Мәним сөзүмә садиг галын

“Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз” (ЈӘҺЈА 8:31).

1. а) Ҝөјә гајыдаркән, Иса өзүндән сонра нә гојуб ҝетди? б) Һансы суаллары нәзәрдән кечирәҹәјик?

МӘСИҺЧИЛИЈИН баниси олан Иса Мәсиһ ҝөјә гајыдаркән, јер үзүндә онун тәрәфиндән јазылмыш китаблар, тикилмиш абидәләр вә ја топланмыш хәзинәләр гојуб ҝетмәди. О, өзүндән сонра шаҝирдләр, һәмчинин шаҝирд олмаг арзусунда оланлар үчүн хүсуси тәләбләр гојуб ҝетди. Јәһјанын Мүждәсиндән өјрәнирик ки, Иса, онун шаҝирди олмаг истәјәнләр үчүн үч зәрури тәләби гејд етмишдир. Бунлар һансы тәләбләрдир? Бу тәләбләрә мүвафиг олмаг үчүн нә етмәк лазымдыр? Вә сөзүн әсл мә’насында Мәсиһин шаҝирдләри олдуғумуза неҹә әмин ола биләрик?a

2. Јәһјанын Мүждәсиндә шаҝирдләр үчүн јазылан ваҹиб тәләбләрдән бири һансыдыр?

² Өлүмүндән тәхминән алты ај әввәл Иса Јерусәлимә ҝәлди вә Чардаглар бајрамыны гејд етмәјә топлашан халга тәблиғ етди. Бир һәфтә давам едән бајрамын орталарына јахын “халгдан бир чоху Она” иман етди. Иса тәблиғини давам етдирди вә бајрамын сон ҝүнүндә јенидән “бир чохлары Она иман етди” (Јәһја 7:10, 14, 31, 37; 8:30). Белә олдугда, Иса диггәтини иман ҝәтирән шәхсләрә јөнәлтди вә шаҝирдләр үчүн һәвари Јәһја тәрәфиндән јазылан ваҹиб бир тәләби билдирди: “Әҝәр сиз Мәним сөзүмә садиг галсаныз, һәгигәтән Мәним шаҝирдләримсиниз” (Јәһја 8:31).

3. Исанын сөзүнә садиг галмаг үчүн инсана һансы кејфијјәт лазымдыр?

³ Иса бу сөзләрлә демәк истәмирди ки, она иман едән јени инсанларын иманы әксик иди. Әксинә, о гејд етмәк истәјирди ки, һәмин инсанларын онун һәгиги шаҝирдләри олмаг имканлары вар — бунун үчүн онлар онун сөзүнә садиг галмалы вә сәбр етмәли идиләр. Онлар Исанын сөзүнү гәбул етдиләр, анҹаг онун сөзүнә садиг галмаға давам етмәләри ваҹиб иди (Јәһја 4:34; Ибраниләрә 3:14). Иса сәбр етмәји шаҝирдләри үчүн о гәдәр зәрури кејфијјәт сајырды ки, һәвариләри илә, Јәһјанын Мүждәсиндә јазылан сонунҹу сөһбәти заманы “мәним ардымҹа ҝәл” чағырышыны ики дәфә тәкрар етди (Јәһја 21:19, 22). Илк мәсиһчиләрин әксәријјәти бу ҹүр давранырды (2 Јәһја 4). Сәбр етмәкдә онлара нә көмәк едирди?

4. Илк мәсиһчиләр нәјин сајәсиндә сәбр едә билирдиләр?

⁴ Тәхминән 70 ил әрзиндә Мәсиһин садиг шаҝирди олан һәвари Јәһја мүһүм бир амили вурғулады. О, садиг мәсиһчиләри тә’рифләјәрәк деди: “Сиз ҝүҹлүсүнүз вә Аллаһын сөзү сиздә јашајыр вә сиз пис олана галиб ҝәлдиниз”. Мәсиһин һәмин шаҝирдләри Аллаһын сөзүнә садиг галараг сәбр едирдиләр, чүнки Аллаһын сөзү онларда јашајырды. Һәмин мәсиһчиләр Аллаһын сөзүнү јүксәк гијмәтләндирирдиләр (1 Јәһја 2:14, 24, И–93). Ејни тәрздә бу ҝүн дә ‘ахыра гәдәр сәбр етмәк’ үчүн, Аллаһын сөзүнүн биздә јашадығына әмин олмалыјыг (Матта 24:13). Буну неҹә етмәк олар? Ҹавабы Исанын сөјләдији мәсәлдә тапырыг.

Сөзү ешидәнләр

5. а) Мәсәлләриндән бириндә Иса торпағын һансы нөвләрини хатырлатды? б) Исанын мәсәлиндәки тохум вә торпаг нәји тәмсил едир?

⁵ Иса, тохум сәпән әкинчи барәдә мәсәл сөјләди. Бу мәсәл Маттанын, Маркын вә Луканын Мүждәсиндә јазылыб (Матта 13:1-9, 18-23; Марк 4:1-9, 14-20; Лука 8:4-8, 11-15). Мүгәддәс Китабын бу парчаларыны охујаркән диггәт јетирәҹәксән ки, мәсәлин мәғзи ондадыр ки, ејни чешид тохумлар мүхтәлиф нөв торпаға дүшүр вә бу заман фәргли мәһсул верирләр. Биринҹи һалда торпаг тапдаланмыш, икинҹи һалда дајаз, үчүнҹүдә исә тиканларла долу иди. Дөрдүнҹү һалда исә, һәр үчүндән фәргли олараг “јахшы торпаг” иди. Исанын өзүнүн изаһ етдији кими, тохум — Аллаһын Сөзүндә јазылан Падшаһлыг һаггындакы хәбәри, торпаг исә, үрәкләри мүхтәлиф вәзијјәтдә олан инсанлары тәмсил едирди. Мүхтәлиф нөв торпагла тәмсил едилән инсанларын һамысында үмуми бир шеј олса да, јахшы торпаг кими тәмсил олунан инсанларын, онлары башгаларындан фәргләндирән бир сәҹијјәви хүсусијјәти вар.

6. а) Исанын сөјләдији мәсәлдәки дөрдүнҹү нөв торпаг диҝәр үчүндән нә илә фәргләнир вә бу нөв кимләрә ишарә едир? б) Мәсиһин шаҝирдләринә лајиг тәрздә сәбр тәзаһүр етдирмәк үчүн нә лазымдыр?

⁶ Лука 8:12-15 (И–93) ајәләриндән ҝөрүрүк ки, һәр дөрд һалда инсанлар ‘сөзү ешидирләр’. Лакин ‘садиг вә тәмиз үрәји’ оланлар, сөзү садәҹә олараг ешитмәклә кифајәтләнмирләр. Онлар ону “садиг вә тәмиз үрәкдә сахлајырлар вә сәбрлә сәмәрә верирләр”. Торпаг јахшы — јумшаг вә дәрин — олдуғундан, тохум көк бурахыр, бөјүјүр вә нәтиҹәдә мәһсул верир (Лука 8:8). Буна бәнзәр тәрздә, садиг үрәкли инсанлар Аллаһын сөзүнү баша дүшүр, ону гијмәтләндирмәјә вә бүтүн һәјатларыны она ҹәмләшдирмәјә башлајырлар (Ромалылара 10:10; 2 Тимотејә 2:7). Аллаһын сөзү онларда јашајыр. Нәтиҹәдә онлар сәбр едәрәк мәһсул верирләр. Беләликлә, Мәсиһин шаҝирдләринә лајиг тәрздә сәбр етмәк үчүн, Аллаһын Сөзүнү бүтүн үрәклә јүксәк гијмәтләндирмәк олдугҹа ваҹибдир (1 Тимотејә 4:15). Бәс Аллаһын Сөзүнү бүтүн үрәклә гијмәтләндирмәји неҹә өјрәнә биләрик?

Үрәјин вәзијјәти вә дәриндән дүшүнмәк

7. Һансы фәалијјәт нөвү садиг үрәклә сых бағлыдыр?

⁷ Диггәт јетирәк ҝөрәк, Мүгәддәс Китабда садиг вә тәмиз үрәк дәфәләрлә һансы нөв фәалијјәтлә мүгајисә едилир. “Салеһин үрәји ҹаваб вермәк үчүн дәрин дүшүнүр” (Сүлејманын мәсәлләри 15:28). “Ағзымын сөзләри вә үрәјимин дүшүнҹәси сәнин өнүндә мәгбул олсунлар, ја Рәбб” (Мәзмур 19:14). “Үрәјимин дүшүнҹәси анлајыш олаҹагдыр” (Мәзмур 49:3).

8. а) Мүгәддәс Китабы охујаркән нәдән гачынмаг вә әксинә олараг, нәји етмәк лазымдыр? б) Аллаһын Сөзү үзәриндә дуа едәрәк дүшүнәндә һансы фајданы әлдә едирик? (“Һәгигәтдә сабит оланлар” адлы чәрчивәдән фикирләри дахил един.)

⁸ “Сүлејманын мәсәлләри” вә “Мәзмур” китабыны јазанлар кими, биз дә дуа едәрәк миннәтдарлыг һисси илә Аллаһын Сөзү вә ишләри үзәриндә дәриндән дүшүнмәлијик. Мүгәддәс Китабы вә ја она әсасланан нәшрләри охујаркән, бир мәнзәрәли јердән башга мәнзәрәли јерә гачан, һәр шеји фото-лентә алан, һәгигәтдә исә ҝөзү илә аз шеј ҝөрән туристләрә бәнзәмәмәлијик. Бунун әвәзинә, Мүгәддәс Китабы тәдгиг едәркән вахт ајырмалыјыг ки, белә демәк мүмкүнсә, дајанаг вә охудуғумуз һиссәләрдән һәзз алагb. Охудугларымызын үзәриндә тәләсмәдән дүшүнәндә, Аллаһын Сөзү үрәјимизә тә’сир едир, һиссләримизи риггәтә ҝәтирир вә дүшүнҹәмизи формалашдырыр. Һәмчинин бизи, ән ҝизли фикирләримизи белә, дуада Аллаһла бөлүшмәјә тәшвиг едир. Нәтиҹәдә, Јеһоваја бағлылығымыз даһа да мөһкәмләнир вә Она олан мәһәббәтимиз бизи, һәтта чәтин анларда белә Исанын ардынҹа јеримәји давам етдирмәјә тәшвиг едир (Матта 10:22). Бәли, әҝәр ахыра гәдәр садиг галмаг истәјириксә, Аллаһын дедикләри үзәриндә дәриндән дүшүнмәк чох ваҹибдир (Лука 21:19).

9. Үрәкләримизин Аллаһын Сөзүнә гаршы һәссас олдуғуна неҹә әмин ола биләрик?

⁹ Исанын сөјләдији мәсәлдә һәмчинин ҝөстәрилир ки, тохумун — Аллаһын сөзүнүн — бөјүмәсинә нә исә мане ола биләр. Буна ҝөрә дә, Исанын садиг шаҝирдләри олараг галмаг үчүн биз, 1) мәсәлдә пис торпаг кими тәгдим едилән манеәләри мүәјјән етмәли вә 2) онларын өһдәсиндән ҝәлмәк вә ја онлардан гачынмаг үчүн аддымлар атмалыјыг. Белә һалда әмин ола биләрик ки, үрәкләримиз Падшаһлыг тохумуна гаршы һәссасдыр вә мәһсул ҝәтирмәјә давам едир.

Башлары гарышыг оланлар — јол кәнарындакы торпаға бәнзәјирләр

10. Исанын сөјләдији мәсәлдәки биринҹи нөв торпағы тәсвир един вә бунун нә демәк олдуғуну изаһ един.

¹⁰ Биринҹи һалда тохумлар “јол кәнарына” дүшүр вә елә орадаҹа ‘ајаг алтында тапдаланыр’ (Лука 8:5). Тахыл тарласынын јанындан кечән јолун кәнарындакы торпаг пијадаларын даими һәрәкәтиндән тапдаланараг сәртләшмишдир (Марк 2:23). Буна бәнзәр тәрздә, вахтларыны вә гүввәләрини бу дүнјанын бош ишләринә сәрф едән инсанларын Аллаһын сөзүнә ҝөрә сәмими миннәтдарлыг һисси инкишаф етдирмәк үчүн башлары гарышыг олур. Онлар сөзү ешидир, лакин үзәриндә дүшүнмүрләр. Буна ҝөрә дә үрәкләриндә һеч бир һисс ојанмыр. Онлар сөзү севмәјә маҹал тапмырлар, чүнки “иблис ҝәлир вә иман етмәјиб, хилас олмасынлар дејә, Сөзү онларын үрәјиндән алыб апарыр” (Лука 8:12, И–93). Бунун гаршысыны алмаг мүмкүндүрмү?

11. Үрәјимизин тапдаланмыш сәрт торпаға бәнзәмәмәси үчүн нә етмәк олар?

¹¹ Үрәк јол кәнарындакы сәмәрәсиз торпаға бәнзәмәсин дејә чох шеј етмәк олар. Тапдаланмыш сәрт торпаг, әҝәр ону белләјиб, үзәриндә бир даһа ҝәзилмәсинә јол верилмәзсә, јумшаг вә сәмәрәли ола биләр. Буна бәнзәр тәрздә, Аллаһын Сөзүнүн өјрәнилмәсинә вә үзәриндә дүшүнүлмәсинә вахт ајрыларса, үрәк дә јахшы, сәмәрәли торпаг кими ола биләр. Әсас одур ки, дүнјәви ишләрә һәддиндән артыг алудә олмајаг (Лука 12:13-15). Әмин ол ки, һәјатдакы “ән үстүн дәјәрләр” үзәриндә дүшүнмәјә вахтын вар (Филипилиләрә 1:9-11).

Горхуја тәслим оланлар — дашлыг јердәки торпаға бәнзәјирләр

12. Исанын мәсәлиндәки икинҹи нөв торпагда ҹүҹәрән биткинин гурумасына әсас сәбәб нәдир?

¹² Икинҹи нөв торпаға дүшән тохум, биринҹидә олдуғу кими, торпағын үзәриндә галмыр. О көк атыр вә бөјүјүр. Ҝүнәш чыханда битки истидән гурујур. Лакин ваҹиб бир амилә диггәт јетир. Биткинин гурумасынын әсас сәбәби исти дејил. Ахы јахшы торпагда бөјүјән битки дә ҝүнәш шүаларынын тә’сиринә мә’руз галыр, лакин гурумур, әксинә, даһа јахшы инкишаф едир. Онларын арасында нәјә ҝөрә бу гәдәр фәрг вар? Исанын изаһ етдији кими, битки “торпағын дәринлији” вә “рүтубәти” олмадығындан гурујур (Матта 13:5, 6; Лука 8:6). Торпағын үст гатынын алтында олан дашлыг јер, биткијә дәрин көк салмаға имкан вермир вә битки рүтубәт тапыб, торпагда мөһкәмләнә билмир. Торпағын дәринлији олмадығы үчүн гурујур.

13. Һансы инсанлар дәринлији олмајан торпаға бәнзәјирләр вә онларын бу ҹүр давранмаларынын әсл сәбәби нәдир?

¹³ Мәсәлин бу һиссәси, “Сөзү ешитдикдә севинҹлә” гәбул едән вә “бир мүддәт” сә’јлә Исанын ардынҹа ҝедән инсанлара аиддир (Лука 8:13, И–93). “Сыхынты вә ја әзијјәт” ҝүнәшинин гызмар шүалары алтына дүшәндә, онлар горхуја о дәрәҹәдә тәслим олурлар ки, севинҹләрини итирир, әлләри јанларына дүшүр вә артыг Мәсиһин ардынҹа јеримәјә давам етмирләр (Матта 13:21). Лакин онларын горхуларынын әсл сәбәби әзијјәтләр дејил. Ахы Исанын милјонларла шаҝирдләри мүхтәлиф ҹүр сыхынты вә әзијјәтләрлә гаршылашыр, лакин сәдагәтләрини горујурлар (2 Коринфлиләрә 2:4; 7:5). Бә’зиләринин горхуја тәслим олмаларынын вә һәгигәтдән узаглашмаларынын сәбәби ондадыр ки, дашлыг јерә бәнзәјән сәрт үрәкләри онлара, инкишафетдириҹи руһани һәгигәтләрин үзәриндә кифајәт гәдәр дәриндән дүшүнмәјә имкан вермир. Нәтиҹәдә, онларын Јеһоваја вә Онун сөзүнә бәсләдикләри мәһәббәт, мүгавимәтләрә таб ҝәтирмәк үчүн олдугҹа сәтһи вә зәиф олур. Бунун гаршысыны неҹә алмаг олар?

14. Һансы аддымлары атмаг лазымдыр ки, үрәк дәринлији олмајан торпаг кими олмасын?

¹⁴ Инсан әмин олмалыдыр ки, онун үрәјиндә дәрин кәдәр, егоизм вә ја буна бәнзәр диҝәр ҝизли мәнфи һиссләр уҹбатындан дашлашма әмәлә ҝәлмәјиб. Әҝәр бу ҹүр дашлашма артыг баш верибсә, Аллаһын Сөзү өз гүввәси илә ону парчалаја биләр (Јеремја 23:29; Ефеслиләрә 4:22; Ибраниләрә 4:12). Дуа едәрәк дәриндән дүшүнмәк исә она сәбәб олур ки, “әкилән сөз” инсанын үрәјиндә көк атыр (Јагуб 1:21, И–93). Бу исә дүшкүнлүк вахтларына таб ҝәтирмәк үчүн ҝүҹ, сынаглара бахмајараг садиг галмаг үчүн исә ҹәсарәт верәҹәк.

Үрәји бүтөв олмајанлар — тиканлар арасындакы торпаға бәнзәјирләр

15. а) Исанын хатырлатдығы үчүнҹү нөв торпаг нәјә ҝөрә хүсуси диггәтә лајигдир? б) Нәтиҹәдә үчүнҹү нөв торпагла нә баш верир вә нәјә ҝөрә?

¹⁵ Тиканлар битән үчүнҹү нөв торпаг, бир чох ҹәһәтдән јахшы торпаға охшадығы үчүн хүсуси диггәтә лајигдир. Јахшы торпагда олдуғу кими, тиканлар битирән торпагда да тохум көк атыр вә бөјүјүр. Бу ики нөв торпагда биткиләр әввәлҹә ејни сәвијјәдә инкишаф едир. Сонрадан елә вәзијјәт јараныр ки, битки боғулур. Јахшы торпагдан фәргли олараг, бу торпагда тиканлар битир. Бу торпагда ҹаван битки баш галдыранда, ‘онунла бәрабәр бөјүјән’ тиканларла рәгабәт апармалы олур. Биткиләр бир мүддәт гида, ишыг вә әрази уғрунда мүбаризә апарыр, лакин нәһајәтдә тиканлар биткијә галиб ҝәлир вә ‘ону боғурлар’ (Лука 8:7).

16. а) Һансы инсанлар тикан басмыш торпаға бәнзәјир? б) Үч Мүждәдән ҝөтүрүлмүш парчалара әсасән тиканлар нәји тәмсил едир? (Һашијәјә бахын.)

¹⁶ Һансы инсанлар тикан басмыш торпаға бәнзәјир? Иса изаһ едир: “[Бу о инсанлардыр ки,] Сөзү ешидирләр, лакин ҝет-ҝедә бу һәјатын гајғылары, зәнҝинлији, зөвгләрилә боғулур вә јеткин сәмәрә вермирләр” (Лука 8:14, И–93). Әкинчинин сәпдији тохумун вә дәлиҹәнин торпагда ејни вахтда битмәсинә бәнзәр тәрздә, бә’зи инсанлар да Аллаһын Сөзүнү вә ‘һәјатын зөвгләрини’ бир араја сығышдырмаға чалышырлар. Аллаһын Сөзүндән олан һәгигәт онларын үрәјинә сәпилир, лакин һәмин һәгигәт орада башга истәкләрлә мүбаризә етмәли вә инсанын һәјатында јер тутмаг уғрунда онларла рәгабәт апармалы олур. Бу ҹүр инсанларын символик үрәји бүтөв дејилдир (Лука 9:57-62). Бунун уҹбатындан онларын Аллаһын Сөзү үзәриндә дуа едәрәк дәриндән дүшүнмәјә кифајәт гәдәр вахтлары јохдур. Бүтүн һәјатларыны Аллаһын Сөзүнә ҹәмләшдирмәдикләри үчүн, ону бүтүн үрәкләри илә гијмәтләндирмирләр. Бу исә, сәбр етмәк үчүн ваҹибдир. Руһани олмајан мәгсәдләр тәдриҹән онларын руһани марагларына о гәдәр ҝүҹ ҝәлир ки, бу инсанлар бүтүнлүклә ‘боғулурлар’c. Јеһованы бүтүн үрәји илә севмәјәнләр үчүн вәзијјәт неҹә дә кәдәрли олур! (Матта 6:24; 22:37).

17. Исанын мәсәлиндәки символик тиканлар бизи боғмасынлар дејә нә етмәлијик?

¹⁷ Әҝәр руһани шејләри мадди шејләрдән үстүн тутуругса, дүнјанын мә’јуслуглары вә зөвгләри бизи боға билмәјәҹәк (Матта 6:31-33; Лука 21:34-36). Мүгәддәс Китабы охумаға вә онун үзәриндә дәриндән дүшүнмәјә һеч заман е’тинасыз јанашмамалыјыг. Һәјатымызы баҹардығымыз гәдәр садәләшдирмәклә, дуа едиб диггәтлә дүшүнмәк үчүн хејли вахт тапарыг (1 Тимотејә 6:6-8). Аллаһын буну етмәји баҹаран хидмәтчиләри — тәшбеһләрлә десәк, мәһсул ҝәтирән биткинин даһа чох гидасы, ишығы вә әразиси олсун дејә, тиканлары торпагдан көкү гарышыг чыхаранлар — Јеһованын хејир-дуаларыны әлдә едирләр. 26 јашлы Сандра бу сөзләри дејир: “Һәгигәтдә алдығым хејир-дуалар үзәриндә дүшүнәндә дәрк едирәм ки, дүнја буна бәнзәр һеч бир шеј тәклиф едә билмәз!” (Мәзмур 84:11).

18. Мәсиһчиләрә лајиг тәрздә Аллаһын сөзүнә неҹә садиг галараг, сәбр едә биләрик?

¹⁸ Ајдын шәкилдә ҝөрүрүк ки, Аллаһын сөзү бизләрдән һәр биримиздә — ҝәнҹләрдә вә јашлыларда — јашадығымыз мүддәтдә, Онун сөзүнә садиг галаҹаг вә Мәсиһин шаҝирдләринә лајиг тәрздә сәбр едәҹәјик. Буна ҝөрә дә ҝәлин диггәт јетирәк ки, символик үрәјимизин торпағы һеч заман сәрт, дајаз вә ја тикан басмыш јох, јумшаг вә дәрин олсун. Белә олан һалда бүтүн һәјатымызы Аллаһын Сөзүнә ҹәмләшдирә биләр вә ‘сәбрлә сәмәрә верәрик’ (Лука 8:15).

[Һашијәләр]

Сиз неҹә ҹаваб верәрдиниз?

• Нәјә ҝөрә Исанын ‘сөзүнә садиг галмалыјыг’?

• Аллаһын сөзү үрәјимиздә јашасын дејә нә етмәлијик?

• Исанын хатырлатдығы дөрд нөв торпаг һансы инсанлары тәмсил едир?

• Аллаһын сөзү үзәриндә дәриндән дүшүнмәк үчүн вахты неҹә тапа биләрдиниз?

[20-ҹи сәһифәдәки чәрчивә/шәкил]

ҺӘГИГӘТДӘ САБИТ ДУРАНЛАР

АРТЫГ узун илләр Мәсиһин шаҝирди оланларын әксәријјәти ‘һәгигәтдә сабит’ дурдугларыны илдән-илә сүбут едирләр (2 Петер 1:12). Сабитликләрини горумагда онлара нә көмәк едир? Онларын дедикләринә диггәт јетирәк.

“Һәр ҝүнүмү Мүгәддәс Китабы охумагла вә дуа етмәклә баша вурурам. Сонра охудуғумун үзәриндә дүшүнүрәм” (Ҹин, вәфтиз олунма тарихи 1939-ҹу ил).

“Јүксәк мөвгејә саһиб олан Јеһованын бизи бу гәдәр дәриндән севдијини дүшүнәндә, раһатлыг дујур вә садиг галмаг үчүн ҝүҹ әлдә едирәм” (Патрисија, вәфтиз олунма тарихи 1946-ҹы ил).

“Мүгәддәс Китабы чалышганлыгла өјрәнмәк вә диггәтими ‘Аллаһын дәрин дүшүнҹәләринә’ ҹәмләшдирмәк, Јеһоваја ибадәт етмәкдә мәнә ҝүҹ верир” (1 Коринфлиләрә 2:10) (Анна, вәфтиз олунма тарихи 1939-ҹу ил).

“Мән Мүгәддәс Китабы вә она әсасланан нәшрләри охујурам ки, үрәјими вә мәни һәрәкәтә ҝәтирән һиссләри тәдгиг едим” (Зелда, вәфтиз олунма тарихи 1943-ҹү ил).

“Ҝәзинәрәк дуада Јеһова илә сөһбәт едә билдијим — садәҹә олараг Она һиссләрими сөјләјә билдијим вахтлар мәним үчүн ән ҝөзәл вахтлардыр” (Ралф, вәфтиз олунма тарихи 1947-ҹи ил).

“Ҝүнүмү, ҝүндәлик ајәни нәзәрдән кечирмәклә вә Мүгәддәс Китабы охумагла башлајырам. Бу мәнә, ҝүн әрзиндә үзәриндә дүшүнәҹәјим јени фикирләр верир” (Мари, вәфтиз олунма тарихи 1935-ҹи ил).

“Мүгәддәс Китабын һансыса китабы ајәбәајә мүзакирә олунанда, әсл мә’нада мөһкәмләндијими һисс едирәм” (Даниел, вәфтиз олунма тарихи 1946-ҹы ил).

Аллаһын Кәламы үзәриндә дуа едәрәк дүшүнмәјә сән нә заман вахт ајырырсан? (Даниел 6:10б; Марк 1:35; Һәвариләрин ишләри 10:9).

[22-ҹи сәһифәдәки шәкил]

Руһани шејләрә үстүнлүк вермәклә, ‘сәбрлә сәмәрә верә’ биләрик.