«Ајыг дурун»
«Һәр шејин ахыры јахындыр. ...Дуа етмәк үчүн ајыг дурун» (1 ПЕТ. 4:7).
1. Исанын тәлимләринин башлыҹа мөвзусу нә иди?
ИСА МӘСИҺ јер үзүндә јашајанда онун тәлимләринин башлыҹа мөвзусу Аллаһын Падшаһлығы иди. Бу Падшаһлыг васитәсилә Јеһова Өз али һөкмранлығына бәраәт газандыраҹаг вә адыны тәгдис едәҹәк. Буна ҝөрә дә Иса шаҝирдләринә: «Сәлтәнәтин ҝәлсин. Ҝөјдә олдуғу кими, јердә дә Сәнин ирадән олсун»,— дејә Аллаһа дуа етмәји өјрәдирди (Мат. 4:17; 6:9, 10). Бу сәмави һөкумәт чох тезликлә Шејтанын системини мәһв едәҹәк, сонра исә Аллаһын ирадәсинин бүтүн јер үзүндә јеринә јетирилмәсинин гајғысына галаҹаг. Даниелин пејғәмбәрлик етдији кими, Аллаһын Падшаһлығы «бүтүн әввәлки [буҝүнкү] падшаһлыглары әзиб-дағыдаҹаг, өзү исә әбәди галаҹаг» (Дан. 2:44).
2. а) Исанын давамчылары онун Падшаһлыг һакимијјәтиндә иштирак етдијини неҹә сезә биләҹәкдиләр? б) Бу әламәт даһа нәјә ишарә едәҹәкди?
2 Аллаһын Падшаһлығынын ҝәлмәси Исанын давамчылары үчүн бөјүк әһәмијјәт кәсб едирди, буна ҝөрә ондан сорушдулар: «Сәнин ҝәлишинә [«иштиракына», ЈД] вә дөврүн сонуна әламәт нә олаҹаг?» (Мат. 24:3). Исанын Падшаһлыг һакимијјәтиндә иштиракы јер үзүнүн сакинләри үчүн ҝөзәҝөрүнмәз олаҹагды, бу сәбәбдән ҝөрүнән әламәт тәгдим олунмалы иди. Һәмин әламәт Мүгәддәс Јазыларда пејғәмбәрлик едилмиш мүхтәлиф һадисәләрдән ибарәт олаҹагды. Буна ҝөрә Исанын һәмин дөврдә јашајаҹаг давамчылары онун ҝөјләрдә артыг һөкмранлыг етмәјә башладығыны сезә биләҹәкдиләр. Һәмчинин бу, һал-һазырда јер үзүндә һөкм сүрән вә Мүгәддәс Китабда бу пис системин ‘ахыр ҝүнләри’ адланан дөврүн башланғыҹына ишарә едәҹәкди (2 Тим. 3:1-5, 13; Мат. 24:7-14).
Ахыр ҝүнләрдә ајыг дурун
3. Нәјә ҝөрә мәсиһчиләр ајыг дурмалыдырлар?
3 Һәвари Петер јазмышдыр: «Һәр шејин ахыры јахындыр. Беләликлә, ағлынызы башыныза јығын вә дуа етмәк үчүн ајыг дурун» (1 Пет. 4:7). Исанын давамчылары онун Падшаһлыг һакимијјәтиндә иштирак етдијини ҝөстәрән дүнја һадисәләрини мүшаһидә едәрәк ајыг дурмалы идиләр. Бу пис системин сону јахынлашдыгҹа онлар ајыг дурмаг үчүн даһа чох сәј ҝөстәрмәли идиләр. Иса шаҝирдләринә демишди: «Ојаг дурун. Чүнки ев саһибинин [Шејтан дүнјасына һөкм етмәк үчүн] нә вахт ҝәләҹәјини... билмәзсиниз» (Марк 13:35, 36).
4. Шејтан дүнјасына мәнсуб олан инсанларла Јеһованын хидмәтчиләринин бахышлары арасындакы фәрги ҝөстәрин. (Һәмчинин чәрчивәјә бахын.)
4 Үмуми ҝөтүрдүкдә, инсанлар Шејтанын һакимијјәти алтындадырлар вә онлар дүнјада баш верән һадисәләрин мәнасына диггәт јетирмирләр. Онлар Мәсиһин Падшаһлыг һакимијјәтиндә иштирак етдијини анламырлар. Лакин Мәсиһин һәгиги давамчылары ајыг галмағын сајәсиндә сон јүз ил әрзиндә баш верән һадисәләрин әсил мәнасыны баша дүшә билмишләр. 1925-ҹи илдә Јеһованын Шаһидләри анладылар ки, Биринҹи Дүнја мүһарибәси вә онун ардынҹа ҝәлән һадисәләр Мәсиһин 1914-ҹү илдән ҝөјләрдә падшаһлыг етмәјә башладығына әмин олмаг үчүн кифајәт гәдәр әсас верир. Беләликлә, Шејтанын һакимијјәти алтында олан бу пис системин ахыр ҝүнләри башлады. Бир чох диггәтҹил инсанлар, мәнасыны анламасалар да, Биринҹи Дүнја мүһарибәсиндән өнҹә вә ондан сонракы дөврүн кәскин фәргини ајдын ҝөрүрләр. («Сәбатсызлыг дөврүнүн башланғыҹы» адлы чәрчивәјә бах.)
5. Нәјә ҝөрә даим ајыг галмағымыз чох ваҹибдир?
5 Тәхминән сон јүз ил әрзиндә дүнјада баш верән дәһшәтли һадисәләр ахыр ҝүнләрдә јашадығымызы ҝөстәрир. Јеһованын Мәсиһә ҝүҹлү мәләкләри илә Шејтан системинә гаршы чыхмаг үчүн әмр вермәсинә чох аз вахт галыб (Вәһј 19:11-21). Һәгиги мәсиһчиләрә ојаг дурмаг тапшырығы верилиб. Беләликлә, бу системин сонуну сәбирсизликлә ҝөзләдијимиз әрәфәдә буну даим етмәк чох ваҹибдир (Мат. 24:42). Биз ајыг галмалы вә Мәсиһин рәһбәрлији алтында бүтүн дүнјада ҝөрдүјүмүз хүсуси бир иши баша чатдырмалыјыг.
Үмумдүнја иши
6, 7. Сон ҝүнләр әрзиндә Падшаһлығын тәблиғ иши неҹә инкишаф етмишдир?
6 Пејғәмбәрлик едилмишди ки, Јеһованын хидмәтчиләринин јеринә јетирмәли олдуглары иш бу пис системин сон ҝүнләриндә јашадығымызы ҝөстәрән әламәтин бир һиссәси олаҹаг. Иса ахыр ҝүнләрдә баш верәҹәк мүхтәлиф һадисәләри садалајаркән бу үмумдүнја ишини тәсвир етмишди. О өз пејғәмбәрлијинә нөвбәти ваҹиб сөзләри дә дахил етмишди: «Сәмави Сәлтәнәт һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр; вә сон о заман ҝәләҹәкдир» (Мат. 24:14).
7 Исанын бу сөзләри илә бағлы олан бәзи фактлары нәзәрдән кечирәк. 1914-ҹү илдә ахыр ҝүнләр башлајанда хош хәбәри тәблиғ едән инсанларын сајы олдугҹа аз иди. Лакин инди онларын сајы нәзәрәчарпаҹаг дәрәҹәдә артмышдыр. Бүтүн дүнјада хош хәбәри тәблиғ едән Јеһованын Шаһидләринин сајы 7 000 000-у ашмыш вә һал-һазырда 100 000-дән чох јығынҹағы тәшкил едирләр. 2008-ҹи илдә Мәсиһин өлүмүнүн Хатирә Ҝеҹәсинә исә Јеһованын Шаһидләриндән савајы 10 000 000 инсан ҝәлмишди. Өтән ил илә мүгајисәдә бу, бөјүк артымдыр.
8. Нәјә ҝөрә мүгавимәтләр тәблиғ ишинин мүвәффәгијјәтлә давам етмәсинә мане ола билмәмишдир?
8 Шејтанын «бу әсрин танрысы» олмасына бахмајараг, пис системин сону ҝәлмәздән өнҹә бүтүн халглар арасында Аллаһын Падшаһлығы һаггында һәгигәтән дә әсаслы шаһидлик верилир! (2 Кор. 4:4). Дүнјанын сијасәти, динләри, коммерсијасы, еләҹә дә онларын истифадә етдикләри тәблиғат васитәләри Шејтанын тәсири алтындадыр. Онда шаһидлик ишинин бөјүк уғур газанмасыны нә илә изаһ етмәк олар? Ону дәстәкләјән Јеһовадыр. Буна ҝөрә дә, Шејтанын бу иши дајандырмаг үчүн ҝөстәрдији бүтүн ҹәһдләрә бахмајараг, Падшаһлығын тәблиғи мөҹүзәли шәкилдә давам едир.
9. Нәјә ҝөрә демәк олар ки, руһани инкишафымыз әсил мөҹүзәдир?
9 Тәблиғ ишинин мүвәффәгијјәти, Јеһованын халгынын артымы вә руһани инкишафы, демәк олар ки, бир мөҹүзәдир. Аллаһын дәстәји олмасајды, јәни О Өз халгына рәһбәрлик вериб, ону мүдафиә етмәсәјди, тәблиғ иши гејри-мүмкүн оларды. (Матта 19:26 ајәсини оху.) Биз әмин ола биләрик ки, ҹанла-башла хидмәт едән вә ајыг дуран халгын үрәјиндә фәалијјәт ҝөстәрән Аллаһын мүгәддәс руһу сајәсиндә тәблиғ иши мүвәффәгијјәтлә баша чатдырылаҹаг «вә сон о заман ҝәләҹәкдир». Һәмин ҝүн сүрәтлә јахынлашыр.
‘Бөјүк мәшәггәт’
10. Бөјүк мәшәггәтин башланғыҹыны Иса неҹә тәсвир етмишди?
10 Индики пис системин сону ‘бөјүк мәшәггәтлә’ башлајаҹаг (Вәһј 7:14). Мүгәддәс Китабда һәмин һадисәнин нә гәдәр давам едәҹәји јазылмајыб, амма Иса демишдир: «О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр» (Мат. 24:21). Орта һесабла 50-60 милјон инсанын һәјатына сон гојмуш Икинҹи Дүнја мүһарибәси кими мәшәггәтлә мүгајисәдә үзүмүзә ҝәлән ‘бөјүк мәшәггәт’ даһа дәһшәтли олаҹаг. О өз јүксәк зирвәсинә Һар-Меҝидон мүһарибәсиндә чатаҹаг. О заман Јеһова Шејтан системинин галыгларыны јер үзүндән тамамилә силмәк үчүн мәләкләрдән ибарәт ордусуна һүҹума кечмәји әмр едәҹәк (Вәһј 16:14, 16).
11, 12. Бөјүк мәшәггәтин башланғыҹына ишарә нә олаҹаг?
11 Мүгәддәс Китаб пејғәмбәрлијиндә бөјүк мәшәггәтин биринҹи мәрһәләсинин нә заман башлајаҹағы һагда дејилмир. Лакин орада онун башланғыҹыны ҝөстәрән гејри-ади һадисәдән — јалан динин сијаси гүввәләр тәрәфиндән тамамилә мәһв едилмәсиндән данышылыр. Јалан дин Мүгәддәс Јазыларын «Вәһј» китабынын 17 вә 18-ҹи фәсилләриндә јер үзүндәки сијаси системләрлә әхлагсызлыг едән фаһишәјә бәнзәдилир. Вәһј 17:16 ајәси ҝөстәрир ки, сијаси гүввәләрин ‘фаһишәјә нифрәт едиб, ону пәришан едиб, чылпаг гојаҹаглары, әтини јејәҹәкләри вә ону одла јандыраҹаглары’ вахт тезликлә ҝәләҹәк.
12 Бу һадисәләрин вахты чатанда Аллаһ бүтүн јалан динләри мәһв етмәк нијјәтини сијаси рәһбәрләрин үрәјинә салаҹаг (Вәһј 17:17). Буна ҝөрә дә демәк олар ки, онларын мәһв едилмәси Аллаһдан олаҹаг. Аллаһын бу һөкмү Онун ирадәсинә зидд ҝедән тәлимләри узун мүддәт әрзиндә өјрәдән вә Онун хидмәтчиләрини тәгиб едән сахта динә гаршы јөнәлиб. Јеһованын садиг хидмәтчиләриндән фәргли олараг, јалан динин мәһви үмумиликдә дүнја үчүн ҝөзләнилмәз олаҹаг. Сон ҝүнләр әрзиндә Јеһованын Шаһидләри инсанлары бу һагда хәбәрдар едирләр.
13. Јалан динин сүрәтлә мәһв олаҹағына нә ишарә едир?
13 Јалан динин мәһвини ҝөрән инсанлар үчүн бу, әсил шок олаҹаг. Мүгәддәс Китаб пејғәмбәрлијиндә дејилир ки, һәтта «јерин һөкмдарлары» белә дејәҹәкләр: «Вај, вај сәнә... Чүнки сәнин мәһкәмән бир саатын ичиндә ҝәлди» (Вәһј 18:9, 10, 16, 19). Бурада истифадә олунан ‘бир саат’ ифадәси һәмин һадисәнин сүрәтлә баш верәҹәјини ҝөстәрир.
14. Јеһованын дүшмәнләри сонунҹу дәфә Онун хидмәтчиләринә һүҹум едән заман Аллаһ онларын ҹавабыны неҹә верәҹәк?
14 Биз билирик ки, јалан динин мәһвиндән аз сонра Јеһованын һөкмләрини бәјан едән хидмәтчиләрин үзәринә һүҹум олаҹаг (Јез. 38:14-16). Дүшмәнләр һүҹума кечәндә садиг халгыны мүдафиә едәҹәјинә сөз верән Јеһова илә үз-үзә ҝәлмәли олаҹаглар. О демишдир: ‘Гысганҹлығымла вә шиддәтли гәзәбимлә дејәҹәјәм. Онда биләҹәкләр ки, Рәбб Мәнәм’. (Језекел 38:18-23 ајәләрини оху.) Јеһованын Кәламында дејилир: «Сизә [садиг хидмәтчиләринә] тохунан Онун ҝөз бәбәјинә тохунмуш олур» (Зәк. 2:8). Беләликлә, дүшмәнләри бүтүн дүнјада Онун хидмәтчиләринә гаршы һүҹума кечәндә Јеһова онларын ҹавабыны верәҹәк. О һәрәкәтә кечәндә бөјүк мәшәггәтин сон мәрһәләси олан Һар-Меҝидон башлајаҹаг. Мәсиһин башчылығы алтында гүдрәтли мәләкләр ордусу Јеһованын Шејтанын дүнјасына гаршы һөкмләрини һәјата кечирәҹәк.
Бу бизә неҹә тәсир етмәлидир?
15. Бу системин сонунун јахын олдуғуну билмәк бизә неҹә тәсир ҝөстәрмәлидир?
15 Пис системин сонунун сүрәтлә јахынлашдығыны билмәк бизә неҹә тәсир етмәлидир? Һәвари Петер јазмышды: «Әҝәр бүтүн бунлар бу ҹүр мәһв едиләҹәксә, сиз неҹә инсанлар олмалысыныз? Аллаһын Ҝүнүнүн зүһуруну ҝөзләјиб, ону сүрәтләндирәрәк мүгәддәс вә Аллаһа ихласкар бир һәјат јашамалысыныз» (2 Пет. 3:11). Бу сөзләр ҝөстәрир ки, давранышымызын Аллаһын тәләбләринә ујғун олдуғуна әмин олмаг үчүн даима ојаг дурмалы вә Јеһоваја мәһәббәтимизи әкс етдирән ишләр ҝөрмәлијик. Бура сон ҝәлмәздән өнҹә Падшаһлыг һаггында хош хәбәрин тәблиғ ишиндә әлимиздән ҝәләни етмәк дахилдир. Петер һәм дә јазмышды: «Һәр шејин ахыры јахындыр. ...Дуа етмәк үчүн ајыг дурун» (1 Пет. 4:7). Дуада Јеһовадан јығынҹағы вә мүгәддәс руһу васитәсилә бизә рәһбәрлик вермәсини хаһиш едәндә Она јахынлашыр вә мәһәббәтимизи тәзаһүр етдиририк.
16. Нәјә ҝөрә Аллаһын мәсләһәтинә ҹидди сурәтдә әмәл етмәлијик?
16 Јашадығымыз тәһлүкәли зәманәдә Аллаһын Кәламындакы нөвбәти мәсләһәтә ҹидди сурәтдә әмәл етмәлијик: «Нә ҹүр һәрәкәт етдијинизә чох диггәт верин, һикмәтсиз кими јох, һикмәтли кими јашајын. Һәр фүрсәтдән истифадә един, чүнки јашадығымыз ҝүнләр шәрдир» (Ефес. 5:15, 16). Бәшәр тарихиндә һәлә һеч вахт бу гәдәр пислик олмајыб. Шејтан инсанлары Јеһованын ирадәсини јеринә јетирмәкдән јајындырмаг үчүн әлиндән ҝәлән һәр шеји едир. Биз, Аллаһын хидмәтчиләри кими, бундан хәбәрдарыг вә јол вермәк истәмирик ки, нә исә бизи Аллаһ гаршысында сәдагәтимиздән дөндәрсин. Биз һәмчинин тезликлә нә баш верәҹәјини билир, Јеһоваја архаланыр вә Онун нијјәтләринә шүбһә етмирик. (1 Јәһја 2:15-17 ајәләрини оху.)
17. Һар-Меҝидондан сағ чыханларын дирилмә заманы һансы һиссләри кечирәҹәкләрини тәсвир един.
17 О заман Аллаһын өлүләри дирилтмәк вәди һәјата кечәҹәкдир, чүнки «һәм салеһ, һәм дә салеһ олмајан өлүләрин дирилмәси олаҹагдыр» (Һәв. иш. 24:15). Мүгәддәс Китабда ајдын дејилир: «Өлүләрин дирилмәси олаҹагдыр»! Биз буна шүбһә етмирик, чүнки бу сөзләрин архасында дуран Јеһованын Өзүдүр! Јешаја 26:19 ајәсиндә вәд едилир: «Сәнин өлүләрин јашајаҹаг. ...Еј торпаг алтында јатанлар, ојанын, севинҹ нәғмәсини охујун... Рәбб дә торпагдакы өлүләри белә дирчәлдәҹәк». Илк нөвбәдә Аллаһын гәдим халгынын вәтәнинә ҝери дөнмәсинә аид олунан бу пејғәмбәрлик бизә әминлик верир ки, јени дүнјада бу сөзләр һәгиги мәнада јеринә јетәҹәк. Дирилмиш инсанлар әзизләринә говушанда неҹә дә бөјүк севинҹ олаҹаг! Бәли, Шејтан дүнјасынын сону јахындыр вә биз Аллаһын јени дүнјасынын астанасындајыг. Буна ҝөрә дә ајыг галмағымыз неҹә дә ваҹибдир!
Јадыныздадырмы?
• Исанын тәлимләринин башлыҹа мөвзусу нә иди?
• Падшаһлығын тәблиғ иши нә дәрәҹәдә вүсәт алыб?
• Ајыг дурмаг нәјә ҝөрә олдугҹа ваҹибдир?
• Һәвариләрин ишләри 24:15 ајәсиндәки вәд сәни неҹә руһландырыр?
[16 вә 17-ҹи сәһифәдәки шәкил вә чәрчивә]
СӘБАТСЫЗЛЫГ ДӨВРҮНҮН БАШЛАНҒЫҸЫ
«Сәбатсызлыг дөврү: јени дүнјадакы авантүра» («The Age of Turbulence: Adventures in a New World»). Бу, Алан Гринспенин 2007-ҹи илдә бурахдығы китабын адыдыр. О, демәк олар ки, 20 ил мүддәтиндә дөвләтин мәркәзи банк системинә нәзарәт едән Бирләшмиш Штатларын Федерал Еһтијатлар Системинин рәһбәри олмушдур. Гринспен дүнјанын 1914-ҹү илдән әввәл вә сонракы вәзијјәтинин нәзәрәчарпан фәргини тәһлил едир:
«1914-ҹү илдән әввәл мөвҹуд олан бүтүн мәлуматлардан белә нәтиҹәјә ҝәлмәк олар ки, бу илә гәдәр инсанлар вә халглар бир-бири илә үмумиликдә һөрмәтлә давраныр, һәмчинин мәдәни вә техноложи наилијјәтләр едирди; елә тәәссүрат јаранырды ки, бәшәријјәт камиллијә чата биләр. XIX әср дәһшәтли гул алверинә сон гојмушду. Адама елә ҝәлирди ки, төрәдилән вәһшиликләрин сајы ҝет-ҝедә азалыр. [...] XIX әср бојунҹа бүтүн дүнјада елми-техноложи ихтиралар сајәсиндә дәмирјоллары, телефон, електрик ишығы, кинематографија, миник автомобили вә сајмагла гуртармаг билмәјән сајсыз-һесабсыз мүхтәлиф мәишәт аваданлыглары әрсәјә ҝәлди. Тиббин инкишафы, даһа кејфијјәтли гида вә ичмәли сујун әксәријјәт үчүн әлчатан олмасы инсан өмрүнү узатды... Һамы елә дүшүнүрдү ки, инкишафын сону олмајаҹаг».
Лакин... «Биринҹи Дүнја мүһарибәси, чохлу дағынтылара сәбәб олан Икинҹи Дүнја мүһарибәси илә мүгајисәдә, әдәб-әркан вә сивилизасија бахымындан даһа виранедиҹи олду: һәмин мүһарибә инсанларын дүшүнҹәсини алт-үст етди. Биринҹи Дүнја мүһарибәсинә гәдәр, јәни бәшәријјәтин ҝәләҹәјинин азад вә мәһдудијјәтсиз ҝөрүндүјү заман јашајан инсанларын бахышлары јахшы јадымдадыр. Бу ҝүн бизим бахышларымыз бир әср өнҹә јашамыш инсанларын бахышларындан кәскин сурәтдә фәргләнир, һәм дә реаллығы әкс етдирир. Биринҹи Дүнја мүһарибәси о дөврдә јашајан инсанларын дүшүнҹә тәрзини алт-үст етдији кими, терроризм, глобал истиләшмә вә популизмин дирчәлиши һәјат кејфијјәтини јахшылашдыран глобализасија дөврүндә јашајан бизләрин дә дүшүнҹә тәрзини алт-үст едәҹәкми? Бу суалын дәгиг ҹавабыны һеч ким билмир».
Гринспен университетдә охујанда игтисадијјат профессору Бенҹамин Андерсонун (1886-1949) дедији сөзләри хатырлајыр: «Биринҹи Дүнја мүһарибәсиндән өнҹәки дүнјанын неҹә олдуғуну ҝөрән вә хатырлајан инсанлар о заманы дәрин носталжи һисси илә јада салырлар. Һәмин дөврдә артыг мөвҹуд олмајан тәһлүкәсизлик һисси һөкм сүрүрдү» («Economics and the Public Welfare»).
2006-ҹы илдә нәшр етдији «Дүнјанын мәһви» адлы китабында Ҹералд Мајер ејни гәнаәтә ҝәлир: «Адәтән дејирләр ки, тарихи һадисәләр “һәр шеји дәјишир”. Бөјүк мүһарибәјә [1914-1918] ҝәлдикдә, бу, доғрудан да белә олду. Мүһарибә һәгигәтән дә һәр шеји: тәкҹә сәрһәдләри, һөкумәтләри вә халгларын мүгәддаратыны дејил, һәмчинин о вахтдан етибарән инсанларын дүнјаја вә өзләринә олан бахышыны дәјишди. Бу да әввәлки кими тәһлүкәсиз олмајан мүасир дүнјанын јаранмасына ҝәтириб чыхарды» («A World Undone»).
[18-ҹи сәһифәдәки шәкил]
Һар-Меҝидонда мәләкләрдән ибарәт орду Јеһованын һөкмләрини иҹра едәҹәк