Иманын нә дәрәҹәдә ҝүҹлүдүр?
“Иманда [“иманыныз сајәсиндә”, ЈД] сабит дурурсунуз” (2 КОРИНФЛИЛӘРӘ 1:24).
1, 2. Нәјә ҝөрә имана малик олмалыјыг вә иманымыз неҹә мөһкәмләнә биләр?
ЈЕҺОВАНЫН хидмәтчиләри билирләр ки, онлар имана малик олмалыдырлар. Әслиндә “иман етмәдән Аллаһа мәгбул олмаг... гејри-мүмкүндүр” (Ибраниләрә 11:6). Буна ҝөрә дә биз мүгәддәс руһа вә онун ҝөзәл сәмәрәсинин бир һиссәси олан имана малик олмаг үчүн дуа едәркән мүдрик давранмыш олуруг (Лука 11:13; Галатијалылара 5:22, 23). Башга мәсиһчиләрин иманыны тәглид етмәклә дә, иманымызы мөһкәмләндирә биләрик (2 Тимотејә 1:5; Ибраниләрә 13:7).
2 Әҝәр биз Аллаһын Кәламында бүтүн мәсиһчиләр үчүн ҝөстәрилән јолла гәтијјәтлә ҝетмәјә давам едириксә, иманымыз даһа да мөһкәм олаҹаг. Иманымыз, һәм дә Мүгәддәс Китабы ҝүндәлик охумағын вә Мүгәддәс Јазылары ‘садиг нөкәрбашынын’ һазырладығы нәшрләрин көмәјилә өјрәнмәјин сајәсиндә мөһкәмләнә биләр (Лука 12:42-44; Јешу 1:7, 8). Мүнтәзәм олараг мәсиһчи ҝөрүшләриндә вә конгресләрдә иштирак етмәклә, бир-биримизин иманы илә руһланырыг (Ромалылара 1:11, 12; Ибраниләрә 10:24, 25). Иманымыз, хидмәтдә инсанларла сөһбәт едән заман да мөһкәмләнир (Мәзмур 145:10-13; Ромалылара 10:11-15).
3. Мәһәббәтлә долу мәсиһчи ағсаггалларындан иманымызла бағлы һансы көмәји алырыг?
3 Мәһәббәтлә долу мәсиһчи ағсаггаллары Мүгәддәс Јазыларын көмәјилә мәсләһәт верәрәк вә руһландырараг, иманда бәргәрар олмағымыза көмәк едирләр. Онлар коринфлиләрә мәктуб јазан һәвари Павелин малик олдуғу руһу әкс етдирирләр. Павел јазырды: “Биз, севинҹиниз үчүн сизинлә чалышырыг. Чүнки иманда [“иманыныз сајәсиндә”, ЈД] сабит дурурсунуз” (2 Коринфлиләрә 1:23, 24). Башга бир тәрҹүмәдә исә дејилир: “Биз сизинлә чалышырыг ки, сизи севиндирәк, чүнки сизин иманыныз мөһкәмдир” (“Ҹонтемпорарј Енҝлисһ Версион”). Салеһләр иман сајәсиндә јашајырлар. Һеч ким бизим әвәзимизә иман тәзаһүр етдирә билмәз, нә дә ки, бизи нөгсансызлығын садиг горујуҹулары едә билмәз. Бу бахымдан “һәр кәс өз мәс’улијјәтинин јүкүнү дашыјаҹагдыр” (Галатијалылара 3:11; 6:5).
4. Мүгәддәс Китабда Аллаһын садиг хидмәтчиләри һаггында јазыланлар иманда мөһкәмләнмәмизә неҹә көмәк едир?
4 Мүгәддәс Јазыларда имана малик олан чохлу инсанлар һаггында бәһс едилир. Ола билсин, онларын нәзәрә чарпан бир чох ишләри бизә мә’лумдур, бәс биз онларын өмүрләри боју, узун мүддәт әрзиндә ҝүнбәҝүн ҝөстәрдикләри иман һаггында билирикми? Бизим шәраитимизә бәнзәр шәраитләрдә онларын имана әсасән неҹә даврандыглары үзәриндә дәриндән дүшүнмәк, бизим дә иманда бәргәрар олмағымыза көмәк едә биләр.
Иман бизә ҹәсарәт верир
5. Мүгәддәс Јазылар, Аллаһын Кәламыны ҹәсарәтлә бәјан етмәкдә иманын бизә ҝүҹ вердијини неҹә ҝөстәрир?
5 Аллаһын Кәламыны ҹәсарәтлә бәјан етмәкдә иман бизә ҝүҹ верир. Һанок Аллаһын һөкмүнүн јеринә јетәҹәјини габагҹадан ҹәсарәтлә хәбәр верирди. О дејирди: “Будур, Рәбб он минләрҹә мүгәддәсләри илә ҝәлди ки, бүтүн инсанлара һөкм етсин вә араларында аллаһсызларын һамысыны Аллаһа һөрмәт етмәдән ҝөрдүкләри бүтүн аллаһсыз ишләр вә аллаһсыз ҝүнаһкарларын Она гаршы сөјләдикләри бүтүн сәрт сөзләр үчүн ифша етсин” (Јәһуда 14, 15). Бу сөзләрә ҝөрә, Һанокун аллаһсыз дүшмәнләри, шүбһәсиз ки, ону өлдүрмәк истәјирдиләр. Лакин о, горхмадан иманла данышырды вә Аллаһ ону “ҝөтүрдү”. Ҝөрүнүр, Һанок өлүм габағы әзијјәт чәкмәдән өлүм јухусуна ҝетди (Јарадылыш 5:24, МКШ; Ибраниләрә 11:5). Бизим үчүн бу ҹүр мө’ҹүзәләр едилмәсә дә, Јеһова, Онун Кәламыны иманла вә ҹәсарәтлә бәјан едә билмәмиз үчүн етдијимиз дуалара ҹаваб верир (Һәвариләрин ишләри 4:24-31).
6. Аллаһдан алдығы иман вә ҹәсарәт Нуһа неҹә көмәк едирди?
6 Нуһ “өз аиләсини хилас етмәк үчүн” иман васитәсилә “ҝәми һазырлады” (Ибраниләрә 11:7; Тәквин 6:13-22). Нуһ, Аллаһын хәбәрдарлығыны өз мүасирләринә ҹәсарәтлә бәјан едәрәк, “салеһлик тәблиғчиси” кими дә хидмәт едирди (2 Петер 2:5). Јәгин ки, инсанлар Нуһун јахынлашмагда олан Туфан һаггында дедикләринә истеһза едирдиләр. Ејнилә бу ҝүн биз дә бә’зиләринә Мүгәддәс Јазылардан индики системин тезликлә мәһв едиләҹәјинә даир сүбутлар ҝәтирдикдә, онлар бизә истеһза едирләр (2 Петер 3:3-12). Анҹаг биз бу барәдә Һанок вә Нуһ кими, Аллаһдан алдығымыз иман вә ҹәсарәт сајәсиндә тәблиғ едә билирик.
Иман бизи сәбирли едир
7. Ибраһим вә башгалары иман вә сәбри неҹә тәзаһүр етдирирдиләр?
7 Бизә, хүсусилә дә бу пис системин сонуну ҝөзләдијимиз бир вахтда иман вә сәбир лазымдыр. “Вә’д олунанлары иман вә сәбирлиликлә мирас аланларын” сырасында Аллаһ горхусуна малик олан гәбилә башчысы Ибраһим дә вардыр (Ибраниләрә 6:11, 12). О, иман сајәсиндә Ур шәһәрини онун бүтүн не’мәтләри илә бирликдә тәрк етди вә Аллаһын вә’д етдији јад өлкәдә гәриб олду. Исһаг вә Јагуб да ејни вә’дин варисләри идиләр. Бунунла белә, “онларын һамысы вә’д едилмиш шејләри алмадан иманлы кими өлдү”. Иман васитәсилә “онлар даһа јахшысыны, јә’ни сәмави вәтәни” арзу едирдиләр. Аллаһ да “онлар үчүн шәһәр һазырламышдыр” (Ибраниләрә 11:8-16). Бәли, Ибраһим, Исһаг, Јагуб вә онларын Аллаһ горхусуна малик олан һәјат јолдашлары сәбрлә Аллаһын сәмави Падшаһлығыны ҝөзләјирдиләр. Онлар бу Падшаһлығын рәһбәрлији алтында јер үзүндә јашамаг үчүн дирилдиләҹәкләр.
8. Ибраһим, Исһаг вә Јагуб нәјә рәғмән сәбир вә иман тәзаһүр етдирирдиләр?
8 Ибраһим, Исһаг вә Јагуб иманларыны итирмәдиләр. Онлар Вә’д едилән дијары мирас алмадылар вә Ибраһимин зүрријјәти васитәсилә бүтүн халгларын неҹә хејир-дуа алдыгларыны да ҝөрмәдиләр (Тәквин 15:5-7; 22:15-18). Ме’мары Аллаһ олан шәһәр јүз илләр сонра мејдана ҝәлмәли олса да, бу инсанлар өмүрләри боју иман вә сәбир тәзаһүр етдирмишләр. Вә инди — Хиласкар Падшаһлығын тә’сис олундуғу бир дөврдә — биздән дә ејни шеј тәләб олунур (Мәзмур 42:5, 11; 43:5).
Иман гаршымыза ән јүксәк мәгсәдләр гојур
9. Иман инсанын мејл вә мәгсәдләринә неҹә тә’сир ҝөстәрир?
9 Садиг гәбилә башчылары һеч вахт Кән’ан дијарынын әхлагсыз һәјат тәрзини мәнимсәмирдиләр. Онларын мејл вә мәгсәдләри чох-чох јүксәк иди. Иман бизим дә гаршымыза руһани мәгсәдләр гојур вә бу мәгсәдләр шәририн — Шејтан Иблисин һакимијјәти алтында олан бу дүнја илә гајнајыб-гарышмағымыза јол вермир (1 Јәһја 2:15-17; 5:19).
10. Јусифин бу дүнјада мөвҹуд олан вәзифәләрдән даһа үстүн мәгсәдләр ҝүддүјү һарадан мә’лумдур?
10 Аллаһын рәһбәрлији сајәсиндә Јагубун оғлу Јусиф, Мисирдә әрзаг пајланмасына нәзарәт етмәјә башлады, лакин Јусиф бу дүнјанын адлы-санлы адамы олмаға ҹан атмырды. Јусиф Аллаһын вә’дләринә иман едәрәк, 110 јашында икән өз гардашларына деди: “Мән өлүрәм, амма Аллаһ мүтләг сизә нәзәр салаҹаг. О сизи бу өлкәдән Ибраһимә, Исһага вә Јагуба анд ичдији торпаға апараҹаг”. Јусиф хаһиш етди ки, ону вә’д едилмиш дијарда басдырсынлар. Өлдүкдән сонра ону мумијалајыб, Мисирдә бир табута гојдулар. Анҹаг исраиллиләр Мисир көләлијиндән азад олунан заман, Муса пејғәмбәр гајғы ҝөстәрди ки, Јусифин сүмүкләри Вә’д едилән дијарда басдырылмаг үчүн орадан чыхарылсын (Јарадылыш 50:22-26, МКШ; Чыхыш 13:19). Јусифин иманына бәнзәр иман бизи, бу дүнјада мөвҹуд олан вәзифәләрдән даһа үстүн мәгсәдләр ҝүдмәјә тәшвиг етмәлидир (1 Коринфлиләрә 7:29-31).
11. Муса, руһани мәгсәдләрә саһиб олдуғуну неҹә сүбут етди?
11 Муса, Мисирин падшаһ аиләсинин јахшы тәһсил алмыш бир үзвү кими “ҝүнаһ илә мүвәггәти олараг зөвг алмагданса, Аллаһын халгы илә әзаб чәкмәји тәрҹиһ етди” (Ибраниләрә 11:23-26; Һәвариләрин ишләри 7:20-22). Бунунла о, дүнјәви нүфуздан вә ола билсин, Мисирин һәр һансы мәшһур сәрдабәләриндән бириндә бәзәдилмиш табутда тәмтәраглы сурәтдә дәфн олунмагдан имтина етди. Мәҝәр буну “Аллаһ адамы”, Ганун әһдинин вәсатәтчиси, Јеһованын пејғәмбәри вә Мүгәддәс Китабын јазычыларындан бири олмаг шәрәфи илә мүгајисә етмәк олармы? (Езра 3:2). Сән бу дүнјада мәнсәбә чатмаға чалышырсан, јохса иман сәнин гаршына даһа јүксәк руһани мәгсәдләр гојур?
Иман һәјатда мәмнунлуг ҝәтирир
12. Иман Раһабын һәјатына неҹә тә’сир ҝөстәрди?
12 Иман инсанын гаршысында ән јүксәк мәгсәдләр гојмагла јанашы, һәјатда она мәмнунлуг да ҝәтирир. Јериһодан олан Раһаб адлы фаһишә гадын, јәгин ки, һәјатынын мә’насыз олдуғуну дүшүнүрдү. Лакин о, иман етдикдән сонра һәр шеј әһәмијјәтли дәрәҹәдә дәјишди. О ‘өз әмәлләринә [иманына] ҝөрә салеһ сајылды, [исраилли] кәшфијјатчылары гәбул етди вә башга јол илә ҝери ҝөндәрди’; бунун сајәсиндә онлар кән’анлы дүшмәнләрин әлиндән гача билдиләр (Јагуб 2:24-26). Бундан әлавә, Јеһованы һәгиги Аллаһ кими гәбул едән Раһаб өз иманыны фаһишәлијә сон гојмагла тәзаһүр етдирди (Јешу 2:9-11; Ибраниләрә 11:30, 31). О, Аллаһа инанмајан кән’анлыја дејил, Јеһованын хидмәтчисинә әрә ҝетди (Тәснијә 7:3, 4; 1 Коринфлиләрә 7:39). Раһаб Мәсиһин улу валидејни олмаг кими бөјүк шәрәфә лајиг ҝөрүлдү (1 Тарихләр 2:3-15; Рут 4:20-22; Матта 1:5, 6). О, әхлагсыз һәјат тәрзинә сон гојан бир чохлары кими, даһа бир мүкафат алаҹагдыр — јер үзүндә Ҹәннәтдә јашамаг үчүн дирилдиләҹәкдир.
13. Давуд Бат-шеба илә неҹә ҝүнаһ ишләтди, лакин о, һансы әһвал-руһијјәни тәзаһүр етдирирди?
13 Раһаб ҝүнаһлы һәјат тәрзини тәрк етдикдән сонра, еһтимал ки, салеһликлә өмүр сүрүрдү. Анҹаг артыг узун илләр иди ки, һәјатларыны Јеһоваја һәср едәнләрдән бә’зиләри ағыр ҝүнаһлара јол верирдиләр. Давуд падшаһ Бат-шеба илә зина ишләтди, онун әрини дөјүшдә өлдүртдү, сонра исә онунла евләнди (2 Самуел 11:1-27). Төвбә едәрәк вә бөјүк гәлб ағрысы кечирәрәк Давуд Јеһоваја јалварды: “Мүгәддәс Руһуну мәндән алма”. Давуд Аллаһын руһундан мәһрум едилмәмишди. О инанырды ки, Јеһова мәрһәмәтли олдуғу үчүн, ҝүнаһ үзүндән “гырылмыш вә әзилмиш үрәји хор ҝөрмәз” (Мәзмур 51:11, 17; 103:10-14). Давуд вә Бат-шеба иманлары сајәсиндә Мәсиһин улу валидејнләри олмаг шәрәфини газандылар (1 Тарихләр 3:5; Матта 1:6, 16; Лука 3:23, 31).
Иман, Аллаһын көмәк едәҹәјинә даир зәманәтлә мөһкәмләнир
14. Ҝидеон көмәјә даир һансы зәманәти алды вә бу һадисә бизим иманымыза неҹә тә’сир ҝөстәрир?
14 Иманла јеримәјимизә бахмајараг, һәрдән Аллаһын көмәк едәҹәјинә даир зәманәтә еһтијаҹ дујуруг. Бу ҹүр зәманәтә, “иман васитәсилә өлкәләр фәтһ едән” кәсләрдән бири — һаким Ҝидеон да еһтијаҹ дујурду (Ибраниләрә 11:32, 33). Мидијалылар вә онларын мүттәфигләри Исраилә басгын едән заман, Аллаһын руһу Ҝидеонун “үзәринә ҝәлди”. О, Јеһованын онунла олдуғуна даир зәманәт алмаг истәјәрәк, ахшамдан хырманда сәрилмиш гојун јунунун үзәриндә тәҹрүбә кечирмәји хаһиш етди. Биринҹи тәҹрүбәдә јалныз јунун үзәриндә шеһ әмәлә ҝәлди, јер исә гуру галды. Икинҹи тәҹрүбә заманы исә, һәр шеј әксинә олду. Көмәјә даир бу ҹүр зәманәт алараг мөһкәмләнән вә еһтијатла һәрәкәт едән Ҝидеон иманла давранды вә Исраилин дүшмәнләринә галиб ҝәлди (Һакимләр 6:33-40; 7:19-25). Гәрар гәбул едән заман Јеһованын көмәјинә зәманәт алмаг истәјириксә, бу бизим иманымызын зәиф олдуғуну ҝөстәрмир. Бундан әлавә, әҝәр гәрар гәбул едәркән Мүгәддәс Китаба вә она әсасланан нәшрләрә мүраҹиәт едириксә, һәмчинин мүгәддәс руһун рәһбәрлик ҝөстәрмәси үчүн дуа едириксә, бунунла иман ҝөстәрмиш олуруг (Ромалылара 8:26, 27).
15. Баракын иманы үзәриндә дүшүнмәк бизә неҹә көмәк едә биләр?
15 Һаким Баракын иманы исә, башга ҹүр мөһкәмләндирилди: о, көмәјә даир зәманәти руһландырма шәклиндә алды. Дебора адлы пејғәмбәр гадын ону тәшвиг етди ки, исраиллиләри Кән’ан падшаһы Јабинин әсарәтиндән азад етмәк үчүн тәшәббүсү өз үзәринә ҝөтүрсүн. Барак иманла вә Аллаһын көмәјинә зәманәт алараг өзү илә пис тәҹһиз олунмуш 10 мин әсҝәри дөјүшә апарды вә исраиллиләрин ҝүҹүндән гат-гат артыг олан, Сисеранын башчылыг етдији Јабинин гошунуна галиб ҝәлди. Бу гәләбәни Дебора вә Барак өз һәјәҹанландырыҹы маһныларында тәрәннүм етдирмишләр (Һакимләр 4:1–5:31). Дебора Баракы Исраил халгынын Аллаһ тәрәфиндән тә’јин олунмуш рәһбәри кими чыхыш етмәјә тәшвиг етди, о да Јеһованын ‘јадларын ордуларыны гован’ хидмәтчиләриндән бири олду (Ибраниләрә 11:34). Јеһоваја хидмәтдә һәр һансы чәтин тапшырығы јеринә јетирмәк үчүн гәтијјәтимиз чатмырса, иманла һәрәкәт едән Барака Аллаһын неҹә хејир-дуа вермәси үзәриндә дүшүнмәк, бизи һәрәкәтә тәшвиг едә биләр.
Иман сүлһ ҝәтирир
16. Ибраһим, Лутла сүлһ мүнасибәтини горумаға ҹан атараг, һансы ҝөзәл нүмунәни верди?
16 Иман бизә, Аллаһа хидмәтдә чәтин тапшырыглары јеринә јетирмәјә көмәк етмәклә бәрабәр, сүлһ вә раһатлыг да ҝәтирир. Чобанлары арасында баш верән мүбаһисә үзүндән ајрылмаг лазым ҝәлдикдә, аһыл јашлы Ибраһим өзүндән кичик олан гардашы оғлу Лута отлаглардан ән јахшысыны сечмәјә имкан верди (Тәквин 13:7-12). Бу чәтин вәзијјәтдән чыхыш јолу тапмаг үчүн, еһтимал ки, Ибраһим Аллаһдан иманла көмәк диләмишди. О, биринҹи јерә өз марагларыны гојмаг әвәзинә, һәр шеји сүлһ јолу илә һәлл етди. Әҝәр мәсиһчи гардашымызла мүбаһисәмиз јараныбса, ҝәлин, Ибраһимин ҝөстәрдији хош давраныш нүмунәсини јадда сахлајараг, иманла дуа едәк вә ‘сүлһ ахтараг’ (1 Петер 3:10-12).
17. Нә үчүн демәк олар ки, еһтимала ҝөрә, Павел, Барнаба вә Марк арасында јаранан сојуглуг сүлһ јолу илә һәлл олунду?
17 Ҝәлин ҝөрәк, мәсиһчи принсипләринә иманла риајәт едәрәк, сүлһүн олмасына биз неҹә көмәк едә биләрик. Павел икинҹи миссионер сәјаһәтинә чыхмаға һазырлашаркән, Барнаба онун Кипр вә Кичик Асијадакы јығынҹаглары јенидән бирликдә зијарәт етмәк тәклифини гәбул етди. Лакин Барнаба әмиси оғлу Маркы да өзү илә апармаг фикриндә иди. Павел разылашмады, чүнки бундан әввәл Марк Панфилијада онлардан ајрылмышды. “Кәскин мүбаһисә олду”, бу мүбаһисәјә ҝөрә Павел вә Барнаба ајрылдылар. Барнаба Марк илә бирликдә Кипрә јола дүшдү, Павел исә Силаны өзүнә јолдаш сечди вә “ҹәмијјәтләри гүввәтләндирәрәк, Сурија вә Киликијаны” долашды (Һәвариләрин ишләри 15:36-41). Ҝөрүнүр, онларын арасындакы сојуглуг вахтилә арадан галдырылмышды, белә ки, Марк Ромада Павел илә бирликдә иди вә һәвари онун һаггында илтифатла данышырды (Колослулара 4:10; Филимона 23). Павел тәхминән б. е. 65-ҹи илиндә Ромада һәбсдә оланда исә, Тимотејә демишди: “Маркы да өзүнлә ҝәтир; чүнки о мәнә хидмәт үчүн јарарлыдыр” (2 Тимотејә 4:11). Павел, еһтимал ки, Барнаба вә Марк илә мүнасибәтләри барәдә иманла дуа едирди, бу исә, “Аллаһын... сүлһү” илә бағлы олан раһатлығы ҝәтирди (Филипилиләрә 4:6, 7).
18. Еводија вә Синтихија, еһтимал ки, һансы нәтиҹәјә ҝәлдиләр?
18 Тәбиидир ки, гејри-камил олдуғумуз үчүн “һамымыз чох сәһв едирик” (Јагуб 3:2). Ики мәсиһчи гадынлар арасында ҝәрҝинлик јаранмышды вә Павел онлар һаггында јазырды: “Еводија вә Синтихијә јалварырам ки, Рәббә аид гадынлар кими, һәмфикир олсунлар... Мүждәни јајмаг үчүн ҹәһд ҝөстәрмиш бу гадынлара јардым ет” (Филипилиләрә 4:1-3). Чох еһтимал ки, Аллаһ горхусуна малик олан бу гадынлар, Матта 5:23, 24 ајәләриндә јазылмыш сөзләрә бәнзәр өјүдләри тәтбиг едәрәк, јаранан наразылығы сүлһ јолу илә һәлл етмишдиләр. Мүгәддәс Китаб принсипләрини иманла тәтбиг едәрәк, биз дә сүлһүн олмасы үчүн чох шеј едә биләрик.
Иман, һәр шејә таб ҝәтирмәјимизә көмәк едир
19. Һансы сынаг Исһаг вә Ребеканын иманыны сындырмады?
19 Иман, сыхынтылара таб ҝәтирмәјимизә дә көмәк едир. Ола билсин, аиләмизин вәфтиз олунмуш үзвү иманына шәрик олмајан бир кәслә евләнәрәк, Аллаһын ганунуна итаәтсизлик етдији үчүн чох кәдәрләнирик (1 Коринфлиләрә 7:39). Исһаг вә Ребека оғуллары Есавын Аллаһдан горхмајан гадынларла евләндији үчүн әзаб чәкирдиләр. Есавын евләндији Һет гызлары онун валидејнләринә о дәрәҹәдә ‘үрәк аҹысы олмушдулар’ ки, Ребека белә дејирди: “Һетли гызларын әлиндән һәјатымдан бездим. Әҝәр Јагуб да беләҹә бу өлкәнин гызларындан — Һетли гызлардан өзүнә арвад алса, даһа мән нијә јашајырам?” (Јарадылыш 26:34, 35; 27:46, МКШ). Лакин бу сынаг Исһаг вә Ребеканын иманыны сындырмады. Ҝәлин биз дә чәтин вәзијјәтләрлә гаршылашдығымыз заман иманымызы мөһкәм сахлајаг.
20. Наоми вә Рут имана даир бизә һансы нүмунәни вердиләр?
20 Јашлы дул гадын Наоми јәһуди иди вә о билирди ки, јәһуди гадынлардан ким исә Мәсиһин улу бабалары олаҹаг оғлан ушаглары доғмалыдыр. Анҹаг онун оғуллары өвладлары олмадан өлдүкләри үчүн, Наоминин өзү исә артыг доға билмәдијиндән, аиләсинин Мәсиһин нәсил шәҹәрәсиндә јер алаҹағына үмиди лап аз иди. Лакин онун дул галмыш ҝәлини Рут јашлы Боаза әрә ҝетди, она оғул доғду вә Мәсиһ Исанын улу валидејни олду! (Тәквин 49:10, 33; Рут 1:3-5; 4:13-22; Матта 1:1, 5). Наоми илә Рутун иманы бәлалара таб ҝәтирди вә онлара севинҹ бәхш етди. Әҝәр бәлалара рәғмән иманымызы горујуб сахлајырыгса, бизи дә гаршыда бөјүк севинҹ ҝөзләјир.
21. Иман бизә нә верир вә биз нә етмәјә гәтијјәтли олмалыјыг?
21 Сабаһкы ҝүнүн өзү илә нә ҝәтирәҹәјини билмәсәк дә, иман сајәсиндә истәнилән сынаға гаршы дура биләрик. Иман бизи ҹәсарәтли вә дөзүмлү едир, гаршымыза ән јүксәк мәгсәдләр гојур вә һәјатда мәмнунлуг ҝәтирир. Иман, башгалары илә мүнасибәтләримизә мүсбәт тә’сир ҝөстәрир вә фәлакәтләрә таб ҝәтирмәјимизә көмәк едир. Ҝәлин биз дә “иман едиб, ҹанларынын хиласына наил оланлардан” олаг! (Ибраниләрә 10:39). Севән Аллаһымыз Јеһовадан алдығымыз ҝүҹүн көмәји сајәсиндә вә Ону иззәтләндирмәк наминә ҝәлин мөһкәм иман ҝөстәрмәјә давам едәк!
Сиз неҹә ҹаваб верәрдиниз?
• Мүгәддәс Китаб, иманын бизә ҹәсарәт верә билдијини неҹә ҝөстәрир?
• Нә үчүн демәк олар ки, иман һәјатда мәмнунлуг ҝәтирир?
• Иман сүлһүн олмасына неҹә көмәк едир?
• Нә сүбут едир ки, иман сыхынтылара таб ҝәтирмәјимизә көмәк едир?
[12-ҹи сәһифәдәки шәкилләр]
Јеһованын Кәламыны бәјан етмәк үчүн, Нуһ вә Һанок иман сајәсиндә ҹәсарәт әлдә етмишдиләр.
[15-ҹи сәһифәдәки шәкилләр]
Мусанын иманына бәнзәр иман, бизи руһани мәгсәдләрә ҹан атмаға тәшвиг едир.
[16-ҹы сәһифәдәки шәкилләр]
Аллаһын көмәјинә даир әминлик Баракын, Деборанын вә Ҝидеонун иманыны мөһкәмләндирди.