Мәһәббәтин сајәсиндә ҹәсарәтлијик

«Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг руһу вермишдир» (2 ТИМОТЕЈӘ 1:7).

1, 2. а) Мәһәббәт инсаны нәјә сөвг едә биләр? б) Нәјә ҝөрә Исанын ҹәсарәти мисилсиздир?

ТӘЗӘҸӘ тојлары олмуш киши илә гадын Австралијанын шәрг саһилиндә јерләшән шәһәрдә истираһәт едир, сујун алтында үзүрдүләр. Онлар үзә чыхмаға һазырлашаркән бөјүк ағ көпәк балығы гадына һүҹум етди. Киши јолдашыны гыраға чәкәрәк ҹәсарәтлә бәдәни илә көпәк балығынын јолуну кәсди. Онун дәфн мәрасиминдә дул галмыш арвады деди: «О мәним уғрумда ҹаныны гурбан верди».

² Бәли, мәһәббәт инсаны е’ҹазкар һүнәр ҝөстәрмәјә тәшвиг едә биләр. Иса Мәсиһ демишдир: «Бир нәфәрин достлары уғрунда ҹаныны вермәсиндән даһа бөјүк мәһәббәт јохдур» (Јәһја 15:13). Бу сөзләри дејәндән һеч бир ҝүн кечмәмиш Иса өз һәјатыны јалныз бир инсанын јох, бүтүн бәшәријјәтин уғрунда гурбан верди (Матта 20:28). Иса ани шүҹаәт ҝөстәрмәклә өз һәјатыны гурбан вермәди. О, истеһзалара вә тәһгирләрә мә’руз галаҹағыны, өзүнә гаршы әдаләтсиз һөкм чыхарылаҹағыны вә дирәкдә өлдүрүләҹәјини габагҹадан билирди. Шаҝирдләрини башына ҝәләҹәк һадисәләрә һазырламаг үчүн Иса демишди: «Будур, Јерусәлимә галхырыг. Инсан Оғлу баш каһинләр вә дин алимләринин әлинә тәслим едиләҹәк. Ону өлүмә мәһкум едәҹәкләр вә Ону бүтпәрәстләрә тәслим едәҹәкләр. Она истеһза едәҹәк, Ону гамчы илә дөјәҹәк, Она түпүрәҹәк вә Ону өлдүрәҹәкләр» (Марк 10:33, 34).

3. Иса нәјә ҝөрә бөјүк ҹәсарәтә малик иди?

³ Иса нәјә ҝөрә е’ҹазкар ҹәсарәтә малик иди? Иманын вә Аллаһ горхусунун бунда бөјүк ролу олмушдур (Ибраниләрә 5:7; 12:2). Ән башлыҹасы исә Мәсиһин ҹәсарәти Аллаһа вә инсанлара бәсләдији севҝисиндән ирәли ҝәлирди (1 Јәһја 3:16). Әҝәр биз дә иман вә Аллаһ горхусу илә јанашы белә мәһәббәт инкишаф етдирсәк, Иса кими ҹәсарәтли ола биләрик (Ефеслиләрә 5:2). Бәс бу ҹүр мәһәббәти неҹә инкишаф етдирә биләрик? Бунун үчүн биз онун мәнбәјини тапмалыјыг.

«Мәһәббәт Аллаһдандыр»

4. Нә үчүн демәк олар ки, мәһәббәтин мәнбәји Јеһовадыр?

⁴ Јеһова мәһәббәтин һәм тәҹәссүмү, һәм дә онун мәнбәјидир. Һәвари Јәһја јазырды: «Севимлиләрим, бир-биримизи севәк. Чүнки мәһәббәт Аллаһдандыр вә севән һәр кәс Аллаһдан доғулуб вә Аллаһы таныјыр. Севмәјән, Аллаһы танымамышдыр, чүнки Аллаһ мәһәббәтдир» (1 Јәһја 4:7, 8). Демәли, Аллаһын мәһәббәтинә бәнзәр мәһәббәт инкишаф етдирмәк үчүн инсан дәгиг билијин сајәсиндә Јеһоваја јахынлашмалы, бу билијә әсасән һәрәкәт етмәли вә сидг-үрәкдән Аллаһа итаәт етмәлидир (Филипилиләрә 1:9; Јагуб 4:8; 1 Јәһја 5:3).

5, 6. Еркән мәсиһчиләрә Исанын мәһәббәтинә бәнзәр мәһәббәт инкишаф етдирмәкдә нә көмәк едирди?

⁵ Иса он бир садиг һәвариси илә етдији сон дуасында Аллаһы танымагла мәһәббәт инкишаф етдирмәјин арасындакы бағлылығы бу сөзләрлә ҝөстәрмишди: «Мәнә олан мәһәббәтин онларда олсун, Мән дә онларда олум дејә, Сәнин адыны онлара билдирдим вә билдирәҹәјәм» (Јәһја 17:26). Иса шаҝирдләринә өзүнүн вә Атасынын арасында олан мәһәббәтә бәнзәр мәһәббәти инкишаф етдирмәјә көмәк едирди, сөзләри вә шәхси нүмунәси илә Аллаһын адынын Онун ҝөзәл хүсусијјәтләрини тәмсил етдијини ачыглајырды. Буна ҝөрә Иса демишди: «Мәни ҝөрән, Атаны ҝөрмүш олур» (Јәһја 14:9, 10; 17:8).

⁶ Исанын мәһәббәтинә бәнзәр мәһәббәт Аллаһын мүгәддәс руһунун бәһрәсидир (Галатијалылара 5:22). Еркән мәсиһчиләр ерамызын 33-ҹү илинин Пентикост ҝүнүндә, вә’д едилмиш мүгәддәс руһу аланда Исанын тә’лимләрини хатырламагла јанашы, Мүгәддәс Јазыларын мә’насыны даһа ајдын баша дүшдүләр. Шүбһәсиз, белә билик онларын Аллаһа олан мәһәббәтини чох мөһкәмләндирди (Јәһја 14:26; 15:26). Бунун нәтиҹәси нә олду? Һәјатлары үчүн тәһлүкәли олмасына бахмајараг, онлар хош хәбәри ҹәсарәтлә вә сә’јлә тәблиғ етмәјә башладылар (Һәвариләрин ишләри 5:28, 29).

Әмәлдә ҝөстәрилән ҹәсарәт вә мәһәббәт

7. Павел вә Барнаба миссионер сәјаһәти заманы нәләрлә үзләшмишдиләр?

⁷ Һәвари Павел јазмышды: «Аллаһ бизә горхаглыг руһу дејил, гүдрәт, мәһәббәт вә нәфсә һаким олмаг руһу вермишдир» (2 Тимотејә 1:7). Павел өз тәҹрүбәсиндән ирәли ҝәләрәк данышырды. Ҝәлин бахаг, Барнаба илә миссионер сәјаһәти заманы онлар нәләрлә гаршылашдылар. Онлар Антакја, Конја, Листра вә башга шәһәрләрдә тәблиғ етмишдиләр. Һәр шәһәрдә бә’зи адамлар имана ҝәлирдиләр, диҝәрләри исә һәгигәтә мүгавимәт ҝөстәрирдиләр (Һәвариләрин ишләри 13:2, 14, 45, 50; 14:1, 5). Листра шәһәриндә јәһудиләр тәрәфиндән гызышдырылмыш бир дәстә адам Павели һәтта даша басды вә ону өлмүш саныб, шәһәрдән кәнара сүрүдү! «Лакин шаҝирдләр онун әтрафына јығылдыгда, о дурду вә шәһәрә ҝирди. Ертәси ҝүн Барнаба илә Дербејә јөнәлди» (Һәвариләрин ишләри 14:6, 19, 20).

8. Павел вә Барнабанын ҹәсарәтиндән инсанлары севдикләри неҹә ҝөрүнүр?

⁸ Бу һүҹумдан сонра Павел вә Барнаба горхуја дүшүб тәслим олдулармы? Әсла, јох! Онлар Дербедә «бир чохларыны шаҝирд етдикдән сонра, Листраја, Конјаја вә Антакјаја гајытдылар». Орадакы јени шаҝирдләр руһланмаға еһтијаҹ дујурдулар. «Биз Аллаһын Сәлтәнәтинә [Падшаһлығына] чох әзијјәтләрлә ҝирмәлијик», — дејәрәк Павел вә Барнаба онлары мөһкәмләндирирдиләр. Мәсиһин ‘гузуларына’ бәсләдикләри дәрин мәһәббәт онлары ҹәсарәтләндирирди (Һәвариләрин ишләри 14:21-23; Јәһја 21:15-17). Јени јығынҹагларда ағсаггаллар тә’јин етдикдән сонра Павел вә Барнаба дуа едиб «онлары иман етдикләри Рәббә тапшырдылар».

9. Ефесли ағсаггаллар Павелин мәһәббәтинә неҹә һај вердиләр?

⁹ Павел о гәдәр гајғыкеш вә ҹәсарәтли инсан иди ки, еркән мәсиһчиләр ону үрәкдән севирдиләр. Ефесдән ҝәлмиш ағсаггалларла ҝөрүшү заманы нә баш вердијини јадыныза салын. Һәмин шәһәрдә һәвари үч ил јашамыш вә мүгавимәтлә үзләшмишди (Һәвариләрин ишләри 20:17-31). Ағсаггаллары, онлара һәвалә едилмиш сүрүнүн гајғысына галмаға тәшвиг етдикдән сонра, Павел онларла бирҝә диз үстә чөкүб дуа етди. Сонра «һамы чох ағлады вә Павелин бојнуна сарылыб, ону өпүрдүләр. Онлары ән чох кәдәрләндирән, онун үзүнү артыг ҝөрмәјәҹәкләринә даир дедији сөзләр иди». Гардашлар Павели неҹә дә чох истәјирдиләр! Видалашмаг вахты ҝәләндә Павел вә онун јолдашлары онлары бурахмаг истәмәјән јерли ағсаггаллардан ‘өзләрини ҝүҹлә ајырдылар’ (ЈД) (Һәвариләрин ишләри 20:36–21:1).

10. Јеһованын мүасир Шаһидләри гаршылыглы мәһәббәти вә ҹәсарәти неҹә тәзаһүр етдирирләр?

¹⁰ Бизим ҝүнләрдә дә сәјјар нәзарәтчиләри, јығынҹаг ағсаггалларыны вә диҝәр мәсиһчиләри Јеһованын гојунларынын гајғысыны чәкәркән нүмајиш етдирдикләри ҹәсарәтә ҝөрә чох севирләр. Мәсәлән, вәтәндаш мүһарибәси ҝедән, јахуд тәблиғ иши гадаған едилмиш өлкәләрдә сәјјар нәзарәтчиләр вә онларын арвадлары јығынҹаглара баш чәкәркән һәјат вә азадлыглары үчүн тәһлүкә илә растлашырлар. Бир чох Шаһидләр дә һәмиманлыларыны әлә вермәдикләри вә ја руһани гиданы һарадан алдыгларыны демәдикләри үчүн әдавәтли рәһбәрләрин вә онларын тәрәфдарларынын әлиндән чох әзијјәт чәкмишләр. Хош хәбәри тәблиғ етдикләри вә ја мәсиһчи ҝөрүшләрини бурахмадыглары үчүн минләрлә Шаһид тә’гибләрә вә ишҝәнҹәләрә мә’руз галмыш, һәтта өлдүрүлмүшләр (Һәвариләрин ишләри 5:28, 29; Ибраниләрә 10:24, 25). Ҝәлин белә ҹәсарәтли баҹы-гардашларын иман вә мәһәббәтини тәглид едәк! (1 Салониклиләрә 1:6).

Севҝинизин сојумасына јол вермәјин

11. Шејтан Јеһованын хидмәтчиләри илә руһани мүһарибәдә һансы үсуллара әл атыр вә биздән нә тәләб олунур?

¹¹ Шејтан јерә атыландан бәри гәзәбини Јеһованын хидмәтчиләринин үзәринә төкүр, чүнки онлар ‘Исаја олан шәһадәтләринә бағлы галырлар’ (Вәһј 12:9, 17). Иблисин истифадә етдији үсуллардан бири тә’гибдир. Лакин чох вахт бу әкс нәтиҹә верир, чүнки мәсиһчи мәһәббәт телләри Аллаһын хидмәтчиләрини бир-бири илә даһа сых бағлајыр вә онлары даһа чох сә’ј ҝөстәрмәјә тәшвиг едир. Шејтан, һәмчинин ҝүнаһа мејлимиздән истифадә едир. Бу тәләјә дүшмәмәк үчүн башга ҹүр ҹәсарәт лазымдыр, чүнки мүбаризә бизим дахилимиздә, ‘һијләҝәр вә хәстә үрәјимиздә’ дүзҝүн олмајан арзулара гаршы ҝедир (Јеремја 17:9; Јагуб 1:14, 15).

12. Аллаһа олан мәһәббәтимизи сојутмаг үчүн Шејтан ‘бу дүнјанын руһундан’ неҹә истифадә едир?

¹² Шејтанын силаһ анбарында сахланылан ҝүҹлү силаһлардан бири дә ‘бу дүнјанын руһудур’. Дүнјанын руһу, Аллаһын мүгәддәс руһуна гаршы чыхан вә дүнјада һөкм сүрән әһвал-руһијјә вә ја тәшвигедиҹи гүввәдир (1 Коринфлиләрә 2:12). Дүнјанын руһу «ҝөзләрин еһтирасы» олан тамаһкарлығын вә вар-дөвләт һәрислијинин јајылмасына сәбәб олур (1 Јәһја 2:16; 1 Тимотејә 6:9, 10). Әшјалара вә ја пула саһиб олмагда пис бир шеј јохдур, лакин әҝәр онлар Аллаһа олан мәһәббәтимизи сыхышдырыб чыхарырса, онда Шејтан гәләбә газаныр. Дүнјанын руһунун гүввәси вә ја ‘һөкмраны’ ҝүнаһа мејлимиздән истифадә едир, о, һәмчинин хәлвәтҹә вә дајанмадан фәалијјәт ҝөстәрир. Бу руһ һава кими һәр јерә јајылыб. Үрәјинин бу дүнјанын руһуна јолухмасына јол вермә! (Ефеслиләрә 2:2, 3; Сүлејманын мәсәлләри 4:23).

13. Әхлаг тәмизлијимизи горујаркән ҹәсарәтимиз неҹә сынана биләр?

¹³ Дүнјанын пис руһуна гаршы дурмаг үчүн әхлаги мәсәләләрдә дә ҹәсарәтли олмаг лазымдыр. Мәсәлән, әдәбсиз сәһнәләр ҝөстәриләндә дуруб театрдан чыхмаг, телевизору вә ја компүтери сөндүрмәк ҹәсарәт тәләб едир. Һәмјашыдларын тәзјигинә ујмамаг вә пис достлуг әлагәләрини кәсмәк үчүн дә ҹәсарәт лазымдыр. Синиф јолдашларынын, әмәкдашларын, гоншуларын вә ја гоһумларын истеһзалары илә үзләшдикдә дә Аллаһын ганун вә принсипләринә риајәт етмәјә ҹәсарәт тәләб олунур (1 Коринфлиләрә 15:33; 1 Јәһја 5:19).

14. Үрәјимиз дүнјанын руһуна јолухубса, нә етмәлијик?

¹⁴ Буна ҝөрә дә, Јеһоваја вә руһани баҹы-гардашларымыза дујдуғумуз мәһәббәти мөһкәмләндирмәк олдугҹа ваҹибдир. Сән дә үрәјинин бу дүнјанын руһуна јолухуб-јолухмадығыны мүәјјән етмәк үчүн мәгсәдләрини вә һәјат тәрзини һәмишә јохла. Әҝәр бу руһ азҹа да олса сәнә тә’сир ҝөстәрибсә, ону үрәјиндән гопарыб чыхармаг вә ораја даһа бурахмамаг үчүн Јеһовадан дуада ҹәсарәт дилә. Јеһова белә сәмими хаһишләри әһәмијјәтсиз гојмајаҹаг (Мәзмур 51:17). Онун руһу дүнјанын руһундан олдугҹа ҝүҹлүдүр (1 Јәһја 4:4).

Сынагларын өһдәсиндән ҹәсарәтлә ҝәлирик

15, 16. Мәсиһин мәһәббәтинә бәнзәр мәһәббәт сынагларын өһдәсиндән ҝәлмәкдә бизә неҹә көмәк едир? Мисал чәкин.

¹⁵ Јеһованын хидмәтчиләри гејри-камиллијин вә гоҹалығын ҝөстәрдији тә’сирлә дә мүбаризә апармалы олурлар. Мәсәлән, бураја хәстәлик, әлиллик, руһ дүшкүнлүјү вә башга чәтинликләри аид етмәк олар (Ромалылара 8:22). Белә сынагларын өһдәсиндән ҝәлмәкдә јалныз Мәсиһин мәһәббәтинә бәнзәр мәһәббәт көмәк етмәјә гадирдир. Замбијада мәсиһчи аиләсиндә бөјүмүш Наманголванын нүмунәсинә диггәт јетирәк. О, ики јашындан әлилдир. Баҹымыз данышыр: «Мән чох утанҹаг идим, елә фикирләширдим ки, хариҹи ҝөрүнүшүмә ҝөрә инсанлар мәндән чәкинирләр. Лакин руһани гардаш вә баҹылар буна башга ҝөзлә бахмағыма көмәк етдиләр. Нәтиҹәдә утанҹаглығын өһдәсиндән ҝәлдим вә тезликлә вәфтиз олундум».

¹⁶ Наманголванын әлил арабасы олса да, о, чох вахт тозлу-торпаглы јолларда имәкләмәли олур. Буна бахмајараг о, һәр ил ән азы ики ај көмәкчи пионер кими хидмәт едир. Наманголва бир гадына тәблиғ едәндә гадыны ағламаг тутду. Нијә? Баҹымызын иман вә ҹәсарәти она чох дәрин тә’сир бағышлады. Наманголванын Мүгәддәс Китаб өјрәтдији адамлардан беши вәфтиз олунуб, бири јығынҹагда ағсаггал кими хидмәт едир. Бу, Јеһованын онун ишинә вердији бол хејир-дуанын сүбутудур. О давам едир: «Ајагларымда чох вахт шиддәтли ағрылар олур, лакин мән гојмурам ки, бу ағрылар мәни ваҹиб шејләрдән сахласын». Бу баҹы бүтүн дүнјада бәдәнләри зәиф, руһлары исә Аллаһа вә диҝәр инсанлара севҝинин сајәсиндә ҝүҹлү олан Шаһидләрин јалныз бир нүмунәсидир. Һәгигәтән дә, белә инсанлар Јеһованын ҝөзүндә ‘ҹаһ-ҹәлалдыр’! (Һаггај 2:7).

17, 18. Бир чохларына хәстәликләрә вә башга чәтинликләрә таб ҝәтирмәкдә нә көмәк едир? Јерли мисаллар ҝәтирин.

¹⁷ Хроники хәстәлик инсаны руһдан сала биләр вә һәтта депрессијаја гәрг едә биләр. Бир јығынҹаг ағсаггалы данышыр: «Бизим китабөјрәнмәдә бир баҹы шәкәрдән вә бөјрәк чатмазлығындан, диҝәри хәрчәнҝдән, икиси ағыр формалы артритдән, даһа бир баҹы исә дәри вәрәминдән вә ҝүҹлү әзәлә ағрыларындан әзијјәт чәкир. Һәрдән онлар руһдан дүшүрләр. Буна бахмајараг бу баҹылар јалныз өзләрини чох пис һисс едәндә вә ја хәстәханада јатанда ҝөрүшләри бурахырлар. Онларын һамысы хидмәтдә мүнтәзәм иштирак едир. Онлар мәнә “зәиф олдуғум заман гүввәтлијәм” дејән Павели хатырладырлар. Бу баҹыларын мәһәббәти вә ҹәсарәти мәни һејран едир. Ола билсин, онларын вәзијјәти бүтүн диггәтләрини һәјатда ән ваҹиб олан шејләрә ҹәмләшдирмәјә көмәк едир» (2 Коринфлиләрә 12:10).

¹⁸ Әҝәр сән дә һансыса хәстәлик вә ја башга бир чәтинликлә мүбаризә апарырсанса, руһ дүшкүнлүјүнүн гурбаны олмамаг үчүн ‘дурмадан дуа ет’ (1 Салоникилиләрә 5:14, 17). Әлбәттә ки, сәндә дә һәрдән руһ дүшкүнлүјү вә руһ јүксәклији олур. Амма диггәтини мүсбәт, руһани шејләрә, хүсусилә дә бизим үчүн әзиз олан Падшаһлыг үмидинә јөнәлт. Бир баҹы дејир: «Мәним үчүн хидмәт санки мәлһәмдир». О, башгалары илә хош хәбәри бөлүшмәклә никбинлијини горујур.

Мәһәббәт, јолларыны азанлара Јеһоваја гајытмаға көмәк едир

19, 20. а) Јеһоваја гајытмаг үчүн ҝүнаһ ишләдәнләрә лазыми ҹәсарәти нә верә биләр? б) Нөвбәти мәгаләдә нә мүзакирә олунаҹаг?

¹⁹ Руһани ҹәһәтдән зәифләјәнләр вә ја ҝүнаһ ишләдәнләрин чоху үчүн Јеһоваја гајытмаг бир о гәдәр дә асан олмур. Әҝәр онлар һәгигәтән дә төвбә етсәләр вә Јеһоваја мәһәббәтләрини јенидән аловландырсалар, лазыми ҹәсарәти әлдә едәҹәкләр. Бирләшмиш Штатларда јашајан Марионун нүмунәсинә бахагa. О, мәсиһчи јығынҹағыны тәрк етди, ички дүшкүнү вә наркоман олду, 20 илдән сонра исә һәбсханаја дүшдү. Марио данышыр: «Ҝәләҹәјим һагда чох дүшүнүрдүм вә Мүгәддәс Китабы јенидән охумаға башладым. Тезликлә Јеһованын кејфијјәтләри, хүсусилә дә һаггында тез-тез дуа етдијим мәрһәмәти мәним үчүн чох гијмәтли олду. Азадлыға бурахылдыгдан сонра көһнә достларымла әлагәләри кәсдим вә јығынҹаг ҝөрүшләринә ҝетмәјә башладым, тезликлә мән јенә дә јығынҹағын үзвү олдум. Мән әкдијим пис әмәлләрин нәтиҹәсини инди бәдәнимдә бичирәм, амма мәним ҝөзәл үмидим вар. Јеһованын мәнә ҝөстәрдији шәфгәт үчүн вә мәни бағышладығына ҝөрә Она һәмишә миннәтдар олаҹағам» (Мәзмур 103:9-13; 130:3, 4; Галатијалылара 6:7, 8).

²⁰ Бәли, Јеһоваја гајытмаг үчүн Марионун вәзијјәтинә охшар бир вәзијјәтлә үзләшәнләрдән сә’ј тәләб едилир. Амма онлар Мүгәддәс Китабы јенидән өјрәнмәјә, онун үзәриндә дүшүнмәјә вә дуа етмәјә башласалар, мәһәббәтләрини јенидән аловландырмаг үчүн лазыми ҹәсарәт вә гәтијјәт әлдә едәҹәкләр. Мариону, һәмчинин Падшаһлыг үмиди дә мөһкәмләндирди. Бәли, мәһәббәт, иман вә Аллаһ горхусу илә јанашы үмид дә бөјүк гүввәдир. Нөвбәти мәгаләдә дәјәрли руһани ән’амдан, үмиддән данышаҹағыг.

[Һашијә]

Ҹаваб верә биләрсинизми?

• Мәһәббәт Исаја мисилсиз дәрәҹәдә ҹәсарәтли олмагда неҹә көмәк етмишди?

• Гардашларына бәсләдикләри мәһәббәт Павел вә Барнабаја е’ҹазкар ҹәсарәт тәзаһүр етдирмәкдә неҹә көмәк етмишди?

• Шејтан мәсиһчиләрин арасында һөкм сүрән мәһәббәти позмаг үчүн һансы үсуллара әл атыр?

• Јеһоваја олан мәһәббәтимиз һансы сынагларын өһдәсиндән ҝәлмәкдә бизә ҹәсарәт верир?

[25-ҹи сәһифәдәки шәкил]

Павелин инсанлара олан мәһәббәти ишини давам етдирмәк үчүн она ҹәсарәт верирди.