилә Јеһованын иззәтини јалныз тә’лим вермәклә дејил, һәмчинин һәјат тәрзләри илә әкс етдирирләр. Һагг-Таала Аллаһын иззәтини әкс етдирмәк бизим үчүн мәс’улијјәт вә дәјәрли үстүнлүкдүр!
5. Руһани фираванлығымыз нәјин сүбутудур?
5 Исанын пејғәмбәрлик етдији кими, Аллаһын Падшаһлығы һаггындакы хош хәбәр бу ҝүн бүтүн дүнјада тәблиғ едилир (Матта 24:14). Һәр милләтдән, халгдан, гәбиләдән вә дилдән олан инсанлар хош хәбәрә һәвәслә һај верир вә Аллаһын ирадәсини јеринә јетирмәк үчүн һәјатларында дәјишикликләр едирләр (Ромалылара 12:2; Вәһј 7:9). Еркән мәсиһчиләр кими, онлар да ҝөрдүкләри вә ешитдикләри шејләр һаггында данышмаја билмирләр (Һәвариләрин ишләри 4:20). Бу ҝүн Аллаһын иззәтини алты милјондан артыг инсан әкс етдирир. Бу, Аллаһын хидмәтчиләринин тарихдә олан ән бөјүк сајыдыр. Сән дә бу инсанларын сырасындасанмы? Аллаһын халгынын руһани фираванлыг ичәрисиндә јашамасы мәҝәр Јеһованын хејир-дуасынын вә мүдафиәсинин сүбуту дејилми? Ҝүҹлү гүввәләрин бизә гаршы јөнәлмәсини дә нәзәрә алсаг, Јеһованын руһунун үзәримиздә олдуғуну ајдын ҝөрмәк олар. Ҝәлин ҝөрәк биз нә үчүн буну әминликлә дејә биләрик.
Аллаһын халгы сусдурулмајаҹаг
6. Јеһованын тәрәфиндә дурмаг үчүн нәјә ҝөрә биздән иман вә ҹәсарәт тәләб олунур?
6 Тәсәввүр ет ки, сәни мәһкәмәјә чағырырлар. Орада сән амансыз бир ҹинајәткара гаршы шаһидлик етмәлисән. Билдијинә ҝөрә, бу ҹинајәткарын архасында нүфузлу бир тәшкилат дурур вә ҹинајәткар ифша едилмәсин дејә сәнә мане олмаг үчүн һәр бир шејә һазырдыр. Бу ҹүр ҹинајәткара гаршы чыхыш етмәк үчүн сәндән бөјүк ҹәсарәт тәләб олунур, һәмчинин, сән әмин олмалысан ки, һөкумәт сәнин арханда дураҹаг. Демәк олар ки, биз дә бу ҹүр вәзијјәтдәјик. Јеһова вә Онун нијјәтләри һаггында шаһидлик етмәклә биз Шејтан Иблисә гаршы шәһадәт едир, онун гатил вә бүтүн дүнјаны алдадан јаланчы олдуғуну ифша едирик (Јәһја 8:44; Вәһј 12:9). Јеһованын тәрәфиндә дурмаг вә Шејтана гаршы чыхмаг үчүн биздән иман вә ҹәсарәт тәләб олунур.
7. Шејтан нә дәрәҹәдә ҝүҹлүдүр вә нә етмәјә чалышыр?
7 Јеһова Һагг-Таала Аллаһдыр вә Шејтандан һәдсиз дәрәҹәдә ҝүҹлүдүр. Биз бир шејә әмин ола биләрик: нә гәдәр ки, Јеһоваја сәдагәтлә хидмәт едирик, О бизи горумаға һәм гадирдир, һәм дә буну үрәкдән едәҹәк (2 Салнамәләр 16:9). Бунунла белә, Шејтан ҹинләрин вә Аллаһдан тәҹрид едилмиш бәшәријјәтин һөкмдарыдыр (Матта 12:24, 26; Јәһја 14:30). Јер үзүнә атылан вә «бөјүк гәзәблә» долан Шејтан Јеһованын хидмәтчиләринә гаршы амансыз сурәтдә чыхыш едир вә һакимијјәти алтында олан дүнјадан истифадә едәрәк хош хәбәри јајанларын һамысыны сусдурмаға чалышыр (Вәһј 12:7-9, 12, 17). О буну неҹә едир? Ән азы үч јолла.
8, 9. Шејтан инсанларын нәләри севмәсини истәјир вә нәјә ҝөрә дост сечәркән еһтијатлы олмалыјыг?
8 Биринҹиси, фикримизи руһани ишләрдән јајындырмаг үчүн Шејтан һәјатын гајғыларындан истифадә едир. Бу сон ҝүнләрдә инсанлар Аллаһы дејил, пулу, өзләрини вә зөвгү севирләр (2 Тимотејә 3:1-4). Онларын әксәријјәтинин башы ҝүндәлик һәјат гајғыларына о гәдәр гарышыб ки, ҝәтирдијимиз хош хәбәрә гулаг асмаг белә истәмирләр. Мүгәддәс Китаб һәгигәтләри онлары һеч марагландырмыр (Матта 24:37-39). Бу ҹүр әһвал-руһијјә бизә дә тә’сир едәрәк, руһани ҹәһәтдән сүст вәзијјәтә сала биләр. Әҝәр мадди шејләрә малик олмаг вә һәјатдан ләззәт алмаг истәјинин үрәјимиздә көк салмасына јол веририксә, онда Аллаһа олан мәһәббәтимиз ҝет-ҝедә сојујаҹаг (Матта 24:12).
9 Бунлары нәзәрә алараг, мәсиһчиләр дост сечәркән еһтијатла давранырлар. Сүлејман падшаһ јазырды: «Һикмәтли илә отуруб-дуран һикмәт газанар, ахмагларла ајаглашан бәдбәхт олар» (Сүлејманын мәсәлләри 13:20). Ҝәлин биз дә Аллаһын иззәтини әкс етдирән инсанларла ‘отуруб-дураг’. Бу ҹүр үнсијјәт неҹә дә хошдур! Јығынҹаг ҝөрүшләримиздә вә јахуд да башга вахт руһани баҹы-гардашларымызла бир јерә јығышанда онларын ҝөстәрдикләри мәһәббәт, иман, севинҹ вә мүдриклик бизи руһландырыр. Бу ҹүр сағлам үнсијјәт бизи хидмәтимизә давам етмәјә тәшвиг едәҹәк.
10. Аллаһын иззәтини әкс етдирәнләрә гаршы Шејтан истеһзадан неҹә истифадә едир?
10 Јеһова Аллаһын иззәтини әкс етдирмәјимизә мане олмаг үчүн Шејтанын истифадә етдији икинҹи үсул истеһзадыр. Шејтанын бу үсула әл атмасы бизи тәәҹҹүбләндирмир. Иса Мәсиһ дә јер үзүндә хидмәт едәркән истеһза илә гаршылашмышды. Она ҝүлүр, әлә салыр, лаға гојурдулар вә һәтта бир дәфә үзүнә түпүрмүшдүләр! (Марк 5:40; Лука 16:14; 18:32). Еркән мәсиһчиләри дә лаға гојурдулар (Һәвариләрин ишләри 2:13; 17:32). Јеһованын мүасир хидмәтчиләри дә ејни ҹүр мүнасибәтлә гаршылашырлар. Һәвари Петерин сөзләринә ҝөрә, онлары һәтта јаланчы пејғәмбәрләр адландыраҹагдылар. О јазырды: «Ахыр ҝүнләрдә өз еһтирасларына ҝөрә һәрәкәт едән ришхәндчиләр истеһза едәрәк ҝәләҹәк вә дејәҹәкләр: “Бәс Онун вә’д едилмиш зүһуру һаны?.. һәр шеј илк јаранан заман олдуғу кими галыр”» (2 Петер 3:3, 4). Аллаһын халгына истеһза едиб дејирләр ки, онлары ҝеридә галмыш адландырырлар. Мүгәддәс Китабын әхлаг нормалары да бу дүнјанын нәзәринҹә артыг дәбдән дүшүб. Тәблиғ етдијимиз хош хәбәр исә чохлары үчүн бош сөзләрдән башга бир шеј дејил (1 Коринфлиләрә 1:18, 19). Бир мәсиһчи кими, биз дә мәктәбдә, ишдә вә јахуд да аиләдә истеһза илә гаршылаша биләрик. Иса кими, Аллаһын Кәламынын һәгигәт олдуғуну билдијимиз үчүн, һеч нәјә бахмајараг, хидмәтимизә давам едириксә Аллаһын иззәтини әкс етдирмиш олуруг (Јәһја 17:17).
11. Мәсиһчиләри сусдурмаг үчүн Шејтан тә’гибләрдән неҹә истифадә едир?
11 Иблисин бизи сусдурмаг үчүн истифадә етдији үчүнҹү үсул тә’гибләр вә ја мүгавимәтләрдир. Иса өз давамчыларына дејирди: «О заман сизә әзијјәт вериб өлдүрәҹәкләр; вә Мәним адыма ҝөрә бүтүн халглар сизә нифрәт едәҹәк» (Матта 24:9). Доғрудан да, Јеһованын Шаһидләри олдуғумуз үчүн дүнјанын бир чох өлкәләриндә бизи амансызҹасына тә’гиб едирләр. Јеһова һәлә гәдим дөврләрдән Она хидмәт едәнләрлә Шејтан Иблисин тәрәфдарлары арасында әдавәтин олаҹағы барәдә пејғәмбәрлик етмишди (Јарадылыш 3:15). Биз ону да билирик ки, сынагларла үзләшәндә нөгсансызлығымызы горујуругса, Јеһованын һөкмранлыг һүгугуна даир шаһидлик етмиш олуруг. Буну јадымызда сахласаг, һәтта ән ағыр шәраитләрдә белә мөһкәм галаҹағыг. Әҝәр Јеһованын иззәтини әкс етдирмәји гәти сурәтдә гәрара алмышыгса, онда һеч бир тә’гиб бизи сусдура билмәјәҹәк.
12. Мүгавимәтләрлә үзләшәндә Аллаһа садиг галырыгса, нә үчүн севинмәлијик?
12 Бу дүнјанын ҹазибәсинә мүгавимәт ҝөстәрирсәнми? Истеһза вә мүгавимәтләрлә үзләшәндә садиглијини горујуб сахлајырсанмы? Әҝәр бу беләдирсә, онда севинмәјә әсасын вар. Иса онун ардынҹа ҝәләнләрә белә дејирди: «Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман сиз нә бәхтијарсыныз! Севинин вә шадланын! Чүнки ҝөјләрдә мүкафатыныз бөјүкдүр; чүнки сиздән габаг пејғәмбәрләри дә белә тә’гиб етмишләр» (Матта 5:11, 12). Сәнин тәһәммүл етмәјин сүбут едир ки, Јеһованын гүввәтли мүгәддәс руһу сәнин үзәриндәдир вә Онун иззәтини әкс етдирмәјин үчүн сәни гүввәтләндирир (2 Коринфлиләрә 12:9).
Тәһәммүлү Јеһова верир
13. Мәсиһчи хидмәтиндә тәһәммүл етмәјимизин башлыҹа сәбәби нәдир?
13 Бизи хидмәтдә сона гәдәр тәһәммүл етмәјимизин башлыҹа сәбәби Јеһованы севмәјимиз вә Онун иззәтини әкс етдирмәк истәјимиздир. Инсанлар адәтән севдикләри вә һөрмәт етдикләри адамлара бәнзәмәјә чалышырлар. Лакин Јеһова Аллаһ гәдәр тәглид едилмәјә лајиг шәхсијјәт јохдур. Аллаһ бөјүк мәһәббәтдән ирәли ҝәләрәк Оғлуну һәгигәтә шәһадәтлик етмәк вә итаәткар бәшәријјәти хилас етмәк үчүн јер үзүнә ҝөндәрди (Јәһја 3:16; 18:37). Аллаһ кими, биз дә һәр ҹүр инсанларын төвбә едиб хилас олмасыны истәјирик вә елә бу сәбәбдән дә онлара тәблиғ едирик (2 Петер 3:9). Бу арзумуз, о ҹүмләдән Аллаһа бәнзәмәк гәтијјәтимиз бизи тәшвиг едир ки, хидмәтимиздә Онун иззәтини әкс етдирмәјә давам едәк.
14. Хидмәтимиздә тәһәммүл етмәк үчүн Јеһова бизи неҹә мөһкәмләндирир?
14 Мәсиһчи хидмәтиндә тәһәммүл етмәк үчүн Јеһова бизә ҝүҹ верир. Өз руһу, тәшкилаты вә Кәламы олан Мүгәддәс Китаб васитәсилә бизи дәстәкләјир вә мөһкәмләндирир. Јеһова Онун иззәтини әкс етдирмәк истәјәнләрә ‘тәһәммүл верир’. О, бизим дуаларымызы динләјир вә сынагларын өһдәсиндән ҝәлмәк үчүн бизә мүдриклик верир (Ромалылара 15:5; Јагуб 1:5). Даһа ваҹиби исә одур ки, Јеһова таб ҝәтирә билдијимиздән артыг сынаглара јол вермир. Әҝәр Јеһоваја ҝүвәнириксә, әмин ола биләрик ки, Онун иззәтини әкс етдирмәјә давам етмәјимиз үчүн О, бизи мүтләг гуртулушла тә’мин едәҹәк (1 Коринфлиләрә 10:13).
15. Тәһәммүл етмәкдә бизә нә көмәк едир?
15 Хидмәтдә тәһәммүл етмәјимиз Аллаһын руһунун үзәримиздә олдуғуну ҝөстәрир. Мисал үчүн, тәсәввүр ет ки, кимсә сәндән евдән-евә пулсуз-парасыз чөрәк пајламағы хаһиш едиб. Сән бу ишлә шәхси вахтынын вә вәсаитинин һесабына мәшғул олмалысан. Бир гәдәр вахтдан сонра ајдын олур ки, сәнин чөрәјини алмаг истәјән чох аздыр, бә’зиләри бу ишдә сәнә, һәтта, мане дә ола биләрләр. Бәс сән бу ҹүр тапшырығы ајдан-аја, илдән-илә јеринә јетирәрдинми? Ҝүман ки, јох. Ола биләр, сән дә шәхси вахтынын вә вәсаитинин һесабына илләрлә, бәлкә дә онилләрлә хош хәбәри тәблиғ едирсән. Нәјә ҝөрә? Мәҝәр буну етмәјә сәни Јеһоваја олан мәһәббәтин тәшвиг етмирми? Мәҝәр сәнин сә’јләринә Өз руһу васитәсилә хејир-дуа верән вә хидмәтдә тәһәммүл етмәјинә көмәк едән Јеһова дејилми? Шүбһәсиз ки, бу беләдир!
Ҝөрдүјүмүз ишләр унудулмајаҹаг
16. Хидмәтдә тәһәммүл етмәк бизим үчүн вә бизи динләјәнләр үчүн нә демәкдир?
16 Јени Әһдин хидмәт үчүн ачдығы имканлар мисилсиз бир ән’амдыр (2 Коринфлиләрә 4:7). Ејнилә, бүтүн өлкәләрдә Аллаһын мүасир хидмәтчиләринин јеринә јетирдији мәсиһчи хидмәти дә олдугҹа гијмәтлидир. Сән дә хидмәтиндә тәһәммүл етсән, Павелин Тимотејә јаздығы кими, «һәм өзүнү, һәм дә сәнә гулаг асанлары хилас едәрсән» (1 Тимотејә 4:16). Бу барәдә бир даһа фикирләш. Тәблиғ етдијин хош хәбәр сајәсиндә инсанлар әбәди јашамаг имканына малик ола биләрләр. Руһани ҹәһәтдән көмәк етдијин инсанларла мөһкәм дост да ола биләрсән. Тәсәввүрүнә ҝәтир, Аллаһ һаггында билијә јијәләнмәкдә көмәк етдијин инсанларла Ҹәннәтдә әбәди јашамаг нә гәдәр севинҹ ҝәтирәҹәк! Сөзсүз, һәмин адамлар онлара көмәк етмәк үчүн ҝөстәрдијин сә’ји һеч вахт унутмајаҹаглар. Бу, доғрудан да әсл мәмнунлуг ҝәтирәҹәк.
17. Нәјә ҝөрә јашадығымыз дөвр бәшәр тарихиндә мисилсиз бир дөврдүр?
17 Сән бәшәр тарихинин мисилсиз бир дөврүндә јашајырсан. Хош хәбәр, Аллаһдан тәҹрид олунмуш бәшәријјәт арасында бир даһа тәблиғ олунмајаҹаг. Вахт варды Нуһ да бу ҹүр инсанларын арасында јашајырды вә онларын мәһвинин ҹанлы шаһиди олду. Өзүнүн вә аиләсинин хилас олмасы үчүн ҝәми тикмәклә Аллаһын ирадәсини сәдагәтлә јеринә јетирдијини билмәк, ҝәрәк ки, ону чох севиндирирди (Ибраниләрә 11:7). Сән дә бу ҹүр севинҹ һиссини дуја биләрсән. Әҝәр инди Падшаһлыг иши үчүн әлиндән ҝәләни едирсәнсә, онда, артыг јени дүнјада оларкән архаја дөнүб бу сон ҝүнләр әрзиндә етдијин ишләрә баханда дујаҹағын севинҹ барәдә дүшүн.
18. Јеһова хидмәтчиләрини нәјә әмин едир вә неҹә руһландырыр?
18 Ҝәлин Јеһова Аллаһын иззәтини әкс етдирмәјә там гәтијјәтли олаг. Биз буну әбәди олараг унутмајаҹағыг. Ҝөрдүјүмүз ишләри Јеһова да унутмур. Мүгәддәс Китаб бизи руһландырыр: «Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун. Лакин арзу едирик ки, һәр бириниз, үмидин вердији там е’тимада наил олмаг үчүн сона гәдәр ејни сә’ји ҝөстәрсин ки, Сиз тәнбәл олмајасыныз, амма вә’д олунанлары иман вә сәбирлиликлә мирас аланлардан нүмунә ҝөтүрәсиниз» (Ибраниләрә 6:10-12).
Изаһ едә биләрсинизми?
• Мәсиһчиләр Аллаһын иззәтини неҹә әкс етдирирләр?
• Аллаһын халгыны сусдурмаг үчүн Шејтан һансы үсуллара әл атыр?
• Аллаһын руһунун үзәримиздә олдуғуну нә сүбут едир?
[9-ҹу сәһифәдәки шәкил]
Мусанын үзү Аллаһын иззәтини әкс етдирирди.
[10 вә 11-ҹи сәһифәләрдәки шәкилләр]
Биз Јеһова Аллаһын иззәтини хидмәтимиздә әкс етдиририк.