“Аллаһ мәһәббәтдир”

“Севмәјән, Аллаһы танымамышдыр, чүнки Аллаһ мәһәббәтдир” (1 ЈӘҺЈА 4:8).

1-3. а) Мүгәддәс Китабда Јеһованын мәһәббәти һаггында нә дејилир вә бу фикир һансы ҹәһәтдән надирдир? б) Нәјә ҝөрә Мүгәддәс Китабда “Аллаһ мәһәббәтдир” дејилир?

ЈЕҺОВАНЫН бүтүн хүсусијјәтләри ҹәлбедиҹи, нөгсансыз вә камилдир. Лакин Јеһованын хүсусијјәтләриндән ән ҝөзәли мәһәббәтдир. Бизи Јеһоваја бу дәрәҹәдә ҹәлб едән дә мәһз бу хүсусијјәтдир. Хошбәхтликдән, мәһәббәт Аллаһын башлыҹа хүсусијјәтидир. Буну һарадан билирик?

² Мүгәддәс Китабда мәһәббәт һаггында дејиләнләр Јеһованын башга әсас хүсусијјәтләринин һеч бири һаггында дејилмир. Мүгәддәс Јазыларын һеч бир јериндә дејилмир ки, Аллаһ гүввәдир, Аллаһ әдаләт вә ја мүдрикликдир. О, бу хүсусијјәтләрә маликдир, онларын мәнбәјидир. Лакин мәһәббәт һаггында 1 Јәһја 4:8 ајәсиндә даһа дәрин бир шеј ашкар едилир: “Аллаһ мәһәббәтдир”. Бәли, мәһәббәт Јеһованын бүтүн варлығыны әһатә едир, бу, Онун шәхсијјәтинин мәғзидир. Өзүмүз үчүн буну тәхминән белә изаһ едә биләрик: Јеһова гүввәсинин сајәсиндә иш ҝөрүр; О, әдаләт вә мүдриклији рәһбәр тутур; мәһәббәт исә Ону һәрәкәтә тәшвиг едир. Бүтүн галан хүсусијјәтләрини О, мәһәббәтлә тәзаһүр етдирир.

³ Јеһованын мәһәббәтин тәҹәссүмү олдуғуну тез-тез ешитмәк олар. Буна ҝөрә дә, мәһәббәтин нә олдуғуну билмәк истәјириксә, Јеһова илә таныш олмалыјыг. Ҝәлин, Јеһованын мисилсиз мәһәббәтинин бә’зи ҹәһәтләрини нәзәрдән кечирәк.

Мәһәббәтин ән бөјүк тәзаһүрү

4, 5. а) Тарихдә мәһәббәтин ән бөјүк тәзаһүрү нәдә ҝөрүнүр? б) Нәјә ҝөрә дејә биләрик ки, Јеһова вә Онун Оғлу ән мөһкәм мәһәббәт телләри илә бир-бирләринә бағлыдырлар?

⁴ Јеһова мәһәббәтдән бизә чох шејләр бәхш етмишдир, лакин бу бәхшишләрдән бири диҝәрләриндән үстүндүр. Сөһбәт нәдән ҝедир? О, өз Оғлуну јер үзүнә ҝөндәрди ки, әзаб чәкиб, һәјатыны бизим үчүн гурбан версин. Биз һәтта бөјүк әминликлә дејә биләрик ки, бу бәхшиш тарихдә мәһәббәтин ән бөјүк тәзаһүрүдүр. Нә үчүн?

⁵ Мүгәддәс Китаб Исаны “бүтүн хилгәтин фөвгүндә дуран, илк доғулан” адландырыр (Колослулара 1:15). Јалныз буну дүшүн: Јеһованын Оғлу һәлә мадди Каинат јарадылмаздан әввәл мөвҹуд иди. Оғул Атасы илә нә гәдәр вахт бир јердә олмушдур? Алимләрин бә’зи һесабламаларына ҝөрә, Каинатын мөвҹудлуғу 13 милјард илдән аз дејил. Алимләрин бу һесабламасы доғру олса да, Јеһованын илк Оғлунун һәјатынын нә гәдәр давам етдијини тәсвир етмәк мүмкүн дејил! Бүтүн бу вахт әрзиндә о, нә илә мәшғул иди? Оғул Атасынын јанында “ме’мар” кими хидмәт етмәјә шад иди (Сүлејманын мәсәлләри 8:30; Јәһја 1:3). Јеһова вә Онун Оғлу мөвҹуд олан һәр шејин јарадылмасында бирҝә чалышырдылар. Бу неҹә дә мараглы вә хошбәхт дөвр иди! Бизләрдән ким исә, бу гәдәр узун мүддәт әрзиндә давам едән мәһәббәт телләринин нә дәрәҹәдә мөһкәм олдуғуну тәсәввүр едә биләрми? Сөзсүз ки, Јеһова Аллаһ вә Онун Оғлу ән мөһкәм мәһәббәт телләри илә бир-бирләринә бағлыдырлар.

6. Иса вәфтиз олунан заман Јеһова өз һиссләрини неҹә ифадә етди?

⁶ Буна бахмајараг, Ата Оғлуну јер үзүнә ҝөндәрди ки, о, инсан кими доғулсун. Бу, Јеһова үчүн севимли Оғлу илә үнсијјәтдән бир нечә ониллијә имтина етмәк демәк иди. О, Исанын бөјүјүб камил инсан олдуғуну сәмадан диггәтлә мүшаһидә едирди. 30 јашында икән Иса вәфтиз олунду. Бу анда Ата ҝөјдән шәхсән шәһадәтлик етди: “Бу Мәним севимли Оғлумдур, Ондан чох мәмнунам” (Матта 3:17). Исанын, әввәлҹәдән дејиләнләри неҹә садигликлә јеринә јетирдијини вә она һәвалә олунанлары иҹра етдијини ҝөрән Ата чох мәмнун иди! (Јәһја 5:36; 17:4).

7, 8. а) Ерамызын 33-ҹү илинин 14 нисан ҝүнүндә Иса нәләрә таб ҝәтирмәли олду вә о заман онун сәмави Атасы һансы һиссләри јашады? б) Нәјә ҝөрә Јеһова Оғлунун әзаб вә өлүмүнә јол верди?

⁷ Бәс Јеһова, ерамызын 33-ҹү илинин 14 нисан ҝүнүндә Исанын әлә верилдији вә аҹыглы издиһам тәрәфиндән тутулдуғу вахт һансы һиссләри јашады? Бәс Иса лаға гојулан, үзүнә түпүрүлән вә јумругланан заман неҹә? Белиндә дәрин јаралар вуран гамчы илә дөјүлән, ағаҹ дирәк үзәринә мисмарлајыб, ону тәһгир едән инсанларын гаршысында галдырылан заман неҹә? Севимли Оғлунун өлүмгабағы Атасына фәрјад етдији заман Јеһова һансы һиссләри кечирди? Бәс Иса ҹаныны тапшырыб, јарадылдығы вахтдан илк дәфә өз мөвҹудлуғуна сон гојан заман Јеһова һансы һиссләри јашады? (Матта 26:14-16, 46, 47, 56, 59, 67; 27:26, 38-44, 46; Јәһја 19:1).

⁸ Јеһованын һиссләри о гәдәр ҝүҹлүдүр ки, Оғлунун өлүмүнүн ҝәтирдији дөзүлмәз ағрылары сөзлә ифадә етмәк гејри-мүмкүндүр. Јеһованын бу һадисәјә нәјә ҝөрә јол вердијини исә ифадә етмәк олар. Бәс Атаны өзүнү бу ҹүр әзијјәтләрә дүчар етмәјә вадар едән нә иди? Јәһја 3:16 ајәсиндә Јеһова ҝөзәл бир шеји ашкар едир вә һәтта бу ајә о гәдәр ваҹибдир ки, ону “Инҹилин миниатүрдә тәсвири” адландырырлар. Орада дејилир: “Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун”. Бәли, һәрәкәтә тәшвиг едән гүввә мәһәббәт олуб. Һеч ким һеч заман белә бөјүк бир мәһәббәти тәзаһүр етдирмәмишдир.

Јеһованын бизи өз мәһәббәтинә әмин етмәси

9. Шејтан бизи нәјә инандырмаға чалышыр вә Јеһова бизи нәјә әмин едир?

⁹ Лакин бунунла бағлы ваҹиб бир суал јараныр: Ҝөрәсән, Јеһова һәр биримизи ајры-ајрылыгда севирми? Бә’зиләри, Јәһја 3:16 ајәсиндә дејилдији кими, Аллаһын бәшәријјәти үмумиликдә севдији илә разыдырлар. Лакин онлар дүшүнә биләрләр: “Аллаһ һеч заман шәхсән мәни севә билмәз”. Шејтан Иблис бизи инандырмаға чалышыр ки, Јеһова Аллаһ бизи севмир вә гијмәтләндирмир. Диҝәр тәрәфдән, өзүмүзү нә гәдәр севилмәјә лајиг олмајан вә ҝәрәксиз һесаб етсәк дә, Јеһова бизи әмин едир ки, һәр бир садиг хидмәтчисини гијмәтләндирир.

10, 11. Исанын сәрчәләр һаггында чәкдији мәсәл Јеһованын ҝөзүндә бизим гијмәтли олдуғумузу неҹә ҝөстәрир?

¹⁰ Мисал үчүн, Исанын Матта 10:29-31 ајәләриндә дедији сөзләри нәзәрдән кечирәк. Иса шаҝирдләринин нә гәдәр гијмәтли олдуғуну ҝөстәрәрәк деди: “Мәҝәр ики сәрчә гушу бир ассаријә сатылмырмы? Вә Атанызын һөкмү олмадыгда, онлардан һеч бири јерә дүшмәз. Сизин исә башыныздакы сачлар да белә сајылмышдыр. Одур ки, горхмајын; сиз бир чох сәрчәдән даһа дәјәрлисиниз”. Исаны биринҹи әсрдә динләјән кәсләр үчүн бу сөзләрин нә демәк олдуғуну нәзәрдән кечирәк.

¹¹ Исанын ҝүнләриндә јемәк мәһсулукими истифадә едилән гушлардан ән уҹузу сәрчә иди. Аз дәјәри олан бир ассаријә ики сәрчә алмаг оларды. Лакин Исанын сонрадан Лука 12:6, 7 ајәләриндә гејд етдији кими, әҝәр алыҹы ики ассари версә, онда о, ики дејил, беш сәрчә ала биләрди. Бешинҹи гушу, санки һеч бир дәјәри јох имиш кими, мүфтә верирдиләр. Ола билсин, бу сәрчәләр инсанларын ҝөзүндә дәјәрсиз иди, бәс Јарадан буна неҹә јанашырды? Иса деди: “Аллаһын јанында онлардан һеч бири [һәтта мүфтә верилән белә] унудулмамышдыр”. Исанын бу мәсәл васитәсилә нәји ҝөстәрмәк истәдијини анлајырсанмы? Әҝәр ади сәрчә Јеһованын ҝөзүндә бу гәдәр гијмәтли идисә, онда ҝөр Онун үчүн инсан нә гәдәр дәјәрли олмалыдыр! Исанын дедији кими, Јеһова бизим һаггымызда кичик тәфсилата гәдәр һәр шеји билир, һәтта башымыздакы сачлар да сајылмышдыр!

12. Нәјә ҝөрә әмин ола биләрик ки, Исанын башымыздакы сачларын белә сајылдығыны демәси шиширтмә дејилди?

¹² Исанын бу сөзләри кимә исә шиширтмә кими ҝөрүнә биләр. Лакин дирилмәјә олан үмид һаггында дүшүнәк. Ҝөр Јеһова бизи нә гәдәр јахшы танымалыдыр ки, сонра јенидән дәгигликлә јарада билсин! О, бизи о гәдәр гијмәтләндирир ки, бизим һаггымызда һәр бир тәфсилаты, бизә мәхсус мүрәккәб ҝенетик коду, һәмчинин һәјатымыз боју олан хатирәләр вә тәәссүратлар Онун јадындадыр. Бунунла мүгајисәдә сачымызы сајмаг — онларын сајы исә орта һесабла 100 миндир — Јарадан үчүн һеч бир чәтинлик төрәтмир. Исанын сөзләри һәгигәтән дә бизи әмин едир ки, Јеһова шәхсән һәр биримизин гејдинә галыр!

13. Јеһошафатла баш верән һадисә неҹә ҝөстәрир ки, гејри-камил олмағымыза бахмајараг, Јеһова бизим јахшы ҹәһәтләримизи ҝөрүр?

¹³ Мүгәддәс Китаб бизи Јеһованын мәһәббәтинә әмин едән даһа бир шеји ачыр. Јеһова биздәки јахшы шејләри ҝөрүр вә гијмәтләндирир. Мисал үчүн, јахшы падшаһ сајылан Јеһошафаты ҝөтүрәк. Падшаһ ағылсыз һәрәкәт едән заман Јеһованын пејғәмбәри она деди: “Бундан өтрү сәнин үзәриндә Рәббин гәзәби вардыр”. Неҹә дә дәһшәтли сөзләрдир! Лакин Јеһованын ҝөндәрдији хәбәр бунунла битмәди. Пејғәмбәр сонра деди: “Бунунла бәрабәр сәндә јахшы шејләр тапылды” (2 Тарихләр 19:1-3). Јеһованын һаглы гәзәби Онун ҝөзләрини тутмамышдыр, О, Јеһошафатда јахшы шејләри дә ҝөрә билди. Гејри-камил олсаг да Аллаһымызын биздә јахшы ҹәһәтләри ҝөрдүјүнү билмәк мәҝәр тәсәлли вермирми?

Јеһова “бағышлајан” Аллаһдыр

14. Әҝәр ҝүнаһ ишләтмишиксә, һансы ағыр һиссләри јашаја биләрик вә Јеһованын әфвинә нә заман үмид едә биләрик?

¹⁴ Әҝәр ҝүнаһ ишләтмишиксә, пешманчылыг вә хәҹаләт һиссләри бизи вадар едә биләр ки, артыг Јеһоваја хидмәт етмәјә лајиг олмадығымызы дүшүнәк. Лакин унутмаг лазым дејил ки, Јеһова “бағышлајан” Аллаһдыр (Мәзмур 86:5). Бәли, әҝәр биз ҝүнаһларымыздан төвбә едиб вә онлары тәкрар етмәмәк үчүн бүтүн гүввәмизлә чалышырыгса, Јеһованын әфвинә үмид бәсләјә биләрик. Ҝөрәк, Аллаһын мәһәббәтинин бу ҝөзәл ҹәһәти Мүгәддәс Китабда неҹә тәсвир едилир.

15. Јеһова ҝүнаһларымызы биздән нә гәдәр узаглашдырыр?

¹⁵ Јеһованын неҹә бағышладығыны тәсвир едәрәк мәзмурчу Давуд ајдын образдан истифадә етмишдир: “Шәрг гәрбдән нә гәдәр узагдырса, үсјанларымызы биздән о гәдәр узаглашдырды” (Мәзмур 103:12). Шәрг гәрбдән нә гәдәр узагдыр? Һансыса мә’нада шәрг гәрбдән һәмишә бөјүк мәсафәдә узаг олаҹагдыр, дүнјанын бу ики әкс нөгтәләри һеч заман растлашмајаҹаг. Бир алимин гејд етдији кими, бу ифадә “олдугҹа узаг, ағласығмаз дәрәҹәдә узаглыг” мә’насыны верир. Давудун мүгәддәс руһун рәһбәрлији алтында јаздығы сөзләрдән ҝөрүндүјү кими, Јеһова бизи бағышлајараг, ҝүнаһларымызы ағласығмаз дәрәҹәдә биздән узаглашдырыр.

16. Нәјә ҝөрә әмин ола биләрик ки, Јеһова ҝүнаһларымызы бағышладыгда, артыг бизи тәмиз саныр?

¹⁶ Нә вахтса ачыг рәнҝли парчадан ләкәни тәмизләмәли олмусанмы? Ола биләр ки, нә гәдәр сә’ј ҝөстәрсән дә, ләкә там ҝетмәмишдир. Јеһованын өз бағышламаг габилијјәтини неҹә тәсвир етдијинә диггәт јетир: “Сучларыныз гырмызы боја кими олса да, гар кими бәјаз олар; гырмызбөҹәји кими гызыл олса да, јун кими олар” (Ишаја 1:18). “Гырмызы” сөзү ал-гырмызы рәнҝә ишарә едирa. “Гызыл” түнд гырмызы рәнҝдир. Биз нә гәдәр чалышсаг да, ҝүнаһын ләкәсини тәмизләјә билмәрик. Лакин Јеһова бизим түнд вә ал-гырмызы ҝүнаһларымызы гар кими вә рәнҝ вурулмајан јун кими ағарда биләр. Буна ҝөрә дә, Јеһова ҝүнаһларымызы бағышладыгда, етдијимиз ҝүнаһларын һәјатымыз боју үзәримиздә јујулмајан ләкә кими галаҹағыны дүшүнмәк лазым дејил.

17. Јеһова һансы мә’нада ҝүнаһларымызы күрәјинин ардына атыр?

¹⁷ Өлүмҹүл хәстәликдән гуртулдугдан сонра, Һизкија өз тә’сирли миннәтдарлыг нәғмәсиндә Јеһоваја деди: “Бүтүн сучларымы күрәјинин ардына атдын” (Ишаја 38:17). Јеһова, төвбә етмиш ҝүнаһкарын ҝүнаһларыны ҝөтүрүр вә бир даһа онлары ҝөрүб, нәзәр јетирмәмәси үчүн мәҹази мә’нада, күрәјинин ардына атыр. Бир мәнбәјә әсасән бу фикри бу ҹүр вермәк олар: “Сән елә етдин ки, [ҝүнаһларым] санки јох иди”. Мәҝәр бу тәсәлли ҝәтирмирми?

18. Пејғәмбәр Мика неҹә ҝөстәрди ки, Јеһова бағышлајанда ҝүнаһларымызы бирдәфәлик кәнар едир?

¹⁸ Пејғәмбәр Мика бәрпа һаггында пејғәмбәрлик едәркән, Јеһованын төвбә етмиш халгыны бағышламаға һазыр олдуғуну әминликлә ифадә етди: “Мирасынын галығынын ҝүнаһындан ваз кечән сәнин кими Аллаһ кимдир? [...] Сән онларын бүтүн сучларыны дәнизин әнҝинликләринә атаҹагсан” (Мика 7:18, 19). Мүгәддәс Китабын јазылдығы дөврләрдә јашамыш инсанлар үчүн бу сөзләрин нә демәк олдуғуну тәсәввүр ет. “Дәнизин әнҝинликләринә” дүшән бир шеји ҝөтүрмәк мүмкүндүрмү? Миканын сөзләри ону ҝөстәрир ки, Јеһова бағышлајанда ҝүнаһларымызы бирдәфәлик кәнар едир.

Аллаһымызын дәрин шәфгәти

19, 20. а) “Шәфгәт ҝөстәрмәк” вә “јазығы ҝәлмәк” кими тәрҹүмә олунан јәһуди фе’ли һансы мә’наны верир? б) Мүгәддәс Китабда Јеһованын шәфгәти ана һиссләринин нүмунәсиндә неҹә тәсвир олунур?

¹⁹ Шәфгәт — Јеһованын мәһәббәтинин даһа бир ҹәһәтидир. Үмумијјәтлә шәфгәт нә демәкдир? Мүгәддәс Китабда шәфгәт рәһмлә чох сых бағлыдыр. Шәфгәт һаггында мә’наны бир нечә јәһуди вә јунан сөзләри чатдырыр. Мәсәлән, јәһуди фе’ли олан раһам чох вахт “шәфгәт ҝөстәрмәк” вә ја “јазығы ҝәлмәк” кими тәрҹүмә олунур. Јеһованын өзүнә тәтбиг етдији бу јәһуди сөзү “бәтн” сөзүнә јахындыр вә “ана шәфгәтини” нәзәрдә тутур.

²⁰ Мүгәддәс Китабда Јеһованын шәфгәт һиссләри ана һиссләринин нүмунәсиндә тәсвир едилир. Ишаја 49:15 ајәсиндә дејилир: “Гадын сүдәмәр ушағыны унуда биләрми ки, өз бәтнинин оғлуна аҹымасын [раһам]? Бәли, онлар унуда биләрләр, фәгәт мән сәни унутмарам”. Тәсәввүр етмәк чәтиндир ки, ана сүдәмәр ушағыны једиздирмәји вә онун гејдинә галмағы унутсун. Ахы көрпә көмәксиздир; о, ҝеҹә-ҝүндүз ана гајғысына вә диггәтинә мөһтаҹдыр. Лакин тәәссүфләр олсун ки, бә’зи аналарын рәһмсизлији барәдә, хүсусилә дә јашадығымыз “чәтин анлар”да аз ешитмирик (2 Тимотејә 3:1, 3). Анҹаг Јеһова бизи әмин едир: “Мән сәни унутмарам”. Јеһованын Өз хидмәтчиләринә бәсләдији дәрин шәфгәт ана һиссиндән, јә’ни инсана мәхсус олан ән ҝүҹлү һиссдән гат-гат ҝүҹлүдүр.

21, 22. Гәдим Мисирдә исраиллиләр һансы вәзијјәтдә идиләр вә көмәк үчүн етдикләри фәрјада Јеһова неҹә һај верди?

²¹ Севән атаја бәнзәјән Јеһова неҹә шәфгәт ҝөстәрир? Бу хүсусијјәт, Онун гәдим Исраил халгы илә давранышында өзүнү хүсусилә ајдын шәкилдә ҝөстәрир. Б. е. ә. XVI әсрин сонуна јахын милјонларла исраиллиләр гәдим Мисирдә гул идиләр. Онлара чох зүлм едилирди (Чыхыш 1:11, 14). Әзаб-әзијјәт ичиндә олан исраиллиләр Јеһоваја фәрјад едирдиләр. Шәфгәт Аллаһы неҹә һај верди?

²² Бу, Јеһоваја дәрин тә’сир бағышлады. О де­ди: “Мисирдә олан халгымын сыхынтысыны ҝөрдүм... онларын фәрјадыны ешитдим; чүнки онларын аҹыларыны билирәм” (Чыхыш 3:7). Јеһова Өз халгынын дүшдүјү әзијјәтләрә тамаша едәрәк, онларын көмәк үчүн етдикләри фәрјады е’тинасызлыгла динләјә билмәзди. Јеһова аҹыјан Аллаһдыр. Аҹымаг, јә’ни башгаларынын ағрысыны һисс етмәк баҹарығы исә шәфгәтә јахындыр. Лакин Јеһова өз халгына јалныз аҹымады, онун мүдафиәсинә галхмаға да тәшвиг олунду. Ишаја 63:9 ајәсиндә дејилир: “Севҝисиндә вә аҹымасында онлары фидијә илә гуртарды”. Јеһова “гүввәтли әллә” исраиллиләри Мисирдән азад етди (Тәснијә 4:34). Сонрадан Аллаһ халгыны сәһрада мө’ҹүзә илә гидаландырды вә бәрәкәтли торпағы онлара мирас верди.

23. а) Мәзмурчунун сөзләри бизи неҹә әмин едир ки, Јеһова ајры-ајрылыгда һәр биримизин гејдинә галыр? б) Јеһова бизә неҹә көмәк едир?

²³ Јеһова халгына јалныз үмумиликдә шәфгәт ҝөстәрмир. Севән Аллаһымыз ајры-ајрылыгда һәр биримизин гејдинә галыр. Аллаһ чәкдијимиз бүтүн әзаблардан хәбәрдардыр. Мәзмурчу јазырды: “Рәббин ҝөзләри салеһләрәдир, гулаглары онларын фәрјадларына ачыгдыр. Рәбб үрәји гырыг оланлара јахындыр вә руһу әзилмиш оланлары гуртарар” (Мәзмур 34:15, 18). Јеһова һәр биримизә ајры-ајрылыгда һансы көмәји ҝөстәрир? О, чәкдијимиз әзијјәтләрин сәбәбини мүтләг арадан галдырмыр. Лакин Јеһованын чохлу имканлары вар ки, көмәк үчүн Она јалваран кәсләрә көмәк етсин. Онун Кәламы олан Мүгәддәс Китабда дүзҝүн гәрарлар гәбул етмәјә көмәк едән сағлам вә фајдалы мәсләһәтләр вар. О, јығынҹагда руһән јеткин кишиләри тә’јин едиб. Онлар да һәмиманлыларыны мөһкәмләндирәрәк, Аллаһын шәфгәтини тәглид етмәјә чалышырлар (Јагуб 5:14, 15). “Дуаны ешидән” Кәс кими, Јеһова “Ондан диләјәнләрә Мүгәддәс Руһ” верир (Мәзмур 65:2; Лука 11:13). Бүтүн бунлар ‘Аллаһымызын үрәјинин мәрһәмәтли [шәфгәтли]’ олдуғуну ҝөстәрир (Лука 1:78).

24. Јеһованын мәһәббәтинә неҹә һај верәҹәксән?

²⁴ Сәмави Атамызын мәһәббәти үзәриндә дүшүнмәк неҹә дә валеһедиҹидир! Әввәлки мәгаләдә хатырладыг ки, Јеһова гүввәсини, әдаләтини вә мүдриклијини бизим хејримизә олараг мәһәббәтлә тәзаһүр етдирир. Бу мәгаләдә исә Јеһованын валеһедиҹи шәкилдә үмумиликдә инсанлара, ајры-ајрылыгда исә һәр бир кәсә неҹә мәһәббәт ҝөстәрдијини ҝөрдүк. Инди исә һәр биримиз өзүмүзә нөвбәти суалы вермәлијик: “Јеһованын мәһәббәтинә неҹә һај верәҹәјәм?” Аллаһы бүтүн үрәјинлә, ҹанынла, дүшүнҹәнлә вә гүввәтинлә севмәклә Онун мәһәббәтинә һај вермиш оларсан (Марк 12:29, 30). Гој јашанылмыш һәр бир ҝүн Јеһоваја даһа чох јахынлашмаға ҹошғун истәјин олдуғуну ҝөстәрсин. Вә гој мәһәббәт олан Јеһова Аллаһ сәнә даһа чох јахынлашсын вә әбәдијјәт боју сәнин достун олсун! (Јагуб 4:8).

[Һашијә]

Јадыныздадырмы?

• Һарадан билирик ки, мәһәббәт Јеһованын башлыҹа хүсусијјәтидир?

• Нәјә ҝөрә Јеһованын, Оғлуну әзаб чәкиб, һәјатыны бизим үчүн гурбан вермәси мәһәббәтин ән бөјүк тәзаһүрүдүр?

• Јеһова һәр биримизи ајры-ајрылыгда севдијинә бизи неҹә әмин едир?

• Мүгәддәс Китаб Јеһованын бағышладығыны һансы ајдын образлар васитәсилә тәсвир едир?

[28 вә 29-ҹу сәһифәләрдәки шәкил]

“Сиз бир чох сәрчәдән даһа дәјәрлисиниз”.

[Иҹазә илә]

© J. Heidecker/VIREO